1-2. Ebigambo bya Yehova ebiri omu Isaaya 65:16, 17 nibituhiga bita kutahanika?

“OTARUHA!” nigwo gwabaire guri omutwe gw’oruteerane oruhango orw’ebiro bishatu orwa 2017. Oruteerane orwo rukatuhwera kureeba oku turikubaasa kwemera okugyezibwa okurikutuhikaho twena. Kuruga obwo hahingwireho emyaka ena, mpaho tukiriyo nitugumisiriza embeera zigumire ez’obunaku obu.

² Oine buremeezi ki obunaku obu? Mbwenu shi ofeereirwe omunyabuzaare nari omunywani? Oine endwara y’amaani? Nooteganisibwa emyaka ya bukuru? N’ekihikiirizi, obushaarizi, nari okuhiiganisibwa? Nari otungire emirabanamu ahabw’endwara, nk’ekigwererezi kya COVID-19? Ka twiniire ekihika obwire obu ebi byona biraabe bitakiriho tutarikubiijuka!​—Shoma Isaaya 65:16, 17.

3. Twine kukora ki hati, kandi ahabw’enki?

³ Embeera zigumire obunaku obu, kandi nizibaasa kwija kugumira kimwe omu biro by’omumaisho. (Mat. 24:21) N’ahabw’ekyo, twine kwongyera amaani omu kugumisiriza kwaitu. Ahabw’enki? Ahakuba Yesu akagira ngu ‘omu kwehangaana nimwo murikwija kujunira amagara gaanyu.’ (Luk. 21:19) Twateekateeka aha ku abandi barikugumira oburemeezi kandi bakaba abasinguzi, nikibaasa kutuhwera kugumisiriza.

4. Ahabw’enki nitugira ngu Yehova niwe ky’okureeberaho kirungi eky’okugumisiriza?

⁴ N’oha otaireho eky’okureeberaho kirungi eky’okugumisiriza? Ni Yehova Ruhanga. Eky’okugarukamu ekyo shi nikikutangaaza? Nikibaasa kukutangaaza waaba otakiteekateekireho. Ensi egi eri omu butware bw’Omuregi, kandi eijwiremu oburemeezi bwingi. Yehova aine amaani g’okwihaho oburemeezi ahonaaho, beitu naayenda kubwihaho omu biro by’omumaisho. (Rom. 9:22) Kwonka hati, Ruhanga naagumizamu naagumisiriza  kuhitsya omu bunaku bwe obuhikire. Ka tureebe ebintu mwenda ebi Yehova agumisiriize.

5. Eiziina rya Ruhanga ritwire nirishiishwa rita, kandi eki nikikureetera kwehurira ota?

⁵ Eiziina rye okuguma nirishiishwa. Yehova naakunda eiziina rye, kandi naayenda ngu buri omwe arihe ekitiinisa. (Isa. 42:8) Kwonka kumara emyaka nka 6000 ehingwire, ritwire nirishiishwa. (Zab. 74:10, 18, 23) Eki kikatandikira omu musiri Edeni obu Omuregi (ekirikumanyisa “Orikubeiherera”) yaayomesereza Ruhanga ngu naima Adamu na Haawa ekirikubaasa kubareetera okushemererwa. (Kut. 3:1-5) Kuruga obwo, abantu batwire niboomesereza Yehova ngu naabaima ebi baine kutunga. Yesu akaba naakwatwaho ahabw’eiziina rya Ishe kushiishwa. Eki kikamureetera kwegyesa abeegi be kushaba bati: “Tataitwe ow’omu iguru, eiziina ryawe ryezibwe.”​—Mat. 6:9.

6. Ahabw’enki Yehova arekire obwire kuhinguraho kubaasa kushoboorora enshonga y’okutegyeka byona?

⁶ Okuhakanisa obushoboorozi bwe bw’okutegyeka. Yehova niwe ahikiire kimwe kutegyeka eiguru n’ensi, kandi niwe arikukirayo kutegyeka gye. (Kush. 4:11) Kwonka Omuregi atwire naateeraho kuhabisa baamaraika n’abantu kuteekateeka ngu Ruhanga taine bushoboorozi bw’okutegyeka. Enshonga y’okuba ohikire kutegyeka ekaba etarikubaasa kushoboororwa omu bwire bukye. Omu bwengye, Ruhanga arekire haahinguraho obwire burikumara kwereebera ngu abantu baateeraho kwetegyeka bonka nibaremwa. (Yer. 10:23) Ahabw’okugumisiriza kwa Ruhanga, enshonga egi neija kushoboororwa omurundi gumwe ehwe. Naija kwihwaho orubanja, ku araayoreke butunu ngu Obukama bwe bwonka nibwo burikubaasa kureetaho obusingye n’oburinzi ebyabuzima omu nsi.

7. Ni baahi abaagomiire Yehova, kandi naija kubakorera ki?

⁷ Obugomi bwa bamwe aha baana be. Yehova akahanga abaana be ab’omwoyo n’ab’abantu boona bahikiriire, bataine bumogo. Kwonka omwana we ow’omwoyo akagoma yaaba Sitaane (ekirikumanyisa “Omuhakanisa”) kandi yaareetera abantu abahikiriire Adamu na Haawa kugomera Yehova. Baamaraika abandi n’abantu bakeegaita aha bugomi obwo. (Yud. 6) Bwanyima, n’ab’eihanga rya Israeli abaabaire bari abantu ba Ruhanga abatoorainwe bakamwanga baatandika kuramya baaruhanga b’ebishuba. (Isa. 63:8, 10) Buzima bakareebya Yehova. Kwonka nabwo, akagumisiriza kandi naija kugumizamu agumisiriize kuhitsya obu araacwekyereze abagomi boona. Eki nikiija kureetera oburuhuuko boona abaamuhamiireho abarikugumisiriza embeera mbi ez’obunaku obu.

8-9. Ni bishuba ki ebirikugambwa ahari Yehova, kandi nibitureetera kutwaza tuta?

⁸ Ebishuba by’Omuregi ebitwireho. Sitaane akomesereza Yobu omuheereza wa Yehova omwesigwa, kandi ebi yaamugambireho nibikwata n’aha beesigwa boona, ngu nibamuheereza ahabw’okweyendeza. (Yob. 1:8-11; 2:3-5) Omuregi agumiizemu naayomesereza abantu okuhitsya na hati. (Kush. 12:10) Nitubaasa kworeka ngu ebishuba bya Sitaane tibirimu kanyitsi koona turikugumizamu nitugumisiriza okugyezibwa kwaitu, kandi turikuguma tuhamiire ahari Yehova ahabw’okumukunda. Nk’oku kyabaire ahari Yobu, okugumisiriza kwaitu nikwija kurugamu ebirungi.​—Yak. 5:11.

⁹ Sitaane naakoresa abeebembezi b’ediini z’ebishuba kureetera abantu kuteekateeka ngu Yehova n’omwinazi, orikubonabonesa abantu. Nangwa n’abamwe nibagira ngu abaana baafa, ni Ruhanga orikuba yaabatwara ahabw’okwenda baamaraika abandi omu iguru. Oku  ka n’okurogota kw’amaani! Nitumanya gye ekihikire. Ku turikurwara endwara y’amaani nari twafeerwa omukundwa, titurikubaasa kucwera Ruhanga orubanja. Omu mwanya gw’ekyo, twine amatsiko ngu eizooba rimwe, naija kutereeza buri kimwe. Nitubaasa kugambira buri omwe orikuhurikiza ngu Yehova ni Ruhanga owa rukundo. Eki nikimureetera kutunga eky’okugarukamu ogwo otwire naamujuma.​—Enf. 27:11.

10. Ebiri omuri Zaaburi 22:23, 24 nibyoreka ki ahari Yehova?

¹⁰ Okubonabona kw’abaheereza be abakundwa. Yehova ni Ruhanga ow’embabazi. Nikimukora kubi kuhurira nitutaka ahabw’okubonabona, okuhiiganisibwa, endwara, nari obutahikiirira. (Shoma Zaaburi 22:23, 24.) Yehova naayetegyereza obusaasi bwaitu, naayenda kubwihaho, kandi buzima naija kubwihaho. (Gyeragyeranisa Okuruga 3:7, 8; Isaaya 63:9.) Eizooba naija kuragaza “amarira goona aha maisho [gaitu, tiharikwija kugaruka kubaho] kufa bundi, n’obu kwakuba okucura nari okurira nari obusaasi.”​—Kush. 21:4.

11. Yehova aine rushusho ki aha bikwatiraine n’abaheereza be abaafiire?

¹¹ Okutaanisibwa na banywani be abaafiire. Abashaija n’abakazi abeesigwa abaafiire nibareetera Yehova kwehurira ata? Aine ekihika ky’okugaruka kubareeba! (Yob. 14:15) Noobaasa kuteebereza orushusho oru Yehova ainiire munywani we Abrahamu? (Yak. 2:23) Nari Musa ou yaagambire nawe “nibareebana”? (Kur. 33:11) Kandi ka ashemereire kuba aine ekihika ky’okuhurira Daudi n’abeeshongozi ba zaaburi abandi barikweshongora ebyeshongoro byabo eby’okuhimbisa! (Zab. 104:33) N’obu banywani ba Ruhanga aba baraabe bagwejegyereire omu kufa, tabeebirwe. (Isa. 49:15) Naijuka buri kashonshorekye ak’emitwarize yaabo. Baibuli neegira ngu, ‘omu maisho ge  boona nibaba bahuriire.’ (Luk. 20:38) Eizooba rimwe, naija kubazoora bagarukye babe abahuriire, kandi naija kugaruka kuhurira okushaba kwabo asiime n’okuramya kwabo. Ku oraabe ofeereirwe omukundwa, amatsiko aga ka gakugumye kandi gakuhuumurize!

12. Okukira munonga niki ekirikureetera Yehova obusaasi omu biro bibi ebi?

¹² Abantu babi okutwariza kubi abandi. Obugomi ku bwatandikire omuri Edeni, Yehova akaba naamanya ngu embeera niziija kubanza kweyongyera kuba mbi, reero zibone kutereera. Naayanga ebikorwa bibi, obutari buringaaniza, n’obushaarizi ebiri omu nsi obunaku obu. Atwire ainiire embabazi abataine kihwera, abataine maani n’oburinzi, efuuzi n’efaakazi. (Zek. 7:9, 10) Nikimureetera obusaasi kureeba abaheereza be abeesigwa nibatwarizibwa kubi kandi nibakomwa. Mugire obuhame ngu mwena abariyo nibagumisiriza nawe naabakunda munonga.

13. Abantu beeyongyeire bata kuba abahwanshoni, kandi ekyo Ruhanga naija kukikorera ki?

¹³ Abantu okwongyera kuba abahwanshoni. Sitaane naakunda kureetera abantu abaahangirwe omu kishushani kya Ruhanga kuba abahwanshoni. Ruhanga ku yaareebire ebikorwa bibi ‘by’abantu biri bingi omu nsi’ omu bwire bwa Noa, akeefuuza “eki yaahangiire omuntu omu nsi, kandi kyamugwisa kubi omu mutima gwe.” (Kut. 6:5, 6, 11) Kuruga obwo shi embeera zihindukire zaaba nungi? Ngaaha buzima! Omuregi ka aine kuba naashemererwa kureeba obuhwanshoni obw’emiringo yoona nibweyongyera, nk’ebihagaro ebirikukorwa abatarikushushanisa buhangwa n’abarikushushanisa obuhangwa! (Efe. 4:18, 19) Okukira munonga Sitaane naashemererwa yaareetera omuntu ori omu kuramya okw’amazima kukora ekibi. Obwire bwa Yehova obw’okugumisiriza ku buraahweyo, naija kworeka oku arikwangira kimwe obuhwanshoni.

14. Abantu nibatwariza bata ebihangirwe bya Ruhanga eby’omu nsi?

¹⁴ Okushiishagura ebihangirwe bye. Abantu tibarikwekuriza ‘ahari bagyenzi baabo kubakora kubi’ kyonka, beitu nibareeberera kubi ensi n’enyamaishwa ebi Yehova yaabakwatsize. (Mub. 8:9; Kut. 1:28) Abahangu abamwe nibarabura ngu ebikorwa by’abantu nibibaasa kureetera ebika * by’ebihangirwe akakaikuru kamwe kucwekyerera bikahwaho omu myaka mikye erikwija. Tikirikutangaaza kureeba nibagira ngu obuhangwa buri omu kabi! Nikishemeza kureeba ngu Yehova naaraganisa ‘kuhwerekyereza abarikuhwerekyereza ensi’ n’okuhindura ensi yoona paradiso.​—Kush. 11:18; Isa. 35:1.

15-16. Niki ekishemereire kutuhiga kugumisiriza hamwe na Yehova? Ha eky’okureeberaho.

¹⁵ Teekateeka aha buremeezi oburikureeta obusaasi obu Tataitwe ow’omu iguru atwire agumisiriize kumara enkumi z’emyaka. (Reeba akabokusi “ Ebi Yehova Arikugumisiriza.”) Yehova eshaaha yoona naabaasa kuhendera embeera embi eziriho hati. Kwonka okugumisiriza kwe kutubeereire omugisha! Nitubaasa kukiteekateekaho tuti. Ka tugire ngu omushaija n’omukazi we baagambirwa ngu omwana waabo otakazairwe naija kuzaarwa aine oburemeezi, tarikwija kugira amagara marungi, kandi ngu naija kufa akiri muto. Kwonka, abazaire bacwamu kuzaara omwana ogwo n’obu baraabe nibaija kuraba omu mbeera zigumire. Rukundo ei bainiire omwana waabo neebahiga kugumisiriza oburemeezi bwona kumureeberera gye nk’oku kirikubaasika.

¹⁶ Nikyo kimwe, baijukuru b’Adamu na Haawa  boona nibaija omu nsi bari abatahikiriire. Kwonka nabwo, Yehova naabakunda kandi naabareeberera. (1 Yoh. 4:19) Kandi Yehova okutashushana n’abazaire ab’omu ky’okureeberaho eki twakoresa, haine eki arikubaasa kukora. Yaataireho obwire obu araiheho okubonabona kwona okutwire nikuhika aha bantu abu yaahangire. (Mat. 24:36) Mbwenu shi rukundo teshemereire kutuhiga kugumisiriza nawe obwire bwona obu kiraabe nikyetengyesa?

17. Ebirikukwata ahari Yesu ebiri 1 Petero 2:21-24 nibituhiga bita kugumizamu nitugumisiriza?

¹⁷ Yehova ataireho eky’okureeberaho ekihikiriire eky’okugumisiriza. Yesu akaba omusinguzi omu kutooreza Yehova aha bikwatiraine n’okugumisiriza. Obu Yesu yaabaire ari omuntu, akagumisiriza okujumwa, okuhemangurwa, n’obusaasi bw’okufeera aha muti ahabwaitu. (Shoma 1 Petero 2:21-24.) Eky’okureeberaho kya Yehova hatariho kubangaanisa, kikaha Yesu amaani g’okugumisiriza. Naitwe nikibaasa kutuha amaani g’okugumisiriza.

18. Ebiri omu 2 Petero 3:9 nibituhwera bita kwetegyereza omugasho gw’okugumisiriza kwa Yehova?

¹⁸ Shoma 2 Petero 3:9. Yehova naamanya obwire buhikire obw’okwihaho embeera mbi eziriho hati. Okugumisiriza kwe kubaasiise abantu nyamwingi abarikuhika omu bukaikuru kurundaanwa, abarikumuramya kandi bakamuhimbisa. Boona nibashemererwa kureeba ngu Yehova agumisiriize obwire burikumara, reero kyababaasisa kuzaarwa, baayega kumukunda, kandi baayehayo ahariwe. Okucwamu kwe kugumisiriza nikwija kwongyera kusiimwa, ku araahe emigisha obukaikuru bw’abantu ahariitwe abaraagumisirize kuhitsya aha muheru!

19. Twine kumariirira kukora ki, kandi nitwija kutunga kihembo ki?

¹⁹ Nitwegyera ahari Yehova okugumisiriza twine okushemererwa. Oyihireho enaku n’okubonabona ebi Sitaane areetsireho, Yehova naaguma ari Ruhanga ow’okushemererwa. (1 Tim. 1:11) Naitwe nitubaasa kugumisiriza tushemereirwe tutegyereize obu araayeze eiziina rye, akooreka omu bwijwire ngu niwe ahikire kutegyeka byona, akaihaho embeera mbi zoona, n’oburemeezi bwona obu twine hati. Ka tumariirire kugumisiriza kandi tugire obwesigye ahabw’okumanya ngu Tataitwe ow’omu iguru nawe naagumisiriza. Twakora tutyo, ebigambo ebi nibiija kuhikiirira ahari buri omwe ahariitwe: ‘Omuntu orikugumisiriza omu kugyezibwa aine [okushemererwa], ahakuba ku araasingure, naija kuheebwa ekirunga ky’amagara, eki Ruhanga yaaraganiise abarikumukunda.’​—Yak. 1:12.