1. Бой-бойынаҥ артык болорго албаданганы неге экелет?

УЛУС бӱгӱнги кӱнде бой-бойынаҥ артык болорго, меке-тӧгӱниле нени ле эткилеп јат. Темдектезе, бизнесмен кижи јолына тура берген кандый ла кижиге јаман неме эдер аргалу. Эмезе спортчы маргаандарда јеҥип аларга, ӧскӧ команданыҥ бир-бирӱзине каршу јетирердеҥ айабас. Эмезе университетке кирип јаткан абитуриент экзамендерде тӧгӱнденип јат. Је христиан кижи андый керектер «эт-канныҥ керектери» деп оҥдоп јат (Гал. 5:19—21). Андый да болзо, кем-кем јуунда ака-эјелерди чагыштырып турганын бойы билбей де турган болор. Бу јаан учурлу сурак, нениҥ учун дезе мындый кылыктаҥ улам јуунныҥ бирлиги бузулардаҥ айабас.

2. Бу јӧрмӧлдӧ нени шӱӱжерис?

² Бу јӧрмӧлдӧ бис кандый эки кылык-јаҥнаҥ улам ака-эјелердеҥ артык болорго албаданып баштаардаҥ айабазыс деп кӧрӧрис. Анайда ок улустаҥ артык болорго албаданбаган Кудайдыҥ чындык ишчилериниҥ темин кӧрӧрис. Је озо баштап, бис Иеговага кандый кӱӱн-санаадаҥ улам иштеп турганысты кӧрӱп ийектер.

3. Биске бойыска кандый сурактар берер керек?

³ Кезикте бойыска мындый сурактар берип турар керек: «Мен бойымды јӱк ле улусла тӱҥдештирип, мен јакшы эмезе јаман деп санаага келедим бе? Мен јуунныҥ керектерин јӱк ле ака-эјелерге кӧрӱнерге болуп эдип тургам ба? Эмезе Иеговага эҥ артыгын берерге  турганым учун эдип јадым ба?» Бу сурактарды бойыска нениҥ учун берер керек? Кудайдыҥ Сӧзи нени айдып турганын кӧрӱп ийектер.

4. Галаттарга 6:3, 4-лӧ болзо, биске бойысты улусла нениҥ учун тӱҥдештирбес керек?

⁴ Агару Бичик бисти бойысты улусла тӱҥдештирбезин деп айдат. (Галаттарга 6:3, 4 кычырыгар.) Нениҥ учун? Нениҥ учун дезе, бойысты улусла тӱҥдештирип турзаас, бис эмезе бийиркенип каларыс эмезе бойысты уйан кижи деп сананарыс. Је мындый санаалардыҥ экилези јастыра (Рим. 12:3). Грецияда јадып турган Катерина * эје айдат: «Мен бойымды јакшы јарлап билер, куучынчы ла јараш эје-сыйындарла тӱҥдештиргем. Учы-учында бойымды эш-кереги јок кижи деп санангам». Је биске ундыбас керек Иегова бисти кӧрӱмјилӱ болгон учун эмезе улусла јакшы куучындажып билер болгоныс учун бойына јууктадып алган эмес, је Иегованы сӱӱп турганыс учун ла оныҥ Уулына сӧсуккур болуп турганыс учун јууктадып алган (Иоанн 6:44; 1 Кор. 1:26—31).

5. Хюн деп аканыҥ теминеҥ бис неге ӱренедис?

⁵ Анайда ок биске бойыска база бир сурак берер керек: «Мени улус јобош кижи деп билер бе эмезе сӧс блаажар кижи деп пе?» Тӱштӱк Кореяда јадып турган Хюн деп аканыҥ темин кӧрӱп ийектер. Алдында ол молјулу акалардаҥ уйан кӧрӱнбеске албаданып туратан. Ол айдат: «Мен акаларды јамандап, олордыҥ айтканыла јӧпсинбей туратам. Је кийнинде менеҥ улам јуунда бӧлӱништер болуп турган деп оҥдоп ийгем». Бу акага јастыразын оҥдоорго најылары болушкан. Мынайып ол кӧрӱм-санаазын солып, эмди сӱреен јакшы аксагал болот. Айдарда, бис јуунныҥ бирлигине јӧмӧжӧрдиҥ ордына улустаҥ артык болорго албаданып турганысты кӧрӱп ийзеес, капшай ла тӱзединер керек.

6. Галаттарга 5:26-ла болзо, кижи кандый эки кылык-јаҥнаҥ улам улустаҥ артык болорго албаданар болор?

⁶ Галаттарга 5:26 кычырыгар. Кижи кандый эки кылык-јаҥнаҥ улам улустаҥ артык болорго албаданып турган болор? Баштапкызы — бийиркенери. Бийиркек кижи јаҥыс ла бойын сананып јат. Экинчизи — кӱйӱнери. Кӱйӱнчек кижи улустыҥ јӱк ле бар немезине кӱйӱнип турган эмес, је улус бар немезин јылыйтып алзын деп кӱӱнзейт. Андый кижиниҥ улусты кӧрӧр кӱӱни јогы кӧрӱнет. Оныҥ учун мындый кылык-јаҥдардаҥ кайа да кӧрбӧй качар керек.

7. Бийиркенери ле кӱйӱнери кандый каршу јетирет? Тем куучындап беригер.

⁷ Бийиркеерин ле кӱйӱнерин самолеттыҥ јаман топливазынныҥ кирине тӱҥдештирерге јараар. Андый топливалу самолет учуп, јӱрер аргалу, је отурар тушта ол аҥтарылардаҥ айабас. Нениҥ учун дезе топливадагы кир самолеттыҥ двигателин туй тудуп ийет. Анайып ла ок кижи Иеговага узак иштеп турган болор, је јӱрегинде бийиркениш эмезе кӱйӱниш бар болзо, ол качан бирде тӱҥей ле аҥтарылып калардаҥ айабас (Укаа 16:18). Оныҥ учун андый кылык-јаҥнаҥ орой болуп калгалакта, тӱрген айрылар керек. Оноҥ башка Иеговага да иштебей барарыс, бойыска да каршу јетирерис.  Айдарда, бийиркенбеске ле кӱйӱнбеске нени эдер керек?

8. Бийиркенбеске не болужар?

⁸ Бийиркенбеске ле кӱйӱнбеске биске апостол Павелдиҥ сӧстӧри болужар. Ол мынайып айткан: «Бойыгар керегинде јобош сананып, ӧскӧ улусты бойыгардаҥ бийик деп бодогор» (Флп. 2:3). Бу јӧплӧ болзо, ака-эјелер бистеҥ јайалталу болзо, бис олорго кӱйӱнбейдис. Карын, бис олор учун сӱӱнедис, анчада ла олор бойыныҥ јайалталарын Иегованы мактаарга тузаланып турза. Је јайалталарлу ака-эјелер бийиркенбей, Павелдиҥ бу сӧстӧрин база тузаланып турза, олор бистиҥ јакшы кылык-јаҥысты ајаруга алар. Анайып, кажыбыс ла албаданып турзаас, јуун амыр ла бирлик болор.

9. Кӱйӱнбеске не болужар?

⁹ Толо кеминде эмезистеҥ улам, бис кезикте кӱйӱнип баштайдыс, је мында биске бойыстыҥ кемисти оҥдоп турганыс болужар. Бойыныҥ кемин оҥдоп турган кижи улустаҥ артык кӧрӱнерге албаданбайт. Карын олордыҥ јакшы јандарын кӧрӱп, олордоҥ та неге де ӱренерге кӱӱнзейт. Темдектезе, јакшы куучын-эрмек белетеп турган аканаҥ ол канайып белетенип турганын сурап угарга јараар. Эмезе амтанду курсак азып турган эјениҥ ченемелинеҥ ӱренерге јараар ол эмезе јуунда најылар табарга кӱч болуп турган ака-эјеге улусла јакшы куучындажа берип турган ака-эјелердеҥ јӧп сураарга јараар. Ол тушта кем де кемге де кӱйӱнбес. Карын, бой-бойынаҥ јакшыга ӱренер.

10. Гедеон кандый јеҥил эмес айалгада болгон?

¹⁰ Манассияныҥ угынаҥ болгон Гедеон ло Ефремниҥ јуучылдарыныҥ ортозында не болгонын кӧрӱп ийектер. Гедеон ло оныҥ 300 јуучылы Иегованыҥ болужыла јаан јеҥӱ алган. Мынаҥ улам олор бийиркене берердеҥ айабас болгон. Бу ӧйдӧ Гедеонго Ефремниҥ улузы келгилеген. Олор Гедеонды бурулап, олорды јуу-согушка кычырбады деп  ачынгылап тургулады. Мынаҥ олордыҥ Гедеон чылап, Иегованыҥ адын макка чыгарарга ла оныҥ албатызын корулаарга эмес, је бойыныҥ ӱйезиниҥ адын макка чыгарарга кӱӱнзегени кӧрӱнет (Јарг. 8:1).

11. Гедеон Ефремниҥ черӱзине кандый каруу берген?

¹¹ Гедеон Ефремниҥ черӱзине мындый сӧстӧр айткан: «Мениҥ јеҥӱ алганым неме бе? Карын, слер улу јеҥӱлер алган эмейигер!» Мынайып, Гедеон олорды да Иегованыҥ болужыла јеҥӱлер алган деп эске алындырган. Бу сӧстӧрдиҥ кийнинеҥ олордыҥ кӧкси ӧчӧ берген (Јарг. 8:2, 3). Гедеонныҥ јобош тудунганынаҥ улам Кудайдыҥ албатызы ачынышпай, бирлик арткан.

12. Ефремляндардаҥ ла Гедеонноҥ неге ӱренедис?

¹² Бу учуралдаҥ неге ӱренедис? Ефремляндарды кӧрзӧ, кижи кезикте Иегованыҥ адын уйатка тӱшпезин деп албаданардыҥ ордына, бойыныҥ ады уйатка тӱшпезин деп албадана берет. А Гедеонныҥ теми аксагалдарга ла билениҥ бажына ӱредӱ болот. Слерге кем-кем ачынып калган болзо, актанардыҥ ордына айалганы олордыҥ кӧзиле кӧрӧргӧ албаданыгар. Олорды мактап ийер арга бедирегер. Је мактаарга јобош болор керек. Анчада ла слердиҥ јанаардаҥ бир де буру јок болгон болзо. Бойыстыҥ буру јогысты кӧргӱзерге албаданганча, ака-эјелерле амыр јӱрзе, артык болор.

13. Анна кандый кӱч айалгада болгон? Ол оны канайып ӧткӧн?

¹³ Анайда ок Аннаныҥ темин кӧрӱп ийектер. Ол Левит укту Елкана деп кижиниҥ ӱйи болгон. Је бу кижи база бир ӱйлӱ болгон. Оныҥ ады Феннана. Елкана Аннаны Феннанага кӧрӧ тыҥ сӱӱген. Феннана балдарлу болгон, је Анна дезе бала јок болгон. Мынаҥ улам Феннана Аннаны базынып баштаган. Анайып, Анна тыҥ кунугып, ыйлап, ажанбай туратан (1 Сам. 1:2, 6, 7). Андый да болзо, Анна Феннанага удура база јаман баштанган деп, Агару Бичикте кайда да айдылбай јат. Карын, ол бастыра санааркаштарын Иеговага куучындап, айалга солынар деп иженген. Мынайып, Иегова оныҥ јӱрегин токунадып, ого алкыжын берген. Мынаҥ ары Феннана Аннаны базынбай барган ба? Бис билбезис. Бу керегинде Агару Бичикте не де айдылбай јат. Је Анна Агару Бичикте айдылганыла, кунукпай барды (1 Сам. 1:10, 18).

14. Аннаныҥ теминеҥ неге ӱренедис?

¹⁴ Аннаныҥ теминеҥ неге ӱренедис? Кем-кем бийиркенип, слерди јаман кӧрӱп турза, ого ачынбагар. Јаман учун  јаман эдердиҥ ордына карын, ол кижиле амыр-энчӱ јӱрерге албаданыгар (Рим. 12:17—21). Кижи слердиҥ јакшы баштанганаарды кӧрбӧзӧ дӧ, укпаза да слер јӱрегердеги амырды јылыйтпазыгар.

15. Апостол Павелдиҥ ле Аполлостыҥ нези тӱҥей болгон?

¹⁵ Эмди апостол Павелдиҥ ле Аполлостыҥ темин кӧрӱп ийектер. Олор экилези Агару Бичикти сӱреен јакшы билгилеген. Экилези ченемелдӱ, јарлу ӱредӱчилер болгон, анайда ок улуска Иисустыҥ ӱренчиктери болорго болушкан. Андый да болзо, олор бой-бойына кӱйӱнбеген.

16. Аполлос кандый кижи болгон?

¹⁶ Аполлос Александрияда чечен тилдӱ, Агару Бичиктерди јакшы билер кижи болгон (Ап. ижи 18:24). Александрия дезе бийик ӱредӱ берип турган, јарлу кала болгон. Аполлос Коринфте болордо, кезик ака-эјелер оны ачыгынча мактап, ӧскӧ акалардаҥ, ол тоодо Павелдеҥ де, бийик кӧдӱрип турдылар (1 Кор. 1:12, 13). Мыны кӧрӱп, Аполлос бийиркенди бе? Јок, ондо андый неме бир де болбогон. Аполлос јуунда бӧлӱништер эдип турган болзо, Павел оны ойто кайра Коринф барзын деп сураар беди? (1 Кор. 16:12). Ол бойыныҥ јайалталарын чын тузаланган. Сӱӱнчилӱ јарды јарлаган ла ака-эјелердиҥ бӱдерин тыҥыткан. Анайда ок Аполлос јобош кижи болгон. Акила ла Прискилла ого чындыкты мынаҥ артык јартап берерде, ол ачынган эштеген деп кайдаҥ да кӧрӱнбей јат (Ап. ижи 18:24—28).

17. Павел јуунныҥ бирлигине канай јӧмӧшкӧн?

¹⁷ Павел Аполлостыҥ јакшы јандарын  ла једимдерин билетен. Је ака-эјелер оны Павелдеҥ артык сӱӱп туру деп, бир де кӱйӱнбеген. Карын, Павел бийиркенбес, јобош, керсӱ кижи болгон. Оныҥ мындый кылык-јаҥы Коринфтеги јуунга берилген јӧптӧҥ кӧрӱнет. Андагы кезик ака-эјелер: «Мен — Павелдийи» — дешкилеп турарда, Павел бого јакшызынып отурбады. Карын, ајаруны Иегова Кудайга ла Иисус Христоско эткен (1 Кор. 3:3—6).

18. 1 Коринфтегилерге 4:6, 7-ле болзо, Аполлостыҥ ла Павелдиҥ теми бисти неге ӱредет?

¹⁸ Апостол Павелдеҥ ле Аполлостоҥ неге ӱренедис? Бис Иеговага кӧп иштеп, кӧп улуска сууга чӧҥӱрилерге болушкан болорыс. Је бистиҥ кандый ла једимис ӱзе Иегованыҥ алкыжы деп, бир де ундыбас керек. Анайда ок Иегованыҥ организациязында канча ла кире кӧп молјуларлу болзоос, амырга ла бирликке ончо ло кире кӧп јӧмӧжӧр керек. Јуунныҥ амырына ла бирлигине јӧмӧжип турган кӧстӧлгӧн акаларды кӧрӧргӧ кандый јакшы! Олор јуунды бойыныҥ кӧрӱм-санаазына тайанып эмес, је Кудайдыҥ сӧзине тайанып ӱредет. Анайда ок ака-эјелерди темди олордоҥ эмес, је Иисус Христостоҥ алзын деп кӱӱнзедет. (1 Коринфтегилерге 4:6, 7 кычырыгар.)

19. Бистиҥ кажыбысла нени эдер аргалу? (« Бой-бойоорды чагыштырбагар» деген рамканы кӧрӱгер.)

¹⁹ Кудай кажы ла кижиге јайалталар берген, бу јайалталарысты бой-бойыска болужарга тузаланар керек (1 Петр 4:10). Је та кем де сананар болор: «Мениҥ кичинек эдип турган ижимнеҥ кандый туза?» Кичинек те иштеҥ јаан туза бар деп оҥдоорго, мындый тем болужар. Јараш, јаан тура тударга, кӧп кичинек кирпичтер керек. Анайып, кичинек кирпичтердеҥ бӱдӱн тура тудулып калат. Оныҥ учун бистиҥ кажы ла эткен кичинек ижис, кичинек кирпичтер чилеп, јуунныҥ бирлигине јаан јӧмӧлтӧ болор. Айдарда, улустаҥ артык болотон санаа бистиҥ кемибисте де болбозын деп албаданактар. Карын, кажыбыс ла бойыстыҥ јаныстаҥ јуун амыр ла бирлик болзын деп болужактар (Еф. 4:3).