1, 2. ¿Andijtsïnisï jarhuatajki aiatsperakua enga Isaías 65:16, 17 jimbo jaka parachi seguirini tekaantani?

“¡ASÏ KUATANTA JE!”. I jindeespti xáni ambakiti títulu kʼéri tánguarhikua rejioniri 2017 anapu. Ini kʼéri tánguarhikua jimbo, jorhenguarhiskachi néna tekaantani jiáni engachi uandanhiatechani jatsiajka. Nitamastia tʼámu uéxurhini, ka seguirixakachi tekaantani uandanhiatechani engachi jatsiajka ini parhakpini jimbo.

² Arini últimu jurhiatikuecha jimbo, ¿náki problemechanchi jatsiaski? Jamberichi no sési nitamakuarhini jaka jimbokachi uarhiranchaska familiari o amiguni ma, o kʼéri pʼamenchakua ma jimbo, ochi jatiriinia, o desastre naturali ma jimbo, o atajperakua jimbo, ochi no sési kánhani, o pʼamenchakua COVID-19 jimbo. ¿A no eskachi uékaxakaia eska niáraaka ima jurhiatikua engachi mirikurhiakia iámindu i ambe? Nóteruchi méni miáuakia ini ambe ka nóteruksï méni úkuarhiati (arhinta je Isaías 65:16, 17).

3. ¿Ambechi jatsiski para úni iásï, ka andi?

³ I parhakpinini jimbo irekani no fásilisti, ka jamberichi jatsiaka para sánderu orhepatini sánderu kʼérati uandanhiatechani jatsiani (Mat. 24:21). Ísï jimbo, jatsiskachi para jánguarhintani sánderu tekaantstiini. Ka Jesúsi uandaspti andichisï jatsi para i ambe úni, enga uandapka: “Ima enga tekaanta[a]ka asta kʼamarhutani jamberi, ima jindeati enga pʼimutantskateaka” (Mat. 24:13). Ma ambe engajtsïni jarhuataaka, jindeesti eratsentani na engaksï máteruecha tekaantajka engaksï sáno májkueni járhati tsʼéjkukuechani jatsiajka eska jucha.

4. ¿Andichisï újki uandani eska Tata Diosï Jeoba jindeeska sánderu ambakiti ejemplu enga tekaantskua xarhatani jaka?

⁴ ¿Né jindeeski sánderu ambakiti ejemplu enga xarhatani jaka tekaantskua? Tata Diosï Jeoba. Engajtsïni i ambe ísku pakataka, ju je eratsentani arini ambe. I parhakpinirhu uánikua problemechaksï jarhasti jimboka noambakiti juramuxaka. Tata Diosï Jeoba uaati kʼamajkuni iásï mismu iámindu ambe enga xáni no sési úkuarhini jaka parhakpinirhu, joperu ima erokuarhixati eska niáraaka ima jurhiatikua  enga ima erakukia (Rom. 9:22). Enga jamberi niáraaka ima jurhiatikua, ima seguirixati tekaantani. Ju je exeni nuebe ambe enga Tata Diosï Jeoba tekaantani jaka.

5. ¿Néna no sési pakatanhaski Tata Diosïri nombri, ka chá néna pʼikuarherasïni indeni ambe jimbo?

⁵ Enga imeeri nombri ísï no sési pakatanhaka. Tata Diosï Jeoba kánikua jukaparharasïndi imeeri nombrini ka uékasïndi eskaksï iáminduecha janhanharhiaka (Is. 42:8). Joperu ma 6,000 uéxurhini ísïistia, enga imeeri nombri no sési pakatanhani jaka (Sal. 74:10, 18, 23). Iámindu i ambe jardini de Edénirhu ueenakuarhispti jiáni enga Noambakiti (enga arhikuekajka “ima enga chkuanderakua ambe jauatatspijka”) uandapka eska Tata Diosï no uékasïreenga íntskuni Adáni ka Ebani ambe engaksï uétarhinchani japka, paraksï tsípikua jingoni irekani (Gén. 3:1-5). Desde jiánksï ueenasti arhini Tata Diosï Jeobani eska ima no íntsaasïnga kʼuiripuechani ambe engaksï meru uétarhinchajka. Jesúsi uandanhiasïreendi eska imeeri Taatiri nombri sánderu no sési pakatanhapiringa. Jimbosï jorhendaapti imeeri chúxapatichani, eskaksï i ambe kómarhipiringa: “Juchaari Taati engari auandarhu jaka, kómarhisïngaksïni eska mítenhaaka chiiti nombri eska pímbinhasïtiiska” (Mat. 6:9).

6. ¿Andisï Tata Diosï Jeoba xáni ióni tiempu jurajkuni jaki para xarhatani eska imajkusï sésikua jatsika para juramuni?

⁶ Engaksï no jiókuarhijka imeeri juramukuani. Tata Diosï Jeobajkusï jatsiti sésikua para juramuni auandarhu ka Echerirhu ka ima jindeesti sánderu ambakiti juramuti (Jaŋ. 4:11). Peru Noambakiti jánguarhintasïndi parakaksï ánjelicha ka kʼuiripuecha eratseaka eska Tata Diosï no sésikua jatsiska para juramuni. Ka tiempu uétarhisïndi para xarhatani eska Tata Diosï Jeobajkusï jatsika sésikua para juramuni. Ísï jimbo, juchaari Kuerajpiri jánhaskakua jingoni jurajkusti paraksï kʼuiripuecha uánikua uéxurhini jimbo jandiajku juramukuarhini ka ísï xarhatani eska no uaaka sési nikuani engaksï no kurhajchaska imani (Jer. 10:23). Jimboka Tata Diosï xáni tekaantaxaka, iáminduechaksï seguru jauati eska imajkusï sésikua jatsika para juramuni ka eska ima jindeeska sánderu ambakiti juramuti ka eska imeeri Juramukuajkusï uaaka eska kʼuiripuecha pínandikua jingoni irekaaka Echerirhu ka no chétapu jingoni.

7. ¿Neechaksï no kurhajchaxaki Tata Diosï Jeobani ka ima ambe úkuaua imeechani?

⁷ Engaksï máru imeeri uájpeecha no kurhajchajka. Tata Diosï Jeoba perfektu uaasti ánjelichani ka kʼuiripuechani. Peru ánjeli ma enga nóteru uékakia kurhajchani enga arhinhajka Satanasi (enga arhikuekajka “tájpanharhikpeti”) úspti eska Adáni ka Eba, engaksï ístu perfektuepka, nóteru kurhajchapiringia Tata Diosïni Jeobani. Ístu, máteru ánjelicha ka máteru kʼuiripuechajtuksï nóteru kurhajchasptia (Jud. 6). Tátsekua, máru Israeli anapuecha, ireta enga Tata Diosï erakupka, nóteruksï kurhajchasptia ka ueenasptiksï diosï no jurhimbitichani kómarhiani (Is. 63:8, 10). Jimbosï Tata Diosï Jeoba, no sési pʼikuarherapti indeni ambe jimbo. Joperu ima seguirixati tekaantani, astaka niáraaka ima jurhiatikua enga ima kʼamajkuauaka iámindu no kurhandiichani. Kánikuaksï sési pʼikuarheraati Tata Diosï Jeobaeri ambakiti marhuaricha engaksï imani jingoni seguirini jaka tekaantani xáni no sési jásï ambe enga parhakpinirhu úkuarhini jaka.

8, 9. ¿Náki chkuanderakuechaksï uandanhasïni Tata Diosï Jeobaeri, ka nénachi uaa xarhatani eska no ísïiska?

⁸ Noambakitiri chkuanderakuecha. Satanasi uandaspti eska Jobu, ka ístu máteru ambakiti Tata Diosïri marhuaricha interesi jimbojkuksïsï marhuakujka Tata Diosïni (Job 1:8-11; 2:3-5). Ka asta iásï jamberi, Noambakiti ísï uandasïndi (Jaŋ. 12:10). Engachi tekaantaska jiáni engachi uandanhiatechani jatsiauaka ka engachi uékperakua jingoni no méni jurajkuska Tata Diosï Jeobani, uaakachi xarhatani eska Noambakiti chkuandera máeska. Tata Diosï Jeoba kóndentaspti Jobuni ka májkueni uaati juchantsïni jingoni engachi tekaantaska (Sant. 5:11).

 ⁹ Satanasi úraasïndi no jurhimbiti relijioniri orhejtsïkutichani paraksï uandani eska Tata Diosï Jeoba no sési kámpisïnga. Ka eska imeeri kulpeeska enga xáni no sési nitamakuarhinhani jaka ka máruksï asta uandasïndi eska enga sapi ma uarhijka, eska Tata Diosï pʼikuntaska jimboka uétarhinchaxapka máteru ánjelini auandarhu. Engaksï ísï uandajka, ¡nóksï sáni janhanharhini jarhasïndi Tata Diosï Jeobani! Joperu juchachi míteska eska inde ambe no ísïiska. Jimbosï engachi pʼamenchani jarhajka o engachi uarhiranchajka nemani, nóchi uandasïnga eska Tata Diosïri kulpeeska. Sánderu sési, juchachi mintsikasïnga eska ma jurhiani ima sési peentaaka iámindu imani ambe engajtsïni no sési pʼikuastajka. Uaakachi aianguani iámindu imeechani engajtsïni kurhajchaaka eska Tata Diosï Jeoba kánikua xénchpetiska. Ka ísï, Tata Diosï uaati mókukuni imani enga tsʼéjkuni jaka (Prov. 27:11).

10. ¿Ambejtsïni jorhendasïni Salmo 22:23, 24, Tata Diosï Jeobaeri ambe?

¹⁰ Engaksï no sési nitamakuarhini jaka imeeri marhuaricha. Tata Diosï Jeoba pʼamojkpitisti. Jimbosï no sési pʼikuarherajti, engachi no sési kánhaajka, engachi pʼamenchani jarhajka o imani ambe jimbo engachi no újka úni (arhinta je Salmo 22:23, 24). Imajtsïni kurhanguchisïndi na engachi no sési pʼikuarherajka. Ka uaati eskachi nóteru méni ísï pʼikuarheraakia (terukutanta je Éxodo 3:7, 8; Isaías 63:9 jingoni). Ka niáraati ima jurhiatikua enga úkuarhiaka ambe enga uandajka Jaŋaskuecha 21:4: “Kutsunharhikuauati iámindu uekua, ka nóteru jauatia, uarhikua, ka ni uandanhiata, ka nóteru nema ueraati o pʼamenchani”.

11. ¿Néna pʼikuarherasïni Tata Diosï Jeoba imeeri marhuaricha jimbo engaksï uarhikia?

¹¹ Engaksï imeeri amiguecha uarhijka. ¿Na pʼikuarherasïni Tata Diosï Jeoba, enga miántajka imeechani engaksï uarhikia ka engaksï sési marhuakuenga? Uékaxatia ménderu exeani (Job 14:15). ¿Úsïnchi eranhaskani na enga xáni jirinhantani jaka imeeri amigu jémbani Abraánini? (Sant. 2:23). ¿O Moisésini, enga ísï uandontskuarhekuenga ‘eska kʼuiripu ma na uandontskuarhijka  máteru kʼuiripu jingoni’? (Éx. 33:11). ¡Ka kánikua uékaxatia eska Dabidi ménderu pirekuaka ka máteru salmistecha imeecheri sési járhati pirekuechani! (Sal. 104:33). Nájkirukaksï uarhikia, ima no mirikurhiasïndi (Is. 49:15). Tata Diosï Jeoba miásïndi na engaksï jásïipka, jimboka para “imani japarini iáminduecha irekaxaka” (Luk. 20:38). Niáraati jurhiatikua, enga ima tsítantauaka ka kurhauati imeecheri kómarhikuechani ka kánikua sési pʼikuarheraati engaksï ima ménderu marhuakuaka. ¿A no eska i ambejtsïni kánikua uinhaperantasïnga juchantsïni engachi uarhiranchaka nemani?

12. ¿Ambe uandanhiatasïni Tata Diosï Jeobani ini últimu jurhiatikuecha jimbo enga xáni no sési jánhaskuarhini jaka?

¹² Engaksï no sési úricha no sési úkuajka máteru kʼuiripuechani. Enga jardini de Edénirhu ueenakuarhipka no kurhandiranhani, Tata Diosï Jeoba mítespti eska ante de sési niántani ambe ma, sánderu no sési jánhaskuarhipirhinga. Ima kurhunhisïndi ambe enga iásï úkuarhini jaka, kómu no sési kámberakua ambe, enga no jurhimbikua jingoni janhajka ka enga atajperanhajka. Méntkisï sánderu uandanhiasïndi imeechani jimbo engaksï no újka kuájpikuarhini; kómu, uérandu japindicha ka tsïndicha (Zac. 7:9, 10). Ka sánderu uandanhiasïndi imeeri ambakiti marhuaricha jimbo, enga exejka eskaksï ónhanhasïnga ka no sési kánhani. Uaakajtsï seguru jarhani eskaksïni Tata Diosï Jeoba xénchasïnga iámindu chánksïni engajtsï ísï tekaantani jaka imani jingoni.

13. ¿Náki no sési járhati úkuechani exeaxaki Tata Diosï Jeoba kʼuiripuecheri, ka ambe uaa?

¹³ Engaksï kʼuiripuecha ikichakueni jásï ambe újka. Kʼuiripuechachi ísï kueraanhaska eska Tata Diosï na jásïika, joperu Satanasi úsïndi eskachi no sési jásï ambe niátaaka. Noéri jurhiatikuecha jimbo, enga “Tata Diosï Jeoba exepkia eska kʼuiripuecheri no sési úkuecha kánikuespkaksïa”, “no sési pʼikuarheraspti enga kueraapka kʼuiripuni ka kómu pʼikuarheraspti imeeri mintsitarhu” (Gén. 6:5, 6, nota, 11). Ka iásï, ¿parhakpinirhu sánderu sési jarhaskia desde jiáni uératini? Nómbe. Noambakiti kánikua tsitisïndi enga iásï sánderu ikichakueni jásï ambe niátanhajkia, kómuenga tataka ma ísku jándikua ambe niátajka máteru tataka jingoni, nanaka máteru nanaka jingoni, o nanaka ma tataka ma jingoni (Efes. 4:18, 19). Ka sánderu tsípisïndi enga Tata Diosï Jeobaeri marhuari ma pekadu ma újka. Enga Tata Diosï Jeoba nóteru tekaantaakia, kʼamajkuauati iámindu imani kʼuiripuechani engaksï ísku jándikua ambe niátajka.

14. ¿Ambe úkuxaki kʼuiripu Echerini ka animalichani?

¹⁴ Engaksï kʼamajkuni jaka Echerini enga Tata Diosï kueraaka. Aparte de enga “kʼuiripu juramukuni jaka máteru kʼuiripuni solu para no sési ambe úkuni”, ístu no kuidarixati Echerini ni animalichani, ísï eska Tata Diosï Jeoba na uékeenga eska úpiringa (Ecl. 8:9; Gén. 1:28). Máru inbestigadorichaksï uandasïndi eska sánderu orhepatini kʼuiripu uaaka eska ma miioni plantecha ka animalicha nóteru jauakia. ¡Jimboksïsï xáni uandanhiani jati! Kánikuachi agradesidu jarhaska Tata Diosï Jeoba jingoni engajtsïni aiachijka eska kʼamajkuauaka “imeechani engaksï kʼamajkuni jaka echerini” ka eska Echerini paraisu ma úntaaka (Jaŋ. 11:18, TNM; Is. 35:1).

15, 16. ¿Ambejtsïni jarhuataa májkueni tekaantaaka eska Tata Diosï Jeoba? Uandanta je ejemplu ma jingoni.

¹⁵ Ju je eratseantani iámindu uandanhiatechani enga desde iónisïa tekaantani jaka juchaari Taati auandarhu anapu (exe je rekuadruni “Ambe enga xáni tekaantani jaka Tata Diosï Jeoba”). ¡Kánikuajtsïni marhuachisïndi na enga xáni tekaantani jaka Tata Diosï Jeoba! Jimboka ima úpiringa na uéjki jatini kʼamajkuni parhakpinini. Ju je eratsentani ini ambe. Ju je eranhaskani eskaksï temungurhirini ma arhisïnga eska imeecheri sapi no sési andajpenuaka, ka eska no ióni uaaka irekani. Nájkiruka temungurhiri mítejka eska kánikua úkua jukaaka kuidarini, kánikuaksï tsípikua jingoni kánguarhisïndi. Jimbokaksï xénchasïnga uájpani, jánguarhintasïndiksï eska sési irekaaka náki uéjki uandanhiatechanksï jatsiani.

 ¹⁶ Sáno májkueni, iámindu Adáni ka Eba uájpeechachi pekadu jingoni andajpenusïnga. Joperujtsïni Tata Diosï Jeoba xénchasïndi ka kuidarini (1 Juanu 4:19). Ka ima kʼóru uaati úni ambe ma juchantsïni jimbo, ambe enga temungurhiri engachi ejemplurhu exeka no úka úni. Ima uandastia káni enga kʼamajkuaka iámindu ambe enga újka eskaksï kʼuiripuecha kómu nitamakurhiaka (Mat. 24:36). ¿A no eska Tata Diosïri uékperakua uaaka eskachi tekaantaaka xáni eska xáni uétarhiaka?

17. ¿Andijtsïnisï jarhuatajki para tekaantani ambe enga arhijka 1 Pedru 2:21-24 tata Jesukristueri ambe?

¹⁷ Tata Diosï Jeobajtsïni sánderu ambakiti ejemplu íntskusti para tekaantani. Ka Jesúsi májkueni úspti eska ima. Enga Echerirhu japka, tekaantaspti enga no sési arhinhapka, no sési kánhapka ka enga cháparhatanhapka chkarirhu ma juchantsïni jimbo (arhinta je 1 Pedru 2:21-24). Taati jémbeeri ejemplu, jarhuataspti Jesúsini paraka tekaantapiringa. Ka juchantsïntu uaati uinhaperantani.

18. ¿Nénajtsïni jarhuatasïni ambe enga arhijka 2 Pedru 3:9 kurhanguni ambe enga xáni úkuarhini jaka jimboka Tata Diosï Jeoba tekaantaxaka?

¹⁸ (Arhinta je 2 Pedru 3:9). Tata Diosï Jeoba mítesti na enga jatini sánderu sésiuaka para kʼamajkuni iámindu no sési jásï ambe parhakpinirhu. Jimboka ima tekaantaxaka, iásïksï jarhasti uánikua kʼuiripuecha engaksï marhuakuni jaka ka kómarhini. Iámindu inde kʼuiripuechaksï kánikua agradesidu jarhasti Tata Diosï Jeoba jingoni enga xáni ióni tekaantaka parakaksï úpiringa andajpenuni, jorhenguarhini ka xénchani imani ka paraksï aiakuni imeecheri tsípikuani. Engachi iáminduecha intsïnhaakia kóntperata jimbokachi tekaantaska asta kʼamarhukuni jamberi, xarharaati eska Tata Diosï Jeoba sési úska enga ísï tekaantani jaka.

19. ¿Ambechi eratsetixaki úni, ka náki kóntperatachanchi intsïnhaua?

¹⁹ Tata Diosï Jeobajtsïni jorhendasïndi imeeri ejemplu jingoni tsípikua jingoni tekaantani, ima seguirixati ‘Tata Diosï máeni enga felisika’ nájkiruka Satanasi úka eska xáni no sési nitamakuarhinhaaka (1 Tim. 1:11, TNM). Juchajtuchi uaaka seguirini tsípikua jingoni irekani engachi jamberi erokuarhini jauaka tekaantskua jingoni paraka Tata Diosï Jeoba pímbinhajkuntaaka imeeri nombrini, xarhataaka eska imajkusï sésikua jatsika para juramuni, kʼamajkuaka no sési jásï ambe ka juchaari problemechani. Ju je eratsetini jarhani tekaantani ka miáni eska ístu juchaari Taati auandarhu anapu ístu tekaantaxaka. Engachi ísï úska, ari uandakuechaksï úkuarhini jauati mándani arhini juchantsïni jingoni: “Tsípisïndi ma kʼuiripu enga tekaantajka enga tsʼéjkunhajka, jimboka enga tekaantaska, intsïnhaaka ma kanakua tsípikueri, enga Diosï aiakuaka imeechani engaksï uékajka imani” (Sant. 1:12).