1, 2. Ndíjkha nambáyulúʼ dí kiʼtáriyaʼ náa Isaías 65:16, 17 maʼngulú má xúʼko̱ rá.

“¡XÁKANAJKHAAʼ!”. Xúʼko̱ ndiyá edxu̱u̱ asamblea dí ajtsú mbiʼi nákha 2017. Dí nijuiʼthá ikhí niʼsngúlúʼ xú káʼnii gándoo maʼngulú xkujndu dí nuraʼníí. Nijngoo má a̱jkhu̱ tsiguʼ, gi̱i̱ kuwáánʼ raʼngulú má xúʼko̱ náa numbaaʼ rígi̱.

² Ndiéjunʼ xkujndu niraʼníí xíkhoo rá. Mbáa numíniiʼ wéñuʼ ga̱jma̱a̱ numuu dí nikháñuu mbáa bi̱ kuʼyáá o mbáa bi̱ nambáxulúʼ gajmiúlú, mbáa numíniiʼ ga̱jma̱a̱ numuu mbá nandii gakhii, o rí niʼni waniáanʼ má, mbáa numíniiʼ numuu rí niguaʼnii mbá gamiéjunʼ, o rí nuni dí raʼkhí xa̱bu̱, mbáa nuni gínáanʼ numuu rí nuʼnigajmaa o numíniiʼ ga̱jma̱a̱ numuu nandii COVID-19. Lá ragájkhun dí nandulú maʼgánú mbiʼi rí xúgíʼ rígi̱ maguanúu tsu̱díí ráʼ. Nditháan xátangaán mundxaʼwamíjná ga̱jma̱a̱ numuu rígi̱ ga̱jma̱a̱ nditháan xárígá mbu̱júu̱ʼ (atraxnuu Isaías 65:16, 17). *

3. Ndiéjunʼ gíʼmaa muʼni xúgi̱ ga̱jma̱a̱ náá numuu rá.

³ Xóo kuwáánʼ náa numbaaʼ rígi̱ naʼni gakhii, mbáa nda̱wa̱á muraʼníí xkujndu itháan gakhii (Mat. 24:21). Ikha jngó ndayóoʼ muʼnimi̱jna̱ rí maʼngulú má xúʼko̱. Jesús niʼthí náá numuu, ikhaa niʼthí: “Á mu naʼngala [...] maguma káwáanʼ” (Luc. 21:19). Mbá rí ma̱ndoo mambáyulú nindxu̱u̱ rí mundxaʼwamíjná xú káʼnii niʼngu̱u̱n eʼwíinʼ bi̱ niraʼníí ikháá xkujndu xóo ikháanʼ.

4. Ndíjkha rí ma̱ndoo muʼthá dí Jeobá nindxu̱u̱ bi̱ naxná májánʼ xkri̱da dí naʼngo̱o̱ rá.

⁴ Tsáa nindxu̱u̱ bi̱ naxná májánʼ xkri̱da dí naʼngo̱o̱ rá. Jeobá.  Á mu naʼniulú tsiánguá xóo extiʼña̱a̱ graxe̱ rígi̱, gundxaʼwámíjná rígi̱, náa numbaaʼ dí kuwáánʼ rígá wéñuʼ xkujndu numuu rí Gixa̱a̱ naʼtáñajunʼ. Jeobá ma̱ndoo maxíyáa má xúgi̱, mú nagi̱ʼthu̱u̱n maʼni índo̱ gáʼga̱nú mbiʼi dí nigájnuu awan (Rom. 9:22). Nákha xóó tséjkha̱nú mbiʼi rúʼko̱, ikhaa naʼngo̱o̱ má xúʼko̱. Guʼyáá mbá mijnagu̱wa̱ʼ dí Jeobá niraʼwíí maʼngo̱o̱.

5. Xú káʼnii niguma gachíí mbiʼyuu Dios, ga̱jma̱a̱ xóo eʼni makumaaʼ ikháán rúʼko̱ rá.

⁵ Rí niguma gachíí mbiʼyuu. Jeobá nandoo kaʼyoo mbiʼyuu ga̱jma̱a̱ nandoo dí xúgíinʼ mbuyamajkuíí (Is. 42:8). Mú, naʼni má 6,000 tsiguʼ dí niguma gachíí mbiʼyuu (Sal. 74:10, 18, 23). Xúgíʼ nigi̱ʼdu̱u̱ náa ixi̱ ri̱ʼi̱ Edén índo̱ Gixa̱a̱ (rí nandoo gaʼthí “bi̱ naʼnigáma” o “bi̱ naʼthí dí nduwaʼ ga̱jma̱a̱ numuu mbáa”) niʼthí rí Dios naʼnigaʼduun maxnúu Adán ga̱jma̱a̱ Eva mbá rí nda̱ñúunʼ mu makuwá gagi (Gén. 3:1-5). Asndu má nákha ikhú, niʼthí nduwaʼ ga̱jma̱a̱ numuu Jeobá dí ikhaa tséxnún xa̱bu̱ numbaaʼ dí phú nda̱ñúunʼ. Jesús nixmiéjuunʼ dí maguma gachíí má xúʼko̱ mbiʼyuu Anu̱u̱. Ikha jngó, niʼsngúún xa̱bi̱i̱ muthi rígi̱ índo̱ gutajkáan: “Anu̱xu bi̱ xtaa mekhuíí, kaʼwu gáʼni mbiʼyaaʼ” (Mat. 6:9).

6. Náá numuu rí Jeobá niniñuuʼ mbayuuʼ wéñuʼ maʼnimbánuu ga̱jma̱a̱ numuu rí i̱ndó ikhaa kaʼyoo maʼtáñajunʼ rá.

⁶ Rí nuthi dí ikhaa rakáʼyoo maʼtáñajunʼ. I̱ndó Jeobá nindxu̱u̱ bi̱ kaʼyoo maʼtáñajunʼ mekhuíí ga̱jma̱a̱ náa tsu̱du̱u̱ Ku̱ba̱ʼ (Apoc. 4:11). Mú Gixa̱a̱ naʼninduwiinʼ ángeles ga̱jma̱a̱ xa̱bu̱ numbaaʼ dí ikhaa rakáʼyoo maʼtáñajunʼ. Ga̱jma̱a̱ numuu xkujndu rígi̱ dí nuthi rí ikhaa rakáʼyoo maʼtáñajunʼ xándoo mambanúu mbá nacha̱. Bi̱ Niʼniáánʼ nindxa̱ʼóo májánʼ edxu̱u̱ numuu rí niniñuuʼ dí xa̱bu̱ numbaaʼ mutañajumijná i̱ndó ikhiin mbayuuʼ tsiguʼ, mu xúʼko̱ makujmaa dí á mu na̱nguá enimbánii xóo ikhaa nandoo, xájmiin nditháan (Jer. 10:23). Ga̱jma̱a̱ numuu dí Dios naʼngo̱o̱ a̱jkiu̱u̱n, xkujndu rígi̱ mambanúu mbájkhu. Makujmaa kaʼwu dí ikhaa nindxu̱u̱ bi̱ naʼtáñajunʼ itháan májánʼ ga̱jma̱a̱ dí i̱ndó náa naʼtáñajunʼ ikhaa ma̱ndoo marigá dí tsímáá ga̱jma̱a̱ dí makuwáánʼ májánʼ náa tsu̱du̱u̱ Ku̱ba̱ʼ.

7. Tsíinʼ nindxúu̱n bi̱ túnimbu̱ún kuyáá Jeobá, ga̱jma̱a̱ ndiéjunʼ gaʼñúún ikhaa xá.

⁷ Tikhun e̱ji̱i̱n túnimbu̱ún. Jeobá niʼniwíinʼ jmbiin xúgínʼ e̱ji̱i̱n xóo ángeles ga̱jma̱a̱ xa̱bu̱ numbaaʼ. Mú mbáa ángel bi̱ tséʼnimbo̱o̱ bi̱ mbiʼyuu Satanás (rí nandoo gáʼthi “bi̱ nakuximinaʼ”) niʼni dí Adán ga̱jma̱a̱ Eva, bi̱ ninindxu̱ún xa̱bu̱ jmbiin, xúnimbu̱ún kuyáá Jeobá. Eʼwíinʼ ángeles ga̱jma̱a̱ eʼwíinʼ xa̱bu̱ numbaaʼ mangiin túnimbu̱ún (Jud. 6). Nda̱wa̱á asndu bi̱ kúwá náa xuajen Israel, mbá xuajen kiejunʼ rí Dios niraʼwíí mani̱ndxu̱u̱ xuajñuu, niniñanʼ mu mbuyamajkún dioses bi̱ ragájkhun (Is. 63:8, 10). Tsénimbu̱ún kuyáá Jeobá. Mú ikhaa naʼngo̱o̱ má xúʼko̱ ga̱jma̱a̱ maʼngo̱o̱ má xúʼko̱ asndu índo̱ gáʼganúu mbiʼi dí maʼni gámbíin xúgínʼ bi̱ tsénimbu̱ún. Mú maʼni̱i̱ a̱jkiu̱ún bi̱ naguájun jmbu náa ikhaa, bi̱ xó má ikhaa naʼngu̱u̱n xúgíʼ dí raʼkhí dí rígá náa numbaaʼ.

8, 9. Ndiéjunʼ dí mindu̱wa̱ʼ nuthi ga̱jma̱a̱ numuu Jeobá, mú xóo eriʼña̱a̱ ikháanʼlu rá.

⁸ Gixa̱a̱ naʼninduwaʼ má xúʼko̱. Índo̱ Gixa̱a̱ niʼthá numuu Job, nindoo gáʼthi dí xúgíinʼ xa̱bi̱i̱ Dios i̱ndó nuni ñajuunʼ á mu ikhaa nambáñun (Job 1:8-11; 2:3-5). Rúʼko̱ eʼthí Gixa̱a̱ asndu mbiʼi xúgi̱ (Apoc. 12:10). Ma̱ndoo musngajmá dí Gixa̱a̱ minduwaaʼ á mu naʼngulú xkujndu ga̱jma̱a̱ á mu naguajún jmbu náa Jeobá numuu rí nandulú kuʼyáá. Mu xúʼko̱ xó má nirígá ga̱jma̱a̱ numuu Job, Jeobá gáʼni tsajkurámuuʼ tsiakii dí nuʼni índo̱ naʼngulú (Sant. 5:11).

⁹ Gixa̱a̱ najmiuu xa̱bu̱ bi̱ kuya̱ edxu̱u̱ náa religión dí mindu̱wa̱ʼ muthi rí Jeobá nindxu̱u̱ mbáa bi̱ ra̱májáanʼ kayuʼ ma̱ngaa dí ikhaa gíʼdoo aʼkhúun náa rí numíniiʼ xa̱bu̱ numbaaʼ.  Ga̱jma̱a̱ rí índo̱ mbáa ada̱ nakháñuu, tikhun asndu nuthi rí Dios ni̱jkha̱a̱ kayá numuu rí ndayóoʼ mbáa ángel chíʼgíʼ mekhuíí. ¡Xúʼko̱ nuni dí nuthi itháan dí raʼkhí ga̱jma̱a̱ numuu Jeobá! Mú ikháanʼ nduʼyáá dí gajkhun. Ikha jngó índo̱ numíniiʼ ga̱jma̱a̱ numuu mbá nandii gakhii o nakháñuu mbáa bi̱ kuʼyáá, nditháan tséʼthá dí Dios gíʼdoo aʼkhúun. Numuu rí nduʼyáá gajkhun rí maʼga̱nú mbá mbiʼi dí ikhaa garígú dí naʼni mumíniiʼ. Ma̱ndoo muʼthúún xúgínʼ bi̱ nudxawíín dí Jeobá nindxu̱u̱ mbáa Dios bi̱ nandoo kaʼyulú. Mú xúʼko̱ Jeobá ma̱ndoo mariʼñuu bi̱ naʼthá numuu (Prov. 27:11).

10. Ndiéjunʼ eʼsngúlú náa Salmo 22:23, 24 ga̱jma̱a̱ numuu Jeobá rá.

¹⁰ Dí numíniiʼ xa̱bi̱i̱ bi̱ nandoo kaʼñún. Jeobá nindxu̱u̱ mbáa Dios bi̱ nagáwi̱i̱nʼ a̱jkiu̱u̱n. Ikha jngó nagawúunʼ índo̱ xa̱bi̱i̱ numíniiʼ, ga̱jma̱a̱ numuu rí nunigíniiʼ, numuu rí naʼniún nandii o ga̱jma̱a̱ numuu dí nakiéʼkulu (atraxnuu Salmo 22:23, 24). * Ikhaa naku̱mu̱u̱ xóo ekumulú. Ikha jngó nandoo marígú dí naʼni mumíniiʼ ga̱jma̱a̱ ikhaa gajkhun marígú (atayáá ma̱ngaa náa Éxodo 3:7, 8; Isaías 63:9). Maʼga̱nú mbá mbiʼi dí ikhaa maʼnimbánuu rígi̱ dí nikudaminaʼ: “Margujndóoʼ xúgíʼ iyooʼ idún, ní xákháñún itháan, ní xarígá tsingíná, ni xtambiyaʼ asndu má gaʼkhu” (Apoc. 21:4).

11. Xú káʼnii eku̱mu̱u̱ Jeobá índo̱ nandxa̱ʼwáminaʼ ga̱jma̱a̱ numún xa̱bi̱i̱ bi̱ nikháñúún rá.

¹¹ Dí nikháñúún bi̱ nambáxu̱u̱ gajmíi̱n. Xú káʼnii eku̱mu̱u̱ Jeobá índo̱ nandxa̱ʼwáminaʼ ga̱jma̱a̱ numún xa̱bekha̱ ga̱jma̱a̱ gu̱ʼu̱ bi̱ niguájun jmbu bi̱ nikháñun rá. Nandoo mbaʼñúún mbu̱júu̱ (Job 14:15). Lá nandoo nundxaʼwamíjná dí nda̱yáaʼ wéñuuʼ Abrahán bi̱ nimbáxu̱u̱ ga̱jma̱a̱  xáʼ. (Sant. 2:23.) O Moisés, bi̱ naʼthúu̱n “mijngii xígi̱” xáʼ. (Éx. 33:11.) ¡Ma̱ngaa dí ra̱ʼkhá tháán eyáaʼ maʼdxawuun mbu̱júu̱ʼ David ga̱jma̱a̱ eʼwíinʼ bi̱ nini ajmúú mitsaanʼ náa nunimba̱a̱ ikhaa xáʼ. (Sal. 104:33.) Maski ajndu bi̱ nimbáxu̱u̱ gajmíi̱n bugi̱ nikháñúún, ikhaa na̱nguá nimbumuu kaʼñún (Is. 49:15). Jeobá narmáʼáan a̱jkiu̱u̱n kuduun xóo kaʼniún, “ikhaa ndaʼyoo rí xúgíinʼ ikhiin ka̱ʼníí xóó kúwá ruya” (Luc. 20:38, nota). Maʼga̱nú mbá mbiʼi dí ikhaa má gákuxíín mbu̱júu̱ʼ, ga̱jma̱a̱ rí maʼdxawuun dí gutajkáan ga̱jma̱a̱ rí maʼdxuu wéñuʼ índo̱ gúyamajkuíí. Lá ragájkhun dí ajngáa rígi̱ naʼni̱i̱ a̱jkiu̱lú ikháanʼ bi̱ nikháñuu mbáa bi̱ nandulú kuʼyáá ráʼ.

12. Ndiéjunʼ dí naʼni maxmiéjunʼ itháan Jeobá náa iwáá mbiʼi rígi̱ náa rígá wéñuʼ dí raʼkhí rá.

¹² Dí xa̱bu̱ xkawiinʼ nuniu̱u̱n dí raʼkhí eʼwíinʼ xa̱bu̱. Índo̱ nikúwá bi̱ túnimbu̱ún náa ixi̱ ri̱ʼi̱ Edén, Jeobá ndiʼyoo má rí marigá itháan dí raʼkhí nákhá xóó tségumambánuu dí nandoo ikhaa. Naguiyuuʼ kaʼyoo xúgíʼ dí raʼkhí ga̱jma̱a̱ xúgíʼ dí tséjmaa dí nuni xa̱bu̱ mbiʼi xúgi̱. Nixmiéjunʼ má xúʼko̱ kaʼñúnʼ itháan bi̱ nda̱a̱ xóo mumbayumijná; xóo bi̱ guabiinʼ, xóo bi̱ nda̱wa̱a̱ anu̱ún ni má rudún ga̱jma̱a̱ bi̱ nikháñun ajmbiu̱ún (Zac. 7:9, 10). Ma̱ngaa naxmiéjunʼ wéñuʼ dí nunigíniin ga̱jma̱a̱ nuxudi̱i̱n guʼwá e̱jua̱nʼ xa̱bi̱i̱ bi̱ naguájun jmbu. Bi̱ naʼngu̱u̱n gajmiún ikhaa ma̱ndoo mbuyáá gajkhun dí Jeobá nandoo kaʼyála wéñuʼ xúgiáanʼ ikháanʼ.

13. Xú káʼnii niguma gachíin xa̱bu̱ numbaaʼ eʼyoo Jeobá rá. Ga̱jma̱a̱ ndiéjunʼ gáʼni ikhaa xá.

¹³ Rí xóo niguma gachíin xa̱bu̱ numbaaʼ. Xa̱bu̱ numbaaʼ nigumáanʼ xó má kaʼnii Dios, mú Gixa̱a̱ naniguuʼ maʼni gacháánʼ. Nákha mbiʼi rí nixtáa Noé, índo̱ “Jeobá ndiʼyoo rí xa̱bu̱ kúwá runi̱ dí ra̱májánʼ wéñuʼ”, “nigáwiinʼ a̱jkiu̱u̱n numuu rí niʼnii xa̱bu̱ náa tsu̱du̱u̱ ku̱ba̱ʼ ga̱jma̱a̱ nixtáa gíná wéñuʼ” (Gén. 6:5, 6, 11, nota). Lá nini itháan májánʼ xa̱bu̱ nda̱wa̱á ráʼ. Na̱nguá. Gixa̱a̱ nanigu̱u̱ʼ mbaʼyoo rí mámbá mbiʼi ejmaʼnuu mixtiʼkhu enii rí xóo nuni aʼkhá xa̱bu̱, tséʼniuu á mu xa̱biya̱ ga̱jma̱a̱ a̱ʼgu̱ o kanikhiin xa̱bekha̱ o kanikhiin gu̱ʼu̱ (Efes. 4:18, 19). Ga̱jma̱a̱ itháan má nadxuu índo̱ mbáa xa̱bi̱i̱ Jeobá nakudaminaʼ aʼkhá. Índo̱ nándáa mbiʼi rí Jeobá magiʼthu̱u̱n xóó, masngájma dí naguiyu̱u̱ʼ kaʼyoo xúgíʼ enii xóo eni aʼkhá xa̱bu̱.

14. Ndiéjun eʼniuu xujkhú ga̱jma̱a̱ Ku̱ba̱ʼ xa̱bu̱ rá.

¹⁴ Rí naguma gachíí Ku̱ba̱ʼ rí ikhaa niʼni. Raʼkháa i̱ndó “xa̱biya̱ naʼtáñajunʼ xa̱biya̱ mu maʼniu dí raʼkhí”, ma̱ngaa na̱nguá eñawu̱u̱n Ku̱ba̱ʼ ni má xujkhú, xó má Jeobá nindoo maguma (Ecl. 8:9; Gén. 1:28). Tikhun científicos nuthi rí migamíi tsiguʼ rí ma̱ʼkha̱ xa̱bu̱ muni gámbíin mbá millón xujkhú bi̱ mixtiʼkuiin ga̱jma̱a̱ plantas. ¡Ikha jngó naxmiéjúnʼ wéñuʼ! Ikháanʼ nuxnáa núma̱aʼ Jeobá numuu rí ikhaa nikudaminaʼ dí maʼni “gámbíin bi̱ nuni gámbáa ku̱ba̱ʼ” ga̱jma̱a̱ rí maʼni̱i̱ Ku̱ba̱ʼ mitsaanʼ náa kuwáánʼ (Apoc. 11:18; Is. 35:1).

15, 16. Ndiéjunʼ exkajxáanʼ maʼngulú xó má Jeobá rá. Arathá ga̱jma̱a̱ mbá xkri̱da.

¹⁵ Gundxaʼwámíjná xúgíʼ xkujndu dí ndiyóoʼ maʼngo̱o̱ mbayuuʼ tsiguʼ Anu̱lú bi̱ xtáa mekhuíí (atayáá kúgumaʼá “ Rí Jeobá xtáa raʼngo̱o̱ a̱jkiu̱u̱n”). Jeobá ma̱ndoo maʼni gámbá dí raʼkhí dí rígá náa numbaaʼ asndu náa má mbiʼi gáʼndoo. ¡Mu ra̱ʼkhá tháán mba̱a̱ dí nambáyulúʼ numuu dí naʼngo̱o̱ a̱jkiu̱u̱n! Gundxaʼwamíjna̱ náa xkri̱da rígi̱. Gundxaʼwamíjna̱ rí najuiʼthún xa̱bu̱ gajmii rí índo̱ gaxtáa timbáa aʼdiún xáxtáa ma̱ja̱nʼ ga̱jma̱a̱ xáxtáa mbayuuʼ. Maski ajndu xa̱bu̱ wanii nduyáá rí muraʼníí mbaʼa gaʼkhu gajmiún aʼdiún. Mú nundriguíi májánʼ wéñuʼ aʼdiún índo̱ naxtáa, numuu rí nandún kuyáá, ikha jngó naʼngu̱u̱n nuraʼníí xúgíʼ xkujndu numuu rí nandún muni xó ma eʼngu̱u̱n muni mbaja̱a̱ májánʼ wéñuʼ aʼdiún mbiʼi rí xóó maxtáa.

¹⁶ Ikháá ma kayuuʼ xúgiáanʼ naguwáʼ náa Adán  ga̱jma̱a̱ Eva ikha jngó nagumáanʼ ga̱jma̱a̱ aʼkhá. Maski ajndu xúʼko̱, Jeobá nandoo kaʼyulú ga̱jma̱a̱ nañewunlú (1 Juan 4:19). Mu rí mixtiʼkhu náa Jeobá ga̱jma̱a̱ numún xabuanii bi̱ niʼthá, nindxu̱u̱ rí ikhaa maʼngo̱o̱ mambáyulú. Ga̱jma̱a̱ nigíʼ má mbiʼi rí maʼni gámbóo xúgíʼ rí naʼni mumíniiʼ e̱ji̱i̱n (Mat. 24:36). Lá tséxkajxáanʼ ngajua ndrígóo maʼngulú gajmiúlú ikhaa mbiʼi rí xóó tígo̱o̱ ráʼ.

17. Ndíjkha naxnúlú tsiakii maʼngulú rí naʼthí ga̱jma̱a̱ numuu Jesús náa Hebreos 12:2, 3 rá.

¹⁷ Jeobá nindxu̱u̱ bi̱ naxnúlú itháán ma̱ja̱nʼ xkri̱da mu maʼngulú. Jesús ndiʼyáridoo májánʼ wéñuʼ. Índo̱ Jesús nixtáa náa tsu̱du̱u̱ ku̱ba̱ʼ niʼngo̱o̱ ga̱jma̱a̱ numulúʼ ikháanʼ, nduwaʼ rí nithi ga̱jma̱a̱ numuu rí nitsijmaa ga̱jma̱a̱ índo̱ nidujmaa náa ixi̱ (atraxnuu Hebreos 12:2, 3). * Nikujmaa kaʼwu rí xkridoo Anu̱u̱ nimbáyúu maʼngo̱o̱. Ikháanʼlu mangáanʼ ma̱ndoo mambáyulú.

18. Xú káʼnii embáyulú 2 Pedro 3:9 makru̱ʼu̱lú ndiéjunʼ rí naʼngo̱o̱ narígá ga̱jma̱a̱ numuu rí naʼngo̱o̱ a̱jkiu̱u̱n Jeobá rá.

¹⁸ (Atraxnuu 2 Pedro 3:9). * Jeobá ndaʼyoo xú káʼnii mbiʼi gánindxu̱u̱ májánʼ rí maʼni gámbóo xúgíʼ dí raʼkhí dí rígá náa numbaaʼ. Núma̱aʼ má ga̱jma̱a̱ numuu rí naʼngo̱o̱ a̱jkiu̱u̱n, ikha jngó xúgi̱ kúwi̱i̱n mbaʼin wéñuʼ xa̱bu̱ bi̱ nuni ñajuunʼ ga̱jma̱a̱ nduyamajkuíí. Mbá xúgíinʼ ikhiin nuxna̱a̱ núma̱aʼ wéñuʼ Jeobá numuu rí niʼngo̱o̱ nigi̱ʼthu̱u̱n mbayuuʼ tsiguʼ, rí asndu niʼngo̱o̱ nigumiin, majmañún maʼndún kuyáá ga̱jma̱a̱ rí muxnaxímíjná náa ikhaa. Índo̱ mbaʼánʼ dí ikháanʼ gaguma tsajkurámaaʼ ga̱jma̱a̱ numuu dí niʼngulú asndu índo̱ gártumuu mbiʼi, makujmaa kaʼwu rí niraʼwíí maʼngo̱o̱ a̱jkiu̱u̱n Jeobá niyambáá wéñuʼ.

19. Ndiéjunʼ rí gíʼmaa makuwáánʼ xawii muʼni rá. Ga̱jma̱a̱ ndiéjunʼ dí májánʼ gakhánulú rá.

¹⁹ Xkri̱da ndrígóo Jeobá naʼsngúlú dí gíʼmaa maʼngulú ga̱jma̱a̱ gagi, numuu rí ikhaa nindxu̱u̱ má xúʼko̱ “Dios gagi” maski ajndu rígá gaʼkhu ga̱jma̱a̱ i̱ʼwáʼ xkujndu dí Gixa̱a̱ niʼni marigá (1 Tim. 1:11). Ikháanʼ mangáán gíʼmaa makuwáánʼ gagi índo̱ kuwáánʼ raʼngo̱o̱ a̱jkiu̱lú nuguaʼthi̱i̱n asndu mbiʼi rí Jeobá gáʼni kaʼwi̱i̱ mbiʼyuu, mbiʼi rí masngájma dí ikhaa kaʼyoo maʼtáñajunʼ ga̱jma̱a̱ mbiʼi rí maʼni gámbáa xúgíʼ dí raʼkhí ga̱jma̱a̱ xkujndu dí rígá. Gakuwáánʼ xawii maʼngulú má xúʼko̱ xó má eʼngo̱o̱ Anu̱lú bi̱ xtáa mekhuíí. Á mu nuʼni xúʼko̱, ajngáa rígi̱ mambanúu náa mámbáa dí ikháanʼlu: “Gagi xtáa xa̱bu̱ bi̱ naʼngo̱o̱ má xúʼko̱ índo̱ naraʼnuu xkujndu, numuu rí índo̱ gaxtriguíi, makháná rí ma̱ndoo maxtáa kámuu, rí Jeobá nikudaminaʼ maxnún bi̱ nandún kuyáá má xúʼko̱” (Sant. 1:12).