1-2. Oinsá promesa iha Isaias 65:16, 17 anima ita atu la rende an?

IHA tinan 2017 reuniaun boot nia tema mak “Keta rende an!” Programa neʼe hatudu oinsá ita bele tahan susar oioin neʼebé ita hasoru. Tinan haat liu ona no ita nafatin tahan hasoru mundu aat neʼe.

² Ita foin daudaun hasoru susar saida? Ita-nia família no belun ruma mate ka lae? Ita hetan moras todan ka lae? Ita hasoru susar tanba idade aumenta ka lae? Ita hasoru susar tanba dezastre naturais, violénsia ka ema kontra ka lae? Ka Ita hasoru susar tanba pandemia hanesan COVID-19 ka lae? Ita hein namanas ba tempu neʼebé buat hotu neʼe sei lakon no ita sei nunka hanoin tan kona-ba neʼe.—Lee Isaias 65:16, 17.

3. Ita tenke halo saida agora no tanbasá?

³ Moris neʼe susar tebes, no karik ita sei hasoru susar neʼebé boot liután iha futuru. (Mt 24:21) Klaru katak ita presiza kontinua hametin ita-nia kbiit atu tahan. Tanbasá? Tanba Jesus hatete: “Hodi tahan nafatin mak imi sei hetan imi-nia moris.” (Lc 21:19) Bainhira ita hanoin kona-ba oinsá ema seluk tahan susar neʼebé hanesan ita-nian, neʼe bele hametin ita-nia kbiit atu tahan.

4. Tanbasá Jeová mak ezemplu diʼak kona-ba tahan?

⁴ Sé mak hatudu ezemplu diʼak liu kona-ba tahan? Maromak Jeová. Neʼe halo Ita hakfodak ka lae? Karik Ita hakfodak, maibé se Ita hanoin kona-ba neʼe, Ita sei komprende. Diabu mak kontrola mundu neʼe, tan neʼe iha problema barak. Jeová iha kbiit atu halakon kedas problema hotu, maibé nia hein tempu neʼebé loos atu halakon problema hotu. (Rom 9:22) Agora Maromak kontinua tahan toʼo tempu neʼebé nia deside ona atu halakon susar hotu. Mai ita haree buat sia neʼebé Jeová tahan.

5. Oinsá mak anju no ema hafoʼer Maromak nia naran? Ita sente oinsá kona-ba neʼe?

⁵ Anju balu no ema hafoʼer ninia naran. Jeová hafolin ninia naran no nia hakarak anju no ema hotu atu respeitu ida-neʼe. (Isa 42:8) Durante tinan rihun neen, anju balu no ema barak hafoʼer ninia naran. (Sal 74:10, 18, 23) Neʼe hahú iha jardín Eden bainhira Diabu (signifika “Ida neʼebé hafoʼer ema seluk nia naran”) duun katak Maromak hanetik buat neʼebé Adão no Eva presiza atu bele sente kontente. (Gén 3:1-5) Husi tempu neʼebá, anju sira no ema duun katak Jeová hanetik buat diʼak husi ema. Jesus hanoin barak tanba anju no ema hafoʼer ninia Aman nia naran. Tanba razaun neʼe mak Jesus hanorin ninia dixípulu sira atu halo orasaun: “Ami Aman iha lalehan, halo Ita-nia naran sai santu.”—Mt 6:9.

6. Tanbasá presiza tempu kleur atu prova katak Jeová iha direitu atu ukun?

⁶ Anju no ema kontra Maromak no ninia direitu atu ukun. Jeová deʼit mak iha direitu atu ukun lalehan no rai, no ninia dalan atu ukun mak diʼak liu hotu. (Apok 4:11) Maibé Diabu koko atu lohi anju sira no ema atu hanoin katak Maromak la iha direitu atu ukun. Presiza tempu atu prova katak Jeová iha direitu atu ukun no nia mak ukun-naʼin neʼebé diʼak liu. Jeová hatudu matenek hodi husik ema ukun ba tempu kleur, atu nuneʼe sira bele haree rasik katak sira labele ukun an ho susesu se sira la rona ba Kriadór. (Jer 10:23) Tanba Maromak hatudu pasiénsia, ikusmai ita hotu sei hatene katak nia deʼit mak iha direitu atu ukun lalehan no rai. Anju no ema hotu sei hatene katak Jeová nia dalan atu ukun mak diʼak liu no ninia ukun deʼit mak bele lori dame no hakmatek ba mundu.

7. Sé-sé deʼit mak kontra Jeová? Nia sei halo saida?

⁷ Ninia oan balu kontra nia. Jeová kria anju no ema ho perfeitu. Maibé tuirmai Satanás (signifika “Kontradór”) book Adão no Eva neʼebé perfeitu atu kontra Jeová. Anju no ema seluk mós kontra Jeová. (Jud 6) Depois neʼe, nasaun Izraél neʼebé Maromak hili ona mós kontra nia, no komesa adora maromak falsu sira. (Isa 63:8, 10) Jeová sente laran-kanek. Maski nuneʼe nia tahan, no sei kontinua tahan toʼo tempu neʼebé deside ona atu halakon kontradór sira. Tuirmai, Jeová no ninia atan sira neʼebé laran-metin ba nia sei kontente tanba sira la presiza tahan tan mundu aat neʼe.

8-9. Satanás no ulun-naʼin relijiaun sira fó sai lia-bosok saida deʼit kona-ba Jeová? Saida mak ita halo?

⁸ Diabu nia lia-bosok. Satanás duun Jeová nia atan ida naran Job no mós Jeová nia atan sira seluk katak sira serbí Jeová tanba deʼit hakarak atu hetan buat ruma. (Job 1:8-11; 2:3-5) Diabu kontinua duun ema toʼo ohin loron. (Apok 12:10) Bainhira ita tahan susar sira no nafatin laran-metin ba Jeová tanba hadomi nia, ita bele prova katak Satanás mak bosok. Hanesan ho Job, ita sei hetan bensaun tanba tahan.—Tgo 5:11.

⁹ Satanás uza ulun-naʼin husi relijiaun falsu atu hatete katak Jeová mak laran-aat no nia hamosu terus oioin. Ulun-naʼin balu hatete katak bainhira labarik ida mate, Maromak mak foti nia tanba Maromak presiza anju iha lalehan. Neʼe la hatudu duni respeitu ba Maromak. Maibé ita hatene katak Jeová mak  Aman neʼebé domin. Bainhira ita sai moras ka ema neʼebé ita hadomi mate, ita nunka fó-sala ba Maromak. Maibé ita fiar katak loron ida, nia sei halakon moras hotu no fó moris-hiʼas ba ema mate. Ita fó sai ba ema hotu katak Maromak hadomi ema. Hodi halo nuneʼe, Jeová bele hatán ba ida neʼebé koʼalia aat nia.—Prov 27:11.

10. Salmo 22:23, 24 fó sai saida kona-ba Jeová?

¹⁰ Ninia atan hasoru susar. Jeová mak Maromak neʼebé laran-sadiʼa. Nia triste tebes bainhira rona ita halerik tanba moras, ema kontra ita ka ita-nia fraku sira. (Lee Salmo 22:23, 24.) Jeová komprende susar neʼebé ita hasoru. Nia hakarak halakon ita-nia susar no nia sei halo duni ida-neʼe. (Kompara ho Éxodo 3:7, 8; Isaias 63:9.) Iha futuru, ‘nia sei hamaran ita-nia matan-been hotu husi ita-nia matan, mate sei la iha tan, no ita sei la triste tan ka tanis ka sente moras’.—Apok 21:4.

11. Jeová sente oinsá kona-ba ninia belun neʼebé mate ona?

¹¹ Ninia belun sira mate. Jeová sente oinsá kona-ba ninia belun sira neʼebé mate ona? Nia hein namanas atu haree sira moris fali. (Job 14:15) Ita bele fiar katak Jeová hakarak tebes atu haree ninia belun Abraão moris fali. (Tgo 2:23) Ka koʼalia ho Moisés neʼebé uluk koʼalia ho nia “oin ba oin”. (Éx 33:11) Klaru katak nia hakarak atu rona fali David no ema seluk neʼebé kanta knananuk hahiʼi nian. (Sal 104:33) Maski sira hotu mate ona, maibé Jeová nunka haluha sira. (Isa 49:15) Nia hanoin-hetan buat hotu kona-ba sira. Bíblia hatete katak “tuir ninia haree sira hotu sei moris hela”. (Lc 20:38, nota) Iha futuru, nia sei fó moris-hiʼas ba  sira no nia sei rona fali sira-nia orasaun no simu fali sira-nia adorasaun. Se ema neʼebé ita hadomi mate, esperansa neʼe sei fó kmaan ba ita.

12. Saida deʼit mak halo Jeová laran-triste durante loron ikus sira-neʼe?

¹² Ema aat hanehan ema seluk. Bainhira ema primeiru kontra Jeová iha jardín Eden, Jeová hatene katak situasaun sei sai aat liu. Jeová odi hahalok aat, hahalok la justisa, no violénsia neʼebé akontese iha mundu ohin loron. Jeová sempre hanoin kona-ba ema sira neʼebé fraku no la iha kbiit, hanesan oan-kiak sira no feto-faluk. (Zac 7:9, 10) Jeová sente triste tebes bainhira ema kontra no hatama ninia atan sira ba komarka. Ita bele fiar katak nia hadomi ita hotu neʼebé tahan hamutuk ho nia.

13. Jeová haree ema halo hahalok aat saida deʼit ohin loron? Nia sei halo saida?

¹³ Ema halo hahalok seksuál neʼebé la morál. Maromak kria ema tuir ninia ilas, maibé Satanás hakarak book ema atu halo hahalok neʼebé la morál. Iha Noé nia tempu, bainhira “Jeová haree katak ema nia hahalok aat sai barak tebes iha rai . . . Jeová sente triste tanba nia kria ona ema iha rai, no nia sente laran-kanek tebes”. (Gén 6:5, 6, 11) Situasaun iha mundu sai diʼak liu ka lae? Lae duni. Diabu sente kontente tebetebes bainhira haree ema halo hahalok seksuál oioin neʼebé kontra Maromak nia hakarak, neʼe inklui hahalok seksuál neʼebé la morál entre mane no feto, no mós hahalok omoseksuál. (Éf 4:18, 19) Satanás kontente bainhira haree Jeová nia atan halo sala. Kuandu toʼo ona tempu neʼebé Jeová deside atu halakon buat aat hotu, nia sei hatudu sai katak nia odi hahalok seksuál neʼebé la morál.

14. Saida mak ema halo ba mundu no animál sira?

¹⁴ Ema estraga mundu. Ema domina ema seluk no mós la tau matan ba mundu no animál sira tuir Jeová nia hakarak. (Ecle 8:9; Gén 1:28) Sientista balu hatete katak rezultadu husi ema nia hahalok mak animál no ai-horis millaun ida sei lakon iha tinan balu tan nia laran. Ita bele komprende tanbasá ema hanoin barak kona-ba ambiente. Maibé Jeová promete katak nia sei halakon ema neʼebé “estraga daudaun mundu” no nia sei halo mundu tomak sai paraízu.—Apok 11:18; Isa 35:1.

15-16. Saida mak sei book ita atu tahan hamutuk ho Jeová? Konta toʼok ai-knanoik.

¹⁵ Ita-nia Aman iha lalehan tahan problema oioin durante tinan rihun ba rihun. (Haree kaixa “ Jeová tahan ba saida”.) Jeová bele halakon buat aat hotu husi mundu neʼe iha tempu naran deʼit. Maibé Jeová nia pasiénsia lori benefísiu mai ita. Hanoin toʼok ai-knanoik neʼe. Doutór ida hatete ba feen-laʼen ida katak sira-nia bebé sei moris mai ho defisiente no sira-nia oan sei moris susar durante ninia moris tomak no mate sedu. Feen-laʼen neʼe sente kontente bainhira sira-nia oan moris mai maski la fasil atu haboot nia. Tanba sira hadomi sira-nia oan, sira tahan susar oioin atu bele tau matan didiʼak ba sira-nia oan.

¹⁶ Nuneʼe mós Adão no Eva nia bei-oan sira hotu la perfeitu bainhira sira moris mai. Maski nuneʼe, Jeová hadomi sira no tau matan ba sira. (1 João 4:19) Jeová la hanesan ho inan-aman neʼebé temi iha ai-knanoik ohin. Jeová bele halakon ninia  oan sira-nia terus. Nia deside ona loron atu halakon ema nia terus hotu. (Mt 24:36) Jeová nia domin book ita atu tahan toʼo loron neʼe mai.

17. Oinsá esplikasaun kona-ba Jesus iha Ebreu 12:2, 3 bele anima ita atu tahan?

¹⁷ Jeová hatudu ezemplu neʼebé perfeitu kona-ba tahan. Jesus banati-tuir ninia Aman nia kbiit atu tahan. Bainhira iha rai, Jesus tahan kuandu ema koʼalia aat nia, hamoe nia, no prega nia iha ai-riin terus nian atu ita bele moris. (Lee Ebreu 12:2, 3.) Jeová nia ezemplu kona-ba tahan fó Jesus kbiit atu tahan. Neʼe mós bele fó ita kbiit atu tahan.

18. Oinsá 2 Pedro 3:9 ajuda ita atu komprende saida mak akontese tanba Jeová hatudu pasiénsia?

¹⁸ Lee 2 Pedro 3:9. Jeová hatene tempu neʼebé loos atu halakon mundu aat neʼe. Tanba Jeová pasiénsia, ema barak hetan oportunidade atu hatene kona-ba nia no agora ema millaun ba millaun adora nia. Sira kontente tanba Jeová tahan no fó tempu ba sira atu moris, aprende kona-ba nia, no dedika sira-nia an ba nia. Bainhira ema millaun ba millaun tahan toʼo rohan, neʼe hatudu ho klaru katak Jeová halo desizaun neʼebé loos bainhira nia deside atu hatudu pasiénsia.

19. Ita presiza hakaʼas an atu halo saida? Ita sei simu kolen saida?

¹⁹ Ita aprende husi Jeová oinsá atu tahan ho haksolok. Maski Satanás hamosu susar no terus oioin, maibé Jeová nafatin kontente. (1 Tim 1:11) Ita mós bele nafatin kontente nuʼudar ita hein ho pasiénsia ba Jeová atu halo santu ninia naran, prova katak nia iha direitu atu ukun, halakon buat aat hotu, no halakon ita-nia problema hotu. Mai ita hakaʼas an atu kontinua tahan no hanoin-hetan katak ita-nia Aman iha lalehan mós presiza tahan. Hodi halo nuneʼe, ita ida-idak sei haree katak liafuan sira-neʼe mak loos: “Ksolok ba ema neʼebé kontinua tahan susar, tanba kuandu Maromak simu ona nia, nia sei simu koroa moris nian, koroa neʼebé Jeová promete ona ba ema sira neʼebé kontinua hadomi nia.”—Tgo 1:12.