1, 2. ¿Bin-utʼil ya skoltayotik te bin ya yal te Isaías 65:16, 17?

«¡MAME XLUJBAT!». Jichme sbiil te mukʼul tsoblej la yichʼ pasel ta 2017. Tey-abi la yakʼbotik jnoptik bin-utʼil ya skʼan jtsʼiktik te jwokoltike. Kʼaxemix chaneb jaʼbil pero yakotikto ta stsʼikel te jwokoltike.

² ¿Bintik wokolil yakotik ta sitintayel? Jaʼniwan te ay machʼa laj ta jfamiliatik o jtul kamigotik, meʼel mamalubel, tulan chamel, kontrainel, majtamba, te COVID-19 sok yantikxan wokoliletik. ¿Mabal jichuk te ya jkʼantik te ya sta skʼajkʼalel te jkʼaxel ya xtupʼ bael spisil ini? Yak, yame sta yorail te ma jichuk ya xkʼotix ta pasel (kʼopona Isaías 65:16, 17).

3. ¿Bin ya skʼan ya jpastik te ora ini, sok bin yuʼun?

³ Ta ora ini tulan te jwokoltike, pero ta pajel chaʼbej yaniwan xtal tulanxan jwokoltik (Mat. 24:21). Jich yuʼun ya skʼan te yakuk stsakxan yip te schʼuunel koʼtantik. Te Jesús la schol bin yuʼun te jich ya skʼan ya jpastik kʼalal jich la yal: «Junuk me awoʼtanik; yuʼun jichme ya xkolex» (Luc. 21:19, AMANNT). Te bin ya skoltayotik, jaʼ te ya jnop ta koʼtantik bin-utʼil ya sitintay swokolik te yantike.

4. ¿Bin yuʼun te jaʼ ejemplo kuʼuntik te Jehová?

⁴ ¿Machʼa te ejemplo kuʼuntik te ya stsʼijk yuʼune? Jaʼ te Jehová. Teme chamnax koʼtantik ya kaʼiytik ta swenta te sujtib ini, jnop kaʼiytik te bintik yak ta kʼoel ta pasel ta balumilal te jaʼ swentainej te Pukuje. Te Jehová ya xjuʼ ya slajin ta jkʼaxel te bintik ma lek, pero yak ta smaliyel te ya xkʼot skʼajkʼalele (Rom. 9:22). Te bitʼil mato sta skʼajkʼalel  yuʼun te Jehová, yakto ta stsʼikel. Kiltik baluneb ta chajp te bintik yak ta stsʼikel te Jehová.

5. ¿Bin-utʼil bolkʼoptaybil sbiil te Dios sok bin-utʼil ya awaʼiy aba yuʼun?

⁵ Bolkʼoptaybil te sbiile. Te Jehová mukʼ skʼoplal ya yil te sbiile sok ya skʼan ichʼel ta mukʼ (Is. 42:8). Pero ayix tal 6,000 jaʼbil te bolkʼoptaybil te sbiile (Sal. 74:10, 18, 23). Spisil ini jajch ta nichimal kʼinal Edén kʼalal te Diablo (te ya skʼan ya yal «jleaw ta kʼop») la yal ta swenta te Jehová te malaj skʼan te tseʼeluk yoʼtan te Adán sok te Evae (Gén. 3:1-5). Jaʼto tal-abi lebil ta kʼop te Jehová te malaj xyakʼbey te ants winiketik te bin ya skʼanike. Te Jesús la smel yoʼtan yuʼun te ya yichʼ bolkʼoptaybeyel skʼoplal sbiil te sTate. Jaʼ yuʼun la yalbey te jnopojeletik yuʼun te jichuk ya skʼanik ta oración: «Jtatic te ayat ta chʼulchan, acʼa ichʼotuc ta mucʼ achʼul bihil» (Mat. 6:9).

6. ¿Bin yuʼun te Jehová yakʼoj bayal tiempo yuʼun ya xchajpan te bitʼil yichʼoj kontrainel te Wentainel yuʼune?

⁶ Kontrainbil te Wentainel yuʼun. Te Jehová jaʼnax ya xjuʼ ya swentain te chʼulchan sok te Balumilal sok jaʼ lekil ajwalil (Apoc. 4:11). Te Diablo sloʼlayoj te chʼul-abatetik sok te ants winiketik sok yakʼbeyoj ta yoʼtan yuʼun ya snopik te ma jaʼuk ay ta swenta Jehová te ya xwentainwan. Te bitʼil yichʼoj kontrainel te Wentainel ya yichʼ bael tiempo yuʼun ya xchajpaj. Te Jpaswanej te ay spʼijil yakʼoj permiso yuʼun ya swentain sba te ants winiketik, pero te Jehová snaʼoj te ma xjuʼ yuʼunik (Jer. 10:23). Ta swenta te tsʼijkem yuʼun te Jehová nopol ya schajpanix sok ya xchiknaj ta ilel te jaʼ lekil Ajwalil sok ya yakʼ talel lamalkʼinal liʼ ta Balumilal te Wentainel yuʼune.

7. ¿Machʼatik-a te la stoy sbaik ta stojol te Jehová sok bin ya yichʼik pasbeyel?

⁷ Stoybail chaʼoxtul snichʼnab. Te Jehová toj la spas te chʼul-abatetik sok te ants winiketik. Pero te chʼul-abat te la stoy sba te Satanás sbiil (te ya skʼan ya yal «jkontrainwanej») la yakʼ skontrainik te Jehová te Adán sok te Eva. Jaʼnix jich ay la stoy sbaik chʼul-abatetik sok ants winiketik (Jud. 6). Ta patil ay chaʼoxtul israeletik te la spʼajik te Jehová sok jajch yichʼik ta mukʼ lotil diosetik (Is. 63:8, 10). Jich yuʼun te Jehová bayal la smel yoʼtan, pero tsʼijkem yuʼun jaʼto te ya sta skʼajkʼalel te ya slajin te jtoybaetik. Xkuxetnax kʼinal ya yaʼiyik te j-abatetik yuʼun, melel jun-nax sok te Jehová tsʼijkem yuʼunik te bintik chopol yak ta kʼaxel ta balumilal.

8, 9. ¿Bintik lotiletik ya yichʼ alel ta stojol te Jehová sok bin ya kaltik yuʼun?

⁸ Te lotiletik yuʼun te Diablo. Kʼalal te Satanás la slebey smul te Job, la yakʼ ta naʼel te spisil te j-abatetik yuʼun te Dios jaʼnax ya sle yutsil slekilik (Job 1:8-11; 2:3-5). Te Diablo ma komen ta spasel lot jaʼto ta ora ini (Apoc. 12:10). Ya kakʼbeytik yil te Satanás te jaʼ jpaslot kʼalal ya tsʼijk kuʼuntik te wokoliletike sok te jun koʼtantik ta stojol te Jehová ta swenta te skʼuxul koʼtantike. Jich bitʼil kʼax ta stojol te Job, te Jehová ya yakʼbotik bendición teme ya stsʼijk kuʼuntik te wokolil (Sant. 5:11).

⁹ Te Satanás jaʼ ya stuuntes te jwolwanejetik yuʼun te lotil religión yuʼun ya yalik te jaʼ smul te Jehová te wokoliletik ya xkʼax ta balumilal. Kʼalal ya xlaj jtul alal  ya yalik te yuʼunlaj ya skʼan jtul chʼul-abat ta chʼulchan te Dios, kʼax ma lek te jich ya yalik ta stojol te Jehová, melel ya jnaʼtik te ma jichuke. Jaʼ yuʼun te kʼalal ya stsakotik tulan chamel o ay machʼa ya xlaj kuʼuntik, maʼyuk bin-ora ya kakʼbeytik smulin te Jehová. Ya schʼuun koʼtantik te ya sta yorail te ya slajin te wokoliletik te Jehová. Ya skʼan ya jcholbeytik yaʼiy te yantik te ay skʼuxul yoʼtan te Jehová, jichme ya sutbey skʼop te machʼa ya xpʼajot yuʼun (Prov. 27:11).

10. ¿Bin ya yakʼ jnoptik te Salmo 22:23, 24 ta stojol te Jehová?

¹⁰ Te wokoliletik ta stojol te j-abatetik yuʼun. Te Jehová ya snaʼ yoʼbolil jbatik jaʼ yuʼun kʼux ya yaʼiy te kʼalal ya xkʼax jwokoltik ta kontrainel, chamel o ta skaj te jmulawilotik (kʼopona Salmo 22:23, 24). Ya yaʼiy te jwokoltik, ya skʼan ya slajin sok ya spas te bin yaloj (paja sok Éxodo 3:7, 8; Isaías 63:9). Ya sta yorail te ya xkʼot ta pasel te bin ya yal te Apocalipsis 21:4: «Ya me xcusticlambot yaʼlel sitic yuʼun te Diose; mayukix lajel, mel-oʼtan, oqʼuel o te bin cʼux».

11. ¿Bin yaʼiyel ya yaʼiy sba te Jehová te bitʼil ay lajem yamigotak?

¹¹ Te yamigotak te lajemik. ¿Bin yaʼiyel ya yaʼiy sba te Jehová kʼalal ya xtal ta yoʼtan te yamigotak te lajemike? Ya skʼan ya yilix yan buelta (Job 14:15). Jaʼnix jich bayal ya snaʼ te yamigo Abrahán (Sant. 2:23). O te Moisés te la yilbey sba sit sok te Jehová (Éx. 33:11). Ya skʼan yaʼiybey skʼayoj te David sok te yantik salmistaetik yuʼun ya skʼayojtaybeyik yutsil skʼoplal (Sal. 104:33). Manchukme lajemikix te yamigotak, pero ma chʼaybilik ta oʼtanil yuʼun te Jehová (Is. 49:15). Te Jehová ya snaʼ bin yilel ta jujuntul te yamigotak,  melel «spisil cuxulic ta sit» (Luc. 20:38). Ya sta yorail te kʼalal ya xchaʼkuxajik ya yaʼiybey te s-oracionik sok ya smulan te bin-utʼil ya x-ichʼot ta mukʼ. ¿Mabal jichuk te ya sta smukʼul koʼtantik teme ay machʼa lajem kuʼuntik?

12. ¿Bintik-a te ya smel yoʼtan yuʼun te Jehová ta ora ini?

¹² Te bintik ma lek ya yichʼ pasbeyel te ants winiketik. Te kʼalal la yichʼ kʼaxuntayel mantal ta Edén, te Jehová snaʼoj te ya xtoyxan te bin ma lek te kʼalal mato yichʼoj chajpanel-ae. Ya yilay te bintik ma lek, te bin ma stojiluk ya yichʼ pasel sok te majtamba. Spisil-ora jaʼ ya smel yoʼtan ta stojol te machʼatik maʼyuk yip yoʼtanik, te maʼyuk machʼa ya xkoltayotik yuʼun jich bitʼil te meʼba alaletik sok te meʼba antsetik (Zac. 7:9, 10). Kʼaxtoxan-a te kʼalal ya yil te ya yichʼ utsʼinel sok chukel te j-abatetik yuʼun. Kʼux aʼiybilik yuʼun te Jehová te machʼatik ya stsʼijk yuʼunik te wokolil.

13. ¿Bin muliletik ya yilay Jehová te ya spas te ants winiketik sok bin ya spas ta swenta-abi?

¹³ Te bintik ma lek ya spas te ants winiketik. Pasbilotik yuʼun ya jkʼayinbeytik stalel te Dios, pero te Satanás ya smulan te yakuk jpastik te bin ma lek. Ta skʼajkʼalel te Noé, «la yil te Jehová te bayel bintic chopol yac spasbelic te machʼatic ayic ta bahlumilal», «la smel yoʼtan yuʼun te la spas te ants-winiquetic; tal scʼuxul ta yoʼtan» (Gén. 6:5, 6, 11). ¿Lekubenbal stalel te ants winiketik? Maʼuk. Te Diablo ya smulan te ya yichʼ pasel bayal ta chajp muliletik, jich bitʼil teme ay machʼa sjoy sbaik ta winikil o ta antsil ya sjokin sbaik ta wayel (Efes. 4:18, 19). Te Diablo tseʼelnax yoʼtan teme jtul j-abat yuʼun Jehová ya xyal ta mulil. Te kʼalal ma stsʼijkix yuʼun-a te Jehová, ya slajin ta jkʼaxel te muliletik.

14. ¿Bin yak ta spasel te ants winiketik ta swenta te Balumilal sok te chambalametik?

¹⁴ Yak ta jinel te Balumilal. Te bitʼil «jtuhl winic ya smosohin yan winic yuʼun ya yaʼbe swocol», jich maba ya skanantay te Balumilal, te chambalametik jich bitʼil ya skʼan te Jehová (Ecl. 8:9; Gén. 1:28). Te cientificoetik ya yalik ta cheʼoxeb jaʼbil bael te ants winiketik ya slajinik jun millón ta chajp chambalametik, jaʼ yuʼun bayal ya smel yoʼtanik. Ya kaltik wokol te ya sta yorail te Jehová ya slajin «te machʼatic ya sjinic te bahlumilale» sok te ya spas ta Nichimal Kʼinal swolol te Balumilal (Apoc. 11:18; Is. 35:1).

15, 16. ¿Bin ya stij koʼtantik yuʼun ya stsʼijk kuʼuntik sok te Jehová? Ala jun ejemplo.

¹⁵ Jnop kaʼiytik te wokoliletik tsʼijkem yuʼun te Jehová te bayalix tal mil jaʼbil (ilawil te recuadro « Te bintik yak ta stsʼikel te Jehová»). Te jichuk ya skʼan te Jehová ya xjuʼ ya slajin ta ora te bintik ma leke. Pero bayal bin lek jtaojtik-a te bitʼil tsʼijkem yuʼune. Jnop kaʼiytik te ejemplo ini te ay jtul winik sok yinam ya x-albotik yuʼun te doctor te kʼalal ya x-ayin te alale, ya sta tulan wokol, ay schamel sok ma jaluk ya xkuxin. Manchukme ya snaʼik te ya staik tulan wokol, pero sok yutsil yoʼtanik ya smaliyik te alale. Ta swenta te skʼuxul yoʼtanik, ya xkujch yuʼunik te swokolik yuʼun ya skanantayik ta lek te alale.

¹⁶ Jaʼ jich ya xkʼot ta jtojoltik, te kʼalal ya x-ayinotik jmulawiletikix-a, melel jaʼ jtsʼumbaltik te Adán sok te Eva. Manchukme  jich-abi te Jehová kʼuxotik ta yoʼtan sok ya skanantayotik (1 Juan 4:19). Pero te Jehová ma pajaluk sok te meʼil tatil la kalbeytikix skʼoplale, melel ay bin ya xjuʼ ya spas ta jtojoltik. Yakʼbeyojix yorail yuʼun ya slajin spisil te wokoliletik (Mat. 24:36). ¿Mabal jaʼuk te skʼuxul yoʼtan ya stij koʼtantik yuʼun ya stsʼijk kuʼuntik sok?

17. Jich bitʼil ya yal te Hebreos 12:2, 3 ta swenta te Jesús, ¿bin-utʼil ya skoltayotik yuʼun ya stsʼijk kuʼuntik?

¹⁷ Te Jehová jaʼ lekil ejemplo te bitʼil tsʼijkem yuʼun. Jaʼ jich la spas te Jesús te kʼalal xtaluk ta Balumilal, tsʼijk yuʼun bolkʼoptayel, labanel sok jijpanel ta teʼ (kʼopona Hebreos 12:2, 3). Te ejemplo yuʼun te sTat jaʼ koltayot ta stsʼikel te swokole. Jaʼnix jich te joʼotik ya skoltayotik.

18. ¿Bin-utʼil ya skoltayotik te 2 Pedro 3:9 yuʼun ya jnaʼtik bintik lek lokʼem-a ta swenta te tsʼijkem yuʼun te Jehová?

¹⁸ (Kʼopona 2 Pedro 3:9). Te Jehová ya snaʼ bin-ora ya slajin te bintik ma lek ya yichʼ pasel ta balumilal. Ta swenta te tsʼijkem yuʼun, bayal millón ta tul ants winiketik ya x-abatinik ta stojol sok ya yichʼik ta mukʼ. Ya yalbeyik wokol te Jehová te yakʼoj tiempo yuʼun ya snaʼbeyik sba, te ya xchʼi skʼuxul yoʼtanik sok te ya x-abatinik ta stojol. Te kʼalal ya kichʼtik te majtanil ta swenta te tsʼijk kuʼuntik jaʼto kʼalal ta slajibal, jich ya jtatik ta ilel te lek te tsʼijk yuʼun te Jehová.

19. ¿Bin ya skʼan ya kakʼ ta koʼtantik spasel sok bin majtanil ya jtatik?

¹⁹ Te ejemplo yuʼun te Jehová ya yakʼ jnoptik te tseʼeluk koʼtantik manchukme ay bayal wokolil, melel te Jehová tseʼelnax yoʼtan stukel manchukme ya yakʼ bayal wokolil te Satanás (1 Tim. 1:11). Jaʼnix jich ya skʼan te tseʼeluk koʼtantik te bitʼil yakotik ta smaliyel te kʼalal ya schʼultes te sbiil te Jehová, te ya yichʼ naʼel te jaʼnax stukel ya xwentainwan te ya slajin te bintik ma lek sok te wokoliletik. Ya skʼan te yakuk stsʼijk kuʼuntik, melel ya smukʼulin koʼtantik te jaʼnix jich te Jehová yak ta tsʼijkel yuʼun-euk. Teme jich ya jpastike, jaʼ jich ya xkʼot ta jtojoltik te bitʼil ya yal Santiago 1:12 te jich ya yal: «Bayel me yutsil te machʼa ya xcuhch yuʼun swocol ta tsajel, como teme cuhch yuʼune, ya me xʼaʼbot yichʼ te corona yuʼun cuxlejal te yaloj Dios ya yichʼic te machʼatic cʼux ya yaʼiy ta yoʼtanic».