1, 2. ¿Tuku xlakata tamalaknun nema min kʼIsaías 65:16, 17 kinkamakgtayayan chuntiya natayaniyaw?

«¡NI KATAXLAJWANI!». Wa uma xtítulo xwanit asamblea regional kata 2017. Programa kinkamasiyanin la tlan natayaniyaw tuku tuwa titaxtuyaw. Titaxtunita akgtati kata chu chuntiya tayanimaw tuku tuwa kʼuma kakilhtamaku.

² ¿Tuku taʼakglhuwit kgalhinitaw nina makgas? Max patimaw xlakata nilh chatum tiku xalak kifamiliajkan o chatum amigo, max kgalhiyaw akgtum lixkajnit tajatat, linawa kata, max milh tuku masputunalh kkinkachikinkan, max kinkatlawanikan tuku nitlan, max kinkaputsastalanimakan o patimaw xlakata anan tajatat xla COVID-19. ¿Ni xlikana pi lakaskinaw pi xchilh kilhtamaku akxni xtitaxtulha putum uma? Nikxni katilakapastakwi putum uma chu na nikxni katilapa (kalikgalhtawakga Isaías 65:16, 17).

3. ¿Tuku kilitlawatkan la uku chu tuku xlakata?

³ Lu tuwa latamakan kʼuma kakilhtamaku, chu max kkilhtamaku nema aku mima natitaxtuyaw tuku tlakg tuwa (Mat. 24:21). Wa xlakata talakaskin chuntiya nakatsiniyaw la natayaniyaw. Jesús lichuwinalh tuku xlakata chuna kilitlawatkan akxni wa: «Xlakata natayaniyatit [...], namakglhtinanatit milatamatkan» (Luc. 21:19). Pulaktum tuku nakinkamakgtayayan natayaniyaw wa nalilakpuwanaw la amakgapitsin tayanikgo tuku tuwa titaxtukgo nema xtachuna akinin titaxtuyaw.

4. ¿Tuku xlakata wanaw pi Jehová wa tlakg xatlan liʼakxilhtit xlakata tayanikan?

⁴ ¿Tiku tlakg xatlan liʼakxilhtit xlakata tayanikan? Jehová. Komo kaks kinkamalakawaniyan kalilakpuwaw uma. Uma kakilhtamaku litsama taʼakglhuwit xlakata wa Akgskgawini akgchipanit. Jehová tlan xmalakgsputulh la uku, pero kgalhima akgtum  kilhtamaku nema xla lakkaxwilinit (Rom. 9:22). Xlakata nina chin uma kilhtamaku, xla chuntiya tayanima. Kaʼakxilhwi pulaknajatsa tuku chuntiya tayaninit asta la uku.

5. ¿La maxkajwikanit xtukuwani Dios chu la mamakgkatsiniyan uma?

⁵ Maxkajwika xtukuwani. Jehová paxki xtukuwani chu lakaskin pi putum xmaxkikgolh kakni (Is. 42:8). Pero lata 6,000 kata maxkajwikanit xtukuwani (Sal. 74:10, 18, 23). Putum kilhtsukulh kjardín xla Edén akxni Akgskgawini (nema wamputun «tiku wan taʼakgsanin») limawakalh Dios pi ni xkamaxkiputun Adán chu Eva tuku xmaklakaskinkgo xlakata xpaxuwakgolh (Gén. 3:1-5). Lata amacha kilhtamaku limawakakanit taʼakgsanin Jehová. Wankanit pi ni kamaxki latamanin tuku xlikana maklakaskinkgo. Jesús lu xlilakgaputsa pi tlakg xmaxkajwika xtukuwani xTlat. Wa xlakata kamasiyanilh kstalaninanin nawankgo kxʼoracionkan: «KinTlatkan tiku wilapi kʼakgapun katamasantujlilh mintukuwani» (Mat. 6:9).

6. ¿Tuku xlakata Jehová mastanit talakaskin pi natitaxtu lhuwa kilhtamaku xlakata nalimasiya pi kajwatiya xla lakgchan namapakgsinan?

⁶ Lakatakika chuna la mapakgsinan. Kajwatiya Jehová lakgchan namapakgsinan kʼakgapun chu kKatiyatni, chu wa tlakg xatlan mapakgsina tiku anan (Apoc. 4:11). Pero Akgskgawini tlawaputunit pi ángeles chu latamanin nalakpuwankgo pi Dios ni lakgchan namapakgsinan. Xlakata tlan nakatsikan pi kajwatiya Jehová lakgchan namapakgsinan, uma nalin kilhtamaku. Malakatsukina, limasiyanit liskgalala akxni mastanit talakaskin pi latamanin xʼakstukan nakamapakgsikan lhuwa kilhtamaku, xlakata liwana natasiya pi komo ni kuenta tlawanikgo nitlan katikakitaxtunilh (Jer. 10:23). Xlakata Dios xakgalhkgalhina, tlan nakatsikan tiku xlikana lakgchan namapakgsinan. Niti katiwa pi xla ni lakgchan mapakgsinan kʼakgapun chu kKatiyatni. Liwana natasiya pi xla tlakg xatlan mapakgsina chu pi kajwatiya xTamapakgsin nalimin xaxlikana takaksni kKatiyatni chu nialh katiʼanalh tuku namakgapekuanan.

7. ¿Tiku lakatakikgonit Jehová, chu tuku nakatlawani?

⁷ Makgapitsi xkamanan lakatakikgolh. Akxni Jehová katlawalh ángeles chu latamanin ni xkgalhikgo talakgalhin. Pero ángel tiku lakatakilh Dios, tiku wanikan Satanás (nema wamputun «lakatayana») tlawalh pi Adán chu Eva, tiku na ni xkgalhikgo talakgalhin, xlakatakikgolh Jehová. Amakgapitsi ángeles chu amakgapitsi latamanin na lakatakikgolh Dios (Jud. 6). Titaxtulh kilhtamaku, makgapitsi tiku xtapakgsikgo kkachikin Israel, akgtum kachikin nema xlaksaknit Dios, lakgmakgankgolh chu tsukukgolh kakninanikgo nixaxlikana dioses (Is. 63:8, 10). Wa xlakata, Jehová makgkatsilh pi xmakgxtakgkanit. Pero chuntiya tayaninit chu chuntiya natayani asta akxni nachin kilhtamaku akxni nakamasputu putum tiku lakatakikgonit. Uma lu tlan nakamamakgkatsini xlakskujnin tiku ni makgxtakgkgo, tiku na chuntiya tayanimakgolh tuku nitlan anan kʼuma kakilhtamaku.

8, 9. ¿Tuku taʼakgsanin limawakakan Jehová, chu tuku tlawayaw akinin?

⁸ Lhuwa xtaʼakgsanin Akgskgawini. Akxni Satanás limawakalh Job tuku ni xlikana, wamputulh pi putum xlakskujnin Dios skujnanikgo xlakata wi tuku makglhtinamputunkgo (Job 1:8-11; 2:3-5). Xla chuntiya wan uma taʼakgsanin asta la uku (Apoc. 12:10). Tlan nalimasiyayaw pi Satanás xaʼakgsanina komo natayaniyaw tuku tuwa chu ni namakgxtakgaw Jehová xlakata paxkiyaw. Chuna la Jehová sikulunatlawalh Job, na nakinkasikulunatlawayan komo natayaniyaw (Sant. 5:11).

⁹ Satanás kalimaklakaskin xpulalinanin  nixaxlikana takanajla xlakata nawankgo pi Jehová lixkajnit likatsi chu wa lin kuenta xlakata anan lhuwa tapatin kkakilhtamaku. Chu, akxni niy chatum skgata, makgapitsi asta wankgo pi Dios lilh xlakata xmaklakaskima achatum ángel kʼakgapun. ¡Limawakakgo Jehová tuku lu nitlan! Pero akinin katsiyaw xaxlikana. Wa xlakata, akxni lu tatatlayaw o niy tiku lu paxkiyaw nikxni limawakayaw Dios. Wata kanajlayaw pi akgtum kilhtamaku namapanu tuku kinkamakgapatinanan. Putum tiku nakinkakgaxmatniyan tlan nawaniyaw pi Dios, chatum Dios xapaxkina. Chu chuna Jehová tlan nakgalhti tiku limawakama tuku nitlan (Prov. 27:11).

10. ¿Tuku kinkamasiyaniyan Salmo 22:23, 24 xlakata Jehová?

¹⁰ Xtapatinkan xlakskujnin tiku lu kapaxki. Jehová xalakgalhamanina Dios. Wa xlakata nitlan limakgkatsi akxni akxilha pi patinanaw, xlakata kinkaputsastalanikanan, tatatlayaw o xlakata kintalakgalhinkan (kalikgalhtawakga Salmo 22:23, 24). Xla makgkatsi kintakatsanajwatkan. Masputuputun, chu chuna natlawa (katamalakxtupi Éxodo 3:7, 8; Isaías 63:9). Nachan kilhtamaku akxni namakgantaxti uma tamalaknun: «Nakaxakani putum xlakgpixtajatkan, chu nialhti katinilh, nialhti katilipuwa, nialhti katitasalh, nialhti katikatsanajwalh» (Apoc. 21:4).

11. ¿Tuku makgkatsi Jehová akxni kalilakpuwan xlakskujnin tiku ni makgxtakgkgo chu nikgonita?

¹¹ Chuna la nikgo xʼamigos. ¿Tuku makgkatsi Jehová akxni kalilakpuwan lakchixkuwin chu lakpuskatin tiku ni makgxtakgkgolh chu nikgonita? Lu kaʼakxilhputumpara (Job 14:15). ¿Tlan lilakpuwanaw pi lu akxilhputuna Abrahán, xʼamigo? (Sant. 2:23) ¿O Moisés, tiku lakaʼakxilhli akxni xtachuwinan? (Éx. 33:11). Chu la kgaxmatniputumpara David chu amakgapitsi salmistas chuna la xkilhtlinikgo (Sal. 104:33).  Maski umakgolh xʼamigos nikgonita, xla chuntiya kalakapastaka (Is. 49:15). Jehová liwana lakapastaka chuna la xlikatsikgo «xlakata kxlakatin putum staknamakgolh» (Luc. 20:38). Nachin kilhtamaku nakamaxkipara xlatamatkan chu namakgamakglhtinampara xʼoracioneskan nema xtlawakgo xliputum xnakujkan chu xatapaxuwan namakgamakglhtinan xtakakninkan. ¿Ni xlikana pi uma lu tlan kinkamamakgkatsiniyan putum tiku makgatsankganitaw kkalinin tiku xkapaxkiyaw?

12. ¿Tuku lilakgaputsa Jehová kʼuma xaʼawatiya kilhtamaku niku litsama tuku nitlan?

¹² Tuku nitlan katlawanikgo amakgapitsi latamanin tiku lixkajnit likatsikgo. Akxni lakatakika Jehová kjardín xla Edén, xla xkatsi pi tlakg xʼama anan taʼakglhuwit akxni nina xlakkaxtlawakan uma. Xla xkajni tuku nitlan, tuku ni xaʼakgstitum chu akxni latlawanikan tuku nitlan. Ankgalhin kalilakgaputsanit tiku ni lakgtliwakgan; akgtum liʼakxilhtit, tiku taxlajwanikgonit chu nila xʼakstukan tamakgtayakgo, chuna la tiku ni kgalhikgo xnatlatnikan chu nikgonita xchixkukan (Zac. 7:9, 10). Liwaka lilakgaputsa akxni akxilha pi nitlan kalikatsinikan xlakskujnin tiku ni makgxtakgkgo chu katamaknukan kpulachin. Tiku tayanipatit chuna la Jehová, liwana kakatsitit pi xla kapaxkiyan.

13. ¿La akxilha Jehová talakgxtumit xalimaxana, chu tuku natlawa nialh makgas kilhtamaku?

¹³ Taliwakanit talakgxtumit xalimaxana. Latamanin kinkamalakatsukikanitan chuna la likatsi Dios, pero Satanás lakgati katlawaw tuku nitlan. Kxkilhtamaku Noé, «Jehová akxilhli pi tuku nitlan xtlawakgo lakchixkuwin xtalhuwima», «nitlan limakgkatsilh xlakata xmalakatsukinit chixku kkatiyatni; chu lu katsanilh xnaku» (Gén. 6:5, 6, 11, nota). Chu la uku, ¿tlakg tlan wi kakilhtamaku? Ni, nichuna. Akgskgawini lu lakgati pi talhuwinit talakgxtumit xalimaxana, chuna la chatum puskat tatalakgxtumi xtapuskat o chatum chixku tatalakgxtumi xtachixku (Efes. 4:18, 19). Chu lu lipaxuwa akxni chatum kskujni Jehová tlawa akgtum talakgalhin. Jehová liwana nalimasiya pi xkajni putum talakgxtumit xalimaxana akxni nakamalakgsputu putum tiku ni lakgpaliputunkgo xlatamatkan.

14. ¿Tuku tlawanimakgo latamanin Katiyatni chu animales?

¹⁴ Chuna la malakgsputumaka Katiyatni nema malakatsukinit. Chixku ni kajwatiya «akgchipanit chixku xlakata natlawani tuku nitlan», wata na ni kuenta tlawanit Katiyatni chu animales chuna la Jehová xlakaskin pi xtlawalh (Ecl. 8:9; Gén. 1:28). Makgapitsi científicos wankgo pi kkilhtamaku nema aku mima, latamanin namalakgsputukgo lhuwa mil animales chu tuwan kaj xlakata tuku tlawamakgolh. ¡Wa xlakata lu lilakgaputsamakgolh! Lu paxtikatsiniyaw Jehová pi nakamalakgsputu «tiku malakgsputumakgolh katiyatni» chu akgtum paraíso natlawa uma Katiyatni (Apoc. 11:18; Is. 35:1).

15, 16. ¿Tuku nakinkamakgpuwantiniyan akxtum natatayaniyaw Jehová? Kalichuwinanti akgtum liʼakxilhtit.

¹⁵ Kalilakpuwaw putum taʼakglhuwit nema tayaninit akglhuwa mil kata kinTlatkan xalak akgapun (kaʼakxilhti recuadro « Tuku Jehová tayanima»). Jehová tlan lakapala xmalakgsputulh uma xalixkajnit kakilhtamaku. Pero xlakata Jehová kgalhkgalhinan, ¡lu litamakgtayanitaw! Kalilakpuwaw uma liʼakxilhtit. Kalilakpuwaw akgtum tamakgaxtokgat nema nakgalhikgo aktsu kskgatakan, kawanikan pi xatatatla nalakachin chu pi ni makgas katilatamalh. Maski umakgolh natlatni katsikgo pi lhuwa taʼakglhuwit nakgalhikgo, xatapaxuwan makgamakglhtinankgo kskgatakan akxni lakachin.  Xlakata paxkikgo kskgatakan tayanikgo putum taʼakglhuwit nema titaxtukgo chu makgtayakgo xlakata tlakg tlan nakitaxtuni.

¹⁶ Xtachuna uma, putum xkamanan Adán chu Eva lilakachinaw talakgalhin. Maski chuna, Jehová kinkapaxkiyan chu kinkakuentajtlawayan (1 Juan 4:19). Pero Jehová wi tuku tlan tlawa kimpalakatakan, tuku natlatni nema kalichuwinaw nila tlawakgo. Lakkaxwilinita kilhtamaku xlakata namasputu putum tuku nitlan titaxtumakgolh xkamanan (Mat. 24:36). ¿Ni xlikana pi xlakata paxkiyaw Jehová na tayaniputunaw putum kilhtamaku nema talakaskin?

17. ¿Tuku xlakata kinkamakgpuwantiniyan natayaniyaw tuku wan Hebreos 12:2, 3 xpalakata Jesús?

¹⁷ Jehová wa tlakg xatlan liʼakxilhtit xlakata la tayanikan. Chu Jesús liwana stalanilh xliʼakxilhtit. Akxni xlama unu kKatiyatni, Jesús tayanilh kimpalakatakan laklixkajnit tachuwin, chuna la likgalhkgamananka chu la xtokgowakaka kkgantum kiwi (kalikgalhtawakga Hebreos 12:2, 3). Xlikana pi xliʼakxilhtit xTlat makgtayalh xlakata natayani. Uma na tlan nakinkamatliwakglhan.

18. ¿La kinkamakgtayayan 2 Pedro 3:9 naʼakgatekgsaw tuku kitaxtuma xlakata Jehová kgalhkgalhinan?

¹⁸ (Kalikgalhtawakga 2 Pedro 3:9). Jehová katsi tuku kilhtamaku tlakg tlan nawan xlakata namasputu uma xalixkajnit kakilhtamaku. Xlakata kgalhkgalhinan, la uku lhuwa millones latamanin skujnanimakgolh chu malankimakgolh. Putum umakgolh latamanin paxtikatsinikgo Jehová xlakata asta la uku tayaninit chu chuna tlan lakachinkgolh, katsinikgonit la napaxkikgo chu makamaxkikgonit xlatamatkan. Akxni kimputumkan namakglhtinanaw kintatlajakan xlakata tayaniw asta kxlisputni, liwana nalimasiya Jehová pi tlan tuku tlawanit xlakata tayaninit.

19. ¿Tuku lakapastaknitaw natlawayaw, chu tuku tatlaja namakglhtinanaw?

¹⁹ Xliʼakxilhtit Jehová kinkamasiyaniyan xatapaxuwan natayaniyaw xlakata xla watiya «xapaxuwana Dios» litaxtu, maski Satanás lhuwa takatsanajwat chu tapatin malakatsukinit (1 Tim. 1:11). Na tlan nalimasiyayaw tapaxuwan chuna la kgalhkgalhimaw pi kachilh kilhtamaku akxni Jehová namasantujli xtukuwani, nalimasiya pi wa lakgchan namapakgsinan chu namasputu tuku nitlan chu kintaʼakglhuwitkan. Chuntiya kalakapastakwi natayaniyaw chu kaputsaw takgoxamixat akxni lilakpuwanaw pi kinTlatkan xalak akgapun na tayanima. Komo chuna natlawayaw, nalikgantaxtu kimpalakatakan umakgolh tachuwin: «Paxuwa ama chixku tiku tayani akxni titaxtuma tuku tuwa, xlakata akxni Dios tlan naʼakxilha, namakglhtinan tatlaja xla latamat, nema Jehová kamalaknunilh tiku chuntiya paxkikgo» (Sant. 1:12).