1-2. Marito lawa Yehovha a ma vuleke eka Esaya 65:16, 17, ma hi pfuna njhani leswaku hi kota ku tiyisela?

“U NGA KARHALI!” yoleyo a ku ri nhlokomhaka yo tsakisa ya nhlengeletano ya xifundzha ya 2017. Nongonoko wu xaxamete tindlela leti nga hi pfunaka ku tiyisela loko hi ri ni swiphiqo. Se ku hundze malembe ya mune hi dyondze hi swona naswona hi hina lava, hi ya emahlweni hi tiyisela swiphiqo swa vutomi emisaveni leyi yo homboloka.

² Xana i maxangu wahi lawa u bohekeke ku ma tiyisela sweswinyana? Xana u loveriwe hi xaka ra wena kumbe munghana loyi u n’wi rhandzaka? Kumbexana u ni mavabyi lama nga tshungulekiki? Kumbe u langutana ni swiphiqo swa vudyuhari? Kumbe u weriwe hi mhangu ya ntumbuluko, madzolonga kumbe wa xanisiwa? Kumbe u twa ku vava hikwalaho ka mavabyi yo tanihi hi ya COVID-19? Hi wu langutele hi mahlongati nkarhi lowu maxangu wolawo hinkwawo ma nga ta hela ni ku tlhela hi rivala hi wona!—Hlaya Esaya 65:16, 17.

3. Xana hi fanele hi endla yini sweswi naswona hikwalahokayini?

³ Vutomi byi hi cinisa gija emisaveni leyi naswona hi ta boheka ku tiyisela mitlhontlho yo tika ku nga ri khale. (Mat. 24:21) Hi fanele hi ya emahlweni hi dyondza tindlela leti nga hi pfunaka ku tiyisela. Hikwalahokayini? Hikuva Yesu u te: “Loko mi tiyisela mi ta ponisiwa.” (Luka 21:19) Loko hi anakanyisisa hi lava tiyiseleke maxangu yo fana ni ya hina, swi ta hi pfuna leswaku hi kota ku ya emahlweni hi tiyisela.

4. Hikwalahokayini hi nga vulaka leswaku Yehovha i xikombiso lexinene xa ku tiyisela?

⁴ I mani xikombiso lexinene xa ku tiyisela? I Yehovha Xikwembu. Xana sweswo swa ku hlamarisa? Kumbexana, kambe loko u ehleketisisa hi swona a wu nge hlamali. Misava leyi yi le hansi  ka matimba ya Diyavulosi naswona yi tele hi maxangu. Yehovha u ni matimba yo yi herisa kambe wa ha rindzele nkarhi lowu vekiweke. (Rhom. 9:22) Enkarhini wa sweswi, Xikwembu xa hina xa ha ya emahlweni xi tiyisela kukondza ku fika nkarhi lowu xi wu vekeke. A hi buleni hi swilo swa kaye leswi Yehovha a swi tiyiselaka.

5. Xana vito ra Yehovha ri thyakisiwe njhani naswona wena u titwisa ku yini hi swona?

⁵ Ku thyakisiwa ka vito rakwe. Yehovha wa ri rhandza vito rakwe naswona u lava leswaku vanhu hinkwavo va ri xixima. (Esa. 42:8) Kambe eka malembe ya 6 000 lama hundzeke, vito rakwe ri thyakisiwile. (Ps. 74:10, 18, 23) Swi sungule entangeni wa Edeni loko Diyavulosi (leswi vulaka “Mulumbeti”) a hehla Xikwembu hi ku vula leswaku xi tsona Adamu na Evha leswi va swi lavaka leswaku va ta tsaka. (Gen. 3:1-5) Ku sukela kwalaho, Yehovha u hehliwe hi ku tsona vanhu leswi va swi lavaka. Yesu a a twa ku vava hikwalaho ka leswi vito ra Tata wakwe ri thyakisiweke. Hikwalaho ka sweswo, u dyondzise vadyondzisiwa vakwe ku khongela hi ndlela leyi: “Tata wa hina la nga matilweni, vito ra wena a ri kwetsimisiwe.”—Mat. 6:9.

6. I yini lexi endleke Yehovha a rindza ku ringana nkarhi wo leha a nga se teka goza ro kombisa leswaku hi yena ntsena a nga ni mfanelo yo fuma?

⁶ Ku tlhontlhiwa ka vuhosi byakwe. Yehovha hi yena ntsena a nga ni mfanelo yo fuma matilo ni misava naswona swa n’wi fanela hikuva u fuma hi vululami. (Nhlav. 4:11) Kambe Diyavulosi u hambukise tintsumi ni vanhu hi ku va endla va ehleketa leswaku Yehovha a swi n’wi faneli ku fuma. Ku tlhontlhiwa ka vulawuri bya Yehovha a ku nga ta lulamisiwa hi siku rin’we. Kambe hi vutlhari, Yehovha u tshike vanhu va tifuma ku ringana nkarhi wo leha leswaku va vona ndlela leyi va tsandzekaka hayona ku lulamisa swilo loko va nga n’wi yingisi Muvumbi. (Yer. 10:23) Leswi Xikwembu xi lehiseke mbilu, ku nga ri khale xi ta teka goza. Xi ta kombisa leswaku hi xona ntsena xi nga ni mfanelo yo fuma loko ku fuma Mfumo wa xona laha misaveni, lowu nga ta va ni ku rhula ni nsirhelelo wa xiviri.

7. I vamani lava xandzukeleke Yehovha naswona u ta endla yini hi vona?

⁷ Van’wana va vana vakwe va n’wi xandzukela. Yehovha u tumbuluxe vana vakwe lava nga tintsumi ni vanhu va nga ri na xidyoho. Kambe n’wana wakwe Sathana (leswi vulaka “Muhembi”) loyi a a ri ntsumi u n’wi xandzukerile, a tlhela a kucetela Adamu na Evha lava a va nga ri na xidyoho leswaku va xandzukela Yehovha. Hi ku famba ka nkarhi, tintsumi ni vanhu van’wana na vona va landzele Sathana. (Yuda 6) Ntlawa wa Vaisrayele ku nga vanhu lava hlawuriweke hi Yehovha, va xandzukile kutani va sungula ku gandzela swikwembu swa mavunwa. (Esa. 63:8, 10) Va xenge Yehovha. Kambe u tiyiserile naswona wa ha ya emahlweni a endla tano kukondza nkarhi wo herisa vaxandzuki hinkwavo wu fika. Yehovha ni lava va tshembekaka eka yena va ta tsaka ku tiva leswaku a va nge he boheki ku tiyisela loko ku herisiwa misava leyi yo homboloka!

8-9. Hi wahi mavunwa lawa Yehovha a phyarhekiweke wona naswona hi fanele hi endla yini?

⁸ Mavunwa ya Diyavulosi. Sathana u hehle Yobo ni malandza hinkwawo yo tshembeka ya Yehovha hi ku vula leswaku ma gandzela Xikwembu hileswi ma lavaka ku vuyeriwa. (Yobo 1:8-11; 2:3-5) Ninamuntlha Diyavulosi wa ha vula tano. (Nhlav. 12:10) Hi kombisa leswaku Sathana i muhembi loko hi tiyisela miringo hinkwayo ni ku tshama hi tshembekile eka Yehovha hileswi hi n’wi rhandzaka. Ku fana na Yobo, na hina hi ta katekisiwa loko hi tiyisela.—Yak. 5:11.

⁹ Sathana u hlohlotela varhangeri va  vukhongeri bya mavunwa ku vula leswaku Yehovha u ni tihanyi ni leswaku hi yena a endlaka vanhu va xaniseka. Van’wana va vula leswaku loko vana lavatsongo va fa, va tekiwe hi Xikwembu hileswi xi lavaka tintsumi etilweni. Sweswo i ku delela Xikwembu. Kambe hina ha swi tiva leswaku Yehovha i Tatana loyi a nga ni rirhandzu. Loko hi vabya kumbe hi feriwa hi xaka kumbe munghana, a hi soli Xikwembu. Ku hambana ni sweswo, hi ni ntshembo wa leswaku ku nga ri khale xi ta horisa mavabyi ni ku pfuxa vafi. A hi byeleni hinkwavo lava nga ta yingisa leswaku Yehovha i Xikwembu xa rirhandzu. Sweswo swi ta endla a kota ku hlamula loyi a n’wi tlhontlhaka.—Swiv. 27:11.

10. Xana Pisalema 22:23, 24, yi kombisa yini hi Yehovha?

¹⁰ Ku xaniseka ka malandza yakwe lawa a ma rhandzaka. Yehovha i Xikwembu lexi nga ni twela vusiwana. A swi n’wi tsakisi nikatsongo loko a hi vona hi rila hikwalaho ka maxangu lawa hi ma tiyiselaka yo tanihi ku xanisiwa, vuvabyi kumbe xidyoho lexi hi velekiweke na xona. (Hlaya Pisalema 22:23, 24.) Yehovha u twa ku vava loko vanhu va xaniseka, u lava ku swi herisa naswona ku nga ri khale u ta endla tano. (Ringanisa Eksoda 3:7, 8; Esaya 63:9.) Nkarhi wa ta lowu a nga ta “sula mihloti hinkwayo ematihlweni ya vona, rifu a ri nge he vi kona, hambi ku ri nkosi, ku rila ni switlhavi a swi nge he vi kona.”—Nhlav. 21:4.

11. Xana Yehovha u titwa njhani hi malandza yakwe lama feke?

¹¹ Ku hambanisiwa ni vanghana vakwe lava feke. Xana Yehovha u titwa njhani hi vavanuna ni vavasati vo tshembeka lava feke? U swi lava hi mbilu hinkwayo ku tlhela a va vona! (Yobo 14:15) Xana wa yi ehleketa ndlela leyi Yehovha a n’wi tsundzukaka hayona munghana wakwe Abrahama? (Yak. 2:23) Kumbe Muxe loyi a a vulavula na yena “hi ku kongoma”? (Eks. 33:11) U swi langutele hi mahlongati ku tlhela a vona Davhida ni vatsari van’wana va tipisalema va n’wi dzunisa hi tinsimu to tsakisa.  (Ps. 104:33) Hambileswi va etleleke ekufeni, Yehovha a nga va rivalanga. (Esa. 49:15) U byi tsundzuka kahle vumunhu bya vona. Bibele yi ri: “Hikuva eka xona hinkwavo va hanya.” (Luka 20:38) Nkarhi wa ta lowu a nga ta va pfuxa hinkwavo ni ku tlhela a twa swikhongelo swa vona leswi sukaka embilwini ni ku amukela vugandzeri bya vona. Loko u feriwe hi xaka kumbe munghana, onge marito lawa ma nga ku chavelela ni ku ku nyika ntshembo.

12. I yini lexi hlundzukisaka Yehovha ngopfu emikarhini leyi ya makumu?

¹² Vanhu vo homboloka va xanisa vanhu van’wana. Loko ku va ni ku xandzuka entangeni wa Edeni, Yehovha a a swi tiva leswaku xiyimo xi ta tika hi ku famba ka nkarhi. Wa byi venga vuhomboloki, ku pfumala vululami ni madzolonga lama nga kona namuntlha laha misaveni. Ku sukela khale, a a khathala swinene hi vanhu lava nga kotiki ku tisirhelela, lava nga riki na vatswari ni tinoni. (Zak. 7:9, 10) Yehovha u twa ku vava swinene loko a vona malandza yakwe yo tshembeka ma khomiwa hi ndlela yo biha ni loko ma pfaleriwa emajele. Tshamani mi ri karhi mi swi tiva leswaku wa mi rhandza hinkwenu n’wina mi tiyiselaka na yena.

13. Hi byihi vubihi lebyi endliwaka hi vanhu naswona Xikwembu xi ta endla yini hi swona?

¹³ Vanhu va tikhoma ku biha hi swa masangu. Sathana u lava leswaku vanhu hinkwavo lava endliweke hi xifaniso xa Xikwembu va tikhoma ku biha. Loko Yehovha a ‘vona leswaku vubihi bya vanhu a byi ya byi nyanya’ enkarhini wa Nowa, “a tisola hileswi a endleke vanhu emisaveni, mbilu yakwe yi vava.” (Gen. 6:5, 6, 11) Xana xiyimo xi cincile? Nikatsongo. Sathana u ba nkulungwana loko a vona vanhu va tikhoma ku biha hi mixaka hinkwawo ya swa masangu, ku katsa ni loku endliwaka hi lava nga tekanangiki ni va rimbewu leri fanaka! (Efe. 4:18, 19) Nakambe Sathana u tsaka ngopfu loko a hambukisa malandza ya Yehovha leswaku ma wela exidyohweni. Loko ku lehisa mbilu ka Yehovha ku fika emakumu, u ta kombisa leswaku wa swi venga ku tikhoma ko biha hi swa masangu hi ku lovisa hinkwavo lava endlaka tano.

14. I yini leswi vanhu va swi endlaka eka misava ni swiharhi?

¹⁴ Ku onhiwa ka ntumbuluko wakwe. Vanhu a va ‘fumi vanhu van’wana ku va endla swo biha’ ntsena kambe va tlhela va onha misava ni swiharhi leswi Yehovha a swi vekeke emavokweni ya vona leswaku va swi khathalela. (Ekl. 8:9; Gen. 1:28) Vativi va sayense va vula leswaku swiharhi swa kwalomu ka miliyoni ku nga ri khale swi ta va swi nga ha ri kona hikwalaho ka swiendlo swa vanhu. Swa twisiseka leswi va vulaka leswaku ntumbuluko wu le khombyeni! Lexi tsakisaka, Yehovha u tshembisa “ku lovisa lava onhaka misava” ni ku cinca misava hinkwayo yi va paradeyisi.—Nhlav. 11:18; Esa. 35:1.

15-16. I yini lexi nga hi pfunaka ku tiyisela swin’we na Yehovha? Kombisa.

¹⁵ Ehleketa hi maxangu lawa Tata wa hina wa le matilweni a bohekeke ku ma tiyisela ku ringana magidi ya malembe. (Vona bokisi leri nge “ Leswi Yehovha A Swi Tiyiselaka.”) Yehovha a nga herisa misava leyi nkarhi wun’wana ni wun’wana. Kambe ndlela leyi a lehisaka mbilu hayona yi hi pfunile! Anakanya hi xikombiso lexi. A hi nge, nuna na nsati va byeriwa leswaku n’wana wa vona loyi a nga si velekiwaka u ni vuvabyi lebyi nga tshungulekiki naswona u ta xaniseka ni ku tlhela a fa a ha ri ntsongo. Kambe vatswari va n’wana va tsaka swinene loko n’wana wa vona a velekiwa hambileswi swi nga ta va tikela ku n’wi khathalela. Rirhandzu leri va nga na rona eka n’wana wa vona ri va susumetela ku tiyisela swiyimo swo tika hi xikongomelo  xa leswaku n’wana wa vona a va ni rihanyo lerinene.

¹⁶ Hilaha ku fanaka, vatukulu va Adamu na Evha va velekiwa ni xidyoho. Hambiswiritano, Yehovha wa va rhandza naswona wa khathala swinene hi vona. (1 Yoh. 4:19) Ku hambana ni vatswari lava hi buleke ha vona, Yehovha u ta herisa maxangu lawa vana vakwe va langutanaka na wona. U veke siku leri a nga ta herisa ku xaniseka hinkwako. (Mat. 24:36) Xana rirhandzu rakwe a ri fanelanga ri hi susumetela ku tiyisela hilaha hi nga kotaka hakona?

17. Xana xikombiso xa Yesu lexi boxiweke eka Vaheveru 12:2, 3, xi hi pfuna njhani leswaku hi kota ku tiyisela?

¹⁷ Yehovha u hi vekele xikombiso lexinene ngopfu xa ku tiyisela. Yesu u tekelele xikombiso xa Tata wakwe xa ku tiyisela. Loko a ha ri laha misaveni, u tiyisele ku rhukaniwa, ku khomisiwa tingana ni rifu emhandzini ya nxaniso hikwalaho ka hina. (Hlaya Vaheveru 12:2, 3.) A swi kanakanisi leswaku xikombiso xa Yehovha xa ku tiyisela hi xona lexi pfuneke Yesu a kota ku tiyisela. Na hina xi nga hi pfuna.

18. 2 Petro 3:9 yi hi pfuna njhani leswaku hi kota ku twisisa leswi endlekaka hikwalaho ka ku lehisa mbilu ka Yehovha?

¹⁸ Hlaya 2 Petro 3:9. Yehovha u wu tiva kahle nkarhi lowu faneleke wo herisa misava leyi. Hikwalaho ka leswi a lehiseke mbilu, swi endle leswaku ku va ni ntshungu lowukulu wa timiliyoni lowu n’wi gandzelaka. Hinkwavo va tsaka leswi Yehovha a tiyiseleke nkarhi wo leha kukondza va velekiwa, va dyondza ku n’wi rhandza ni ku tinyiketela eka yena hi ku khuvuriwa. Xiboho lexi Yehovha a xi tekeke xo tiyisela xi ta endla leswaku a tsaka swinene loko a hakela vanhu va timiliyoni hikwalaho ka leswi va tiyiseleke ku ya fika emakumu!

19. Hi fanele hi tiyimisela ku endla yini naswona i mikateko yihi leyi hi nga ta yi kuma?

¹⁹ Hi dyondza tindlela to tiyisela hi tsakile eka Yehovha. Hambileswi Sathana a vangaka maxangu ni ku xaniseka, Yehovha wa ha ri “Xikwembu lexi tsakeke.” (1 Tim. 1:11) Na hina hi nga swi kota ku tshama hi tsakile loko ha ha rindzele Yehovha leswaku a kwetsimisa vito rakwe, a vangamisa vuhosi byakwe, a herisa vuhomboloki ni swiphiqo hinkwaswo leswi hi langutanaka na swona. Onge hi nga tiyimisela ku tiyisela ku ya fika emakumu ni ku tlhela hi chaveleleka hi ku tiva leswaku Tata wa hina wa le matilweni na yena u tiyisela na hina. Loko hi endla tano, marito lawa ma ta va ntiyiso: “Wa tsaka munhu loyi a yaka emahlweni a tiyisela miringo, hikuva loko a yi hlurile u ta kuma harhi ya vutomi, leyi Yehovha a yi tshembisaka lava tshamaka va ri karhi va N’wi rhandza.”—Yak. 1:12.