1-2. Kon Yehova su palabranan na Isaías 65:16 i 17 ta animá nos pa no entregá?

“NO ENTREGÁ!” Esei tabata e tema di nos kongreso regional di 2017. E kongreso ei a siña nos kon nos por perseverá i sigui trata ku nos problemanan. Pero, kuater aña a pasa i ainda nos ta soportando yen di kos den e mundu malbado akí.

² Ki problema abo ta pasando aden aworakí? Bo a pèrdè un miembro di famia òf un amigu den morto? Bo tin un malesa grave? Edat avansá a hasi bo bida mas difísil? Desaster natural, violensia, persekushon òf e pandemia COVID-19 a afektá bo? Nos tur ta anhelá pa e kosnan akí pasa tras di lomba pa kaba, pa nos lubidá nan i pa nan no pasa nunka mas tampoko!—Lesa Isaías 65:16, 17.

3. Dikon nos mester sigui perseverá?

³ Bida den e mundu akí ta hopi duru, anto den futuro lo e bira mas duru ainda. (Mat. 24:21) Pues, nos tin ku sigui perseverá. Dikon? Pasobra Hesus a bisa: “Pa medio di boso perseveransia, boso lo gana boso alma.” (Luk. 21:19) Algu ku por yuda nos sigui perseverá ta di wak kon otronan a soportá e mesun pruebanan ku nos ta pasando aden aworakí.

4. Dikon nos por bisa ku Yehova ta e persona ku mas ta perseverá?

⁴ Ken ta e persona ku mas ta perseverá? Yehova Dios. Esei ta sorprendé bo? Kisas sí, pero pensa riba e detayenan akí. Diabel ta esun ku ta goberná mundu aworakí, i mundu ta pata pata di problema. Yehova tin e poder pa kaba ku tur e kosnan ei den un fregá di wowo. Pero, Yehova tin su dia stipulá kaba, i e ta wardando ku pasenshi pa  e dia ei yega. (Rom. 9:22) Mientrastantu, tin nuebe kos ku Yehova ta sigui soportá.

5. Kon Dios su nòmber ta ser dañá, i kon esei ta laga bo sinti?

⁵ Konstantemente ta daña su nòmber. Yehova ta stima su nòmber, i e ke pa tur persona respet’é. (Isa. 42:8) Pero, ya pa seis mil aña kaba no ta tratando su nòmber ku rèspèt. (Sal. 74:10, 18, 23) Tur kos a kuminsá den e hòfi di Eden. Diabel (ku ta nifiká “Kalumniadó”) a akusá Dios di no a duna Adam ku Eva loke nan tabatin mester pa nan ta felis. (Gén. 3:1-5) Djei padilanti, el a sigui akusá Yehova ku E no ta dunando hende loke di bèrdat nan tin mester. Hesus no por a soportá mira ku konstantemente tabata daña nòmber di su Tata. Ta pa e motibu ei, el a siña su disipelnan pa pidi den orashon: “Nos Tata ku ta den shelu, bo nòmber sea santifiká.”—Mat. 6:9.

6. Dikon Yehova ta laga sufisiente tempu pasa promé ku e solushoná e kuestion ku si e tin derecho di goberná shelu i tera?

⁶ Hopi persona ta kuestioná si e tin derecho di goberná. Yehova so tin derecho di goberná shelu i tera, i su manera di goberná ta e mihó ku tin. (Rev. 4:11) Pero, Diabel a purba di konvensé tantu angel komo hende ku Dios no tin e derecho ei. No ta di un dia pa otro por a solushoná e kuestion ku si Yehova tin derecho di goberná sí òf nò. Demostrando sabiduria, Yehova a skohe pa laga sufisiente tempu pasa. Asina ei, tur persona por mira ku hende no por goberná riba nan mes i sin nan Kreador tur kos ta bai malu. (Yer. 10:23) Danki na Yehova su pasenshi, e kuestion ku si Dios tin derecho di goberná shelu i tera lo ser solushoná un bes i pa semper. Tur persona lo sa ku Yehova su manera di goberná ta mihó i ku ta su Reino so por trese berdadero pas i siguridat.

7. Ken a rebeldiá kontra Yehova, i kiko ta spera nan?

⁷ Algun di su yunan a rebeldiá kontra dje. Yehova a krea tantu angel komo hende sin niun defekto. Pero un angel, Satanas (ku ta nifiká “Opositor”) a rebeldiá kontra Yehova. Anto Satanas a konvensé Adam ku Eva, kendenan tabata perfekto, pa nan tambe rebeldiá kontra Yehova. Tabatin otro angel i otro hende ku tambe a rebeldiá. (Hudas 6) Mas despues, asta algun hende di e nashon di Israel, e pueblo ku Dios a skohe, a rebeldiá kontra dje i a kuminsá adorá dios falsu. (Isa. 63:8, 10) Yehova a sintié traishoná. Pero, el a soportá e situashon i lo sigui perseverá te ora e tempu yega pa e kaba ku tur e rebeldenan. Ki alivio esei lo ta pa Yehova i pa tur su sirbidónan fiel ku, meskos kuné, ta soportando tur e kosnan malbado den e mundu akí.

8-9. Ki mentira tin kontra Yehova, i kiko nos tin ku hasi?

⁸ Konstantemente Diabel ta gaña riba dje i Su sirbidónan. Satanas a akusá Yòb di ta sirbi Yehova tanten ku ta kumbiní Yòb. Ku e akusashon ei, Satanas a enbolbé tur sirbidó fiel di Yehova i Yehova mes tambe. (Yòb 1:8-11; 2:3-5) Anto ketu bai e ta sigui akusá sirbidónan di Yehova di ta sirbiÉ tanten ku ta kumbiní nan. (Rev. 12:10) P’esei, ora nos sigui perseverá i ta keda fiel na Yehova pasobra nos ta stim’é, nos ta demostrá ku Satanas ta un gañadó. Yehova lo bendishoná nos pa nos perseveransia, meskos ku el a hasi ku Yòb.—Sant. 5:11.

 ⁹ Satanas ta usa lidernan di religion falsu pa bisa ku Yehova ta kruel i ku ta E ta esun ku ta pone hende sufri. Ora un mucha muri, algun di nan asta ta bisa ku ta Dios a tum’é pasobra e tabatin mester di mas angel den shelu. Esei sí ta un mentira! Pero, nos sí sa e bèrdat. P’esei, hamas nos lo kulpa Dios ora nos haña un malesa grave òf ora un ser kerí di nos muri. Al kontrario, nos sa ku un dia lo e kaba ku tur malesa i resusitá e mortonan. Nos por splika tur hende ku ke skucha nos, ku Yehova ta un Dios ku stima hende masha hopi mes. Anto ora nos hasi esei, Yehova por kontestá esun ku ta reproch’é.—Pro. 27:11.

10. Kiko Salmo 22:23 i 24 ta laga nos komprondé tokante Yehova?

¹⁰ Sufrimentu di su sirbidónan stimá. Yehova ta un Dios di kompashon. Ta duel e mashá ora e tende nos sklama pasobra nos ta sufri debí na persekushon, malesa òf nos mes imperfekshon. (Lesa Salmo 22:23, 24.) Yehova ta sinti nos doló; e ke kit’é, i lo e kit’é tambe. (Kompará ku Éksodo 3:7, 8; Isaías 63:9.) E dia lo yega ku “lo e seka tur lágrima for di [nos] wowo, i lo no tin morto mas; ni tristesa ni sklamashon ni doló lo no tin mas.”—Rev. 21:4.

11. Kon Yehova ta sinti ora e pensa riba su fiel sirbidónan ku a muri?

¹¹ Morto di su amigunan. Kon bo ta kere Yehova ta sinti ora e pensa riba su fiel sirbidónan ku a muri? E tin gana di mira nan atrobe! (Yòb 14:15) Bo por imaginá bo kuantu falta e ta sinti di su amigu Abraham? (Sant. 2:23) Anto kiko di Moises, kende el a papia “kara-kara” kuné? (Éks. 33:11) Anto kasi sigur e tin masha gana di skucha David i e otro salmistanan kanta  nan bunita kantikanan di alabansa. (Sal. 104:33) Aunke e amigunan ei di Dios a muri, Yehova nunka a lubidá riba nan. (Isa. 49:15) E ta kòrda delaster un detaye di nan personalidat. Beibel ta bisa ku den un sentido, “p’e nan tur ta bibu.” (Luk. 20:38) E dia lo yega ku lo e resusitá nan, i lo e skucha nan orashon i disfrutá di nan adorashon atrobe. Tur esaki por ta un konsuelo pa bo si bo a pèrdè un ser kerí den morto.

12. Kiko ta e kos ku ta duel Yehova masha hopi mes?

¹² Hende malbado ta oprimí otro hende. Ora ku e rebelion a kuminsá na Eden, Yehova tabata sa ku kosnan lo empeorá promé ku nan mehorá. Yehova ta odia tur maldat, inhustisia i violensia ku e ta mira den e mundu awe. E ta sinti foral pa esnan ku ta vulnerabel, por ehèmpel esnan débil i esnan ku no por protehá nan mes, manera huérfano i biuda. (Zak. 7:9, 10) Pero, loke ta duel e mas ainda ta ora e mira su sirbidónan fiel ser oprimí i será den prizòn. Bo por tin sigur ku e ta stima nos tur ku ta perseverando huntu kuné.

13. Ki kos inmoral hende ta hasi, i kiko Yehova lo bai hasi tokante esei?

¹³ Hende ta birando mas i mas inmoral. Yehova a krea hende pa imit’é, pero Satanas ta haña plaser den pone hende hasi kos inmoral. Den tempu di Noe, ora Yehova “a mira ku maldat di hende tabata grandi,” ‘a duel e ku el a traha hende riba tera i e tabata tristu den su kurason.’ (Gén. 6:5, 6, 11) Pero, kosnan a drecha? Apsolutamente ku nò! Diabel ta masha kontentu mes pa mira tur klase di inmoralidat seksual aki riba tera, tantu entre hende hòmber i hende muhé komo entre hende di e mesun sekso. (Efe. 4:18, 19) Satanas ta bira mas kontentu ainda ora e logra pone un sirbidó di Yehova kometé inmoralidat. Pero warda te ora Yehova su pasenshi kaba, e ora ei lo e mustra kuantu rabia e tin riba inmoralidat.

14. Kon hende ta trata Yehova su kreashon?

¹⁴ Hende ta daña Su kreashon. Ta bisto ku hende ta “ehersé outoridat riba un otro hende pa su daño.” Pero no ta esei so. Nan no ta kuida e tera i e animalnan manera Yehova a pidi nan pa hasi. (Ekl. 8:9; Gén. 1:28) Algun sientífiko ta bisa ku debí na loke hende ta hasi, den e siguiente añanan, un mion espesie * mas por disparsé. Ta di komprondé pakiko hende ta asina preokupá tokante naturalesa. Pero, nos ta gradisidu ku Yehova a primintí ku lo e “kaba ku esnan ku ta kaba ku e tera” i lo e hasi nos planeta un paradeis.—Rev. 11:18; Isa. 35:1.

15-16. Kiko ta motivá nos pa sigui soportá huntu ku Yehova? Duna un ilustrashon.

¹⁵ Pensa riba tur e problemanan ku nos Tata ku ta den shelu ta soportando pa míles di aña kaba. (Wak e kuadro “Loke Yehova Ta Soportando.”) Ta bèrdat ku Yehova por kaba ku e mundu malbado akí na kualke momento, pero su pasenshi a resultá di ta un bendishon pa nos. Kon asina? Wèl, suponé ku un hòmber ku su esposa ta haña sa ku nan bebi ta bai nase ku problema físiko, ku su bida lo no bai ta fásil anto ku lo e muri na un edat yòn. Apesar di esei, e mayornan ta mashá felis ora e bebi nase aunke ku nan sa  ku lo bai ta difísil pa kuida e yu ei. Nan amor pa e yu ta motivá nan pa soportá kualke difikultat pa asina por duna e yu ei e mihó bida posibel.

¹⁶ Di mes manera, nos tur komo desendientenan di Adam ku Eva a nase imperfekto. Apesar di esei, Yehova ta stima nos i ta kuida nos. (1 Huan 4:19) Kontrali na e mayornan den nos ilustrashon, Yehova sí por kaba ku nos sufrimentu, anto el a pone un dia kaba pa hasi esei. (Mat. 24:36) Yehova su amor mester motivá nos pa sigui soportá kuné te ora su dia yega.

17. Kon Hebreonan 12:2 i 3 por yuda nos sigui perseverá?

¹⁷ Di bèrdat Yehova ta e persona ku mas ta perseverá. Anto Hesus a imitá e perseveransia di su Tata. Tempu ku Hesus tabata riba tera, el a soportá palabranan ofensivo, bèrgwensa i asta un staka di tormento pa nos. (Lesa Hebreonan 12:2, 3.) Yehova su ehèmpel di perseveransia a duna Hesus i por duna nos tambe e forsa pa sigui perseverá.

18. Kon 2 Pedro 3:9 ta yuda nos komprondé kiko Yehova su pasenshi ta logrando?

¹⁸ Lesa 2 Pedro 3:9. Yehova sa ki ora ta e mihó momento pa kaba ku e mundu malbado akí. Danki na su pasenshi hopi hende por a siña konos’é anto awor tin un multitut grandi di miónes di hende ta ador’é. Nan tur ta masha kontentu mes ku Yehova a perseverá asina largu di manera ku nan por a nase, siña stim’é i dediká nan mes na dje. E dia ku Yehova rekompensá nos tur ku a perseverá, lo ta bisto ku Yehova tabatin tur rason di tene pasenshi.

19. Kiko nos mester ta determiná pa hasi, i kiko nos rekompensa lo ta?

¹⁹ For di Yehova nos ta siña kon pa perseverá ku goso. Apesar di tur e tristesa i sufrimentu ku Satanas a kousa, ketu bai Yehova ta “e Dios felis.” (1 Tim. 1:11) Nos tambe por keda ku nos goso segun ku nos ta warda ku pasenshi pa Yehova santifiká su nòmber, proba ku e tin derecho di goberná anto kaba ku tur maldat i tur problema ku nos tin. Laga nos ta determiná pa sigui perseverá i nunka lubidá ku nos Tata den shelu tambe ta perseverando. Si nos hasi esei, e siguiente palabranan lo konta pa nos: “Felis ta e hende ku ta sigui wanta prueba, pasobra ora e haña aprobashon divino, lo e risibí e korona di bida ku Yehova a primintí esnan ku ta sigui stim’é.”—Sant. 1:12.