1-2. Hadia mbuʼusa li si so ba Yesaya 65:16, 17?

”BÖI AWUWU!” Daʼö duho sadöni dödöda nitutunö ba gangowuloa ba zi sambua regional me döfi 2017. Ba gangowuloa sebua andrö, tafahaʼö ita ba wangoromaʼö faʼanau gölö hewaʼae na oya gabula dödöda. No öfa fakhe me no mufalua gangowuloa sebua andrö, ba lö manö tebulö tataögö gabula dödö ba gulidanö si lö sökhi andre.

² Hadia gabula dödö nitaögöu barö-barö daʼa? Hadia no mate nösi nomou mazui si fahuwu khöu? Hadia no göna ndraʼugö fökhö sabölö-bölö? Hadia tefakao waʼaurimö börö me itugu numalö ndröfimö? Hadia ötaögö gabula dödö börö me no alua khöu bencana alam, faʼalösökhi, mazui folohi? Hadia molua-lua khöu pandemi COVID-19 mazui fökhö waba tanö böʼö? Tatu tatötöna enaʼö numalö fefu wamakao andrö, lö saʼae itörö tödöda ba lö göi ifuli alua!​—Baso Yesaya 65:16, 17.

3. Hadia zinangea tafalua, ba hadia mbörö?

³ Basaki sibai waʼaurida ba götö iadaʼa, ba tola manö itugu basaki zalua khöda ba zi so miföna. (Mat. 24:21) Börö daʼö, moguna tafahaʼö ita ba wangaʼaroʼö faʼanau gölöda. Hadia mbörö? Börö me imane Yesu, ”Na anau gölömi, ba teʼorifi ami.” (Luk. 21:19) Enaʼö tola tafalua daʼö, moguna tafahaʼö ita ba duma-duma waʼanau gölö niha böʼö sanaögö abula dödö simane nitaögöda.

4. Hana wa Yehowa zi tobali duma-duma fondrege zi sökhi ba wangoromaʼö faʼanau gölö?

⁴ Haniha zi tobali duma-duma fondrege zi sökhi ba wangoromaʼö faʼanau gölö? Lowalangi Yehowa. Te tokea ndraʼugö ba wanema li simane daʼö. Hizaʼi angeragö atö: Börö me Afökha zamatörö ulidanö andre, lö manö iʼila aetu gabula dödö nitaögöda. Sindruhunia, so waʼabölö khö Yehowa ba wangasiwai fefu gabula dödöda iadaʼa. Hizaʼi, ibaloi ginötö si tefaudu ba wamalua daʼö. (Rom. 9:22) Gasa-gasa wombaloinia inötö andrö, ihalö gangetula  Yehowa ba wangoromaʼö faʼanau gölö. Datatutunö siwa ngawalö nitaögö Yehowa.

5. Hewisa wa tola teʼoʼaya döi Lowalangi, ba hewisa dödöu ba zalua andrö?

⁵ Teʼoʼaya döinia. Ba wamaigi Yehowa, tohude sibai döi niʼokhögönia ba omasi ia na lafosumange daʼö ira niha gulidanö maʼafefu. (Yes. 42:8) Hizaʼi, barö zi önö ribu fakhe andre, no teʼoʼaya döinia. (Si. 74:10, 18, 23) Ibörögö alua daʼö ba Kabu Edena. Me luo daʼö, iböbögö zi lö duhu khö Yehowa Afökha (eluahania ”Samöbögö si Lö Duhu”) wa so zi lö nibeʼenia khö Gadamo hegöi Khawa si tola mangaʼasogö khöra faʼomuso dödö. (1 Mo. 3:1-5) Iʼotarai daʼö, lö tebulö lafobahulu Yehowa wa no itayaigö waʼomuso dödö ba niha gulidanö. Abu sibai dödö Yesu me teʼoʼaya döi Namania. Börö daʼö, ifahaʼö ndra soloʼö khönia enaʼö lamane ba wangandröra, ”He Ama khöma si so ba zorugo, yateʼamoniʼö döimö.”​—Mat. 6:9.

6. Hana wa itehegö Yehowa ba niha gulidanö ba wamatörö faʼaurira samösa ba zi hauga ribu fakhe faʼara?

⁶ Ato zolawa faʼasinangeania ba wamatörö. Sindruhunia, ha Yehowa zinangea mamatörö ba zorugo hegöi ba gulidanö. Baero daʼö, no fondrege zi sökhi lalania ba wamatörö. (Fam. 4:11) Hizaʼi, iforege Afökha ba wondrönisi tödö ndra malaʼika hegöi niha gulidanö enaʼö lawaʼö tödöra wa tenga sinangea mamatörö Lowalangi. Tebai muʼasiwai gabula dödö andrö ba zi ha samuza. Börö daʼö, ibeʼe ginötö ba niha gulidanö Lowalangida safönu faʼatua-tua ba wamatörö faʼaurira samösa ba zi hauga ribu fakhe faʼara. Ifalua daʼö enaʼö tola aboto ba dödöra wa lö mofozu waʼaurira na lö lafondrondrongo wanuturu lala moroi khö Zomböi yaʼira. (Yer. 10:23) Börö waʼebolo dödö Lowalangi, tola aboto ba dödö niwöwöinia wa yaʼia Zamatörö fondrege zi sökhi ba ha Famatörönia zi tola mangaʼasogö faʼatulö hegöi faʼohahau dödö ba gulidanö. Buania, lö hadöi saʼae solawa faʼasinangea Yehowa ba wamatörö.

7. Haniha manö zamadaö khö Yehowa, ba hadia dania nifaluania?

⁷ So ösa ndraononia samadaö. Ba wamobörö, moʼahonoa wamazökhi Yehowa iraononia, yaʼia daʼö ira malaʼika hegöi niha gulidanö. Hizaʼi, so samösa malaʼika samadaö khö Yehowa irege lafotöi ia Satana (eluahania ”Samadaö”). Aefa daʼö, iforege ba wamaelungu Adamo hegöi Khawa enaʼö mamadaö göi ira. Ato malaʼika hegöi niha gulidanö si fao khönia ba wamadaö. (Yud. 6) Baero daʼö, ba soi si no ifili tobali ono mbanuania, yaʼia daʼö iraono Gizaraʼeli, so ösa zi faröi khönia ba lafosumange lowalangi tanö böʼö. (Yes. 63:8, 10) Tatu abu dödö Yehowa me faröi khönia nono mbanuania. Hewaʼae simanö, lö tebulö so khönia waʼebolo dödö ba anau gölönia wombaloi inötö si no itatugöi ba wangohori fefu zamadaö khönia. Na alua daʼö, hasambalö omuso dödö nono mbanua Yehowa si lö faröi börö me no fao ira khönia ba wangoromaʼö faʼanau gölö ba wanaögö ngawalö zi lö sökhi ba gulidanö nifatörö Zatana!

8-9. Hadia manö zi no iböbögö Satana khö Yehowa, ba hewisa wangoromaʼöda wa lö atulö niböbögönia andrö?

⁸ Lö tebulö falimo Gafökha. Yobi andrö ono mbanua Yehowa satulö tödö. Hizaʼi, iböbögö Satana zi lö duhu khö Yobi hegöi ba nono mbanua Yehowa tanö böʼö si lö faröi, ba iwaʼö wa lafosumange Lowalangi ha ba wangalui tana khöra. (Yob. 1:8-11; 2:3-5) Irugi iadaʼa, lö tebulö iböbögö khöda daʼö Satana. (Fam. 12:10) Dozi ita tola taforomaʼö wa lö atulö niböbögö Zatana andrö. Tola tafalua daʼö na anau gölöda ba wanaögö ngawalö wanandraigö ba lö faröi ita khö Yehowa börö waʼomasida khönia. Na anau gölöda, hasambalö ifahowuʼö ita Yehowa simane nifaluania khö Yobi.​—Yak. 5:11.

⁹ Iʼogunaʼö ndra sondröniaʼö ba agama sofaya Satana ba wamazaewe falimosa ba niha wa Yehowa andrö Lowalangi si lö sökhi ba yaʼia  zamakao niha gulidanö. Na mate nono side-ide, so zangumaʼö wa no ikaoni ia Lowalangi börö me moguna nasa khönia malaʼika ba zorugo. Sindruhu-ndruhu wa no laʼobousi döi Lowalangi! Aboto ba dödöda wa iʼomasiʼö sibai ita Amada sotöi Yehowa. Na göna ita fökhö sabölö-bölö mazui mate niha niʼomasiʼöda, lö tatahigö Yehowa. Faduhu dödöda wa ba zi so miföna dania, hasambalö iheta fefu ngawalö wökhö ba isusugi niha si no mate. Taforege ba wamatunö ba niha fefu wa Yehowa andrö Lowalangi safönu faʼomasi. Na tafalua daʼö, tola ibeʼe Yehowa wanema li ba niböbögö Zatana khönia.​—Amd. 27:11.

10. Hadia wamahaʼö si tola tahalö sanandrösa khö Yehowa moroi ba Zinunö 22:23, 24?

¹⁰ Tefakao nono mbanuania niʼomasiʼönia. Yehowa andrö no Lowalangi sahakhö tödö. Abu dödönia na tefakao ita börö wolohi, fökhö, mazui falömoʼahonoada samösa. (Baso Zinunö 22:23, 24.) Tola irasoi Yehowa waʼabu dödö nirasoida. Omasi ia iheta waʼabu dödöda andrö, ba hasambalö ifalua daʼö ba zi so miföna. (Fareso göi 2 Moze 3:7, 8; Yesaya 63:9.) Ba ginötönia dania, hasambalö ’iʼosi dawa hörö fefu ba höröda. Lö hadöi saʼae faʼamate, faʼabu dödö, fege-ege, mazui fökhö’.​—Fam. 21:4.

11. Hadia mbörö wa omasi sibai Yehowa na ifuli falukha ia ba nono mbanuania si no mate?

¹¹ No mate ndra si fahuwu khönia. Hewisa dödö Yehowa ba niha samati khönia si no mate? Omasi sibai ia ifuli falukha khöra! (Yob. 14:15) Hadia tola ökhalaigö hawaʼomasi Yehowa falukha khö zi fahuwu khönia sotöi Aberahamo? (Yak. 2:23) Mazui khö Moze si no irai ”fatutu bawa” khönia? (2 Mo. 33:11) Tatu omasi ia ifuli ifondrondrongo zinunö niʼanunöisi Dawido hegöi ira sanura sinunö tanö böʼö ba wanuno yaʼia! (Si. 104:33) Hewaʼae no mörö ba waʼamate ndra si fahuwu khönia andrö, lö iʼolifugö ira Yehowa. (Yes. 49:15) Itörö tödönia fefu zoʼamakhaita khöra börö me ”auri sa ira fefu ba wamaiginia”. (Luk. 20:38) Hasambalö isusugi  ira ba zi so miföna. Aefa daʼö, tola ifuli ifondrondrongo wangandröra soroi ba dödö ba itema wamosumange nifaluara khönia. Na so niha niʼomasiʼöu si no mate, tatu terara dödöu me öʼila wa irasoi göi Yehowa hadia nirasoimö.

12. Hana wa abu sibai dödö Yehowa ba ngaluo safuria andre?

¹² Lafakao niha böʼö ira niha si lö sökhi. Me ibörögö mamadaö niha gulidanö khönia ba Kabu Edena, aboto ba dödö Yehowa wa hasambalö itugu lö sökhi zalua ba gulidanö. Fatuwu sibai ia ba ngawalö waʼalösökhi hegöi falöʼatulö salua ba gulidanö andre. Iʼotarai me föna, iʼameʼegö tödö sibai niha sambö faʼabölö, simane iraono si lö satua hegöi lakha mbanua. (Zak. 7:9, 10) Ba abu sibai dödö Yehowa na tefakao ba mukuru nono mbanuania si lö faröi. Yafaduhu dödöu wa iʼomasiʼö Yehowa fefu niha si fao khönia ba wangoromaʼö faʼanau gölö.

13. Hadia manö gamuata si lö sökhi niʼila Lowalangi ba götöda andre, ba hadia dania nifaluania?

¹³ Itugu lö sökhi gamuata niha gulidanö. Sindruhunia, ifazökhi niha Lowalangi si fakhili-khili khönia. Hizaʼi, omasi Zatana na lafalua gamuata si lö sökhi. Me iʼila wa ”itugu lö sökhi zalua ba gulidanö” me götö Noakhi, ”maniasa Yehowa me no iwöwöi niha ba gulidanö ba afökhö dödönia”. (1 Mo. 6:5, 6, 11) Hadia no itugu sökhi zalua ba götöda andre? Löʼö! No saʼae toʼölö niha wamalua ngawalö gamuata wohorö, he ba gotalua ndra matua hegöi ira alawe, ira matua faoma ira matua, mazui ira alawe faoma ira alawe! (Ef. 4:18, 19) Tatu omuso sibai dödö Gafökha me iʼila daʼö, ba abölö omuso dödönia nasa na tola idönisi dödö nono mbanua Yehowa irege lafalua horö sebua. Hizaʼi, so nola-ola waʼebolo dödö Yehowa. Hasambalö iforomaʼö ba zi so miföna wa fatuwu sibai ia ba ngawalö gamuata wohorö. Ihori dania fefu niha samalua amuata wohorö si lö omasi mamalalini era-era.

14. Hadia lua-lua gamuata niha ba gurifö hegöi ulidanö andre?

¹⁴ Lafakiko gomböila dangania ira niha gulidanö. Ato niha ’samatörö awöra niha irege teʼala ira’, ba molua-lua göi nifaluara andrö ba gulidanö hegöi urifö si no ifaduhusi tödö khöra Yehowa. (Sango. 8:9; 1 Mo. 1:28) Latutunö ira niha satua-tua wa ba zi hauga fakhe tö, tola tehori mato sazuta spesies tö ba gulidanö andre börö gamuata niha. Andrö, lö tokea ita na so niha sangumaʼö wa tola manö tekiko gulidanö andre. Hizaʼi, tatu taʼandrö sibai saohagölö börö me no ifabuʼu Yehowa wa hasambalö ’ifakiko niha samakiko ulidanö’ ba ibaliʼö faradaiso gulidanö andre.​—Fam. 11:18; Yes. 35:1.

15-16. Hana wa terou dödöda wefao khö Yehowa ba wangoromaʼö faʼanau gölö? Beʼe duma-duma.

¹⁵ Angeragö atö hawaʼoya gabula dödö nitaögö Namada si so ba zorugo ba zi hauga ribu fakhe faʼara. (Faigi kotak ” Anau Gölö Yehowa Hewaʼae . . .”.) Sindruhunia, tola ihori gulidanö si lö sökhi andre Yehowa gofu hawaʼara manö zomasi ia. Hizaʼi, ihalö gangetula ba wangoromaʼö faʼebolo dödö ba oya howu-howu nitemada börö waʼebolo dödönia andrö. Khalaigö atö duma-duma andre: Laʼombakhaʼö khö zi sambua fongambatö wa hasambalö cacat dania nonora na tumbu. Lö anau nosonia ba hasambalö tefakao ia sandrohu faʼaurinia. Aboto ba dödö ndra satuania wa tenga saoha wondrorogö iraono si cacat simane daʼö. Hewaʼae simanö, omuso sibai dödöra me tumbu nonora andrö. Börö me laʼomasiʼö ia, anau gölöra wanaögö ngawalö gabula dödö enaʼö tola labeʼe wondrege zi sökhi khö nonora andrö.

¹⁶ Simanö göi, lö moʼahonoa ngaʼötö Gadamo hegöi Khawa iʼotarai me tumbu ira. Hewaʼae simanö, lö tebulö iʼomasiʼö ira Yehowa ba iʼameʼegö tödö ira. (1 Yo. 4:19) Ba duma-duma nitutunöda  no mege, hewaʼae na laforege ira satua andrö ba wameʼe fondrege zi sökhi, lö tebulö tefakao nonora. Tenga simane daʼö Yehowa, so khönia waʼabölö ba wangeheta fefu gabula dödö nitaögö niha gulidanö. No göi itatugöi hawaʼara ifalua daʼö. (Mat. 24:36) Na taʼangerönusi waʼomasi Yehowa, tatu terou dödöda wefao khönia ba wangoromaʼö faʼanau gölö hewaʼae na ara sibai tataögö gabula dödö.

17. Hewisa wa tola möi fanoloda duma-duma Yesu nisura ba Heberaiʼo 12:2, 3 ba wangoromaʼö faʼanau gölö?

¹⁷ Yehowa zi tobali duma-duma soʼahonoa ba wangoromaʼö faʼanau gölö, ba no mofozu Yesu ba woloʼö faʼanau gölö Namania. Me so Yesu ba gulidanö, itehegö laʼoʼaya ba laʼailasi ia, ba mate ia salahida ba döla geu famakao. (Baso Heberaiʼo 12:2, 3.) Tola anau gölö Yesu ba wanaögö fefu daʼö, börö me iʼangeragö duma-duma nibeʼe Yehowa. Tola göi anau gölöda na taʼangeragö daʼö.

18. Simane nitutunö ba 2 Fetero 3:9, hadia mbua moroi ba waʼebolo dödö Yehowa?

¹⁸ Baso 2 Fetero 3:9. Iʼila Yehowa hawaʼara ginötö si tefaudu ba wangohori ulidanö si lö sökhi andre, ba lö tebulö iforomaʼö waʼebolo dödö ba wombaloi inötö andrö. Börö waʼebolo dödönia, tebeʼe ginötö ba niha sato ba wangokhögö faʼaboto ba dödö sanandrösa khönia. Iadaʼa, so ngawawa sato sibai si hauga zuta faʼato samosumange ba sanuno yaʼia. Laʼandrö sibai saohagölö börö me tenga ha ba zi sabata iforomaʼö Yehowa waʼanau gölö irege tola tumbu ira, lafahaʼö ira ba wangomasiʼö yaʼia, ba lalulu waʼaurira khönia. Na no laforomaʼö waʼanau gölö irugi gamozua, hasambalö ifahowuʼö ira Yehowa si fao faʼomuso dödö. Ba ginötö daʼö dania taʼila wa faʼanau gölö niforomaʼö Yehowa irugi mane maʼökhö no angetula si tefaudu!

19. Hadia gangetula nihalöda, ba hadia howu-howu nitemada ba zi so miföna?

¹⁹ Moroi ba duma-duma Yehowa, tafahaʼö ita ba wangoromaʼö faʼanau gölö si fao faʼomuso dödö. Hewaʼae na oya sibai wangabu dödö ba famakao niʼasogö Zatana, lö tebulö wa ”Lowalangi somuso tödö” Yehowa andrö. (1 Ti. 1:11) Tola göi tarasoi waʼomuso dödö sagötö fombaloida inötö si no itatugöi Yehowa ba wangamoniʼö töinia, ba wangoromaʼö faʼasinangeania ba wamatörö, ba wangohori fefu ngawalö waʼalösökhi, hegöi ba wangasiwai fefu gabula dödö nitaögöda. Datahalö gangetula ba wangoromaʼö faʼanau gölö, börö me taʼila wa iforomaʼö göi waʼanau gölö Amada si so ba zorugo. Na tafalua daʼö, tola tasöndra waʼauri si lö aetu simane niwaʼö ba ayati daʼa: ”Yaʼahowu niha sanau ölö ba wanaögö fanandraigö. Na no aefa itaögö wanandraigö andrö, itema dakula faʼauri nifabuʼu Yehowa ba niha sangomasiʼö yaʼia.”​—Yak. 1:12.