1-2. E faapefea ona faalaeiauina i tatou i fetalaiga a Ieova i le Isaia 65:16, 17, ina ia aua le faavaivai?

“AUA E TE FAAVAIVAI!” O le matua lenā o le tauaofiaga 2017. Na tatou aʻoaʻoina mai i lenā tauaofiaga auala e tatou te onosaia ai faafitauli e tutupu iā i tatou. Ua fā tausaga talu ona mavae lenā tauaofiaga, ae o loo tatou onosaia pea faafitauli o le olaga i lenei lalolagi.

² Po o e feagai ma ni faafitauli? Po ua maliu se tasi o lou aiga po o sau uō pele? Po o maua oe i se maʻi tugā? Po o e aafia i āuga o le soifua matua? Po o e aafia i mala faalenatura, faiga sauā po o sauāga? Po o e aafia i se faamaʻi e pei o le KOVITI-19? Maʻeu lo tatou moomoo atu i le aso o le a aveesea ai na faafitauli ma o le a lē toe iai!​—Faitau le Isaia 65:16, 17.

3. O le ā e tatau ona tatou faia i le taimi lenei, ma aiseā?

³ Ua matuā faigatā le olaga i lenei lalolagi, ma e ono oo foʻi iā i tatou ni faafitauli e sili atu ona faigatā i le lumanaʻi. (Mata. 24:21) O lea la, e manaʻomia ona faamalosia pea lo tatou onosaʻi. Aiseā? Ona na fetalai Iesu: “O lo outou tumau, e maua ai lo outou ola.” (Luka 21:19) E faamalosia lo tatou tumau pe a manatunatu i auala ua taulau ai isi i le onosaia o faafitauli e pei o o tatou faafitauli.

4. Aiseā ua avea ai Ieova ma faaaʻoaʻoga sili o le onosaʻi?

⁴ O ai le faaaʻoaʻoga sili o le onosaʻi? O Ieova le Atua. Pe e faateʻia oe i lenā tali? E lē tatau ona faateʻia ai oe. O loo pulea e le Tiapolo lenei lalolagi ua tumu i faafitauli. E iā Ieova le mana e faamuta ai faafitauli, ae o loo ia onosaʻi seʻia oo i le aso e na te faia ai faapea. (Roma 9:22) I le taimi lenei, o loo  onosaʻi pea Ieova seʻia oo i lana taimi atofaina. Seʻi o tatou talanoaina ni mea se iva o loo onosaia e Ieova.

5. Ua faapefea ona taʻuleagaina le suafa o le Atua, ma o ā ou faalogona i lenā mea?

⁵ Le taʻuleagaina o lona suafa. E tāua iā Ieova lona suafa, ma o lona finagalo ia faaaloalo tagata uma i lenā suafa. (Isa. 42:8) Ae ua pe ā ma le 6,000 tausaga o taʻuleagaina lona suafa. (Sala. 74:10, 18, 23) Na amata ona taʻuleagaina le suafa o le Atua ina ua tuuaʻia o ia e le Tiapolo (o lona uiga o le “taufaaleaga”) e faapea, ua taofia e le Atua Atamu ma Eva i le faia o se mea e maua ai lo la fiafia. (Kene. 3:1-5) Talu mai lenā taimi, na tuuaʻia sesē ai Ieova e na te taofia tagata mai i le faia o se mea lelei mo i latou. Na mamafa i le mafaufau o Iesu le matuā taʻuleagaina o le suafa o lona Tamā. O le māfuaaga lea na ia aʻoaʻo ai ona soo e tatalo e faapea, “Lo matou Tamā e o i le lagi, ia faapaiaina lou suafa.”​—Mata. 6:9.

6. Aiseā ua faataga ai e Ieova se taimi umi e foʻia ai le luʻia o lana pule silisili ese?

⁶ Le luʻia o lana pule silisili ese. E na o Ieova e iai le aiā e pule aoao ai i le lagi ma le lalolagi, ma e sili ona lelei le auala e pule ai. (Faaa. 4:11) Ae ua taumafai le Tiapolo e faasesē agelu ma tagata, ina ia manatu e leai se aiā a le Atua e pule ai. O lea, e umi se taimi e faamaonia atu ai le tonu o le pule silisili ese a Ieova. O se mea atamai la le faatagaina e le Atua o se taimi umi, ina ia iloa ai e tagata e lē mafai ona latou taulau i le puleaina o i latou lava e aunoa ma le fesoasoani a le Atua. (Iere. 10:23) O le onosaʻi o le Atua, o le a iʻu ai ina foʻia atoatoa lenā luʻi. O le a faasilisilia o ia a o ia faamaonia, e na o lona Malo e mafai ona aumaia le filemu ma le puipuiga moni i le lalolagi.

7. O ai na fouvale faasaga iā Ieova, ma o le ā o le a ia faia iā i latou?

⁷ Le fouvalega a nisi o lana fanau. E lelei atoatoa le auala na foafoaina ai e Ieova ona atalii agaga ma Atamu ma Eva. Peitaʻi, na faaosooso e le agelu fouvale o Satani (o lona uiga “o Lē e Tetee”) Atamu ma Eva le fanau lelei atoatoa a Ieova ina ia la teena o Ia. Na auai foʻi isi agelu ma tagata i le fouvalega. (Iuta 6) Mulimuli ane, na fulitua iā Ieova nisi o tagata Isaraelu lona nuu filifilia, ma liliu e tapuaʻi i atua sesē. (Isa. 63:8, 10) Na matuā talafeagai la le tigā ai o le finagalo o Ieova. Peitaʻi, na onosaʻi Ieova ma o loo onosaʻi pea o ia, seʻia oo i le taimi e na te faaumatia ai tagata fouvale uma. Maʻeu se mapusaga o le a maua e ana auauna faamaoni uma, o ē o loo onosaʻia faatasi ma Ieova mea leaga uma o loo tutupu i lenei faiga o mea!

8-9. O ā pepelo o loo tuuaʻia ai Ieova, ma e faapefea ona tatou tali atu i na pepelo?

⁸ O pepelo faifai pea a le Tiapolo. Na tuuaʻia e Satani Iopu le auauna amiotonu a Ieova e faapea, e manatu faapito le māfuaaga e auauna ai i le Atua. Ua faapena foʻi ona tuuaʻia e Satani auauna faamaoni uma a Ieova. (Iopu 1:8-11; 2:3-5) O loo faaauau pea ona tuuaʻia e le Tiapolo tagata. (Faaa. 12:10) E mafai ona tatou faamaonia le pepelo o Satani, pe a tatou onosaia luʻi, ma tumau faamaoni iā Ieova ona e tatou te alolofa iā te ia. E faamanuia i tatou e Ieova pe a tatou onosaʻi, e pei ona ia faamanuia iā Iopu.​—Iako. 5:11.

⁹ E faaaogā e Satani taʻitaʻi o lotu sesē e latou te tuuaʻia Ieova e sauā, ma o Ia le pogai o mafatiaga o tagata. Pe a feoti tamaiti, e aʻoaʻo e nisi o i latou ua amia e le Atua na tamaiti ona o loo ia manaʻomia nisi agelu i le  lagi. O se matuā taufaaleaga lenā mea! Ae ua tatou iloa le mea moni. E lē tuuaʻia le Atua pe a tatou aafia i ni maʻi tugā pe maliu sē e pele iā i tatou. E tatou te mautinoa foʻi o le a iai le aso e faaleleia ai e le Atua le tulaga o mea. O lea la, ia taʻu atu i tagata uma e fia faalogo le mataʻina o le alofa o Ieova le Atua. O le faia faapea, o le a mautali ai Ieova i lē o loo taufaifai atu iā te ia.​—Faata. 27:11.

10. O le ā ua faaalia i le Salamo 22:23, 24 e faatatau iā Ieova?

¹⁰ O mafatiaga o Ana auauna pele. O Ieova o se Atua e alofa mutimutivale. E faanoanoa Ieova pe a tatou tagi atu ona o mafatiaga o loo tatou onosaia e pei o sauāga, maʻi po o tatou vaivaiga. (Faitau le Salamo 22:23, 24.) E mafatia Ieova pe a tatou tigā, e finagalo o ia e faamuta na tigā, ma o le a ia aveesea. (Faatusatusa i le Esoto 3:7, 8; Isaia 63:9.) O le a iai le aso ʻe na te soloiesea ai loimata uma i o tatou mata, e lē toe iai se oti, po o se faanoanoa, po o se tagiauē, e lē toe iai foʻi se tigā.’​—Faaa. 21:4.

11. O le ā ua misia e Ieova e faatatau i ana auauna faamaoni ua maliliu?

¹¹ Misia o Ana uō ua maliliu. O ā faalogona o Ieova e faatatau i tane ma fafine faamaoni ua maliliu? E matuā naunau Ieova e toe feiloaʻi iā i latou! (Iopu 14:15) E mautinoa le matuā misia e Ieova o lana uō o Aperaamo. (Iako. 2:23) E misia foʻi e Ieova Mose o lē na la talanoa faafesagaʻi. (Eso. 33:11) E naunau foʻi Ieova e toe faafofoga atu iā Tavita ma isi faisalamo o usuina pese mālie o ona viiga! (Sala. 104:33) E ui ua maliliu nei uō a Ieova ae e lē o galo i latou uma iā te ia. (Isa. 49:15)E manatua e Ieova o latou uiga uma, o lona uiga la, i lana silasila “ua latou ola uma iā te ia.” (Luka 20:38.) E iai le aso o le a toe faatutūina mai ai e Ieova i latou, ma o le a toe  faafofoga o ia i a latou tatalo mai i le loto, ma talia la latou tapuaʻiga. Pe afai ua maliu se tasi e pele iā te oe, tau ina ia faamāfanafanaina oe i nei manatu.

12. O ā amioga leaga ua sili ona tigā ai Ieova i nei aso e gata ai?

¹² Le sauā o tagata amioleaga. Ina ua tupu le fouvalega i Etena, na silafia e Ieova o le a matuā leaga le tulaga o mea a o leʻi oo i le taimi e faaleleia ai. E inosia e Ieova amioga leaga, faiga lē tonu ma faiga sauā i aso nei. E sili atu ona tigā Ieova pe a mafatia ē e vaivai, o i latou e lē malupuipuia, o tamaiti ua mātua oti ma fafine ua feoti a latou tane. (Saka. 7:9, 10) E sili atu foʻi ona tigā Ieova pe a sauāina ma faafalepuipuiina ana auauna faamaoni. O lea, ia mautinoa e alofa Ieova iā te outou uma, o ē o loo onosaʻi faatasi ma ia.

13. Ua faapefea ona faaleagaina tagata i le silafaga a le Atua, ma o le ā o le a ia faia i na mea?

¹³ Le faaleagaina o tagata. E fiafia Satani e faaleaga tagata na faia i le faatusa o le Atua. Ina ua “silafia e Ieova ua matuā leaga amioga a tagata i le lalolagi” i aso o Noa, “ona faanoanoa ai lea o Ieova ona o tagata na ia faia i le lalolagi, ma ua tigā ai lona finagalo.” (Kene. 6:5, 6, 11.) Po ua faaleleia le tulaga o mea talu mai aso o Noa? E mautinoa e leai! E fiafia tele le Tiapolo pe a faatuputeleina amioga leaga uma taufeusuaʻiga. E aofia ai feusuaʻiga i le va o tane ma fafine, o feusuaʻiga i le va o tane ma isi tane po o fafine ma isi fafine. (Efe. 4:18, 19) E matuā fiafia lava Satani pe a lolo atu iā te ia tagata o le tapuaʻiga moni ma faia le agasala. Pe a oo ina muta le onosaʻi o Ieova, o le a ia faaumatia i latou uma o loo faia amioga lē mamā taufeusuaʻiga.

14. O le ā ua faia e tagata i foafoaga a le Atua i le lalolagi?

¹⁴ Le faaleagaina o Lana foafoaga. E lē gata ua pule sauā le tagata ma “ua matuā afāina” ai le isi tagata, ae ua faaleagaina foʻi le lalolagi ma meaola na foafoaina e Ieova, lea na tuuina atu i le tagata e na te tausia. (Fai. 8:9; Kene. 1:28) Ua lapataʻi mai nisi saienitisi, i ni nai tausaga o i luma o le a faatamaʻia ai le faitau miliona o manu ma laau ona o tagata. E lētioa la faapopoleina saienitisi i le faaleagaina o le siʻosiʻomaga! Ae e maʻeu lo tatou lotofaafetai ona ua folafola mai e Ieova o le a ia ʻfaafanoina i latou o loo faaleagaina le laueleele,’ ma suia le lalolagi e avea ma parataiso.​—Faaa. 11:18; Isa. 35:1.

15-16. O le ā e uunaʻia ai i tatou e onosaʻi faatasi ma Ieova? Ia faataʻitaʻi.

¹⁵ Seʻi mafaufau i le faitau afe o tausaga o onosaʻi lo tatou Tamā i le lagi i le tele o faafitauli o loo tutupu. (Tagaʻi i le pusa “ O Mea o Loo Onosaia e Ieova.”) E mafai e Ieova ona faaumatia lenei faiga leaga o mea i so o se taimi. Ae o se faamanuiaga iā i tatou le onosaʻi o Ieova. Seʻi mafaufau i le faataʻitaʻiga lenei. Seʻi faapea ua taʻu atu i se tane ma se avā o le a iai aafiaga tumau i le la pepe o le a fanau mai. O le a faigatā le olaga mo si a la pepe ma e lē umi ae oti. E ui i lea, na fiafia le ulugalii o le a fanau le la tama e ui o le a matuā faigatā ona tausia o ia. O lo la alolofa i le la tama, na uunaʻia ai i laʻua e onosaia so o se faigatā ina ia faia le mea sili e tausia ai o ia.

¹⁶ O lea la, e lē lelei atoatoa foʻi i latou uma na fananau mai iā Atamu ma Eva. Ae e alofa pea Ieova iā i latou ma e na te tausia i latou. (1 Ioa. 4:19) Peitaʻi, e mafai e Ieova ona faamutaina mafatiaga uma o tagata e lē pei o mātua i le faataʻitaʻiga o i luga. Ua atofa e Ieova le aso e na te aveesea ai maʻi uma o loo  aafia ai tagata. (Mata. 24:36) Pe e lē uunaʻia ea i tatou e le alofa o Ieova, ina ia tatou onosaʻi faatasi ma Ia i le tele e manaʻomia ai?

17. E tusa ai ma faamatalaga e faatatau iā Iesu i le Eperu 12:2, 3, e faapefea ona faalaeiauina ai i tatou ia onosaʻi pea?

¹⁷ O Ieova o le faaaʻoaʻoga lelei atoatoa o le onosaʻi. Na faaaʻoaʻo foʻi Iesu i le onosaʻi o lona Tamā. A o i ai Iesu i le lalolagi na ia onosaia upu faifai, faalumaina, ma na mafatia i le laau e faapuapuagatia ai mo i tatou. (Faitau le Eperu 12:2, 3.) E mautinoa o le faaaʻoaʻoga lelei atoatoa a Ieova, na faamalosia ai Iesu e onosaʻi. E mafai foʻi ona faamalosia ai i tatou.

18. Ua faapefea ona fesoasoani iā i tatou le 2 Peteru 3:9, e malamalama ai i mea ua faataunuuina ona o le onosaʻi o Ieova?

¹⁸ Faitau le 2 Peteru 3:9. E silafia e Ieova le taimi sili ona lelei e faaumatia ai lenei lalolagi amioleaga. O lona onosaʻi ua mafai ai ona aoaoina mai le faitau miliona o le motu o tagata e toʻatele, e tapuaʻi ma vivii iā te ia. Ua faafiafiaina i latou uma, ona o le onosaʻi o Ieova ua mafai ai ona latou fananau mai, aʻoaʻoina i latou e alolofa iā te ia ma tuuina atu o latou ola mo ia. O le a matuā faaalia atoatoa le tonu o le filifiliga a Ieova e onosaʻi pea, pe a oo i le taimi e na te tauia ai ma le olioli le faitau miliona o i tatou o ē e tumau ma le onosaʻi seʻia oo i le iʻuga!

19. O le ā e tatau ona tatou maumauaʻi e fai, ma o le ā le taui o le a tatou maua?

¹⁹ Ua tatou aʻoaʻoina mai iā Ieova le auala e tatou te onosaʻi ai ma le olioli. E ui i faanoanoaga uma ma mafatiaga na faapogaia e Satani, ae o loo faaauau pea ona avea Ieova ma “Atua fiafia.” (1 Timo. 1:11) E mafai foʻi ona tatou tumau ma le olioli, a o faatalitali ma le onosaʻi i le taimi e faapaiaina ai e Ieova lona suafa, faasilisilia lana pule silisili ese, soloiesea amioga leaga uma ma faamuta faafitauli o loo tutupu. Seʻi o tatou maumauaʻi e onosaʻi pea, ma ia faamāfanafanaina i tatou ona o le onosaʻi pea o lo tatou Tamā i le lagi. Pe a tatou faia faapea, o le a faataunuuina upu nei iā i tatou taʻitoʻatasi: “E fiafia le tagata e tumau e ui lava i tofotofoga, auā a uma ona tofotofoina o ia, ona maua ai lea e ia o le pale o le ola, lea na folafola mai e Ieova iā i latou o ē e alolofa pea iā te ia.”​—Iako. 1:12.