1-2. Unfa dee soni dee Jehovah taki a Jesaaja 65:16, 17, ta da u taanga fuu hoi dou?

DI NË u di könklësi di u bi hoi a di jaa 2017, bi dë „HOI DOU!” A di könklësi aki u bi lei unfa u sa hoi dou te fuka ta miti u. Fö jaa pasa kaa di u bi hoi di könklësi aki, ma tökuseei u ta hoi dou a di hogi goonliba aki jeti.

² Andi da dee soni dee bi miti i a dee ten dee pasa aki? Wan famii fii nasö wan mati fii bi lasi libi ö? Wan siki bi kisi i di sa kii i ö? Di libi ko ta taanga da i u di i ko gaandi ö? Gaan ventu nasö gaan wata bi ko poi di kamian ka i ta libi ö? Sëmbë ta du ku i ö? Di feti di sëmbë ta feti ku deseei bi tja hogi ko da i ö? Di kolona siki tooka soni a di libi fii ö? U ta hangi di ten seei ka wa o ta mëni dee soni aki möön, söseei ka hogi an o ta miti u möön!​—Lesi Jesaaja 65:16, 17.

3. Andi u musu du nöunöu, nöö faandi mbei u musu du di soni dë?

³ Di libi taanga seei, nöö kandë woto soni sa miti u a di ten di ta ko di sa mbei di libi ko möön taanga da u (Mat. 24:21). U musu ko sa’ u hoi dou. Faandi mbei u taki sö? Wë u di Jesosi bi taki taa: „Ee un hoi a di biibi go dou, nöö na wan u dee uwii a unu hedi seei sa lasi” (Luk. 21:19). Woo sa hoi dou te u ta si unfa dee sëmbë dee abi dee seei fuka kuma u ta hoi dou.

4. Faandi mbei u sa taki taa Jehovah da di möön bunu sëmbë di u sa djeesi a di hoi di a ta hoi dou?

⁴ Ambë da di möön bunu sëmbë di u sa djeesi a di hoi di a ta hoi dou? Wë Jehovah Gadu. Di soni dë ta foondo i ö? A sa dë sö. Ma te i kai pakisei nëën, nöö joo fusutan faandi mbei a dë sö. Didibi hën ta tii di goonliba, nöö sömëni fuka dë nëën. Jehovah abi di makiti u tooka soni wantewante, ma a ta wakiti di daka di a buta taa a o hopo du wan soni (Lom. 9:22). Di Gadu  fuu ta hoi dou u te di juu fëën dou. Boo taki u nëigi soni ka u sa si taa Jehovah seei ta hoi dou.

5. Unfa sëmbë poi di në u Gadu, nöö unfa di soni dë ta mbei i ta fii?

⁵ Di poi di sëmbë ta poi hën në. Jehovah lobi di në fëën. Nöö a kë taa hii sëmbë musu lesipeki ën (Jes. 42:8). Ma söwan sikisi dusu jaa longi, sëmbë ta poi di në fëën (Ps. 74:10, 18, 23). Di soni aki bi bigi a di djai u Eden, di Didibi (di kë taki hogihati mindisonima), bi taki taa Jehovah ta tapa Adam ku Eva, u de an feni wan soni di bi sa mbei de ta dë waiwai (Ken. 3:1-5). Sensi di ten dë, hën sëmbë ta mindi soni da Jehovah taa a ta tapa libisëmbë u de an feni dee soni di de abi fanöudu tuutuu. A bi ta toobi Jesosi taa sëmbë bi ta poi hën Tata në. U di soni dë mbei a bi lei dee bakama fëën u de begi sö: „U Tata di dë a liba ala, be di në fii ko santa e.”​—Mat. 6:9.

6. Faandi mbei Jehovah bi mbei wan hii pisiten pasa, ufö a lei taa hën abi leti u tii liba ala ku goonliba aki tuu?

⁶ Di saka di sëmbë an kë saka deseei a di tii fëën basu. Jehovah abi leti u tii liba ala ku goonliba aki. Nöö di fasi fa a ta tii da di möön bunu wan (Ako. 4:11). Ma Didibi bi pooba u ganjan dee ëngëli ku libisëmbë tuu, u de ko ta si kuma Gadu an abi leti u tii. Jehovah an bi seeka di soni aki wantewante. A bi du soni a wan köni fasi. A bi disa libisëmbë u de tii deseei wan hii pisiten, sö taa de sa si taa soni an o waka bunu da de, ee de an ta haika di sëmbë di mbei de (Jel. 10:23). U di Gadu bi du soni ku pasensi, mbei sëmbë o sa ko si taa hën abi di leti u tii. Nöö na wan daka seei sëmbë o sa hopo fia ku ën möön u di soni dë hedi. A o lei taa di Könuköndë fëën wanwan sa tja bööböö libi ko a goonliba aki.

7. Ambë ku ambë bi hopo fia ku Jehovah, nöö andi Jehovah o du ku dee lö sëmbë aki?

⁷ Di hopo di so u dee mii fëën hopo fia ku ën. Di Jehovah bi mbei dee ëngëli ku libisëmbë, nöö a bi mbei de söndö föutu. Ma wan u dee ëngëli bi hopo fia ku Jehovah, nöö a bi mbei Adam ku Eva seei hopo fia ku ën tu. Di ëngëli dë di Bëibel ta kai Saatan (di kë taki felantima, nasö fiama). Woto ëngëli ku woto libisëmbë bi hopo fia ku Gadu tu (Jud. 6). Bakaten dee Isaëli sëmbë, dee sëmbë dee Jehovah bi tei ko dë sëmbë fëën, bi bia baka da Jehovah Gadu tu, hën de bigi ta dini poipoi gadu (Jes. 63:8, 10). Di soni aki bi hati Jehovah gaanfa seei. Ma tökuseei a hoi dou, nöö a o ta hoi dou u te di juu dou ka a o kii hii dee sëmbë dee ta hopo fia ku ën. Di soni aki o mbei hii dee sëmbë dee ta hoi deseei a Jehovah feni gaan bunu, u di de ku ën tuu ta hoi dou hii fa di goonliba hogi!

8-9. Un mindimindi soni sëmbë ta taki u Jehovah, nöö andi u sa du te u jei dee lö soni dë?

⁸ Di mindi di Saatan ta mindi soni dëën. Saatan bi taki hogi u di dinima u Jehovah de kai Jöpu. Saatan bi taki taa hii dee dinima u Jehovah ta dini ën, u di a ta mbei de feni bunu (Jöpu 1:8-11; 2:3-5). Saatan ta taki di seei soni dë a di ten aki jeti (Ako. 12:10). Te u ta hoi dou te fuka ta miti u, söseei te u ta hoi useei a Jehovah u di u lobi ën, nöö woo sa lei taa dee soni dee Saatan ta taki da mindimindi soni. Jehovah o mbei u feni gaan bunu u di u ta hoi dou, leti kumafa a bi mbei Jöpu feni gaan bunu.​—Jak. 5:11.

⁹ Saatan ta wooko ku dee fesima u dee poipoi keiki u mbei sëmbë biibi taa Jehovah da wan sëmbë di abi hogihati, söseei taa hën ta mbei libisëmbë ta tja sitaafu. Te wan mii dëdë, nöö so u de ta taki seei taa Gadu hën tei ën, u di a bi abi möön ëngëli fanöudu a liba ala. Gadu an ta feni di soni dë u bunu seepiseepi.  Uu sabi taa Jehovah da wan lobihati Tata. Te u dë ku suwaki nasö te wan sëmbë fuu ko lasi libi, nöö wa ta taki taa Gadu hën mbei. Ma u ta biibi taa wan daka a o seeka hii soni ko bunu baka. U sa piki hii sëmbë di kë haika u unfa Jehovah lobi sëmbë tjika. A di lö fasi dë Jehovah sa feni wan soni piki di sëmbë di ta fia ku ën.​—Nöng. 27:11.

10. Andi Psalöm 22:23, 24 ta taki u Jehovah?

¹⁰ Di tja di dee dinima fëën ta tja sitaafu. Jehovah da wan Gadu di ta fii da sëmbë. An lo’ te u ta tjali, u di u ta tja sitaafu. An lo’ te u ta tjali u di sëmbë ta du ku u, u di u dë ku suwaki, nasö u di u abi suwakifasi. (Lesi Psalöm 22:23, 24.) Jehovah ta fii ku u. A kë du wan soni sö taa wa tja sitaafu möön, nöö a o du wan soni tu. (Luku Ëkisodesi 3:7, 8; Jesaaja 63:9.) Di daka o ko ka „a o feki hiniwan wojowata puu a [u], nöö dëdë an o dë möön. Na wan sëmbë o tjali nasö bai kai wolo, söseei pen an o de möön”.​—Ako. 21:4.

11. Un soni di dee dinima u Jehovah bi ta du, Jehovah ta hangi?

¹¹ Di paati di dëdë paati hën ku dee mati fëën. Unfa Jehovah ta fii u di so womi ku so mujëë di bi ta dini ën ku hii de hati, dëdë? Wë a dë seei ta wakiti di ten ka a o si de baka! (Jöpu 14:15) I sa pakisei unfa Jehovah ta hangi faa si hën mati Abahamu tjika u? (Jak. 2:23) Nasö i sa pakisei unfa a ta hangi Mosesi, di sëmbë di hën ku ën bi ta fan „fesi ku fesi” ö? (Ëki. 33:11) Söseei pakisei luku unfa a o ta hangi u jei dee kanda u Dafiti ku dee woto psalöm sikifima. De bi ta kanda kanda u gafëën (Ps. 104:33). Gadu an fëëkëtë dee mati fëën dë, hii fa de dëdë kaa (Jes. 49:15). A ta mëni hii soni u de jeti. Nöö ’hii de tuu dë ku libi jeti nëën wojo’ (Luk. 20:38). Wan daka a o weki de ko a libi baka, nöö a o ta jei fa de ta begi ën, nöö a o ta wai ku de. Ee wan sëmbë fii lasi libi, nöö dee soni aki sa da i kötöhati.

12. Andi da dee soni dee ta pasa a dee lasiti daka aki, dee ta mbei Jehovah fii tjali?

 ¹² Di mbei di sëmbë ta mbei wotowan ta tja sitaafu. Di Adam ku Eva bi hopo fia ku Jehovah a di djai u Eden, nöö Jehovah bi sabi taa soni bi o ko hogi seei. Ma a bi sabi tu taa bakaten soni bi o ko bunu baka. Jehovah an lobi te sëmbë ta du hogi ku wotowan, söseei te de ta libi hogi ku wotowan. Jehovah ta fii möön gaanfa da sëmbë di an abi sëmbë u heepi de. Dee sëmbë aki sa dë sëmbë di an abi makiti u du soni, miii di an abi mama ku tata, nasö mujëë di manu u de lasi libi (Sak. 7:9, 10). Jehovah an ta kë si te sëmbë ta du ku dee dinima fëën, söseei te de ta buta de a dunguwosu. I sa dë seiki taa a lobi hii dee dinima fëën dee ta hoi dou, leti kumafa hënseei ta hoi dou tu.

13. Un gaan hogi soni Gadu ta si libisëmbë ta du, nöö andi a o du?

¹³ Di libi di sëmbë ta libi fanafiti libi nango möönmöön. Gadu mbei libisëmbë kumafa hënseei dë. Ma Saatan an lobi te sëmbë ta libi kumafa Gadu kë. Di Gadu „ko si taa libisëmbë bi ta du gaan hogi a goonliba seei” a di ten u Noa, hën „a bi hati [ën] taa a bi mbei libisëmbë buta a goonliba. A bi fii ën gaanfa te nëën hati dendu” (Ken. 6:5, 6, 11). Soni ko möön bunu a di goonliba sensi di ten dë u? Wë nönö, na seei. Saatan musu u ta wai te a ta si taa möönmöön sëmbë ta libi fanafiti a di së u manu ku mujëë soni. Womi ku mujëë ta libi ku deseei söndö u de tööu, söseei womi ku womi, nasö mujëë ku mujëë ta libi ku deseei (Ef. 4:18, 19). Saatan ta wai gaanfa seei te sëmbë di ta dini Jehovah du wan gaan zöndu. Jehovah ta hoi pasensi. Ma te di juu fëën dou, nöö a o lei taa a buuse fanafiti libi. A o kii dee sëmbë dee ta libi dee lö libi dë, ee de an kë tooka.

14. Andi libisëmbë ta du ku di goonliba ku dee mbeti?

¹⁴ Di poi di sëmbë ta poi di goonliba. Na tii nöö libisëmbë ta tii wotowan a wan fasi di ta tja hogi ko da de. Ma de an ta luku di goonliba ku dee mbeti, kumafa Gadu bi piki libisëmbë u de du ën (Peleik. 8:9; Ken. 1:28). So mbeti ku woto soni an dë möön, u di de lasi go. So könima ta taki taa dee soni dee libisëmbë ta du, sa mbei taa a dee jaa dee ta ko, wan milion mbeti ku woto soni sa lasi go tu. Fëën mbei u ta fusutan faandi mbei sëmbë ta fëëë taa soni an o go bunu ku di goonliba. Ma Jehovah paamusi u taa a o ’poi dee sëmbë dee ta poi di goonliba’, nöö a o mbei di goonliba ko toon wan paladëisi.​—Ako. 11:18; Jes. 35:1.

15-16. Andi musu da u taanga fuu hoi dou makandi ku Jehovah? Konda wan woto.

¹⁵ Pakisei dee hogi soni di di Tata fuu di dë a liba ala ta si sömëni dusu jaa longi kaa. (Luku di pisi „ Andi ku andi ta miti Jehovah ka a ta lei taa a ta hoi dou?”) Hiniwan juu Jehovah sa poi di hogi goonliba aki. Ma u ta feni wini u di a ta hoi pasensi. Buta pakisei a di woto aki. Boo taa wan mujëë dë ku bëë, nöö data ta piki hën ku hën manu taa di mii u de an dë gösöntu seepiseepi. Boiti di dë, di data ta piki de tu taa te de pai di mii, di libi o taanga dëën, nöö a o dëdë njönkunjönku. Tökuseei di mama ku di tata ta wai ku di mii u de, hii fa a o taanga da de u de ta sölugu ën. U di de lobi di mii u de, mbei de o hoi dou hii fa soni ta taanga da de, sö taa de sa heepi ën faa sa abi di möön bunu libi di a sa feni.

¹⁶ Wë sö nöö a dë ku dee bakamii u Adam ku Eva. Hii de tuu ta abi zöndu te de pai de. Ma tökuseei Jehovah lobi de, nöö a ta booko hën hedi ku de (1 Joh. 4:19). Di mama ku di tata u di woto di u bi taki soni u de djunsu dë, an bi sa du wan soni u mbei di mii u de an dë ku suwaki möön. Ma Jehovah hën a sa du wan soni  u mbei dee mii fëën an abi zöndu möön. A buta wan daka ka a o puu hii dee soni dee ta mbei libisëmbë ta tja sitaafu (Mat. 24:36). Di lobi di Jehovah abi ta heepi ën faa hoi dou. Di soni dë musu da u taanga fu useei hoi dou makandi ku ën.

17. Unfa di soni di Hebelejën 12:2, 3 ta taki u Jesosi, ta da u taanga fuu hoi dou?

¹⁷ Jehovah da di möön bunu sëmbë di u sa djeesi a di hoi di a ta hoi dou. Jesosi seei bi hoi dou kuma hën Tata. Di Jesosi bi ko dë kuma wan libisëmbë a goonliba aki, nöö a bi ta hoi dou hii fa sëmbë bi ta fan hogi ku ën ta dëën sen, söseei hii fa de bi pekëën a wan posu fuu hedi. (Lesi Hebelejën 12:2, 3.) A musu u dë sö taa di hoi di Jehovah ta hoi dou, hën bi da Jesosi taanga fu hënseei hoi dou. Di soni dë sa da u taanga fuu hoi dou tu.

18. Unfa 2 Petuisi 3:9 ta heepi u fuu ko fusutan andi ta pasa, u di Jehovah ta hoi pasensi?

¹⁸ Lesi 2 Petuisi 3:9. Jehovah sabi andi da di möön bunu ten u poi di hogi goonliba aki. U di a abi pasensi, mbei sömëni sëmbë bi feni pasi u de ko sabi ën, nöö nöunöu te a hia sëmbë ta dini ën. Hii de tuu ta wai taa Jehovah bi hoi dou hii dee ten dee pasa, u tefa de mama ku de tata ko pai de, u tefa de ko lei soni fëën ko lobi ën, söseei u tefa de ko buta de libi nëën maun. Te milionmilion sëmbë hoi dou u te a di kaba u di goonliba aki, nöö a o dë gbelingbelin u si taa di hoi di Jehovah bi ta hoi dou da wan bunu soni.

19. Andi u musu mbei hii möiti fuu du, nöö un paka fëën woo feni?

¹⁹ Te u luku unfa Jehovah ta du soni, nöö u ta ko sabi unfa u sa hoi dou ku piizii. Hii fa Saatan mbei sëmbë ta tjali, söseei hii fa a mbei sëmbë ta tja sitaafu, tökuseei Jehovah ta dë waiwai go dou (1 Tim. 1:11). Useei sa dë waiwai go dou a di pisiten aki tu, hii fa u ta wakiti u Jehovah seeka soni ko bunu baka. A o mbei di në fëën ko santa, a o lei taa hën abi leti u tii hii soni, a o puu hii hogilibi a goonliba, söseei a o mbei taa wa o ta abi bookohedi möön. Boo mbei hii möiti fuu hoi dou, u di u sabi taa di Tata fuu di dë a liba ala ta hoi dou tu. Ee u du di soni dë, nöö soni o waka da u kumafa di Bëibel ta taki. A ta taki taa: „Ee wan sëmbë ta hoi dou te tesi ta miti ën, nöö a o dë waiwai. Biga te Jehovah feni ën u bunu, nöö a o dëën di libi di a paamusi dee sëmbë dee lobi ën.”​—Jak. 1:12.