1-2. Ngande watokeketsha ɛtɛkɛta wa Jehowa wa lo Isaya 65:16, 17 diaha mpekɔ?

LOSANGANYA la rɛjɔ la lo 2017 laki l’ɔtɛ a dui wa dimɛna efula wata ɔnɛ: “Tatohekɔke.” Ekongelo kɛsɔ kakatɛnya woho wakokaso mbikikɛ ehemba watokomɛ. Ɛnɔnyi ɛnɛi wambeta ntatɛ oma laasɔ, ndo tekɔ lo ntetemala mbikikɛ ekakatanu lo dikongɛ nɛ di’akambo.

² Ekakatanu akɔna wakahomana layɛ atete edja? Onde wɛ akavusha ose nkumbo kana ɔngɛnyi ayɛ ɔmɔtshi wokayɛ ngandji? Onde wɛ ekɔ la hemɔ kɛmɔtshi kakokiyanya? Onde wɛ ekɔ lo diɛnɛ l’ekakatanu wendana la lotshundu? Onde wɛ ekɔ lo diɛnɛ l’ɔtɛ wa mpokoso kɛmɔtshi k’oma lo diangɔ diakatongama, awui wa ngala, kana ɛhɛnyɔhɛnyɔ? Kana onde wɛ ekɔ lo mbikikɛ etombelo w’oma lo hemɔ kɛmɔtshi, ɛnyɛlɔ hemɔ kambokokanɛ ka COVID-19? Tekɔ lo kongɛɛ l’asolo walomɔlomɔ lushi layoshila akambo asɔ tshɛ. Akambo asɔ hawotohɔma ndo hawotoyala nto!​—Adia Isaya 65:16, 17.

3. Kakɔna kahombaso nsala, ndo lande na?

³ Lɔsɛnɔ la lo dikongɛ nɛ lekɔ wolo, ndo sho koka mpomana l’ekakatanu wa wolo lo nshi yayaye. (Mat. 24:21) Mbokɛmaka hwe dia sho pombaka ntetemala nkeketsha ekikelo kaso. Lande na? Nɛ dia Yeso akate ate: “Oma lo ekikelo kanyu mbayonyoshimbɛ nsɛnɔ yanyu.” (Luka 21:19) Nkanyiya woho wakikɛ anto akina ehemba wele lawɔ wafɔna la waso koka nkeketsha ekikelo kaso.

4. Lande na kakokaso mbuta dia Jehowa ekɔ ɛnyɛlɔ koleki dimɛna ka ekikelo?

⁴ Onto akɔna lele ɛnyɛlɔ koleki dimɛna ka ekikelo? Jehowa Nzambi. Onde okadimwelo ɔsɔ kaambiyaka? Ondo vɔ koka kaambiya, koko naka wɛ nkanyiya dui sɔ, kete wɛ hatamba. Andja ɔnɛ wekɔ lo nɔmbwama oma le Diabolo, ndo vɔ wambolola  l’ekakatanu. Jehowa ekɔ la wolo wa nshidiya ekakatanu ɛsɔ lo tshenyi ya wonya, koko nde ekɔ lo nkonga dia nsala dui sɔ lo nshi yayaye. (Rɔmɔ 9:22) Etena kakatakonge dui sɔ, Nzambi kaso ekɔ lo ntetemala mbikikɛ edja ndo lam’ayokoka etena kɛsɔ. Nyɛsɔ tɔsɛdingole awui divwa wakikɛ Jehowa.

5. Ngande wakɔnywama lokombo la Nzambi, ndo ngande wayaokayɛ lo dikambo sɔ?

⁵ Woho wɔnywama lokombo lande. Jehowa nangaka lokombo lande ndo nde nangaka di’onto tshɛ lilɛmiya. (Isa. 42:8) Koko ambeta oko ɛnɔnyi nunu samalo wele, lokombo lande la dimɛna lakɔnywama. (Os. 74:10, 18, 23) Dui sɔ diakatatɛ l’ekambɔ k’Ɛdɛna etena kakate Diabolo (kitshimudi ate “Omamanyishi”) dia Nzambi ekɔ lo dima Adama l’Eva ɛngɔ kɛmɔtshi ka dimɛna kakiwɔ l’ohomba dia vɔ monga l’ɔngɛnɔngɛnɔ. (Eta. 3:1-5) Ntatɛ oma l’etena kɛsɔ, anto wekɔ lo nsɔngwɛ Jehowa awui wa kashi w’ɔnɛ nde ekɔ lo dima anto kɛnɛ mɛtɛ kewɔ l’ohomba. Yeso akayakiyanya lo kɛnɛ kendana la woho wɔnywama lokombo la She. Diakɔ diele, nde aketsha ambeki ande dia nɔmbaka ɔnɛ: “Shɛso lele l’olongo, lokombo layɛ lakidiame.”​—Mat. 6:9.

6. Lande na kaketawɔ Jehowa dia etena k’otale mbeta la ntondo ka nde ndjokandola dikambo diendana la lowandji lande?

⁶ Lowandji lande lekɔ lo ndɔshama. Paka Jehowa oto mbele la lotshungɔ tshɛ lo tshɛ la mbolɛ l’olongo ndo la nkɛtɛ, ndo yoho yande ya nɔmbɔla mboleki dimɛna. (Ɛny. 4:11) Koko Diabolo akasale la wolo dia minganyiya andjelo ndo anto lo mbakonya dia mfɔnya dia Nzambi bu la lotshungɔ lɔsɔ. Dikambo diendana la lotshungɔ lele la Jehowa la mbolɛ kokoka kandɔma lushi ɔtɔi. La lomba tshɛ, Nzambi akatshike etena k’otale di’anto mɛna dia etena kayanga anto dia ndjalɔmbɔla vɔamɛ aha la ekimanyielo k’Otungi, vɔ kitaka tatala. (Jɛr. 10:23) L’ɔtɛ wa solo dia lotutsha diaki Nzambi, dikambo sɔ diayokandɔma mbala ɔtɔi lo pondjo. Nde ayoyindjama etena kayondɛnya dia paka Diolelo diande to mbayela wɔladi wa mɛtɛ ndo lotui tshitshi la nkɛtɛ.

7. Waa na wakatɔmbɔkwɛ Jehowa, ndo kakɔna kayondosala la wɔ?

⁷ Ɔtɔmbɔkwɛlɔ w’anande amɔtshi. Jehowa akatonge anande wa lo nyuma ndo anto wa kokele. Koko l’ɔkɔngɔ diko, ondjelo ɔmɔtshi wakatɔmbɔkɔ welɛwɔ Satana (kitshimudi ate “Ɔndɔshi”), akakonya Adama l’Eva, anto waki kokele dia vɔ tɔmbɔkwɛ Jehowa. Andjelo akina ndo anto wakayoyela lokolo lawɔ l’ɔtɔmbɔkwɛlɔ. (Judɛ 6) L’ɔkɔngɔ diko, kaanga anto wa lo wodja w’Isariyɛlɛ, wodja wa Nzambi wakasɔnama, wakayowoka ɔkɔngɔ ndo wakayotatɛ ntɛmɔla tozambizambi ta kashi. (Isa. 63:8, 10) Jehowa akayaoke oko onto lambowofunga. Koko nde akakikɛ, ndo nde ayotetemala mbikikɛ polo lam’ayokoka etena kayondolanya atɔmbɔki tshɛ. Dui sɔ diayɔngɛnyangɛnya anto wele la kɔlamelo wakikɛ kaamɛ la nde awui wa kɔlɔ lo dikongɛ nɛ di’akambo!

8-9. Kashi yakɔna yatama lo dikambo dia Jehowa, ndo kakɔna kasalaso la ntondo ka kashi shɔ?

⁸ Kashi yatetemala Diabolo mbuta. Satana akasɔngwɛ Jɔbɔ, okambi wa Jehowa w’ɔlɔlɔ, lo mbuta di’atɛmɔdi wa Jehowa tshɛ wele la kɔlamelo mbokambɛka l’ɔtɛ w’eyango wa lokaki. (Jɔbɔ 1:8-11; 2:3-5) Diabolo ekɔ lo ntetemala nsɔngwɛ anto polo ndo ɛlɔ kɛnɛ. (Ɛny. 12:10) Sho koka nsala kɛnɛ tshɛ kakokaso nsala dia mɛnya dia tshɛ kata Satana kekɔ kashi lo mbikikɛ ehemba aso ndo lo ntetemala monga la kɔlamelo le Jehowa l’ɔtɛ wa ngandji kawokaso. Oko wakatshɔkwama Jɔbɔ, sho lawɔ tayɔtshɔkwama l’ɔtɛ w’ekikelo kaso.​—Jak. 5:11.

⁹ Satana kambaka l’ewandji w’ɛtɛmwɛlɔ wa kashi dia mbuta dia Jehowa ekɔ esehe ndo ɔnɛ  nde mbele lo kiɔkɔ y’asui w’anto. Etena kavɔ ana, amɔtshi komaka polo ndo lo mbuta dia Nzambi mbambowaɔsa nɛ dia nde ekɔ l’ohomba w’andjelo efula l’olongo. Ɔsɔ ekɔ mɛtɛ tshondo ya lɔtɛngɔ! Sho mbeyaka dia Jehowa ekɔ Shɛso ka ngandji. Etena katataso hemɔ kɛmɔtshi ka wolo kana kavushaso lakiso ɔmɔtshi la ngandji, sho hatosha pondjo Nzambi kaso onongo. Koko, tekɔ la mbetawɔ dia lushi lɔmɔtshi nde ayosembola akambo. Sho koka mbutɛ onto tshɛ layotohokamɛ dia Jehowa ekɔ Nzambi ka ngandji. Dui sɔ mboshaka diaaso dia nde nkondja okadimwelo wa dimɛna wa mbisha ɔnɛ lawɔnyɔla.​—Tok. 27:11.

10. Kakɔna katosholɛ Osambo 22:23, 24 lo dikambo dia Jehowa?

¹⁰ Woho wasowa ekambi ande wa ngandji. Jehowa ekɔ Nzambi ka kɛtshi. Nde halange tooka talela l’ɔtɛ wakikɛso asui, oyadi ɛhɛnyɔhɛnyɔ, hemɔ kana wandja aso. (Adia Osambo 22:23, 24.) Jehowa mbokaka paa kokaso. Nde nangaka kinya ndo nde ayokinya. (Ɛdika la Etombelo 3:7, 8; Isaya 63:9.) Lushi layokoka lele nde “ayokitola asɔyi tshɛ oma lo washo [aso], nyɔi hatoyala nto, otanda hatoyala nto, delo hatoyala nto, kaanga kandji hatoyala nto.”​—Ɛny. 21:4.

11. Ngande wayaoka Jehowa lo kɛnɛ kendana l’ekambi ande wa kɔlamelo wakavu?

¹¹ Nyɔi k’angɛnyi ande. Ngande wayaoka Jehowa lo kɛnɛ kendana l’apami la wamato wa kɔlamelo wakavu? Nde nomɔlomɔka dia mbaɛna nto. (Jɔbɔ 14:15) Onde wɛ koka nkanyiya kandji kakoke Jehowa lam’akavu Abrahama w’ɔngɛnyi ande? (Jak. 2:23) Kana Mɔsɛ, ɔnɛ lele nde akatɛkɛtaka la nde “elungi l’elungi”? (Eto. 33:11) Ndo nde ekɔ lo nomɔlomɔ dia mboka Davidɛ nde l’amembi w’esambo akina wemba esambo awɔ w’amɛna wa lotombo! (Os. 104:33) Kaanga mbele angɛnyi wa Nzambi asɔ wekɔ lo ndala djɔ lo nyɔi, Jehowa  hawaohɛ. (Isa. 49:15) Nde mbohɔka kiambokambo tshɛ yendana la lonto lawɔ. Lo yoho mɔtshi, “lo ndjela kanyi yande, vɔ tshɛ wekɔ lo nsɛna.” (Luka 20:38, nɔtɛ) Lushi lɔmɔtshi, nde ayowaolola oma lo nyɔi, ndo nde ayoka nto alɔmbɛlɔ awɔ w’oma k’ɛse otema ndo ayetawɔ ɔtɛmwɛlɔ awɔ. Naka wɛ akavusha onto ɔmɔtshi lokayɛ ngandji, kete tokanyi tɔsɔ takosambe ndo takokeketsha.

12. Kakɔna kaleka nyangiya Jehowa lo nshi y’ekomelo ya kɔlɔ nyɛ?

¹² Anto wa kɔlɔ wekɔ lo nsoya anto akina. Etena kakatatɛ ɔtɔmbɔkwɛlɔ l’Ɛdɛna, Jehowa akeyaka di’akambo wayoleka ntshɔ otsha lo kɔlɔ la ntondo ka vɔ ndjolowana. Jehowa petshaka awui wa kɔlɔ, awui wa wɛngiya, ndo awui wa ngala weta l’andja ɔnɛ ɛlɔ kɛnɛ. Nde mbokaka nshi tshɛ amɛnyi mfɔnu kɛtshi, mbuta ate anto wele wɔdu, anto wele bu l’ekokelo, ana wa tshike ndo wadi waki edo. (Zɛk. 7:9, 10) Jehowa ndekaka nyanga etena kɛnande ekambi ande wa kɔlamelo wasoyama ndo wadjama lo nkanu. Nyonge l’eshikikelo dia nde nyolangaka nyu tshɛ wanɛ wakikɛ kaamɛ la nde.

13. Naa lɔkɛwɔ la sɔnyi lɛna Nzambi lele l’anto, ndo kakɔna kayondosala lo dikambo sɔ?

¹³ Olanelo wa lɔkɛwɔ lele la nkumbo k’anto. Satana nangaka ndanya lɔkɛwɔ l’anto wakatongama l’efanelo ka Nzambi. Etena kakɛnyi Nzambi “dia kɔlɔ k’anto kaki efula” lo nshi ya Nɔa, “Jehowa akanyange l’ɔtɛ wakandatonge anto la nkɛtɛ ndo otema ande waki la lɔkɔnyɔ.” (Eta. 6:5, 6, nɔtɛ,  11) Ntatɛ oma l’etena kɛsɔ, onde awui wamboleka ndowana? Ndooko! Diabolo ngɛnangɛnaka etena kɛnande woho wambofulanɛ weho tshɛ w’awui wa mindo wa dieyanelo, mbidja ndo dieyanelo dia lam’asa pami la womoto ndo pami la pami kana womoto la womoto. (Ɛf. 4:18, 19) Satana ngɛnangɛnaka lo yoho ya laande, etena kakɔshande atɛmɔdi wa mɛtɛ wa Jehowa lo pɛkato. Etena kayokoma solo dia lotutsha dia Jehowa l’ekomelo, nde ayɛnya dia nde petshaka awui wa mindo lo minya wanɛ tshɛ wasala awui wa kɔlɔ, koko hawolange ntshikitana.

14. Kakɔna kasala onto la nkɛtɛ kakatonge Nzambi?

¹⁴ Anto wekɔ lo ndanya nkɛtɛ kakandatonge. Onto hakomɛ tsho lo ‘mbolɛ wonyande onto dia mbosalɛ kɔlɔ,’ koko nde ekɔ lo ndanya nkɛtɛ ndo nyama yakatonge Jehowa ndo yakandasha onto ɔkɛndɛ wa ndjikokɛka. (Ond. 8:9; Eta. 1:28) Waa nomb’ewo mɔtshi mbutaka di’ɛnɔnyi engana oma lanɛ, l’ɔtɛ wa kɛnɛ kasala anto, miliyɔ ɔtɔi ka weho * wa nyama ndo w’esongo wayoshila. Aha la taamu, vɔ wekɔ lo mbuta di’andja ɔnɛ wekɔ l’ofukutanu! Diɛsɛ ko, Jehowa akalake dia “ndanya wanɛ walanya nkɛtɛ” ndo nkadimola nkɛtɛ k’otondo paradiso.​—Ɛny. 11:18; Isa. 35:1.

15-16. Kakɔna kahomba totshutshuya dia mbikikɛ kaamɛ la Jehowa? Sha ɛnyɛlɔ.

¹⁵ Ohokanyiya ekakatanu tshɛ wambokikɛ Shɛso lele l’olongo l’edja k’ɛnɔnyi nunu. (Enda kiombo yele l’ɔtɛ a dui ɔnɛ: “ Awui wakikɛ Jehowa.”) Jehowa kokaka nkomiya dikongɛ di’akambo dia kɔlɔ nɛ etena tshɛ kalangande. Koko solo diande dia lotutsha diambonga tshondo y’ɔtshɔkɔ le so! Tɔshi ɛnyɛlɔ kɛnɛ: Ohɔsa dia wambotɛ pami kɛmɔtshi nde la wadɛnde di’ɔnawɔ lahatotɔ ekɔ l’ekakatanu wa wolo wa lo demba ndo ɔnɛ nde hongaki pondjo la lɔsɛnɔ la dimɛna ndo ɔnɛ nde ayovɔ esadi. Koko ambutshi wambɔngɛnangɛna etena kambotɔ ɔna, kaanga mbewɔ l’okakatanu dia mbokokɛ. Ngandji kokawɔ ɔnɔsɔ kambatshutshuya  dia mbikikɛ okakatanu akɔna tshɛ l’oyango wa nkimanyiya ɔnakɔ dia monga la lɔsɛnɔ loleki dimɛna.

¹⁶ Woho akɔ waamɛ mbele, tokanula tshɛ ta Adama l’Eva mbotɔka anto wele keema kokele. Koko, Jehowa mbaokaka ngandji ndo ndjakiyanyaka dikambo diawɔ. (1 Jni. 4:19) Ndo otshikitanyi l’ambutshi w’anto wa lo ɛnyɛlɔ kaso, Jehowa kokaka nsala dui dimɔtshi lo kɛnɛ kendana la dikambo sɔ. Nde akashikikɛ datɛ diayondonya hemɔ tshɛ yasoya anto wakatongama. (Mat. 24:36) Shi ngandji kande pombaka totshutshuya dia mbikikɛ kaamɛ la nde l’edja tshɛ kele dui sɔ ohomba?

17. Ngande watokeketsha ɛtɛkɛta wa lo Hɛbɛru 12:2, 3 wendana la Yeso dia ntetemala mbikikɛ?

¹⁷ Jehowa ekɔ ɛnyɛlɔ ka kokele ka ekikelo. Yeso akatondoya dia mbokoya ekikelo ka She. Oko onto, Yeso akakikɛ ɛtɛkɛta wa kɔlɔ, sɔnyi ndo otamba w’asui lo dikambo diaso. (Adia Hɛbɛru 12:2, 3.) Ɛnyɛlɔ ka Jehowa kendana la ekikelo kakasha Yeso wolo wa mbikikɛ. Tɔ kokaka tosha ndo sho wolo wa mbikikɛ.

18. Ngande watokimanyiya 2 Petero 3:9 dia nshihodia etombelo wambonga la solo dia lotutsha dia Jehowa?

¹⁸ Adia 2 Petero 3:9. Jehowa mbeyaka etena koleki dimɛna ka nkomiya andja ɔnɛ wa kɔlɔ. Solo diande dia lotutsha diambokimanyiya dia ntshumanya olui a woke w’anto, wele waya miliyɔ efula wɔɔtɛmɔla ndo wootombola. Vɔ tshɛ wekɔ l’ɔngɛnɔngɛnɔ l’ɔtɛ wakakikɛ Jehowa polo ndo vɔ mbotɔ, mbeka dia mbooka ngandji, ndo ndjakimɔ le nde. Etena kayofuta Jehowa miliyɔ y’anto wa l’atei aso wayokikɛ polo l’ekomelo difuto di’efula, mbayɛnama dia Jehowa aki mɛtɛ la shadiya dia mbikikɛ.

19. Kakɔna kahombaso ndjashikikɛ dia nsala, ndo ɛtshɔkɔ akɔna wayotokondja?

¹⁹ Sho kondjaka wetshelo oma le Jehowa lo woho wa mbikikɛ l’ɔngɛnɔngɛnɔ. Oyadi ekakatanu ndo asui akɔna wambela Satana, Jehowa ekɔ nshi tshɛ “Nzambi k’ɔngɛnɔngɛnɔ.” (1 Tim. 1:11) Woho akɔ waamɛ mbele, sho koka nama ɔngɛnɔngɛnɔ aso etena kakongɛɛso la solo dia lotutsha tshɛ dia Jehowa nkidia lokombo lande, nyindja lowandji lande, minya awui tshɛ wa kɔlɔ ndo ekakatanu tshɛ wele la so ɛlɔ kɛnɛ. Nyɛsɔ toyashikikɛ dia mbikikɛ ndo dia nkondja ekeketshelo kaya lo mbeya dia ndo Shɛso lele l’olongo mbakikɛ. Naka sho nsala ngasɔ, kete ɛtɛkɛta wayela ɛnɛ, wayokotshama le ɔmɔmɔ wa l’atei aso. “Ɔngɛnɔngɛnɔ le onto latetemala mbikikɛ ehemba, nɛ dia lam’ayondetawɔma oma le Nzambi, nde ayolongola dɛmbɔ dia nkoso dia lɔsɛnɔ diakalake Jehowa wanɛ watetemala mbooka ngandji.”​—Jak. 1:12.