1, 2. ¿Imanotaj Isaías 65:16, 17 yanapämanchi mana yamacaypa aguantaycänapaj?

2017 WATA jatun asambleanchipa titulunga cargan: “¡Ama guepaman cutiychu!”. Chaycho yachacurgunchi imayca nacaycunata imano aguantanapaj. Chuscu watana pasashga y mana yamacaypa aguantaycanchiraj.

² ¿Imacunapataj chaylaraj pasashcanchi? Ichanga nacaycanchi wanupacushganchiraycur, edäninchiraycur, canan wichan gueshyaraycur o cay munducho imayca mana alicuna pasashganraycurpis. Öraga nishwanmi ‘cay lapanta ricayta munänachu’. Y chaynomi canga, shamoj tiempuchoga yarpaylapis yarpäshunnachu caycunaman (leiriy Isaías 65:16, 17).

3. ¿Imatataj canan wichan ruraycashwan y imanir?

³ Cay caway vidachoga imaycacunami pasaycan. Shamoj tiempuchoga imayca mana alicunaga masrächi miracaycamunga (Mat. 24:21). Canan aguantaycashganchega yanapämäshunmi. Chaychi Jesuspis nergan: “Imano ñacarpis nogaman yäracamorga salbashami canquipaj” (Luc. 21:19). Jina waquincuna imano aguantashganta ricarga yanapämäshunmi.

4. Jehovaga shuyaraycanrämi imacuna pasashgantapis, ¿imatataj chaypita yachacunchi?

⁴ Quiquin Taytanchi Jehovapis aguantaycanmi. ¿Imanirtaj chayta ninchi? Diablupa maquincho cay mundo captinmi chayno caycan. Munarga, Jehovaga juclami cay munduta ushacächinman pero shuyaraycanrämi (Rom. 9:22).  Junajninga chayaramungami. ¿Ima isgun cajcuna pasanantataj Jehová shuyaraycanraj?, ricärishun.

5. ¿Imanotaj Diospa jutinta mana cajpaj churapäcush y gamga ima ninquitaj chaypita?

⁵ Jutin mana ali ricash caycashganta. Jutinta cuyashpanmi Jehovaga respetananchita munan (Is. 42:8). Pero 6.000 watacunapanomi, jutilanta mana cajpaj churapäcush (Sal. 74:10, 18, 23). Lapanpis Edén huertachomi galaycamush, chaychomi Diabluga nergan Adantawan Evata ‘cushicunayquipaj cajtaga manami Diosga goycäshunquichu’ nir (Gén. 3:1-5). Chay wichanlapitanami runacunaga Diosta acusar galaycärishga, ‘payga manami gomanchichu ali cawacunapaj munashganchita’ nir. Jesuspis laquicurganmi Taytanpa jutin respetash mana captin. Chaymi gatejnincunata cayno mañacärinanpaj yachachergan: “Jana patsacho kaykaq Papä, qampa jutiki respitashqa kaykulätsun” (Mat. 6:9).

6. ¿Imanirtaj Jehovaga autoridäninwan ima pasaycashganta jucla alcharirganchu?

⁶ Autoridäninta mana respetashganta. Jehovalami derechuyoj caycan cieluchopis Pachachopis gobernamunanpaj, paynoga manami pipis canchu (Apoc. 4:11). ‘Chayga manami rasunchu’ nirmi Satanasga angelcunatawan runacunata engañan. Walca tiempulachoga manachi musyacanmanchu gobernamänanchipaj Jehová Diosla derechuyoj cashganta, yachaj Dios carmi achca tiempo pasanantaraj jaguiycan; cananga ricacaycämunmi quiquinpura runacuna gobernacäriptenga lapanpis mana alilaman chayashganta (Jer. 10:23). Ichiclachona musyacanga Diosninchipa Gobiernunla ali cawayta apamunanpaj cajta.

7. ¿Picunataj Jehovapa contrancho churacargan y imataj paycunawan ruramunga?

⁷ Camashga carpis contrancho churacajcuna. Angelcunatapis runacunatapis juchaynajtami Jehovaga camargan. Satanasmi contrancho churacar galaycurgan, nircurna Adantawan Evatapis Jehovapa contrancho churacächergan. Tiempuwan waquin angelcunapis y runacunapis chaynola rurapäcurgan (Jud. 6). Chaypitapis Israel marcata Jehová acrashga carpis waquincunaga juc dioscunata adurarmi galaycärirgan (Is. 63:8, 10). Diospa shongunga nanaycushgarächi. Chayno carpis Diosninchega shuyaraycashgala, y jinala cananpis ruraycan chiquejnincunata ushacächinanpaj chayamushgan junajcama. Cushicuypämi chay junaj chayamuptenga canga. Canan wichan aguantaycashganchega manami manacajlapächu canga.

8, 9. ¿Imatataj Jehovapa contrancho parlapäcun y noganchega upälalachuraj cacushwan?

⁸ Diabluga lulacuycarlami unaypita cacuycan. Job runata acusashganlachomi Diabluga nergan Diostaga sirvinchi pay bendicimaptinchilash (Job 1:8-11; 2:3-5). Canan wichanpis chaynola Diabluga acusaycämanchi (Apoc. 12:10). Imano cawacushganchichomi ricacanga Diabluga alapa lulacoj cashgan y Diosninchita imaycacunapa pasar sirvishganchipis. Imanomi Jobtapis bendicirgan chaynolami bendecimäshun mana yamacaypa aguantaptinchi (Sant. 5:11).

⁹ Lutanpa yachachicojcunaga Jehovapitami nin ‘runacunata castigashganta y culpanraycur ima mana alicunapis cashganta’. Paycunapa guepanchomi Diabluga caycan. Jina  cay religioso tucojcunaga wamra wanuptin ‘Diosmi cieluman apacush’ nipäcunmi. Mana rasun cashganpita Jehovaga piñacunchi cayno yachachicojcunawanga; chaymi imalapitapis gueshyarga o wanupacurga yarpaylapis yarpäshunchu Diospa juchan cashganta. Yaracuycäshun, cuyacoj cashpanmi Diosninchega imayca alicunata apamunga, chaycunapita waquincunata wilapaycäshun. Jutinta mana cajpaj churajcunata ricarga Jehovaga manami upälalaga cacungachu (Prov. 27:11).

10. ¿Imatataj yachaycachilämanchi Salmo 22:23, 24 texto Jehovapita?

¹⁰ Nacapacuycarlami sirvejnincuna caycan. Jehovaga cuyaycalämanchimi, mayraj shongunpis nanaycun nacaycashganchita ricarga (leiriy Salmo 22:23, 24). Ichanga ricaräcuycarlaga manami cacungachu, mayna wilacurgan imano ushacächinanpäpis (Éxodo 3:7, 8 textuwan tincuchiy; Isaías 63:9). Cayno aunicushganpis walcalana pishin galaycunanpaj: “Wagay manami canganachu. Wañuy manami canganachu. Nanächicuypis, llaquicuypis manami canganachu” (Apoc. 21:4).

11. ¿Ima ninraj Jehová unay wanushgan sirvejnincunaman yarpar?

¹¹ Cuyashgancuna wanuptin. Mayraj Taytalanchi Diosga laquicun cuyashgan siervuncuna wanuptenga, payga mana gongaypa shuyaraycan yapay ricchachimunanpaj (Job 14:15). Imanoraj laquipar yarpachacun unay amigun Abrahanpaj (Sant. 2:23). Moisestapis parlapaj “amïgunwan runa parlajnömi” (Éx. 33:11). Davidpis y waquin salmistacunapis cantapar alabapänanta munaycanchi Taytalanchi Diosga (Sal. 104:33). Lapancunatami Jehovaga yarparaycanla (Is. 49:15). Jina Diosninchega yarparaycanmi jucnin  jucnincuna imano cashgantapis, “Paypäga llapanpis cawaycanmi” (Luc. 20:38). Imaylapis sharcapäcamungami y yapaymi mañacur y Dioslata adurar carcaycanga, chayga cushichengami Jehovata. Wanupacushga carga caypita yachacuycashganchega shacyächimanchimi.

12. Cay mundo pasaypa mana ali caycaptenga, ¿picunaparaj Taytalanchi Jehová alapa yarpachacun?

¹² Nacachicojcuna imayca mana alicunata ruraptin. Edén huertacho jucha ruraycuna galacaycamuptenga, Jehovaga musyarganmi tiempuwanga imayca mana alicuna masraj miraycunanpaj. Diosga chiquinmi canan wichan imayca mana alicuna pasaycashganta. Wacchacunapäga, viudacunapäga, pobricunapäga alapami yarpachacun (Zac. 7:9, 10). Masrächi cuyashgan sirvejnincunata runacuna nacachiptin o carcilman apapäcuptenga. Diosninchinola lapanchipis aguantaycanchi, chayraycurga payga mayraj cuyaycalämanchi.

13. ¿Cay munducho imacuna pasaycashgantataj Jehová ricaycan y imataj ruranga?

¹³ Mana pengaypa cajcunata rurashgancuna. Runacunaga Diosninchi imano cashgannolami rurashga canchi, Diablo ichanga imaycatapis ruran mana ali runaman ticranapaj. Noé cawashgan wichanga ‘TAYTA DIOS ricaran runacuna pasaypa mana alli rurayllachö cawashanta’ y ‘runata rurashanpita pësacushpanmi’ cayno nergan ‘¡Imapäraj runata rurargä!’ (Gén. 6:5, 6, 11). Canan wichanpis chaynolami, may chaycho mana alicunala miraycan. Diabluga cushicunchi warmipura olgupura pununacur tucuy ganracunata rurashganta ricarga (Efes. 4:18, 19). Y masrächi cushicun pilapis Diosta sirviycar juchacunata rurariptenga. Jehovaga manami ricaräcungalachu cay lapanta, chayamunganami chay junaj lapan mana alicunata ushacächinanpaj.

14. ¿Imanotaj cay Pachapis y uywacunapis caycan runacunapa culpanraycur?

¹⁴ Camashgan Pachaga juchunaraycaj wasinomi caycan. Canan wichan ‘runacunaga runa-masinta mana allita rurananpaj munayniyojmi caycan’. Pachatapis uywacunatapis cuidarcaycanchu (Ecl. 8:9; Gén. 1:28). Waquin tantiaj runacunaga wilacurcaycanmi imano runacunapa culpanraycur shamoj watacunacho maychicaj uywacuna wanur ilacananpaj. ¡Pipis manchacunchi cayta wiyarga! Noganchi ichanga cushicunchi Dios aunicushganta musyarga, payga aunicushga ‘cay pachacho mana allita rurajcunata’ ushacächinanpaj y nircur cay Pachata mushojyächinanpaj (Apoc. 11:18; Is. 35:1).

15, 16. ¿Imaraycurtaj Diosninchinola aguantaycashwan? Juc ejempluta churaycamuy.

¹⁵ Maychicaj watacunapana Tayta Jehovaga aguantaycashgala mana alicuna pasacunanta (“ Imacuna pasanantataj Jehová aguantaycanraj” nej recuadruta ricäriy). Munarga maynachi Jehovaga cay munduta ushacächinman cargan, pero shuyaraycanrämi. Chayga noganchitapis yanapämanchimi. Imaraj canman taytacunata juc doctor niptin wamran yurimur gueshyaycarla yurimunanpaj cajta, nacaycarla cawananpaj y nircur wanunanpaj. Wamranta cuyashpanmi taytacunaga cushishga shuyaran wamran imay junaj yurimunanpaj, ashmananpaj sasa captinpis calpachacärin aguantananpaj.

¹⁶ Chaynolami noganchipis Adanpitawan Evapa miraynin carga juchayojla canchi, chayno captinpis Jehovaga cuyaycalämanchimi  (1 Juan 4:19). Naga parlashganchi taytacunaga wamranta cuyarpis ricaraycangalachi imano nacananta, Jehová ichanga manami ricaraycamäshunlachu, payga musyanna imay junaj imayca nacaycunapita libramänanchipaj (Mat. 24:36). Chayno Tayta Jehová alapa cuyaycämaptinchega imaycatapis aguantashunchi.

17. ¿Ima nintaj Hebreos 12:2, 3 Jesuspita, y imanotaj chayga shacyächimanchi?

¹⁷ Imaycatapis Jehová aguantaycaptenga noganchipis aguantaycäshun; Jesuspis chaytami rurargan. Cay Pachacho caycarga, pipis washanta parlaptin, pipis asipar burlacuptin, guerucho warcushgantapis lapanta aguantargan (leiriy Hebreos 12:2, 3). Imanomi Taytanpis aguantargan, chaynolami paypis ima aycata aguantargan; ali caycan yarpachacunanchipaj.

18. ¿Imatataj tantiachimanchi 2 Pedro 3:9 Jehová shuyarashganraycur ima ruracaycämushganpita?

¹⁸ (Leiriy 2 Pedro 3:9). Jehová mayna musyan lapan mana alicunata ushacächinanpaj. Ushacayta manaraj apamushganraycurmi cananga maychicaj runacuna cushi cushila Payta sirviycanchi. Jehová mana shuyämashpanchi captenga manachi yuriylatapis yurishwanchu cargan, manachi payta reguishwanchu ni sirvishwanchu cargan. Ushanancama aguantarga y salvaciunta tarishganchi junajga musyacangami Jehová pacienciacoj cashgan alapa ali cashganta.

19. ¿Imata rurananchipätaj calpachacushwan, y chayraycur imatataj tarishun?

¹⁹ Jehovaman yarparga noganchipis cushi cushila aguantanapämi calpachacushwan, Biblia nin payga cushishgala cawacoj Dios cashganta, contrancho Diablo imaycata ruraycaptinpis (1 Tim. 1:11). Chauras mana yamacaypa aguantaycäshun; ichiclachona lapan Pachacho jutin respetashga canga, Payla autoridäyoj cashgan musyacanga y problemanchicunapitapis librina caycäshun. Ama laquicushunchu, quiquin Tayta Diosninchipis imayca pasacunanta aguantaycanraj. Cayno Biblia nishganga jucninchi jucninchipämi caycan: “Cushishami goyanga ima chayamuptinpis Tayta Diosman sïguir yäracojcunaga. Sïguir yäracuptenga Tayta Diosninchïmi aunishannölla premyuta gonga. Llapan cuyajcunallatami chay mana ushacaj caway premyutaga gonga” (Sant. 1:12).