1-2. Kumbi layizgu la pa Yesaya 65:16, 17, lititiwovya wuli kuti tileki kuwere vuli?

UNGANU wachigaŵa wa 2017, wenga ndi mutu wakuchiska ukongwa wakuti, “Mungaweriyanga Vuli Cha!” Unganu uwu, ungukonkhoska vo tingachita kuti tikunthiyengepu asani tikumana ndi masuzgu. Pajumpha vyaka vinayi sonu kutuliya po tinguchitiya unganu uwu. Kweni mpaka sonu, techekukunthiyapu masuzgu mucharu chiheni ichi.

² Kumbi mwakumana ndi masuzgu wuli pambula kuswera yapa? Kumbi munthu wa mubanja linu pamwenga mubwezi winu wakutayika? Pamwenga mungutamapu matenda ngakofya ukongwa? Kumbi musuzgika chifukwa chakuti mukota? Kumbi mungukwaskika ndi masoka ngachilengedu, vivulupi pamwenga kutombozgeka? Pamwenga musuzgika chifukwa cha matenda nge mulili wa COVID-19? Titiyilindizga mwakunweka nyengu yo masuzgu ngosi ngazamuja kuti ngamaliya limu. Tazakungakumbuka cha kweniso ngazamuchitika so cha!—Ŵerengani Yesaya 65:16, 17.

3. Kumbi tikhumbika kuchitanji pasonu panu, nanga ntchifukwa wuli?

³ Umoyu ngwakusuzga ukongwa mu nyengu yinu ndipu panyaki kunthazi tingazikumana ndi masuzgu ngakulu ukongwa kuluska ngenanga. (Mate. 24:21) Mwaviyo, tikhumbika kusazgiyaku kukunthiyapu kwidu. Chifukwa wuli? Chifukwa Yesu wangukamba kuti: “Asani mwazamukunthiyapu, mwazamutaska umoyu winu.” (Luka 21:19) Kuŵanaŵaniya mo ŵanthu anyaki afiskiya kukunthiyapu masuzgu ngakuyanana ndi ngo tikumana nangu, kungatichiska kuti nasi tikunthiyengepu.

4. Ntchifukwa wuli tingakamba kuti Yehova ntchakuwoniyapu chamampha ukongwa pa nkhani yakukunthiyapu?

⁴ Kumbi ndiyani yo ntchakuwoniyapu chamampha ukongwa pa nkhani yakukunthiyapu? Yehova Chiuta. Kumbi venivi vakuziziswa? Mutenere kuti mwazizwa kweni asani mungaŵanaŵaniyapu fundu yeniyi, mungazizwa cha. Dyaboli ndiyu walamuliya charu  ichi ndipu chikuzaza ndi masuzgu. Yehova we ndi nthazi zakumalisiya masuzgu pasonu panu, kweni iyu walindizga zuŵa lo wazamuchitiya venivi kunthazi. (Aro. 9:22) Pasonu panu, Chiuta widu walutirizga kukunthiyapu mpaka po nyengu yakuŵikika yikwaniyengi. Tiyeni tikambiskani vinthu 9 vo Yehova wakunthiyapu.

5. Kumbi zina laku Chiuta lifipiskika wuli, nanga yimwi mutuvwa wuli ndi venivi?

⁵ Kufipiskika kwa zina laki. Yehova watanja zina laki ndipu wakhumba kuti weyosi walitumbikengi. (Yesa. 42:8) Kweni kwa vyaka pafufupi 6,000, zina laki lamampha laja lichinyozeka. (Salimo 74:10, 18, 23) Zina lenili lingwamba kunyozeka mumunda wa Edeni pa nyengu yo Dyaboli (zina lo ling’anamuwa kuti “Waboza”) wangukamba kuti Chiuta wanguŵanola chinthu chinyaki Adamu ndi Heva cho akhumbikiyanga kuti akondwengi. (Gene. 3:1-5) Kutuliya pa nyengu yeniyi, Yehova waja wachimbika mulandu waboza kuti watiŵanola chinthu chakukhumbikiya ukongwa ŵanthu. Yesu wangukwaskika chifukwa chakuti ŵanthu alinyozanga zina la Awisi. Ndichu chifukwa chaki iyu wangukambiya akusambira ŵaki kuti apempherengi kuti: “Awusefwi akuchanya, zina linu litoweseki.”—Mate. 6:9.

6. Ntchifukwa wuli Yehova wazomereza kuti pajumphi nyengu yitali wechendalongo kuti iyu ndiyu wakwenere kulamuliya kuchanya ndi pacharu chapasi?

⁶ Wasuskika kuti ngwakwenere cha kulamuliya chilengedu chosi. Yehova pe ndiyu wakwenere kulamuliya kuchanya ndi charu chapasi ndipu ulamuliru waki ngwamampha ukongwa. (Chivu. 4:11) Kweni Dyaboli wangwesesa kulandizga angelu kweniso ŵanthu kuti aŵanaŵanengi kuti Chiuta ngwakwenere cha kulamuliya. Pakhumbikanga nyengu kuti tiziŵi kuti Yehova ndiyu wakwenere kulamuliya ndipuso kuti iyu ndiyu wakulamuliya wamampha ukongwa. Mphakuvwika kuti Chiuta wazomereza kuti ŵanthu ajilamuliyi kwa nyengu yitali kuti awoni kuti angajilamuliya umampha cha ŵija asani aleka kuvwiya Mlengi. (Yere. 10:23) Chifukwa cha kuzizipizga kwaku Chiuta, nkhani yakukayikiya kuti Yehova ndiyu wakwenere kulamuliya yazamumaliya limu. Ŵanthu wosi azamuziŵa kuti ulamuliru waku Yehova ndiwu wamampha ukongwa ndipuso kuti Ufumu waki pe ndiwu ungazisa chimangu chayichu kweniso kuvikilirika pacharu chapasi.

7. Kumbi mbayani wo agarukiya Yehova, nanga wazamuchitanji nawu?

⁷ Kugaruka kwa ŵana ŵaki anyaki. Yehova wangulenga angelu kweniso ŵanthu akufikapu. Kweni pavuli paki, Satana (zina lo ling’anamuwa kuti “Wakususka”) yo ndi mungelu wakugaruka, wanguchitiska kuti Adamu ndi Heva wo ŵenga ŵanthu akufikapu agarukiyi Yehova. Angelu anyaki kweniso ŵanthu, nawu so angugaruka. (Yuda 6) Pati pajumpha nyengu, chinanga ndi mtundu wa Ayisirayeli, wo ŵenga ŵanthu akusankhika ndi Chiuta, angumukana ndipu angwamba kusopa achiuta aboza. (Yesa. 63:8, 10) Yapa, Yehova wanguwona kuti amuchitiya chinyengu. Kweni iyu waja wachikunthiyapu ndipu walutirizgengi kukunthiyapu mpaka pa nyengu yo wazamutuzgiyapu akugaruka wosi. Pavuli paki, Yehova ndi ateŵeti ŵaki akugomezgeka, azamukondwa chifukwa azamukunthiyapu so cha chinthu chiheni chechosi cha mucharu ichi!

8-9. Kumbi ndi maboza nanga ngo ŵanthu akamba ngakukwaskana ndi Yehova, nanga isi tingachita wuli?

⁸ Maboza ngaku Dyaboli. Satana wangukamba kuti mteŵeti waku Yehova Yobu kweniso ateŵeti anyaki wosi aku Yehova akugomezgeka, asopa Chiuta chifukwa cha mbunu. (Yobu 1:8-11; 2:3-5) Dyaboli walutirizga kuchita venivi mazuŵa nganu. (Chivu. 12:10) Tingalongo kuti Satana ngwaboza asani tikunthiyapu mayeseru kweniso tilutirizga kuja akugomezgeka kwaku Yehova chifukwa chakuti titimuyanja. Nge mo Yehova wangutumbikiya Yobu, nasi watitumbikengi asani tikunthiyapu.—Yako. 5:11.

⁹ Satana wagwiriskiya ntchitu alongozgi a visopa vaboza kuti akambengi kuti Yehova  ngwankhaza ndipuso kuti ndiyu wachitiska masuzgu ngo ŵanthu akumana nangu. Ndipu anyaki akamba kuti asani ŵana ŵafwa, ndikuti Chiuta ndiyu waŵato chifukwa wakhumba angelu anandi kuchanya. Uku nkhumunyoza kukulu ukongwa Chiuta! Kweni isi tiziŵa kuti Yehova Mbada achanju. Asani tatama matenda ngakulu pamwenga munthu yo tamuyanjanga watayika, titumba mulandu Chiuta cha. Mumalu mwaki, tigomezga kuti zuŵa linyaki wazamuchizga ŵanthu wo atama kweniso wazamuyuska akufwa. Tingakambiya weyosi fundu yeniyi yo wangavwisiya kuti Yehova ndi Chiuta wachanju. Pavuli paki, Yehova wangamumuka yo watimunyoza.—Nthanthi 27:11.

10. Kumbi Salimo 22:23, 24, livumbuwanji vakukwaskana ndi Yehova?

¹⁰ Masuzgu ngo ateŵeti ŵaki akugomezgeka akumana nangu. Yehova ndi Chiuta walisungu. Iyu wakondwa cha kuvwa kuti tiliya chifukwa cha masuzgu ngo tikunthiyapu nge kutombozgeka, matenda pamwenga kuleka kufikapu. (Ŵerengani Salimo 22:23, 24.) Yehova waziŵa urwirwi wo tituvwa. Iyu wakhumba kuwumalisa ndipu wazakuwumalisa nadi. (Yeruzgiyani ndi Ekisodo 3:7, 8; Yesaya 63:9.) Nyengu yituza yo iyu “wazamuleska masozi ngosi mumasu [mwidu], ndipu nyifwa yazamuŵaku so cha. Kwazamuŵavi kuliya, kukuta pamwenga urwirwi.”—Chivu. 21:4.

11. Kumbi Yehova wasoŵanji kwa ateŵeti ŵaki akugomezgeka wo akufwa?

¹¹ Kulekana ndi mabwezi ngaki ngo ngatufwa. Kumbi Yehova watuvwa wuli chifukwa cha anthulumi ndi anthukazi akugomezgeka wo akufwa? Iyu wakhumbisiska kuziŵawona so! (Yobu 14:15) Aŵanaŵaniyani ŵaka mo Yehova wamusoŵe mubwezi waki Abrahamu! (Yako. 2:23) Pamwenga ŵanaŵaniyani so mo Yehova wamusoŵe Mozesi, yo walongoronga nayu “pa masu ndi pa masu.” (Eki. 33:11) Kweniso iyu wakhumbisiska kuzivwa Davidi ndipuso ŵanthu anyaki wo angulembaku buku la Masalimo, achimba sumu zawu zamampha zakumuthamika! (Salimo 104:33) Chinanga kuti mabwezi ngaku Chiuta  ngenanga ngakufwa, kweni Yehova wakungaluwa cha. (Yesa. 49:15) Iyu wakumbuka chechosi chakukwaskana ndi yiwu. Tingakamba ŵaka kuti “kwaku iyu wosi watiŵawona kuti mbamoyu.” (Luka 20:38, mazu ngamumphata) Zuŵa linyaki, wazakuŵayuska ndipu wazamuvwisiya so mapempheru ngawu ngakutuliya pasi pa mtima kweniso kuzomereza kusopa kwawu. Asani yimwi mubali winu wakutayika, fundu izi zingakupembuzgani.

12. Kumbi ndi vinthu wuli vo vichitiska kuti Yehova wasuzgikengi ukongwa maŵanaŵanu mazuŵa nganu ngakumaliya?

¹² Ŵanthu aheni akandirizga anyawu. Ŵanthu ŵati ayamba ŵaka kugaruka mu Edeni, Yehova wanguziŵa kuti vinthu vazamunangika ukongwa vechendayambi so kuja umampha. Yehova watinkha vinthu viheni, vinthu vambula urunji kweniso viwawa vo vichitika mucharu mazuŵa nganu. Nyengu zosi iyu watiŵaŵanaŵaniya ŵanthu wo awoneka kuti alivi wakuŵawovya. Mwakuyeruzgiyapu, waŵanaŵaniya ŵanthu wo mbakulopwa kweniso wo angajivikiliya cha ŵija, nge ŵana alanda kweniso vyoko. (Zeka. 7:9, 10) Yehova wasuzgika ukongwa maŵanaŵanu asani wawona ateŵeti ŵaki akugomezgeka akandirizgika kweniso aŵikika mujeri. Mungakayikiyanga cha kuti watikuyanjani mosi yimwi mukunthiyapu nayu limoza.

13. Kumbi Chiuta wawona kuti ŵanthu achita jalidu liheni nili, nanga iyu wazamuchitanji?

¹³ Ŵanthu achita ureŵi. Satana wakondwa kuchitiska kuti ŵanthu wo akulengeka mu chikozgu chaku Chiuta achitengi mijalidu yiheni. Chiuta wati wawona “kuti uheni wa ŵanthu wenga ukulu” mu nyengu yaku Nowa, “Yehova wanguchita chitima kuti wangupanga ŵanthu pacharu chapasi ndipu vingumupweteka ukongwa mumtima.” (Gene. 6:5, 6, 11) Kumbi vinthu vasintha kutuliya pa nyengu yeniyi? Awa! Dyaboli wakondwa kuwona kuti ureŵi wa mtundu wewosi uchitika nge kugonana kwa pakati pa anthukazi ndi anthulumi, anthulumianthulumi pe kweniso anthukazianthukazi pe. (Aefe. 4:18, 19) Satana wakondwa ukongwa asani wachitiska kuti ateŵeti aku Yehova achiti ubudi ukulu. Asani Yehova wazileka kukunthiyapu, wazamulongo kuti watinkha ureŵi mwakutuzgapu ŵanthu wosi wo aleka kusintha.

14. Kumbi ŵanthu achitanji nachu charu kweniso vinyama?

¹⁴ Ŵanthu ananga charu. Munthu “wapweteka munthu munyaki pakumulamuliya” kweniso watichiphwere cha charu ndi vinyama vo Yehova wakulenga vo wakupaska ŵanthu kuti aviphweriyengi. (Waku. 8:9; Gene. 1:28) Asayansi anyaki akamba kuti vyaka va pambula kuswera, vo ŵanthu achita vingachitiska kuti mitundu ya vinyama kweniso vakume yakujumpha 1 miliyoni yimali. Mphakuvwika kuti ŵanthu afipa mtima ndi vo vichitikiya chilengedu. Tiwonga ukongwa kuti Yehova watilayizga kuti ‘wazamunanga wo ananga charu chapasi’ ndipu iyu wazakuchisintha kuti chije paradayisu.—Chivu. 11:18; Yesa. 35:1.

15-16. Kumbi ntchinthu wuli cho chitenere kutichitiska kuti tikunthiyengepu limoza ndi Yehova? Kambani chakuyeruzgiyapu.

¹⁵ Aŵanaŵaniyani masuzgu ngosi ngo Awusefwi akuchanya aja achikunthiyapu kwa vyaka masauzandi nganandi. (Wonani bokosi lakuti “ Vinthu vo Yehova Wakunthiyapu.”) Nyengu yeyosi, Yehova wangamalisa vinthu viheni vo vichitika mu nyengu yinu. Kweni kukunthiyapu kwaki kwatiwovya ukongwa! Ŵanaŵaniyani chakuyeruzgiyapu ichi. Yeruzgiyani kuti banja linyaki alikambiya kuti mwana yo abalengi wazamukuŵa ndi masuzgu ngakulu ndipu umoyu wa mwana yo wazamukuŵa wakusuzgikiya ukongwa kweniso wazamukufwa weche munamana. Chinanga kuti yiwu aziŵa kuti azamusuzgika ukongwa chifukwa cha mwana yo, kweni angalindizga mbwenu kuti waweku. Chifukwa chakuti yiwu atimuyanja mwana wawu, akunthiyapu masuzgu ngosi ngo akumana nangu ndi chilatu chakuti amuphwere umampha.

 ¹⁶ Mwakuyanana ŵaka, mphapu yosi yaku Adamu ndi Heva, yituwa yambula kufikapu. Kweni Yehova watiŵayanja mbwenu ndipu watiŵaphwere. (1 Yoha. 4:19) Ndipu mwakupambana ndi apapi wo taŵakamba muchakuyeruzgiyapu, Yehova wangamalisa masuzgu nga ŵana ŵaki. Iyu wakuŵika nyengu yo wazamumalisiya limu masuzgu ngosi ngo ŵanthu akumana nangu. (Mate. 24:36) Mwaviyo, chanju chaku Yehova chitenere kutichitiska kuti nasi tikunthiyengepu asani mphakwenere.

17. Mwakukoliyana ndi Aheberi 12:2, 3, kumbi vo Yesu wanguchita vititichiska wuli kuti nasi tilutirizgi kukunthiyapu?

¹⁷ Yehova ntchakuwoniyapu chamampha ukongwa pa nkhani yakukunthiyapu. Yesu wangufiska kuyezga Awisi pa nkhani yakukunthiyapu. Pa nyengu yo wenga pacharu chapasi, Yesu wangukunthiyapu kunyoza kwa ŵanthu, vinthu vakuchitiska soni kweniso chimiti chakutombozgekiyapu chifukwa chaku isi. (Ŵerengani Aheberi 12:2, 3.) Tikayika cha kuti chakuwoniyapu chaku Yehova pa nkhani yakukunthiyapu, chingumupaska nthazi Yesu kuti nayu wakunthiyengepu. Ndipu nasi chingatipaska so nthazi

18. Kumbi lemba la 2 Peturo 3:9, lititiwovya wuli kuziŵa vo vachitika chifukwa chakukunthiyapu kwaku Yehova?

¹⁸ Ŵerengani 2 Peturo 3:9. Yehova waziŵa nyengu yamampha yakumalisiya charu chiheni ichi. Kukunthiyapu kwaki, kwawovya kuti a mzinda ukulu awunganiskiki ndipu a mzinda ukulu ŵenaŵa wo alipu mamiliyoni nganandi atimusopa kweniso kumuthamika. Yiwu akondwa kuti Yehova wakunthiyapu kwa nyengu yitali kuti abaliki, asambiri kumuyanja ndipuso ajipereki kwaku iyu. Vazamuwoneke limu kuti Yehova wanguchita umampha kukunthiyapu pa nyengu yo wazamutumbika ŵanthu mamiliyoni nganandi wo akunthiyengepu mpaka pakumaliya!

19. Kumbi titenere kusimikiza mtima kuchitanji, nanga tazamutumbikika wuli?

¹⁹ Tisambira kwaku Yehova mo tingakunthiyapu mwalikondwa. Chinanga kuti Satana wachitiska masuzgu, kweni Yehova walutirizga mbwenu kuja “Chiuta walikondwa.” (1 Timo. 1:11) Nasi tingalutirizga kukondwa po tilindizga Yehova mwakuzikira kuti wazitowesi zina laki, wazilongo kuti ndiyu wakwenere kulamuliya, wazimalisi vinthu vosi viheni kweniso kuzimalisa masuzgu ngosi ngo tikumana nangu pasonu panu. Tiyeni tisimikizi mtima kuti tikunthiyengepu kweniso kupembuzgika pakuziŵa kuti Awusefwi akuchanya nawu akunthiyapu. Asani tikunthiyengepu, mazu yanga ngazamufiskika kwaku isi: “Ngwakukondwa munthu yo walutirizga kukunthiyapu mayeseru, chifukwa asani wazomerezeka wazamulonde chisoti cha umoyu, chenicho Yehova wakulayizga ŵanthu wo alutirizga kumwanja.”—Yako. 1:12.