1-2. Woo halpt ons Jesaja 65:16-17 nich opptojäwen?

DE DREEDOAGSCHA KONGRESS 2017 haud daut besondre Teema “Jeff nich opp!” En dit Program wort jewäsen, woo wie kjennen met onse Trubbels foadich woaren. Nu sent aul vea Joa vegonen un wie motten noch emma staunthauft bliewen en dise schlajchte Welt.

² Waut hautst du de latste Tiet fa Trubbels? Es doa wäa von diene Famielje ooda een gooda Frint jestorwen? Hast du eene schlemme Krankheit? Hast du Schwierichkjeiten, wäajen du ella jeworden best? Hast du Schoden jekjräajen derch een Owwada ooda Jewault ooda Vefoljunk? Ooda motst du lieden wäajen de COVID-19-Krankheit? Wie sänen ons doano, daut et aul dise Trubbels nich mea jäwen woat, daut kjeena mea woat doaraun denkjen un dee nienich mea woaren oppkomen (läs Jesaja 65:16-17).

3. Waut mott wie doonen, un wuarom?

³ Daut Läwen en dise Welt es schwoa un daut kaun lota veleicht noch schwanda woaren (Mat. 24:21). Soo, wie motten daut lieren, staunthauft to bliewen. Wuarom? Wiels Jesus säd: “Wan jie staunthauft bliewen, woa jie june Seelen jewennen” (Luk. 21:19). Wan wie doaräwa nodenkjen, woo aundre met biejlikj soone Schwierichkjeiten foadich woaren aus wie, dan halpt ons daut, staunthauft to bliewen.

4. Wuarom es Jehova daut baste Biespel fa staunthauft sennen?

⁴ Wäa es daut baste Biespel, staunthauft to bliewen? Jehova Gott. Wundat die daut? Nich, wan du doaräwa nodenkjst. Dise Welt woat von dän Soton beharscht un dee es voll Trubbels. Jehova haft de Macht, daut hee met aule Trubbels haustich wudd kjennen een Enj moaken, oba hee wacht noch (Reem. 9:22). Ons Gott wacht jeduldich, bat dee Dach jekomen  es, daut hee dise schlajchte Welt venichten woat. Well wie nu mol äwa näajen veschiedne Sachen räden, waut Jehova jeduldich uthelt.

5. Woo haben se Gott eenen schlajchten Nomen jemoakt, un woo denkjst du doaräwa?

⁵ Dee moaken am eenen schlajchten Nomen. Jehova jleicht sienen Nomen un hee well, daut jieda eena dän achten deit (Jes. 42:8). Oba aul fa 6 000 Joa haben se am eenen schlajchten Nomen jemoakt (Psa. 74:10, 18, 23). Dit funk em Goaden Eden aun, aus de Diewel, waut “Läajna” bediet, Gott beschuljen deed, daut hee Adam un Eva nich daut jeef, waut dee fäld toom schaftich sennen (1. Mo. 3:1-5). Von doa aun haben se Jehova emma beschulcht, daut hee de Menschen nich daut jeft, waut dee werkjlich fält. Jesus wia besorcht doaräwa, daut se sienen Voda eenen schlajchten Nomen muaken. Doawäajen lieed hee siene Jinja soo bäden: “Ons Voda em Himmel! Dien Nomen saul heilich jehoolen woaren” (Mat. 6:9).

6. Wuarom haft Jehova soo lang jewacht toom bewiesen, daut hee daut Rajcht haft to harschen?

⁶ Väle stalen sikj jäajen Gott siene Harschoft. Jehova es de eensja, waut daut Rajcht haft, äwa Himmel un Ieed to harschen, un hee es uk de basta Harscha (Opb. 4:11). Oba de Soton haft jeprooft, Enjel un Menschen entobillen, daut Gott nich daut Rajcht doatoo haft. Un daut wudd Tiet brucken, to bewiesen, daut Jehova daut Rajcht haud to harschen un daut hee uk de basta Harscha wia. Gott wia weis un jeef de Menschen väl Tiet, daut dee enseenen kunnen, daut see sikj selfst nich fein rejieren kunnen, onen no dän Schepfa to horchen (Jer. 10:23, NW). Wäajen Gott soo jeduldich es, woat daut fa emma bewäsen woaren, daut hee daut Rajcht haft to harschen un daut bloos sien Kjennichrikj fa woaren Fräd un Sechaheit oppe Ieed sorjen kaun.

7. Wäa haft sikj jäajen Jehova jestalt, un waut woat hee doamet doonen?

⁷ Eenje von siene Kjinja stalden sikj jäajen am. Jehova muak de Enjel un uk de Menschen volkomen, onen Fäla. Oba dan stald een Enjel sikj jäajen am. Hee wort toom Soton, waut “Fient” bediet, un brocht uk de volkomne Menschen Adam un Eva bat doa, dautselwje to doonen. Aundre Enjel un Menschen deeden daut uk (Jud. 6). Lota deeden eenje von sien Volkj Israel, waut hee utjewält haud, am dän Rigjen dreien un fungen aun, faulsche Jetta auntobäden (Jes. 63:8, 10). Jehova feeld sikj sea aunjeschmäat. Oba hee wacht jeduldich, bat dee Tiet kjemt, wua hee aul siene Jäajna oppriemen woat. Dan woaren Jehova un uk siene true Deena sea schaftich sennen, daut et dise beese Welt un uk aule Trubbels nich mea jäwen woat.

8-9. Waut vonne Läajes woaren äwa Jehova vetalt, un waut kjenn wie doamet doonen?

⁸ De Läajes von dän Fient. De Soton beschuljd dän truen Hiob un uk aul Jehova siene Deena, daut dee Gott bloos tru wieren, wäajen dee doa waut bie hauden (Hiob 1:8-11; 2:3-5). Un de Soton vekloacht Gott siene Deena noch emma (Opb. 12:10). Wan wie en Schwierichkjeiten staunthauft bliewen un Jehova tru bliewen, bewies wie, daut de Soton een Läajna es un daut wie Jehova leewen. Jehova säajend Hiob, un hee woat ons uk säajnen, wan wie jeduldich uthoolen (Jak. 5:11).

⁹ De Soton brukt de Leidasch von de faulsche Gloowes, daut dee lieren, daut Jehova een grausoma Gott es un doafäa veauntwuatlich es, daut de Menschen lieden. Eenje sajen mau rajcht, wan Kjinja stoawen, daut Gott dee wajchjenomen haft, wiels am noch een poa Enjelkjes fälden. Daut es plaut  jeloagen! Wie weeten, daut Jehova een leeftolja Voda es. Wan wie eene schlemme Krankheit haben ooda wan doa wäa jestorwen es, wäm wie sea leewden, woa wie Gott kjeenmol doafäa de Schult jäwen. Em Jäajendeel! Wie vetruen doaropp, daut Gott eenen Dach aule Kranke heelen woat un de Vestorwne wada oppwakjen. Aul deejanje, waut reed sent to horchen, kjenn wie vetalen, waut von leeftolja Gott Jehova es. Dan kaun hee dän Fient auntwuaten, waut am veacht (Spr. 27:11).

10. Waut wiest Psalm 22:24-25 ons äwa Jehova?

¹⁰ Siene leewe Deena motten lieden. Jehova haft Metleet met siene Deena. Hee haust daut, wan dee lieden motten, wäajen dee veleicht vefolcht woaren, krank sent ooda wäajen dee äare Onvolkomenheit (läs Psalm 22:24-25). Jehova deit daut wee, wan wie lieden motten; hee well daut endren un hee woat uk (see uk 2. Mose 3:7-8; Jesaja 63:9). De Dach woat komen, wan hee ons “aule Tronen von de Uagen weschen [woat]. Doa woat kjeen Doot ooda Trua ooda Hielen ooda Weedoag mea sennen” (Opb. 21:4).

11. Woo denkjt Jehova äwa siene true Deena, waut aul jestorwen sent?

¹¹ Hee kaun nich met siene Frind toop sennen, waut jestorwen sent. Woo denkjt Jehova äwa true Mana un Frues, waut jestorwen sent? Hee bangt sikj doano, dee wada to seenen! (Hiob 14:15). Kaust du die väastalen, woo sea hee sikj no sienen Frint Abraham bangt? (Jak. 2:23). Ooda no Moses, met dän hee soo räd “aus een gooda Frint met dän aundren”? (2. Mo. 33:11). Un hee freit sikj secha aul, wan David un aundre Psalmenschriewa wada woaren scheene Leeda sinjen toom am lowen (Psa. 104:33). Wan dise Frind uk aul jestorwen sent, haft hee dee oba nich vejäten (Jes. 49:15). Hee weet noch jieda Eenselheit, woo dee daut  hauden. De Schreft sajcht: “En am läwen dee aula” (Luk. 20:38). Eenen Dach woat hee dee wada aula toom läwen brinjen un hee woat no dee äare opprechtje Jebäda horchen un dee woaren am deenen kjennen. Dit kaun die väl Troost un Moot jäwen, wan doa wäa jestorwen es, dän du väl jeräakjent hast.

12. Waut sat Jehova nu en de latste Tiet besonda too?

¹² Schlajchte Menschen saten aundre too. Aus daut met de Trubbels em Goaden Eden aunfunk, wist Jehova aul, daut de Loag enne Welt ieescht wudd schlemma woaren, ea dee kunn bäta woaren. Jehova haust daut schlajchte, de Ojjerajchtichkjeit un de Jewault en dise Welt. Jehova es noch emma sea om dee bekjemmat jewast, waut no hinjen jeschowen worden un sikj selfst nich wäaren kunnen, soo aus de Weisenkjinja un de Wätfrues (Sach. 7:9-10). Am sat daut besonda too, wan hee sitt, woo siene Deena unjadrekjt un enjestopt woaren. Wie kjennen ons secha sennen, daut hee ons leeft, wan wie met am toop jeduldich uthoolen!

13. Woo sent de Menschen vondoag dän Dach, un waut woat Gott doamet doonen?

¹³ Met de Menschen äa schwienschet Läwen woat daut emma oaja. Gott haft de Menschen en sien Bilt jemoakt, oba de Soton veuasoakt dee, een schwienschet Läwen to fieren. En Noah siene Tiet sach Gott, “daut de Menschen sea bees . . . wieren. Un däm HARN deed daut leet daut hee haud Menschen oppe Ieed jemoakt. Am wia daut sea schod” (1. Mo. 6:5-6, 11). Es de Welt von don bäta jeworden? Na, secha nich! De Soton freit sikj sea, wan dee sitt, woo jeweenlich de veschiedne Sorten Huararie en dise Welt jeworden sent, biejlikj Mana met Frues, Mana met Mana ooda Frues met Frues (Efs. 4:18-19). Dee es besonda schaftich, wan dee Jehova siene Deena enne Faul locken kaun, eene schwoare Sind to begonen. Wan Jehova siene Jedult ieescht aufjerant es, dan woat hee wiesen, woo schlajcht hee daut orreine Läwen lieden kaun.

14. Waut doonen de Menschen met de Natua?

¹⁴ De Menschen moaken de Natua twei. De Menschen haben to äaren ieejnen Schoden äwa de aundre jeharscht un haben sikj uk nich soo om de Natua un om de Tieren jekjemmat, aus Jehova daut von dee haben wull (Liera 8:9; 1. Mo. 1:28). Eenje Forscha sajen, daut de Menschen daut en de näakjste Joaren bat doa brinjen kjennen, daut eene Million Sorten Tieren un Plaunten utstoawen woaren. Es daut nich schlemm bestalt met de Natua? Oba Jehova haft vesproaken, dee “omtobrinjen, dee de Ieed vedorwen haben”, un oppe gaunze Welt een Paradies to moaken (Opb. 11:18; Jes. 35:1).

15-16. Waut sull ons bat doa brinjen, met Jehova toop staunthauft to bliewen? Jeff een Biespel.

¹⁵ Denkj mol äwa aul de Trubbels no, wua ons himlischa Voda aul dusende Joaren met foadich woaren mott. (See dän Kausten “ Waut Jehova jeduldich uthelt”.) Jehova wudd met dise schlajchte Welt haustich een Enj moaken kjennen. Oba siene Jedult es ons aul sea togood jekomen. Denkj mol äwa dit Jlikjnis no: Een Poa Lied sellen een Bäbe haben un dee woat jesajcht, daut daut Bäbe krank es un daut et woat väl Schwierichkjeiten haben, wan daut ieescht woat jebuaren sennen, un daut woat bie junk stoawen. Oba de Elren sent doawäajen sea schaftich, aus dit Bäbe to Welt kjemt. Wäajen de Elren daut Kjint soo sea leewen, nämen dee aule Schwierichkjeiten opp sikj, daut daut soon goodet Läwen haben kaun aus mäajlich.

¹⁶ Biejlikj soo sent aule Nokomen von  Adam un Eva onvolkomen, wan dee to Welt komen. Oba Jehova leeft dee doawäajen sea un hee kjemmat sikj om dee (1. Joh. 4:19). Aundasch aus bie de Lied en daut Jlikjnis wudd Jehova kjennen met aulet Lieden een Enj moaken. Un hee haft aul eenen Dach bestemt, wanea hee daut doonen woat (Mat. 24:36). Sull ons siene Leew nich bat doa brinjen, met am toop wieda staunthauft to bliewen, soolang aus daut needich es?

17. Woo kaun Hebräa 12:2-3 ons halpen, staunthauft to bliewen?

¹⁷ Jehova es daut baste Biespel fa staunthauft bliewen. Jesus deed sienen Voda no un bleef uk staunthauft. Aus hee oppe Ieed wia, leet hee sikj vespotten un veachten un tolatst aun eenen Pol noaglen, om ons to raden (läs Hebräa 12:2-3). Secha jeef Jehova sien Biespel am de Krauft, daut hee kunn staunthauft bliewen. Un daut kaun ons uk halpen.

18. Woo wiest 2. Petrus 3:9 ons, waut derch Jehova siene Jedult mäajlich jeworden es?

¹⁸ Läs 2. Petrus 3:9. Jehova weet, wanea de baste Tiet es, met dise schlajchte Welt een Enj to moaken. Doaderch daut hee soo jeduldich wia, kunn doa eene groote Häad toopjesaumelt woaren. Un nu sent daut millionende, waut am aunbäden un preisen. Aul dee sent Jehova sea dankboa, daut hee jeduldich wia, daut see kunnen jebuaren woaren un lieren kunnen, am to leewen un sikj am hantojäwen. Wan Jehova de millionende beloonen woat, waut bat aum Enj tru jebläwen sent, dan woat sikj daut utwiesen, woo goot daut utkjeem, daut hee jeduldich wia.

19. To waut sell wie ons gaunz eenich sennen, un waut woa wie doafäa kjrieen?

¹⁹ Wie lieren von Jehova, woo wie kjennen met Freid staunthauft bliewen. Wan de Soton uk soo väl truajet un soo väl Lieden oppjebrocht haft, blift hee doawäajen de schaftja Gott (1. Tim. 1:11, NW). Wie kjennen onse Freid uk hoolen, wan wie jeduldich wachten, bat Jehova sienen Nomen heilicht un bewiest, daut hee daut Rajcht haft to harschen un de basta Harscha es, un met aulet schlajchte un onse Trubbels een Enj moaken woat. Daut kaun ons väl Moot jäwen, wan wie seenen, daut ons himlischa Voda uk staunthauft blift. Well wie ons fa wieda gaunz eenich sennen staunthauft to bliewen. Wan wie daut doonen, dan woa wie beläwen, woo sikj de Wieed erfellen: “Seelich es dee Maun, dee nich vesajcht, wan hee vesocht woat, un uthelt, wan hee oppe Proow jestalt woat. Wan hee de Proow bestonen haft, woat am de Läwenskroon jerieekjt woaren, dee de Har dämjanjen vesproaken haft, dee am goot es” (Jak. 1:12).