1-2. Milandu yakue Yehova ili mu Isaya 65:16, 17, ili yatukwasia siani kutwalilila kusipikizia maavia etu?

“TE KULEKELA ATA KANIINI!” ozo i ubanga wali mutue wa kulonghaana kwa kalaale kwa muaka wa 2017. Kooko kulonghaana kwaatulangiliile vya kusipikizia maavia etu. Papita kale miaka ina, mpaka loonu tukilisie mukusipikizia maavia a mu keenu kyalo kibiipile.

² Ni maavia ki auli nao leenu? Eba, ni kufuilua na muntu wa mu lupua ao kibuza uutonene saana? Buluele bwaviizie bwa musita waleepele? Eba, ni maavia ali aleetua na bukote, maavia ali aleetua na maka a kyalo ali ainoona, kukitilua ovio, ao kusaanzua? Ao, eba uli mukwemiiwa juu ya buluele bwa korona ao buluele bunge bupaleene ni bobo? Tupembeele kwa nkulu musita azo maavia onse luakaaluka a kale, musita utwakalaba azo maavia, kabili te akakitikapo kabili!​—Soma Isaya 65:16, 17.

3. Tupalile kukita ki loonu, kabili juu ya ki?

³ Buikazi mu keenu kyalo bubiipile, kabili paange twakaba kusaakaana ni maavia akilile kubiipa musita uli mukwiza. (Mat. 24:21) Kakiine tupalile kukila kukosia mibeele ya kusipikizia. Juu ya ki? Paantu Yesu waalandile eevi: “Kine mwasipikizia mwakapususia bukose bwenu.” (Luk. 21:19) Kine tuli twatontonkania bange vibali mukusipikizia maavia apaleene ni etu, twakaba kukila kwaluka ni mibeele ya kusipikizia.

4. Juu ya ki kunti twalanda nangue Yehova atubiikiile mufuano uweeme saana wa kulangilila mibeele ya kusipikizia?

⁴ Naani atubiikiile mufuano uweeme saana wa kulangilila mibeele ya kusipikizia? Yehova Leeza. Paange keekio kyasuko kya kupapia, inzi, kine watontonkania teuviinda kupapa. Keenu kyalo, kili mukutungululua na Kibanda, kabili kilimo maavia engi. Yehova ali ni buviinde bwa kupuisia maavia mu musita umosie, inzi apembeleele musita uli waiza eevi akabe kupuisia maavia azo. (Bar. 9:22) Mu wenka ozo musita, Leeza weetu atwaliliile kusipikizia mpaka musita waapaangile ukabe kufika. Kansi, tumone bintu kenda bili mukusipikizia Yehova.

5. Liina lyakue Leeza lili mukukoosiiziwa siani mukinzi, kabili weewe pa lobe uli waiunvua siani palua kaako?

⁵ Kukoosiiziwa mukinzi kwa liina lyakue. Yehova atonene liina lyakue, kabili atonene kila muntu aye walikindikile. (Is. 42:8) Papita kale miaka elufu sita eevi (6000), liina lyakue liweeme lyali mukukoosiiziwa mukinzi. (Malum. 74:10, 18, 23) Liina lyakue lyaatendekele kukoosiiziiwa mukinzi mu busitani bwa Edeni, musita Kibanda (liina lilangiliile “Wa bufi”) lwaalangiliile nangue Leeza waali wabatanine ba Adamu ni Eva kintu kibaali bakabiile eevi baye bali ni nsaansa. (Kut. 3:1-5) Kubambila paapo mpaka loonu, Yehova atwaliliile kubeepelua nangue ali mukubatana bantu bintu bibakabiile saana. Yesu waakisilue paantu liina lyakue Baba wakue lyaali lyakoosiiziwa mukinzi. Keekio i kyaalengele, abasambilizie basambi bakue baye bapepa eevi: “We Baba weetu wa ku muulu, liina lyobe liswesiiwe.”​—Mat. 6:9, NWT.

6. Juu ya ki Yehova waalekeleele musita waleepele upite ntaanzi ya kupingula mulandu palua kupingua kwa nsaambu yakue ya kuteeka?

⁶ Bantu bali mukumupinga Leeza ni nsaambu yakue ya kuteeka. Yehova i ali ni nsaambu yonse ya kutungulula muulu ni kyalo, kabili ni nzila yakue ya kuteeka iweeme saana. (Nfy. 4:11) Inzi, Kibanda kyaavulunghaniizie bantu ni bamalaika eevi batendeke kutontonkania nangue Leeza tali na nsaambu ya kuteeka. Keekio, kyaali kyapalile kutwama musita waleepele eevi kusininkizia nangue Yehova i ali ni nsaambu ya kuteeka, kabili weene i kateeka aweeme. Leeza waapinguile kwa mulangue. Waalekeleele musita waleepele upite bantu bali mukwitungulula beene, eevi bemwene nangue tebaviinda kwitungulula buino kine te bamutuiliziizie weene. (Yer. 10:23) Paantu Leeza alangiliile mibeele ya kupembelela, te kuli muntu wakaba kutuisika nangue Leeza ali ni nsaambu ya kuteeka ku muulu ni ku kyalo kyonse. Bantu bonse bakaba kwinika nangue nzila ya kuteeka yakue Yehova i iweeme saana, kabili nangue Bukolo Bwakue Leeza sie bunke, i buli ni buviinde bwa kuleeta mutende wa kisinka ni kuteekamana pa kyalo.

7. Ni baani baamusangukiile Leeza, kabili bakasaangua na ki?

⁷ Bukisanguka bwa baana bamo pakati ka baana bakue. Yehova waabumbile baana bakue ba kimubili ni ba kimupasi bapuililikile, bila bali na kilubo ata kimo. Inzi muana wakue umo, malaika waaizile kwaluka Sataana (liina lilangiliile “Kisanguka”) waabalengiizie ba Adamu ni Eva bakaane kumunakila Yehova. Bamalaika pamo ni bantu bange baaiungile pamo nakue mu bukisanguka. (Yud. 6) Kisia musita kupita, ni bantu ba mu ntundu ya Israeli, ntundu yaali yasaakuilue na Leeza baamukeene ni kutendeka kupupa ba leeza ba bufi. (Is. 63:8, 10) Kakiine, Yehova waakitiilue ovio saana. Inzi waasipikiziizie, kabili wakaba kutwalilila kusipikizia mpaka musita ukabe kufika wa kwinoona babisanguka bonse. Keekio, kyakabaleetela mpaalo ikata bantu ba kisinka, bali mukusipikizia bubiifi pamo ni Leeza, mu keenu kyalo!

8-9. Yehova ali wabeepelua siani, kabili kunti twakita siani palua bobo bufi?

⁸ Bufi bwakue Kibanda. Sataana waamusitaakile Yobu pamo ni babombi bange ba kisinka bakue Yehova nangue, bali bamubombelasie Leeza juu ya kwiwaamiizia bo beene. (Yob. 1:8-11; 2:3-5) Mpaka loonu, Kibanda atwaliliilesie kusitaaka bantu. (Nfy. 12:10) Kunti twalangilila nangue Sataana ni wa bufi, kupitila kusipikizia maavia etu ni kusiala twali ba kisinka kuli Yehova paantu tumutonene. Kine twasipikizia, twakaba kupaalua nga evelia vyaapaalilue Yobu.​—Yak. 5:11.

⁹ Sataana ali mukubombia bantunguluzi ba diini eevi kulangilila nangue Yehova abiipile kabili i ali mukuleeta maavia ku bantu. Kabili bange bali balanda nangue musita baana lubali bafua, Leeza i ali wabatwama paantu akabiile ba malaika bengi ku muulu. Kakiine keekio kili kyamukoosiizia saana Leeza mukinzi! Inzi  fwefue tumanine buino nangue Yehova ni Baba ali ni ntono. Musita utuli twapatua na buluele bwaviizie saana, ao musita utuli twafuilua na muntu ututonene te twizi kumutuka Leeza weetu. Inzi, tuzumiine nangue busiku bumo Leeza wakapuisia maluele ni kutuntumuna bafuile. Kunti twamubuila kila muntu atonene kutuilizia amane nangue Yehova ni Leeza wantono. Keekio kunti kyamukwasia Yehova amone vya kumwasuka olia ali wamupunia.​—Tus Maf. 27:11.

10. Lileembo lya Malumbo 22:23, 24 lyalangilila ki palwakue Yehova?

¹⁰ Babombi bakue batonua bali mukwema. Yehova weene ni Leeza wankumbu. Ali wakisua saana musita lwali watumona twali mukwema juu ya maavia ali aleetua na kusaanzua, kuluala, ao ali aleetua na kusipuililika. (Soma Malumbo 22:23, 24.) Yehova ali waunvua misa ituli twakisua, atonene kupuisia maavia, kabili wakaba kuapuisia. (Palania ni Kufuma 3:7, 8; Isaya 63:9.) Busiku bwakafika bwa ‘kukuusa mensozi onse kufuma mu menso etu, ni lufu te lukabako kabili, kabili tekukaba malilo, aosie kulila ao misa tebikabako kabili.’​—Nfy. 21:4, NWT.

11. Yehova ali waiunvua siani palua babombi bakue ba kisinka bafuile?

¹¹ Kusiana ni babibuza bakue baafuile. Yehova ali mukwiunvua siani musita balalulme ni banakazi ba kisinka lubali mukufua? Atonene saana kubamona kabili! (Yob. 14:15) Tontonkania nkulu ili na Yehova ya kumumona kabili kibuza wakue Abrahamu! (Yak. 2:23) Ao tontonkania, nkulu ili na Yehova ya kumumona kabili Musa ubaali balanda nakue “menso kwa menso”! (Kuf. 33:11) Kabili, tontonkania nkulu ili na Yehova ya kumunvua Daudi ni bakaleemba bange ba Malumbo, bali mukwimba nghimbo yabo iweeme ya kumutasia! (Malum. 104:33) Anzia kine babo babibuza bakue baafuile, Leeza tabalabile. (Is. 49:15) Alangulukile kila kantu palua bumuntu bwabo. Bibilia ili yalanda nangue “mu kumona kwakue bonse bakosele.”  (Luk. 20:38, NWT, bulondolozi bwa pensina) Busiku bumo, wakabatuntumuna ni kutuilizia kabili mapepo abo a kufuma ku mutima ni kwitabila lupupo lwabo. Kine ufuiliilue na muntu uutonene saana, ezio milandu kunti ya kuteekia mutima ni kukukoselezia.

12. Mu enu nsiku ya kupeleezia ibiipile, ni binti ki bili mukumukisia saana Yehova?

¹² Kutitikilua kwa bantu na babiifi. Musita bukisanguka lubwatendekele mu Edeni, Yehova waainikile nangue aali yakakila kubiipa mu kyalo, ntaanzi ya kuiza kuwaamia aali ezio. Yehova teezi kutona bubiifi, kutionua kwa nsaambu, ni kukitilua ovio kuli mukukitika mu kyalo loonu. Lyonse ali wabeemena saana baalia basili na bakubakwasia, nga evelia baalia batopele, baalia basili na buviinde bwa kwisuunga, basili na baviazi ni baalia bafuiliilue na balume ao bakazi. (Zek. 7:9, 10) Kabili, Yehova ali wakisua saana musita lwali wamona babombi bakue ba kisinka bali mukutitikilua ni kukakua. Uye wali ni kisinka nangue, Yehova amitonene saana mwe bonse bali mukusipikizia pamo nakue.

13. Bantu bali mukulangilila lwendo ki lubiipile ntaanzi yakue Leeza, kabili Leeza wakaba kukita ki palua babo bantu?

¹³ Bantu bali mukukila kwaluka ni lwendo lubiipile lwa bupungue. Bantu baabumbilue eevi baye bamupala Leeza, inzi Sataana atonene kulengia beingizie mu lwendo lubiipile. Musita Leeza ‘lwaamwene nangue bubiifi bwa muntu bwali buingi’ mu nsiku yakue Noa, “Yehova waanuunine paantu waakitile bantu pa kyalo, kabili waaunvuile misa ku mutima wakue.” (Kut. 6:5, 6, bulondolozi bwa pensina, 11) Aali ya kyalo yaalulukile? Ata! Kibanda kili mukunvua nsaansa saana musita lukili mukumona lwendo lwa bupungue lwa kila musango lwasalangana saana ku bantu. Loolo lwendo, lubiikile mukati balalume kulaalana ni banakazi, balalume kwa balalume ni banakazi kwa banakazi! (Baef. 4:18, 19) Sataana ali wakila kusaansamuka musita lwali wamona bantu bali bamupupa Yehova baponena mu lizaambi. Musita kupembelela kwakue Yehova lukwakaba kufika pa mpela, wakaba kufumiapo bantu bonse bali ni lwendo lubiipile bali bakaana kwaluluka eevi kulangilila nangue teezi kutona lwendo lubiipile.

14. Kyalo ni nama bili mukukitua siani na bantu?

¹⁴ Bantu bali mukwinoona kyalo kyaabumbile Leeza. Muntu ‘tateekelesie muntu mwinakue eevi kumukisia,’ inzi kabili tali mukusuunga kyalo ni nama nga evelia vibaamulandile kuli Yehova. (Kas. 8:9; Kut. 1:28) Bange basayansi bali mukulanda nangue mu miaka iniini ili mukwiza, misango milioni imo ya nama ni bimuti kunti yainooneka juu ya bintu bili mukukita bantu. Kakiine bantu bali ni nsaambu ya kwema saana mu maano palua mazingira! Tuli mukutasia paantu Yehova alaile kwiza “kwinoona baalia bali bainoona kyalo,” ni kukita kyalo kyaluke Paradiso.​—Nfy. 11:18; Is. 35:1.

15-16. Ni kiki kipalile kutukinkizia kusipikizia nga Yehova? Leeta mufuano.

¹⁵ Tontonkania palua maavia akolele ali mukusipikizia Baba weetu wa ku muulu mu maelufu a miaka. (Mona kisanduku “ Bintu Bili Mukusipikizia Yehova.”) Yehova kunti wapuisia maavia a mu keenu kyalo pa musita onse wali kutona. Inzi, kupembelela kwakue kwakitukwasia saana fwefue! Tontonkania ozu mufuano. Tulande, ba mulume ni mukazi babuilua kuli munganga nangue muana wabo akili munda ali ni buavia bukata, kabili kisia kuvyalua kwakue bukose bwakue bwakaba kuya bwabiipile, kabili wakaba kufua wakilisie mwanike. Anzia evio, baviazi basekelela lwavyalua ozo muana anzia kine kyakaba kuya kyakolele saana kumusuunga. Paantu bamutonene muana wabo, basipikizia kila buavia eevi bamukwasie alukeko mwakubeela.

¹⁶ Evio vyenka baana bonse bakue Adamu ni  Eva te beezi kuvyalua bapuililikile. Inzi, Yehova abatonenesie kabili ali wabeemena. (1 Yoan. 4:19) Inzi, kwibeelako ni baviazi batwalondoluela mu mufuano weetu, Yehova weene kunti wapuisia maavia ali na baana bakue. Waasaakuile nsita ya kupuisiiziapo maavia onse a bantu. (Mat. 24:36) Eba, ntono yakue teipalile kutukinkizia kusipikizia nga weene kine kyapala kukita evio?

17. Milandu ili mu Baebrania 12:2, 3 ilandiile palwakue Yesu, yatukinkizia siani kutwalilila kusipikizia?

¹⁷ Yehova i mufuano upuililikile wa kusipikizia. Yesu waapalile mibeele ya kusipikizia yakue Baba wakue. Musita lwaali pa kyalo, Yesu waasipikiziizie milandu ibiipile, kuzyelekaniiwa, ni kimuti kya busaanso juu yeetu. (Soma Baebrania 12:2, 3 *.) Kakiine mufuano wakue Yehova wa kusipikizia waamupeele Yesu maka a kusipikizia. Mufuano wakue Yehova kunti watupeela ni fwefue maka a kusipikizia.

18. Lileembo lya 2 Petro 3:9 lyatukwasia siani kwinika bintu bili mukukitika paantu Yehova ali mukulangilila saana mibeele ya kupembelela?

¹⁸ Soma 2 Petro 3:9. Yehova amanine musita upalile saana wa kwinoonenapo keenu kyalo kibiipile. Paantu Yehova apembeleele, bantu bengi bafikiila kumumana, kabili loonu libumba likata lya mamilioni a bantu bali mukumupupa. Babo bantu bonse bali ni nsaansa paantu Yehova wasipikizia musita waleepele, mpaka bafikiila kuvyalua, basambilila kumutona ni kwipeela kuli weene. Musita mamilioni a bantu luakasipikizia mpaka ku mpela, kyakamoneka paswetele nangue Yehova waakitile buino paantu waalangiliile mibeele ya kusipikizia!

19. Tupalile kupingula kukita ki, kabili twakaba kupata kilambu ao mpaalo ki?

¹⁹ Mufuano wakue Yehova watusambilizia vya kusipikizia twali ni nsaansa. Anzia kine Yehova ali mukukisua na maavia ali mukuleetua na Sataana, weene atwaliliilesie kuya wali “Leeza wansaansa.” (1 Tim. 1:11, NWT) Ni fwefue evio vyenka kunti twatwalilila kuya twali ni nsaansa musita utupembeleele twasipikiziizie Yehova aswesie liina lyakue, alangilile nsaambu yakue ya kuteeka, apuisie bubiifi bonse ni maavia atuli nao. Kansi tupingule kusipikizia twateekele mutima twainikile nangue ni Baba weetu wa ku muulu ali mukusipikizia. Kine twakita evio, kila umo weetu wakaba kupata kilambu kya bukose bwa loonse nga vilandile leeli lileembo: “Baalia bali basipikizia meezio basyukile, paantu kine bapita mu meezio a ozo musango bakapokelela kilambu, ni keeki kilambu i bukose bwa muyayaya bwaalailue na Leeza kuti apeele baalia bamutonene.”​—Yak. 1:12.