1, 2. Кызьы Иеговалэн кылъёсыз, кудъёсыз гожтэмын Исаиялэн 65:16, 17, милемлы кужым сёто шуг-секытъёсты чиданы?

 «ЭН СЁТСКЕ!» — озьы нимаськиз 2017-тӥ арын ортчем улосысь конгресс. Со милемыз юнматӥз но оскытӥз, ми шуг-секытъёсмес чиданы быгатӥськомы шуыса. Со дырысен ньыль ар ортчиз ини. Нош ми али ке но та лек дуннеын улӥськомы на.

² Нош кыӵе куректонъёсын тӥ пумиськоно луиды берпуметӥ аръёс ӵоже? Оло нош, тӥ секыт висиды, матысь адямидэс ыштӥды, инкуазь шимучыре сюриды, лек ужен яке уйылон-уллянъёсын пумиськиды? Оло тӥледыз курадӟыто шуг-секытъёс, кудъёсыз герӟаськемын бадӟым арлыдын яке COVID-19 пандемияен? Ми туж возьмаськомы со нуналэз, куке вань та шуг-секытъёсты вунэтомы но куке соос уз луэ ини. (Лыдӟе Исаиялэсь 65:16, 17.)

3. Мар милемлы али туж кулэ но малы?

³ Та дуннеын улон туж секыт. Нош вуонояз эшшо но бадӟымгес визь сынаськонъёс луыны быгатозы (Матф. 24:21). Соин ик милемлы али туж кулэ чидан. Малы? Иисус валэктӥз: «Чидан пыр лулъёстэс утелэ» (Лука 21:19). Вань шуг-секытъёсмес чидан понна, милемлы дышетсконо соослэсь, кинъёс со выллем ик шуг-секытъёс пыр потӥзы.

4. Малы вераны луоз, Иегова тужгес но умой адӟем карон возьматэ шуыса, кызьы чидась луоно?

⁴ Кин тужгес но умой адӟем карон возьматэ, кызьы чидась луоно? Иегова Инмар. Тӥ паймиды, дыр? Но малпаське, Шайтанлэн кивалтэмез сэрен, та дунне шуг-секытъёс пӧлы выемын. Иегова та шуг-секытъёсты син куспын быдтыны быгатэ ке но, со возьма, куке талы пуктэм нунал вуоз (Рим. 9:22). Нош со дырозь Инмар ужпум кутӥз, соосты чиданы. Ойдолэ эскеромы укмыс шуг-секытъёсты, кудъёссэ со али но чида на.

5. Кызьы Инмарлэн нимыз саптамын вал но кыӵе шӧдонъёсты тӥляд кылдо таин сэрен?

⁵ Солэсь нимзэ саптан. Иегова туж яратэ аслэсьтыз нимзэ. Солэн потэ, ваньмыз солэсь нимзэ мед гажалозы шуыса. Библиын гожтэмын: «Мон — [Иегова, ВД], со — Мынам нимы, Аслэсьтым данме мукетлы уг сёты, вӧлыса лэсьтэм сульдэръёсты ушъяны уг лэзьы» (Ис. 42:8). Но солэсь нимзэ 6 000 аръёс ӵоже саптало ини (Пс. 73:10, 18, 23). Ваньмыз кутскиз Едем садын. Соку Дьявол, мар «кылнуллӥсь» шуэм луэ, Инмарез янгыше уськытӥз, со Адамлы но Евалы шудо луыны уг сёты шуыса (Ул.-выл. 3:1—5). Ӵапак озьы ик Иеговаез шонертэм янгыше уськыто туннэ нуналозь но. Иисус туж сюлмаськиз, тросэз Атаезлэсь нимзэ уг гажало шуыса. Тӥни малы со дышетскисьёссэ тазьы вӧсяськыны дышетӥз: «Инмысь Атаймы! Тынад нимыд дано мед луоз» (Матф. 6:9).

6. Малы Иегова трос дыр висъяз возьматон понна, инмен но музъемен кивалтыны правоез вань шуыса?

⁶ Вылӥ кивалтэтэзлы пумитъяськон. Инмен но музъемен кивалтыны Иеговалэн гинэ правоез вань. Солэн кивалтэтэз — самой умой (Усьт. 4:11). Нош Дьяволлэн потэ, кылчинъёс но адямиос мед малпалозы, Инмарлэн сыӵе правоез ӧвӧл шуыса. Иеговалэн кивалтыны правоез вань шуыса возьматон понна, дыр кулэ вал. Инмар туж визьмо лэсьтӥз. Со адямиослы тырмыт дыр сётӥз валан понна, Кылдытӥсьтэк улыны тыршемзы номыр умойзэ уз вайы шуыса (Иер. 10:23). Инмарлэн чидамезлы луыса нокинлэн но юанэз уз кылды ини, Инмар умой кивалтӥсь луыны быгатэ-а яке уг-а шуыса. Ваньзы тодозы: Иегова — самой умой кивалтӥсь но солэн Эксэйлыкез музъем вылэ тупаса но кышкатэк улон ваёз.

7. Кинъёс Иеговалы пумит султӥзы но мар соосты возьма азьланяз?

⁷ Нылпиосызлэн пумит султэмзы. Иегова кылдытӥз аслэсьтыз нылпиоссэ — кылчинъёсты но, адямиосты но — нокыӵе шекъёстэк. Соос тырбыдэсэсь вал. Но берлогес одӥгез кылчин пумит султӥз но Шайтан луиз, мар «пумит султӥсь» шуэм луэ. Со Адамлэсь но Евалэсь мылкыдзэс ӝутӥз Иеговалы пумит султыны. Собере соосын ӵош пумит султӥзы мукет кылчинъёс но адямиос (Иуда 6). Израиль калык но, Инмарлэн быръем калыкез, солэсь палэнскиз но зэмос луисьтэм инмаръёслы ужаны-тыршыны кутскиз (Ис. 63:8, 10). Табере валамон, малы Иегова шӧдӥз, солэсь куштӥськизы шуыса. Озьы ке но Инмар ваньзэ тае чидаз. Со чидалоз со дырозь, куке вань пумит султӥсьёсты быдтыны дыр вуоз. Соку соос, кинъёс та лек дуннеын шуг-секытъёсын пумиськизы но Иеговалы оскымон кылизы, туж шумпотозы!

8, 9. Кызьы Иеговаез пыкыло но кызьы ми возьматыны быгатӥськомы, со озьы ӧвӧл шуыса?

⁸ Шайтанлэн пӧяськемез. Шайтан янгыше уськытӥз Иовез (озьы ик Инмарлы оскымон вань ужась-тыршисьёсты но): со Иеговалы ужа-тырше, аслыз пайдазэ утчаса гинэ (Иов 1:8—11; 2:3—5). Туннэ но Шайтан Инмарлэсь ужась-тыршисьёссэ ӵапак озьы ик янгыше уськытэ (Усьт. 12:10). Но ми быгатӥськомы возьматыны, Шайтан пӧяське шуыса. Кызьы? Визь сынаськонъёс но шуг-секытъёс дыръя Иеговалы оскымон кыльыса но сое яратыса. Соку, Иовез кадь ик, Иегова милемыз но чиданмы понна бакель кароз (Иак. 5:11).

⁹ Шайтанлэн потэ, мукетъёсыз мед малпалозы, Иегова лек адямиосты курадӟытэ шуыса. Шайтанлы юрттэ зэмос луисьтэм религия. Кылсярысь, куке нылпиос куло, куд-ог священникъёс верало, Инмар соосты инме басьтӥз шуыса, малы ке шуоно солы пичи кылчинъёс кулэ луизы. Озьы вераса, соос Инмарез сантэмало. Кыӵе умой, ми зэмлыкез тодӥськомы шуыса. Ми секыт висьыны усимы ке но яке матысь адямимы кулӥз ке но, ми  ноку но Инмарез янгыше ум уськытэ. Ми умой тодӥськомы: куке но Иегова висисьёсты бурмытоз но кулэмъёсты улӟытоз. Милям потэ, ваньзы мед тодозы, макем яратӥсь Иегова Инмар. Та сярысь мукетъёсызлы вераса, ми Иеговалы луонлык сётӥськомы, Шайтанлэн пыкылыса верамъёсызлы ответ сётыны (Мад. 27:11).

10. Мае ми тодӥськомы Иегова сярысь Псалтирьысь 21:24, 25?

¹⁰ Дуно ужась-тыршисьёсызлэн курадӟемзы. Иегова Инмар милемыз туж жаля. Со тодэ, кызьы ми курадӟиськомы уйылон-уллянъёс, висёнъёс яке асьмелэн тырмымтэосмы сэрен. Синкылиосмес адӟыса, солы чидантэм вӧсь луэ. (Лыдӟе Псалтирез 21:24, 25.) Куке милемлы вӧсь, Иеговалы но вӧсь луэ. Но милемыз жалян сяна, Инмар вӧсь луэмез быдтыны но быгатэ. (Ӵошатэ Потонэз 3:7, 8; Исаиялэсь 63:9.) Иегова кылзэ сётэ: вуоз нунал, куке со адямиослэн «син улысьтызы вань синкылизэс ӵушоз. Кулон уз ни луы, бӧрдон но, викышъян но, висён но уз ни луэ» (Усьт. 21:4).

11. Мӧзме-а Иегова эшъёсызлэсь, кудъёсыз кулӥзы ини?

¹¹ Матысь эшъёсын люкиськон. Иегова туж мӧзме оскымон ужась-тыршисьёсызлэсь, кудъёсыз кулӥзы ини. Солэн туж потэ соосын нош ик адӟиськемез (Иов 14:15). Пуктэ син азяды, макем зол Иегова мӧзме Авраам эшезлэсь (Иак. 2:23). Озьы ик Моисейлэсь, кудӥныз со «ваче син сылыса вераськиз» (Пот. 33:11). Нош макем Иегова мӧзме Давидлэсь но псаломъёсты гожъясь мукет адямиослэсь, кудъёсыз сое чебер кырӟанъёсын данъязы! (Пс. 103:33). Ваньзы соос кулӥзы ке но, Иегова аслэсьтыз эшъёссэ уг вунэты (Ис. 49:15). Соос сярысь со ваньзэ пыр-поч тодэ. Со сяна, Библиын гожтэмын: «Инмар азьын ваньмыз улэпесь» (Лука 20:38). Ӝоген Иегова соосты улӟытоз. Соку соос  нош ик солы йыбыртъялозы, нош со соослэсь сюлмысь вӧсяськемзэс кылзоз. Та милемыз тужгес но буйгатыны быгатэ соку, куке милям матысь адямиосмы пӧлысь кин ке но кулӥз.

12. Мар тужгес но вӧсь каре Иеговаез та берпум нуналъёсы?

¹² Дуннеын вӧлмем кужмысь каронъёс. Иегова валаз, Едем садын пумит султон кышкыт бервылъёсы вуттоз шуыса но, югдур тупатскытозь, трос дыр кулэ луоз шуыса. Иегова адӟемпотостэм каре лек но шонерлыктэм ужъёсты, озьы ик кужмысь каронэз, кудъёсыз та дуннеын туж вӧлмемын. Солэн сюлмыз ик вӧсь луэ, куке ултӥяло ляб адямиосты, озьы ик соосты, кинъёслэн утисьсы ӧвӧл, кылсярысь, палкышноосты но анай-атайтэк кылем нылпиосты (Зах. 7:9, 10). Тужгес но солы вӧсь луэ, куке солэсь оскымон ужась-тыршисьёссэ ултӥяло но пытсэтъёсы пуктыло. Юн оске: Иегова тӥледыз туж яратэ, малы ке шуоно тӥ со кадь ик куректонъёсты чидаськоды.

13. Кыӵе кырсь ужъёс пӧлы выемын адямиос но мар кароз Иегова?

¹³ Адямиослэн азон-калгон пӧлы выемзы. Адямиос Инмарлы укшатыса кылдытэмын вал, нош Шайтанлы туж кельше адямиослэсь мылкыдзэс ӝутыны кырсь ужъёсын вырыны. Ной улон нуналъёсы «музъем вылысь адямиос пӧлын азыса-сӧриськыса улон туж алямын вал». Соку «жаляз Кузё-Инмар, ӧкынӥз, музъем вылэ адямиез кылдытӥ шуыса, Солэн сюлмыз ӝоже усиз» (Ул.-выл. 6:5, 6, 11). Со дырысен югдур умойгес луиз-а? Ӧз. Дунне азон-калгонэн герӟаськем пӧртэм ужъёс пӧлы выемын. Шайтан шумпотэ, куке адӟе, кызьы адямиос кузпалъяськытэк ӵош кӧлало, кузпалъёссылы оскымон уг луо, озьы ик куке кышномурт кышномуртэн но пиосмурт пиосмуртэн ӵош кӧлало (Еф. 4:18, 19). Шайтан тужгес но шумпотэ, куке быгатэ Инмарлэн ужась-тыршисезлэсь мылкыдзэ ӝутыны секыт сьӧлык лэсьтыны. Но Иегова котьку но чидаса уз улы. Пуктэм дыре со быдтоз кырсь ужъёс пӧлы выем адямиосты, кудъёсызлэн воштӥськемзы уг поты. Озьы со возьматоз, макем зол адӟемпотостэм каре азон-калгонэз.

14. Мар каро адямиос музъемен но пудо-животъёсын?

¹⁴ Музъемлэн бырон калэ вуэмез. Библия вера, «адями адямиен кузёяське но солы изъян вайыса кельтэ» шуыса (Екк. 8:9). Со сяна, адямиос музъемез туж секыт югдуре вуттӥзы. Нош музъем — Иеговалэн кылдытэмез. Инмар адямиосты косӥз со сярысь сюлмаськыны (Ул.-выл. 1:28). Тодосчиослэн верамзыя, адямиос сэрен матысь аръёсы ог миллион пӧртэм пумо пудо-животъёс но будосъёс бырон калэ вуозы. Соин ик паймонэз ӧвӧл, тодосчиос туж сюлмасько шуыса. Шумпотыса вераны луэ, Иегова кылзэ сётӥз, музъемез саптасьёсты быдтыны но быдэс музъемез райлы пӧрмытыны (Усьт. 11:18; Ис. 35:1).

15, 16. Мар милемлы кужым сётэ Иеговалэсь чидамзэ адӟем карыны? Вералэ пример.

¹⁵ Малпалэ гинэ, макем трос куректонэз чидано луэ инмысь Атаймы кӧня ке сюрс аръёс ӵоже ини. (Учке « Мае чида Иегова» рамкаез). Иегова кемалась ини быгатысал та лек дуннеез быдтыны. Но со та дырозь сое ӧз лэсьты на. Ми тау кариськомы Иеговалы чидамез понна. Кылсярысь, пуктэ син азяды, кышноен карт нылпизылэсь вордӥськемзэ возьмало шуыса. Но эмъясь соослы вера, нылпизы секыт висёнэн вордӥськоз но кема уз улы шуыса. Кӧня гинэ шуг-секытъёсын соослы пумиськоно медам луы, соос нылпизылэн вордӥськемезлы шумпото. Соос сое туж ярато. Соин ик соос дась котькыӵе шуг-секытъёс пыр потыны но лэсьтыны ваньзэ, мае быгато, со шумпотыса мед улоз шуыса.

 ¹⁶ Ӵапак озьы ик Адамлэн но Евалэн вань нылпиоссы тырбыдэстэмесь луыса вордӥсько. Озьы ке но Иегова соосты яратэ но соос сярысь сюлмаське (1 Иоанн 4:19). Но примерысьтымы анай-атаен ӵошатыса, югдурез тупатыны Иеговалэн кужымез вань. Со малпаз ини, кыӵе нуналэ но часэ адямиослэсь вань курадӟонъёссэс быдтоз (Матф. 24:36). Куке ми малпаськиськомы, макем Иегова милемыз яратэ, та милемлы кужым сётэ со нуналэз чидаса возьманы.

17. Мар милемлы кужым сётыны быгатэ чидась луыны, Еврейёслы 12:2, 3 лыдэ басьтыса?

¹⁷ Иегова самой умой адӟем карон возьматэ, кызьы чидась луоно. Нош солэн Пиез, Иисус, туж умой быгатэ солэсь адӟем карыны. Музъем вылын ужакуз-тыршыкуз, Иисус ми понна чидаз сантэманэз но ултӥямез, озьы ик юбо бордын курадӟыса кулонэз. (Лыдӟе Еврейёслы 12:2, 3.) Зэм но, Иеговалэн чидамез Иисуслы кужым сётӥз ваньзэ чиданы. Озьыен, Иеговалэн чидамез милемыз но юнматыны быгатэ.

18. Кыӵе пайда вайиз Иеговалэн чидамез, 2 Пётрлэсь 3:9 лыдэ басьтыса?

¹⁸ Лыдӟе 2 Пётрлэсь 3:9. Иегова туж умой тодэ, ку самой тупась дыр та лек дуннеез быдтыны. Иеговалэн чидамез трос миллион адямиослы луонлык сётӥз соин тодматскыны но солэн ужась-тыршисьёсыз луыны. Соос пӧлысь котькудӥз тау каре: Иегова чидаз но тырмыт дыр сётӥз, соос вордӥськыны, сое яратыны но асьсэлэсь улонзэс солы сӥзьыны мед быгатозы шуыса. Куке туж-туж трос калык, та дуннеез быдтыку, улэп кылёз, валамон луоз, Иеговалэн чидамез юнме ӧй вал шуыса.

19. Мар карыны милям мылкыдмы вань но кыӵе бакель карон милемыз возьма?

¹⁹ Иеговалэн чидамез милемыз дышетэ, ми но куректонъёсмес шумпотыса чиданы быгатӥськомы шуыса. Шайтанлэн пумит султэмез трос куректонъёс но шуг-секытъёс вайиз ке но, Иегова шумпотыса улэ (1 Тим. 1:11). Ми но быгатӥськомы шумпотыны но чидаса возьманы, куке Иегова аслэсьтыз нимзэ чылкытатоз, кивалтыны правоез вань шуыса возьматоз но вань лек ужъёсты но шуг-секытъёсты быдтоз. Милям вань трос мугъёсмы Инмысь Атаймес чидамез понна тау карыны! Ойдолэ азьланяз но чидаса уломы! Соку ми пӧлысь котькудӥз сярысь тазьы вераны луоз: «Визь сынаськонэз чидам мурт шудо, малы ке шуоно со эскеремын-чакламын луоз но соин со улонлэсь венецсэ басьтоз, кудзэ Кузё-Инмар Сое яратӥсьёслы кузьманы кыл сётӥз» (Иак. 1:12).