1, 2. Йәшая 65:16, 17-айәттики Йәһваниң сөзлири, бизни һәргиз ваз кәчмәсликкә қандақ илһамландуриду?

 2017-ЖИЛИ «Һәргиз ваз кәчмәйли!» дегән мавзуда чоң жиғилиш өткүзүлгән. Жиғилишниң мәзмуни қийинчилиқларға қандақ сәвир-тақәт билән бәрдашлиқ берәләйдиғанлиғимизни көрсәткән. Төрт жил өтүп кәтти. Биз һазирғичә мошу рәзил дунияда сәвир-тақәт қилип яшаватимиз.

² Йеқинда қандақ қийинчилиқларни баштин өткүздиңиз? Аилә әзалириңиз яки достуңиздин айрилип қалдиңизму? Хәтәрлик кесәлгә гириптар болдиңизму? Қерилиқ түпәйли қийиниливатамсиз? Тәбиий-апәт, зораванлиқ яки зиянкәшликкә учридиңизму? Бир ваба, йәни таҗсиман вирус тәсиригә учридиңизму? Биз әшу қийинчилиқларниң йоқ болуп, уларни пүтүнләй унтуп, қайта улар болмайдиған күнни тәқәзалиқ билән күтиватимиз! (Йәшая 65:16, 17ни оқуң)

3. Һазир чоқум немә иш қилишимиз керәк вә немә үчүн?

³ Бу дунияда һаят кәчүрүш қийинлашти. Йеқин келәчәктә техиму көп қийинчилиқларға дуч келишимиз мүмкин (Мәт. 24:21). Немә үчүн биз сәвир-тақәтлик болушни үгинишимиз керәк? Сәвәви Әйса: «Сәвир-тақәтлик болсаңлар, мәңгүлүк һаятқа еришисиләр»,— дегән (Луқа 21:19, ЙД). Әгәр башқиларниң бизниңкигә охшаш қийинчилиқларға қандақ бәрдашлиқ бәргәнлиги һәққидә ойлансақ, бизму сәвир-тақәтлик болушни үгинәләймиз.

4. Немә үчүн Йәһвани сәвир-тақәтниң әң есил үлгиси дәп ейталаймиз?

⁴ Сәвирчанлиқниң әң есил үлгисини ким қалдурған? Йәһва Худа. Бу җавапни аңлиғанда, һәйран қалдиңизму? Бу дуния Шәйтанниң башқуруши астида, шуңа қийинчилиқларға толған. Йәһваниң бу рәзил дуния түзүлмисини йоқ қилидиған күчи бар. Бирақ шу күнни күтүп туриватиду (Рим. 9:22). Худа шу бәлгүләнгән вақит йетип кәлгичә, чидап туриватиду. Һазир  қайси тоққуз ишта Йәһваниң сәвирчанлиқ көрситип келиватқанлиғини көрүп бақайли.

5. Худаниң исмиға қандақ һақарәт қилинип кәлгән? Сиз шуни билгәндә қандақ һис-туйғуда болдиңиз?

⁵ Исмиға һақарәт қилинған. Йәһва Өз исмини яхши көриду вә башқиларниң Уни һөрмәтлишини халайду (Йәшая 42:8). Амма тәхминән 6000 жилчә Униң исми һақарәтлинип келиватиду (Зәб. 74:10, 18, 23). Дәсләптә, бу Ерәм беғида башланған. Иблис (мәнаси «төһмәт қилғучи») Яратқучини әйипләп, Адәм ата билән Һава анини хошаллиққа ериштүридиған нәрсидин мәһрум қилди дегән (Ярит. 3:1—5). Шуниңдин та һазирғичә, Йәһва инсанларни еһтияҗ болған нәрсиләрдин мәһрум қилған дәп әйиплинип келиватиду. Атисиниң исмиға дағ кәлтүрүлгәч, Әйса беарам болуп, шагиртлириға мундақ дуа қилишни үгәткән: «Асмандики Атимиз, Сениң исмиң муқәддәс болғай» (Мәт. 6:9).

6. Немә үчүн Йәһва Өз һөкүмранлиқ һоқуқиға мунасивәтлик мәсилини һәл қилиш үчүн йетәрлик вақитниң өтүшигә йол қойған?

⁶ Униң һөкүмранлиқ һоқуқиға қарши чиққан. Пәқәт Йәһваниң асман вә йәр үстидин һөкүмранлиқ қилиш һоқуқи бар вә Униң һөкүмранлиқ қилиш усули әң яхши (Вәһ. 4:11). Амма Иблис пәриштиләр вә инсанларни аздуруп, Худаниң шундақ һоқуқи йоқ дәп ойлашқа дәвәт қилған. Йәһваниң һөкүмранлиқ һоқуқиниң барлиғи вә Униң әң яхши һөкүмран екәнлиги бир күндила испатлинидиған иш әмәс. Дана Худа инсанларниң Өз Яратқучисиға беқинмай, һакимийәт жүргүзүп көрүшигә йетәрлик вақит бәргән. Шунда инсанлар өзлириниң һалак болидиғанлиғиға көз йәткүзәләйду (Йәр. 10:23). Худаниң сәвирчанлиғиниң нәтиҗисидә шу әйипләш бирла қетим вә мәңгүгә һәл қилиниду. Худа Өзиниң Падишалиғила йәр-йүзидә һәқиқий тинчлиқ вә бехәтәрликни әмәлгә ашуридиғанлиғини испатлап, Өз һөкүмранлиқ һоқуқини ақлайду.

7. Кимләр Йәһваға қарши исиян көтәргән? У уларни қандақ бир тәрәп қилиду?

⁷ Униң бәзи пәрзәнтлири исиян көтәргән. Яратқучимиз пәриштиләр вә инсанларни мукәммәл қилип яратқан. Бир исиянчи пәриштә Шәйтан («қаршилашқучи») мукәммәл инсан Адәм ата билән Һава анини Йәһваға қарши чиқишқа қайил қилған. Башқа пәриштиләр вә инсанлар исиянға қошулған (Йәһ. 6). Кейинирәк һәтта Худа таллиған исраил хәлқи арисидин бәзиләр Уни рәт қилип, ялған илаһларға ибадәт қилған (Йәшая 63:8, 10). Йәһва Өзигә сатқунлуқ қилинғанлиғини һис қилған. Бирақ У сәвир қилған вә барлиқ исиянчиларни йоқ қилидиған вақит кәлгичә сәвир-тақәт қилиду. Шу күн кәлгәндә, Йәһва вә Униңға садиқ болғанлар шат-хорамлиққа чөмиду, чүнки уларниң әнди бу дунияниң рәзиллигигә сәвир-тақәт қилишниң һаҗити йоқ.

8, 9. Йәһва һәққидә қандақ ялғанлар ейтилип келиватиду? Биз шуларға қандақ җавап қайтурушимиз керәк?

⁸ Шәйтан тохтимай ялғанчилиқ қиливатиду. Шәйтан Худаниң садиқ хизмәтчиси Аюпни әйиплигән. Шундақ қилип, у Йәһваға садиқ хизмәтчиләрниң һәммиси шәхсий мәнпәити үчүн ибадәт қилиду дегән (Аюп 1:8—11; 2:3—5). Иблис бүгүнки күнгичә шу әйипләшләрни давамлаштуруп келиватиду (Вәһ. 12:10). Биз Йәһвани сөйгәнликтин, Униңға садиқ қелиш вә синақларға бәрдашлиқ бериш арқилиқ, Шәйтанниң ялғанчи екәнлигини испатлалаймиз. Сәвирчан болсақ, Йәһва Аюпқа охшаш бизниму бәрикәтләйду (Яқуп 5:11).

⁹ Шәйтан ялған динниң йетәкчилирини ишлитип, Худа шәпқәтсиз вә инсанларниң азап-оқубәтлиригә җавапкар дәйду. Бәзиләр, һәтта кичик балилар өлүп кәткәндә,  Худаниң бир пәриштигә еһтияҗи чүшкәч, уни елип кәтти дәйду. У учиға чиққан һөрмәтсизлик әмәсму! Йәһва У меһир-шәпқәтлик бир Ата! Биз еғир кесәл болғанда яки йеқин кишимиздин айрилғанда, һәргизму Худани әйиплимәймиз. Әксичә, Худаниң кәлгүсидә ағриқларни сақайтип, өлүкләрни тирилдүрүлидиғанлиғиға ишинимиз. Биз аңлашни халайдиғанларға Йәһваниң қанчилик меһир-шәпқәтлик Худа екәнлиги һәққидә ейтип берәләймиз. Шунда Яратқучимиз Өзини әйиплигүчигә җавап бериду (Пәнд н. 27:11).

10. Зәбур 22:23, 24-айәтләр Йәһва Худа тоғрисида немини ашкарә қилиду?

¹⁰ Йәһва әзизлигән хизмәтчиләр азап-оқубәт чекиватиду. Йәһва рәһим-шәпқәтлик Худа. Зиянкәшлик, кесәллик яки намукәммәллигимиз түпәйли қилған налә-пәрядлиримизни аңлиғанда, Униң көңли азаплиниду (Зәбур 22:23, 24ни оқуң). Йәһва чекиватқан азаплиримизни чүшиниду, уларни тохтитишни халайду вә кәлгүсидә тохтитиду (Чиқиш 3:7, 8ни селиштуруң; Йәшая 63:9). Шундақ бир күн келидуки, «өлүм әнди болмайду йә қайғу, йә жиға-зар, йә ағриқ башқа болмайду» (Вәһ. 21:4).

11. Өлүп кәткән садақәтмән хизмәтчилири һәққидә Йәһва қандақ һис-туйғуда болиду?

¹¹ У йеқин достлиридин айрилған. Йәһва Өзиниң өлүп кәткән садақәтмән әр вә аял хизмәтчилирини көрүшкә бәкму тәшна (Аюп 14:15). Тәсәввур қилиң, Йәһва Өз дости Ибраһимни қанчилик сеғинғанду? Үзму үз параңлашқан Мусаничу? (Яқуп 2:23; Чиқ. 33:11) Яратқучи Давут вә башқа Зәбур язғучилириниң йеқимлиқ мәдһийә нахшилирини аңлашқа қанчилик тәшна болуватқанду, һә! (Зәб. 104:33) Худаниң достлири һазир өлүм уйқисида болсиму, У уларни унтуп қалғини йоқ (Йәшая 49:15). Уларниң миҗәз-хулқи һәққидики һәрбир инчикә тәпсилатлар Униң ядида. Муқәддәс китап:  «Униң [Худа] үчүн уларниң барлиғи тириктур»,— дәйду (Луқа 20:38). Худа бир күни уларни тирилдүриду, уларниң сәмимий дуалирини қайта аңлайду вә ибадәтлирини қобул қилиду. Әгәр йеқинлириңиздин айрилған болсиңиз, мошу сөзләр тәсәлли бериду, шундақ әмәсму!

12. Бу рәзил ахирқи күнләрдә Йәһваниң көңлини немә азаплайду?

¹² Рәзил инсанларниң башқиларни езиши. Ерәм беғида исиян башланғанда, Йәһва вәзийәтниң бара-бара яманлишидиғанлиғини билгән. Бүгүнки күндә, Яратқучи бу дунияда болуватқан рәзиллик, адаләтсизлик вә зораванлиқлардин нәпрәтлиниду. У һәрқачан баққучиси йоқ житим-йесир вә тул қалғанларға һисдашлиқ қилиду (Зәк. 7:9, 10). Худа Өзиниң садиқ хизмәтчилириниң зиянкәшликкә учриғанлиғини, түрмигә ташланғанлиғини көргәндә, көңли бәкму азаплиниду. Яратқучи билән бирликтә сәвир-тақәт қилип келиватқан һәммимизни, Униң бәкму яхши көридиғанлиғиға ишинимиз.

13. Худаниң нәзәридә инсанлар қандақ әхлақсизлиққа петип қалған? У кәлгүсидә немә иш қилиду?

¹³ Инсанлар барғансири әхлақсиз һаят кәчүрүватиду. Худаниң образида яритилған инсанларниң әхлақсиз һаят кәчүрүшини Шәйтан бәкму халайду. Худа Нуһниң заманида инсанларниң рәзиллишип кәткинини көрүп, йәр йүзидә инсанни яратқанлиғиға әпсусланди (Ярит. 6:5, 6, 11). Шу замандин бери, бу дунияниң вәзийити яхшиландиму? Яқ, өзгәргини йоқ! Бүгүнки күндә әр-аяллар вә охшаш җинистики кишиләрниң түрлүк әхлақсиз иш-һәрикәтлири көпийип кәтти. Иблис буни көрүп интайин хошал болғанду, һә! (Әфәс. 4:18, 19) Болупму, Йәһваға пак ибадәт қилғучилар шундақ еғир гуна қилса, Шәйтан бәкму хошал болиду. Йәһваниң сәвир-тақити чекигә йәткәндә, У әхлақсизлиқни өч көридиғанлиғини көрситиду.

14. Инсанлар Худа йәр йүзидә яратқан мәвҗудатларға немә қиливатиду?

¹⁴ Инсанлар мәвҗудатларни вәйран қиливатиду. Инсан инсанларға зиянкәшлик қилипла қалмай, Йәһва уларға ишәнч қилип тапшурған йәр йүзидики җанлиқларғиму зиянкәшлик қиливатиду (Вәз 8:9; Ярит. 1:28). Бәзи мутәхәссисләр, кәлгүси бир қанчә жилда инсанлар һайванатларниң бир миллиондин көпирәк түрини қурутуветиду дәп агаһландуриду. Шуңа инсанларниң муһит булғиниши һәққидә ғәм-тәшвишкә чүшиши һәйран қаларлиқ әмәс! Йәһваға миң шүкри, У «йәрни гумран қилғучиларни гумран» қилиду вә пүткүл йәр йүзини җәннәт маканға айландуриду (Вәһ. 11:18; Йәшая 35:1).

15, 16. Немә бизни Йәһва билән бирликтә сәвир-тақәт қилишқа дәвәт қилиши керәк? Мисал кәлтүрүң.

¹⁵ Нәччә миң жилдин буян Асмандики Атимизниң барлиқ азап-оқубәтләргә сәвир-тақәт қилип келиватқанлиғини ойлап көрүң (« Йәһва сәвир-тақәт қиливатқан ишлар» намлиқ рамкиға қараң.). Йәһваму бу рәзил дунияни халиған вақтида йоқ қилишқа қадир! Униң сәвирчанлиғи биз үчүн чоң бәрикәт. Мундақ пәрәз қилайли: бир җүп әр-аял балисиниң еғир кесәл болуп туғулидиғанлиғи, һаят кәчүрүши асан болмайдиғанлиғи, һәтта узун өмүр көрмәй өлүп кетидиғанлиғини билди. Һәтта бу асанға чүшмәйдиғанлиғини билсиму, ата-ана балилиқ болидиғанлиғидин хошал болиду. Улар өз пәрзәндини сөйгәч, униңға әң яхшисини бериш үчүн һәрқандақ қийинчилиқларға бәрдашлиқ беришкә тәйяр.

¹⁶ Худди шуниңдәк, Адәм ата вә Һава аниниң барлиқ әвлатлири бу дунияға намукәммәл туғулди. Бирақ Йәһва уларни сөйиду вә ғәмхорлуқ қилиду (Йоһ. 1-х. 4:19). Жуқуридики мисалидики ата-аниларға охшимайдиған  йери, Йәһва Өз пәрзәнтлириниң азап-оқубәтлирини йоқ қилалайду. Өзи яратқан инсанларниң барлиқ азап-оқубәтлирини йоқ қилидиған вақит-саатни аллиқачан бәлгүләп қойған (Мәт. 24:36). Униң меһир-муһәббити бизни әшу вақит йетип кәлгичә, сәвир-тақәт қилишқа дәвәт қилмамду?

17. Ибранийларға 12:2, 3-айәтләрдики Әйса һәққидики сөзләр, немә үчүн бизни давамлиқ сәвир-тақәтлик болушқа үндәйду?

¹⁷ Йәһва сәвирчанлиқниң мукәммәл үлгиси. Әйса Мәсиһму Өз Атисиниң сәвирчанлиғини үлгә қилған. У инсан сүпитидә, биз үчүн мәсхиригә учрап, азаплиқ қийнашларға бәрдашлиқ бәргән (Ибранийларға 12:2, 3ни оқуң). Йәһваниң сәвирчанлиқ үлгиси, шәк-шүбһисизки Әйсаға бәрдашлиқ беришкә күч бәргән. У бизгиму күч берәләйду.

18. Петрусниң 2-хети 3:9-айәт Йәһваниң сәвирчанлиғи немиләрни әмәлгә ашурғанлиғини чүшинишимизгә қандақ ярдәм бериду?

¹⁸ Петрусниң 2-хети 3:9ни оқуң. Худа бу рәзил дунияни қачан йоқ қилишни яхши билиду. Йәһва сәвирчан болғач, нурғун инсанлар Уни тонуш имканийитигә егә болди вә һазир миллионлиған адәмләр бирликтә җәм болуп, Униңға ибадәт қиливатиду. Улар Худаниң шунчә узун жиллар сәвирчанлиқ көрсәткинигә бәк миннәтдар! Сәвәви уларниң туғулуп, Яратқучини яхши көрүшни үгинип, өзлирини Униңға беғишлаш имканийити болди. Ахирғичә бәрдашлиқ бәргән миллионлиған инсанлар мукапатқа еришкәндә, Йәһваниң сәвирчан болушни таллиғанлиғиниң қанчилик тоғра қарар екәнлиги ениқ болиду.

19. Биз чоқум немә қилишқа қәтъий бәл бағлишимиз керәк вә қандақ мукапатқа еришимиз?

¹⁹ Йәһва хошаллиқ билән сәвир-тақәт қилип келиватиду. Шәйтанниң көңүл ағриғи вә азапларни пәйда қилғиниға қаримай, Йәһва шат-хорамлиқни сақлап қалған (Тим. 1-х. 1:11). Йәһваниң Өзиниң исмини улуқ қилидиғанлиғини, Өз һөкүмранлиқ һоқуқиниң һәқ екәнлигини испатлайдиғанлиғини вә биз чекиватқан азап-оқубәтләрни йоқ қилидиғанлиғини сәвирчанлиқ билән күтсәк, бизму шат-хорамлиқни сақлалаймиз. Асмандики Атимизниң сәвирчанлиқ көрситиватқанлиғини билип, бизму ахирғичә бәрдашлиқ беришкә қәтъий бәл бағлайли! Шундила бу сөзләрниң һәқиқәт екәнлигини көрүп йетимиз: «Синақларни сәвир-тақәт билән баштин өткүзгән киши нәқәдәр бәхитлик, чүнки у Йәһваниң мәрһәмитигә егә болуп, Уни сөйгәнләргә вәдә қилған һаятлиқ таҗиға еришиду» (Яқуп 1:12, ЙД).