1-2. Ngimba amasyu agha ghali pa Yesaya 65:16, 17 ghikutukasya bulebule ukuti tukindilileghe ukwifimbilisya?

ULUKOMANO lwa kighaba ulwa 2017 lwali numutu uwakuti “Tungakatalagha.” Ulukomano ulu lwatukasisye muno tubaghile ukubombela ukuti twifimbilisyeghe ku ndamyo isi tukwaghana nasyo. Pakindile ifyinja 4 ukufuma apa ulukomano ulu lwabombiwe loli tukali tukukindilila ukwifimbilisya ku ndamyo nkisu ikibibi iki.

² Ngimba ndamyo siliku isi mukulimbana nasyo? Nifwa ya nkamu winu uwa mu mbumba pamo mmanyani winu? Bubine bunywamu? Bukangale? Ngozi sya kipeliwa, mukunyoziwa pamo mukufwimiwa? Pamo mupalamasiwe ni mbungo ya COVID-19? Tukughulila akabalilo aka indamyo syosa isi sisakumalika.—Belenga Yesaya 65:16, 17.

3. Ngimba tukulondiwa ukubomba isyafiki lino kangi nongwa yafiki?

³ Ubumi bwakutamya fiyo amasiku agha kangi tukuya pakukindilila ukwifimbilisya ku ndamyo nyingi nkyeni. (Mat. 24:21) Syakupilikiwa, ukuti tukulondiwa ukukindilila ukwifimbilisya. Nongwa yafiki? Panongwa yakuti Yesu atile: “Mbufindang’oma bwinu mo mwisakukabilagha ubumi bwinu.” (Luka 21:19) Tukuya pakukindilila ukwifimbilisya linga tukwinong’onela isya muno abangi bafwanisyile ukwifimbilisya ku ndamyo isyakufwana itolo nisyitu.

4. Nongwa yafiki tubaghile ukuyoba ukuti Yehova kifwanikisyo kinunu pa nkhani ya kwifimbilisya?

⁴ Ngimba yonani uyu kifwanikisyo kinunu pa nkhani ya kwifimbilisya? Yehova Kyala. Ngimba ansala uyu ikubaswighisya? Lumo abaghile ukubaswighisya. Loli linga mukwinong’onela isi, mubaghile ukupilikisya kanunu. Ikisu iki kikulongosiwa nu Mohesi yonongwa yake muli indamyo nyingi. Yehova ali namaka aghakumasya  indamyo isi akabalilo kalikosa loli ikughulila akabalilo akanunu nkyeni ukuti asabombe isi. (Rom. 9:22) Pakabalilo aka, Kyala witu ikukindilila ukwifimbilisya ukufika apa isakonanga ikisu iki. Isagha tuyobesanie ifindu 9 ifi Yehova ikwifimbilisya.

5. Ngimba ingamu ya Kyala yanyoziwe bulebule kangi mukwipilika bulebule na isi?

⁵ Ukunyoziwa kwa ngamu yake. Yehova ayighanile ingamu yake kangi ikulonda ukuti aliwesa ayighindikeghe. (Yes. 42:8) Loli kwa fyinja 6,000 ingamu yake inunu yikunyoziwa. (Sal. 74:10, 18, 23) Isi syalyandile mu ngunda wa Edeni pakabalilo aka Umohesi (ukusanusya “Uwakususya”) alimpele inongwa Kyala ukuti amwimagha Adamu na Eva ifindu ifinunu ifi balondiwagha ukuti baye balusekelo. (Bwa. 3:1-5) Ukufuma pakabalilo ako, Setano akali ikukindilila ukumpa inongwa Yehova iyakuti ikubima abandu ifindu ifinunu ifi bikulondiwa. Yesu atamiwe fiyo naminong’ono panongwa yakuti ingamu ya Tata wake yanyoziwagha. Pakifukwa iki, abamanyisye abafundiwa bake ukuti biputeghe ukuti: “Tata witu wakumwanya, ingamu yako yikemesiweghe.”—Mat. 6:9.

6. Nongwa yafiki Yehova itikisye ukuti akabalilo akatali kakindepo bo akali ukunangisya ukuti ali nubudindo ubwakulaghila?

⁶ Ukususiwa kwa bulaghili bwake. Yehova mwene yo ali nubudindo ubwakulaghila kumwanya na pa kisu kyapasi kangi ubulaghili bwake bununu fiyo. (Ubuset. 4:11) Loli Umohesi ikughela ukubasyoba abandumi na bandu ukuti binong’oneghe ukuti Kyala akaya nubudindo bo ubu. Pabaghile ukwegha akabalilo ukuti Yehova anangisye ukuti yo ali nubudindo ubwakulaghila kangi ukuti yo ndaghili unnunu. Mwamahala, Kyala alitikisye abandu ukuti bilaghile bene kwa kabalilo akatali ukuti bakete linga babaghile ukufwanisya kisita Mpeli. (Yere. 10:23) Panongwa yakuti Kyala anangisye ubololo, umwene isakumasya inkhani iyi kwa bwila. Akayapo uyu isakukayikila ukuti Kyala mwene yo ali nubudindo ubwakulaghila kumwanya na pa kisu. Abandu bosa bisakumanya ukuti ubulaghili bwa Yehova bo bununu kangi Ubunyafyale bwake bwene bo bwisakutwala ulutengano nu kufighililiwa pa kisu.

7. Ngimba bo banani aba balinsambukile Yehova, kangi isakubabombela isyafiki?

⁷ Abanake bamo balinsambukile. Yehova apelile abandumi na bana ba bandu ukuya bagholofu. Loli bo akabalilo kakindilepo uwandumi yumo uyu alipelile ukuya yo Setano (ukusanusya “Untungulu”) alinsambukile Yehova nu kubasofania abandu abagholofu, Adamu na Eva, ukuti bope bansambukile Yehova. (Yuda 6) Ukufuma apo, abandu ba mu Israeli aba basaliwe na Kyala, bope balinsambukile nu kwanda ukwiputa ku bakyala ababutungulu. (Yes. 63:8, 10) Isi syalimpalamasisye fiyo Yehova. Loli umwene ikukindilila ukwifimbilisya ukufika pakabalilo aka isakubonanga bosa aba bikunsambukila. Pabumalilo, Yehova na babombi bake abasubiliwa bisakuya balusekelo panongwa yakuti batisakulondiwa ukwifimbilisya kangi ku ndamyo isya nkisu iki.

8-9. Ngimba butungulu buliku ubu bikunjobela Yehova kangi tukulondiwa ukubomba isyafiki?

⁸ Ubutungulu bwa Mohesi. Setano alintungulupile Yobu na babombi abangi abasubiliwa ba Yehova ukuti bikumwiputa Kyala panongwa yakuti ikubasaya. (Jobu 1:8-11; 2:3-5) Umohesi ikukindilila ukubasyoba abandu amasiku agha. (Ubuset. 12:10) Tubaghile ukubombapo simo ukunangisya ukuti Setano ntungulu mwakwifimbilisya ku ndamyo nu kukindilila ukuya basubiliwa kwa Yehova panongwa yakuti tunganile. Mwakufwana itolo na Yobu, nanuswe Yehova ikuya pakutusaya linga tukwifimbilisya.—Yak. 5:11.

⁹ Setano ikubombela abalongosi ba matchalichi agha butungulu mwakuyoba ukuti Yehova  wankhaza fiyo kangi yo uyu ikupangisya ukuti abandu batamiweghe. Abandu bamo bikuti linga abana bafwile, yo Kyala uyu ikubegha panongwa yakuti ikulonda ukongelela abandumi kumwanya. Ubu butungulu bunywamu fiyo. Uswe tusimenye ukuti Yehova yo Tata walughano. Linga tubinile pamo umundu uyu tunganile afwile, tutikumpa inongwa Kyala witu. M’malo mwake, tuli nulusubilo ukuti isiku limo isakubabumbulusya ababine nu kubasyusya aba bafwile. Tukulondiwa ukubabula abangi ukuti Yehova yo Kyala walughano. Linga tukubomba isi, Yehova ikuya pakubamula aba bikundumbusya umwene.—Mbu. 27:11.

10. Ngimba ilemba lya Salimo 22:23, 24 likuyoba isyafiki isya Yehova?

¹⁰ Ukutamiwa kwa babombi bake aba abaghanile. Yehova yo Kyala wakisa. Umwene atikuhoboka linga tukutamiwa panongwa yakufwimiwa, ububine pamo ubusitabugholofu bwitu. (Belenga Salimo 22:23, 24.) Yehova ikupilikisya muno tukwipilikila; umwene ikulonda ukumasya isi kangi syo isi ikuya pakubomba. (Fwanikisya na Ukusoka 3:7, 8; Yesaya 63:9.) Akabalilo kikwisa aka “isakubapyasilagha amasosi ghosa, bope nubufwe nalinga bo busulumanie, nalinga ko kukuta pamo ko kubaba fitisakuyangako kangi.”—Ubuset. 21:4.

11. Ngimba Yehova ikwipilika bulebule isyakufwana na babombi bake abasubiliwa aba bafwile?

¹¹ Ukulekana na bamanyani bake aba bafwile. Ngimba Yehova ikwipilika bulebule isyakufwana na banyambala na bakikulu abasubiliwa aba bafwile? Umwene ikulonda fiyo ukubaketa kangi. (Jobu 14:15) Inong’onela muno Yehova ansyukile ummanyani wake Abrahamu. (Yak. 2:23) Kangi Mose, uyu ayobagha nawe “maso na maso.” (Kuso. 33:11) Kangi ikughulila akabalilo aka isakumpilika Davidi na ba masalimo abangi bikwimba inyimbo inunu isya kumpala. (Sal. 104:33) Nalinga ukuti abamanyani ba Kyala aba bafwile loli umwene ikubakumbuka.  (Yes. 49:15) Umwene ikukumbuka kilikyosa iki babombagha. Ibaibolo likuti “buno bosa itolo bumi kumyake.” (Luka 20:38) Isiku limo ikwisa pakubasyusya, ikwisa kupilika kangi inyiputo syabo isyakufuma pasi pandumbula nu kwitika ukwiputa kwabo. Linga umundu uyu mwalinganile afwile, ifundo isi sibaghile ukubakasya fiyo.

12. Ngimba findu fiki fikumpangisya Yehova ukuti angahobokagha nifindu ifibibi ifi fikubombiwa amasiku agha?

¹² Linga abandu ababibi bikubanyoza abinabo. Bo Adamu na Eva bansambukile Yehova mu ngunda wa Edeni, Kyala asyaghenie ukuti ifindu fikayagha pakuya kanunu pa bumi bwabo. Yehova afibengile ifindu ifibibi, ubusitabugholofu ni findu ifya nkhaza ifi fikubombiwa nkisu amasiku agha. Utubalilo tosa umwene ikubapasikisya fiyo aba bakaya nubutuli, mwakifwanikisyo aba bakabaghila ukwifighilila bene bo abapina na bafwilwe. (Zeka. 7:9, 10) Yehova sikumbaba fiyo linga ikubaketa ababombi bake abasubiliwa bikunyoziwa nu kupinyiwa mu jele. Mubaghile ukuya nulusubilo losa ukuti Yehova abaghanile mwesa mwe mukwifimbilisya pampene nawe.

13. Ngimba kayilo kaliku akabibi aka Kyala ikuketa mu bandu kangi ikwisa kubomba isyafiki?

¹³ Abandu aba bikubomba ifyabulowe. Abandu bapeliwe ukuti bankongeghe Kyala loli Setano ikubapangisya ukuti babombeghe ifindu ifibibi. Bo Kyala “aketile ukuti ubutulanongwa bwa mundu bubele pa kisu” m’masiku gha Nowa, “Yehova alinkusulumania panongwa yakumpela umundu pa kisu, silinkumbaba fiyo mundumbula yake.” (Bwa. 6:5, 6, 11) Ngimba ifindu lino fili kanunu nkisu ukufuma pakabalilo kala? Hayi. Umohesi ikuhoboka fiyo ukuketa ukuti uluko lulilosa ulwakughonana luli paliposa ukongelelapo ukughonana kwa nnyambala nunkikulu aba bakaya pabweghi kangi ukughonana kwa bakikulu pamo abanyambala bene. (Ef. 4:18, 19) Kangi ikuhoboka fiyo linga abandu aba bikumwiputa Yehova babombile ubutulanongwa ubunywamu. Pakabalilo aka Yehova isakuleka ukunangisya ubololo, isakunangisya ukuti atikuhoboka ni findu ifyabulowe mwakubasosyapo abandu bosa aba bikubomba ifyabulowe aba batikulonda ukuchenja.

14. Ngimba abandu bikubomba isyafiki nikisu kangi ni finyamana?

¹⁴ Ukonangika kwa kipeliwa kyake. Umundu ‘atikukubilwa pasi pabulaghili bwa mundu’ mwene loli ikonanga nikisu ni finyamana ifi Yehova alimpele umundu ukuti afipweleleleghe. (Ndumbi. 8:9; Bwa. 1:28) Abasayansi bamo bikuyoba ukuti panongwa ya isi abandu bikubomba, igulu lya fya bumi * fingi fibaghile ukumalika kwa fyinja finandi ifi fikwisa. Yonongwa yake sikaya syakuswighisya linga bikuyoba ukuti ikipeliwa kili pa ndamyo. Tukundaghisya kwa Yehova panongwa yakuti afingile “ukwisa kubapyuta aba bikukipyuta ikisu” nu kukipela ikisu ukuya paladaiso.—Ubuset. 11:18; Yes. 35:1.

15-16. Ngimba findu fiki fibaghile ukututula ukwifimbilisya bo Yehova? Yoba ikifwanikisyo.

¹⁵ Inong’onela indamyo syosa isi Tata witu wakumwanya ifimbilisye kwa fyinja fingi. (Keta ibokosi ilyakuti “ Ngimba Yehova Ikwifimbilisya ku Findu Fiki?”) Yehova ayagha pakumasya mwalululu ifindu ifibibi nkisu iki. Loli ubololo bwake bukututula fiyo. Inong’onela ikifwanikisyo iki. Tufwanikisye ukuti unnyambala nu nkasi wake babuliwe ukuti umwanabo uyu akali ukupapiwa ali ni ndamyo inywamu kangi linga isakupapiwa ubumi bwake bwisakuya pangozi kangi isakufwa bo akali nkeke. Loli abapapi bikunangisya ulusekelo bo umwana apapiwe nalinga ukuti kubaghile ukuya kukafu kumyabo ukuti bampweleleleghe. Panongwa yakuti banganile umwanabo, abene bikuya pakwifimbilisya  ku ndamyo ukuti bantule ukuya nu bumi ubununu.

¹⁶ Mwakufwana itolo, abanduyungu lwa Adamu na Eva bosa bikuya basita bugholofu linga bikupapiwa. Loli Yehova ikukindilila ukubanangisya ulughano nu kubapwelelela. (1 Yoh. 4:19) Kangi mwakukindana na bapapi aba nkifwanikisyo iki, Yehova ikuya pakumasya indamyo isi abanake bikwaghana nasyo. Umwene abikile akabalilo aka isakumasya indamyo syosa isi abandu bikwaghana nasyo. (Mat. 24:36) Ulughano lwa Yehova lukutupangisya ukwifimbilisya muli mosa muno tubaghile ukufwanisyila

17. Ngimba amasyu agha ghikulingania isya Yesu agha ghali pa Bahiburi 12:2, 3 ghikutukasya bulebule ukukindilila ukwifimbilisya?

¹⁷ Yehova ikunangisya ikifwanikisyo ikinunu pa nkhani yakwifimbilisya. Yesu afwanisye ukunkonga Yehova pa nkhani yakwifimbilisya. Bo ali pa kisu, Yesu alifimbilisye ku masyu amabibi, ukukosiwa isoni kangi nu kukomeleliwa pampiki uwakutamiliwapo panongwa yitu. (Belenga Bahiburi 12:2, 3.) Ikifwanikisyo kya Yehova ikyakwifimbilisya kyalinkasisye Yesu ukuti yope ifimbilisyeghe. Nanuswe tubaghile ukukasiwa fiyo.

18. Ngimba pa 2 Peteri 3:9 pikututula bulebule ukwifimbilisya linga tukuketa isi sibombiwe panongwa yakuti Yehova ikunangisya ubololo?

¹⁸ Belenga 2 Peteri 3:9. Yehova amenye akabalilo akanunu akakumasyila ifindu nkisu ikibibi iki. Panongwa ya bololo bwake, abandu bingi bafwanisye ukummanya kangi ikilundilo ikikulumba ikya bandu kikumwiputa umwene. Bosa bikundaghisya panongwa yakuti Yehova ifimbilisye kwa kabalilo akatali ukuti bapapiwe, banangisyeghe ulughano kumyake nu kwiyipa ku myake. Linga abandu bingi bifimbilisye mpaka pabumalilo, sikuya pakunangisya ukuti Yehova atalwisye ukunangisya ubololo.

19. Ngimba tukulondiwa ukukindilila ukubomba isyafiki kangi tukwisa pakwambilila ifindu fiki?

¹⁹ Tukumanyila kwa Yehova muno tubaghile ukwifimbilisyila mwalusekelo. Kisita kwinong’onelako indamyo isi Setano apangisye, Yehova ikukindilila ukuya yo ‘Kyala walusekelo.’ (1 Tim. 1:11) Nanuswe tubaghile ukukindilila ukuya balusekelo bo tukughulila mbololo ukuti Yehova ayikemesye ingamu yake, anangisye ukuti umwene yo abaghiliwe ukulaghila kangi nu kumasya indamyo syosa isi tukwaghana nasyo lino. Isagha tukindilile ukwifimbilisya nu kukasiwa pakumanya ukuti Tata witu yope ikwifimbilisya. Linga tukubomba isi, amasyu agha ghisakuya gha bwanaloli kwa aliwesa, agha ghikuti: ‘Yo nsayiwa umundu uyu linga ikukiba itolo bo ali ndughelo; buno linga alutolile, po isakwambililagha ifihombiwa fya bumi, ifi Yehova afingile ukubapa aba banganile.’—Yak. 1:12.