1-2. Kansi ni lonjezo yotyani ili pa lemba ya Yesaya 65:16, 17 yamene yutiyavya kupitilija kupilila?

“OSAFOKA!” wamene uyu wenze mutu wa pulogilamu ya nsonkhano wachigawo wa 2017. Pulogilamu yamene iyi itiwonesha mwatingapililile mavuto ŵasu. Lomba papita vyaka 4 kufumila pewichitika nsonkhano wamene uyu, ndipo tupitilija mphela kupilila mavuto osiyana-siyana muli chino chalo chiipa.

² Kansi mwewo mwakumana na mavuto otyani kwalombapano? Kansi mwaluza wabanja wanu olo shamwali wanu wokondewa? Kansi mwewo muli na matenda akulu pa moyo wanu olo kapena mavuto amene owela chifukwa cha uchikulile? Kansi mwewo mwakumanapo na masoka achilengedwe, chiwawa, olo kutamanishiwa? Olo payakine muvutika na mavuto owela chifukwa cha matenda a COVID-19? Tuyembekezela mwachidwi nthawe yamene mavuto onse amene aŵa azasile​—ndipo azakumbukiliwelinisoti olo kuchitikasoti!​—Ŵelengani Yesaya 65:16, 17.

3. Kansi tufunika kuchita chinji palipano, ndipo ndaŵa yanji?

³ Moyo mu dongosolo ino ya vinthu ni wovuta ndipo payakine tifunike kupilila mavuto anyinji kusogolo. (Mt. 24:21) Niye chifukwa chake tufunikila kupitilija kuphunzila kupilila vinthu vinyinji. Ndaŵa yanji? Ndaŵa yakuti Yesu enena kuti: “Keno mwewo muzapilile, muzafwane moyo.” (Lk. 21:19) Kuganizila vamene vuyavya ayakine kupilila mavuto olingana na ŵatukumana nawo sewo, kungatiyavye kuti nase tikopilila mavuto osiyana-siyana.

4. Ndaŵa yanji tinganene kuti Yehova ni chisanzo chiweme ngako pa nkhani yopilila?

⁴ Kansi chisanzo chiweme ngako cha kupilila ni ŵani? Ni Yehova Mulungu. Kansi yankho yamene iyi yukudabwishani? Payakine mwewo mudabwa. Koma mukaganizila nkhani yamene iyi mungamvwishe chifukwa chake tunena tetyo. Mdyelekezi niye  olamulila chino chalo, ndipo chili na mavuto anyinji ngako. Yehova ali na mphamvu zakuti angawononge chino chalo lomba teti, koma yove oyembekezela nsiku yakuti azachite vamene ivi. (Aro. 9:22) Palipano, Mulungu opitilija mphela kupilila mpaka nthawe yechiikilatu izakwane. Lomba tiyeni tikambilane vinthu vokwanila 9 vakupilila Yehova.

5. Kansi zina ya Mulungu yankhala yunyozewa tyani, ndipo mwewo mukumvwa tyani chifukwa cha vamene ivi?

⁵ Kunyozewa kwa zina yake. Yehova oikonda zina yake, ndipo yove ofuna kuti aliyense akoilemekeza. (Yes. 42:8) Koma kwa vyaka 6.000 vapita, zina yake iweme yamene iyi yankhala yunyozewa. (Sal. 74:10, 18, 23) Vamene ivi viyambila mmunda wa Edeni, pamene Mdyelekezi (kutanthauza “Ndeŵaniya”) pechiimba mulandu Mulungu wakuti enzetana Adamu na Hava vinthu venzefunikila kuti akosangalala. (Gen. 3:1-5) Kufumila pa nthawe yamene iyo, Yehova wankhala otalijiliwa wenye kuti otana ŵanthu vinthu vakufunikila pa moyo. Venzemukhuza ngako Yesu kuwona kuti zina ya Atata ŵake yunyozewa. Niye chifukwa chake yove euja ophunzila ŵake kupemphela kuti: “Atata ŵasu muli kululu, zina yanu ituŵishiwe.”​—Mt. 6:9.

6. Ndaŵa yanji Yehova walola kuti papite nthawe yokwanila kuti awoneshe kuti yove niye woyenela kulamulila?

⁶ Kushushiwa kwa Ulamulilo wake. Ni Yehova yeka wamene ali na udindo wolamulila kululu na pano pachalo, ndipo ulamulilo wake ni uweme ngako. (Chiv. 4:11) Koma Mdyelekezi wankhala oluŵilisha angelo komasoti ŵanthu poŵachitisha kuganiza kuti Mulungu ni wosayenelela kulamulila. Nkhani yakuti Yehova ni woyenela kulamulila yenzefunika nthawe yokwanila kuti isilijiwe. Mwanzelu, Mulungu elola kuti papite nthawe ikulu kuti ŵanthu awone ŵeka kuti angakwanishelini kulilamulila paliye kusogolelewa na Nyamalenga. (Yer. 10:23) Chifukwa chakuti Yehova wankhala ochita vinthu moleza ntima, nkhani yamene iyi izasilijiwe mu njila iweme ngako ndipo izachitikelinisoti. Yove azalemekezewe pamene pakuti azawoneshe kuti ni Ufumu wake weka wamene ungalete ntendele ngawo-ngawo komasoti chitetezo pano pachalo.

7. Kansi ni ŵani esankha kusamvwila Yehova, ndipo yove azachite nawo tyani?

⁷ Kusamvwila kwa ŵana ŵake ayakine. Yehova elenga ŵana ŵake amene ni angelo komasoti ŵanthu ali angwilo. Koma pavuli pake mmozi wa angelo amene awo wamene ni Satana (kutanthauza “Woshusha”) esankha kusamvwila ndipo echitishasoti kuti Adamu na Hava osati amvwile Yehova. Papita nthawe, angelo ayakine pamozi na ŵanthu ayakine epanduka. (Yuda 6) Pavuli pake, olo Aisiraeli amene enze ŵanthu osankhiwa a Mulungu, emukana ndipo eyamba kulambila milungu yonyenga. (Yes. 63:8, 10) Vamene ivi vimuŵaŵa ngako Yehova. Koma yove wankhala opilila ndipo opitilija mphela kupilila mpaka nthawe yakuti azawononge onse asamvwila. Pavuli pake, Yehova pamozi na ŵanthu onse amene ni okhulupilika kuli yove azasangalale chifukwa azafunikelini kupililasoti vinthu viipa va chino chalo chiipa.

8-9. Kansi ni wenye wotyani wakunena ŵanthu wokhuza Yehova, ndipo sewo tufunika kuchita chinji?

⁸ Wenye wakunena Mdyelekezi. Satana enena kuti ntumiki wokhulupilika wa Yehova Yobu, komasoti atumiki okhulupilika a Yehova masiku ŵano, otumikila Mulungu chifukwa cha dyela. (Yobu 1:8-11; 2:3-5) Satana onena mphela vamene ivi mpaka pano. (Chiv. 12:10) Sewo tingawoneshe kuti vakunena Satana ni vawenye tikopilila mayeselo nonkhala mphela wokhulupilika kwa Yehova chifukwa chakuti tumukonda. Molingana na Yobu, sewo nase Yehova azatidalise keno tingapilile.​—Yak. 5:11.

⁹ Satana okatishila ntchito asogoleli avipembezo vawenye kuti akonena kuti Yehova ni  wankhanza, komasoti kuti niye ochitisha mavuto ŵakukumana nawo ŵanthu. Ayakine mpaka onena kuti keno ŵana amwalila niyekuti ni Mulungu waŵatola chifukwa chakuti enzefuna angelo ayakine kululu. Kwamene uku ni kumunyoza ngako Mulungu! Koma sewo tuziŵa kuti Yehova ni Atata achikondi ndipo angachitelini vamene ivi. Tikolwala matenda akulu ngako olo keno munthu watukonda wamwalila, sewo tumuimbalini mulandu Mulungu. Mmalomwake, tukhulupilila kuti nsiku iyakine yove azakonze vinthu ndipo tuuja aliyense wamene angatimvwishile kuti Yehova ni Mulungu wachikondi. Vamene ivi vuchitisha kuti Yehova akokwanisha kuyankha ŵala omunyoza.​—Miy. 27:11.

10. Kansi lemba ya Salimo 22:23, 24 yuwonesha kuti Yehova ni wotyani?

¹⁰ Kutamana kwa atumiki ŵake okondewa. Yehova ni Mulungu wachifundo. Yove okondwelalini akatiwona kuti tuvutika na vinthu monga​—kutamanishiwa, matenda olo mavuto ayakine amene owela chifukwa chakuti nise ochimwa. (Ŵelengani Salimo 22:23, 24.) Yehova omvwisha mavuto ŵasu, ndipo yove ofuna kuŵasilija ndipo azaŵasilije chendi. (Yelekezelani na Eks. 3:7, 8; Yes. 63:9.) Nthawe ikuza yakuti “yove azapukute misozi yonse m’menso [mwasu], ndipo imfwa izaŵepolinisoti. Kuzaŵeve kulila, olo kumimila, olo soti voŵaŵa.”​—Chiv. 21:4.

11. Kansi Yehova akumvwa tyani akaganizila za atumiki ŵake okhulupilika amene emwalila?

¹¹ Kusoŵana na azishamwali ŵake amene emwalila. Kansi Yehova akumvwa tyani pa nkhani ya analume na anakazi okhulupilika amene emwalila? Yove ofunishisha ngako kuŵawonasoti! (Yobu 14:15) Ganizilani mwamene Yehova mwakumusoŵela nshamwali wake Abulahamu! (Yak. 2:23) Ganizilanisoti za Mose wamene enzelaŵila naye “pamenso na pamenso”! (Eks. 33:11) Komasoti yove oyembekezela mwachidwi kuzakumvwa Davide  pamozi na ayakine amene elembako masalimo oimba nyimbo zokondwelesha zomutamanda! (Sal. 104:33) Olo kuti azishamwali a Mulungu amene aŵa echifwa, Yehova aliyeŵaluŵe. (Yes. 49:15) Yove okumbukila chilichonse chokhuza ŵanthu amene aŵa. Baibolo yunena kuti, “kuli yove onse amene aŵa ni amoyo.” (Lk. 20:38) Nsiku iyakine, yove azaŵaushe ndipo azamvwishilesoti mapemphelo ŵawo ofumila pansi pa ntima komasoti azavomekeje kuti akomulambila. Keno munthu wemwenzekonda emwalila niye kuti mfundo zamene izi zingakutonthojeni komasoti kukulimbikisani.

12. Kansi ni vinthu votyani vumuŵaŵa ngako Yehova m’masiku ŵano osilijila?

¹² Keno ŵanthu aipa okandilila ayawo. Kusamvwila pekwiyamba m’munda wa Edeni, Yehova eziŵa kuti vinthu vizaipe ngako vikaliyenkhalasoti luweme. Yove ozonda vinthu viipa, vachiwawa komasoti viliye chilungamo, vamene vuchitika muli chino chalo masiku ŵano. Nthawe zonse Yehova odela nkhaŵa ŵanthu amene angakwanishelini kuliteteza, monga ofoka komasoti anakazi na ŵana amasiye. (Zek. 7:9, 10) Yehova oŵaŵiwa ngakosoti akawona atumiki ŵake okhulupilika okandililiwa komasoti kuikiwa m’djeli. Nkhalani osimikijila kuti yove okukondani ngako mwewo monse amene mupilila naye pamozi.

13. Kansi ni vinthu viipa votyani vakuwona Mulungu vamene vuchitika pano pa chalo, ndipo yove azachitepo chinji?

¹³ Minkhalidwe iipa yamene ŵanthu yalinayo. Ŵanthu elengewa m’chifanizilo cha Mulungu, koma Satana okondwela kuŵasokoneza kuti akochita vinthu viipa. Mulungu ‘pechiwona kuti kuipa kwa ŵanthu pa chalo kwapaka ngako’ m’nthawe ya Nowa, “Yehova echimvwa chisoni kuti epanga ŵanthu pachalo, komasoti vimuŵaŵa ngako muntima.” (Gen. 6:5, 6, 11) Kansi vinthu vichinja kufumila pa nthawe yamene iyo? Kulaŵila chendi viliye! Satana okondwela ngako akawona kuti vinthu wachiwelewele vili paliponse, kuyangijilapo kuyonana kwa ntundu uliwonse wa ŵanthu osalungulana komasoti kwamene kuchitika pakati pa analume olo anakazi ŵeka-ŵeka! (Aef. 4:18, 19) Komasoti yove okondwela ngako keno ŵanthu amene olambila Yehova achita chimo ikulu. Kuleza ntima kwa Yehova kukazasila, yove azawoneshe kuti ozondana ngako na minkhalidwe yamene iyi powononga ŵanthu onse aipa.

14. Kansi ŵanthu ochita nacho chinji chalo komasoti nyama?

¹⁴ Kuwonongewa kwa vinthu vechilenga. Kuyangijila pa ‘kukandilila ayawo poŵalamulila,’ ŵanthu ochisamalilalini chalo na nyama zechiŵapasa Yehova kuti akozisamalila. (Mlal. 8:9; Gen. 1:28) Asayansi ayakine onena kuti chifukwa cha vakuchita ŵanthu, mitundu yokwanila 1 miliyoni ya vomela komasoti nyama isililetu pano pachalo mu vyaka vikuza kusogolo. Tetyo ni vomvwika kuti ove onena kuti chilengedwe chili pa mavuto. Tumutembeja ngako Yehova chifukwa walonjeza kuti ‘azawononge ŵala owononga chalo’ ndipo azachinje chino chalo kuti chinkhale paladaiso.​—Chiv. 11:18; Yes. 35:1.

15-16. Kansi n’chinji chingatiyavye kuti tikopilila monga ni Yehova? Pelekani chisanzo.

¹⁵ Ganizilani mavuto ŵakupilila Atata ŵasu ŵakululu kwa vyaka vinyinji. (Onani bokosi yakuti “Vinthu vakupilila Yehova.”) Yehova angakwanishe kuwononga chino chalo nthawe iliyonse. Koma vinthu vawachita yove ponkhala woleza ntima vatiyavya ngako tonse! Ganizilani chisanzo ichi. Tiyelekeze kuti mwanalume pamozi na nkazi wake aujiwa kuti mwana wawo wamene akaliyevyalika ali na vuto ikulu, ndipo akazavyalika akovutika komasoti azamwalile ali ntontho. Koma makolo amene awo osangalala mphela na kuvyalika kwa mwana wamene  uyo olo kuti oziŵa kuti azakumane na mavuto akulu pomusamalila. Chifukwa chakuti omukonda mwana wawo, ove opilila mavuto aliwonse ŵakukumana nawo na cholinga chakuti amusamalile mulimonse mwangakwanishile.

¹⁶ Molingana na vamene ivi, ŵana onse ŵa Adamu na Hava ovyalika ochimwa kale. Olo n’tetyo Yehova oŵakonda ndipo oŵasamalila. (1 Yoh. 4:19) Ndipo mosiyana na makolo a m’chisanzo chamene ichi, Yehova angakwanishe kuchitapo kanthu. Yove waika nthawe yakuti azasilije mavuto onse ŵakukumana nawo ŵanthu. (Mt. 24:36) Kansi chikondi chake chingatichitishelini kupilila naye pamozi mpaka nthawe yamene iyo keno pangafunikile?

17. Kansi vayufotokoza lemba ya Aheberi 12:2, 3 ponena za Yesu, vingatilimbikise tyani kuti tikopilila?

¹⁷ Yehova ni chisanzo chiweme ngako pa nkhani yopilila. Yesu etolela chisanzo cha Atata ŵake chifukwa chakuti penze pano pachalo yove epilila kunyozewa, vinthu vochitisha nsoni komasoti kutamanishiwa pa chimuti chotamanilapo chifukwa cha sewo. (Ŵelengani Aheberi 12:2, 3.) Kulaŵila chendi, chisanzo cha kupilila kwa Yehova chimuyavya ngako Yesu kuti naye apilile, ndipo nase chingatiyavyesoti.

18. Kansi lemba ya 2 Petulo 3:9 yutiyavya tyani kuwona ubwino wa kuleza ntima kwa Yehova?

¹⁸ Ŵelengani 2 Petulo 3:9. Yehova oziŵa nthawe iweme yakuti azawononge ichi chalo chiipa. Kuleza ntima kwake kwayavya kuti ŵanthu mamiliyoni anyinji amene ni gulu ikulu aunganijiwe ndipo omulambila komasoti kumutamanda. Ŵanthu onse amene aŵa okondwela kuti yove eleza ntima kwa nthawe itali kuti ove avyalike, aphunzile kumukonda komasoti kuti alipeleke kuli yove. Yehova akazapeleka madaliso kuli ŵanthu akuti apilile mpaka pa mapeto, vizawoneshe kuti yove echita luweme kusankha kuti aleze ntima!

19. Kansi tufunika kusimikija ntima kuchita chinji, ndipo tizalondele madaliso otyani?

¹⁹ Sewo tuphunzila kufumila kwa Yehova vatingachite kuti tikopilila mosangalala. Olo kuti Satana ochitisha mavuto anyinji pano pa chalo, Yehova opitilija mphela kunkhala “Mulungu wachimwemwe.” (1 Tim. 1:11) Sewo nase tingapitilije kunkhala osangalala patuyembekezela moleza ntima kuti Yehova atuŵishe zina yake, awoneshe kuti yove ni woyenela kulamulila, komasoti kuti asilije vinthu viipa na mavuto onse ŵakukumana nawo ŵanthu. Tetyo tiyeni tinkhale osimikija ntima kuti tikopilila komasoti kulimbikisiwa poziŵa kuti Atata ŵasu ŵakululu nawo opilila. Tikachita tetyo, mawu aŵa akwanilishiwe kuli aliyense wa sewo, akuti: “Wodala ni munthu opilila mayeselo, chifukwa chakuti akazavomelejewa, azalondele madaliso a moyo, wechilonjeza Yehova kuli onse opitilija kumukonda.”​—Yak. 1:12.