1-2. Ko mawu ya Yahova yogumanika pa Yesaya 65:16, 17 yachatilimbikisa tani kuti tileke kufoka?

NSONKHANO wachigawo wa 2017 wenze na msolo wakuti: ʹMusafooke!’ Nsonkhano moyu udawonesa momwe tingapiririre viyeso vosiyanasiyana. Magole yanayi yapita tachita kale nsonkhano moyu ndipo tidakapitiriza kupirira pamoyo wathu munthawe zoshupa zino.

² Ko ni mabvuto yaponi yomwe mwagumana nayo manjemanjepa? Ko mwaluza wachibale wanu panango shamwali wanu? Ko munkudwala matenda yosamala? Ko munkubonera na ukalamba? Panango munkugumana na matsoka yachilengedwe, ugananga panango kudzudziwa? Panango munkugumana na mabvuto ndawa ya matenda ya koronaviru? Tinkudikhira mwachidwi nthawe yomwe vinthu vose vimwevi vidzakhale vakale ndipo tidzavikumbukirelini soti!​—Lewengani Yesaya 65:16, 17.

3. Ko tichadekana kuchita chani manjeuno, ndipo ndawa chani?

³ Moyo mudziko ino niwoshupa, ndipo vingachitike kuti tidzagumane na vinthu voshupa maninge kutsogolo. (Mat. 24:21) Ndipomwapa tichadekana kudziwa vatingachite kuti tikhale wopirira. Ndawa chani? Ndawa Yesu adati: ‘Peno imwepo mudzapirire mudzagumane moyo.’ (Luka 21:19) Tidzakwanise kupirira tikambaganizira momwe anango adapiriria padagumana na mabvuto ninge yathu.

4. Ndawa chani tikunena kuti Yahova ni chitsanzo chabwino cha kupirira?

⁴ Ko ni mbani yemwe ni chitsanzo chabwino pa kupirira? Yahova Mulungu. Ko mdawiro moyu wakudabwisani? Panango wakudabwisanidi. Dziko yose inkunyang’aniriwa na Ndyerekezi, ndipo iyo ili dzale na mabvuto. Yahova yemwe ni wamphanvu adzamalise manjemanje vimwevi, ndipo iye ankudikhira  kuti nthawe ikwane. (Aro. 9:22) Kwa nthawe itali, Mulungu wathu wakhala akupirira pakudikhira kuti adzacheneke dziko yakuipa. Naboni tikambirane vinthu 9 vomwe vachitisa Yahova kusalula kupirira.

5. Ko dzina ya Yahova idanyozewa tani, ndipo ko imwepo muchabva tani na vimwevi?

⁵ Kupirira pomwe dzina yake inkunyozewa. Yahova achaikonda dzina yake, ndipo achada kuti aliyese ambayilemekeze. (Yes. 42:8) Koma kwa magole 6.000 dzina mweyi yakhala ikunyozewa. (Sal. 74:10, 18, 23) Vimwevi vidayambira m’munda wa Edeni pomwe Ndyerekezi (kuthandauza ‘Woneneza’) adanyoza Mulungu pakuuza Adamu na Hava kuti iye ankukumanani vinthu vomwe vidakakuchitisa kuti mukhale wokondwa. (Gen. 3:1-5) Kundoyambira nthawe mweyo Yahova wakhala akunamiziriwa kuti achanyima wanthu wake vinthu vabwino. Yesu angaganizira maninge va kunyozewa kwa dzina ya Ababa wake. Ndawa ya vimwevi, adawuza wopfunzira wake kuti ambapemphere kuti: ‘Ababa wathu wakudzulu, dzina yanu ichenesewe.’​—Mat. 6:9.

6. Ndawa chani Yahova wabvuma kuti papite nthawe utongi wake wabwino ukanati wayamba?

⁶ Kutsutsiwa kwa utongi wake. Yahova ndiye yekha ntongi wabwino kudzulu na padziko yapasi, ndipo katongedwe kake nikabwino maninge. (Chiv. 4:11) Koma Ndyerekezi akuyesesa kuchitisa kuti wanthu ambakumbuke kuti Mulungu niwoyipa. Ndipo vingadekana nthawe kuti vidziwike kuti Mulungu ni ntongi wabwino. Mwanzeru, Mulungu adabvuma kuti wanthu adzitonge wokha kuti awone kuti nivosakwanisika kuzitonga. (Yer. 10:23) Ndawa ya kuleza moyo kwa Yahova, vinthu vidzakonzewe kabodzi na kabodzi padziko yose yapasi. Ndipo adzatsimikizire kuti Ufumu wake wokha ndiwo udzakhazikise ntendere na chitetezo padziko.

7. Mbani adapandukira Yahova, ndipo adzachite nawo chani?

⁷ Kupanduka kwa anango wa wana wake. Yahova adasika wana wake wauzimu na wana wangwiro pa dziko yapasi. Koma mngelo wopanduka Satana (kuthandauza ‘Wotsutsa’) andachitisa kuti wanthu wangwiro Adamu na Hava apandukire Mulungu. Angelo anango na wanthu adapandukambo. (Yuda 6) Mpakana patsogolo pake Aizilayeri omwe wenze ntundu wa wanthu wosaluliwa na Mulungu, adasiya kumubvera nkuyamba kutumikira milungu yabodza. (Yes. 63:8, 10) Ni vobveka kuti Yahova alibe kubva bwino ne pang’ono. Koma podiya venze teno adapitiriza kupirira, ndipo adakapirira pakudikhira nthawe yomwe adzamalise kupanduka kose. Vimwevi vidzabwerese madaliso kwa achamutumikira mu nthawe ino pomwe dzina yake ikuswipiziwa koma akupitiriza kupirira.

8-9. Ko ni mabodza yaponi yomwe Yahova achanenerewa, ko tingachite chani pa nkhani mweyi?

⁸ Mabodza ya Ndyerekezi. Satana adati Yobu na atumiki anango wokhulupirika angakwaniselini kutumikira Mulungu yekha basi. (Yobu 1:8-11; 2:3-5) Ndyerekezi ankupitiriza kutsutsa atumiki wa Mulungu ntsiku zino. (Chiv. 12:10) Tingachite mbali yathu pakukhala wokhulupirika na kuthemba Yahova na kuwonesa kuti timukonda ndipo vimwevi vidzawonese kuti Satana ni wabodza. Ninge Yobu, tidzadalisiwe ndawa ya kupirira kwathu.​—Yak. 5:11.

⁹ Satana achaphatisa basa azitsogoleri wa chipembedzo chabodza pakunena kuti Yahova ni woipa ndipo ndiye achachitisa mabvuto yose. Anango achati mwana akafa, Mulungu ndiye wamutenga ndawa achada angelo  azinji kudzulu. Vimwevi vichamuipira Mulungu. Koma ise tidziwa kuti Mulungu ni wachikondi. Tikakhala kuti tikudwala matenda yopasa mantha, panango munthu watichakonda wafa, tinenalini kuti wachitisa ni Mulungu. M’malo mwake, tinachikhulupiriro kuti ntsiku ibodzi adzamalise matenda na kumukisa wakufa. Tichauza aliyese wachidwi kuti Yahova ni Mulungu wachikondi. Ndipo vimwevi vimupasa mwayi wabwino wodawira yemwe ankumunyoza.​—Miy. 27:11.

10. Ko lemba ya Salimo 22:23, 24 ichaulula chani va Yahova?

¹⁰ Kubonera kwa atumiki wake womwe achamukonda. Yahova ni Mulungu wachikondi. Iye akondwalini kuwona atumiki wake akubonera na mavuto, peno ni kudzudziwa, matenda panango ndawa ya uchimu wathu. (Lewengani Salimo 22:23, 24.) Yahova achadziwa va kuwawiwa kwathu, ndipo achada kukulekesa, ndipo adzakulekese. (Linganizani na Ekisodo 3:7, 8; Yesaya 63:9.) Ntsiku idzafike pomwe ‘iye adzapukuse misozi yose mʼmaso mwawo ndipo kudzakhale kulibe impfa, kulira ne kuwawiwa.ʼ​—Chiv. 21:4.

11. Ko Yahova achabva tani akaganizira va atumiki wake wokhulupirika womwe adafa?

¹¹ Kusiyana na azishamwali wake womwe adafa. Ko Yahova achabva tani akaganizira amuna na akazi wokhulupirika womwe adafa? Iye achada kuwawona soti! (Yobu 14:15) Ko munkuyesa kuganiza chisuwo chomwe Yahova anacho na shamwali wake Abulahamu? (Yak. 2:23) Panango shungu na Mose, munthu yemwe ambayankhula naye ‘maso na maso’? (Eks. 33:11) Mwachidziwikire Iye anashungu yakubva Davide na wamasalimo anango ankuyimba nyimbo zomutamanda! (Sal. 104:33) Mwachidziwikire azishamwali wa Mulungu womwe ankugona mu impfa Iye alibe kuwayebwa. (Yes. 49:15) Iye adakakumbuka  mwatsatanetsanane va makhalidwe yawo. Ndipo ‘kwa iye wose ni wamoyo.’ (Luka 20:38) Ntsiku ibodzi, iwo adzakhale soti na moyo, ndipo iye adzabve mapemphero yawo yochokera pasi pa moyo ndipo adzakondwe na utumiki wawo. Peno imwepo mudaluza munthu wa pamoyo mu impfa, tinashuwa kuti vimwevi vichakukhazikani moyo pasi ndipo muchayamba kubva soti bwino.

12. Nchani chomwe chikumuwawa maninge Yahova mu ntsiku zomalizira zino?

¹² Wanthu woipa ankuboneresa anzawo. Pomwe kupanduka kudachitika m’munda wa Edeni, Yahova angadziwa kuti vinthu vidzayipe maninge akalibe wachosa kuyipa padziko. Yahova achazonda wanthu woipa, wosowa chilungamo na wochitira anzawo voipa. Iye nthawe zose achasamalira wanthu momwe achakwanisalini kudziteteza, wana wamasiye na akazi wa masiye. (Zek. 7:9, 10) Yahova achabvalini bwino pomwe atumiki wake wokhulupirika ankudzudziwa na kuyikhiwa mudjeri ndawa ya kumutumikira. Khalani wotsimikiza kuti, Iye achakonda womwe achapirira ninge iye.

13. Ko Mulungu ankuwona makhalidwe yakuipa yaponi, ndipo adzachite tani?

¹³ Wanthu ankukonda maninge va chigololo. Wanthu adasikiwa kuti ambatewedzere Mulungu, koma Satana achada kuti iwo ambachite vinthu voipa. Pomwe ‘Yahova adawona kuti kuyipa kwanyanya’ mu ntsiku za Nowa, ‘adawawiwa moyo ndawa yakuti adasika wanthu padziko.’ (Gen. 6:5, 6, 11) Ko manje vinthu vakhalako bwino mudziko? Ne pang’ono! Nivosachita kubvunza kuti Satana achakondwa maninge akambawona wanthu ankuchita makhalidwe yakuipa kuphatanidzapo kugonana kwa amuna panango akazi wokha-wokha. (Aef. 4:18, 19) Satana achakondwa maninge akawona kuti ntumiki wa Yahova wachita chimo. Kuleza moyo kwa Yahova kukadzafika kumapeto, iye adzawonese mphamvu zake kwa wanthu wokonda vachigololo.

14. Ko wanthu ankuchita tani na vomwe Mulungu adasika padziko?

¹⁴ Wanthu ankucheneka dziko yomwe Mulungu adakonza. Sikuti wanthu akundoponderezana chabe, koma ankudzonga pomwe dziko kuphatanidzapo vinyama vomwe Yahova achada kuti wanthu ambavisamalire. (Mla. 8:9; Gen. 1:28) Wasayantsi anango achati ndawa ya vomwe wanthu achachita, makhaindi * yazinji ya vinyama yankupunguka, ndipo magole yakubwera vidzamaliretu. Ni vosadabwisa wasayantsi mwawa akambati dziko iri pangozi. Koma nkhani yabwino niyakuti Yahova ‘adzadzonge womwe ankucheneka dziko yapasi.’ Ndipo dziko yose idzakhale paradaiso.—Chiv. 11:18; Yes. 35:1.

15-16. Ko nchani chichatichitisa kupirira ninge Yahova? Perekani chitsanzo.

¹⁵ Kumbukirani mabvuto yose yomwe Yahova Ababa wathu wakudzulu wayapirira kwa magole yazinji. (Wonani bokosi yakuti “ Vomwe Yahova ankupirira.”) Yahova adakafuna sembe adamalisa kalekale dziko yoipa. Koma kuleza moyo kwake kwatithandiza maninge. Ganizirani chitsanzo ichi. Linganizani kuti mwamuna na nkazi wake awuziwa kuti mwana wawo adzabadwe na matenda yomwe yadzachitise kuti afe adakali mwana. Koma mwana akabadwa azibereki achakhala wokondwa podiya kuti vingakhale voshupa kumusamalira. Pakuti iwo achamukonda mwana wawo, niwokonzeka kuchita vilivose vangakwanise pakumusamalira kuti akhale na moyo wabwino.

 ¹⁶ Mwakulingana na vimwevi, wana wose wa Adamu na Hava abadwa wochimwa padziko pano. Podiya viri tene, Yahova achawakonda ndipo achawasamalira. (1 Yoh. 4:19) Koma mosiyana na azibereki wa muchitsanzo chile, Yahova angamalise mabvuto ya wana wake. Ndipo adasalula kale nthawe yomwe adzamalise kubonera kwa wanthu. (Mat. 24:36) Ko vimwevi vichatichitisalini kupirira mabvuto ninge iye vikakhala vokwanisika?

17. Ko vomwe lemba ya Aheberi 12:2, 3 ikufotokoza pa nkhani ya Yesu, vinkutilimbikisa tani kuti tipitirize kupirira?

¹⁷ Yahova nichitsanzo chabwino maninge pa nkhani yopirira. Yesu adatewedzerambo Ababa wake mwakukhala wopirira. Pewenze munthu, iye adapirira mawu yonyoza, kuchitisiwa manyazi na kukhomererewa pamuti kuti atiwombole. (Lewengani Aheberi 12:2, 3.) Ni vosachita kubvunza kuti chitsanzo cha kupirira kwa Yahova chidapasa mphamvu Yesu kuti apirirembo.

18. Ko lemba ya 2 Petulo 3:9 ichatithandiza tani kubvesa phindu yomwe iripo ndawa ya kuleza moyo kwa Yahova?

¹⁸ Lewengani 2 Petulo 3:9. Yahova ankudziwa nthawe yabwino yomwe adzamalise mabvuto. Kuleza moyo kwake kwachitisa kuti awunganidze gulu ikulu yosawerengeka yomwe ikumutumikira na kumutamanda. Wose ni wotembeja Yahova ndawa yakuti wadikhira mpakana iwo kubadwa, kupfunzira va iye na kudzipereka kwa iye. Wanthu azinji akadzapirira mpakana mapeto, adadzawone kuti Yahova adachita bwino kusalula kukhala woleza moyo tene.

19. Ko tinkufunika kukhala wotsimikiza kuchita chani, ndipo mphoto yathu ni chani?

¹⁹ Yahova watipfunzisa momwe tingapiririre tiri wokondwa. Podiya kuti tigumane na matenda na kubonera komwe Satana achabweresa, Yahova ni ‘Mulungu wachimwemwe.’ (1 Tim. 1:11) Isembo tingakhale wokondwa ndawa yodikhira nthawe yomwe Yahova adzachenese dzina yake, kuchosa woipa na kumalisa mabvuto yathu yose. Naboni tipitirize kupirira ninge momwe Ababa wathu wakudzulu ankuchitira. Tikachita vimwevi, yadzakwanilisike mawu yakuti: ‘Wodala ni munthu wopirira mayesero, ndawa akadzabvumiziwa, adzatambire mphoto ya moyo, yomwe Yahova wapolomisa wose womukonda.’​—Yak. 1:12.