1-2. Sar o vetuvanje taro Isaija 65:16, 17 pomožinela amenge ma te otkažina amen?

„MA OTKAŽIN TUT!“ sine i tema e regionalno kongreseskiri bašo 2017 berš. Akava kongres sikavgja amenge sar šaj te istrajna keda isi amen problemija. Nakhle štar berš otkeda sine amen akava kongres, a amen panda mora te istrajna ko akava lošno sveto.

² Save problemija sine tut ko posledno vreme? Dali mulo nekoj tari tli familija ili nesavo paše amal? Dali isi tut nesavo pharo nasvalipe? Dali o životo tuke pharo adaleske so phujrovea? Dali doživingjan prirodno katastrofa, nasilstvo ili progonstvo? Ili šaj i pandemija KOVID-19 ili nešto slično kergja te ovel tuke pharo? Edvaj adžikeraja o dive keda sa akala problemija nane više te oven, keda ka bistra len hem nikogaš više nane te slučinen pe! (Čitin Isaija 65:16, 17.)

3. So mora te kera panda akana hem soske?

³ O životo ko akava sveto tano pharo, hem sar so ka nakhel o vreme šaj te ovel panda popharo (Mat. 24:21). Znači, ponadari da valjani te istrajna. Soske? Adaleske so o Isus vakergja: „Preku tumari istrajnost ka spasinen tumaro životo“ (Luka 21:19). Ka ovel amenge polokho te istrajna ako razmislinaja bašo adava sar o javera istrajnena keda isi len slična problemija sar amare.

4. Soske šaj te vakera kaj o Jehova tano najšukar primer baši istrajnost?

⁴ Koj tano najšukar primer baši istrajnost? O Jehova. Šaj akava odgovor iznenadinela tut. Ama razmislin bašo akava. Akale svetoja vladinela o Satana, adaleske tano  pherdo problemencar. E Jehova isi le mokj odma te čhinavel sa o problemija, sepak ov adžikerela ko dive so odredingja le bašo adava (Rim. 9:22). Ama džikote na avela adava dive, amaro Devel ponadari da istrajnela. Te dikha enja bukja kolende so o Jehova istrajnela.

5. Sar sine ladžakerdo e Devleskoro anav, hem so mislinea tu bašo adava?

⁵ E Jehovaskoro anav sine ladžakerdo. Ov mangela plo anav hem mangela sekova jekh te poštujnel le (Isa. 42:8). Ama ko posledna šov milja berša leskoro anav tano ladžakerdo (Ps. 74:10, 18, 23). Ki gradina Eden o Beng, so značinela „klevetniko“, vakergja kaj o Devel na dela e Adameske hem e Evake adava so valjani lenge te oven bahtale (1. Moj. 3:1-5). Ottegani o Jehova tano krivimo kaj na dela e manušenge adava so čače valjani lenge. E Isuse mučinela sine adava so leskere Dadeskoro anav sine ladžakerdo. Adaleske, ov sikavgja ple učenikon te molinen pe: „Amaro Dad so sian ko nebo, te slavinel pe tlo sveto anav“ (Mat. 6:9).

6. Soske o Jehova mukhela te nakhel dovolno vreme angleder te dokažinel kaj isi le pravo te vladinel?

⁶ But džene tane protiv e Devleskoro pravo te vladinel. Samo e Jehova isi le pravo te vladinel ko nebo hem ki Phuv, hem ov vladinela ko najšukar način (Otk. 4:11). Ama o Beng probingja te hovavel e angelen hem e manušen te šaj te mislinen kaj e Devle nane le pravo ko adava. O problemi bašo e Jehovaskoro pravo te vladinel našti rešinela pe sine odma. Adaleske o Devel mudro mukhlja dovolno vreme e manušenge te šaj te dikhen kaj ako probinena te vladinen bizi leste ola našti te oven uspešna (Erem. 10:23). Adaleske so o Jehova tano strplivo akava problemi ka rešinel pe jekh puti zasekogaš. Leskoro pravo te vladinel ka ovel opravdimo. Hem ka dokažinel pe kaj samo leskoro Carstvo ka anel čačutno mir hem sigurnost.

7. Koj buningja pe protiv o Jehova hem so ka kerel ov bašo adava?

⁷ Nesave taro e Jehovaskere čhave buningje pe protiv leste. Ov stvoringja e angelen hem e manušen sovršena, bizi nisavi maana. Ama tegani o angeli o Satana, so značinela „protivniko“, buningja pe protiv o Jehova. Ov ubedingja e sovršena manušen, e Adame hem e Eva, te buninen pe protiv leste. Javera da angelija hem manuša isto agjaar buningje pe (Juda 6). Pokasno čak nesave tari Izraelsko nacija, e Devleskoro birimo narodo, otfrlingje le hem počmingje te obožavinen hovavne devlen (Isa. 63:8, 10). E Jehova sine le pravo so osetingja pe izneverimo. Ama ov istrajngja hem ponadari da ka istrajnel, sa džikote na avela o vreme te uništinel sa okolen so buninena pe. Tegani o Jehova hem leskere verna sluge na ka valjani više te istrajnen o lošna bukja taro akava sveto!

8-9. Save hovajba tane vakerde bašo Jehova hem so šaj amen te kera bašo adava?

⁸ E Satanaskere hovajba. O Satana obviningja e Jove hem sa e javere verna slugen e Jehovaskere kaj obožavinena le taro sebična pričine (Jov 1:8-11; 2:3-5). Ov kerela adava avdive da (Otk. 12:10). Amen šaj te pomožina te dokažinel pe kaj o Satana tano hovavno agjaar so ka istrajna ko amare nevolje hem ka ačhova verna e Jehovaske soske mangaja le. Isto sar e Jove, o Jehova ka nagradinel amen da ako siem istrajna (Jak. 5:11).

⁹ Preku o hovavne religiozna vodačija o Satana vakerela kaj o Jehova tano surovo  hem krivo bašo muke so cidena o manuša. Nesave čak vakerena kaj keda nesavo čhavo merela, o Devel lelja le soske valjangje leske poviše angelija ko nebo. Akalea ni hari na poštujnena e Devle. Ama amen džanaja kaj o Jehova tano Dad pherdo mangipaja. Nikogaš na keraja krivo e Devle keda isi amen pharo nasvalipe ili keda merela amendar nekoj so mangaja le. Namesto adava amen verujnaja kaj o Devel jekh dive ka sasljarel sa o nasvalipa hem ka vazdel e mulen. Adaleske, sarinenge so mangena te šunen vakeraja kaj o Jehova tano pherdo mangipe. Tegani o Jehova ka šaj te odgovorinel okoleske so asala leske (Izr. 27:11).

10. So vakerela amenge o Psalm 22:23, 24 bašo Jehova?

¹⁰ E Devleskere mangle sluge mučinena pe. O Jehova tano sočuvstvitelno Devel. Ov tano but tažno keda dikhela kaj mučinaja amen, bizi razlika dali adava tano taro progonstvo, nasvalipe ili nesovršenost. (Čitin Psalm 22:23, 24.) O Jehova haljola amari dukh. Ov mangela te čhinavel la hem ka kerel adava. (Sporedin 2. Moj. 3:7, 8; Isa. 63:9.) Paše tano o dive keda „ka kosel sekoja asvin taro amare jakhja hem meribe nane te ovel više, ni žalibe, ni rojbe, ni dukha“ (Otk. 21:4).

11. So osetinela o Jehova sprema ple verna sluge so mule?

¹¹ O Jehova tano odvojmo ple amalendar so mule. So osetinela o Jehova sprema ple verna sluge kola so mule? Ov edvaj adžikerela palem te dikhel len! (Jov 14:15). Zamislin samo kobor falinela e Jehovaske leskoro amal o Avraam (Jak. 2:23). Ili o Mojsej, kasaja so kerela sine „muj mujea“ lafi (2. Moj. 33:11). Hem kobor samo mangela te šunel e Davide hem e javere psalmisten sar giljavena pumare but šuže  falbena gilja! (Ps. 104:33). Iako leskere amala mule, ov na bistergja len (Isa. 49:15). Ov pamtinela sekova detali baši lende. I Biblija phenela kaj „leske sarine ola tane dživde“ (Luka 20:38). Jekh dive, ov ka iranel len ko životo hem palem ka šunel lengere iskrena molitve hem ka prifatinel lengoro obožavanje. Ako mulo tutar nekoj so mangea le, akala lafija šaj te utešinen tut.

12. So posebno dukhavela e Jehova ko akala posledna hem lošna dive?

¹² O lošna manuša kerena šteta e javerenge. Keda slučingja pe i pobuna ki Edensko gradina, o Jehova džanlja kaj o uslovija ki Phuv ka oven sa pološna. Ov mrzinela o lošnipe, i nepravda hem o nasilstvo so isi avdive ko sveto. Otsekogaš posebno grižinela pe okolenge soj tane slaba. Sar na primer okolenge kolen so nane koj te pomožinel, sar soj o čhave bizo roditelija hem o udovice (Zah. 7:9, 10). Le posebno dukhala le keda dikhela kaj leskere sluge tane progonime hem phanle. Šaj te oven sigurna kaj o Jehova mangela sarinen tumen so istrajnena zaedno lea!

13. Kola odvratna postapke dikhela o Jehova maškar o manuša hem so ka kerel bašo adava?

¹³ O manuša ovena sa ponemoralna. O manuša sine stvorime sprema e Devleskoro liko, ama o Satana mangela te čhivel len te keren nemoralna bukja. Keda o Devel ko e Noeskoro vreme „dikhlja kaj o lošnipe e manušengoro ki phuv tano baro... pelo pišmani so kergja e manuše ki Phuv hem dukhandilo le ko vilo“ (1. Moj. 6:5, 6, 11). Dali ottegani o sveto ulo pošukar? Dikhjola pe kaj na! E Satanaske tano but milo keda dikhela sar o manuša kerena nemoral na samo manušencar taro isto pol, nego hem manušencar taro sprotivno pol (Ef. 4:18, 19). Ov tano posebno bahtalo keda šaj te čhivel nekas so obožavinela e Jehova te kerel seriozno grevo. Keda e Jehovaskiri strplivost ka avel dži ki granica, ov ka sikavel kaj mrzinela o nemoralno ponašibe hem ka uništinel sa okolen so na mangena te meninen ple nemoralna postapke.

14. So kerena o manuša e Phuvjaja hem e životnencar?

¹⁴ O manuša uništinena i Phuv koja so ov stvoringja la. Na samo so „o manuš vladinela upro manuš ki leskiri šteta“, nego isto agjaar na grižinela pe šukar e Phuvjake hem e životnenge sar so rodingja o Jehova (Prop. 8:9; 1. Moj. 1:28). Nesave naučnikija vakerena kaj e manušengere postapke šaj te anen dži ko adava jekh milioni vrste životne hem rastenija te oven uništime bašo nekobor berša. Šaj te haljova soske nesave manuša tane sekirime baši priroda. Ama, o Jehova vetingja kaj ov ka „uništinel okolen so uništinena i phuv“ hem kaj ka kerel celi Phuv raj (Otk. 11:18; Isa. 35:1).

15-16. So valjani te pottikninel amen te istrajna sar o Jehova? Vaker primer.

¹⁵ Razmislin samo kobor phare problemija trpinela amaro nebesno Dad but milja berša. (Dikh i ramka „ Ko so istrajnela o Jehova“.) O Jehova keda mangela šaj te čhivel krajo akale lošno svetoske, ama amen da isi amen korist tari leskiri strplivost. Te šaj te haljova akava te vakera jekh primer. Zamislin tuke kaj jekhe bračno pareske vakerena kaj lengoro bebe ka bijangjovel seriozno nasvalipaja, nane te ovel le lokho životo hem ka merel but rano. Iako džanena kaj nane te ovel lenge lokho te grižinen pe leske, sepak ola tane but bahtale keda bijangjovela. Adaleske so but mangena  le, ola istrajnena o pharipa te šaj te ovel le o najšukar životo so šaj.

¹⁶ Slično agjaar, e Adameskere hem e Evakere čhave bijangjovena nesovršena. Sepak, o Jehova mangela len hem grižinela pe lenge (1. Jov. 4:19). Ama but porazlično e roditelendar taro primer, o Jehova šaj te čhinavel o muke ple čhavengere. Ov odredingja o vreme keda ka čhivel krajo sa e manušikane mukenge (Mat. 24:36). E Jehovaskoro mangipe valjani te pottikninel amen da te istrajna sa džikote valjani.

17. Sar adava so pišinela bašo Isus ko Evreite 12:2, 3 ohrabrinela amen ponadari da te istrajna?

¹⁷ O Jehova tano sovršeno primer baši istrajnost. O Isus gelo palo ple Dadeskoro primer hem keda sine ki Phuv ov istrajngja vredžiba, ladž hem meribe ko stubo mučibaske. (Čitin Evreite 12:2, 3.) E Jehovaskoro primer baši istrajnost sigurno dengja sila e Isuseske te istrajnel, a šaj te del sila amenge da.

18. Sar o lafija taro 2. Petrovo 3:9 pomožinena amenge te haljova so slučinela pe adaleske so o Jehova tano strplivo?

¹⁸ Čitin 2. Petrovo 3:9. O Jehova džanela keda tano najšukar te čhivel krajo akale lošno svetoske. Adaleske soj tano strplivo, but manuša šaj sine te zapoznajnen le. Hem akana baro mnoštvo taro milionja manuša obožavinena le. Ola tane blagodarna e Jehovaske so istrajngja doborom vreme te šaj te bijangjoven, te zapoznajnen le, te mangen le hem te den lafi kaj ka služinen leske. Keda milionja manuša ka dobinen pli nagrada adaleske so istrajngje dži ko krajo, tegani ka dikhel pe kaj o Jehova šukar kergja so istrajngja.

19. Ko so valjani te ova odlučna, hem savi ka ovel amari nagrada?

¹⁹ Taro Jehova sikljovaja sar te ova bahtale džikote istrajnaja. Iako o Satana kergja te ovel but pharipe hem muke, sepak o Jehova ponadari da tano „bahtalo Devel“ (1. Tim. 1:11). Amen da šaj te ačhova bahtale džikote strplivo adžikeraja o Jehova te slavinel plo sveto anav, te opravdinel plo pravo te vladinel, te anel krajo e lošnipaske hem sa e problemenge so isi amen avdive. Adaleske, te ova odlučna te istrajna hem nikogaš ma te bistra kaj amaro Dad soj ko nebo isto agjaar istrajnela. Ako keraja agjaar akala lafija ka važinen amenge da: „Bahtalo tano o manuš so istrajnela ko iskušenija, soske otkeda ka ovel iskušimo ka priminel i nagrada, o životo, kova so o Jehova vetinela okolenge so mangena le“ (Jak. 1:12).