NKHANI YAKUPFUNZA 27
Tewezerani Kupirira kwa Yahova
‘Mukapitiriza kupirira, mun’dzagumana moyo.’—LUKA 21:19.
NYIMBO 114 ‘Latizani Khalidwe la Kupirira’
BZOMWE TIN’PFUNZA *
1-2. Kodi mafala ya Yahova yomwe yali pa Zaiya 65:16, 17, yambatilimbikisa tani kuleka kubwerera m’mbuyo?
“LEKANI KUBWERERA M’MBUYO!” ukhali msolo wa mtsonkhano wa cigawo wa 2017. Mtsonkhanoyo udatithandiza kuwona kuti tingapirire tani mabvuto yomwe timbagumana nayo. Papita kale magole manai kucokera pomwe tidacita mtsonkhanoyo, ndipo tikadapitiriza kupirira moyo wakunesa m’dziko lakuipali.
2 Kodi ni mabvuto yaponi yomwe mwagumana nayo tsapanopali? Kodi mwafedwa wadzinza wanu ayai xamwali wanu? Kodi muna matenda yomwe yakukuboneresani? Kodi moyo ukukunesani thangwe ra kukalamba? Kodi mudagwedwa na malengwa ya pantsi, kucitiridwa ciwembo ayai kuzunzidwa? Kodi mukubonera thangwe ra matenda ya COVID-19 ayai matenda yanango? Ifepano tikudikhirira nthawe yomwe mabvutoya yan’dzawoneka lini pomwe ndipo ne tin’dzayakumbukira lini pomwe!—Werengani Zaiya 65:16, 17. *
3. Kodi n’ciyani comwe tin’funika kucita tsapano, ndipo thangwe ranyi?
3 Ntsiku zino, moyo wanesa, ndipo pinango ifepano kutsogoloku tingadzagumane na mabvuto mazinji pa moyo wathu. (Mateu 24:21) Kulewa cadidi, ifepano tin’funika kupitiriza kupfunza kuti tidzapirire. Thangwe ranyi? Thangwe Jezu adalewa kuti: ‘Mukapitiriza kupirira, mun’dzagumana moyo.’ (Luka 21:19) Kukumbukira kuti wanthu winango akupirira mabvuto ninga yathu, kungatithandize kuti tipirirembo.
4. Thangwe ranyi tingalewe kuti Yahova ni ciratizo cabwino pa nkhani yakupirira?
4 Kodi mbani ciratizo cabwino pa nkhani yakupirira? Ni Yahova Mulungu. Kodi mukudabwa na mtawiroyu? Pinango-pentse. Tsono dzikoli likutongedwa na Dyabu, ndipo lidadzala na mabvuto. Yahova ana mphanvu yakumalisa mabvutoya nthawe iri-yentse, tsono iye akudikhirira kudzayamalisa kutsogolo. (Waroma 9:22) Pakali pano Mulungu akadapitiriza kupirira mpaka nthawe yomwe adzapfudze dzikoli. Mbaticezeraneni bzinthu bzipfemba bzomwe Yahova akubzipirira.
BZINTHU BZOMWE YAHOVA AKUPIRIRA
5. Kodi dzina la Mulungu likunyozedwa tani, ndipo imwepo mumbabzibva tani?
5 Kunyozedwa kwa dzina lace. Yahova ambafuna dzina lace, ndipo iye akufunambo kuti munthu ali-wentse ambalilemekeze. (Zaiya 42:8) Tsono papita kale magole yakupitirira 6.000 ndipo dzina la Mulungu likupitiriza kunyozedwa. (Psalymo 74:10, 18, 23) Bzimwebzi bzidayambira mu zunde la Edeni pomwe Dyabu (kuthandauza kuti “Nyamagunkha”) adalewa kuti Mulungu akhafuna lini kuti Adamu na Eva akhale na cinthu comwe cingadawacitisa kukhala wakukondwa. (Ciyambo 3:1-5) Kuyambira nthawe imweyire, Yahova ambanamiziridwa kuti ambamana wanthu bzomwe iwo ambafunikira. Jezu akhacita thupo thangwe ra kunyozedwa kwa dzina la Baba wace. Ndipopa iye adapfunzisa anyakupfunza wace kuti ambapembe kuti: ‘Baba wathu kudzuluko, dzina lanu licenesedwe.’—Mateu 6:9.
6. Thangwe ranyi Yahova adabvuma kuti papite nthawe kuti alatize kuti ndiye omwe adathemera kutonga kudzulu na pa dziko la pantsi?
6 Kunyozedwa kwa utongi bwace. Ni Yahova yekha omwe adathemera kutonga kudzulu na pa dziko la pantsi, ndipo katongedwe kaceko n’kabwino kwene-kwene. (Cibvumbulutso 4:11) Tsono Dyabu adayezera kupumpsa wanjo na wanthu mwa kuwacitisa kukumbuka kuti Mulungu alibe ugo bwakutonga. Pangadatenga nthawe kuti wanthu awone kuti Yahova ana ugo bwakutonga ndipo ni Mtongi wabwino. Pakuti Mulungu ngwanzeru, iye adabvuma kuti papite nthawe kuti wanthu awone okha kuti iwo angakwanise lini kutsogolerana mwakusaya kuthemba Mulengi. (Jeremiya 10:23) Thangwe ra kupirira kwa Mulungu, nkhani imweyi in’dzamalisidwa kabodzi na kabodzi. Ndipo wanthu wentse an’dzadziwa kuti katongedwe ka Mulungu n’kabwino ndipo Umambo bwace bun’dzabweresa mtendere na mkhomeko.
7. Kodi mbani omwe adapandukira Yahova, ndipo iye an’dzacita ciyani na wanthuwo?
7 Kupanduka kwa wana wace winango. Yahova adalenga wanjo wace na wanthu wakulungamiratu. Tsono Sathani (kuthandauza kuti “Nyakutsutsa”) adapandukira Yahova, ndipo iye adapumpsa Adamu na Eva kuti apandukirembo Yahovayo. Wanjo na wanthu winango adacitambo bzibodzi-bodzibzi. (Djuda 6) Na kupita kwa nthawe, mtundu wa Ajirayeri, omwe akhali wanthu wakusankhulidwa na Mulungu adalamba Mulunguyo aciyamba kunamata mirungu yakunama. (Zaiya 63:8, 10) Yahova adabzibva kuti adaphindukiridwa. Napo bziri tenepo, iye akupitiriza kupirira ndipo an’pitiriza kucita bzimwebzi mpaka nthawe yomwe an’dzapha wentse omwe adamupandukira. Bzimwebzi bzin’dzabweresa bzisimbo kwa atumiki wace omwe akupirira naye pabodzi bzinthu bzakuipa m’dzikoli!
8-9. Kodi ni bzinthu bziponi bzomwe wanthu ambanamizira Yahova, ndipo ifepano tingacite ciyani?
8 Magunkha ya Dyabu. Sathani adanamizira Djobi, mtumiki wakukhulupirika wa Yahova, mwakulewa kuti atumiki wentse wakukhulupirika wa Yahova ambatumikira Mulungu thangwe ra psete. (Djobi 1:8-11; 2:3-5) Dyabu akadapitiriza kunamizira atumiki wa Yahova mpaka ntsiku zino. (Cibvumbulutso 12:10) Tsono tingalatize kuti Sathani ngwakunama mwa kupitiriza kupirira mabvuto na kupitiriza kukhala wakukhulupirika kwa Yahova thangwe ra lufoyi. Ndipo ninga Djobi, ifepano tin’dzasimbidwa tikapitiriza kupirira.—Tiyago 5:11.
9 Sathani ambaphatisa basa atsogoleri wa magereja yakunama kuti ambalewe kuti Yahova ngwakuipa ndipo ndiye omwe akucitisa kuti wanthu abonere. Ndipo winango ambalewa kuti mwana akasaika, Mulungu amutenga thangwe iye akufuna wanjo azinji kudzulu. Kumweku n’kunyoza Mulungu! Ifepano timbadziwa kuti Yahova ni Baba wa lufoyi. Ndipo tikaduwala mwakuti penu-penu ayai tikasaikidwa m’bale wathu, timbalewa lini kuipa Mulungu. M’mbuto mwace, ifepano timbakhulupira kuti ntsiku inango iye an’dzamalisa matenda ndipo an’dzalamusa anyakufa. Ifepano tingathandize munthu ali-wentse omwe angafune kudziwa momwe Yahova aliri Mulungu wa lufoyi. Tikacita bzimwebzi, Yahova ambakwanisa kutawira ule omwe akumunyonza.—Mimwani 27:11.
10. Kodi Psalymo 22:23, 24 ambalewa ciyani bza Yahova?
10 Kubonera kwa atumiki wace omwe ambawafuna. Yahova ni Mulungu wa ntsisi. Iye ambawawidwa kwene-kwene akatiwona tikubonera, pinango thangwe ra kuzunzidwa, matenda ayai thangwe ra kuperewera kwathu. (Werengani Psalymo 22:23, 24. *) Yahova ambabvesesa momwe ifepano timbabvera kuwawa. Iye akufuna kumalisa kuwawako, ndipo an’dzakumalisadi. (Ndendemezerani na Kufuluka 3:7, 8; Zaiya 63:9.) In’dzafika nthawe yomwe ‘iye an’dzapukuta misozi yentse m’maso [mwathu], ndipo infa in’dzawoneka lini pomwe. Pan’dzawoneka lini pomwe kulira, ayai kubuula ne kuwawidwa.’—Cibvumbulutso 21:4.
11. Kodi Yahova asuwa ciyani kuna atumiki wace wakukhulupirika omwe adasaika?
11 Cisuwo na axamwali wace omwe adafa. Kodi Yahova ambabzibva tani akakumbukira atumiki wace wakukhulupirika omwe adasaika? Iye akufunisisa kudzawawona pomwe. (Djobi 14:15) Kodi imwepo mungakwanise kubvesesa cisuwo comwe Yahova anaco na xamwali wace Abalahamu? (Tiyago 2:23) Ayai Mozeji omwe adalewalewa naye ‘maso na maso’? (Kufuluka 33:11) Ndipo Yahova akufunisisambo kudzabva Davide pabodzi na anembi winango wa bukhu la Psalymo akuyimba nyimbo zabwino zakumutumbizisa. (Psalymo 104:33) Napo kuti axamwali wa Mulunguwa adafa, tsono Yahova alibe kuwayebwa. (Zaiya 49:15) Iye ambakumbukira bwino-bwino unthu bwawo. Bibliya limbalewa kuti ‘kwa iye wentse ana moyo.’ (Luka 20:38) Ntsiku inango, Yahova an’dzawalamusa acikhala pomwe na moyo, ndipo an’dzabva pomwe mipembo yawo acibvuma kunamata kwawo. Penu imwepo mudafedwa, mafalaya yangakutsangalazeni.
12. Kodi ni bzinthu bziponi bzomwe Yahova ambawawidwa nabzo mu ntsiku zakumalizira zino?
12 Kuboneresedwa kwa wanthu na wanthu wakuipa. Pomwe kupanduka kudayamba mu Edeni, Yahova adadziwa kuti bzinthu pa moyo wa wanthu bzingadadzakhala bzakunesa pomwe ikanati kufika nthawe yabwino. Yahova ambaipidwa na uipi, kusaya cirungamo na ciwembo bzomwe bzikucitika m’dzikoli ntsiku zino. Ndipo iye nthawe zentse ambabva ntsisi na wanthu, maka-maka na wale omwe akubonera ndipo palibe wanthu omwe angawakhotcerere, ninga nkhungwa na mkazi mansiwa. (Zakariya 7:9, 10) Yahova bzimbamuwawa kwene-kwenetsa akawona atumiki wace wakukhulupirika akuboneresedwa na kufungiridwa m’kawoko. Tenepo tsimikizani kuti iye ambakufunani mwentsene omwe mukupirira naye pabodzi.
13. Kodi ni makhalidwe yaponi yakuipa yomwe Mulungu ambayawona kuna wanthu, ndipo iye an’dzacita nawo tani wanthuwo?
13 Makhalidwe yakuipa ya wanthu. Wanthu adalengedwa kuti ambatewezere Mulungu, tsono Sathani ambafuna kuwacitisa bzinthu bzakuipa. Pomwe Yahova ‘adawona kuti kuipa kwawanda’ pa nthawe ya Nowa, iye ‘[adakhumbula] kuti adakonza wanthu pa dziko la pantsi, ndipo bzidamuwawa kwene-kwene mu mtima mwace.’ (Ciyambo 6:5, 6, 11) Kodi ntsiku zino bzinthu bzacinja bzicikhala bwino? Ne na pang’onopo! Dyabu ambakomedwa kwene-kwene na mtundu uli-wentse wa upombo bomwe bukucitika, kuphatanidzambo malume ya pa mphasa ya wanthu omwe ali lini pa banja pabodzi na malume ya pa mphasa ya amuna ayai akazi okha-okha! (Wayefezo 4:18, 19) Ndipo Sathani ambakomedweratu kwene-kwene akawona kuti wanthu omwe ambanamata Yahova acita pikado. Yahova akadzaneta kupirira, an’dzalatiza kuti ambawenga upombo mwa kupha wanthu wentse wa upombo omwe ambalamba kucinja.
14. Kodi wanthu akucita ciyani na cirengedwe ca Mulungu?
14 Kudzongedwa kwa cirengedwe cace. Sikuti ‘munthu [akundopweteka] munthu mwanzace pa kumutonga,’ koma iye akusamalirambo lini dziko la pantsi na bzirombo ninga momwe Yahova akhafunira kuti munthuyo acite. (Mpalizi 8:9; Ciyambo 1:28) Masiyentista yanango yambalewa kuti bzakucita bza wanthu bzingacitise kuti mitundu ya bzirombo na miti yakukwana midyau ibodzi bzizambazike magole yakubweraya. Mpsakupusa kubvesesa kuti thangwe ranyi wanthu ambakhala na thupo na cirengedwe. Tikutenda kwene-kwene Yahova thangwe adalewa kuti ‘[an’dzapha] wale omwe akudzonga dziko la pantsi,’ ndipo an’dzasandusa dziko la pantsi kukhala paraizo.—Cibvumbulutso 11:18; Zaiya 35:1.
KODI TIKUPFUNZA CIYANI NA KUPIRIRA KWA YAHOVA?
15-16. Kodi n’ciyani cingaticitise kuti tipirire pabodzi na Yahova? Fotokozani ciratizo.
15 Kumbukirani mabvuto yentse yomwe Baba wathu wa kudzulu akuyapirira kuyambira kale-kale. (Onani kwadru yakuti “ Bzinthu Bzomwe Yahova Akubzipirira.”) Yahova angadafuna angadapfudza dziko lakuipali pa nthawe iri-yentse. Tsono kupirira kwace kukutithandiza kwene-kwene. Kumbukirani ibzi! Tiyezezere kuti banja lauzidwa kuti mwana wawo an’dzabadwa lini na thanzi labwino ndipo akadzandoti wabadwa, moyo wace un’dzakhala wakunesa ndipo an’dzafa akali mwana. Napo bziri tenepo, aberekiwo akukomedwa pa kubadwa kwa mwanayo napo acidziwa kuti an’dzabonera naye pa kumufuwa. Thangwe ra lufoyi na mwanayo, iwo akupirira mabvuto yali-yentse ndipo akucita bzomwe angakwanise kuti apitirize kumufuwa mwana wawoyo.
16 Mpsibodzi-bodzimbo na mbadwe zentse za Adamu na Eva, izo zimbabadwa zakuperewera. Napo bziri tenepo, Yahova ambazifuna ndipo ambazisamalira. (1 Juwau 4:19) Ndipo mwakusiyana na banja la mu ciratizoli, Yahova an’dzamalisa kubonera kwa wana wace wentse. Iye akudziwa kale nthawe yomwe an’dzamalisa kuboneraku. (Mateu 24:36) Kodi lufoyi la Yahova limbaticitisa lini kufuna kupitiriza kupirira naye pabodzi?
17. Kodi mafala yakulewa bza Jezu yomwe yali pa Wahebereu 12:2, 3 yakutilimbikisa tani kuti tipitirize kupirira?
17 Yahova ni ciratizo cabwino pa nkhani yakupirira. Jezu adatewezera kupirira kwa Baba wace. Pomwe iye akhali pa dziko la pantsi, adapirira pomwe akhalewedwa mafala yakuipa, bzinthu bzakupasisa manyazi na kupirirambo pomwe akhali pa muti wakuzunzidwira kuti atipulumuse. (Werengani Wahebereu 12:2, 3. *) Ciratizo ca kupirira kwa Yahova cidalimbikisa Jezu kuti apirire ndipo cingatilimbikisembo.
18. Kodi 2 Pedru 3:9 ambatithandiza tani kubvesesa bzomwe bzikucitika thangwe ra kupirira kwa Yahova?
18 Werengani 2 Pedru 3:9. * Yahova akudziwa nthawe yabwino yomwe an’dzapfudza dziko lakuipali. Kupirira kwa Yahova kukuthandiza wanthu azinji kuti amudziwe, ndipo tsapano thimu likulu la mamidyau ya wanthu likumunamata. Ndipo wanthu wentsenewo ambatenda thangwe ra kudziwa kuti Yahova akupirira kuyambira kale-kale mpaka iwo kubadwa, acipfunza kumufuna na kubzipereka kwa iye. Wanthu an’dzabvesesa thangwe lomwe limbacitisa Yahova kuti apirire pomwe iye an’dzatipasa moyo wabwino thangwe ra kupirira kwathu mpaka kuphampha kwa dzikoli!
19. Kodi tin’funika kutsimikiza kucita ciyani, ndipo tin’dzakhala na mabaibai yaponi tikacita bzimwebzo?
19 Ifepano timbapfunza na Yahova momwe tingakhalire wakukondwa. Napo kuti pana bzinthu bzakuwawa na mabvuto yomwe Sathani adayakolomola, Yahova akupitiriza kukhala ‘Mulungu wakukondwa.’ (1 Timotio 1:11) Ifepano tingapitirize kukhala wakukondwa pomwe tikudikhirira mwakupirira kuti Yahova acenese dzina lace, amalise uipi, atsimikizire kuti ndiye omwe adathemera kutonga na kumalisa mabvuto yentse yomwe tikugumana nayo. Tenepo, mbatitsimikizeni kupirira na kukhala na mtsangalazo ticidziwa kuti Baba wathu wa kudzulu akupirirambo. Tikacita bzimwebzi mafala aya yan’dzaphata basa kwa ifepano: ‘Wakukondwa ni ule omwe an’pitiriza kupirira pomwe akuboneresedwa, thangwe rakuti akawonedwa kuti ngwakuthemera an’dzatambira korowa ya moyo, yomwe Yahova adalewa kuti an’dzaipereka kwa omwe an’pitiriza kumufuna.’—Tiyago 1:12.
NYIMBO 139 Bziyezezereni Kuti Muli M’paraizo
^ ndi. 5 Tentsenefe timbagumana na mabvuto. Mabvuto mazinji yambakhala yalibe mankhwala. Tenepo mankhwala yace ni kupirira basi. Tsono ndife lini tekha omwe tikupirira. Yahova ali kupirirambo bzinthu bzizinji. Mu nkhani ino, tin’cezerana bzipfemba pa bzinthubzo. Ndipo tiniwonambo bzinthu bzabwino bzomwe bzikucitika thangwe ra kupirira kwa Yahova, na bzomwe tingapfunze na bzinthubzo.
^ ndi. 2 Zaiya 65:16 Tenepo, ali-wentse pa dziko la pantsi omwe an’dzakhumba kusimbidwa, an’dzasimbidwa na Mulungu wacadidi, ndipo omwe an’dzalumbira pa dziko la pantsi, an’dzalumbirira Mulungu wacadidi. Pakuti mabvuto yakale-kale yan’dzayebwedwa, thangwe yan’dzawoneka lini m’maso mwangu. 17 Pakuti ndikulenga kudzulu kupsa na dziko lipsa. Bzinthu bzakale bzin’dzakumbukiridwa lini pomwe, ne kubwera mu mtima.
^ ndi. 10 Psalymo 22:23 Imwe omwe mumbagopa Yahova, mutumbizeni! Mulemekezeni wana wentse wa Djakobo! Mugopeni, imwe mwentse wana wa Jirayeri. 24 Pakuti iye alibe kunyoza ne kunyantsidwa na matsautso ya munthu wakubonera; alibe kumubisira nkhope yace. Pomwe adadandaula kuti amuthandize, iye adabva.
^ ndi. 17 Wahebereu 12:2 Ticinyang’anisisa Mtumiki Mkulu na wakucitisa cikhulupiro cathu kuti cikhale cakukwana, Jezu Kristu. Thangwe ra cikondweso comwe adamuikhira patsogolo pace, iye adapirira pa muti wace wakuzunzidwira, iye alibe kucita thupo na manyazi, ndipo tsapano wakhala pantsi ku boko la madidi la mpando wa Umambo wa Mulungu. 3 Tenepo, kumbukirani mwakusamala ule omwe adapirira mafala yakunyoza ya anyakuphonya omwe akhacita bzinthu bzakundowabweresera phindu, kuti muleke kuneta mucibwerera m’mbuyo.
^ ndi. 18 2 Pedru 3:9 Yahova ngwacinono lini pa piciro lace ninga momwe wanthu winango ambawonera, koma iye ambapirira namwe thangwe an’funa lini kuti munthu ali-wentse adzapfudzidwe, koma an’funa kuti wentse akungule.
