1, 2. Исайя 65:16, 17-де Иегованың сөстери бистерге дүжүп бербезинге канчаар дузалап турар?

2017 ЧЫЛДА «Дүжүп бербеңер!» деп регион шуулганы болуп эрткен. Ол бисти сорук киирип, бергелеривисти ажып эртиптер бис деп чүүлге бүзүреткен. Оон бээр дөрт чыл эрткен, а бис ам-даа бо каржы делегейде чурттап турар хевээр бис.

² А силер сөөлгү чылдар дургузунда чүнү шыдажып эрткен силер? Аар-берге аарып, чоок кижизин чидирип, бойдус-халаптарынга таваржып, күчүлелге азы чок болза истеп сүрүүшкүннерге таваржып турган чадавас силер. Бир болза, назылап улгады берген азы COVID-19 деп аарыгның уржуктарындан хинчектенип турар чадавас силер. Бо берге үелерниң эрте бээрин дыка-ла манап чоруур бис! Ынчан биеэде турган качыгдалдар, аар-бергелер моон соңгаар сагышка безин артпас, угаанга безин кирбес боор. (Номчуптуңар: Исайя 65:16, 17.)

3. Биске кандыг шынарны сайзырадыры эргежок чугула база чүге?

³ Бо делегей бистерни кажанда-даа кээргевес. А келир үеде бис оон-даа улуг бергелерге таваржып болур бис (Мф. 24:21). Ынчангаш амдыгааштан эгелеп, быжыг туруштуг болуру чугула. Чүге? Иисус ону мынчаар тайылбырлаан: «Ол бүгүнү шыдажып эртер болзуңарза, амы-тыныңарны камгалап алыр силер» (Лк. 21:19). Таваржып чоруур бергелеривисти ажып эртип алыр дизе, шак ындыг бергелерге таварышкаш, туруштуг арткан улустуң чижээнден өөренир болзувусса эки.

4. Иегова — туруштуг чоруктуң эң-не эки үлегери деп чүге чугаалап болур?

⁴ Иегова Бурган — туруштуг чоруктуң эң-не эки дээн үлегерин көргүзүп чоруур. Чүге ынча деп болур? Бодап көрүңер даан, Эрликтиң хайындан делегей бергелерже дүлнүп кире берген. А Иегова ол бергелерни карак-чивеш аразында ап каап болур-даа болза, айтып каан хүнүн быжыг туруштуу-биле манап чоруур (Рим. 9:22). Иегованың амдыызында чөпшээреп чоруур бергелериниң тозун көрүптээлиңер.

5. Бурганның адын канчаар карартып каан? Ол чүүл силерге кандыг минниишкиннерни оттурар-дыр?

⁵Адын карартканын. Иегова Бодунуң адынга ынак база шупту чаяалгалар Ооң адынга хүндүткелдиг хамаарылгалыг боорун күзеп турар (Иса. 42:8). Ынчалзажок алды муң чыл ишти улус Ооң буянныг адын бак атка киирип турар (Ыд. ыр. 73:10, 18, 23). Шупту чүве Эдем сесерлиинге эгелээн. Бурган Адам биле Еваның аас-кежиктиг болурун күзевейн турар деп, Эрлик нүгүлдээн (Э. д. 3:1—5). Амгы үеде безин ындыг буруудадыышкыннарны Иегова дыңнап чоруур. Улус Адазының адынга көргүзер ужурлуг хүндүткелди көргүспес боорга, Иисус аажок муңгарап турган. Ынчангаш ол эдерикчилеринге мынча дээн: «Мынчаар мөргүп чоруңар: „Дээрде Адавыс! Сээң адың алдаржызын!“» (Мф. 6:9).

6. Бодунуң эргезиниң чөптүг-шынныын көргүзер дээш, Иегова чүге хөй үени берген?

⁶Ооң дээди эрге-чагыргазынга удурланыышкынны. Дээр биле черни чагырар эрге чүгле Иеговада база Ооң чагыргазы эң-не эки (Ажыд. 4:11). Ынчалза-даа Эрлик кижилерге Бурганның ындыг эргези чок деп чүүлдү көргүзерин кызып турар. Иегованың чагыргазы чөптүг-шынныг деп айтырыгны чаңгыс хүн ишти шиитпирлээри болдунмас турган. Бурган дыка мерген угаанныг кылдыр алдынган. Кижилер Чаяакчызы чокта боттары канчап-даа эки чурттап шыдавас деп чүүлдү көргүзер дээш, чедер болгаш артар үени оларга берген (Иер. 10:23). Бурганның шыдамыының ачызында ол айтырыг удавас үзе шиитпирлеттинер. Ынчан Иегова — эң-не эки Чагырыкчы база Ооң Чагыргазы чер кырынга ёзулуг амыр-тайбыңны эккээр деп чүүлге чаңгыс-даа кижи чигзинмес боор.

7. Бурганга удур үймээнге кымнар киржип турар база олар-биле келир үеде чүү болур?

⁷Ажы-төлүнүң үймээн үндүргенин. Иегова ажы-төлүн: дээрниң төлээлерин база кижилерни тергиин болгаш четпес талалары чок кылдыр чаяап каан. Ынчалза-даа бир дээрниң төлээзи үймээнчи хөөн сайзырадып алгаш, Удурланыкчы Эрлик апарган. Ол тергиин турган Адам биле Еваны Иеговага удур тура халыырынче оттурган. Соонда ол үймээнге өске-даа дээрниң төлээлери база кижилер катчыпкан (Иуда 6). Безин Бурганның шилип алган чону, израильчилер, Иеговадан хая көрнүп, өске бурганнарга чүдүп эгелээннер (Иса. 63:8, 10). Ажы-төлү Оон хая көрнү бээрге, Иегованың сеткил-чүрээ ыстап-саргып аарып турган. Ынчалза-даа Бурган ону шыдажып эртипкен. Ол моон-даа улаштыр үймээнчилерни узуткаваан шаанда, бо бүгүнү шыдажып эртер. Каржы делегейге хинчектенип чурттап келген, ынчалза-даа Иеговага шынчы арткан улустарга ол эң-не аас-кежиктиг хүн боор!

8, 9. Эрлик Иегованы канчаар буруудадып турар база ол чүүл меге деп канчаар бадыткап болур бис?

⁸Эрликтиң төнчү чок мегезин. Удурланыкчы Эрлик чөптүг-шынныг Иовту (ол ышкаш Бурганның өске-даа шынчы бараалгакчыларын) Иеговага ажык-кончаа сүрүп бараалгап чоруур деп буруудаткан (Иов 1:8—11; 2:3—5). Эрлик бо хүннерге чедир Бурганның бараалгакчыларын буруудатпышаан хевээр (Ажыд. 12:10). Ынчалза-даа бистер шенелделерге болгаш аар-бергеге таварышкаш, Аңаа шынчы артып, ынакшылывысты кадагалап алыр болзувусса, Эрликти арын-нүүр чок, мегечи деп бадыткаар бис. Бурган, Иовту шаңнааны дег, бисти база туруштуг артканывыс дээш шаңнаар (Иак. 5:11).

⁹ Эрлик Иегованы каржы-хажагай база кижилерниң ажыг-шүжүүнге чүгле Ол буруулуг деп боданырынче улусту оттуруп турар. Ооң ол мегезин тарадырынга меге шажыннар дузалап турар. Чижээ, кажан чаш уруг чок апаарга, чамдык шажын башкарыкчылары ону Бурган дээрже алгаш барган деп турарлар. Олар ажыы-биле Бурганны нүгүлдеп турар! Ынчалза-даа бис алыс шынны билир бис. Шыңгыы  аарый бээр-даа болзувусса азы чоок киживисти чидирип аар-даа болзувусса, Бурганны черле буруудатпас бис. Иегова удавас аарыг улусту экиртиптер, чок апарган улусту диргизиптер деп быжыг бүзүрээр бис. База Иегованы улус ынакшылдыг Бурган деп билип каарын күзеп турар бис. Ооң дугайында улустарга чугаалап тургаш, Эрликтиң мегезинге удур харыылаптар арганы Иеговага берип турар бис (У. ч. 27:11).

10. Ырлар 21:24, 25-тен Иегованың дугайында чүнү билип ап тур бис?

¹⁰Эргим бараалгакчыларының хилинчек-човалаңын. Иегова бисти сеткилинден кээргеп турар. Истеп-сүрүүшкүннерден, аарыг-аржыктан болгаш боттарывыстың четпес талаларывыстан кайы хире хинчектенип чоруурувусту Ол билир. Бистиң караавыс чажын көргеш, Ооң баары ажыыр. (Номчуптуңар: Ырлар 21:24, 25.) Бис аарышкыны миннип турувуста, Иегова база шак ындыг аарышкыны миннип турар. Оон артык, Ол удавас бистиң аарышкывысты албан ап кааптар. (Деңнеңер: Хосталыышкын 3:7, 8; Исайя 63:9.) Иегова «караавыста чаш бүрүзүн чодуп бээр. Моон соңгаар өлүм-даа, ыы-сыы-даа, ажыг-шүжүг-даа, аарышкы-даа турбас» деп магадылап турар (Ажыд. 21:4).

11. Чок апарган өңнүктеринге хамаарыштыр Иегова чүнү миннип турар?

¹¹Чоок өңнүктери-биле чарлырын. Иегова Бодунуң чок апарган бараалгакчыларын сактып, оларны катап көрүксеп турар (Иов 14:15). Бодап көрүңер даан, Авраам деп өңнүүн Ол кайы хире сактып турар деп? (Иак. 2:23). Азы «удур-дедир көржүп алгаш, чугаалажып» турган Моисейни? (Хост. 33:11). Кайгамчык чараш ырылар чогаадып турган Давидти болгаш өске-даа ыр күүседикчилерин Ол кайы хире чоктап чоруур деп! (Ыд. ыр. 103:33). Олар чеже-даа чок апарган болза, Иегова оларны кажанда-даа утпас (Иса. 49:15). Иегова оларның дугайында шупту чүүлдү сактыр, безин Библияда  «Бурганга хамааржыр бүгү улус дириг-дир!» дээн (Лк. 20:38). Иегова оларны удавас диргизиптерге, олар катап Аңаа бараалгаар, а Ол оларның ханы мөргүлдерин дыңнаар. Чоок киживисти чидирип алган болзувусса, бо бодалдар биске оожургалды берип турар.

12. Бо сөөлгү хүннерде Иегованы чүү эң-не муңгарадып турар?

¹²Делегейде нептерээн күчүлелди. Эдем сесерлиинге болган үймээнниң уржуктары сан чок коргунчуг боор, безин байдалды өскертиринге үр үе херек апаар деп чүүлдү Иегова билип турган. Бо делегейде сайзырап турар бузут-бакты, чөптүг эвес чорукту, күчүлелди Иегова көөр хөңнү чок. Дузалаптар улузу чок кээргенчиг улусту, ылаңгыя дулгуяктарны болгаш өскүстерни бастырга, Ооң чүрээ ыстап аарып турар (Зах. 7:9, 10). Ылаңгыя кажан шынчы бараалгакчыларын кара-бажыңнап, кызагдаарга, Ооң сагыжы аарып турар. Иегова силерге дыка ынак деп, черле чигзинмеңер! Силер база Иегова ышкаш бергелерни быжыг туруштуг эртип турар болгай силер!

13. Мөзү-шынар талазы-биле улус канчаар кудулаан база Иегова чүнү кылыр?

¹³Улустуң мөзү-шынар талазы-биле кудулаанын. Бурганның овур-хевири-биле чаяаттынган улус самыырап, будалырга, Эрлик аажок өөрүп турар. Нойнуң үезинде улустуң «бүгү бодалдары үргүлчү-ле каржы-бак чүүлче угланган болган. Дээрги-Чаяакчы чер кырынга кижини чаяап каанынга хараадап, сеткилиниң ханызындан хомудаан» (Э. д. 6:5, 6, 11). Амгы үеде байдал экижээн бе? Чок, оон-даа дорайтаан! Бо делегейде улус самыыралдың бүгү хевирлеринче сундугуп кире берген. Улус Эрликти өөртүп, өгленип албаан хирезинде, самыырап, кады чурттаан эжинге өскерлип база эр кижи эр кижи-биле, кыс кижи кыс кижи-биле холбажып турар (Эф. 4:18, 19). Эрлик Бурганның шынчы бараалгакчызын аар бачыт кылырынче күткүпкеш, дыка амырап турар. Ынчалза-даа Иегова ону төнчү чок шыдажып турбас. Ол Бодунуң шилип алган хүнүнде самыыралга кайы хире хөңнү чогун көргүзүп, эттинип алыр күзели чок бузуттуг улусту узуткап кааптар.

14. Чер болгаш дириг амытаннар кандыг байдалда?

¹⁴Черниң узуткаттынып турарын. «Кижи кижини чагырып, аңаа хора чедирип чоруурундан» аңгыда, Иегованың чаяалгаларынга хумагалыг хамаарылга көргүспейн турар (Эккл. 8:9). Бистиң Черивис — Иегованың чаяалгазы, ооң дугайында сагыш човаарын Ол кижилерге дагзып каан болгай (Э. д. 1:28). Эртемденнерниң саналы-биле алырга, миллион хире дириг амытаннарның база үнүштерниң хевирлери бо чоокку каш чылдар дургузунда кижилерниң хайы-биле чиде берип болур. Ынчангаш тускай эртемниг улус кижилерни бойдуска камныг болурунче кыйгырып турар. Өөрүнчүг чүүл, Иегова «черни узуткап турарларны чок кылыр» база бүдүн Черни дываажаң кылыптар мен деп аазап турар (Ажыд. 11:18; Иса. 35:1).

15, 16. Иегованың туруштуун өттүнер күштү биске чүү берип турар? Чижектен чугаалаңар.

¹⁵ Муң-муң чылдар дургузунда кайы хире аарышкыны Иегова шыдажып чоруур-дур, бодап көрүңер даан! (« Иегова туруштуу-биле чүнү шыдажып чоруур?» деп көзенекти көрүңер.) Ол бо каржы делегейни кажан-даа болза узуткап болур. Ынчалза-даа Ол амдыгаа чедир ону кылбаан. Ынчангаш Иегованың шыдамык чоруу дээш четтиргенивисти илередир болзувусса эки. Бир чижектен көрүптээлиңер. Ашак-кадай улус удавас ада-ие боор деп турар дижик. Ынчалза-даа иезиниң иштинде чаш төл аар аарыглыг база төрүттүнүп келгеш, үр эвес чурттаар деп билип кааннар. Оларны чеже-даа хөй бергелер манап турза, олар өпеяазының төрүттүнүп келгенинге аажок өөрүп турарлар. Олар аар-бергелерни шыдажып эртеринге белен  бооп, чаш төлүн ынакшылдыг байдалга өстүрүп, эвээш-даа бол, ону аас-кежиктиг кылыр дээш кызып турарлар.

¹⁶ Бо чижекте ышкаш, Адам биле Еваның ажы-төлү база тергиин эвес кылдыр төрүттүнүп турар. Ынчалза-даа Иегова оларга аажок ынак база олар дээш сагыш човап чоруур (1 Ин. 4:19). Чижекте ада-иеге бодаарга, Иегованың байдалды өскертип шыдаар күжү бар. Ол хилинчек-човалаңны узуткаар хүннү болгаш шакты шагда-ла бодап алган (Мф. 24:36). А амдыызында ол үе келбээнде, Иегова бистерге кайы хире ынак деп чүүлдүң дугайында боданыр болзувусса, холувусту сула салбайн, быжыг туруштуг бооп артар бис.

17. Еврейлерге 12:2, 3-те сөстер биске дүжүп бербезинге канчаар дузалаар?

¹⁷ Иегова — быжыг туруштуг болурунуң эң-не эки үлегери-дир. А Ооң Оглу Иисус Ону тергиини-биле өттүнүп чоруур. Ол черге бараалгап чорааш, бис дээш улуска дорамчыладып, бак сөгледип, безин чагыга хинчектенип өлген. (Номчуптуңар: Еврейлерге 12:2, 3.) Иегованың быжыг туруштуг үлегер-чижээниң ачызында Иисус ол бүгүнү шыдажып эртипкен. Ындыг болганда, Бурганның туруштуг чоруу биске база күштү бээр.

18. 2 Пётр 3:9-тан алырга, Иегованың шыдамыының ачызында чүү болдунган?

¹⁸ Номчуптуңар: 2 Пётр 3:9. Бо каржы делегейни кажан узуткаарын Бурган дыка эки билир. Иегованың шыдамык чоруунуң ачызында миллион-миллион кижилер Ооң-биле өңнүктежип алгаш, бараалгакчылары апарган. Оларның кижи бүрүзү чырык черге төрүттүнүп, Аңаа ынак апарып база чуртталгазын бараалгадып алыр аргалыг болганынга Иеговага өөрүп четтирип турар. Мөөң чон бо каржы делегейниң төнчүзүн ажып эртиптерге, Иегованың шыдамык чоруу хилис болбаан деп чүүл көстүп кээр.

19. Чүнү кылырынче хөөнненип алган бис база бисти кандыг шаңнал манап турар?

¹⁹ Иегованың чижээ бергелерни өөрүшкүлүг ажып эртип болур деп чүүлдү көргүзүп турар. Эрликтиң тура халыышкынны улуска аарышкыны болгаш ажыг-шүжүгнү эккелген-даа болза, Иегова дөмей-ле «ачы-буянныг Бурган» бооп артпышаан (1 Тим. 1:11). Бис база, Ол дег, аас-кежиктиг бооп болур бис. Иегова Бодунуң адын арыглап, эрге-чагыргазының чөптүг-шынныын көргүзерин база бүгү бузут-бакты болгаш таваржып чоруур бергелеривисти узуткап кааптарынга чедир шыдамыккай манаар бис. Дээрде Адавыска быжыг туруштуу дээш өөрүп четтирер чылдагааннарывыс эңмежок! Бис база быжыг туруштуг артар дээш, шиитпирлиг хөөнненип алыылыңар! Ынчан бо сөстер биске күүсеттинер: «Шенелделерни шыдажып эртип турар кижи амыр-чыргалдыг, чүге дээрге оларны шыдажып эрткеш, Бурганга ынак улуска Ооң аазааны шаңналды — мөңге амыдыралды алыр» (Иак. 1:12).