1-2. Nagnino ty raha saontsie i Jehovah amy Isaia 65:16, 17 ao ro magnampe antika hiaretse?

“MANAGNA FIARETAGNE” ty foto-keve ty havoriambey vondrom-paritse tamy 2017. Nitreantikagne tamy i havoriambey ignehoe tie akore ty hiaretagne ty olagne mahazo antika. Fa efatse taogne lasa zay, faie heheke tika le mbe miaretse ty fiaignagne amy ty tontolo raty toy eto avao.

² Ino zao ty olagne natrehe’o vaho tsy ela? Ty fahafateza ty longo’o ndra ty nama’o tena tea’o vao? Sa narare mafe fa ho nimate rehe? Sa tsy mora ama’o ty miatreke o fiaignagneo noho i rehe fa mihantetse? Sa nisy tsikolony, keré, ranobey, horohoron-tane, aly, ndra fagnenjehagne ty tama’areo agne? Sa rehe miatreke olagne hafa noho ty fisia ty aretegne manjamagne manahake ty COVID-19? Fa tsy lignentika ty hiavia i andro hagnafahagne o olagne rehoe iabỳ. Tsy hahatsiaro irey sasa tika amy izay, sady lelia’e tsy hisy sasa ka rey.​—Vakio ty Isaia 65:16, 17.

3. Ino ty raha tsy maintsy ataontika amy izao, le ino ty anto’e?

³ Tsy mora ty raha atrehentika amy izao. Va’e mbe ho mafemafe ambone izao aza ty olagne hatrehentika amy ty hoavy. (Mat. 24:21) Mila mikezake avao areke tika mba hiaretse mihoatse ty fa nataontika amparake izay. Fa nagnino? Satria hoe ty Jesosy: “Fa ze miaretse hatrake am-para’e ro hovonjegne.” (Mat. 24:13) Hahavita hiaretse ty olagne mahazo antikagne tika naho mandineke ty raha atao ty hafa mba hiatrehagne ty olagne mahazo iareo.

4. Nagnino tika ro afake mirehake tie i Jehovah ro modely fanjaka amy ty fiaretagne?

⁴ Ia ty modely fanjaka amy ty fiaretagne? I Jehovah Andrianagnahare. Va’e hahagaga azo zay. Faie naho mandineke soa rehe, le tsy ho gaga ka. Fehe i Devoly ty tontolo toy, le izay ty mahavy aze ho feno olagne. Vita i Jehovah ty mamoagne i olagne rey tsy ela avao, satria managne hery hanoagne izay reke. Faie mbe mandigne ty hiavia i andro raike hanoa’e izaỳ reke. (Rom. 9:22) Miaretse heike areke i Andrianagnaharentikagney amparake ty hiavia o fotoagne fa tinondro’e iohoe. Andao tika handineke ty raha sive iareta i Jehovah.

5. Akore ty nandratiratiagne i tahina i Jehovah-y, le ino ty tsapa’o boake amy izay?

⁵ Ty fandratiratiagne i tahina’ey. Tea i Jehovah i tahina’ey, le tea’e naho magnaja i tahina’ey ze kila ndaty. (Isaia 42:8) Faie nisy nandratiraty i tahina’ey fa ho 6 000 taogne lasa zay. (Sal. 74:10, 18, 23) Tamy i tonda i Edenay ao ty nanomboha izay. Nanao kitomboke an’Andrianagnahare ty Devoly (midika tihoe “Mpandratiraty”) tamy izay tie misy raha tsy mea’e i Adama naho i Eva, ie amy izao hahasambatse iareo ze raha zay. (Gen. 3:1-5) Nanomboke tamy izay, le natao kitomboke ty Jehovah tie tsy mea’e o ndatio ze raha tena paliae iareo. Nampinekoneko i Jesosy ze fandratiratiagne i tahinan-dRae’ey zay. Izay ty nahavy aze nampianatse i mpiana’e rey hivavake hoe izao: “Rae’ay amy i lagnitsey ao, homasinegne abey ty tahina’o!”​—Mat. 6:9.

6. Nagnino ty Jehovah ro nandigne tagnate ty fotoagne lava bey mba hagnaporofoagne fa managne zo hitondra ze kila raha namboare’e reke?

⁶ Ty fanoheragne ty zo’e hitondra. I Jehovah raike avao ty manan-jò hitondra ze kila raha namboare’e, ndra an-dagnitse agne zay ndra an-tane etoy, sady ty fitondra’e avao ro fara’e soa. (Apok. 4:11) Faie natao i Devoly ze hamitahagne o anjelio naho o ndatio mba hahavy iareo hieretseretse tie tsy manan-jò hitondra ty Andrianagnahare. Mitake fotoagne lava ty hagnaporofoagne tie manan-jò hitondra ty Jehovah, sady ty fitondra’e ro fara’e soa. Hendre ty Andrianagnahare, le nenga’e hifampitondra agnate ty fotoagne lava bey o ndatio mba hahatreava iareo tie tsy ho tomombagne ty fitondra o ndatio naho fa tsy miankigne amy i Mpamorogney. (Jer. 10:23) Noho i Andrianagnahare nanam-paharetagne areke, le tsy hisy ndaty hisalasala sasa tie tena manan-jò hitondra ze kila raha namboare’e vata’e reke. Ty anto’e, ho voaporofo tie ty fitondra i Jehovah avao ro fara’e soa, sady i Fanjakà’ey avao ro hahavita hampisy fiadanagne naho filaminagne an-tane etoy.

7. Ia iaby ty nanohetse i Jehovah, le hatao’e akore iareo?

⁷ Ty fanohera ty ila’e amo o ana’eo aze. Natao i Jehovah voririke o anjelio naho o ndatio naho fa finoro’e. Faie nanohetse i Jehovah ty raike amo o anjeli’eo, le natao tihoe Satana (midika tihoe “Mpanohetse”) ty agnara’e sady nitaone’e ty Adama naho i Eva mba hanohetse i Jehovah miarake ama’e. Nisy anjely naho ndaty hafa ka nanohetse i Jehovah miarake amy iareo. (Joda 6) Tafara tatoy aza, le nanohetse aze ka ty ila’e amo o Israelitao, i vahoake jinobon’Agnaharey, sady nivavake tamy ty andrianagnahare diso. (Isaia 63:8, 10) Nahatsiaro ho voafitake ty Jehovah. Faie niaretse reke sady mbe hiaretse avao amparake ty hiavia i fotoagne hampibaibaia’e o mpanohetse azeo iabỳ. Ho fale ty Jehovah naho ze mpanompo’e tsy mivalike amy izay. Tsy hisy raha hiareta iareo sasa tie amy izay, satria fa tsy ho eo iaby ze raha raty amy ty tontolo toy eto.

8-9. Ino ty kitomboke atao amy i Jehovah, le ino ty raha azontika atao mba hagnaporofoagne fa tsy maregne zay?

⁸ Ty vande i Devoly. Nanao kitomboke i Joba naho ty mpanompo i Jehovah tsy mivalike hafa ty Satana tie hatea tegna avao ty anompoa iareo an’Agnahare. (Joba 1:8-11; 2:3-5) Mbe manao kitomboke o ndatio avao ty Devoly hatrake amy izao. (Apok. 12:10) Afake magnaporofo tika tie tsy maregne i reha i Satanay naho miaretse ze raha sarotse manjò antikagne tika sady tsy mivalike amy i Jehovah noho itika tea Aze. Nimea i Jehovah valesoa ty Joba satria niaretse. Hamale soa antikagne ka reke naho miaretse tika.​—Jak. 5:11.

⁹ Mampiasa o mpitarike fivavahagneo ty Satana mba hirehake vande miomba i Jehovah. Rehafe iareo ohatse tie raty fagnahy ty Andrianagnahare sady boake ama’e o fijaleagne mahazo o ndatiò. Ty ila’e aza mirehake tie mipay anjely fagnampe’e ho ama’e an-dagnitse agne ty  Andrianagnahare, le izay ty mahavy o ajajao ho mate satria alae’e. Tena manalatse an’Andrianagnahare ze raha rezay! Faie haintika tie Rae bey hatea ty Jehovah. Tsy magnomey tsiny i Andrianagnaharentikagney areke tika naho fa marare mafe ndra mate ty ndaty raike tena teantika. Itika aza mino fa indraike andro agne, le ho foagne o aretegneo sady hovelome’e o ndaty fa nimateo. Azontika ambara amy ze ndaty vognogne hitsanogne antika ka tie bey hatea ty Jehovah Andrianagnahare. Ty fanoantikagne izay ro ahafaha i Jehovah mamale i magnaraty azey.​—Ohab. 27:11.

10. Ino ty raha rehafe ty Salamo 22:23, 24 miomba i Jehovah?

¹⁰ Ty fijalea o mpanompo’e tena tea’eo. Andrianagnahare mitretré ty Jehovah. Tena malahelo reke naho fa maharey antika mitoreo ama’e noho ty fijaleagne iaretantikagne. Va’e ho fagnenjehagne, aretegne ndra ty tsy fahavoririhantikagne zay. (Vakio ty Salamo 22:23, 24.) Tsapa i Jehovah soa i raha mampijale antika rey. Tea’e hafahagne rey, sady tena hanao izay reke. (Ampitahao amy ty Eksodosy 3:7, 8; Isaia 63:9.) Ho avy ty andro ‘hamafa’e ze ranomaso amy ty masontikagne, le tsy hisy sasa ty fate, ty alahelo ndra ty toreo ndra ty fanaintaignagne.’​—Apok. 21:4.

11. Ino ty tsapa i Jehovah amy i mpanompo’e tsy mivalike nimate rey?

¹¹ Ty tsy fahafaha’e mifandrambe amy i nama’e nimate rey. Tena tsy ligne i Jehovah ty hahavazoho indraike i lahilahy naho ampela tsy nivalike rey hovelomegne amy ty mate. (Joba 14:15) Azo’o sare an-tsaigne vao tie manao akore ty hamanigna i Jehovah i Abrahama, i ragne’ey? (Jak. 2:23) Ndra i Mosesy, i nifampirehake tama’e ‘mifagnatrekey’? (Eks. 33:11) Tena fa tsy ligne i Jehovah ka ty haharey i Davida naho ty mpanao salamo hafa hihira fideragne ho aze. (Sal. 104:33) Faie ndra tie nimate aza o nama i Jehovah rehoe, le tsy haligno’e. (Isaia 49:15) Tsiaro’e amy ty pitsopitso’e ty toetse iareo. Rehafe ty Baiboly fa  ‘velogne iaby i nama’e rey tie ama’e.’ (Lioka 20:38) Hovelome’e amy ty mate iareo amy ty hoavy, le haharey ty vavake amy ty fo atao iareo indraike reke, sady hankasitrake ty fanompoagne hatao iareo ho aze. Hampahery naho hampionogne azo ty fisaintsaignagne ireo naho nimate ty ndaty raike tena tea’o.

12. Ino ty raha tena mampikoretse ty arofo i Jehovah amo ze o andro fara’e zao?

¹² Ty fampijalea o ndaty raty fagnahio ty ndaty hafa. Naho fa nisy nanohetse ty Jehovah ta Edena tao, le fa nioni’e tie hindra heike ty haratia o fiaignagneo vaho izay hiheregne ho soa indraike. Heje i Jehovah ty mahavazoho o haratiagneo, o tsy rare’eo naho o alio amy ty tontolo toy eto amy hinane zao. Fa nikarakara o ndaty tsy misy mpitretréo avao reke amparake izay, agnisa izay o ndaty maleme naho tsy misy mpiaro manahake o bodeo naho o vantotseo. (Zak. 7:9, 10) Tena mikoretse ty arofo’e naho fa mahavazoho o mpanompo’e tsy mivalikeo ampijalegne naho gadraegne. Matokia fa teà i Jehovah iaby nareo, satria miaretse manahake aze.

13. Ino ty raha raty anoe o ndatio, le mampangorigne an’Andrianagnahare ty mahavazoho aze? Hatao’e akore o ndaty rehoe amy ty hoavy?

¹³ Ty haraty findesam-bata o ndatio. Tea i Satana hampanoegne raha raty o ndaty namboare i Jehovah mitovy vintagne ama’eo. Naho fa “nivazoho i Jehovah tie fa losotse loatse ty haratia ty ndaty amy ty tane toy” tamy ty andro faha i Noa, le ‘nanegnena’e ty nagnamboara’e o ndatio amy ty tane toy, sady nikoretse ty arofo’e.’ (Gen. 6:5, 6, 11) Mindra ty haratiagne amy ty tontolo toy eto tie amy izao. Azo antoke fa tena fale ty Devoly mahatrea fa manjare tsy mampagnino o ndatio ty manao ze o karazam-piraisagne iaby zao, agnisa izay ty raha vetaveta atao ty lahilahy raike naho ty ampela raike, vaho ty firaisagne atao ty lahilahy sambe lahilahy ndra ampela sambe ampela. (Efes. 4:18, 19) Vao mainke fale aza ty Satana naho vita’e ty mitaogne o mpanompo i Jehovah-o hanao fahotagne lahibey. Naho fa tapetse ty fahareta i Jehovah, le habaibai’e ze ndaty raty findesam-batagne faie tsy mete miova mba hampisehoa’e tie tena mampangorigne aze ty raha raty atao iareo.

14. Ino ty raha atao o ndatio amy ty tane toy naho amo o bibio?

¹⁴ Ty fanimbà o ndatio ty tane toy. ‘Mikomandikomandy ty nama’e o ndatio, le magnoho-doza amy iareo.’ Faie tsy izay avao ty raha atao iareo. Tsy darea iareo ka ty tane toy naho o bibio, i nampikarakarae i Jehovah iareoy. (Mpito. 8:9; Gen. 1:28) Misy manam-pahaiagne mirehake tie noho ty raha atao ty ndaty amy izao, le an-tapetrisa’e ty karazan-draha managne aigne ho lany taranake naho tsy hisy sasa afake taogne tsiampeampe. Tsy mahalatsa areke naho mirehake iareo tie mampatahotse ty hiafara o tontolo iaignagneo. Faie soan-draha fa nampitamà ty Jehovah tie ‘hovonovonoe’e ze ndaty manimba o taneo’ sady hova’e paradisa ty tane toy iaby.​—Apok. 11:18; Isaia 35:1.

15-16. Ino ty toko’e handrisike antika hiaretse manahake i Jehovah? Mirehafa ohatse raike.

¹⁵ Fa nieretserete’o vao o raha iareta i Babantika an-dagnitse agney rehoe? Fa agn’arivo’e taogne maro reke ty niaretse ireo. (Henteo ty efajoro tihoe “ Ino Iaby ty Raha Iareta i Jehovah?”) Vita i Jehovah ty mamoagne o raha raty amy ty tontolo toy etò ndra ombia ndra ombia tea’e hanoagne izay. Faie tena fale tika noho i reke nanam-paharetagne fa tsy le avy le nanao izay. Intoy misy fagnoharagne raike. Andao hatao tihoe misy ampela raike mivesatse. Le nirehafegne iareo mirovaly tie managne aretem-bey o ana iareo iohoe. Ho sarotse ty fiaigna’e voka ze arete’e zay, le ho mate tanora ka reke. Faie nifale iareo mirovaly naho fa niterake i ana iareoy, ndra tie eo aza ty raha sarotse hatrehe iareo amy ty fikarakaragne aze. Tena tea iareo i ana iareoy, le izay ty nandrisike iareo hiaretse mba hagnomeagne aze fiaignagne fara’e soa amy ie mbe velogney.

 ¹⁶ Tsy voririke ka ze tarana i Adama naho i Eva naho fa naterake. Faie teà i Jehovah iareo sady karakarae’e soa. (1 Jaona 4:19) Misy raha tsy itoviza i Jehovah amy i rae aman-drene amy i fagnoharagne teoy. Tsy afake nagnafake i fijaleagne nahazo i ana iareoy iareo. Fa i Jehovah, vita’e ty magnafake ze raha mampijale o ana’eo. I reke aza fa nanondro date hagnatanteraha’e izay. (Mat. 24:36) Tsy toko’e handrisike antika hiaretse ka vao ze hatea i Jehovah zay ndra ombia ndra ombia hiavia i fotoagne fa tinondro’ey?

17. Nagnino ty raha rehafe ty Hebreo 12:2, 3 miomba i Jesosy ro mandrisike antika hiaretse avao?

¹⁷ Tena modely fanjaka amy ty fiaretagne ty Jehovah. Niaretse manahake an-dRae’e ka ty Jesosy. Tamy i Jesosy tambone tane etoỳ ohatse, le niaretse fagnaratiratiagne naho fahafaham-baraka. ‘Niaretse hazo fijaleagne’ ka reke. (Vakio ty Hebreo 12:2, 3.) Azo antoke fa ty modely nenga i Jehovah amy ty fiaretagne ty nandrisike i Jesosy hiaretse. Afake mandrisike antika hiaretse ka io.

18. Nagnino ty 2 Petera 3:9 ro magnampe antika hahatrea tie nisy nahasoa aze ty fanagna i Jehovah fiaretagne?

¹⁸ Vakio ty 2 Petera 3:9. Ony i Jehovah tie ombia ty fotoagne mete soa hamaragnagne ty tontolo raty toy. Noho i reke manam-paharetagne, le maro ty ndaty nanjare nahafantatse aze, sady fa an-tapetrisa’e ka amy izao ty isa i vahoake maro manompo aze rey. Tena fale o ndaty rehoe, satria niaretse ty Jehovah amparake ty niavia ty fotoagne niterahagne iareo, nianara iareo miomba aze naho nanokana iareo tegna ho aze. Tena mete areke ty natao i Jehovah naho nanapa-kevetse ty hiaretse heike reke, kanao misy vahoake an-tapetrisa’e amy hinane zao mahavita miaretse hatrake ampara’e.

19. Toko’e ho tapa-kevetse hanao ino tika, le ino ty valesoa ho azontika naho manao izay?

¹⁹ Nianarantika amy i Jehovah fa vitantika ty miaretse. Ndra tie eo aza ty fijaleagne naho ty raha mampalahelo atao i Satana, le mbe “Andrianagnahare falefale” avao reke. (1 Tim. 1:11) Afake ty ho fale manahake aze ka tika ndra tie fa tena tsy lignentika aza ty hiavia i fotoagne hagnamasina i Jehovah ty tahina’ey naho hagnamarena’e ty zo’e hitondray vaho hagnafaha’e ze kila raha ratỳ naho hamoagna’e ze olagne mahazo antika amy izaoy. Lonike areke tika ho tapa-kevetse ty hiaretse, satria miaretse manahake antika ka i Babantikagne an-dagnitse agney, sady mampahery antika ty mahafantatse izay. Naho itika miaretse, le ho tanterake amantika ty raha rehafe ty Baiboly toy: “Sambatse ze ndaty miaretse hatrake ampara’e naho fa misy fitsapagne mahazo aze, satria naho fa ankasitrahagne reke, le hahazo i satro-boninahitse ty havelogney, i nampitamae i Jehovah hoahy ze tea azey.”​—Jak. 1:12.