1, 2. ¿Isaías 65:16 y 17 versocunaca ima shinataj llaquicunahuan ahuantashpa catichun ayudan?

2017 HUATAPICA “¡Ama shaicuichu!” nishca jatun tandanacuitami charircanchij. Cai jatun tandanacuipimi llaquicunata charishpapish ima shina chꞌimbapurashpa catinata yacharcanchij. Ñami chuscu huatacuna pasashca. Shinapish cushicuihuanmi ahuantashpa ñaupajman caticunchij.

² ¿Ima problemacunallatataj charinchij? Ñucanchij familia o amigochari huañushca. Mana cashpaca ungushca cashcamanta, mayorlla cashcamanta, jatun terremoto, acapana tiyashcamanta, contracuna catirashpa llaquichishcamanta o cai millai ungüi COVID-19 tiyashcamantachari llaquicunahuan chꞌimbapuracunchij. ¿Manachu tucui cai llaquicuna tucurichun munanchij? Ñallami Yayitu Jehová Diosca cai tucui mana allicunataca tucuchinga. Cai tucui llaquicunataca manataj yuyarishunchu (Isaías 65:16, 17-ta liyipai).

3. ¿Cunanmanta imatataj yachana canchij?

³ Cai mundopi causanaca mana jahuallachu can. Shamuj punllacunapicarin achca llaquicunahuanmi chꞌimbapurashun (Mateo 24:21). Chaimantami cunanmanta llaquicunata ima shina ahuantashpa catinata yachana canchij. Jesusca: ‘Ahuantashpa ñucata catirajcunaca quishpiringuichijmi’ nircami (Lucas 21:19). Llaquicunata ahuantashpa catingapajca shujtajcunapish ima shina llaquicunata ahuantacushcatami yachana canchij.

4. ¿Ima shinataj Jehová Diosca ñucanchijman llaquicunata ahuantachun yachachin?

⁴ Jehová Diosca achca huatacunatami llaquicunata ahuantashpa caticushca. Paimi ñucanchijmanca llaquicunata ima shina ahuantanata yachachin. Cai mundota Diablo mandacushcamantami achca problemacuna tiyan. Jehová Diosca cai  llaquicunata, Diablotapish ratomi chingachi tucun. Pero paica pai agllashca punlla chayangacamami ahuantashpa catinata decidishca (Romanos 9:22). Cunanca Jehová Dios 9 llaquicunata ima shina ahuantashpa caticushcata ricushun.

5. a) ¿Diabloca ima shinataj Diospaj shutitaca yangapi churashca? b) ¿Chaita yachashpaca ima shinataj sintirinchij?

⁵ Diabloca Diospaj shutitami yangapi churashca. Jehová Diosca paipaj shutita respetachun, jatunyachichunmi munan (Isaías 42:8, NWT ). Pero Diabloca 6 mil huatacunatami Diospaj shutitaca yangapi churashpa caticun (Salmo 74:10, 18, 23). Jardín de Edenpica Adán y Evataca Diabloca: ‘Cushilla causachunca Yaya Diosca mana tucuita cushcachu’ nishpami llullarca (Génesis 3:1-5). Chai punllamanta huichimanmi Diabloca Diostaca: ‘Canca gentecunataca mana cuidai tucunguichu’ nishpa juchachishca. Jesusca cai Allpapi cashpaca Jehová Diospaj shutita yangapi churachunca mana munajchu carca. Chaimantami Jesusca paipaj discipulocunamanca: “Jahua pachapi caj ñucanchij Yaya, cambaj jucha illaj shutitaca, alli nishca cachun” nishpa mañachun yachachirca (Mateo 6:9).

6. ¿Jehová Diosca pailla mandana derechota charishcata ricuchingapajca imamantataj achca tiempota pasachun saquishca?

⁶ Huaquincunaca Jehová Dios ama mandachunmi jarcasha nincuna. Jehová Diosca pailla alli mandaj cashcamantami jahua pachata, cai pachata mandana derechota charin (Apocalipsis 4:11). Pero Diabloca jahua pachapi causaj angelcunatapish, cai pachapi causaj gentecunatapishmi Dioslla mandana derechota charishcata ama crichun pandachisha nin. Diablo nishcacuna llulla cashcata ricuchingapajmi achca tiempo minishtirishca. Chaimantami Jehová Diosca gentecunallataj paicunapura mandanacushpa causachun achca tiempota saquishca. Achca tiempopimi gentecuna Diosta mana cazushcamanta paicunapurallataj mana mandai tucushcata cuentata cushcanchij (Jeremías 10:23). Jehová Dios pacienciata charishcamantami pailla mandana derechota charishcata tucuicuna cuentata cungacuna. Shinallataj Diospaj Gobiernolla cai Allpaman alaja causaita apamunatapishmi intindingacuna.

7. a) ¿Picunataj Diospaj contra tucushcacuna? b) ¿Jehová Diosca millaicunataca imatataj ruranga?

⁷ Diospaj huaquin churicunaca paipaj contrami tucurcacuna. Jehová Diosca angelcunatapish, runacunatapish jucha illajtami rurarca. Pero shuj angelca Diosta mana cazushcamantami Satanás tucurca. Paica jucha illaj Adanta, Evatapishmi Diospaj contra tucuchun pandachirca. Shujtaj angelcunapish, shujtaj runacunapishmi Diospaj contra tucushcacuna (Judas 6). Qꞌuipacarin Dios agllashca pueblomanta huaquin israelitacunaca Diosta mana cazushpami yanga dioscunata adorai callarircacuna (Isaías 63:8, 10). Chaimantami Jehová Diosca shungu pꞌaquirishca sintirirca. Pero cai millai gentecunata tucuchingacamami paica ahuantashpa caticushca. Ñalla Jehová Dios tucui millai gentecunata tucuchijpica Diosta sirvijcunaca cushillami sintirishun.

8, 9. a) ¿Diabloca Jehová Diosmantaca ima llullacunatataj nin? b) ¿Ñucanchijca Diablo nishcacuna llulla cashcataca ima shinataj ricuchinchij?

⁸ Diabloca Diosmantaca achca llullacunatami nishca. Diabloca Jobta, Diosta tucui sirvijcunatapishmi ‘Diostaca mana cꞌuyaimanta sirvinguichijchu’ nishpa juchachirca (Job 1:8-11; 2:3-5; Apocalipsis 12:10). Pero ñucanchijca llaquicunata ahuantashpa, Jehová Diosta cꞌuyaimanta sirvishpaca Diablo llulla cashcatami  ricuchishun. Chashna ahuantajpica Jehová Diosca Jobta shinallatajmi ñucanchijtapish bendicianga (Santiago 5:11).

⁹ Panda religioncunaca cai mundopi tiyaj tucui llaquicunamantaca Yaya Diosmi culpata charin nishpami llullancuna. Shinallataj shuj huahua huañujpica Diosca jahua pachapi shuj angelta minishtishcamantami apan nishpami llullancuna. Chashnami Diabloca Jehová Diosta cꞌamishpa caticun. Pero ñucanchijca chaitaca mana crinchijchu. Ashtahuanpish ima ungüita charishpa o shuj familia huañujpica Yaya Diostaca mana culpanchijchu. Shinallataj Jehová Dios tucui llaquicunata tucuchinatami alli yachanchij. Chaimi tucuicunaman Jehová Diosca cꞌuyajmi can nishpa huillana canchij. Chaita rurajpica Jehová Diosca Diablo llulla cashcatami ricuchinga (Proverbios 27:11).

10. Salmo 22:23, 24-pi nishca shinaca ¿llaquicunahuan cajpica Jehová Diosca imatataj ruranga?

¹⁰ Jehová Diosca paita sirvijcunata cꞌuyashcamantami paita sirvijcuna llaquicunahuan cajpica paipish llaquilla sintirin. Por ejemplo, Diosta sirvijcuna llaquicunata charijpi, paicunata catirashpa llaquichijpi, ima ungüita charijpica paipish llaquillami sintirin (Salmo 22:23, 24-ta liyipai). Chaimantami tucui cai llaquicunataca Diosca tucuchisha nin (Éxodo 3:7, 8; Isaías 63:9 versocunata ricui). Ñallami Jehová Diosca ñucanchijmantaca tucui huiquita pꞌichanga. Huañuitapish, huacaitapish, llaquitapishmi tucui anchuchinga (Apocalipsis 21:4).

11. ¿Jehová Diosca paita alli sirvijcuna huañushcamantaca ima shinataj sintirin?

¹¹ Jehová Diosca paita sirvijcuna huañujpipish paicunata cutin ricunatami shuyacun (Job 14:15). Por ejemplo, paipaj amigo Abrahamtami cutin ricunata achcata munan (Santiago 2:23). Cutin Moiseshuanca paica ‘ñahui ñahuimi’ parlaj carca. Paita ricunatapishmi shuyacun (Exodo 33:11). Shinallataj  Davidpish, salmocunata cantajcunapish cutin paita alabachunmi achcata munan (Salmo 104:33). Cai Diosta sirvijcuna huañushca cajpipish paicunamantaca manataj cungarinchu (Isaías 49:15). Jehová Diosca paicuna ima shina cashcataca allimi yuyarin. Chaimantami paicunaca paipajca causacujcuna shina can (Lucas 20:38). Ñallami paicunataca causachinga. Paicunapaj mañashcacunata, paicunapaj adorashcatami cutin ñalla chasquinga. ¿Familia huañujpi paita cutin tigra ricunata yachashpaca manachu cushilla sintirinchij?

12. ¿Jehová Diosca imamantataj llaquilla sintirin?

¹² Millai gentecuna shujtajcunata llaquichijpimi Yayitu Diospish llaquilla sintirin. Yayitu Diosca Adán y Eva paita mana cazushca qꞌuipaca ashtahuan millai gentecuna tiyanataca allimi yacharca. Paica cunan punllacunapi tiyaj tucui millai ruraicunataca manataj ricunayachinchu. Ashtahuancarin Jehová Diosca sololla cajcunamanta, fuerza illaj cajcunamanta, viudacunamanta, huerfanocunamantami achcata preocuparin (Zacarías 7:9, 10). Paita sirvijcunata yangamanta juchachishpa carcelpi churajpica achcatami llaquirin. Cai laya llaquicunata apacushpaca Jehová Dios ñucanchijta cꞌuyashcataca manataj cungarinachu canchij.

13. a) ¿Diabloca gentecunataca imata rurachuntaj pandachicun? b) ¿Jehová Diosca imatataj ruranga?

¹³ Gentecunaca tucui laya mapa ruraicunatami rurancuna. Jehová Diosca runacunataca paiman rijchajtami rurarca. Pero Diabloca mana allicunata rurachunmi pandachin. Noepaj punllacunapica gentecuna millaita rurashcata ricushpaca Diosca shungupi nanarishpami llaquirirca (Génesis 6:5, 6, 11). ¿Chai punllamanta cunancamaca gentecunaca cambiashcachu? Mana. Diabloca shuj cꞌarihuan shuj huarmihuan huainayashpa o huarmipura, cꞌaripura huainayashpa causachunmi achca gentecunataca pandachishpa caticun (Efesios 4:18, 19). Diosta sirvijta huainayana trampapi urmachishpacarin Diabloca achcatami cushicun. Pero Yayitu Diosca ñallami cai tucui mapa ruraicunataca tucuchinga.

14. ¿Runacunaca ima shinataj cai Allpata, animalitocunataca mana alli cuidacuncuna?

¹⁴ Runacunaca paicunapura mandashpapish cai Allpapi tiyaj animalitocunata, Allpataca Jehová Dios munashca shinaca mana cuidashcacunachu (Eclesiastés 8:9; Génesis 1:28). Huaquin cientificocunaca runacunapaj culpamantami catij huatacunapica achca animalitocuna huañunga nincunami. Chaita yachashpami mancharishcacuna can. Pero ñucanchijca Jehová Dios ñalla cai Allpata, animalitocunata mana cuidajcunata tucuchishpa cai Allpatapish sumaj paraisota ruranata yachashpaca cushillami sintirinchij (Apocalipsis 11:18; Isaías 35:1).

15, 16. ¿Imamantataj Jehová Dios shina llaquicunata ahuantashpa catina canchij? Shuj ejemplohuan parlai.

¹⁵ Jehová Diosca achca huatacunatami achca llaquicunata ahuantashpa caticushca (“ Jehová Diosca ahuantashpami caticun” nishca recuadrota ricui). Diosca cai mana alli mundotaca pai munashcapimi tucuchi tucun. Pero ñucanchij beneficiarichunmi paica pacienciahuan shuyachun. Cai chꞌimbapuraipi yuyashun. Shuj cusa huarmimanchari shuj doctorca: “Cambaj huahuaca discapacitadomi huacharinga. Mana achcata causangachu. Llaquicunatami charinga” nishpa huillan. Yaya mamaca cashna llaquicunahuan chꞌimbapuranata yachashpapish huahua huacharijpica cushillami sintirincuna. Huahuata cꞌuyashcamantami alaja causaita charichun tucui pudishcata rurancuna.

¹⁶ Ñucanchijpish Adanpaj Evapaj huahua huahuacuna cashcamantami chai ungushca  huahua shinallataj juchayujcuna canchij. Chashna cajpipish Jehová Diosca ñucanchijtami cꞌuyan, cuidan (1 Juan 4:19). Ashtahuancarin Jehová Diosca ñucanchij charishca llaquicunata tucuchingapajmi ña shuj punllata agllashpa charicun (Mateo 24:36). Caita yachashpaca Jehová Diosta cꞌuyashcamantami llaquicunata charishpapish ahuantashpa cati tucunchij.

17. Hebreos 12:2, 3-pi nishca shinaca ¿ñucanchijpish Jesús shina ahuantashpa catingapajca imatataj rurana canchij?

¹⁷ Jehová Diosmi ñucanchij ahuantangapajca alli ejemplo can. Jesuspish cai Allpapi cashpaca paipaj ejemplotami catirca. Paita yangamanta juchachijpi, mana alli tratajpi, huañuchijpica ñucanchijmantami tucuita ahuantarca (Hebreos 12:2, 3-ta liyipai). Ñucanchijpish Jehová Diospaj ejemplota catishpami llaquicunata ahuantai tucushun.

18. 2 Pedro 3:9-pi nishca shinaca ¿Jehová Dios pacienciata charishcamantaca ima beneficiocunatataj charishcanchij?

¹⁸ (2 Pedro 3:9-ta liyipai). * Jehová Diosca millai gentecunata tucuchingapajmi shuj punllata agllashpa charicun. Paipaj pacienciamantami achca gentecunaca Jehová Diosta sirvishpa, alabashpa caticunchij. Paicunaca huacharishpa, Jehová Diosta cꞌuyashpa, paiman mingarishpa sirvichun saquishcamantami agradicishca sintirincuna. Tucuringacama llaquicunata ahuantashpaca Jehová Dios pacienciata charishcamantami achca millón gentecunaca quishpirishun.

19. a) ¿Jehová Dios llaquicunata tucuchingacamaca imata rurashpataj catina canchij? b) ¿Chashna ahuantashpaca imatataj chasquishun?

¹⁹ Diablo cai pachata mandacushcamantami achca llaquicuna, problemacuna tiyan. Pero Jehová Diosca cushicuihuanmi cai llaquicunataca ahuantashpa caticun (1 Timoteo 1:11, NWT ). Ñucanchijpish llaquicunataca Jehová Dios shinallatajmi cushicuihuan, pacienciahuan ahuantashpa catina canchij. Jehová Dios paipaj shutita jatunyachingacama, cai Allpata mandangacama, tucui problemacunata tucuchingacamami ahuantashpa catina canchij. Santiago 1:12-pica: “Llaquicunahuan cashpapish ahuantashpa catij runaca cushicunmi. Chashna ahuantajpimi Jehová Diosca shuj premiota shina paimanca causaita cunga. Chai premiotaca paita cꞌuyashpa catijcunamanmi Diosca cusha nishca” ninmi (NWT ).