1-2. Gitumbiso gi gomogo omu nya libhuku la Isaya 65:16, 17, gi nga hi phasa kharini gu simama gu timiseya?

“U NGA DIGI GU TIMISEYA!” owu wu diri hungo nya mahungo nya kongresu nya 2017. Longoloko wu yeyedzide edzi hi nga timiseyago khidzo sigaradzo sathu. Kala muhuno gu vbindride 4 myaga, ganiolu ethu hi ngu gu simama gu timiseya.

² Nga dundrugeya khu sigaradzo u tshanganidego naso matshigwanaya. Adzina u fedwe khu givbango nya ndranga mwendro pari u yi golago ngudzu. Mwendro adzina momo madwali ma vegidego womi wago mhangoni. Ina u ngu emisana ni gigaradzo nyo dandre khu tanga? Ina u pharidwe khu ndziya nya mba yadi, gu wugedwa mwendo gu thegedwa khu mhango nya tumbunugo? U ngu tshaniseka khu kotani nya tungo nya COVID-19 mwendro mambe madwali? Hi virede khu maho nyo fuviye litshigu leli sigaradzo sesi si na fuviswago nigu gima kha hi nanga si dundruga gambe! — Leri Isaya 65:16, 17.

3. Ginani hi yedego gu gira olu nigu khu ginani?

³ Womi tigoni momo wu ngu lemeya nigu ga matshigu ma landreyago adzina si na lomba gu hi timiseya sigaradzo nya sikhongolo. (Mat. 24:21) Khu kharato, hi yede gu simama gu timiseya. Khu ginani? Kholu Jesu a di khuye: “Khu gu timisela gwanu, mu na vbanyisa mihefemulo yanu.” (Luka 21:19) Gu dundrugeya khu vambe va si kodzidego gu timiseya sigaradzo nya nga esi sathu si na hi phasa nethu gu timiseya.

4. Khu ginani hi ganeyago gu khethu Jehovha giyeyedzo nya gyadi nya gutimiseye?

⁴ Khu mani a gu giyeyedzo nya gyadi nya gu timiseye? Khu Jehovha Nungungulu. Si ngu gu hlamadzisa? Dundrugeya khesi: Litigo leli lo fumedwa khu Dhiyabulosi nigu li tade khu sigaradzo. Jehovha a na ni tshivba nya gu fuvise sigaradzo sesi khu gitepwana basi, ganiolu uye a gu vireya litshigu a li vegisidego gasi a gira  isoso. (Rom. 9:22) Na li si gu vbohi litshigu leli, ginani egi Uye a girago? A gu simama gu timiseya. Hi na wona 9 sigaradzo esi Jehovha a si timiseyago.

5. Lina la Nungungulu li nyenyezisidwe kharini nigu wa gu dzipwa kharini khu isoso?

⁵ Lina laye li nyenyeziswa. Jehovha a ngu gola lina laye nigu o vbweta gu khuye vathu vatshavbo va li ninga githavo. (Isa. 42:8) Ambari ulolo, gu ngu vbindra 6 dzimiliyoni nya myaga lina laye nya ladi na li gu nyenyeziswa. (Ndzi. 74:10, 18, 23) Isoso si phede thembweni ga Edheni tepo Dhiyabulosi (si thulago “Mupfhadzedzeyi”) a nga singedza Nungungulu khuye kha vbweti gu ninga Adhamu ni Evha silo si na va ningago litsako. (Gen. 3:1-5) Gu khugeya avbovbo, Jehovha o singedzwa gu mba ninga vathu esi va si vbwetago. Jesu garadzegide ngudzu tepo a nga wona lina la Papayi waye na li gu nyenyeziswa. Khu kharato, uye hevbudzide vapizani vaye khuye: “Papayi wathu u guromo Ndzadzini, lina lago li na agiswe.” — Mat. 6:9.

6. Khu ginani Jehovha a digago tepo nyo laphe yi vbindra na si yeyedzi gu khuye na ni fanelo nyo fume ndzadzini ni mafuni?

⁶ Nya vangi va ngu wugeya Nungungulu ni Wufumu waye. Jehovha khuye a gu ni fanelo nyo fume ndzadzini ni mafuni nigu uye a ngu yiti ndziya nya yadi nyo fume. (Gutu. 4:11) Ganiolu, Dhiyabulosi zamide gu gira dzingilozi ni vathu va pimisa gu khavo Nungungulu mwalo fanelo yoyo. Mahungo ma gimbileyanago ni Wufumu mwendro fanelo nyo fume ya Nungungulu na ma sa kodzega gu lulamiswa khu litshigu limwedo. Nungungulu dzumelede vathu va fuma khu tepo nyo laphe gasi va wona gu khavo kha va nanga dugeleya va gu mba engisa Muvangi wawe. (Jer. 10:23) Khu kotani nya gulaphise monyo ga Nungungulu, mwalo ni moyo a na kanakanago gu khuye Nungungulu na ni fanelo nyo fume ndzadzini ni mafuni nigu vatshavbo va na dziti gu khavo mafumelo ya Jehovha khyadi ngudzu nigu Mufumo waye basi wu na resago gurula ni gu khadzisega mafuni.

7. Khu mani a nga wugeya Jehovha nigu ginani egi Jehovha a na girago khu isoso?

⁷ Simbe sanana saye kha sa mu engisa. Jehovha vangide dzingilozi ni vathu na va vbelede. Ganiolu, ngilozi mweyo yi di wugeya Nungungulu yi khala Sathane (si thulago “Muwugeyi”) a bwe a kutsedzeya Adhamu ni Evha vathu nyo vbeleye, gu anavo va wugeya Jehovha. Dzimbe dzingilozi ni vathu, anavo va dzi patide avba nyo wugeye Nungungulu. (Judha 6) Khu gimbiya nya tepo, ambari Vaisrayeli ava va nga ba va hathidwe khu Nungungulu, vambe va kona va mu pfhurarede va ya khozeya vanungungulu nya malipha. (Isa. 63:8, 10) Khu kharato, Jehovha a diri ni gighelo nyo dzipwe na kanganyisidwe. Ambari ulolo, Jehovha o timiseya kala li vboha litshigu a na fuvisago vatshavbo va gu mba mu engisa. Isoso si na reseya litsako nya likhongolo Jehovha gumogo ni vale va tumbegago gwaye va timiseyago guvivba nya litigo leli.

8-9. Khu yavbi malipha nyo khaguri ya Dhiyabulosi nigu ethu hi nga gira ginani?

⁸ Malipha ya Dhiyabulosi. Sathane singedzide Joba ni simbe sithumi nyo tumbege sa Jehovha gu khuye vo mu thumeya khu gu vbweta gu wuyedwa khu gilo nyo khaguri. (Joba 1:8-11; 2:3-5) Kala muhuno Sathane kha ema gu singedza vathu gu khuye vo thumeya Nungungulu khu gu vbweta gu wuyedwa khu gilo nyo khaguri. (Gutu. 12:10) Ethu hi nga gira gipandre gyathu gasi gu yeyedza gu khethu Sathane muliphi. Ho gira isoso khu gu timiseya sigaradzo hi simama hi tumbega ga Jehovha nigu hi yeyedza gu khethu hi ngu mu haladza. Ha gu pimedzeya giyeyedzo gya Joba nya gutimiseye anethu hi na kategiswa. — Jak. 5:11.

⁹ Sathane o thumisa vathangeyi nya wukhongeyi nya malipha gasi va ganeya gu khavo Jehovha vivbedwe khu monyo nigu khuye a hi  vangeyago gutshaniseka. Tepo gu fago gyanana, vambe vakona vari khavo khu Nungungulu a nga gi dzega kholu yi di gu vbwetega yimbe ngilozi ndzadzini. Igyogyo givalo nya gikhongolo ngudzu ga Jehovha. Ethu hi ngu dziti gwadi gu khethu Jehovha Papayi nya lihaladzo. Tepo hi emisanago ni madwali nya makhongolo mwendro gu fedwa khu muthu hi mu haladzago, kha hi ningi nandru Nungungulu wathu. Wulangani nya isoso ethu hi ngu khodwa gu khethu litsigu limwedo, Jehovha a na fuvisa madwali ni gu wusa ava va fudego. Hi nga embeya ni wevbini a dzinago gu hi engiseya gu khethu Jehovha, Nungungulu nya lihaladzo. Khu kharato, hi na phasa Jehovha gu ninga hlamulo nya wadi wule a mu hembululago. — Mav. 27:11.

10. Ginani egi Ndzimo 22:23, 24, yi hi hevbudzago khu Jehovha?

¹⁰ Gutshaniseka nya sithumi saye. Jehovha a ngu pweya wusiwana sithumi saye. Uye kha tsaki khu gu hi wona na hi gu tshaniseka khu kotani nya gu wugedwe, madwali mwendro gu mba vbeleya gwathu. (Leri Ndzimo 22:23, 24.) Jehovha a ngu pwisisa guvbisa hi gu pwago, uye o vbweta gu vbedza guvbisa hi gu pwago nigu a na gira isoso. (Fananisa ni Ekisodha 3:7, 8; Isaya 63:9.) Nugunugu, “Uye a na va bavbula marongo mahoni gwawe, kholu gima kha gu na manega gambe gufa, gulila gu na vbela, ni gudilela ni wuvi.” — Gutu. 21:4.

11. Jehovha o dzipwa kharini khu dzipari dzaye dzi fudego?

¹¹ Gufa ga dzipari dzaye. Jehovha a gu dzipwa kharini khu dzipari dzaye dzi fudego? Uye a ngu suva gu dzi wona gambe! (Joba 14:15) Nga dundrugeya edzi Jehovha a suvago khidzo gu wona pari yaye Abrahama. (Jak. 2:23) Mwendro Mosi a nga ba a ganeya naye “khovbe ni khovbe”. (Ekiso. 33:11) Ni edzi a suvago khidzo gupwa Dhavidhe ni vambe vaembeleyi nya dzindzimo na mu embeleleya dzindzimo nya gu dhumise! (Ndzi. 104:33) Ambari olu sithumi  sesi nyo tumbege si fudego, Jehovha kha si divala. (Isa. 49:15) Uye a ngu dundruga satshavbo maningano ni makhaleleo yawe. Bhibhiliya yari khiyo: “Ga Nungungulu vatshavbo va ngu vbanya.” (Luka 20:38) Litshigu limwedo, Jehovha a na va wusa va vbanya gambe, a na si kodza gu engiseya milombelo yawe yi khugeyago monyoni a bwe a dzumeya wukhozeyi wawe. Gu dundruga dziponto dzedzi, dzi na gu thaveleya wa gu ba u fedwe khu muthu u mu golago.

12. Ginani gi gu mba tsakisa Jehovha matshiguni yaya nyo hegise?

¹² Vathu nyo vivbedwe khu monyo va tshanisago vambe. Tepo wuvivbi wu nga pheya Edheni, Jehovha adi gu dziti gu khuye giemo gi di hadzi engedzeya guvivba na yi nga si vbohi tepo nya gu si lulamiswa. Jehovha kha tsaki khu gu wona litigo na li tade khu wuvivbi, gu mba lulama ni wughevenga. Jehovha tepo yashavbo a ngu khathala ngudzungudzu khu vale va vbedego tshivba ni vale va gu mba kodza gu dzi vhikeya, nya nga ava va fedwego khu vavelegi ni dzinoni. (Zak. 7:9, 10) Matshiguni yathu, egi gi si tsakisigo Jehovha gu wona sithumi saye nyo tumbege na si gu tshaniswa ni gu khotedwa mapasoni. Tiyisegani gu khenu Jehovha a ngu mi haladza enu mwatshavbo mu simamago gu timiseya nga uye.

13. Litigo lomo ga giemo muni nyo nyenyeze nigu ginani egi Jehovha a na girago?

¹³ Litigo li tade khu wubhayi. Satahane a ngu dziti gu khuye vathu va giridwe khu mufananiso wa Nungungulu, khu kharato uye a ngu gola gu va gireya silo nyo vivbe. Matshiguni ya Nowa, tepo Jehovha a nga “wona gukhuye gughoha ga vathu gu diya na gu engedzelana tigoni khu tshivba ni tshivba,” uye “a di dzi laya kholu a nga girago muthu, a di swihala ngudzu.” (Gen. 6:5, 6, 11) Ina giemo gi vbindrugedzide? Ne vbadugwana! Sathane a gu tsaka khu gu wona vathu na vari ga giemo gegi nyo nyenyeze, yatshavbo mafumbu nya wubhayi ma olovelegide, gani wa gu girwa khu mwama ni nyamayi mwendro khu vathu nya sivbango nya wuvelegi nyo fane. (Efes. 4:18, 19) Uye gambe a ngu tsaka ngudzu a gu gira githumi gimwegyo gya Jehovha gi gira gighoho nya gikhongolo. Ambari ulolo, gu laphisa monyo ga Jehovha gu ngu hegedwa nigu nugunugu a na yeyedza gu khuye a ngu nyenya wubhayi khu gu fuvisa vatshavbo ava va si vbwetigo gu vbindrugedza mavbanyelo yawe.

14. Ginani egi vathu va girago khu mafu ni sirengo?

¹⁴ Vathu va gu ghoheteya esi Nungungulu a vangidego mafuni. Nungungulu rumide vathu gu khathaleya esi uye a si vangidego. Ganiolu, muthu “a gu fumela mumbe muthu gasi gu mu tshanisa” a tshanisa sirengo a bwe a ghoheteya mafu. (Muh. 8:9; Gen. 1:28) Vasiyentista vari khavo tanga nya miliyoni nya sirengo yi na mwalalega khu mahungo nya vathu. Si ngu pwala gu khu ginani vathu va garadzegago khesi si dugeleyago! Hi ngu tsaka khu guti gu khethu Jehovha a na mbembisa “vale va saselago litigo” a bwe a vbindrugedza mafu ma khala paradhesi. — Gutu. 11:18; Isa. 35:1.

15-16. Ginani gi hi kutsago gu timiseya gumogo ni Jehovha? Ninga giyeyedzo.

¹⁵ Nga dundrugeya khu satshavbo esi Papayi wathu wa ndzadzini a si timiseyago khu mazanazana nya myaga. (Wona kwadru yi gu khiyo “ Esi Jehovha a timiseyago.”) Jehovha a di hadzi vbedza sigaradzo sesi ni yevbini tepo. Ganiolu, uye a gu timiseya nigu isoso si ngu hi phasa ngudzu! Nga dundrugeya khu gipimaniso gegi. Patwa wu vireyago gibhebhetana wa gu embedwa khu dhogodheya gu pwani gyanana gyawe gi di hadzi manega ni madwali nya ma khongolo nigu kha gi na nga vbanya tepo nyo laphe. Ganiolu, vavelegi va gu tsaka tepo gyanana gi velegwago ambari olu si na va garadzeyago gu gi sayisa. Khu kotani nya lihaladzo va gu nalo khu gyanana gyawe, avo va gu timiseya ni gevbini gigaradzo  gasi gu phasa gyanana gyawe gu vbanya womi nya wadi.

¹⁶ Gufana ni gyanana gile, sanana sa Adhamu ni Evha so velegwa na sa sa vbeleya. Ambari ulolo, Jehovha a gu si khathaleya khu lihaladzo. (1 Joh. 4:19) Ganiolu, gu na ni guhambana nyo khaguri ga vavelegi va khumbugidwego avba nya gipimaniso ni Jehovha. Jehovha a na ni makhodzelo nyo vbedze sigaradzo satshavbo si tshanganago ni sanana saye nigu khu lihaladzo vegiside litshigu nya gu a gira isoso. (Mat. 24:36) Lihaladzo la Jehovha la gu hi kutsa gu timiseya naye kala mahegiso.

17. Giyeyedzo gya Jesu gi gomogo omu ga Vahebheru 12:2, 3, gya gu hi kutsa gu simama gu timiseya khu ndziya muni?

¹⁷ Jehovha giyeyedzo nya gyadi nya gu timiseye. Nigu Jesu pimedzede gwadi giyeyedzo gya Papayi waye. Khu kotani nya lihaladzo laye khethu, Jesu timisede malito nyo paye monyo, dzitshoni ni gu khokhothedwa avba nya simbo nya tshanisa tepo a nga ba ari mafuni. (Leri Vahebheru 12:2, 3.) Khu lisine, giyeyedzo gya Jehovha nya gu timiseye gi ningide tshivba Jesu nya gu timiseye. Nigu gi ngu hi tiyisa nethu.

18. Guya khu 2 Pedro 3:9, khu yevbini mihandro nya yadi yi reswago khu gu laphisa monyo ga Jehovha?

¹⁸ Leri 2 Pedro 3:9. Jehovha a ngu yiti tepo nya ydi nyo fuvise litigo leli nyo vivbe. Khu kotani nya gulaphise monyo ga Papayi wathu wa ndzadzini, vathu nya vangi va manide lithomo nya guvelegwe va hevbula khuye va bwe va hendzeledza womi wawe gwaye. Vathu vovo muhuno, va gu gira gipandre nya gitshungu nya gikhongolo nigu va gu bonga Nungungulu kholu a simamago a timiseya. Tepo dzimiliyoni nya vathu dzi na gu ba dzi timisede kala mahegiso dzi na hakhago tshatshazelo, si na wonega guagani gu khiso Jehovha giride gwadi khu gu ba a hungide gu laphisa monyo!

19. Hi yede gu dzi emiseya gu gira ginani nigu tshatshazelo muni hi na wu manago?

¹⁹ Giyeyedzo gya Jehovha gya gu hi hevbudza gu timiseya na hi tsakide. Ambari olu Sathane a vangago gutshaniseka ni wuvi, Jehovha a ngo simama gu khala “Nungungulu nyo tsake.” (1 Thim. 1:11) Khu ndziya nyo fane anethu hi nga simama na hi tsakide tepo hi vireyago gu khethu Jehovha a agisa lina laye, a emeya Wufumo waye, a fuvisa guvivba gwatshavbo ni sigaradzo hi tshanganago naso muhuno. Dzi emiseye gu timiseya nigu gima u nga divale gu khuwe Papayi wathu wa ndzadzini anuye a gu timiseya. Ha gu gira isoso, moyo ni moyo wathu a na pwisisa edzi malito ma gomogo omu ga Jakobe 1:12 ma gu lisine khidzo, ma gu khayo: “Kategide muthu a timiselago gu lingwa kholu, hwane nya gu na lingidwe, a na hakha gihugu nya guvbanye gi nga tumbiswago khu Pfhumu ga vale va mu golago.”