1-2. Marito ya Yehovha lawa ma nga ka Esaya 65:16, 17 ma hi pfunisa ku yini swaku hi tiyisela?

“U NGA KARHALI!” leyi ku ve nhlokomhaka ya kongresu la 2017. Li hi pfune ku vona swaku hi nga tiyiselisa ku yini hambileswi hi nga ni swikarhatu. Se ku hundze 4 wa malembe kambe hi tama hi tiyisela ka misava leyi ya ku biha.

² Pimisa hi swikarhatu leswi u nga kumana na swona swoswinyana. Swi nga yentxeka u feliwe hi xaka kumbe munghanu wa wena lava a wu va rhandza hintamu. Kumbe u kumiwe hi mavabyi lawa ma nga veka wutomi la wena nghozini. Swi nga yentxeka u kumana ni swikarhatu hi mhaka ku guga, kumbe u kumane ni ku hluphiwa, ku xanixiwa hi mhaka lipfumelo la wena, tindhambhi, ma ciclone kumbe minchumu yin’wana. Wutomi la wena li txintxile hi mhaka mavabyi ya ku fana ni corona vírus? Hi wu nyimeli hintamu nkama wa ku swikarhatu leswi hinkwaswu swi helisiwa. Hi swi lava hintamu swaku li fika siku leli hi nga ta kala hi nga ha swi khumbuki hinkwaswu leswi swi yentxekaka. — Esaya 65:16, 17.

3. Hi fanele hi yentxa yini swoswi, naswona hi mhaka muni?

³ A wutomi ka masiku ya hina la karhata, naswona ka nkama lowu taka hi ta kumana ni swikarhatu swa swikulu swa ku tlula leswi. (Mat. 24:21) Swi lava hi tama hi tiyisela. Hi mhaka muni? Hikusa Yesu a vule swaku: “Loko mi tiyisela, mi ta ponisiwa.” (Luk. 21:19) Ku tiva swaku vanhu van’wana va tiyisela swikarhatu swa ku fana ni swa hina, swi nga hi pfuna swaku hi tama hi tiyisela.

4. Hi mhaka muni hi nga vulaka swaku Yehovha i xikombiso xa xinene xa ku tiyisela?

⁴ Hi mani a nga xikombiso xa xinene xa ku tiyisela? Hi Yehovha Xikwembu. Leswo swa ku hlamalisa? Pimisanyana hi leswi, misava leyi yi fumiwa hi Sathana naswona yi ni swikarhatu swa swinyingi. Yehovha a ni matimba ya ku swi helisa hinkwaswu hi nkamanyana, kambe a nyimela nkama wawunene swaku a swi helisa. (Rom. 9:22) Na wu nge se fika nkama wolowo, Yehovha a tama a  tiyisela. A hi voni 9 wa swikarhatu leswi Yehovha a swi tiyiselaka.

5. Ku sukela aEdeni vito la Xikwembu li chimisiwa ku yini, u titwisa ku yini hi leswo?

⁵ Ku chimisiwa ka vito la yena. Yehovha wa li rhandza vito la yena, naswona a lava swaku hinkwavu va li nyika lisima. (Esa. 42:8) Kambe se ku hundza 6.000 wa malembe na vito la yena li chimisiwa. (Pis. 74:10, 18, 23) Leswo swi sungule ka jaradi la Edeni loko Davulosi (leswi vulaka “Mulumbeti”) a lumbete Xikwembu swaku a xi nga swi lavi ku nyika Adamu na Evha nchumu lowu a wu ta va yentxa va tsaka. (Gen. 3:1-5) Ku sukela kolanu, Yehovha a lumbetiwa swaku a tsona vanhu minchumu leyi va yi lavaka. Yesu a karhateke hintamu hi ku vona vito la Papayi wa yena li chimisiwa hi ndlela leyi. Hi mhaka leyo, a byele vadjondzisiwa va yena swaku va khongelisa xileswi: “Papayi wa hina lweyi a nga matilweni, vito la wena a li kwetsimisiwi.” — Mat. 6:9.

6. Hi mhaka muni Yehovha a hi nyika nkama wa ku leha na a nge se lulamisa mhaka ya yena ya mfanelo ya ku fuma?

⁶ Ku yala swaku Xikwembu xi ni mfanelo ya ku fuma vanhu. Yehovha hi yena a nga ni mfanelo ya ku fuma matilo ni misava, naswona hi yena ntsena a tivaka ndlela ya yinene ya ku fuma. (Nhla. 4:11) Davulosi a zame ku kanganyisa tintsumi ni vanhu a va yentxa va pimisa swaku Xikwembu a xi na yona mfanelo leyo. A swi lava nkama swaku mhaka leyo yi lulamisiwa ni kuva vanhu va twisisa swaku a swi nga ta koteka swaku va va ni ntsaku na va tifuma hi voxe, na va nga yingisi lweyi a nga va yentxa. (Yer. 10:23) Xikwembu xi kombise wutlharhi hileswi xi nyikaka nkama lowu vanhu, naswona ku lehisa mbilu ka xona ku ta yentxa swaku mhaka leyi yi lulamisiwa hi ku helela. A ku nga ha ta va ni ku kanakana swaku Xikwembu hi xona xi nga ni mfanelo ya ku fuma naswona hi xona xi tivaka ndlela ya yinene ya ku swi yentxa leswo. Vanhu hinkwavu va ta swi tiva swaku o va Mfumu wa Xikwembu ntsena lowu ta yentxaka swaku ku va ni ku rhula ka ntiyiso a misaveni.

7. Hi vamani va nga tshika ku yingisa Yehovha, naswona yena a ta yentxa yini hi mhaka leyi?

⁷ Ku kala ku yingisa ka vana va yena. Yehovha a yentxe tintsumi ni vanhu na va nga na xidjoho, naswona a swi koteka kuva va mu yingisa. Kambe yin’we ya tintsumi yi sungule ku kala yi nga ha mu yingisi Yehovha ivi yi hundzuka Sathana (leswi vulaka “Mukaneti”). Sathana a yentxe swaku vanhu lava a va nga na xidjoho ku nga Adamu na Evha, va sungula ku kala va nga ha xi yingisi Xikwembu. Tintsumi tin’wana ni vanhu va yentxe leswi fanaka. (Yuda 6) Hi ku famba ka nkama Vayisrayele, vanhu lava a va langiwe hi Xikwembu, na vona va tshike ku yingisa Yehovha ivi va gandzela swikwembu swin’wana. (Esa. 63:8, 10) Swa twala kuva Yehovha a titwile na a tshikiwile. Hambileswo, Yehovha a tama a tiyisela minchumu leyi hinkwayu anze siku leli a nga ta helisa vanhu hinkwavu lava kalaka va nga mu yingisi. Leswo swi ta tisa ku rhula ka vanhu va ku tshembeka, lava tamaka va tiyisela na Yehovha ka wubihi li nga kona ka misava leyi.

8-9. Hi wani mavunhwa man’wana ya Davulosi, naswona hi fanele hi yentxa yini hi wona?

⁸ Mavunhwa ya Davulosi. Sathana a vule swaku Yobo ni vanhu van’wana va ku tshembeka va Yehovha, va mu tirhela hileswi va lavaka swaku minchumu yi va fambela kahle. (Yobo 1:8-11; 2:3-5) Ni namuntlha Sathana wa ha vula swoleswo. (Nhla. 12:10) Hina hi nga swi kombisa swaku Sathana i muhembi hi ku tiyisela swikarhatu na hi tshembekile, ni ku komba Yehovha swaku ha Mu rhandza. Loko hi tiyisela ku fana na Yobo, na hina hi ta katekisiwa. — Yak. 5:11.

⁹ Sathana a tirhisa varhangeli va wukhongeli la mavunhwa swaku va djondzisa vanhu leswaku  Yehovha hi yena a yentxaka swaku vanhu va hlupheka. Loko ku fa xin’wanana, van’wana va vula swaku xi tekiwe hi Xikwembu hikusa a xi lava ntsumi yin’wana atilweni. Leswo a hi ntiyiso! Hikusa ha swi tiva swaku Yehovha i papayi lweyi a nga ni lirhandzu. Loko hi vabya kumbe hi feliwa hi munhu hi mu rhandzaka a hi nyiki nandzu Xikwembu xa hina. Kambe ku hambana ni leswo, ha kholwa swaku siku lin’wana xi ta helisa mavabyi ni lifu. Hi nga byela vanhu hinkwavu lava lavaka ku hi yingisa swaku Yehovha i Xikwembu lexi nga ni lirhandzu. Loko hi yentxa leswo hi ta pfuna Yehovha swaku a nyika nhlamulu lweyi a lwisanaka na yena. — Swi. 27:11.

10. Tipisalema 22:23, 24 yi hi djondzisa yini hi Yehovha?

¹⁰ Ku hlupheka ka vanhu va yena lava a va rhandzaka. Yehovha a ni ntwelawusiwana hi vanhu va yena. Yena a nga swi rhandzi ku hi vona na hi xanisiwa hi mhaka lipfumelo la hina, mavabyi, kumbe hi mhaka leswi hi nga ni xidjoho. (Lerha Tipisalema 22:23, 24.) Yehovha wa ku twa ku vava loku hi ku twaka naswona a ta helisa ku hlupheka hinkwaku. (Fananisa ni Eksoda 3:7, 8; Esaya 63:9.) Ku nga li khale Xikwembu “xi ta limpa mihloti hinkwayu ka matihlo ya vona, lifu a li nga ha ta va kona, hambi ku keta, ku rila ni ku twa ku vava a swi nge he vi kona.” — Nhla. 21:4.

11. Yehovha a titwisa ku yini hi ku feliwa hi vanhu va yena va ku tshembeka?

¹¹ Ku feliwa hi vanghanu va yena. Yehovha a titwisa ku yini loko a feliwa hi vanghanu va yena va ku tshembeka? A swi lava hintamu ku tlhela a va vona. (Yobo 14:15) Indje wa swi pimisa leswi Yehovha a swi lavisaka xiswona ku tlhela a vona munghanu wa yena Abrahamu? (Yak. 2:23) Kumbe Moxe, lweyi a a vulavula na yena na va “txuvukanile”? (Ekso. 33:11) Pimisa hi leswi a mu xuvisaka xiswona Davhida ni vatsali van’wana va tipisalema na va yimbelela ni ku mu dzunisa hi tinsimu. (Pis. 104:33) Hambileswi vanhu lava va ku tshembeka va nga fa, Yehovha a nga  va khohlwanga. (Esa. 49:15) A khumbuka minchumu hinkwayu hi wumunhu la vona, ‘hikusa ka yena hinkwavu va hanya.’ (Luk. 20:38) Siku lin’wana, Yehovha a ta yentxa swaku va tlhela va hanya, naswona a ta tlhela a yingisela swikhongelo swa vona ni ku pfumela swaku va mu tirhela. Ku pimisa hi minchumu leyi, swi nga ku tiyisa loko u feliwa hi munhu lweyi u mu rhandzaka.

12. Ka masiku lawa ya wugamu i ntxini xi yentxaka Yehovha a vaviseka hintamu?

¹² Vanhu lava hluphaka vanhu van’wana. Ku sukela ajaradi la Edeni, Yehovha se a a swi tiva swaku loko a nge se susa ku hlupheka amisaveni, a wutomi a li ta karhata hintamu. Yehovha wa swi nyenya ku vona wubihi, wukanganyisi, ni wugevenga leli nga kona la misaveni. Ku sukela khale a karhateka hintamu hi vanhu lava kalaka va nga swi koti ku tivhikela, lava nga feliwa hi vapsali, ni lava nga feliwa hi vavanuna. (Zak. 7:9, 10) Namuntlha lexi mu vavisaka hintamu Yehovha i ku vona ku xaniseka ka vanhu va yena va ku tshembeka lava hluphiwaka ni ku petiwa madjele. Tiyisekani swaku Yehovha wa mi rhandza hinkwenu naswona tamani mi tiyisela ku fana na yena.

13. Misava yi bihe ku fikela kwini, naswona Yehovha a ta yentxa yini hi leswo?

¹³ Mahanyelo ya ku kala ma nga li manene. Sathana wa swi tiva swaku vanhu va yentxiwe hi xifaniso xa Xikwembu, hi mhaka leyo wa swi rhandza ku yentxa vanhu va titwa na va nga pfuni nchumu. Ka masiku ya Nowa loko Yehovha “a vona swaku wubihi la munhu a li kulile” swi yentxe swaku, “Yehovha a tilaya hileswi a nga vumba vanhu amisaveni, kutani a vaviseka ambilwini yakwe.” (Gen. 6:5, 6, 11) Hambileswo wubihi a li zanga li yampsa. Sathana a tsake hintamu hi ku vona mahanyelo ya ku biha ya vanhu namuntlha hi leswi va nga ni mahanyelo ya ku biha hi swa masangu. Wanuna ni wansati va ku kala va nga chadanga va tshama xikan’we, vavasati va chada ni vavasati, vavanuna va chada ni vavanuna. (Efe. 4:18, 19) Sathana a tsaka hintamu loko a vona munhu lweyi a tirhelaka Yehovha a yentxa xidjoho xa xikulu. Kambe ku lehisa mbilu ka Yehovha ku ni magamu, ku nga li khale a ta kombisa leswi a yi nyenyisaka xiswona nsila ya swa masangu hi ku helisa hinkwavu lava kalaka va nga lavi ku txintxa.

14. I mpsini leswi vanhu va swi yentxaka hi misava ni swiharhi?

¹⁴ Ku wonheteliwa ka minchumu leyi a nga yi yentxa. Xikwembu xi nyike vanhu ntirho wa ku hlayisa minchumu leyi xi nga yi yentxa. (Gen. 1:28) Kambe a ntiyiso hi swaku munhu ‘a fuma munhu mun’wana ku mu yendlela swa ku biha’ ni ku wonhetela leswi Xikwembu xi nga swi yentxa. (Ekl. 8:9) Tintivi tin’wana ti vula swaku swiharhi swa swinyingi swi ta va swi nga ha li kona ka malembe ma taka hi mhaka leswi vanhu va swi yentxaka. Swa twala leswi vanhu va karhatekaka hi misava, kambe swa tsakisa ku tiva swaku Yehovha a tshembisa “ku helisa lava wonhaka misava” ni ku yi yentxa yi va paradesi la ku xonga. — Nhla. 11:18; Esa. 35:1.

15-16. I mpsini leswi swi hi pfunaka ku tiyisela na Yehovha? Nyikela xikombiso.

¹⁵ Pimisa hi hinkwaswu leswi Papayi wa hina wa le tilweni a swi tiyiselaka ku sukela khale. (Vona kwadru leli nge: “ I Mpsini Leswi Yehovha A Swi Tiyiselaka.”) Yehovha a nga swi kota ku helisa ku hlupheka hi nkama lowu a wu lavaka. Kambe Yehovha a tama a tiyisela naswona ku tiyisela ka yena ka hi pfuna. A hi pimiseni hi leswi: A hi nge nuna na nsati lava nyimelaka ku va ni xin’wanana va byeliwa leswi hi médico: “N’wana wa n’wina wa vabya, a wutomi la yena li ta karhata naswona a nga ta hanya malembe ya manyingi.” Hambileswi ku hlayisa n’wana lweyi swi ta karhataka hintamu, vapsali va kona va mu yamukela hi lirhandzu. Lirhandzu leli va nga na  lona li va pfuna ku tiyisela ni ku xi hlayisa kahle xin’wanana xa vona.

¹⁶ Ku fana ni xin’wanana lexiyani, vana va Adamu na Evha va psaliwa se na va ni xidjoho. Hambileswo, Yehovha a va hlayisa hi lirhandzu. (1 Yoh. 4:19) Kambe Yehovha a hambanile ni vapsali va xin’wanana lexi, hikusa yena a nga swi kota ku helisa ku hlupheka ka hina, naswona leswi a hi rhandzaka se a veke ni nkama lowu a nga ta helisa ku hlupheka hi wona. (Mat. 24:36) Lirhandzu leli la Yehovha li yentxa swaku na hina hi tiyisela na yena nkama hinkwawu.

17. Xikombiso xa Yesu xi nga ka buku la Vaheberu 12:2, 3 xi hi pfunisa ku yini swaku hi tama hi tiyisela?

¹⁷ Yehovha i xikombiso xa xinene xa ku tiyisela, naswona Yesu a mu tekelele kahle Papayi wa yena. Hi lirhandzu, Yesu a tiyisele ku rhuketeliwa, ku danisiwa, ni ku vekiwa ka mhandzi ya nxaniso nkama na a li la misaveni. (Lerha Vaheberu 12:2, 3.) A swi kanakanisi swaku ku tiyisela ka Yehovha ku pfune Yesu swaku na yena a tiyisela. Na hina swi nga hi pfuna.

18. Hi ku ya hi 2 Pedru 3:9 ku tiyisela ka Yehovha ku hi pfunisa ku yini?

¹⁸ Lerha 2 Pedru 3:9. Yehovha wa wu tiva nkama wa wunene wa ku helisa ku hlupheka. Hi mhaka ku tiyisela ka Yehovha swi kotekile swaku vanhu va vanyingi va psaliwa, va djondza hi Yehovha va tlhela va tinyiketela ka yena. Vanhu volavo va lumba ntlawa wa xitshungu xa xinyingi naswona va xi khensa hintamu Xikwembu hileswi xi tamaka xi tiyisela. Ka nkama lowu taka Yehovha a ta swi kombisa swaku vanhu volavo va yentxe kahle hileswi va nga tiyisela, naswona a ta va katekisa hintamu lava nga ta tiyisela anze magamu.

19. Hi fanele hi tinyimisela ku yentxa yini, naswona Yehovha a ta hi hakelisa ku yini?

¹⁹ Xikombiso xa Yehovha xi hi djondzisa ku tiyisela na hi tsakile. Hambileswi Sathana a yentxaka swaku ku va ni ku hlupheka ni ku vaviseka, Yehovha a tama a va “Xikwembu xa ku tsaka.” (1 Tim. 1:11) Na hina hi tama hi lehisa mbilu na hi tsakile, hi nyimela siku leli Yehovha a nga ta basisa vito la yena, a kombisa swaku hi yena a nga ni mfanelo ya ku fuma, a helisa wubihi hinkwalu ni swikarhatu leswi hi kumanaka na swona namuntlha. Kambe loko nkama wolowo wu nge se fika, na hina hi nga tama hi tiyisela na hi tsakile. Tinyimiseli ku tama u tiyisela naswona u nga khohlwi swaku Papayi wa hina wa le tilweni na yena wa tiyisela. Loko hi yentxa leswo, hi ta swi vona swaku i ntiyiso marito lawa ma nga ka buku ya Yakobo 1:12 lawa ma nge: “Wa tsaka munhu lweyi a tiyiselaka mindzingo, hikusa loko a tsakeliwa hi Xikwembu a ta kuma harhi ya wutomi, leyi Yehovha a nga yi tshembisa lava tamaka va mu rhandza.” — Yak. 1:12.