1-2. Ngmekera tekingel a Jehovah el ngar er a Isaia 65:16, 17 e melisiich er kid el mo melemolem el outekangel?

“MOLEMOLEM EL OUTEKANGEL” a mle dai er a klou el ongdibel er kid er a 2017. Tia el prokuram a ulechotii a rolel e ngsebeched el outekangel a mondai el bo dechebangel. Eua el rak er uriul e kede dirk outekangel a mondai er tia el mekngit el beluulechad.

² Ngera el tekoi a omchelebangel er chelecha el taem? Ngmla mo smecher a chedal a telungalek er kau me a lechub e ngsechelim? Me a lechub e ke sochera er a mekngit el rakt? Ke chudelang? Ke chelebangel er a telemellel a beluu, uldikel, me a lechub e ngodechelakl? Me a lechub e ngrakt el ua COVID-19? Kede kmal oureng el mo er sel taem el ika el rokui el tekoi a kmal diak deluut el mo melatk!​—Monguiu er a Isaia 65:16, 17.

3. Ngera kired el meruul er ngii er chelechang e ngera uchul?

³ Ngmeringel a klengar er chelechang me nguaisei engdi kede locha mo chelebangel a lmuut el meringel el omelsemai er a ngar medad. (Mt. 24:21) Me ngkired el mo meduch a rengud el outekangel. E ngera uchul? E le Jesus a dilu el kmo: “A le meduch a rengmiu el outekangel, e kom mo osobel a klengar er kemiu.” (Lk 21:19) Me sel dolatk er a rolel e a rebebil a mle sebechir el outekangel a osisiu el mondai el uai kid, e ngmo sebeched el outekangel.

4. Ngera me ngsebeched el melekoi el kmo a Jehovah a kot el ungil kerebai el outekangel?

⁴ Ngtecha kot el ungil kerebai el outekangel? Ng Jehovah el Dios. Nglocha mo mechas a rengum er a nger, engdi ka di molatk er tiang. Tia el beluulechad a ngar cheungel a chederedellel a Diabelong e kmal mui er a mondai. E a Jehovah a ngar ngii a klisichel el mo okngemed engdi ngmengiil er a taem el mo meruul er tiang. (Rom 9:22) Me chelecha el longiil e a Dios er kid  a outekangel aike el tekoi el ngar ngii. Ka me bo dosaod a etiu el tekoi el Jehovah outekangel.

5. Ngmilekera motuub a ngklel a Dios, e uangera uldesuem el kirel?

⁵ Otuub el mora ngklel. A Jehovah a kmal soal a ngklel e soal a rokui el chad a bo lolecholt a omengull el kirel. (Isa. 42:8, NW) Me nguaisei engdi ngar er aika el mereko el 6,000 el rak e ngmla motuub tia el ngklel. (Psa. 74:10, 18, 23) Tia ulemuchel er a sers er a Eden. Tia sel taem el Diabelong (el belkul a kmo “Ngike el Oltuub”) a ultelecheklii a Dios el kmo ngngar ngii a kmung ngerang el diak lomsa Adam me a Eva el mo uchul a deuil a rengrir. (Gen. 3:1-5) Seikid el taem el mei e a Jehovah mla motelechakl el kmo ngdiak lomesterir a rechad aike el kmal lousbech. A Jesus a kmal dimlak el soal a otuub el mla mora ngklel a Demal a uchul me ngullisechakl er a redisaiplo er ngii el mo meluluuch el kmo: “A Demmam el ngara eanged, Le mechedaol a ngklem.”​—Mt. 6:9, BT.

6. Ngera uchul me a Jehovah dirkak el semecheklii a ultok el kirel omengederederel?

⁶ Ultok el kirel omengederederel. A Jehovah a ngar ngii a llemeltel el mengedereder er a eanged me a chutem, e a rolel a omengederederel a kot el ungil. (Och. 4:11) Me nguaisei engdi a Diabelong ngkaikid er a lolasem el mengeuid er a rechanghel me a rechad el mo omdasu el kmo a Dios a diak a llemeltel el mengedereder. Tia el ultok el kirel a llemeltel a Jehovah el mengedereder a dimlak el sebechel el mereched el mesmechokl. A Dios a mla mechititerir a rechad me te mengedereder me bo lobeketakl el kmo, ngkmal diak el sebechir el di tir el mengedereder. (Jer. 10:23) Ng Dios el outekangel a uchul me tia el tekoi a mo mesmechokl. Me ngmo mocholt el kmo ngii a ngar ngii a llemeltel el mengedereder e di ta el Rengedel a sebechel kutmeklii a mera el budech er tia el beluulechad.

7. Te rua techang a ulemtok er a Jehovah, e ngera ngmo meruul el kirir?

⁷ Ultekengir a rebebil er a rengelekel. A Jehovah ulemeob er a rechanghel me a rechad el cherrungel el diak a telemellir. Me nguaisei engdi a ta er a rechanghel el Satan (el belkul a kmo “Ngike el Omtok”) a rirellii a Adam me a Eva el mo omtok er a Jehovah. A rekuk bebil er a rechanghel me a rechad a dirrek el mlo omtok. (Jud 6) E a uriul e a rechad er a Israel el mlengilt el chedal a Dios a ultngeklii e mlo mengull a klsuul chelid. (Isa. 63:8, 10) Me te milengeblad er a Jehovah. Me nguaisei engdi ngmelemolem el outekangel el mo er sel taem el bo lolekngemed er tirke el rokui el omtok. Tia mo uchul a deurreng er a reblak a rengrir el chedal el tir a uai ngii el outekangel er tia el mekngit el blekeradel!

8-9. Ngera el cheleblad a mla medung el kirel a Jehovah, e ngera sebeched el meruul el kirel?

⁸ Betok el chelebeldil a Diabelong. A Satan a ultelecheklii a blak a rengul el mesiungel a Jehovah el Job, el ua lolekoi el kmo a rokui el blak a rengrir el mesiungel a Jehovah a mesiou er ngii el kirel aike el bo lengai. (Job 1:8-11; 2:3-5) A Diabelong a dirk melekoi a osisiu el tekoi er chelecha el taem. (Och. 12:10) Ngsebeched el ochotii el kmo ngbulak loeak sel doutekangel a mondai er kid e dolemolem er a blakerreng er kid el mora Jehovah e le ngbetik a rengud er ngii. Seikid e kede mo ua Job el mukngeltengat e le kid el outekangel.​—Jak. 5:11.

⁹ A Satan a ousbech er a remengeteklel a klsuul klechelid el mo melekoi el kmo a Jehovah a mekngit a blekerdelel e ngii a uchul me a rechad a chuarm. A rebebil a kmo a uchul me  a rengalek a mad e le Dios a millai er tir e le ngousbech er a rebetok el anghel er a eanged. Tia kmal klou lotuub el mora Dios! Engdi kid a medengei el kmo a Jehovah a ungil Chedam. Me sel bo desecher er a meringel el rakt me a lechub e le mad a betik er a rengud, e ngdiak doltelechakl er a Dios. Kede bai oumerang el kmo a ta er a klebesei e ngmo sumechokl a rokui el tekoi. Ngsebeched el ouchais er a rokui el chad el orrenges er kid el kmo a Jehovah a kot el ungil Dios. Tiakid e kede msa nger er ngii el mora chad el mekngit a uldesuel el kirel.​—Osi. 27:11.

10. A Psalm 22:23, 24, ngera ngochotii el kirel a Jehovah?

¹⁰ Ringel el lechelebangel a remekreos el mesiungel. A Jehovah a chubechub el Dios. Ngdiak el soal lorrenges er kid el lmangel e le kid el outekangel a ringel el ua odechelakl, secher, me a lechub e ngchelitechetud. (Monguiu er a Psalm 22:23, 24.) A Jehovah a medengei a rengeled e soal merrob e mo meruul uaisei. (Momekesiu er a Exodus 3:7, 8; Isaia 63:9, NW.) Ngdi kmedung e ngmo “smuld a rokui el chiuosech er a [medad]. Ng dikea lluut el mor ngii a kodall, e mo diak a klengiterreng, ma langel, ma ringel.”​—Och. 21:4.

11. Ngera el tekoi a le miss a Jehovah er a remesiungel el mla mad?

¹¹ Ngcheroid er a resechelil el mla mad. Ngera uldesuel a Jehovah el kirir a reblak a rengrir el sechal me a redil el mla mad? Ngkmal oureng el lmuut el mo omes er tir! (Job 14:15, NW) Molatk er a Jehovah el kmal miss er a sechelil er a Abraham. (Jak. 2:23) Me a dirrek el Moses el lulengedecheduch er “medal.” (Exo. 33:11) Ngdirrek el kmal oureng el rongesii a David me tirke el bebil er a milluches a psalm el mengitakl a chelitakl er a odanges! (Psa. 104:33) Me alta tirka el sechelil a Jehovah a mla mad engdi ngkmal dirkak lobes  er tir. (Isa. 49:15) Ngmedengei a derta el tekoi el kirel a blekerdelir. Me ngua dedu el kmo, “ng medengei el kmo te rokui el di ngar.” (Lk. 20:38) A ta er a klebesei e ngmo olekiis er tir, e lmuut el mo orrenges a nglunguchir e kongei er a omengull er tir. A lsekum ngar ngii a betik er a rengum el mla mad, e bo el sebechel aika el tekoi el mengelaod er kau.

12. Ngileakl el kmal mekngit a rengul a Jehovah er a ngera el tekoi er aika el uriul sils?

¹² Ulecheracheb er a rechad el mla er tirke el mekngit. Sera lomuchel a ultok er a Eden e a Jehovah a mle medengei el kmo a blekeradel a mo mekngit er a uchei er a bo lungil. A Jehovah ouketui a mekngit el omeruul, chelebirukel, me a uldikel el ngar ngii er chelechang. Ngileakl el kmal olecholt a klechubechub el mo er tirke el diak a olengeseu er tir, el ua rengalek el diak a redemerir me a rederrir me a remelakl dil. (Sek. 7:9, 10) Ngdirrek el kmal mekngit a rengul sel leseterir a reblak a rengrir el mesiungel el mucheracheb e mekelebus. Me bo lulterekokl a rengum el kmo, ngbetik a rengul er kid el rokui el outekangel el obengkel.

13. Ngera el mekngit el omeruul a loruul a rechad, e ngera ngmo meruul a Dios el kirel?

¹³ Rechad el kmal mla mo sorir a deleboes. A Satan a kmal soal rulleterir a rechad el ulebeob el okesiul a Dios el mo meruul a deleboes. A Dios er a lesa el kmo “a re bek el chad er a beluulchad a kmal mle dengerenger” er a taem er a Noah, “e ng mekngte rengul ele ng rirelleterir a re chad el mer a beluulchad. Ng kmal uluuchel er a rengul.” (Gen. 6:5, 6, 11) Ngmla mengodech a blekeradel? Ngkmal diak! Ngulterekokl el kmal dmeu a rengul a Diabelong sel lesa el kmo ngkmal mla mo klou a deleboes el omeruul, el uldimukl er a deleboes er a delongelel a sechal me a redil me a delongelel a sechal me a sechal me a redil me a redil! (Efe. 4:18, 19) Ngdirrek el kmal dmeu a rengul el meseterir a remera el Kristiano el ruebet er a klengit. Ngar er a telutk el temel, e kede mo mesa el kmo a Jehovah a kmal ouketui a rokui el deleboes el omeruul.

14. Ngera ngmla rullii a chad el mora blebelel a Dios?

¹⁴ Telemellel a blebelel. A chad a diak di ‘lomekcharm’ er a ta er a chad, ngdirrek el mekngit a omerellel el mei er tia el chutem me a charm el ngar cheungel a chederedellel. (Oli. 8:9; Gen. 1:28) A rebebil scientist a melekoi el kmo a omerellir a rechad a uchul me a ta el miliol el kakerous el charm me a dellomel a mo mokngemed. Sei a uchul me a rechad a kmal suebek a rengrir er a environment! Kede oba omereng el saul e le Jehovah mla tibir el mo ‘melemall er tirkel melemall er a beluulchad’ e rullii tia el beluulechad el mo baradis.​—Och. 11:18; Isa. 35:1.

15-16. Ngera sebechel otbechid el mo outekangel el obengkel a Jehovah? Momekesiu.

¹⁵ Molatk aike el mondai el bla loutekangel a Demad el ngar er a eanged er aika el mereko el telael el rak. (Momes er a baks el “ Aike el Loutekangel a Jehovah.”) A Jehovah a sebechel lokngemedii tia el mekngit el blekeradel er a ngii di el taem. Engdi kede ngeltengat e le ngii loutekangel! Ngsebeched el omekesiu er ngii el ua tiang. Ka me dedu el kmo a chad me a bechil a louchais er tir el kmo a ngelekir a mo mechell el chitechut e mo diak el beot a klengar er ngii e mo mad. Me alta nguaisei engdi tirka el obekel a kongei el mekurulii a ngelekir. A bltkil a rengrir el mora ngelekir a rulleterir el mo outekangel a ngii di el ringel me bo el sebechir el msa kot el ungil klengar.

¹⁶ Me ngdi osisiu a rokui el ngelekel a Adam me a Eva a mlechell el diak lemecherrungel. Me nguaisei engdi a Jehovah betik a rengul e  omekerreu er tir. (1 Jn. 4:19) A Jehovah a diak el uai tirke el obekel el dulsaod er tir, e le ngsebechel torob a ringelel a rengelekel. Ngmla oterekeklii a taem el bo loruul er tiang. (Mt. 24:36) A bltkil a rengul ngdiak lotbechid el mo outekangel el obengkel el mo lmuut er seikid el taem?

17. Ngmekera omesodel a Jesus el ngar er a Hebru 12:2, 3, NW e ngosukid el outekangel?

¹⁷ A Jehovah a kot el ungil kerebai el outekangel. A Jesus a dirrek el uluukerebai er a Demal el outekangel. Sera lengar tia el chutem e nguluutekangel a mekngit el omelekoi, terached, e mlad er a teluo el kerrekar el kired. (Monguiu er a Hebru 12:2, 3, NW. *) A kerebai er a Jehovah el outekangel a ulterekokl el ngilsuir a Jesus el mo outekangel e dirrek el sebechel ngosukid.

18. Ngmekera 2 Petrus 3:9 e ngosukid el mo medengei aike el meketmokl e le Jehovah el outekangel?

¹⁸ Monguiu er a 2 Petrus 3:9. A Jehovah a medengelii sel kot lungil taem el bo lolekngemed er tia el mekngit el blekeradel. Ngii el ngileltii el mo outekangel a uchul me te betok el miliol a mla mo chedal a klou el seked e mengull e oldanges er ngii. Ngkmal dmeu a rengrir e le Jehovah uluutekangel me te mlechell, e milsuub el mo medengelii, e tuib a klengar er tir el mo er ngii. Ngkmal mo obeketakl el kmo ngmelemalt a Jehovah el ngileltii el mo outekangel er sel taem el bo el beskid a omeksuled, kid el betok el miliol el uluutekangel el mora ulebongel!

19. Kede mla rullii er a rengud el mo mekerang, e ngera omeksuled?

¹⁹ Kede suubii er a Jehovah a rolel a doutekangel loba deurreng. Alta Satan a mla mukdubech a betok el ringel, a Jehovah dirk melemolem el “dmeu a rengul el Dios.” (1 Ti. 1:11, NW) Kid me ngsebeched el melemolem el dmeu a rengud er chelecha el dongiil er a Jehovah el mo mengedaol er a ngklel, mesebechakl er a omengederederel, okngemed a rokui el mekngit, e torob a mondai er kid. Me derellii a rengud el mo outekangel e bo lemechelaod a rengud el medengei el kmo a Demad el ngar er a eanged me ngdirrek el outekangel. A doruul el uaisei e aika el tekoi a mo tmaut er kid el kmo: “Ng ngeltengat ngikel chad el di outekangel er a ringel el mor a ulebongel, ele ng mo nguu omeksullel er sel klengar el le dilu Dios el kmo ng mo mesterir tirkel betik a rengrir er ngii.”​—Jak. 1:12.