1-2. Akapeea ta Iehova tuatua ia Isaia 65:16, 17 me akamaroiroi ia tatou kia kore e tuku i te au?

“AURAKA E TUKU I TE AU!”, ko te tumu manako tera o te uruoaanga tapere o te 2017. Kua akaari mai te reira akapeea tatou me akakoromaki i tetai ua atu manamanata. Kua raveia teia uruoaanga e ā mataiti i topa ake nei e te akakoromaki nei rai tatou i roto i teia ao kino.

² Eaa te au manamanata tei tupu kia koe? Kua mate ainei tetai o toou ngutuare e toou oa? E maki kino ainei toou? E manamanata ainei toou no te tu ruaine? Kua tupu ainei tetai tumatetenga natura e te kino kia koe? Me kore te kino ta te COVID-19 i akatupu? Te tiaki nei tatou i te rā e takoreia ai teia au mea pouroa​—ka akangaropoinaia e kare rava e tupu akaou!​—E tatau ia Isaia 65:16, 17.

3. Eaa ta tatou ka rave i teianei, e no teaa ra?

³ E ngata te oraanga i roto i teia akatereanga, e penei ka kino atu te reira a te tuatau ki mua. (Mata. 24:21) No reira, ka anoanoia tatou kia tamou marie i te tu akakoromaki. No teaa ra? Karanga a Iesu: “Kareka te tāpu tikai e tae ua atu ki te openga ra, ka ora ïa.” (Mata. 24:13) Me akamanako tatou i te tu akakoromaki o tetai ke, ka akamatutu te reira i to tatou tu akakoromaki.

4. Eaa a Iehova i riro ei akaraanga meitaki rava atu no te tu akakoromaki?

⁴ Koai te akaraanga meitaki rava atu no te tu akakoromaki? Ko te Atua ko Iehova. Ka poitirere ainei koe? Penei paa. Tei raro teianei ao i te akatereanga a te Tiaporo, e kua kī te reira i te au manamanata tukeke. E mana to Iehova i te takore viviki i te au manamanata, inara kua akanoo takere aia i tetai rā no te rave i te reira. (Roma 9:22) Teia atianga, te akakoromaki nei te Atua e tae ua atu ki  tera rā. Ka uriuri tatou e iva au mea ta Iehova e akakoromaki nei.

5. Akapeea to te Atua ingoa te akakinoia anga, e eaa toou manako no te reira?

⁵ Akakinoia tona ingoa. Akaperepere maata a Iehova i tona ingoa e te inangaro ra aia i te katoatoa kia akangateitei i te reira. (Isa. 42:8) Inara no tetai ono tauatini mataiti, kua akakinoia tona ingoa meitaki. (Sala. 74:10, 18, 23) Kua akamata teia i roto i te kainga i Edene, te akaapaanga te Tiaporo (aiteanga “Tapepe Pikikaa”) i te Atua no tei kore i oronga i tetai apinga meitaki kia mataora a Adamu e Eva. (Gene. 3:1-5) Mei tera taime mai, kua akaapa pikikaaia a Iehova no tei kore i oronga i ta te tangata e anoano ra. Kua manata a Iesu no te au akakinoanga i te ingoa o tona Metua. No teia tumu, kua apii aia i tana au pipi kia pure: “E to matou Metua i te ao ra, kia tapu toou ingoa.”​—Mata. 6:9.

6. Eaa a Iehova i tuku ei i tetai tuatau kia akatikatika i te manamanata no tona turanga ngateitei?

⁶ Patoiia tona turanga ngateitei. Ko Iehova anake tei tau kia tutara ki runga i te rangi e te enua nei, e nana te tutaraanga meitaki rava atu. (Apo. 4:11) Inara kua tauta te Tiaporo i te akavare i te au angera e te tangata kia manako e kare te Atua e tau kia tutara. Kare teia manamanata no to Iehova turanga ngateitei e rauka i te akatikatika vivikiia. No reira, kua tuku te Atua i tetai tuatau no te tangata kia tutara e kia kite e me kare ratou e akarongo ki Tei Anga mai, ka puapinga kore ratou. (Iere. 10:23) Na roto i te tu akakoromaki o te Atua, kua rauka teia manamanata i te akatikatikaia. Ka akangateiteiia aia me akatupu tona Patireia i te ‘au e te tinamou i te enua nei.

7. Koai ma tei meameaau ia Iehova, e eaa tana ka rave kia ratou?

⁷ Tu meameaau o tetai o tana au tamariki. Kua anga a Iehova i te au angera e te tangata ma te tu apakore. Inara kua meameaau te angera ko Satani (aiteanga “Tei Patoi”) ia Iehova e kua akakeu ia Adamu e Eva, kia meameaau katoa. Kua piri atu tetai au angera e te tangata ki teia meameaau anga. (Iuda 6) Muri mai, kua patoi tetai pae o te ngati Iseraela, te iti tangata ikiia o te Atua, e kua akamori i te au atua pikikaa. (Isa. 63:8, 10) Kua taitaia tikai a Iehova. Noatu rai, kua akakoromaki ua rai aia e tae ua atu ki te taime e takore ei aia i te aronga meameaau. Ka akapumaana teia i te au tavini tiratiratu o Iehova tei akakoromaki kapiti kiaia i te kino i roto i teia ao!

8-9. Eaa te au akakinoanga no runga ia Iehova, e eaa ta tatou ka rauka i te rave?

⁸ Au akakinoanga a te Tiaporo. Kua akaapa a Satani i te tavini tiratiratu o Iehova, ko Iobu, e kua karanga e te tavini ra to te Atua au tavini tiratiratu pouroa iaia kia puapingaia ratou. (Iobu 1:8-11; 2:3-5) Te akaapa nei rai te Tiaporo i te tangata i teia tuatau. (Apo. 12:10) Ka rauka ia tatou i te akapapu e e pikikaa a Satani na te akakoromakianga i te au manamanata e te vai tiratiratu anga kia Iehova no to tatou inangaro Iaia. Me akakoromaki tatou mei ia Iobu rai, ka akameitakiia tatou.​—Iako. 5:11.

⁹ Taangaanga a Satani i te au arataki akonoanga pikikaa kia karanga e na Iehova i akatupu i te mamae o te tangata. Karanga tetai pae e me mate te tamariki, kua apai te Atua ia ratou ei angera ki te  rangi. E pikikaa te reira! Me tuia tatou e te maki kino e me mate tetai tei akaperepereia, kare tatou e akaapa i te Atua. Mari ra, ka irinaki tatou e ka akatikatika aia i te reira. Ka akakite tatou ki te katoatoa tei akarongo mai e e Atua aroa a Iehova. Ka rauka i reira iaia i te patoi atu i tei akakino mai iaia.​—Mase. 27:11.

10. Eaa ta Salamo 22:23, 24 e apii maira no runga ia Iehova?

¹⁰ Tu mamae o tona au tavini akaperepere. E Atua tangi aroa a Iehova. E mamae ana aia me aue tatou no te au turanga kino—mei te takinokinoanga, te maki, e to tatou tu apa ua. (E tatau ia Salamo 22:23, 24.) Te kite maira a Iehova i to tatou au mamae; te inangaro ra aia i te takore i te reira, e ka pera rai aia. (Akaaite kia Exodo 3:7, 8; Isaia 63:9.) A tetai rā, ka “orei [aia] i te roimata katoatoa; e e kore rava te mate, e te aue, e te mii; e te mamae oki, e kore katoa ïa.”​—Apo. 21:4.

11. Eaa to Iehova manako no tona au tavini tiratiratu tei mate?

¹¹ Akatakakeanga mei tona au oa tiratiratu tei mate. Eaa to Iehova manako no te au tane e te au vaine tiratiratu tei mate? Te inangaro ra aia i te kite akaou ia ratou. (Iobu 14:15) E ākā inangaro to Iehova i te kite akaou i tona oa ia Aberahama. (Iako. 2:23) Me kore ia Mose, tana i tuatua atu “mata e te mata.” (Exo. 33:11) Tona inangaro maata i te akarongo akaou kia Davida e te au tata salamo kia imene i te au imene akameitaki! (Sala. 104:33) Noatu te moe ra teia au oa o te Atua i roto i te vaarua, kare ratou i ngaropoina ia Iehova. (Isa. 49:15) Te maara nei iaia to ratou au tu. Mei te mea rai e “te ora katoatoa ra”  ratou i mua iaia. (Luka 20:38) A tetai rā, ka akatuakaou mai aia ia ratou, e ka āriki akaou i ta ratou pure akatenga e ta ratou akamorianga. Me kua mate tetai o toou akaperepere, kia riro teia i te akapumaana ia koe.

12. Eaa tei akataitaia ia Iehova i roto i teia tuatau openga?

¹² Te tangata e takinokinoia ra e te aronga rave kino. Te tupu anga te meameaau i Edene, kua kite a Iehova e ka tupu te kino ki te maata i mua ake ka meitaki ei te reira. Te rikarika ra a Iehova i te tu kino, akono kore e te tā ua i te ao nei. E tangi ana aia i te aronga parukaua—te aronga paruparu, te matiroeroe e te vaine takaua. (Zeka. 7:9, 10) E taitaia ana a Iehova me kite aia i tona au tavini tiratiratu e takinokinoia ra e me peʼiia ratou ki roto i te are auri. Mea papu e te inangaro maira aia ia kotou katoatoa e akakoromaki ra mei iaia rai.

13. Eaa te au tu ainga tau kore ta Iehova e kite maira, e eaa tana ka rave?

¹³ Te tu ainga tau kore o te tangata. Kua angaia te tangata i to te Atua tu, inara e reka ana a Satani me rave te tangata i te au mea tau kore e te viivii. Te kite anga te Atua e “e kino maata to te tangata” i to Noa tuatau, “kua tataraara iora Iehova, koia i anga i te tangata ki runga i te enua nei, e ongoongo rava akera tona ngakau.” (Gene. 6:5, 6, 11) Kua meitaki mai ainei te turanga i teia tuatau? Kare! Ka mataora te Tiaporo me kite aia i te au tu ainga tau kore e raveia ra i teia tuatau, i rotopu i te tane e te vaine, te tane e te tane, e te vaine e te vaine! (Ephe. 4:18, 19) Ka rekareka maata a Satani me rave te au tavini o Iehova i teia ara kino. Me tae ki to Iehova tuatau, ka takore aia i te au tu ainga tau kore e te aronga tei rave i te reira.

14. Eaa ta te tangata i rave ki te enua e te manu?

¹⁴ Te enua e takinokinoia ra. Kare te tangata e ‘tutara ki rungao i tetai, ei mate nona uaorai,’ mari ra te takinokino katoa ra ratou i te enua e te au manu ta Iehova i anga. (Kohe. 8:9; Gene. 1:28) Karanga te aronga kite taieni e ka riro ta te tangata e rave ra i te tamate e mirioni ua atu au tu manu e te tumu rakau a te au mataiti ki mua. Karanga ratou e kua kino rava te tu o te enua! Mea meitaki, kua taputou a Iehova i te “takore i te aronga te takino ra i te enua nei” e ka akariro i te enua nei ei parataito.—Apo. 11:18, NW; Isa. 35:1.

15-16. Eaa te ka akakeu ia tatou kia akakoromaki kapiti kia Iehova? Akatutu mai.

¹⁵ Akamanako ana i te au manamanata ta to tatou Metua i te rangi e akakoromaki nei no te tauatini ua atu mataiti. (Akara i te pia “ Ta Iehova e Akakoromaki Nei.”) Ka rauka ia Iehova i te takore i teia akatereanga kino i tetai ua atu taime. Inara kua riro tona tu akakoromaki ei akameitakianga no tatou! Ei akatutuanga. Akamanako ana e kua akakiteia ki tetai tokorua e ka anau mai ta raua pepe ma te au tu maki o te kopapa, ka ngata i te akono iaia e ka mate tamariki ua aia. Noatu te reira, kua rekareka rai te nga metua te anau anga mai ta raua pepe. Kua akakeu to raua inangaro maata no teia pepe kia akakoromaki i te au manamanata e kia oronga i tetai oraanga meitaki no te pepe.

¹⁶ Mei te reira rai, kua anauia mai te au tamariki pouroa a Adamu e Eva ma te tu  apa ua. Noatu te reira, te inangaro ra a Iehova ia ratou e ka akono aia ia ratou. (1 Ioa. 4:19) Inara ei tuke ki te nga metua i roto i te akatutuanga, ka rauka ia Iehova i te rapakau i te reira. Kua akanoo aia i tetai rā no te takore i te au manamanata o te tangata. (Mata. 24:36) Kare ainei ka akakeu tona aroa ia tatou kia akakoromaki kapiti ua rai kiaia?

17. Akapeea to Iesu akaraanga ia Ebera 12:2, 3 te tauturu anga ia tatou kia akakoromaki?

¹⁷ Akanoo a Iehova i te akaraanga meitaki rava atu no te tu akakoromaki. Kua aru a Iesu i te akaraanga o tona Metua. I te enua nei, kua akakoromaki a Iesu i te au akakinoanga, te taakama, e te rakau tamamae no tatou. (E tatau ia Ebera 12:2, 3.) Riro to Iehova tu akakoromaki i te tauturu ia Iesu kia akakoromaki. Ka tauturu katoa te reira ia tatou.

18. Akapeea a 2 Petero 3:9 te tauturu anga ia tatou kia kite i to Iehova tu akakoromaki?

¹⁸ E tatau ia 2 Petero 3:9. Kite a Iehova i te taime meitaki tikai no te takore i teia ao kino. Riro tona tu akakoromaki i te arataki mai i tetai urupu tangata, e mirioni tuma, no te akamori e te akapaapaa iaia. Mataora ratou pouroa e kua akakoromaki a Iehova kia anauia mai ratou, kia apii i te inangaro iaia, e te akatapu ia ratou uaorai kiaia. Ka tutaki a Iehova i te au mirioni ua atu tangata te ka akakoromaki e tae ua atu ki te openga!

19. Eaa ta tatou ka tauta i te rave, e eaa te tutaki ka rauka mai?

¹⁹ Apii mai tatou mei ia Iehova akapeea me akakoromaki ma te rekareka. Noatu te au mamae e te kino ta Satani i akatupu, ka vai rai a Iehova ei “Atua mataora.” (1 Timo. 1:11, NW) Ka rauka katoa ia tatou te rekareka me akatapu a Iehova i tona ingoa, me akatinamou aia i tona turanga ngateitei, e te takore i te au manamanata katoatoa. No reira kia maroiroi tatou i te akakoromaki e kia pumaana i te kite e te akakoromaki katoa nei to tatou Metua i te rangi. Me rave tatou i te reira, ka akatupuia teia tuatua: “E ao to te tangata e akakoromaki i te timataanga: kua akatika anakeia mai aia ra, e rauka ïa iaia te korona ora, ta te Atu i tuatua mai e no te aronga i anoano iaia ra.”​—Iako. 1:12.