1-2. Oñgeni onondaka mba Siovaa mbuli mu Isaías 65:16, 17 mbutupameka tutualeko okukoleleya?

“TUALAKO OKUKOLELEYA!” oyo osapi yotyonge tyononthiki ononthatu tyalingilwe menima lyo 2017. Motyonge otyo tualongesilwe, oñgeni tupondola okukoleleya movitateka tulambela. Apa tuakala notyonge otyo palambale omanima ekuana mahi no ngotyo tutualako okukoleleya.

² Ovitateka patyi ukahi nokulambela? Okuti wanyimisa umwe mombunga ine epanga liove? Okuti ulitehelela okuti umulike? Okuti una ovitateka mokonda wakulupa? Okuti wauhulukilwa notyinimawe ine umoneswa ononkhumbi? Okuti ukahi nokumona emone mokonda yomukihi wo Kolona Vilu? Atuho tukevelela nehambu onthiki ovipuka ovio aviho mavikapuako atuhekevihinangaila vali! — Tanga Isaías 65:16, 17.

3. Oityi tuna okulinga iya omokonda yatyi?

³ Omuenyo mouye uno kawapepukile, tuesukisa okukoleleya movitateka ovinyingi. Mahi apa katutu matyivilipo. (Mat. 24:21) Otyo tyilekesa umwe nawa okuti, tuesukisa okutualako okulilongesa okukoleleya. Omokonda yatyi? Omokonda Sesusi wapopia okuti: “Inkha mukoleleya mamukayovola omienyo vienyi.” (Luka 21:19) Okusoka oñgeni vakuetu vali novitateka ngevi tuna vakoleleya, tyipondola okutukuatesako nonthue atukoleleya.

4. Omokonda yatyi tupopila okuti Siovaa ongeleka ongwa yokukoleleya?

⁴ Olie ongeleka ongwa yokukoleleya? O Siovaa Huku. Tyipondola hamwe wahuva nekumbululo olio. Opo utyinoñgonoke soka kuetyi: Ouye auho ukahi nokutuminwa Neliapu tupu weyula  movitateka. Siovaa utyivila okuhanyako ouye ou momuvo wehehi, mahi ukahi nokukevelela onthiki meketyilinga. (Loma 9:22) Siovaa Huku yetu ukahi nokukevelela atee onthiki makahanyako ouye ou wovivi wa Satanasi. Matulilongesa ovipuka etyive Siovaa ekahi nokukoleleya.

5. Oñgeni enyina lya Huku lihole okusiliswa? Iya otyo tyikukalesa ñgeni?

⁵ Enyina liae liasiliswa. Siovaa uhole enyina liae, uhanda ñgeno ovanthu aveho velilinga onthilo. (Isa. 42:8) Mahi mokueenda kuomanima omanyingi, enyina lya Huku litualako okusiliswa. (Sal. 74:10, 18, 23) Enyina lya Huku liehimbika okusiliswa motyikunino tyo Endene etyi Eliapu (tyihangununa okuti “Omutendeleyi”) apopia okuti Huku pena ovipuka aholeka ko Andau na Eva na vahakale nehambu. (Gên. 3:1-5) Tunde opo, ovanthu vatualako okupopia okuti Siovaa weveholeka ovipuka vimwe opo vahakale nehambu. Sesusi ankho wesuka nokusukukisa enyina lya Huku. Otyo alongesile ovalongwa vae okulikuambela okuti: “Tate yetu keulu, enyina liove lisukukiswe.” — Mat. 6:9.

6. Omokonda yatyi Siovaa ayekela palambe omanima omanyingi opo alekese okuti oe wafuapo pala okutumina?

⁶ Outumini wae watyitukilwapo. Siovaa oe vala wafuapo pala okutumina keulu na pano pohi iya onkhalelo yae yokutumina oyo ikahi vali nawa. (Ehol. 4:11) Mahi Eliapu liahongiliya onoandyu novanthu ovanyingi okusoka okuti onkhalelo ya Siovaa yokutumina kaikahi nawa. Ankho tyesukisa omuvo, opo Siovaa alekese okuti onkhalelo yae yokutumina oyo yaviuka. Mokonda yotyo, Siovaa ukahi nokuyeka ovanthu velitumine, opo vamone okuti tyina vahahongolelwa Nae katyiveetela ouwa. (Jer. 10:23) Mokonda Huku wapua-elundo, kumbi otyitateka otyo matyitetululwa nawa-nawa. Tyina tyamatetululwa, Siovaa malekesa okuti Ouhamba wae, oo upondola okuetela ombembwa netuliyo ovanthu aveho kombanda yohi.

7. Ovalie vatyitukilapo Siovaa? Iya oityi mavakalingwa?

⁷ Ovana vae vamwe vemutyitukilapo. Siovaa watunga onoandyu novanthu tyihena onkhali. Petupu apa akambesa. Mahi oandyu imwe yatungwa na Siovaa, Satanasi (tyihangununa okuti “Ondyale”) aityitukilapo Siovaa. Tupu aihongilinya ovanthu vehena onkhali Andau na Eva okumutyitukilapo. Tyihe-otyo vala, onoandyu mbumwe novanthu vamwe aveliwaneka moumphuki wa Satanasi. (Sunda 6) Konyima ovanthu vamwe velongo lyo Isilayeli ankho ovanthu va Huku, avemuanye avahimbika okufenda ovikahuku viomatutu. (Isa. 63:8, 10) Otyipuka otyo tyaihamene unene ku Siovaa, mahi no ngotyo utualako okukevelela aloo onthiki meya okuhanyako onomphuki ombo. Tyina Siovaa amahanyeko onomphuki ombo, matyietela ehambu ovaumbili vae vatualako okukoleleya ngae!

8-9. Omatutu patyi apopiwa konthele ya Siovaa iya oityi onthue tupondola okulinga?

⁸ Omatutu Eliapu. Satanasi wapopia okuti Sombe novaumbili ovakuavo va Huku, vemufenda vala mokonda vapewa ovipuka oviwa. (Jó 1:8-11; 2:3-5) Eliapu litualako okuhunga ovaumbili va Huku atee hono. (Ehol. 12:10) Inkha tutualako okukala nohole na Siovaa, atukala ovakuatyili Kwe, matulekesa okuti Satanasi onkhembi. Nonthue Siovaa upondola okutuyamba nga Sombe, inkha tukoleleya. — Tia. 5:11.

⁹ Hono Satanasi uhongiliya ononkhalamutwe mbonongeleya mbomatutu, okulongesa  okuti Siovaa omukalavi, tupu oe uvelwa onombei ononkhumbi tumona. Mongeleka vamwe vapopia okuti, tyina olukembe lumwe luamankhi, Huku oe weluihana mokonda wesukisa onoandyu keulu. Otyo omatutu! Mokonda onthue tutyii okuti Huku una okankhenda. Onthue tutyii okuti tyina tuna otyitateka tyimwe ine tuanyimisa umwe tuhole, katupondola okuvela onombei Huku. Mahi onthue tuna onthumbi yokuti nthiki imwe Siovaa makamanako omauvela akatutilisa ovanthu vokuankhia. Naina tupopile ovanthu aveho okuti Siovaa Huku omukwaluembia. Inkha tutyilinga matukuatesako Siovaa, okukumbulula una omulinga omukuele. — Pro. 27:11.

10. Oityi o Salmo 22:23, 24 ipopia konthele ya Siovaa?

¹⁰ Ononkhumbi ovaumbili vae vamona. Siovaa o Huku una okankhenda. Huku wiihamenwa unene tyina amona ovipuka ovaumbili vae vakoleleya, ngetyi okuyelwe, nomauvela noukuankhali wetu mwene. (Tanga Salmo 22:23, 24.) Siovaa weete ononkhumbi mbetu, uhanda okumbumanako iya otyo umwe malingi apa katutu. (Tyieleka na Êxodo 3:7, 8; Isaías 63:9) Onthiki imwe Huku ‘makasekuna ononkhuka momaiho [etu], ononkhia kamambukakala-ko vali, nii okuliyava, nii okulila nii omaluihamo kavikakala-ko vali. Ovipuka vyo kohale vialamba-le.’ — Ehol. 21:4.

11. Oñgeni Siovaa elitehelela okusoka kovaumbili vae ovakuatyili vokuanyima?

¹¹ Okuyapulwa kovaumbili vae mokonda yononkhia. Oñgeni Siovaa elitehelela okusoka kovaumbili vae ovakuatyili vokuanyima? Siovaa uhanda okukevemona vali. (Jó 14:15) Soka oñgeni Siovaa akala tyina asoka okukatala vali epanga liae Ambalaiau? (Tia. 2:23) Ine okukatala Moisesi una ankho atomphola nae “tyipala na tyipala”? (Êx. 33:11) Pahe  soka oñgeni Siovaa akala okusoka okukatehelela oviimbo oviwa vimuhilivika vya Daviti novaimbi ovakuavo! (Sal. 104:33) Namphila omapanga a Huku elele mononkhia mahi Siovaa kevelimbilwe. (Isa. 49:15) Siovaa uhinangela nawa oñgeni ankho vatuwa. Ombimbiliya ipopia okuti: “Mokutala kuae aveho vena omuenyo.” (Luka 20:38, okatoi.) Onthiki imwe Siovaa mekevekondolela omuenyo, ahambukwa okutehelela omalikuambelo avo, nokutavela efendelo liavo. Inkha pena umwe wanyimisa, onondaka ombo mbukuungumanesa nokukupameka.

12. Ovitateka patyi Siovaa amona mononthiki mbuno mbonthyulilo?

¹² Ovanthu vamonesa vakuavo ononkhumbi. Etyi ovo Andau na Eva vatyitukilapo Siovaa motyikunino tyo Endene, Siovaa ankho utyii okuti ovipuka mavivilipo. Siovaa uyele ovivi, nokulingua onya noungangala amona mouye uno. Tupu Siovaa wiihamenwa unene okumona ovanthu vehena ava veveyakulila ngetyi onotyiwe novahepe. (Zac. 7:9, 10) Tyehe-tyo vala, Siovaa wihamenwa vali unene tyina amona ovaumbili ovakuatyili vamoneswa ononkhumbi nokupakua movikaleya. Tukalei nonthumbi yokuti Siovaa uhole ovaumbili vae aveho vatualako okukoleleya movitateka ovio.

13. Ovipuka patyi ovivi Huku ohole okumona kovanthu iya oityi malingi?

¹³ Ovipuka ovivi ovanthu valinga. Ovanthu vatungwa otyifuika tya Huku mahi Satanasi uvehongilinya okulinga ovipuka ovivi. Etyi Huku amona okuti “ovivi ovinyingi unene kombanda yohi” pononthiki mba Noe “elivele mokonda etyi aeta ovanthu kombanda yohi atyimuihama komutima.” (Gên. 6:5, 6, okatoi, 11) Okuti hamwe ovivi vitualako okuliyawisa tundee opo? Yoo! Satanasi uhambukwa unene tyina tala ovivi vikahi nokuliyawisa ngetyi ovanthu valinga omaundalelapo novalume valala poyavo! (Efe. 4:18, 19) Tupu Satanasi uhambukwa vali unene tyina omona okuti ovaumbili votyotyili va Huku valinga ononkhali unene. Mahi Siovaa malekesa okuti uyele ovivi ovio tyina amahanyeko aveho valinga ovipuka ovio avehelivele.

14. Oityi ovanthu valinga nohi novinyama Huku atunga?

¹⁴ Ovanthu vanyona ovipuka Huku atunga. Ovanthu kavanyono vala ovanthu vakuavo mahi tupu vanyona ohi novinyama Siovaa evetuma okuyunga. (Ecl. 8:9; Gên. 1:28) Ovanongo vamwe vapopia okuti mokonda yetyi ovanthu valinga, apa katutu ovinyama vimwe nomiti vimwe ovinyingi-nyingi kamavikalako vali. Mokonda yotyo ovanthu ovanyingi vena owoma novipuka vipondola okumoneka kombanda yohi. Mahi onthue tupandula unene Siovaa meya okuhanyako vana vekahi nokuhanya ohi iya ohi aikala omphangu yombembua. — Ehol. 11:18; Isa. 35:1.

15-16. Omokonda yatyi Siovaa akoleleyila? Popia ongeleka.

¹⁵ Soka kovipuka aviho Siovaa Huku yetu ekahi nokukoleleya mokueenda kuomanima omanyingi. (Tala okakasa kati “ Etyi Siovaa Akoleleya.”) Siovaa upondola okumanako ouye ou wovivi momuvo wehehi. Mahi oumphua-lundo wae utukuatesako. Nkhele tusokei kongeleka ei: Tusokei kovalinepi vapopilwa okuti omona wavo makutulwa novitateka iya upondola okunyima tyina nkhele omututu. Namphila vapopilwa ngotyo mahi ovalinepi ovo vena ehambu liokukevelela omona wavo iya vahanda okulinga atyiho vevila opo vemutekule. Mokonda yoluembia vena nomona wavo ovalinepi ovo vakoleleya iya valinga atyiho opo vatekule omona wavo.

 ¹⁶ Tyelifwa notyo ovana aveho va Andau na Eva vatyitwa ovakuankhali. Mahi nongotyo Siovaa uvehole iya uvetukula. (1 Suau 4:19) Ngetyi tyilinga he yovana na Siovaa uhanda okulinga tyimwe opo amaneko ononkhumbi mbovanthu. Atee umwe, Siovaa wanakale onthiki meya okumanako ovipuka aviho vimonesa ononkhumbi ovanthu. (Mat. 24:36) Okuti oluembia Siovaa ena nonthue kalutulundu no onthue okukoleleya?

17. Ngetyi tyipopia Ova Hebeleu 12:2, 3 oñgeni ongeleka ya Sesusi itulunda okukoleleya?

¹⁷ Siovaa wetuavela ongeleka ikahi nawa yokukoleleya. Sesusi wetyivilile okukoleleya mokonda yokuahetekela Tate yae. Etyi ali pano pohi Sesusi wakoleleyile okupopiwa omapita nokumoneswa ononkhumbi atee umwe ankhila momuti wemone mokonda yonthue. (Tanga Ova Hebeleu 12:2, 3.) Onkhalelo Siovaa akoleleya yakuatesileko Sesusi okukoleleya iya nonthue ipondola okutukuatesako okukoleleya.

18. Ngetyi tyipopia 2 Petulu 3:9, oityi tyikahi nokumoneka mokonda youmphua-lundo wa Siovaa?

¹⁸ Tanga 2 Petulu 3:9. Siovaa wii onthiki meya okumanako ouye uno wovivi. Mokonda youmphua-lundo wa Siovaa ovanthu ovanyingi vekahi nokumunoñgonoka nokumuumbila. Iya ovanthu ovo vapandula unene Siovaa wapua-elundo, mokonda yotyo vatyitua avekulo iya avelilongesa okuhumba Siovaa avelipakula kwe. Mokonda yovanthu ovanyingi mavakayovolwa tyilekesa umwe nawa okuti Siovaa walinga nawa etyi apua-elundo!

19. Oityi tuatokola okulinga iya oñgeni matukayambwa?

¹⁹ Ku Siovaa tulilongesilako okukoleleya nehambu. Namphila Satanasi aeta ovitateka vimonesa ovanthu ononkhumbi mahi no ngotyo Siovaa o “Huku wehambu.” (1 Tim. 1:11) Nonthue tupondola okukoleleya nehambu, atukevelela omuvo Siovaa meya okusukukisa enyina liae, alekesa okuti oe vala wafuapo pala okutumina, amaneko ovivi novipuka aviho vitumonesa ononkhumbi. Tutokolei okutualako okukoleleya tyityi okuti na Tate yetu wo keulu ukahi nokukoleleya. Inkha tulinga ngotyo onondaka ombu mambukala mbotyotyili, mbati: “Una ehambu omunthu una utualako okukoleleya mokulolwa, mokonda tyina amapandwa na Huku makatambula ekolowa liomuenyo, lina Siovaa alaa vana vatualako okukala nohole Nae.” — Tia. 1:12.