1-2. Ive vọ yehẹ Aizaya 65:16, 17 rọ chọn avwanre uko vwo chirakon?

“WO JẸ OMA RHỌ WẸ-Ẹ!” ọyena yen uyovwinrota rẹ ọghwẹkoko ri 2017. Vwẹ ọghwẹkoko yena, a ta ota kpahen obo re se vwo chirakon rẹ ebẹnbẹn sansan rẹ avwanre hirharokuẹ. Ẹgbukpe ẹne wanvrẹ re, jẹ avwanre ji chirakon yerẹn vwẹ akpọ rẹ Eshu nana.

² Ebẹnbẹn vọ yen wo hirharoku o krinọ na-a? Ohwo rẹ orua yẹrẹ ugbeyan wẹn ọvo ghwuru? Wọ họnvwa ọga ro se hwe ohwo? Wo chirakon rẹ ebẹnbẹn rẹ ọghwo? Oghwọrọ ri kpregede, ozighi-egbe, yẹrẹ omukpahen te we oma? Gbane ofu dje we fikirẹ ọga ri COVID-19 yẹrẹ emiavwe ọfa rọ ro akpọeje? Avwanre rhẹro rẹ ọke rẹ enana eje cha vwọ wanvrẹ, e me chọrọ ohwo ẹro, e rhe che rhiẹromrẹ ayen ọfa-a!— Se Aizaya 65:16, 17.

3. Die yen ofori nẹ e ru enẹna, kẹ diesorọ e vwo ru ọtiọyen?

³ Akpọ rẹ Eshu nana vọnre vẹ ebẹnbẹn, jẹ efa re gan vrẹ enana je cha vwẹ obaro. (Mat. 24:21) Ọtiọyena, ofori nẹ a kpurhiẹn phiyọ akoechiron rẹ avwanre. Diesorọ? Jesu da ta: “Akoechiro wẹn wọ cha vwọ mrẹ arhọ wẹn reyọ.” (Luk 21:19) E de roro kpahen obo re chọn ihwo efa uko vwo chirakon rẹ ebẹnbẹn rayen, ọyena cha chọn avwanre uko vwo kpurhiẹn phiyọ akoechiron rẹ avwanre.

4. Diesorọ a vwọ tanẹ Jihova yen djudje rẹ akoechiron ro me yovwin kparobọ?

⁴ Ono yen djudje rẹ akoechiron ro me yovwin kparobọ? Jihova Ọghẹnẹ. Ẹkpahọnphiyọ yena se gbe we unu. Ẹkẹvuọvo, wọ cha riẹn oboresorọ a vwọ ta ọtiọyen siẹrẹ wo de roro kpahọn. Idẹbono yen suẹn akpọ nana rọ vọnre vẹ ebẹnbẹn na. Jihova se phioba phiyọ ebẹnbẹn na eje ichichiyin na, ẹkẹvuọvo ọ hẹrhẹ ọke ro bruphiyọ. (Rom 9: 22) Enẹna, Ọghẹnẹ rẹ avwanre chirakon hẹrhẹ ọke yena. E jẹ a fuẹrẹn erọnvwọn irhirin rẹ Jihova chirakon rọyen.

5. Idjerhe vọ yen e vwo gbe odẹ rẹ Ọghẹnẹ ku, kẹ ẹwẹn vọ yen rhe we kpahen ọnana?

⁵ E gbe odẹ rọyen ku. Jihova vwo ẹguọnọ rẹ odẹ rọyen, ọ guọnọre nẹ ihwo eje muọghọ kẹ. (Aiz. 42:8) Jẹ, e gbe odẹ na ku vwẹ uvwre rẹ ikpe uriorin esan re wanre. (Une 74:10, 18, 23) A ton rọ phiyọ vwẹ ogba rẹ Idẹn, ọke rẹ Eshu (ro mudiaphiyọ “Ovwegrẹn yẹrẹ Ọrọvwọsua”) vwọ vuẹ Adam vẹ Ivi nẹ Jihova si obo re cha nẹrhẹ oma vwerhen ayen nu kẹ ayen. (Jẹn. 3:1-5) Nẹ ọke yena rhe, kọyen e vwo guẹn efian nyẹ Jihova nẹ ọ djahen erhuvwu kẹ ihworakpọ. Jesu guọnọ phorho ekan nẹ odẹ rẹ Ọsẹ rọyen. Ọnana yen sorọ o vwo yono idibo rọyen nẹ ayen nẹrhovwo ọtiọna: “Ọsẹ rẹ avwanre rọhẹ obo odjuvwu, e je ru odẹ wẹn fon.”—Mat. 6:9, NW.

6. Diesorọ Jihova vwọ hẹrhẹ nẹ ọke grongron wanvrẹ tavwen o ki djephia nẹ ọyen vwo uturhi ro vwo sun akpọ vẹ odjuvwu?

⁶ A vwọso usuon rọyen. Jihova vwo uturhi ro vwo sun odjuvwu vẹ akpọ; usuon rọyen yen me yovwin. (Evwọ. 4:11) Ẹkẹvuọvo, Idẹbono guọnọ phiẹn emekashe vẹ ihworakpọ vwo roro nẹ Ọghẹnẹ vwo uturhi tiọye-en. Ọ cha reyọ ọke tavwen a ke sa rhuẹrẹ ota nana phiyọ, ro shekpahen ohwo ro fori nẹ o sun akpọ vẹ odjuvwu. Jihova de brorhiẹn rẹ aghwanre, rọ vwọ vwẹ uphẹn kẹ ihworakpọ nẹ ayen sun oma rayen, rere ayen mrẹvughe nẹ ayen che se ru ọtiọyen siẹrẹ ayen de chukoku irhi rẹ Ọmemama na-a. (Jer. 10:23) Fikirẹ akoechiron rẹ Ọghẹnẹ, a cha rhuẹrẹ ota ro sheri na phiyọ ofuọvo. Jihova da womarẹ Uvie rọyen vwo phi ufuoma vẹ ofuvwegbe phiyọ akpọ na nu, ihwo ejobi ke cha riẹn nẹ ọyen vwo uturhi ro vwo sun.

7. Amono yen vwọso usuon ri Jihova, kẹ die yen o che ru ayen?

⁷ Emọ rọyen evo vwọsuọ. Jihova ma ihworakpọ vẹ emekashe gbagba, o vwo asan vuọvo ro shechọ vwẹ oma raye-en. Ẹkẹvuọvo, amakashe rọ rhe dia Eshu (ro mudiaphiyọ “Ovwegrẹn yẹrẹ Ọrọvwọsua”) da phiẹn Adam vẹ Ivi, ayen da vwọso Jihova. Emakashe kugbe ihworakpọ evo da vwomaba ayen. (Jud 6) Ọke vwọ yanran, ẹgborho rẹ Izrẹl rẹ Ọghẹnẹ jẹreyọ da je siọn, eghẹnẹ efian kọyen ayen ga. (Aiz. 63:8, 10) Jihova de no nẹ ayen ku ọyen phiyotọ. Dedena o ji vwo odirin rayen, eriyin o che vwo odirin rhi te ọke rọ cha vwọ ghwọrọ ihwo eje re vwọsuọ. Ọyena cha vwẹ aghọghọ kẹ idibo rọyen eje re vẹ ọyen gbe chirakon rẹ ebẹnbẹn rẹ akpọ rẹ Eshu nana!

8-9. Efian vọ yen e gun nyẹ Jihova, kẹ die yen avwanre se ru?

⁸ Efian rẹ Idẹbono guẹn. Eshu ta eta ebrabra vwọso odibo ri Jihova re se Job, rọ vwọ ta erharhe eta ro mudiaphiyọ nẹ idibo rẹ Ọghẹnẹ eje fuevun ga Jihova fikirẹ urhurusivwe rẹ erere romobọ rayen. (Job 1:8-11; 2:3-5) Idẹbono je ta eta ebrabra tiọyena te ọke na. (Ẹvwọ. 12:10) Avwanre se dje Eshu phiyọ ọvwọrefian siẹrẹ e de chirakon rẹ edavwini, je fuevun kẹ Jihova ọkieje fikirẹ ẹguọnọ rẹ avwanre vwo kpahọn. Kirobo rẹ Jihova hwosa kẹ Job, eriyin o ji che bruba kẹ avwanre siẹrẹ e de chirakon.—Jems 5:11.

⁹ Eshu womarẹ ilori rẹ ẹga efian vwọ vuẹ ihwo nẹ Jihova yen ọvwuvumwemwu rọ sua ojaẹriọ kẹ ihworakpọ. Siẹrẹ emọ  de ghwu, ihwo evo ke tobọ tanẹ Ọghẹnẹ yen reyọ ayen kidie ọ guọnọ emekashe efa vwẹ obo odjuvwu. Ọyena aroeyivwo! Avwanre riẹn oka rẹ Ọghẹnẹ rẹ Jihova hepha. Avwanre da họnvwa okpọga, yẹrẹ siẹrẹ ohwo rẹ avwanre vwo ẹguọnọ kpahen de ghwu, avwanre tanẹ Ọghẹnẹ yen sorọ-ọ. Ukperẹ ọtiọyen, avwanre vwo esegbuyota nẹ ọ cha rhuẹrẹ ekuakua na eje phiyọ ẹdẹ ọvo. Avwanre guọnọ vuẹ ihwo eje re cha kerhọ nẹ Jihova ọyen Ọghẹnẹ rẹ ẹguọnọ. Ọyena cha nẹrhẹ ọ sa nabọ kpahen kẹ ọ rọ reyọ vwọ jehwẹ na.—Isẹ 27:11.

10. Die yen Une Rẹ Ejiro 22:23, 24 ta kpahen Jihova?

¹⁰ Ojaẹriọ rẹ idibo rọyen. Jihọva ọyen Ọghẹnẹ rẹ arodọnvwẹ. Ọ da Jihova siẹrẹ avwanre de kperẹ se fikirẹ omukpahen, ọga, yẹrẹ jẹgba. (Se Une Rẹ Ejiro 22:23, 24.) Jihova riẹn obo wọ rioja rọyen; ọ guọnọ dobọ rọyen ji, o che phioba phiyọ kẹrẹkpẹ. (Ji ni Eyanno 3:7, 8; Aizaya 63:9.) Ọke yena de te, “ko ririe ameoviẹ nẹ ẹro [rẹ avwanre], ughwu gbe cha dia ọfa-a, eyẹ omaemuohọ eye oviẹ eyẹ odjadja ọfa-a.”—Ẹvwọ. 21:4.

11. Mavọ yen oma ruẹ Jihova kpahen idibo rọyen ri ghwure?

¹¹ Igbeyan rọyen ri ghwure rọ rha sa mrẹ-ẹ. Mavọ yen oma ruẹ Jihova kpahen idibo rọyen ri ghwure? O rhẹro rẹ ọke rọ cha vwọ mrẹ ayen! (Job 14:15) Di roro oborẹ Jihova rhẹro rẹ ọke rọ cha vwọ rhoma mrẹ ugbeyan rọyen Ebraham! (Jems 2:23) Yẹrẹ obo ro rhẹro rẹ ọke rọ vwọ mrẹ Mosis rọ vẹ ọyen “hirhe aro ku” ohwohwo ta ota! (Eyan. 33:11) O ji rhẹro rẹ ọke rọ vwọ rhoma kerhọ rẹ ine rẹ ejiro ri Devid vẹ ibuine ichekọ na! (Une 104:33) Dede nẹ igbeyan rẹ Ọghẹnẹ nana  vwerhẹn vwọrẹ ughwu, ayen cha sa chọrọ Jihova ẹro-o. (Aiz. 49:15) Ọ karophiyọ erọnvwọn eje vwẹ ugboma vẹ uruemu rayen. Vwẹ ọhọ ọvo, a sa tanẹ “ayen ejobi rhọ vwọ kẹ.” (Luk 20:38) Ọ cha kpare ayen nushi ẹdẹ ọvo, ọ me rhoma nyo ẹrhovwo ji rhiabọreyọ ẹga rayen. E jẹ eta nana bọn wẹ gan siẹrẹ ohwo wo vwo ẹguọnọ kpahen de ghwu.

12. Die yen sua omaemuophiyọ kẹ Jihova vwẹ ẹdẹ ebrabra nana?

¹² Ihwo ebrabra re vwẹ oja ria ihwo efa. E vwo gbevwọso Ọghẹnẹ vwẹ ogba rẹ Idẹn nu, Jihova da ghwa riẹn nẹ ekuakua cha braphiyọ tavwen e ke rhoma yovwin. O vwo utuoma kpahen umwemwu, oshenyẹ, kugbe ozighi-egbe ra mrẹ vwẹ akpọ na nonẹna. Ọkieje yen o vwo roro kẹ eyauku, emephrorivwin, kugbe ihwo efa re cha sa chochọn rẹ oma raye-en. (Zek. 7:9, 10) Jihova muomaphiyọ siẹrẹ ọ da mrẹ idibo rọyen re shenyẹ, vẹ e rehẹ uwodi. Jẹ o muwẹro nẹ o vwo ẹguọnọ rẹ idibo rọyen eje re vẹ ọyen gbe chirakon.

13. Ogbiru ra ghẹmrẹ vọ yen ihworakpọ vwobọ vwọ, kẹ die yen Jihova che ru?

¹³ Ogbiru ra ghẹmrẹ rẹ ihworakpọ vwobọ vwọ. Eshu guọnọ phiẹn ihworakpọ ra mare vwẹ uhoho rẹ Ọghẹnẹ vwo vwobọ vwẹ ogbiru ra ghẹmrẹ. Jihova vwọ “mrẹ nẹ evun umwemwu rẹ ohwo rhoro gangan” vwẹ ọke ri Noa, “ọ da da Ọrovwohwo gangan rọ vwọ ma ohwo phihọ akpọ na, ọ da da vwẹ udu rọye.” (Jẹn. 6:5, 6, 11) Akpọ na yovwirin enẹna re? Ẹjo, kakaka! O muẹro nẹ oma vwerhen Idẹbono siẹrẹ ọ da mrẹ koka koka rẹ ọfanrhiẹn rọ vọn asan eje nonẹna, tẹ ọ rẹ ọshare vẹ aye, kugbe ọ rẹ ọshare vẹ ọshare, yẹrẹ ọ rẹ aye vẹ aye! (Ẹfe. 4:18, 19) Oma vwerhọn san siẹrẹ ọ da sa phiẹn idibo ri Jihova vwo ru umwemwu. Odirin ri Jihova de te oba re, ko che djephia nẹ o vwo utuoma gangan kpahen koka koka rẹ ọfanrhiẹn.

14. Die yen ihworakpọ ruẹ eranvwe vẹ otọrakpọ na rẹ Ọghẹnẹ mare?

¹⁴ Ihwo ghwọrọ akpọ rẹ Ọghẹnẹ mare na. ‘Ohwo tua ohwo muotọ kẹ umiovwo rọye.’ Vwọba, ihworakpọ ghwọrọ akpọ na vẹ eranvwe rẹ Jihova vwọ kẹ ayen nẹ ayen vwẹrote. (Agwho. 8:9; Jẹn. 1:28) Egbaerianriẹn evo si ihwo orhọ nẹ fikirẹ oborẹ ihworakpọ ruẹ, vwẹ ikpe evo re cha na, a rha cha mrẹ oka rẹ eranvwe vẹ ekankọn sansan ri te oduduru ọvo vwẹ akpọ na-a. Ọnana yen sorọ ihwo evo vwo roro nẹ ẹdẹ ọvo akpọ na cha ghwọrọ kufia siẹvuọvo! Jẹ, oma vwerhen avwanre nẹ Jihova veri nẹ ọyen cha ‘ghwọrọ [ihwo re] ghwọrọ . . . akpọ na,’ o mi ru akpọ na phiyọ Iparadaisi.—Ẹvwọ. 11:18; Aiz. 35:1.

15-16. Die yen ofori nẹ o mu avwanre vwo nene Jihova chirakon? Dju udje rọyen.

¹⁵ Roro kpahen ebẹnbẹn na eje rẹ Ọsẹ rẹ avwanre rọhẹ obo odjuvwu chirakon rọyen vwẹ ikpe uriorin buebun rhire na. (Ni ekpeti na “ Oborẹ Jihova Chirakon Rọyen.”) Jihova se phioba phiyọ akpọ ọbrabra nana vwẹ ọke rọ guọnọre. Ẹkẹvuọvo, odirin rọyen fierere kẹ avwanre eje! Roro kpahen udje nana. Vwẹro roro nẹ a vuẹ aye gbe ọshare ọvo nẹ ọmọ rẹ ayen che vwiẹ che vwo oshechọ buebun vwẹ ugboma rọyen, e de ji vwiẹ nu, ọmọ na cha dia kri tavwen o ki ghwu-u. Dedena ayen ji muegbe rẹ ayen vwo dede ọmọ na. Ẹguọnọ rẹ ayen vwo kpahen  ọmọ na da nẹrhẹ ayen chirakon rẹ ẹdia na, je davwẹngba rayen eje vwọ vwẹ ukẹcha ro fori kẹ ọmọ na.

¹⁶ Vwẹ idjerhe vuọvo na, emọ na eje rẹ Adam vẹ Ivi vwiẹre gbare-e. Dedena Jihova vwo ẹguọnọ rayen, ọ je vwẹrote ayen. (1 Jọn 4:19) Vwọ fẹnẹ ọsẹ vẹ oni vwẹ udje na, Jihova se phioba phiyọ ojaẹriọ rẹ emọ rọyen eje. O bru ọke phiyotọ ro che vwo ru ọnana. (Mat. 24:36) E jẹ ẹguọnọ ri Jihova mu avwanre vwo nene chirakon te asan ro fori.

17. Mavọ yen eta ra ta kpahen Jesu vwẹ Hibru 12:2, 3 sa vwọ cha avwanre uko vwo chirakon ọkieje?

¹⁷ Jihova yen djeudje rẹ akoechiron gbagba. Jesu vwẹrokere udje rẹ akoechiron rẹ ọsẹ rọyen. Ọke rọ vwọ hẹ otọrakpọ na, Jesu chirakon rẹ eta ebrabra, ophọphọvwe kugbe ughwu vwẹ urhe oja fikirẹ avwanre. (Se Hibru 12:2, 3.) O muẹro nẹ udje rẹ akoechiron ri Jihova yen chọn rọ uko. Ọ je sa chọn avwanre uko.

18. Mavọ yen 2 Pita 3:9 vwọ chọn avwanre uko vwọ riẹn erere rẹ odirin ri Jihova ghwa rhe?

¹⁸ Se 2 Pita 3:9. Jihova riẹn ọke ro fori ro che vwo phioba phiyọ akpọ ọbrabra nana. Odirin rọyen nẹrhẹ e se koko otu gbidigbidi rẹ ihwo ri te oduduru buebun re vwẹ ẹga vẹ ejiro vwọ kẹ. Oma vwerhen ayen nẹ odirin ri Jihova nẹrhẹ e se vwiẹ ayen, ayen de ji vwo uphẹn rẹ ayen vwo vwo ẹguọnọ rẹ Ọghẹnẹ je vwomakpahotọ kẹ. Ọke rẹ Jihova de che ku ebruphiyọ ku oduduru rẹ ihwo buebun ri fuevun te oba, ka cha mrẹvughe nẹ orhiẹn ro bruru ro vwo chirakon na ghene vọn vẹ erere!

19. Die yen ofori nẹ e brorhiẹn re vwo ru, kẹ erere vọ yen che norhe?

¹⁹ Jihova yono avwanre obo ra sa vwọ ghọghọ ọke re de chirakon. Jihova jehẹ “Ọghẹnẹ rẹ oma vwerhan,” dede nẹ o muomaphiyọ mamọ fikirẹ ojaẹriọ vẹ ebẹnbẹn rẹ Eshu soro. (1 Tim. 1:11) Avwanre je sa ghọghọ, rẹ avwanre vwọ hẹrhẹ ọke rẹ Jihova che vwo ru odẹ rọyen fon, kpare usuon rọyen kpenu, ji phioba phiyọ umwemwu vẹ ebẹnbẹn na eje rẹ avwanre hirharokuẹ. E jẹ avwanre brorhiẹn re vwo chirakon, rẹ avwanre vwọ riẹn nẹ Ọsẹ rẹ avwanre rọhẹ obo odjuvwu ji ruẹ ọtiọyena. Eta nana che rugba vwẹ oma rẹ avwanre ohwo ọvuọvo siẹrẹ e de chirakon: “Ebruba kẹ ohwo ro chirakon vwẹ ọke rẹ odavwini, fikiridie o de mudia gan, ko vwo erhu rẹ arhọ na, rẹ Ọrovwohwo ve phihọ kẹ otu re guọnerọ.”—Jems 1:12.