1-2. Olsem wanem tok bilong Jehova i stap long Aisaia 65:16, 17 i strongim yumi long no ken givap?

“NO KEN GIVAP!” em naispela tim bilong 2017 rijinel kibung bilong yumi. Dispela program i stori long hau yumi ken sanap strong taim ol hevi i painim yumi. Nau em 4-pela yia i go pinis, na yumi wok long sanap strong yet na karim ol hevi long dispela taim nogut bilong nau.

² Yu wok long karim wanem ol hevi long nau? Wanpela long famili o pren bilong yu i dai? Yu bin kisim wanpela bikpela sik we klostu yu lusim laip bilong yu? Yu karim hevi bilong go lapun? Yu karim hevi long netrol disasta, o pait o pasin birua i kamap long hap bilong yu? O yu karim hevi bilong wanpela bikpela sik, olsem COVID-19 pendemik? Yumi laik tru long lukim dispela taim we olgeta dispela samting bai pinis, na yumi bai lusim tingting olgeta long ol dispela samting na ol bai i no inap kamap gen.—Ritim Aisaia 65:16, 17.

3. Yumi mas mekim wanem long nau, na bilong wanem?

³ Laip long dispela taim nau i gat ol hatwok bilong en, na ating yumi inap karim wanpela bikpela hevi tru long bihain. (Mat. 24:21) Olsem na yumi mas strongim pasin bilong yumi long sanap strong na karim ol hevi. Wai? Bikos Jisas i tok: “Pasin bilong yupela long sanap strong bai mekim na yupela i holimpas laip bilong yupela.” (Luk 21:19) Taim yumi tingim hau ol narapela i sanap strong na karim ol hevi wankain olsem ol hevi bilong yumi, dispela bai strongim yumi long sanap strong na karim hevi.

4. Wai na yumi ken tok olsem Jehova em i nambawan gutpela eksampel long pasin bilong sanap strong na karim ol hevi?

⁴ Husat em nambawan gutpela eksampel long pasin bilong sanap strong na karim hevi? God Jehova. Yu kirap nogut long dispela bekim? Ating yu bai kirap nogut, tasol sapos yu skelim gut,  yu bai kliagut. Dispela graun i stap aninit long kontrol bilong Devil na i pulap long planti hevi tru. Jehova i gat strong long pinisim olgeta dispela hevi wantu tasol, maski i olsem, em i wetim wanpela haptaim i kamap bihain na bai em i ken mekim olsem. (Rom 9:22) Long nau, God bilong yumi i wok long sanap strong na karim ol hevi i go inap long dispela taim em i makim i kamap. Yumi ken skelim 9-pela hevi em Jehova i sanap strong na karim.

5. (a) Long wanem rot Satan i bagarapim gutnem bilong God? (b) Yu pilim olsem wanem long dispela?

⁵ Satan i bagarapim gutnem bilong God. Jehova i laikim nem bilong em na em i laik bai olgeta man i rispektim nem bilong em. (Ais. 42:8) Tasol inap 6 tausen yia, Satan i bin bagarapim gutnem bilong God. (Sng. 74:10, 18, 23) Dispela samting i bin kirap long gaden Iden taim Devil (mining bilong en, “Man Bilong Krungutim Gutnem Bilong Narapela”) i sutim tok long God olsem em i pasim Adam na Iv long kisim sampela samting em ol i nidim bilong stap amamas. (Stt. 3:1-5) Kirap long dispela taim, ol i sutim tok giaman long Jehova olsem em i no givim sampela samting em ol man i nidim bilong stap amamas. Jisas i no amamas long dispela tok giaman ol i sutim long nem bilong Papa bilong em. Olsem na em i skulim ol disaipel bilong em long beten olsem: “Papa bilong mipela long heven, nem bilong yu i mas i stap holi.”—Mat. 6:9.

6. Wai na Jehova i larim bikpela haptaim i lus bambai em i ken kamapim klia olsem em i gat rait long mekim wok bos?

⁶ Planti i sakim God na wok bos bilong Em. Jehova i gat olgeta rait long bosim heven na graun na wei bilong em long mekim wok bos i nambawan tru. (Rev. 4:11) Tasol Devil i giamanim ol ensel na ol manmeri long ting olsem God i no gat rait long mekim wok bos. Bikpela haptaim i mas lus na bai Jehova i ken pruvim olsem em i gat rait long mekim wok bos. God i larim bikpela haptaim i lus na bai ol manmeri i ken lukim olsem taim ol man i laik bosim ol yet na ol i no larim Man Bilong Wokim ol i bosim ol, hevi tasol i save kamap. (Jer. 10:23) God i no les kwik, na em bai stretim dispela hevi. Olgeta man bai save olsem wok bos bilong Jehova tasol em i nambawan, na Kingdom bilong em tasol bai bringim bel isi na gutpela sindaun long graun.

7. Husat lain i sakim Jehova na em bai mekim wanem long ol?

⁷ Sampela pikinini bilong em i sakim em. Jehova i wokim ol pikinini spirit na ol pikinini bilong em long graun i gutpela olgeta. Tasol bihain, wanpela pikinini spirit bilong em, em Satan, (mining bilong en “Birua”) i kirapim Adam na Iv em tupela manmeri i gutpela olgeta long sakim Jehova. Ol narapela ensel na ol manmeri tu i insait long dispela pasin bikhet. (Jut 6) Bihain, ol manmeri bilong lain Israel, em lain God i makim, ol i kirap long sakim em na lotuim ol God giaman. (Ais. 63:8, 10) Jehova i pilim olsem ol i givim baksait long em. Maski i olsem, Em i sanap strong yet na karim hevi, na em bai sanap strong yet i go inap long em i pinisim olgeta bikhetlain. Na dispela bai bringim bikpela amamas long ol manmeri i stap gut long em—em ol manmeri i karim wankain hevi olsem em long dispela haptaim nogut bilong nau!

8-9. (a) Satan i mekim wanem ol tok giaman long Jehova? (b) Yumi ken mekim wanem?

⁸ Ol tok giaman bilong Satan. Satan i sutim tok long gutpela wokman bilong Jehova, em Jop, na em i tok olsem olgeta gutpela wokman bilong Jehova i mekim wok bilong Em bikos ol i tingim ol yet. (Jop 1:8-11; 2:3-5) Satan i wok yet long sutim tok giaman long ol manmeri i kam inap long nau. (Rev. 12:10) Yumi ken mekim ol samting bilong pruvim olsem ol tok bilong Satan i giaman long rot bilong sanap strong na karim ol hevi, na wok yet long stap gut long Jehova bikos yumi laikim Em. Olsem Jop, yumi tu bai kisim blesing long pasin bilong yumi long sanap strong na karim hevi.—Jems 5:11.

 ⁹ Satan i yusim ol hetman bilong ol lotu giaman long tok olsem Jehova em man nogut na em i As bilong ol pen na hevi i painim ol manmeri. Sampela i tok, taim ol pikinini i dai, God i kisim bek ol bikos em i nidim sampela moa ensel long heven. Ol i bagarapim tru gutnem bilong God! Tasol yumi save olsem Jehova em i Papa i gat pasin laikim. Taim yumi kisim wanpela bikpela sik o wanpela yumi laikim i dai, yumi no save sutim tok long God bilong yumi. Yumi bilip tru olsem wanpela taim em bai stretim olgeta dispela hevi. Yumi ken tokim ol man yumi autim tok long ol olsem Jehova em God i gat pasin laikim. Long dispela rot, Jehova inap bekim tok long man i sutim tok long em.—Prov. 27:11.

10. Buk Song 22:23, 24 i tok wanem long Jehova?

¹⁰ Ol hevi i painim ol gutpela wokman bilong Em. Jehova em God i gat pasin marimari. Em i save pilim sori tru taim em i lukim yumi krai bikos long ol pen na hevi yumi karim long ol man i birua long yumi, yumi sik, o ol pasin kranki bilong yumi yet. (Ritim Buk Song 22:23, 24.) Jehova i pilim tru ol pen na hevi bilong yumi, na em i laik pinisim, na em bai pinisim. (Skelim Kisim Bek 3:7, 8; Aisaia 63:9.) Wanpela taim bai kamap, “na em bai mekim drai aiwara i stap long ai bilong [yumi], na bai i no gat dai moa, na [yumi] bai i no bel hevi moa na krai moa, na [yumi] bai i no inap pilim pen gen.”—Rev. 21:4.

11. Jehova i pilim olsem wanem long ol gutpela wokman bilong Em i dai?

¹¹ Ol gutpela pren bilong em i dai. Jehova i pilim olsem wanem long ol gutpela wokman na ol gutpela wokmeri bilong Em, em ol i dai? Em i gat bikpela laik tru long lukim ol gen! (Jop 14:15) Jehova i misim tru gutpela pren bilong em Abraham. (Jems 2:23) Na Moses, em man em i save toktok long em “olsem man i save toktok wantaim narapela man.” (Kis. 33:11) Na em i laik tru long harim Devit na ol narapela man bilong raitim song i singim ol naispela song bilong preisim em. (Sng. 104:33) Maski ol dispela pren bilong  em i dai, Jehova i no lusim tingting long ol. (Ais. 49:15) Em i tingim olgeta pasin bilong ol. I olsem, “long tingting bilong em olgeta i stap laip.” (Luk 20:38) Wanpela taim em bai kirapim bek ol, na em bai harim gen ol gutpela beten bilong ol na orait long pasin bilong ol long lotuim em. Sapos wanpela yu laikim tru i dai, ol dispela tok i ken strongim yu na mekim gut bel bilong yu.

12. Wanem samting i save mekim Jehova i bel hevi tru long dispela taim nogut bilong las de?

¹² Ol man nogut i mekim nogut long ol manmeri. Taim pasin bikhet i kirap long gaden Iden, Jehova i save olsem ol samting bai go nogut moa paslain long ol i kamap gutpela gen. Jehova i heitim ol pasin nogut, pasin i no stret, na pasin bilong pait na bagarapim man i stap long graun long nau. Oltaim em i save sori tru long ol man i no gat strong—em ol man i no inap helpim ol yet, ol pikinini i no gat papamama, na ol wido. (Sek. 7:9, 10) Jehova i save bel hevi tru taim em i lukim ol man i mekim nogut long ol gutpela wokman bilong em na kalabusim ol. Yupela i ken save tru olsem em i laikim yupela olgeta husat i sanap strong na karim hevi olsem em.

13. (a) Ol manmeri i mekim wanem stingpela pasin long ai bilong God? (b) God bai mekim wanem bilong stretim dispela hevi?

¹³ Ol manmeri i mekim olkain pasin pamuk. God i wokim ol manmeri long bihainim ol pasin bilong em, tasol Satan i pulim ol manmeri long mekim olkain pasin i no stret. Taim God i “lukim olsem pasin bilong ol manmeri long graun i go nogut tru” long taim bilong Noa, “Jehova i bel hevi bikos long ol man em i bin wokim ol long graun. Na bel bilong em i hevi tru.” (Stt. 6:5, 6, 11) Kirap long dispela taim na i kam, yu ting ol samting i wok long kamap gutpela? Nogat tru! Satan i amamas tru taim em i lukim olkain pasin pamuk i go nogut moa long nau, na dispela i makim tu olkain pasin pamuk namel long man na meri, na man i maritim man, na meri i maritim meri! (Efe. 4:18, 19) Satan i save amamas tru taim wanpela wokman bilong God i mekim bikpela sin. Jehova i heitim tru olkain pasin pamuk na long taim stret em i makim, em bai pinisim olgeta man em ol i no laik senisim pasin bilong ol.

14. Ol man i mekim wanem long graun na ol samting God i wokim?

¹⁴ Ol man i bagarapim graun na ol samting God i wokim. ‘Man i bosim man’ na dispela i bringim hevi tasol, na tu, ol i no lukautim gut graun na animal samting em Jehova i givim ol long lukautim. (Ekl. 8:9; Stt. 1:28) Sampela saveman i givim tok lukaut olsem ol pasin ol man i mekim, dispela inap kilim i dai 1 milion bilong ol samting i gat laip insait long sampela yia bihain. Olsem na em isi long kliagut long as na ol manmeri i wari tru long envairomen! Yumi amamas long tok promis bilong Jehova olsem Em bai “bagarapim ol man i wok long bagarapim graun” na mekim graun olgeta i kamap wanpela ples paradais.—Rev. 11:18; Ais. 35:1.

15-16. Wanem samting inap helpim yumi long sanap strong na karim hevi wankain olsem Jehova? Stori long tok piksa.

¹⁵ Tingim olgeta dispela hevi em Papa bilong yumi long heven i bin karim inap planti tausen yia. (Lukim blok “ Ol Hevi Jehova i Karim.”) Jehova inap pinisim ol pasin nogut bilong graun long wanem taim em i laikim. Tasol pasin bilong em long i no les kwik i helpim yumi! Yumi ken mekim tok piksa long dispela olsem: Tingim tupela marit, meri i gat bel na nau dokta i tokim tupela olsem bebi i stap long bel bilong mama i gat sampela bagarap long bodi, na bai i gat bikpela hatwok long lukautim pikinini taim em i bon, na ating em inap dai. Maski i olsem, papamama i amamas taim bebi i bon, maski ol bai i gat bikpela hatwok long lukautim dispela bebi. Ol i laikim tru bebi bilong ol, olsem na ol i redi long karim olgeta kain hevi bilong lukautim em gut.

 ¹⁶ Wankain olsem, olgeta tumbuna pikinini bilong Adam na Iv ol i no gutpela olgeta taim ol i bon. Maski i olsem, Jehova i laikim ol na tingim ol. (1 Jon 4:19) Na i no olsem tupela papamama long tok piksa, Jehova inap mekim sampela samting bilong pinisim pen na hevi bilong ol. Em i makim pinis taim bilong pinisim olgeta samting i givim pen na hevi long ol manmeri. (Mat. 24:36) Tru tumas, pasin laikim bilong Jehova i mas kirapim yumi long sanap strong na karim hevi wantaim em, maski longpela haptaim i lus long mekim olsem.

17. Olsem wanem stori bilong Jisas i stap long Hibru 12:2, 3 i strongim yumi long sanap yet na karim hevi?

¹⁷ Jehova i stap nambawan gutpela eksampel long pasin bilong sanap strong na karim hevi. Jisas i bihainim pasin bilong Papa bilong em long sanap strong na karim hevi. Taim Jisas i stap olsem man long graun, em i karim hevi long ol tok nogut ol man i mekim long em, ol i semim em, na em i dai long diwai pos bilong helpim yumi. (Ritim Hibru 12:2, 3.) Tru tumas, eksampel bilong Jehova long sanap strong na karim hevi i strongim Jisas long sanap strong na karim hevi. Dispela i ken strongim yumi tu.

18. Olsem 2 Pita 3:9 i kamapim, pasin bilong Jehova long i no les kwik i kamapim wanem samting?

¹⁸ Ritim 2 Pita 3:9. Jehova i save long rait taim bilong pinisim olgeta pasin nogut bilong graun. Pasin bilong em long i no les kwik i opim rot long bikpela lain manmeri inap kisim save long em, na nau planti milion manmeri i lotuim em na preisim em. Olgeta i amamas olsem Jehova i bin sanap strong na karim hevi inap longpela taim, na nau ol inap bon na lain long laikim em na dediket long em. Taim planti milion manmeri i sanap strong i go inap long pinis, dispela bai kamapim klia olsem Jehova i bin mekim rait disisen taim em i no bin les kwik!

19. (a) Yumi mas tingting strong long mekim wanem? (b) Bai yumi kisim wanem blesing?

¹⁹ Yumi kisim skul long Jehova long pasin bilong amamas long sanap strong na karim hevi. Maski Satan i kamapim ol wari na ol pen na hevi, Jehova i stap yet olsem “God bilong amamas.” (1 Tim. 1:11) Yumi tu i ken stap amamas yet taim yumi wetim Jehova long stretim bek gutnem bilong em, kamapim klia olsem em i gat rait long mekim wok bos, pinisim olgeta pasin nogut, na pinisim olgeta hevi yumi karim long nau. Yumi ken tingting strong long sanap strong na kisim bel isi taim yumi save olsem Papa bilong yumi long heven tu i sanap strong na karim ol hevi. Sapos yumi mekim olsem, bai yumi lukim truim bilong dispela tok: “Man husat i wok long sanap strong long taim bilong traim, em i ken amamas. Long wanem, taim God i orait long em, em bai kisim kraun bilong laip, em Jehova i promis long givim long ol man husat i no lusim pasin bilong laikim em.”—Jems 1:12.