1-2. Kansi lonjezo yupezeka pa Yesaya 65:16, 17, yutiyavya tyani kupilila?

“MUSATAYE MTIMA!” Uyu niye wenze mutu wa msonkhano wa cigao wa 2017. Msonkhano uyu wetiyavya kuziŵa zatingacite kuti tikwanishe kulimbana na mavuto yatukumana nayo. Papita vyaka 4 kufumila petecita msonkhano uyu. Koma tikalupilila mavuto yatukumana nayo m’calo cino ciipa.

² Tonse tukhuziwa na mavuto a m’calo cino ciipa. Mavuto aya yangankhale imfwa ya munthu wa m’banja mwasu olo muyasu, matenda, ukalamba, masoka a cilengedwe, ciwawa, cinzunzo, olo mavuto yamene yawela cifukwa ca mlili wa COVID-19. Tuyembekezela nthawi pamene mavuto yonse aya yakasile ndipo tikaŵakumbukile lini soti.​—Ŵelengani Yesaya 65:16, 17.

3. Kansi tufunika kucita cinji, ndipo ndaŵa yanji?

³ Masiku ŵano tukumana na mavuto. Koma payakine msogolo tingayokumana na mavuto anyinji kupambana yatukumana nayo lomba. (Mat. 24:21) Tetyo, tufunika kupitilizhya kuphunzila zatingacite kuti tikokwanisha kupilila. Ndaŵa yanji kucita izi n’kofunika? Yesu elaŵila kuti: “Ngati mukapilile, mukapeze moyo.” (Luka 21:19) Kuyangizhyila apo, tingakwanishe kupilila ngati tuganizila za ŵanthu amene okumana na mavuto yolingana na yatukumana nayo, koma okwanisha kuyapilila.

4. Ndaŵa yanji tulaŵila kuti Yehova ni cisanzo cabwino pa nkhani yopilila?

⁴ Yehova ni cisanzo cabwino ngako pa nkhani yopilila. Ndaŵa yanji takamba tetyo? Maleŵania wankhala olamulila cino calo kwa nthawi itali ndipo wacitisha mavuto anyinji. Yehova ali na mphamvu zosilizhya mavuto aya, koma oyembekezela kuyocita izi pa nthawi yoyenelela. (Aro. 9:22) Pakuyembekezela  nthawi iyi, Yehova opilila vinthu vosiyanasiyana. Lomba, tilaŵizhyane vinthu 9 vamene yove opilila.

5. Kansi zina ya Mulungu yunenezewa tyani, nanga izi zukupangishani kumvwa tyani?

⁵ Kunenezewa kwa zina yake. Yehova oikonda ngako zina yake, ndipo ofuna kuti aliyense akoilemekeza. (Yes. 42:8) Koma zina yake yankhala yunenezewa kwa vyaka pafupifupi 6 sauzande. (Sal. 74:10, 18, 23) Izi zeyambila m’munda wa Edeni pamene Maleŵania (kutanthauza kuti “Woneneza”) elaŵila kuti Mulungu enzotana Adamu na Eva vinthu vabwino ngako. (Gen. 3:1-5) Kuyambila nthawi yamene iyo, Yehova wankhala onenezewa kuti otana ŵanthu vinthu vingaŵapase cimwemwe. Peenze pacalo, Yesu ekhuziwa ngako na kunenezewa kwa zina ya Ausuwake. Niye cifukwa cake ephunzisa ophunzila ŵake kupemphela kuti: “Ausuwasu akululu, zina yanu ituŵishiwe.”​—Mat. 6:9.

6. Ndaŵa yanji Yehova walola ŵanthu kuzilamulila ŵeka?

⁶ Kusushiwa kwa ulamulilo wake. Yehova niye woyenelela kulamulila kululu na pacalo. Ndipo ulamulilo wake ni uweme ngako. (Chiv. 4:11) Koma Maleŵania, ecitisha angelo na ŵanthu kuganiza kuti Mulungu ni wosayenelela kulamulila. Cifukwa ca izi, penzofunika kupita nthawi itali kuti Yehova aoneshe kuti niye woyenelela kulamulila. Tetyo, Mulungu walola maboma kuti alamulile kwa nthawi itali, kuti ŵanthu aone kuti angakwanishe lini kuzilamulila ŵeka. (Yer. 10:23) Cifukwa ca kuleza mtima kwa Mulungu, paliye aliyense wati akakaikile kuti yove niye woyenelela kulamulila kululu na pacalo, cifukwa ŵanthu akangiwa. Onse akaziŵe kuti ulamulilo wa Yehova ni wabwino cifukwa niye wati ukalete mtendele pacalo.

7. Kansi ni ŵani epandukila Yehova, ndipo akacite nao tyani?

⁷ Kupanduka kwa angelo na ŵanthu ayakine. Yehova elenga angelo na ŵanthu aungwilo. Koma Satana (kutanthauza kuti “Wosusha”) epandukila Yehova. Ndipo ecitisha Adamu na Eva kuti nao am’pandukile. Pavuli pake, ŵanthu koma soti angelo ayakine enkhala kumbali ya Satana nopandukila Yehova. (Yuda 6) Ndipo olo Aisiraeli amene enze mtundu wosankhiwa na Mulungu, em’pandukila noyamba kulambila milungu yawenye. (Yes. 63:8, 10) Izi zemukhumudwisha ngako Yehova. Koma epilila, ndipo apitilizhye kupilila mpaka pati akaononge onse om’pandukila. Pa nthawi iyo, Yehova koma soti atumiki ŵake okhulupilika akasangalale cifukwa akafunikile lini soti kupilila vinthu viipa va m’calo cino.

8-9. Kansi ŵanthu ouzhyiwa wenye wotyani wokhuza Yehova, nanga seo tucitanji?

⁸ Wenye wa Maleŵania. Satana elaŵila kuti Yobu, koma soti atumiki onse okhulupilika, otumikila Yehova cifukwa ca vinthu vakuŵapasa. (Yobu 1:8-11; 2:3-5) Maleŵania opitilizhya kulaŵila wenye uyu mpaka masiku ŵano. (Chiv. 12:10) Tingaoneshe kuti Satana ni wawenye mwa kupitilizhya kupilila mavuto yatukumana nayo, nopitilizhya kunkhala okhulupilika kwa Yehova cifukwa comukonda. Yehova edalisa Yobu cifukwa epilila, ndipo nase angatidalise ngati tupitilizhya kupilila.​—Yak. 5:11.

⁹ Satana oseŵenzesha asogoleli a vipembezo vawenye polaŵila kuti Yehova ni wankhanza ndipo niye ocitisha mavuto. Mwacisanzo, asogoleli aŵa olaŵila kuti ŵana akamwalila, Mulungu oŵatola kuti akankhale angelo kululu. Uku ni kumunyoza Mulungu. Koma seo tuziŵa kuti Yehova ni Tata  wacikondi. Tetyo, ngati talwala matenda akulu olo munthu wetenzokonda akamwalila, tupasa lini Mulungu mlandu. M’malomwake, tukhulupilila kuti ikafwike nthawi pamene Mulungu akacosepo matenda noukisha akufwa. Ndipo tuuzhyako ayakine kuti Yehova ni Mulungu wacikondi. Izi zuyavya kuti Yehova ayankhe Satana wamene omutonzhya.​—Miy. 27:11.

10. Kansi Salimo 22:23, 24 yufotokozanji zokhuza Yehova?

¹⁰ Kuvutika kwa atumiki ŵake. Yehova ni Mulungu wacifundo. Tetyo, okhumudwa ngako akaona kuti tuvutika cifukwa ca kunzunziwa, kulwala na mavuto ayakine amene owela cifukwa cosoŵa ungwilo. (Ŵelengani Salimo 22:23, 24.) Yehova oziŵa mwatumvwila. Niye cifukwa cake akasilizhye mavuto yatukumana nayo. (Linganizhyani na Ekisodo 3:7, 8; Yesaya 63:9.) Yove “akapukute misozi yonse m’menso [mwasu], ndipo imfwa ikankhaleko lini soti. Kukaŵeve kulila, kapena kumimila, olo voŵaŵa.”​—Chiv. 21:4.

11. Kansi Yehova akumvwa tyani akaganizila za atumiki ŵake amene ecifwa?

¹¹ Imfwa ya ashamwali ŵake. Kansi Yehova akumvwa tyani akaganizila za atumiki ŵake okhulupilika? Yove ocitolakalaka kuŵaukisha. (Yobu 14:15) Ganizilani mwamene Yehova olakalakila kuukisha shamwali wake Abulahamu. (Yak. 2:23) Ganizilani soti mwamene Yehova olakalakila kuukisha Mose wamene enzolaŵila naye “pamenso na pamenso.” (Eks. 33:11) Ndipo olakalaka kuukisha Davide na elemba masalimo ayakine kuti akamuimbile nyimbo zomutamanda. (Sal. 104:33) Olo kuti ashamwali ŵake aŵa ecifwa, yove aliyoŵaluŵe. (Yes. 49:15) Akalukumbukila mweenzoonekela na vinthu vonse viweme  vecimucitila. Baibo yulaŵila kuti kwa Yehova, “onse aŵa ni amoyo.” (Luka 20:38) Yove akaŵaukishe ndipo akamvwishile soti mapemphelo ŵao ocokela pansi pa mtima novomelezhya kulambila kwao. Ngati mwetaikiliwa wokondeka wanu mu imfwa, mfundo izi zingakutonthozeni.

12. Kansi ni zinthu zotyani zamene zukhumudwisha ngako Yehova m’masiku ŵano osilizhya?

¹² Kuvutishiwa kwa ŵanthu cifukwa ca ŵanthu ayakine aipa. Kufumila pa kupanduka kwa m’munda wa Edeni, Yehova eziŵa kuti minkhalidwe ya ŵanthu ipitilizhye kuipilaipila. Yove ozonda vinthu viipa monga kusoŵa cilungamo na ciwawa, zamene zucitika masiku ŵano. Ndipo omvwila ngako cifundo ŵanthu amene aliye oŵateteza monga ŵana amasiye na anakazi amasiye. (Zek. 7:9, 10) Yehova oŵaŵiwa ngako akaona kuti atumiki ŵake onzunziwa noikiwa m’jele. Koma ziŵani kuti Yehova okukondani ngako cifukwa mupitilizhya kupilila monga ni mwakucitila yove.

13. Kansi ni nkhalidwe yotyani yakucita ŵanthu masiku ŵano, ndipo Yehova akacite cinji?

¹³ Kuloŵelela kwa ŵanthu m’nkhalidwe yaciwelewele. Olo kuti ŵanthu epangiwa m’cifanizilo ca Mulungu, Satana oŵapangisha kucita vinthu viipa. Mulungu “peciona kuti kuipa kwapaka pacalo” m’nthawi ya Nowa, “ecimvwa cisoni kuti epanga ŵanthu, ndipo zemuŵaŵa mumtima.” (Gen. 6:5, 6, 11) Kansi ŵanthu eleka kucita vinthu viipa? Yai. Maleŵania okondwela ngako akaona kupaka kwa minkhalidwe yaciwelewele, kuyangizhyilapo na kulalana kwa anakazi olo analume ŵeka-ŵeka. (Aef. 4:18, 19) Ndipo osangalala ngako akaona kuti mtumiki wa Yehova wacita cimo ikulu. Pa nthawi yake, Yehova akaoneshe kuti ozonda ciwelewele mwa kuononga ŵanthu amene ocita ciwelewele ndipo ofuna lini kucinja.

14. Kansi ŵanthu ocitanji na cilengedwe ca Mulungu?

¹⁴ Kuonongewa kwa vinthu vecilenga. Kuyangizhyila pa kuvutisha ayao, ŵanthu apitilizhya kuononga cilengedwe ceciŵalamula Yehova kuti akocisamalila. (Mla. 8:9; Gen. 1:28) Asayansi olaŵila kuti mitundu ya zamoyo ziyakine yopitilila pa 1 miliyoni ingaonongekeletu cifukwa ca zocita za ŵanthu. Niye cifukwa cake ŵanthu ayakine olaŵila kuti vinthu va m’calo vingaonongekeletu kufwika pamlingo wakuti vingakonzewe lini. Koma Yehova walonjeza kuti ‘akaononge ŵanthu onse amene oononga calo,’ ndipo akapange calo conse kunkhala paladaiso.​—Chiv. 11:18; Yes. 35:1.

15-16. Kansi n’cinji cutiyavya kupilila monga ni mwakucitila Yehova? Fotokozani cisanzo.

¹⁵ Ganizilani kupaka kwa vinthu vamene Yehova wankhala opilila kwa vyaka vinyinji. (Onani kabokosi kakuti “ Vinthu Vakupilila Yehova.”) Yehova angaononge calo cino ciipa nthawi iliyonse. Koma oleza mtima, ndipo izi zatipindulisha ngako. Ganizilani cisanzo ici: Tiyelekezele kuti munalume na mkazi wake auzhyiwa kuti mwana wao akavyalike na matenda akulu ndipo pavuli pake akamwalile. Olo n’tetyo, mwana uyu akavyalika, makolo osangalala ngako olo kuti oziŵa kuti kusamalila mwana uyu kunkhale kovuta. Kukonda mwana uyu kungaŵacitishe kupilila mavuto yangakumane nayo pomusamalila kuti ankhale na umoyo uweme.

¹⁶ Molingana na izi, ŵanthu onse ovyalika aliye ungwilo cifukwa ni mbadwa za Adamu na Eva. Olo n’tetyo, Yehova oŵakonda  noŵasamalila. (1 Yoh. 4:19) Mosiyana na makolo ŵatafotokoza m’cisanzo, Yehova angakwanishe kusilizhya mavuto yakukumana nayo atumiki ŵake. Ndipo eikilatu nthawi pati akasilizhye mavuto onse. (Mat. 24:36) Kuzindikila kuti Yehova otikonda, kungatiyavye kuti tipitilizhye kupilila monga ni mwakucitila yove. Ndipo kungatithandize kuyembekezela moleza mtima, nthawi pati akasilizhye mavuto.

17. Kansi mfundo zupezeka pa Aheberi 12:2, 3 zingatilimbikishe tyani kupilila?

¹⁷ Yehova ni cisanzo cabwino ngako pa nkhani yopilila. Naye Yesu, etolela cisanzo ca Ausuwake pa nkhani yopilila. Peenze pacalo, epilila cimuti conzunzikilapo, mau onyoza na kucitishiwa nsoni. (Ŵelengani Aheberi 12:2, 3.) Cisanzo ca Yehova pa nkhani yopilila niye ceyavya Yesu kuti akwanishe kupilila mavuto onse yecikumana nayo. Nase tingakwanishe kupilila ngati tingatolele cisanzo ca Yehova monga ni mwecicitila Yesu.

18. Kansi 2 Petulo 3:9 yuonesha tyani ubwino wa kupilila kwa Yehova?

¹⁸ Ŵelengani 2 Petulo 3:9. Yehova oziŵa nthawi yoyenelela pati akaononge calo cino ciipa. Cifukwa cakuti ni woleza mtima, ŵanthu mamiliyoni anyinji ankhala na mwai wophunzila za yove noyamba kumulambila. Onse ni osangalala kuti Yehova epilila kwa nthawi itali, zamene zepeleka mwai kuti ove avyalike, aphunzile za yove, na kuti azipeleke nobatizika. Msogolo, tikankhale na mwai woona ubwino wa kupilila kwa Yehova. Pa nthawi iyo, ŵanthu mamiliyoni amene otolela cisanzo cake pa nkhani yopilila, akalandile mphoto ya moyo wosasila.

19. Kansi tufunika kupitilizhya kucita cinji, ndipo tikalandile mphoto yanji?

¹⁹ Yehova ni cisanzo cabwino pa nkhani yopilila mwacimwemwe. Mosasamala kanthu kuti Satana wacitisha mavuto anyinji, Yehova wapitilizhya kunkhala “Mulungu wacimwemwe.” (1 Tim. 1:11) Nase tingapitilizhye kupilila mwacimwemwe patuyembekezela moleza mtima kuti Yehova akaoneshe kuti niye woyenelela kulamulila, akatuŵishe zina yake, nosilizhya mavuto yonse yatukumana nayo. Tiyeni tipitilizhye kupilila, ndipo tikokumbukila nthawi zonse kuti naye Yehova opilila vinthu vinyinji. Ngati tucita izi, tione kukwanilishiwa kwa mau akuti: “Wodala ni munthu wamene opilila mayeselo, cifukwa akayovomelezhyewa, akalandile mphoto ya moyo yamene Yehova elonjeza onse omukonda.”​—Yak. 1:12.