1-2. Maipfi a Yehova a re kha Yesaya 65:16, 17 a ri thusa hani u dzula ri tshi konḓelela?

BUTHANO ḽa dzingu ḽa 2017 ḽo vha ḽi na tshiṱoho tshi takadzaho tshine tsha ri “Ni Songo Neta!” Ḽeneḽo buthano ḽo ri gudisa uri ri nga konḓelela hani thaidzo dzine ra sedzana nadzo. Ho no fhela miṅwaha miṋa ro vha na ḽeneḽo buthano nahone na zwino ri kha ḓi konḓelela kha ḽino shango ḽivhi.

² Ndi thaidzo dzifhio dze na ṱangana nadzo zwenezwino? Naa no lovhelwa nga muraḓo wa muṱa kana nga khonani yaṋu? Naa ni na vhulwadze vhune ha nga ni vhulaya? Naa ni na thaidzo dzi ḓiswaho nga vhulala? Naa no kwamiwa nga khombo dza mupo, vhuvemu kana u tovholwa? Kana naa a ni ḽi lu ḓifhaho nga nṱhani ha dziedzi ḽa COVID-19 kana nga maṅwe malwadze? Ro lavhelela nga maṱo matswuku ḓuvha ḽine ra ḓo vha ri si tsha sedzana na thaidzo dzine ra khou ṱangana nadzo zwino. Nga tshenetsho tshifhinga, ri ḓo vha ri si tsha dzi humbula nahone dzi si tsha ḓo dovha dza vha hone!—Vhalani Yesaya 65:16, 17.

3. Ri tea u ita mini zwino nahone ndi ngani?

³ A ri ḽi lu ḓifhaho kha ḽino shango nahone zwithu zwi nga ṋaṋa u vhifha hu si kale. (Mat. 24:21) Zwi tou vha khagala uri ri tea u guda u dzula ri tshi konḓelela. Ndi ngani? Ndi ngauri Yesu o ri: “Nga u konḓelela ni ḓo ḓitshidza.” (Luka 21:19) U humbula uri na vhaṅwe vha khou konḓelela milingo i fanaho na yashu, zwi ḓo ri thusa uri ri dzule ri tshi konḓelela.

4. Ndi ngani ri tshi nga amba uri Yehova ndi ene tsumbo yavhuḓi ya u konḓelela?

⁴ Ndi nnyi ane a vha tsumbo yavhuḓi ya u konḓelela? Ndi Yehova! Naa zwenezwi zwi a ni mangadza? Khamusi zwi khou ni mangadza. Fhedzi arali na nga humbula nga hazwo, ni ḓo kona u zwi pfesesa. Diabolo ndi ene ane a khou langa shango nahone ḽino shango ḽi na thaidzo nnzhi vhukuma. Yehova u na maanḓa  a u fhelisa thaidzo dzoṱhe dzine ra khou sedzana nadzo zwino, fhedzi o lindela ḓuvha ḽe a ḽi vhea ḽi tshi swika. (Vharoma 9:22) Musi ḽeneḽo ḓuvha ḽi sa athu u swika, Yehova u khou konḓelela zwithu zwinzhi. Kha ri ambe nga ha zwithu zwa 9 zwine Yehova a khou zwi konḓelela.

5. Dzina ḽa Mudzimu ḽo ḓodzwa hani matope nahone ni ḓipfa hani nga zwenezwo?

⁵ Yehova u khou konḓelela dzina ḽawe li tshi ḓodzwa matope. Yehova u funa dzina ḽawe nahone u ṱoḓa vhathu vhoṱhe vha tshi ḽi ṱhonifha. (Yes. 42:8) Fhedzi dzina ḽawe ḽo ḓodzwa matope lwa miṅwaha i ṱoḓaho u vha 6 000 yo fhiraho. (Ps. 74:10, 18, 23) Zwenezwi zwo thoma tsimuni ya Edeni musi Diabolo (zwine zwa amba uri “Mupomoki”) a tshi amba uri Mudzimu o dzima Adamu na Eva zwiṅwe zwithu zwine zwa nga ita uri vha takale. (Gen. 3:1-5) U bva nga tshenetsho tshifhinga, Mudzimu o pomokwa uri u khou dzima vhathu zwithu zwine vha zwi ṱoḓa. Yesu ho ngo takalela dzina ḽa Khotsi awe li tshi ḓodzwa matope. Ndi ngazwo o funza vhafunziwa vhawe uri musi vha tshi rabela vha ri: “Khotsi ashu wa ṱaḓulu, dzina ḽau nga ḽi vhe ḽikhethwa.”—Mat. 6:9.

6. Ndi ngani Yehova o lindela hu tshi fhela tshifhinga uri a kone u sumbedza uri ndi ene o tewaho nga u vhusa?

⁶ Yehova u khou konḓelela musi vhathu vhanzhi vha tshi ri ho ngo tewa nga u vhusa. Yehova ndi ene e eṱhe o tewaho nga u vhusa ḽifhasi na ngei ṱaḓulu nahone nḓila ine a vhusa ngayo ndi ya khwinesa. (Nzumb. 4:11) Fhedzi Diabolo o lingedza u fhura vhathu na vharuṅwa uri vha humbule uri Yehova ho ngo tewa nga u vhusa. Zwo vha zwi tshi ḓo dzhia tshifhinga uri vhathu vha vhone uri Yehova ndi ene o tewaho nga u vhusa na uri ndi ene Muvhusi wa khwinesa. Yehova o shumisa vhuṱali nga u tendela vhathu vha tshi ḓivhusa. Zwenezwo zwo ita uri ri zwi vhone uri musi ri tshi ḓivhusa, zwithu a zwi tshimbili zwavhuḓi. (Yer. 10:23) Nge Yehova a si fhele mbilu, zwi ḓo ita uri ri zwi vhone uri ndi ene o tewaho nga u vhusa. Dzina ḽa Mudzimu ḽi ḓo phumuliwa matope nahone ri ḓo zwi vhona uri ndi Muvhuso wa Mudzimu fhedzi une wa nga ita uri hu vhe na mulalo na u tsireledzea kha ḽifhasi.

7. Ndi vhafhio vhe vha shandukela Yehova nahone u ḓo vha ita mini?

⁷ Yehova u khou konḓelela u shandukelwa nga vhaṅwe vha vhana vhawe. Yehova o sika vharuṅwa na vhathu vha si na tshivhi. Fhedzi Saṱhane (zwine zwa amba uri “Muhanedzi”) we a vha e muruṅwa wa Mudzimu o shandukela Yehova, a dovha a ita uri Adamu na Eva vhe vha vha vha si na tshivhi na vhone vha shandukele Yehova. Hu na vhaṅwe vharuṅwa na vhathu vhe na vhone vha shandukela Yehova. (Yuda 6) Nahone nga murahu, lushaka lwa Vhaisiraele lwe Mudzimu a vha o lu khetha lwo mu shandukela lwa shumela midzimu ya mazwifhi. (Yes. 63:8, 10) Zwi tou pfala uri zwenezwo zwo pfisa Yehova vhuṱungu. O konḓelela nahone u ḓo dzula a tshi konḓelela u swika a tshi fhelisa vhathu vha sa mu thetshelesi. Zwenezwo zwi ḓo takadza vhashumeli vhawe vha fhulufhedzeaho ngauri a vha tsha ḓo dovha vha ṱangana na thaidzo dzine vha khou sedzana nadzo zwino!

8-9. Ndi mazwifhi afhio ane a ambiwa nga ha Yehova nahone riṋe ri nga ita mini nga hazwo?

⁸ Yehova u khou konḓelela mazwifhi a Diabolo. Saṱhane o pomoka Yobo na vhashumeli vhoṱhe vha Yehova uri vha shumela Yehova nga nṱhani ha uri vha khou ṱoḓa u vhuyelwa nga zwiṅwe zwithu. (Yobo 1:8-11; 2:3-5) Diabolo u kha ḓi pomoka vhashumeli vha Yehova na ṋamusi. (Nzumb. 12:10) Ri nga sumbedza uri Saṱhane ndi muzwifhi nga u konḓelela thaidzo dzine ra sedzana nadzo na nga u dzula ri tshi fhulufhedzea kha Yehova ngauri ri a mu funa. Arali ra dzula ri tshi fhulufhedzea, Yehova u  ḓo ri lambedza samusi o lambedza Yobo.—Yak. 5:11.

⁹ Saṱhane u shumisa vharangaphanḓa vha vhurereli u amba uri Yehova u na tshiṱuhu na uri ndi ene ane a ita uri vhathu vha shengele. Vhaṅwe vha amba uri musi vhana vha tshi fa, Mudzimu u vha o vha dzhia ngauri o vha a tshi khou ṱoḓa vhaṅwe vharuṅwa ṱaḓulu. Musi vha tshi ita zwenezwo, vha vha vha tshi khou nyadza Yehova. Riṋe ri a zwi ḓivha uri Yehova ndi Khotsi a re na lufuno. A ri vhoni Mudzimu mulandu musi ri tshi lwala kana musi muthu ane ra mu funa a tshi lovha. Fhedzi ri a zwi ḓivha uri ḽiṅwe ḓuvha u ḓo zwi lugisa. Ri vhudza vhathu vhoṱhe vhane vha thetshelesa uri Yehova u a ri funa roṱhe. Zwenezwo zwi ita uri Yehova a kone u fhindula ane a mu goḓa.—Mir. 27:11.

10. Phisalema 22:23, 24 i dzumbulula mini nga ha Yehova?

¹⁰ Yehova u khou konḓelela u vhona vhashumeli vhawe vha tshi tambula. Yehova u a pfela vhuṱungu. U a ṱungufhala musi a tshi vhona ri tshi khou tambula, ri tshi tovholwa, ri tshi lwala na musi ri tshi kulwa nungo nga vhushayanungo hashu. (Vhalani Phisalema 22:23, 24.) U a pfesesa vhuṱungu vhune ra vhu pfa. U ṱoḓa u vhu fhelisa nahone u ḓo vhu fhelisa. (Vhambedzani Ekisoda 3:7, 8; Yesaya 63:9.) Hu ḓo swika ḓuvha ḽine a ḓo ‘phumula miṱodzi yoṱhe maṱoni ashu, lufu lwa si tsha vha hone, u ṱungufhala, u lila na vhuṱungu zwi si tsha vha hone.’—Nzumb. 21:4.

11. Yehova o ṱuvha mini nga vhashumeli vhawe vho lovhaho?

¹¹ Yehova u khou konḓelela u lovhelwa nga khonani dzawe. Yehova u ḓipfa hani nga vhashumeli vhawe vha fhulufhedzeaho vhe vha lovha? U khou ṱoḓa u dovha a vha vhona! (Yobo 14:15) Humbulani nḓila ye Yehova a ṱuvha ngayo khonani yawe Abrahamu! (Yak. 2:23) Kana nḓila ye a ṱuvha ngayo Mushe we a vha a tshi amba nae “vho livhana zwifhaṱuwo.” (Ek.  33:11) A nga vha o ṱuvha na u pfa Davida na vhaṅwe vhaimbi vha dziphisalema vha tshi khou mu imbela nyimbo dza u mu renda. (Ps. 104:33) Yehova ho ngo hangwa dzenedzo khonani dzawe naho dzo lovha. (Yes. 49:15) U kha ḓi humbula zwoṱhe nga havho. Bivhili i ri: “Khae vhoṱhe vha khou tshila.” (Luka 20:38) U ḓo vha vusa, a dovha a pfa vha tshi mu rabela zwi tshi bva mbiluni na u ṱanganedza nḓila ine vha mu gwadamela ngayo. U ḓivha zwenezwi zwi nga ni khuthadza arali no lovhelwa nga muthu ane na mu funa.

12. Ndi mini zwine zwa ṱungufhadza Yehova kha ano maḓuvha mavhi a vhufhelo?

¹² Yehova u khou konḓelela u vhona vhathu vha tshi tsikeledzwa nga vhathu vhavhi. Musi Adamu na Eva vha tshi mu shandukela tsimuni ya Edeni, o vha a tshi zwi ḓivha uri zwithu zwi ḓo ṋaṋa u vhifha. Yehova u vhenga vhuvhi, u haṱula nga nḓila i songo teaho na vhuvemu zwine zwa khou itea. Yehova u na ndavha na vhathu vha sa koni u ḓilwela vha ngaho dzitshilikadzi na vhana vha si na vhabebi. (Sak. 7:9, 10) Zwi a mu vhaisa vhukuma musi a tshi vhona vhashumeli vhawe vha fhulufhedzeaho vha tshi tsikeledzwa na u valelwa dzhele. Ni nga vha na vhungoho ha uri u funa vhoṱhe vhane vha khou konḓelela u fana nae.

13. Ndi zwithu zwifhio zwi shonisaho zwine vhathu vha khou zwi ita nahone Yehova u ḓo ita mini?

¹³ Yehova u khou konḓelela u vhona vhathu vha tshi ḓifara luvhi nga zwa vhudzekani. Mudzimu o sika vhathu a tshi ḓifanyisa, fhedzi Saṱhane u ṱoḓa u ita uri vhathu vha ite zwithu zwivhi. Tshifhingani tsha Noaxe, musi Mudzimu a tshi “vhona uri vhuvhi ha vhathu ho no anda vhukuma,” o “ḓisola nge a vhumba vhathu kha ḽifhasi, mbilu yawe ya vhavha.” (Gen. 6:5, 6, ṱms., 11) Naa zwithu zwo no shanduka u bva tshifhingani tsha Noaxe? Na khathihi! Diabolo u a takala musi a tshi vhona vhathu vha tshi ita mifuda ya vhudzekani i ngaho vhudzekani vhukati ha vhathu vhavhili vha songo vhinganaho na vhathu vhane vha ita zwa vhudzekani na vhathu vha mbeu i fanaho na yavho! (Vhaef. 4:18, 19) U dovha a takala na u fhirisisa musi a tshi ita uri vhashumeli vha Yehova vha ite tshivhi tshihulwane. Musi ḓuvha ḽa Yehova ḽi tshi swika, Yehova u ḓo fhelisa vhathu vhoṱhe vha sa shanduki vhane vha ḓifara luvhi nga zwa vhudzekani.

14. Vhathu vha khou fara hani ḽifhasi na dziphukha?

¹⁴ Yehova u khou konḓelela u vhona vhathu vha tshi tshinya ḽifhasi. ‘Vhathu vha khou huvhadza vhaṅwe musi vha tshi vha vhusa’ nahone a vha khou ṱhogomela ḽifhasi na zwipuka sa zwe Yehova a vha humbela uri vha zwi ite. (Muh. 8:9; Gen. 1:28) Vhaṅwe vhorasaintsi vho amba uri zwine vhathu vha khou zwi ita zwino zwi ḓo ita uri nga murahu ha miṅwaha, dziṅwe phukha na zwiṅwe zwimela zwi si tsha vha hone. Ndi ngazwo hu na vhaṅwe vhathu vhane vha khou vhilaela nga ha zwimela na dziphukha. Ri livhuwa uri Yehova o fhulufhedzisa “u fhelisa vha tshinyadzaho ḽifhasi” na uri u ḓo ita uri ḽifhasi ḽoṱhe ḽi vhe pharadiso.—Nzumb. 11:18; Yes. 35:1.

15-16. Ndi mini zwine zwa fanela u ri ṱuṱuwedza uri ri konḓelele u fana na Yehova? Ṋeani tsumbo.

¹⁵ Humbulani nga ha thaidzo dze Yehova a dzi konḓelela lwa miṅwaha minzhi vhukuma. (Sedzani bogisi “ Ndi Zwithu Zwifhio Zwine Yehova A Khou Zwi Konḓelela?”) Yehova a nga fhelisa zwithu zwivhi zwine zwa khou itea tshifhinga tshiṅwe na tshiṅwe. Fhedzi u sa fhela mbilu ha Yehova ho ri thusa vhukuma! Humbulani nga ha tsumbo i tevhelaho. Kha ri ri vhavhingani vha vhudzwa uri ṅwana ane vha ḓo vha nae u ḓo vha na thaidzo ya mutakalo na uri musi o no bebwa ha nga ḽi lu ḓifhaho nahone ha nga tshili tshifhinga tshilapfu. Fhedzi musi onoyo ṅwana  a tshi bebwa, vhabebi vhawe vha a takala naho zwi tshi ḓo konḓa uri vha mu ṱhogomele. Ngauri vha a funa ṅwana wavho, vha ḓo konḓelela na u ita zwoṱhe zwine vha nga kona uri a vhe na vhutshilo havhuḓi.

¹⁶ Nga nḓila i fanaho, samusi roṱhe ri tshi bva kha Adamu na Eva, ri bebwa ri na tshivhi. Naho zwo ralo, Yehova u a ri funa nahone u na ndavha na riṋe. (1 Yoh. 4:19) Yehova u khwine kha vhavhingani vhe ra amba nga havho ngauri u ḓo fhelisa zwithu zwi si zwavhuḓi zwine vhana vhawe vha khou ṱangana nazwo. O vhea tshifhinga tshine a ḓo fhelisa ngatsho tshengelo. (Mat. 24:36) Nḓila ine Yehova a ri funa ngayo i tea u ri ṱuṱuwedza uri na riṋe ri dzule ri tshi konḓelela u fana nae.

17. Nḓila ye Yesu a ṱaluswa ngayo kha Vhahevheru 12:2, 3 i ri ṱuṱuwedza hani uri na riṋe ri dzule ri tshi konḓelela?

¹⁷ Yehova ndi tsumbo yavhuḓi ya u konḓelela. Yesu o edzisa nḓila ine Yehova a konḓelela ngayo. Musi Yesu e kha ḽifhasi, o konḓelela musi a tshi semiwa, u shoniswa na u ombelwa kha danda a tshi itela riṋe. (Vhalani Vhahevheru 12:2, 3.) Zwi tou vha khagala uri tsumbo ya Yehova ya u konḓelela yo thusa Yesu uri na ene a konḓelele. Na riṋe i nga ri thusa uri ri konḓelele.

18. Luṅwalo lwa 2 Petro 3:9 lu ri thusa hani u vhona zwe zwa itea nge Yehova a si fhele mbilu?

¹⁸ Vhalani 2 Petro 3:9. Yehova u a ḓivha tshifhinga tsho teaho tsha u fhelisa ḽino shango. U sa fhela mbilu hawe zwo ita uri hu vhe na vhathu vhanzhi vhane vha guda nga hae na uri hu vhe na vha dzimiḽioni vhane vha mu gwadamela. Vhenevho vhathu vhoṱhe vha a takala ngauri Yehova Mudzimu o konḓelela u swika vha tshi bebwa, vha guda nga hae na u ḓiṋekedza khae. Zwi ḓo vhonala uri phetho ya Yehova ya u sa fhela mbilu yo vha i yavhuḓi musi vhathu vha dzimiḽioni vha tshi konḓelela u swika vhufheloni!

19. Ri tea u ḓiimisela u ita mini nahone ri ḓo lambedzwa nga mini?

¹⁹ Ri nga guda nḓila ya u konḓelela milingo ro takala kha tsumbo ya Yehova. Yehova u dzula e “Mudzimu o takalaho” hu sa londwi thaidzo dzine dza vhangwa nga Saṱhane. (1 Tim. 1:11) Na riṋe ri nga kona u dzula ro takala musi ro lindela Yehova a tshi ita uri dzina ḽawe ḽi vhe ḽikhethwa, a tshi sumbedza uri ndi ene e eṱhe o tewaho nga u vhusa, a tshi fhelisa vhuvhi na u fhelisa thaidzo dzine ra khou ṱangana nadzo zwino. Kha ri ḓiimisele u bvela phanḓa ri tshi konḓelela nahone zwi a ri khuthadza u ḓivha uri Yehova u khou konḓelela na riṋe. Arali ra ita zwenezwo, ri ḓo kona u zwi vhona uri “hu takala ane a dzula a tshi konḓelela mulingo, ngauri u ḓo wana khare ya vhutshilo, musi o no takalelwa nga Mudzimu. Yehova o fhulufhedzisa yeneyo khare vhane vha dzula vha tshi Mu funa.”—Yak. 1:12.