1-2. Marhẹ ẹmro i Jehova ra ya rhẹ Isaiah 65:16, 17 o ru ha userhumu rẹn ọwan diẹn?

“WU VWE FIOBỌRHOTỌRE-E!” yẹ urhomu-ẹmro ro suẹn ẹkwaphiẹrhotọre omẹvwa ọrẹ ẹgbukpe 2017. Ẹkwaphiẹrhotọre na o dje rẹn ọwan oborẹ ene ru diẹn ebẹnbẹn re rhiẹromẹrẹn. Ẹgbukpe ẹne yi nyavrẹn ne, nẹ ọke re ruẹ omẹvwa ọrana, ọrẹn ọwan e ji diẹn akpọ ọkon ọnana.

² Me yẹ ebẹnbẹn wu rhiẹromẹrẹn ro vwo ji jiri na? Uhwu ohworho ekrun yanghene ugbehian ọnọ rọ kpẹnkpẹnren? Emiamo rọ nọ sabu suẹ uhwu? Ebẹnbẹn re lele ọho? Oghwọghọ kpregede, irueruo ozighi, gbinẹ ẹkparehaso? Wa rioja fọkiẹ erhirhiẹ emiamo, jerẹ emiamo akpọ ephian re se COVID-19? Ọwan a hẹrhẹ ọke ebẹnbẹn enana ephian ine nie,—ra na ja karorhọ aye ghwomaran, habaye aye i ji rharhumu homaphia-a!—Se Isaiah 65:16, 17.

3. Me ye ne vi ru vwana, mesoriẹ?

³ Akpenyerẹn uvuẹn akpọ ọnana ọ gbanhonron, ana ji sabu dẹrughwaroghwu ebẹnbẹn egbogbanhon erọrọ uvuẹn obaro na. (Matt. 24:21) Itiọrurhomẹmro, o fori ne rhe ruẹ edirin ọwan gbanhanrhọ. Mesoriẹ? Fọkime Jesu ọ tare: “Nyoma edirin are, are ine simi arhọ are.” (Luke 21:19) Ana sabu vwo edirin rhọ, ọke erhe roro kpahen oborẹ awọrọ e ji diẹn aruẹ ebẹnbẹn re rhiẹromẹrẹn.

4. Mesoriẹ ana sabu ta taghene Jehova yẹ udje rọ mai rhomu sekpahen edirin?

⁴ Ọrọmo yẹ udje rọ mai rhomu sekpahen edirin? Jehova Osolobrugwẹ. Ọrana o gberuo unu? Ọnọ sabu gbo unu, ọrẹn wu ne vwẹruọ ye wu rhe roro kpahiẹn. Dẹbolo yo sun akpọ na, ọ ji vuọn rhẹ ebẹnbẹn buebun. Jehova o vwo omẹgbanhon  ro no fiobarhọ aye ogege, ọrẹn ọ hẹrhẹ ọke ro no ruẹ omaran. (Rom. 9:22) Vwana, Jehova o vwo edirin bọmọke ọke rọ kwaphiẹrhọ ono te. Jene yono kpahen ekwakwa irhinrin ri Jehova o vwo edirien.

5. Marhẹ e ru rhua ephian vwe odẹ Osolobrugwẹ ne, marhẹ oma o ruo kpahiẹn?

⁵ Ephien ra rhua vwe odẹ ye. Jehova o vwo ẹguọlọ kpahen odẹ ye, ọ ji guọlọ nẹ ihworho ephian i họghọ riẹn. (Isa. 42:8) Ọrẹn, uvwre ẹgbukpe 6,000 rhe na, ituakpọ i phien odẹ i Jehova ne. (Ps. 74:10, 18, 23) Ọnana ọ phiare uvuẹn ogba Eden, ọke i Dẹbolo (ro mevirhọ “Ọrọ rhaphiawan”) ọ mọrenfian banren Osolobrugwẹ taghene ọ guọlọ nẹ Adam ọrhẹ Eve i vwo oborẹ ọnọ lẹrhẹ aye vwo omamerhomẹ-ẹ. (Gen. 3:1-5) Nẹ ọke ọrana rhe, a mọrenfian banren Jehova ne taghene ọ guọlọ nẹ ituakpọ i vwo oborẹ ọnọ yẹ aye omamerhomẹ-ẹ. Oma ọ merhen i Jesu kpahen ephien ra rhua vwe odẹ Ọsẹ ye-e. Fọkiẹ ọrana, no yono idibo yi oborẹ a nẹrhomo: “Ọsẹ ame obẹ idjuwu, jene ru odẹ ọnọ fon.”—Matt. 6:9.

6. Mesoriẹ i Jehova ọ lẹrhẹ ọke buebun nyavrẹn bọmọke ọnọ ki kwaphiẹ ẹmro ro sekpahen ọdo-usun ọnẹyen rhọ?

⁶ Ẹkparehaso ọdo-usun ọnẹyen. Jehova yo vwo omẹgbanhon ro no sun idjuwu na ọrhẹ otọrakpọ na, izede ro suẹn lele yọ mai rhomu. (Rev. 4:11) Ọrẹn, Dẹbolo nọ damoma ro no sun emakashe ọrhẹ ituakpọ beghe, nẹ aye i roro taghene Jehova o vwo omẹgbanhon ro no su-un. Ẹmro ro sekpahen ọdo-usun i Jehova, o rhiẹ oborẹ ana kwaphiẹrhọ ẹdẹ owu-u. Ọrẹ ẹghwanren, Jehova nọ ha uphẹn rẹn ihworho mẹrẹnvwrurhe taghene ituakpọ arha damoma aye ine sun oma aye ọvo vabọ ọkpọvi Jehova, aye i vwo efikparobọ-ọ. (Jer. 10:23) Fọkiẹ edirin Jehova, ana kwaphiẹ ẹmro ọnana rhọ ukwọgbọ. Jehova ono fikparobọ, ọke ro no djephia taghene Uvie ọnẹyen ọvo yọ nọ sabu rhua obọdẹn ufuoma ọrhẹ omefuon rhiẹ akpọ na.

7. Ayọmo yi kparehaso i Jehova, me ọye ono ruẹ aye?

⁷ Ẹkparehaso emọyen ezẹko. Jehova ọ ma emakashe ọrhẹ ituakpọ gbagba, vabọ ijẹgba. Ọrẹn, ọmakashe owu ro rhiẹ Echu (ro mevirhọ “Ọrọ kparahaso awan”) nọ lẹrhẹ Adam ọrhẹ Eve ri gbare, kparehaso i Jehova. Emakashe erọrọ ọrhẹ ituakpọ ni homaba ẹkparehaso ọnana. (Jude 6) Ọke oru, ihworho ezẹko uvuẹn agbamwa Israel, ri rhiẹ ihworho i Jehova ọ djẹha, ni ten riẹn jeghwai ya ga isolobrugwẹ efian. (Isa. 63:8, 10) Oma ọ merhen i Jehova-a. Ọrẹn, o vwo edirien, habaye ono ji rhe vwo edirin bọmọke ọnọ ghwọghọ ọsoso ihworho ri kparehasuiẹ. Ọrana ọnọ rhua omefuon vwe ihworho ri vwo atamwu kpahiẹn, re ji lelie diẹn akpọ ọkon ọnana!

8-9. Efian ego ya mọren banren i Jehova, me ya na sabu ru kpahen aye?

⁸ Efian ri Dẹbolo ọ mọrọn banriẹn ọke ephian. Echu ọ mọrenfian banren odibo i Jehova re se Job ro rhiẹ ọvwata, ọrhẹ ituakpọ ephian taghene ọwan a ga i Jehova fọkiẹ oborẹ ono ru rẹn ọwan. (Job 1:8-11; 2:3-5) Dẹbolo ọ ji mọrenfian banren ituakpọ me te inyenana. (Rev. 12:10) Ana sabu djephia taghene Echu ọmọrenfian nyoma re ne diẹn ebẹnbẹn re rhiẹromẹrẹn, ji sẹrorẹ atamwu ọwan kpahen Jehova fọkiẹ ẹguọlọ re vwo kpahiẹn. Jerẹ oborẹ o ru rẹn Job, ọnọ ha ebrurhọ rẹn ọwan erhe vwo edirin.—Jas. 5:11.

⁹ Echu ọ ha ilori ẹga efian ta taghene Jehova ọvwọkon rọ suẹ ojẹriọ ituakpọ. Ezẹko a ta taghene emọvwerhe i rhe hwu, Osolobrugwẹ yọ harẹ aye fọkime ọ guọlọ  emakashe erọrọ obẹ odjuwu. Ọrana ofian obẹta! Ọwan i rheri taghene Jehova o vwo ẹguọlọ. Ọke erhe kpomẹ yanghene ọke ohworho re vwo ẹguọlọ kpahen orho hwu, ọwan i vwe kperi Jehova-a. Ukpomaran, e vwo esegburhomẹmro taghene ẹdẹ owu ọnọ kwaphiẹ ekwakwa serhọ. Ana sabu ta rẹn ihworho ri guọlọ kerhọ taghene Jehova, Osolobrugwẹ ro vwo ẹguọlọ. Ọke ọrana Jehova nọ nọ sabu kpahenrhọ rẹn ọrọ haye djechẹẹ.—Prov. 27:11.

10. Me yẹ Psalm 22:23, 24 o djephia kpahen Jehova?

¹⁰ Idibo yi ro vwo ẹguọlọ kpahen ra rioja. Jehova, Osolobrugwẹ ro vwo aruẹdọn. Oma ọ vwọ merhiẹn, ọke rọ mẹrẹn ọwan ra rioja-a,—sẹ ẹkparehaso, emiamo, yanghene fọkiẹ ijẹgba ọwa-an. (Se Psalm 22:23, 24.) Jehova o vwẹruọ emiamiamo ọwan; ọ guọlọ fiobarhọ ye, ono ji fiobarhọ ye. (Haye vwanvwọn Exodus 3:7, 8; Isaiah 63:9.) Phẹrẹkpẹ, Jehova ono “hionron amioviẹ nẹ [ọwan] ẹro, uhwu orho rhirhiẹ ye-e, orho vwo omemwurhọ-ọ, yanghene unuebo oviẹ-ẹ, yanghene omiamiamo orho rhirhiẹ ye ghwomara-an.”—Rev. 21:4.

11. Marhẹ oma o ruẹ i Jehova kpahen idibo yi ri vwo atamwu ri hwu ne?

¹¹ Igbehian yen ri hwuru. Marhẹ oma o ruẹ i Jehova kpahen idibo yi ri fuevwan ga ye ri hwu ne? Ọ guọlọ rharhumu mẹrẹn aye! (Job 14:15) Wu na sabu roro kpahen oborẹ i Jehova ọ guọlọ rharhumu mẹrẹn ugbehian yen ọghoghanren re se Abraham? (Jas. 2:23) Yanghene Moses, rẹ aye a ha “ukẹro mẹrẹn omoma aye” ọke aye a tẹmro? (Ex. 33:11) Habaye, ọ ji guọlọ rhon uvwele ijoro ujiri David ọrhẹ ọbo ijoro na erọrọ! (Ps. 104:33) Dedevwo igbehian i Jehova enana i hwu ne, aye a ji sẹrẹ i Jehova ẹro-o. (Isa. 49:15) Ọ karorhọ i kemru kemru kpahen uruemru aye. Baibol  na ọrhọ ta, “aye ephian e nyerẹn hariẹn.” (Luke 20:38, ekete ra djokarhọ) Ẹdẹ owu, ọnọ rhọmọ aye rhiẹ akpọ, ji rhon ẹrhomo aye ro nẹ ẹhẹn rhe, jeghwai rhiabọ dede ogame aye. Orhianẹ ohworho wu vwo ẹguọlọ kpahen o hwu ne, jenẹ ẹmro erana i yọ omefuon ọrhẹ urhebro.

12. Me yọ mai lẹrhẹ i Jehova mwuomarhọ uvwre enyerakpọ ọkon ri koba na?

¹² Evwọkon na re sehiẹn ituakpọ. Ọke ẹkparehaso na ọ tonrhọ uvuẹn Eden, Jehova o rheri taghene ekwakwa ine biomu rhọ bọmọke ọnọ kwaphiẹ aye rhọ. Jehova o vwo utuoma kpahen irueruo ọkon, osehiẹn, ọrhẹ ozighi rọ ha akpọ na inyenana. O vwo ọdamẹ okokodo kpahen eri vwe vwo omẹgbanhon ọrhẹ eri na ja sabu chochọn oma aye, eri vwe vwo esẹ ọrhẹ izu, kugbe emẹse ri vwe vwo esa. (Zech. 7:9, 10) Oma ọ vwọ merhen i Jehova-a, maido ọke rọ mẹrẹn idibo yi re sehiẹn ji fiẹ rhẹ ekanron. Are i vwo imwẹro taghene Jehova o vwo ẹguọlọ kpahen are ephian re lelie diẹn.

13. Irueruo ijẹfuọn ego yẹ Osolobrugwẹ ọ mẹrẹn uvwre ituakpọ, me ọye ono ru kpahiẹn?

¹³ Ituakpọ re vwobọrhọ irueruo ijẹfuọn. Echu ọ guọlọre nẹ ituakpọ ra maren uvuẹn ohọhọme Osolobrugwẹ, i vwobọrhọ irueruo ọkon. Ọke Osolobrugwẹ ọ “mẹrẹnvwrurhe taghene obiobiomu ituakpọ o bunrun omamọ” uvuẹn ọke i Noah, “nọ da i Jehova taghene ọye ọ ma ihworho rhẹ uvuẹn otọrakpọ na, nọ da riẹ te ẹhẹn.” (Gen. 6:5, 6, ekete ra djokarhọ, 11) Akpọ na o rhomu ne nẹ ọke ọrana rhe? Ẹjo! Oma ọ merhen Echu ọke rọ mẹrẹn ihworho re vwobọrhọ aruẹ irueruo ọfanrhiẹn ephian, kugbe irueruo ọfanrhiẹn emẹse ọrhẹ emẹse yanghene ehworhare ọrhẹ ehworhare e vwobọrhọ! (Eph. 4:18, 19) Oma ọ ji merhen Echu, maido ọke rọ mẹrẹn idibo i Jehova re vwobọrhọ ọdandan. Ọke erhionrin Jehova ono vwoba, ono djephia taghene ọye o vwo utuoma kpahen irueruo ijẹfuọn nyoma rọ nọ ghwọghọ eri vwobọrhọ ye.

14. Me yẹ ituakpọ e ruẹ otọrakpọ na ọrhẹ eranmo ri havwiẹ?

¹⁴ Ituakpọ re biomu emama i Jehova. Ituakpọ e ‘suẹn ereva aye riẹ oghwọghọ,’ aye e vwo ọdamẹ kpahen otọrakpọ na ọrhẹ eranmo ri Jehova ọ tare taghene onyakpọ ọ hẹrote-e. (Eccl. 8:9; Gen. 1:28) Egba irherhe ezẹko i ha orhetio phia taghene irueruo ituakpọ, ọnọ sabu lẹrhẹ ẹko * eranmo ri te oduduru owu je nyerẹn ghwomaran, uvwre ẹgbukpe ezẹko ra sa na. Ọrana yọ soriẹ ihworho e brudu kpahen emama! Ọrẹ omamerhomẹ, Jehova o veri taghene ọnọ “ghwọghọ era ghwọghọ otọrakpọ na,” ji ruẹ akpọ na rhiẹ i paradais.—Rev. 11:18; Isa. 35:1.

15-16. Me yo no mwu ọwan lele i Jehova vwo edirin? Dje udje yi.

¹⁵ Roro kpahen ọsoso ebẹnbẹn ri Jehova o diẹn uvwre ẹgbukpe uriusionrin buebun rhe na. (Se ekpeti na “ Ekwakwa ri Jehova o Diẹn.”) Jehova ọnọ sabu fiobarhọ enyerakpọ ọkon ọnana ọke rọ guọlọre. Ọrẹn, erhionrin ro vwori ọ ha userhumu rẹn ọwan omamọ ne! Ana sabu rorie izede omana. Gbe rorie taghene na ta rẹn esa ọrhẹ ane owu taghene ọmọ aye re vwe ji vwiẹ, ọnọ bẹnriẹn ro no nyerẹn, ono ji kiki hwu. Udabọ ọrana, oma ọ ji merhen esa ọrhẹ ane na kpahen ọmọ aye na. Ẹguọlọ aye i vwo kpahen ọmọ na yo mwurun aye diẹn ebẹnbẹn ephian, nẹ aye i sabu hẹrote arhọ ọmọ na.

¹⁶ Omaran ọ ji havwọ, emọ Adam ọrhẹ Eve  ephian ihworho ri vwa gba ọke re vwiẹ aye. Ọrẹn, Jehova o vwo ẹguọlọ kpahen aye, nọ ji hẹrote aye. (1 John 4:19) Ọrẹ ovẹnẹ rhẹ emiemọ ri ha udje na, Jehova ọnọ sabu fiobarhọ ojẹriọ ọwan. O fiẹ ọke rhotọre ne, ro no tiẹ ojẹriọ ituakpọ ephian nie. (Matt. 24:36) O fori nẹ ẹguọlọ i Jehova o ji mwu ọwan lelie din te ọke rọ guọlọre.

17. Marhẹ oborẹ a ya kpahen Jesu uvuẹn Hebrews 12:2, 3 o ru ha userhumu rẹn ọwan rhe diẹn?

¹⁷ Jehova o dje udje rọ gbare sekpahen edirin. Jesu ọ ji hẹrokele edirin Ọsẹ ye. Ọke rọ ha otọrakpọ na, Jesu o diẹn ẹmro hwainhwain, ofa, ọrhẹ ojẹriọ uvuẹn oberun orhan oja fọkiẹ ọwan. (Se Hebrews 12:2, 3.) Itiọrurhomẹmro, edirin Jehova ọ yẹ Jesu omẹgbanhon ro vwo edirin. Ọnọ ji sabu ha userhumu rẹn ọwan.

18. Marhẹ 2 Peter 3:9 o ru ha userhumu rẹn ọwan vwẹruọ oborẹ erhionrin Jehova o ru phia ne?

¹⁸ Se 2 Peter 3:9. Jehova o rhe ọke ro serhọ rọ nọ ghwọghọ akpọ ọkon ọnana. Erhionrin ọnẹyen ọ ha uphẹn phia re koko otu gbidigbidi, ri te iduduru buebun ra ga i Jehova jeghwai jirie. Oma ọ merhen aye taghene Jehova o vwo edirin te ọke re vwiẹ aye, rẹ aye e vwo ẹguọlọ kpahiẹn, ji homakpahontọre riẹn. Ọke i Jehova ọnọ ha ebrurhọ rẹn iduduru idibo yi ri vwo edirin ye toba, na na mẹrẹnvwrurhe taghene Jehova o brorhiẹn rọ gbare ọke ro vwo edirin!

19. Me yo fori ne brorhiẹn yen re ne ruo, erere ọgo ya na mẹrẹn?

¹⁹ E yono mie i Jehova oborẹ ene ru vwo edirin rhẹ aghọghọ. Udabọ ebẹnbẹn ọrhẹ ojẹriọ Echu ọ soro, Jehova jẹ “Osolobrugwẹ oma ọ merhan.” (1 Tim. 1:11) Ana ji sabu sẹrorẹ aghọghọ ọwan ọke ra hẹrhẹ i Jehova no ru odẹ ye fon, kpare ọdo-usun ọnẹyen rierun, fiobarhọ irueruo ọkon ephian jeghwai tiẹ ebẹnbẹn ọwan nie. Jene vwo omwemẹ re ne vwo edirin, ji mẹrẹn urhebro fọkime Jehova o ji diẹn. Erhe ruẹ omaran, ẹmro enana ine rugba uvuẹn oma ọwan: “Omamerhomẹ ọ havwiẹ rẹn ohworho ro diẹn, fọkime erhe vwo ekwerhọ kpahiẹn, ono vwo erhu arhọ ri Jehova o verhọ rẹn ere vwo ẹguọlọ Kpahiẹn.”—Jas. 1:12.