1-2. Luholo lutshi mbimbi jia Yehowa jidi mu Yeshaya 65:16, 17 jidi gutukuatesa ha gukolesela?

MUTO wa lumene wa asamble a masugu thathu a givo 2017 watuhanele diago gikhese. Wakhalele muzuela egi: “Ubembigo!”. Programe ya asamble yene yatumonesele luholo tuajiya gukolesela mu malamba tudi mutagana nawo. Ivo nguana yabadiga gale sendese tuakalegele asamble ene, uvi esue mulandula gukolesela mu mavu awa abola.

² Malamba atshi wana tagana nawo masugu awa? Wafuishi muenya mu fami yaye nga futa diaye ba? Udi nu ukhashi wakola mu muila ba? Udi muthu wa gukola ba? Udi gudisagesa mukunda nu lamba dimoshi dia gubuila mu gisagumuisa nga ndaga jiabola nga usageshi ba? Nga ndo udi gudisagesa mukunda nu misongo ya Coronavirus nga ndaga iko ya luholo lumoshi ba? Tudi munengena lusugu malamba awa agasue mbaakhadigo luko, mbatuabuita diago mutshima nu mbaashigo luko gutubuila!—Tanga Yeshaya 65:16, 17.

3. Ndaga itshi tudi naye gukalagala? Mukunda natshi?

³ Idi diago lamba ha gujinga mu masugu awa a gisugishilo, tuajiya nji gutagana nu malamba akola mu masugu adi muza. (Mat. 24:21) Hene, tudi naye gukudisa khadilo dietu dia gukolesela. Mukunda natshi? Handaga Yesu wazuelele egi: ‘Gula muakolesela, mbamuhuluisa mionyo yenu.’ (Luka 21:19) Gula tuatangiza luholo athu ako abingile malamba gifua anyi tudi mutagana nawo, yajiya gutukuatesa ha gukudisa khadilo dietu dia gukolesela.

4. Mukunda natshi tudi muzuela egi Yehowa udi diago gifezegeselo giabonga giatadila gukolesela?

⁴ Yehowa Nzambi udi diago gifezegeselo giabonga giatadila gukolesela. Yajiya gukhala egi udi gudihula mukunda natshi tuazuela ngenyi? Uvi gula watangiza ndaga yene muabonga mbawukotelesa diago. Mavu awa adi aguzala pha nu ndaga jiabola handaga  Diabulu wana guatuameza. Yehowa udi nu ngolo jia gumanesela ndaga eji jiagasue jiabola henyaha, uvi udi munengena masugu adi muza ha guyikalagala. (Lomo 9:22) Nzambi wetu udi mulandula gukolesela uu nu tangua diahagele muene ha gushiya mavu awa mbaditagana. Tutadilenu ndaga 9 Yehowa wana gukolesela.

5. Luholo lutshi jina dia Nzambi diaseguluishiwe? Luholo lutshi udi gudivua mukunda nu ndaga yene?

⁵ Jina dia Yehowa diaseguluishiwe. Yehowa wana guzumba jina dienji, wana gutshigana egi muthu wagasue adi nemese. (Yesh. 42:8) Uvi ivo 6 000 yabadiga gale sendese jina dienji diaseguluishiwe. (Ngi. 74:10, 18, 23) Ndaga yene ya sendesele mu dihia dia Edene tangua Diabulu (yakotelesa egi “Muenya mambo”) wazuelele egi Nzambi waminyile Adama nu Eva gima gimoshi akhadile nagio funu ha gukhala nu gusuanguluga. (Gis. 3:1-5) Sendese mu tangua diene, athu avula ana zuela egi Yehowa wana gumina athu ndaga adi nayo funu ha gukhala nu gusuanguluga. Yesu wakhalele gudisagesa luholo jina dia Tata wenji diaseguluishiwe. Gishina giene walongesele alandudi enji ha gukombelela egi: ‘Tata wetu udi mu dilu, jina diaye dinemesewe.’—Mat. 6:9.

6. Mukunda natshi Yehowa wabembelele athu tangua diavula gutuama dia guamonesa egi phamba muene udi watagana ha gutuameza dilu nu mavu?

⁶ Athu avula ana gulumbugila Nzambi nu luholo luenji lua gutuameza. Yehowa hakhenji udi watagana ha gutuameza mavu nu dilu. Luko, luholo luenji lua gutuameza luakhala luawaha lume. (Yat. 4:11) Uvi Diabulu watumine anjelo nu athu ako ha gulumbugila Nzambi nu ha gutangiza egi Nzambi ashigo watagana ha guatuameza. Yakhalele naye guazula tangua hagula akotelese egi Yehowa udi mutuameji watagana nu luholo luenji lua gutuameza ludi nji luabonga. Nzambi wamonesele gutema luholo wabembelele athu tangua diavula ha gudituameza hagula ene hakhawo akotelese egi ajiyilego gubinga gula ashigo mutegelela Mufugi wawo. (Yel. 10:23) Luholo Yehowa wana monesa khadilo dia guhuiminyina, athu agasue mbaakotelesa egi phamba muene udi watagana ha guhinyina mavu nu dilu. Mbaajiya nji egi luholo lua gutuameza lua Yehowa ludi luatagana nu phamba Ufumu wenji mbawubata guhuima nu ubambi ha mavu.

7. Akuatshi alumbugidile Yehowa? Itshi mbaaza guatshita?

⁷ An’enji ako amulumbugidile. Yehowa wafugile anjelo nu athu nu mila yatagana. Uvi gungima muanjelo mumoshi munu wabuile Satana (yakotelesa egi “Muluishi”) walumbugidile Nzambi, watumine nji Adama nu Eva anyi akhadile nji athu atagana ha gulumbugila Yehowa. Gungima, anjelo ako nu athu ako alumbugidile nji Yehowa. (Yuda 6) Enya Isalele akhalele gifutshi ginyi Yehowa watombele ha gukhala akombeledi’enji, uvi amutunyine nu asendesele nji gukombelela nzambi jia mambo. (Yesh. 63:8, 10) Ndaga yene yasagesele diago Yehowa. Uvi wakolesele mu tangua diene nu udi mulandula gukolesela uu nu tangua mbaaza mushiya athu agasue abola. Ngenyi, muene nu akombeledi’enji agujinginyina mbakhala nu gusuanguluga handaga ndaga jiabola mbajikhadigo luko guene!

8-9. Ndaga jitshi jia mambo athu ana guzuela mukunda nu Yehowa? Itshi esue tuajiya gukalagala mukunda nu mambo ene?

⁸ Mambo a Diabulu. Satana wazuelele egi Yobo nu akombeledi ako agujinginyina a Yehowa ana gumukombelela nu matangi abola. (Yobo 1:8-11; 2:3-5) Diabulu yowu genji mulandula gubumba mambo a luholo elu uu nu mangino. (Yat. 12:10) Tuajiya gumonesa egi Satana udi muenya mambo gula tudi mukolesela mu malamba agasue tudi mutagana nawo nu tudi musala agujinginyina gudi Yehowa handaga tuana gumuzumba. Gifua luholo muene washimbigile Yobo, mbawutushimbiga nji gula tudi mukolesela.—Yak. 5:11.

⁹ Satana wana gutuma mafumu a ikombelelo  ya mambo ha guzuela egi Yehowa udi muthu wabola, wana gumonesa athu malamba. Ako nji ana guzuela egi tangua ana ana gufua, Nzambi wana guazula handaga udi nu funu ya anjelo avula mu dilu. Athu awa ana segelula diago Nzambi! Uvi esue tuana gujiya egi Yehowa udi Tata wa guzumba. Tangua tuana gukata misongo yakola nga ndo tuafuisa muthu tuana guzumba muavula, tuanago guzuela egi Nzambi watumonesa lamba diene. Uvi tuana gusha mutshima egi mu masugu adi muza, muene mbawukatula misongo nu mbawufuzumuna athu afuile gale. Tudi naye guwambela athu tuana tagana nawo mu mudimo wa gulongesa egi Yehowa wana khala Nzambi waguzumba. Ngenyi Yehowa mbawuhana mvutu gudi muthu wana gumumbila mambo.—Ish. 27:11.

10. Mukanda wa Ngimbo 22:23, 24 udi gutulongesa itshi mukunda nu Yehowa?

¹⁰ Tangua akombeledi’enji ana tagana nu malamba. Yehowa wakhala Nzambi wa khenda. Wana guvua gikenene tangua tuana gutagana nu malamba gifua usageshi, ukhashi nga luholo tushigo athu atagana. (Tanga Ngimbo 22:23, 24.) Yehowa wana kotelesa muabonga luholo tuana gudivua tangua tuana tagana nu malamba; wana tshigina guamanesela, gudi nu lusugu mbawamanesela diago. (Fuanesa nu Guzoga 3:7, 8; Yeshaya 63:9.) Gualeha ndo, ‘muene mbawukungumuna masoji agasue gu meso [etu], gufua mbagukhadigo luko, nga masaga nga gudila nga malamba mbaakhadigo luko.’—Yat. 21:4.

11. Luholo lutshi Yehowa wana gudivua mukunda akombeledi’enji agujinginyina anyi afuile gale?

¹¹ Gufua gua mafut’enji. Luholo lutshi Yehowa wana gudivua mukunda nu akombeledi’enji agujinginyina a mala nu a akhetu anyi afuile gale? Wana tshigina diago guamona luko! (Yobo 14:15) Tangiza gale luholo Yehowa adi mutshigina gumona luko futa dienji Abalahama! (Yak. 2:23) Tangiza nji luholo Yehowa adi mutshigina guta luko maga nu Moize, munu akhalele muzuela nenji “phala nu phala”! (Guz. 33:11)  Tangiza luholo Yehowa adi mutshigina gutegelela luko Davidi nu ayimbi a ngimbo ako tangua adi gumuyimbi ngimbo jiabonga ha gumutumbuisa! (Ngi. 104:33) Ikhale mafut’enji awa agasue afuile gale, Yehowa khenji aabuitshile gale ndo mutshima. (Yesh. 49:15) Wana guwunguluga ndaga jiagasue jiaatadila. Biblia idi muzuela egi: ‘Mukut’awo agasue adi nu monyo mu matangi’enji.’ (Luka 20:38, note.) Mu masugu adi muza, muene mbawafuzumuna hagula ategelele luko isambu yawo ya giamatshidia nu mbawutshigina gukombelela guawo. Gula wafuishile gale muthu wana guzumba, matangi’awa a ndando ajiya gugukolesa nu ajiya nji guguhana gikhesa.

12. Mu masugu awa abola agisugishilo, ndaga jitshi jiana guhana Yehowa gikenene?

¹² Tangua athu abola ana monesa athu ako lamba. Ha lumbugidile athu mu dihia dia Edene, Yehowa wajiyile egi ndaga mbajibola muavula gubadiga gutuama egi muene hakhenji ajilondege. Yehowa wanago gutshigina ndaga jiabola jidi mukalegewa mangino ha mavu. Uvi wana gudisagesa tangua diagasue mukunda nu athu adi aguleba nu ajiyilego gudibamba gifua an’a shiye nu akhetu agafunda. (Zak. 7:9, 10) Yehowa wana guvua gikenene giavula tangua akombeledi’enji agujinginyina ana gumonesewa lamba nu ana gumbiwa mu bologo. Tuajiya diago gusha mutshima egi Yehowa wana guzumba aphangi agasue ana gukolesela mu malamba gifua muene.

13. Ndaga jitshi jia sonyi Yehowa wana gumona gudi athu? Itshi mbaakalagala?

¹³ Athu adi mukalagala ndaga jia sonyi muavula gubadiga. Nzambi wafugile athu hagula alandule makalegelo enji, uvi Satana wana tshigina egi athu akhale gukalagala ndaga jia sonyi. Tangua Nzambi ‘wamonele egi athu adi mukalagala ndaga jiavula jiabola’ mu masugu a Nowa, ‘wavuile gikenene luholo wafugile athu ha mavu.’ (Gis. 6:5, 6, 11.) Gungima ndaga jiasombegesele ba? Ndo sha! Diabulu wana khala nu gusuanguluga luholo ana gumona athu adi mukalagala uthambi mu maluholo agasue gifua mala ana gukalagala uthambi nu akhetu nga athu ana gubungisa muila mala nu mala nga akhetu nu akhetu! (Ef. 4:18, 19) Satana wana khala nu gusuanguluga guavula gula mukombeledi wa Yehowa wakalagala gubola guakoma. Gudi nu lusugu Yehowa mbaashigo mumonesa khadilo dia guhuiminyina gudi athu ana kalagala uthambi, mbawashiya mukut’awo agasue handaga ashigo mutshigina gusombegesa.

14. Ndaga jitshi athu ana kalegela mavu nu shitu?

¹⁴ Athu adi mubolesa ima yafugile Nzambi. Athu anago phamba ‘guhinyina athu ako ha guamonesa lamba’ uvi ana bolesa nji mavu nu shitu jiafugile Yehowa hagula athu ajiya gujibamba. (Mulo. 8:9; Gis. 1:28) Enya ndunge ako ana guzuela egi luholo athu adi mubolesa mavu, yajiya gutshita egi mu ivo idi muza maluholo a shitu nu a mitshi 1 milio atote ha mavu. Gishina giene athu avula adi muvua woma mukunda nu ndaga jidi mubuila mavu! Tudi muhana Yehowa mersi luholo watulayele egi: ‘Mbawushiya athu adi mubolesa mavu’ nu mbawubuisa mavu agasue phaladiso.—Yat. 11:18; Yesh. 35:1.

15-16. Itshi idi naye gututuma ha gulandula gukolesela gifua Yehowa? Hana gifezegeselo.

¹⁵ Tangiza gale ndaga eji jiagasue jia gikenene Sh’etu wa mu dilu wana gukolesela mu ivo eyi yavula yabadiga. (Tala galuanda “ Ndaga Yehowa Wana Gukolesela.”) Yehowa wajiya gushiya mavu awa abola mu tangua diagasue watshigina. Uvi khadilo dienji dia guhuiminyina diana gutukuatesa muavula! Tufezegese gale. Tangiza egi munganga wawambela yala mumoshi nu mukaji’enji udi nu vumo egi mun’awo udi nu misongo yakola, gula wavualewa mbaashigo mujinga muavula, mbawudi mufua. Uvi tangua mona muene wavualewa, mvuaji jienji jidi nu gusuanguluga ikhale adi mujiya egi mbayikhala lamba ha gubamba mun’awo. Luholo mvuaji jiene jiana guzumba  mun’awo, mbaakolesela mu malamba agasue mbaatagana nawo hagula mun’awo akhale kiawaha.

¹⁶ Luholo lumoshi nji, ana agasue a Adama nu Eva ana guvualewa nu mila ishigo yatagana. Uvi Yehowa wana guazumba nu wana gudisagesa mukunda nu ene. (1 Yone 4:19) Yehowa ashigo gifua mvuaji tuazuelela mu gifezegeselo handaga muene udi nu ngolo jia gumanesela malamba a an’enji. Watombele gale lusugu mbaamanesela malamba agasue athu ana gutagana nawo. (Mat. 24:36) Guzumba gua Yehowa gudi naye nji gututuma ha gulandula gukolesela.

17. Luholo lutshi ndaga adi muzuelela mukunda nu Yesu mu Hebelu 12:2, 3 jidi gutukuatesa ha gulandula gukolesela?

¹⁷ Yehowa udi diago gifezegeselo giatagana mu ndaga yatadila gukolesela. Yesu walanduile muabonga khadilo dia gukolesela dia Tata wenji. Tangua Yesu wakhadile ha mavu, wakolesele tangua athu akhalele gumushingana, gumuhana sonyi nu tangua amukhokhele ha mutshi wa lamba mukunda nu esue. (Tanga Hebelu 12:2, 3.) Khadilo dia Yehowa dia gukolesela diakuatesele diago Yesu ha gukolesela. Diajiya nji gutuhana ngolo jia gukolesela.

18. Ha gutadila 2 Phetelo 3:9, luholo lutshi khadilo dia Yehowa dia guhuiminyina diatukuatesele?

¹⁸ Tanga 2 Phetelo 3:9. Yehowa udi mujiya tangua diabonga mbaaza gushiya mavu awa abola. Khadilo dienji dia guhuiminyina diakuatesele athu avula ha gumujiya. Mangino ba milio a athu adi gumokombelela hamoshi. Mukut’awo agasue akhala nu gusuanguluga ha gujiya egi Yehowa wana gukolesela sendese mualeha gutuama egi ene avuadiwe, alonguge giamatshidia, amuzumbe nu adihane gudi muene. Yehowa mbawushimbiga akombeledi’enji agasue mbaakolesela uu gu gisugishilo. Ngenyi mukut’awo agasue mbaakotelesa egi khadilo dienji dia guhuiminyina diakhadile diago nu ndando!

19. Desizio ditshi tudi naye guzula? Ishimbigo isthi mbatuheta gula tuatshita ngenyi?

¹⁹ Gifezegeselo gia Yehowa giatumonesa luholo tuajiya gulandula gukolesela nu gusuanguluga guagasue. Yehowa udi mulandula ‘gukhala nu gusuanguluga’ ikhale Satana udi mukalagala ndaga jidi muhana gikenene nu jidi mubata malamba. (1 Tim. 1:11) Esue nji tuajiya gukhala nu gusuanguluga ha tudi munegena nu guhuiminyina guagasue tangua Yehowa mbaatumbuisa jina dienji, mbaamonesa egi phamba luholo luenji lua gutuameza ludi luatagana nu mbaamanesela malamba agasue tudi mutagana nawo mangino. Luholo tuajiya egi Tata wetu wa mu dilu wana kolesela nji mu malamba, tuzulenu nji desizio dia gulandula gukolesela mu malamba agasue tudi mutagana nawo. Gula tuatshita ngenyi, mbatumona diago gutaganesewa gua mbimbi eji: ‘Gusuanguluga gudi nu muthu udi mulandula gukolesela mu malamba, handaga Nzambi mbawumutshigina. Muene mbawuheta monyo gifua gishimbigo Yehowa walayele athu ana landula gumuzumba.’—Yak. 1:12.