1. Kai akibatna perban piga-piga kalak nggit ersaing?

BAS doni enda enterem kalak si meriah kapna ersaing janah lakokenna kai pe gelah jadi kalak si hebatna. Contohna, sekalak pengusaha banci saja gunakenna cara si licik gelah ceda gelar pengusaha si deban. Sekalak pemain bola banci saja suin banna lawanna gelah banci ia menang. Sekalak pelajar banci saja banna cara-cara si licik gelah banci masuk ku universitas si terkenal. Selaku kalak Kristen siteh maka perbahanen si bage salah, perban si e kerina “hasil perbahanen daging.” (Gal. 5:19-21) Tapi banci nge umat Jahwe la sengaja mpengaruhi kalak si deban bas runggun gelah nggit ersaing? Penungkunen e penting, perban sipat nggit ersaing banci erban turang senina lanai ersada.

2. Kai kari sibahas bas artikel enda?

² Bas artikel enda sibahas kari sipat-sipat si la mehuli si banci erban kita nggit ersaing ras turang seninata. Sibahas ka kari usihen arah umat Dibata si la nggit ipengaruhi sipat nggit ersaing si icatat bas Pustaka. Tapi mari sibahas lebe uga carana mereksa pusuhta.

3. Penungkunen kai saja si perlu siukuri?

³ Perlu rusur sipereksa pusuhta, eme kerna kai tujunta ngelakoken sada tindaken. Contohna, cuba sungkun bandu, ‘Adi hebaten aku asangken kalak si deban nge maka puas ukurku? Gelah jadi si hebatna nge maka aku kerja keras, ntah gelah banci ulin asangken piga-piga turang senina? Ntah kubereken ateku si mehulina man Jahwe?’  Perlu siukuri penungkunen e ndai kerina. Engkai?

4. Menurut Galati 6:3, 4, engkai maka ula sibandingken dirita ras kalak si deban?

⁴ Ipersingeti Pustaka kita gelah ula sibandingken dirita ras kalak si deban. (Baca Galati 6:3, 4.) Engkai? Perban adi hebaten siakap kita asangken turang seninata banci kita jadi kalak si meganjang rukur. Tapi adi hebaten siakap turang seninata asangken kita, banci ka kitik ukurta. Perukuren si bage banci erban kita lanai ngukuri dirita uga litna. (Rom. 12:3) Bagenda nina Karin * si tading i Junani, “Rusur kubandingken aku ras kalak si jilen asangken aku, si beluhen erberita, ras si beluhen erteman. Akibatna lanai kuakap meherga bangku.” Arus siinget maka kita itarik Jahwe labo perban penampilenta, perban kita beluh ngerana, ntah pe perban terkenal, tapi perban idahNa nggit kita engkelengi Ia janah megiken AnakNa.​—Joh. 6:44; 1 Kor. 1:26-31.

5. Kai pelajaren si banci sidat arah pengalamen turang seninata Hyun?

⁵ Penungkunen si deban si perlu siukuri eme: ‘Kalak si erban dame nge aku itandai kalak ntah si rusur erban masalah?’ Cuba perdiateken pengalamen sekalak pertua si gelarna Hyun arah Korea Selatan nari. Mbarenda pernah ianggapna piga-piga turang senina si lit tanggung jawapna bas runggun jadi saingenna. Nina, “Kupandangi lalap kalak e janah rusur aku la setuju man pendapat kalak e. Perban sipatku e, runggun kami lanai ersada.” Bas pudi wari sampati teman-temanna ia gelah sadar maka salah perbahanenna e. Emaka mulai ia berubah janah gundari enggo jadi pertua si seh kel ulina. Kai pelajarenna man banta? Adi enggo mulai lit sipat nggit ersaing bas kita, mislah kita robah janah jadi kalak si erban dame.

6. Menurut Galati 5:26, sipat-sipat kai saja si banci erban kita nggit ersaing?

⁶ Baca Galati 5:26. Kai saja sipat-sipat si la mehuli si erban kita nggit ersaing? Salah sadana egois. Kalak si egois kepentingenna saja ngenca ukurina. Sipat si debanna eme cian. Kalak si percian merhat ia nandangi jang kalak janah kai si lit bas kalak e pe bene ka min atena. Situhuna sipat percian e bali ras segat ate. Sipedauh ateta sipat-sipat si la mehuli e bali bagi mpedauh penakit menular si mekelek!

7. Kai akibatna adi kita egois ras meganjang rukur? Ban perumpamanna.

⁷ Sipat egois ras percian banci ipeseri ras nget-nget si mangani kayu. Banci saja sada rumah si galang si iban arah kayu nari teridah paguh. Tapi adi kayu-kayu bas rumah e lalap ipangani nget-nget, dungna rumah e banci hancur. Bage ka me kalak si egois ras meganjang rukur. Amin pe banci layanina Jahwe piga-piga waktu tapi dungna hancur nge ia pagi. (Kua. 16:18) Ngadi pagi ia ngelayani Jahwe janah labo ia ngenca si rugi tapi kalak si deban pe rugi banna. Adi bage kai si perlu silakoken gelah ula kita egois ras meganjang rukur?

8. Uga carata ngelawan sipat egois?

⁸ Banci silawan sipat egois adi tetap sidalanken nasehat Paulus man kalak Pilipi, nina, “Ula lakoken kai pe perban  nggit rubati ntah pe perban mentingken bana, tapi alu meteruk ukur anggaplah kalak si deban ganjangen asangken kena.” (Pil. 2:3) Adi sianggap kalak si deban ganjangen asangken kita, labo kita nggit ersaing ras kalak si beluhen asangken kita. Tapi meriah ukurta ngidah kalak e khususna adi kengasupenna ipakena guna ngelayani Jahwe. Adi dalanken turang seninata nasehat Paulus ndai, banci ergai kalak e sipat-sipatta si mehuli. Hasilna, siban me runggun dame ras ersada.

9. Kai si perlu silakoken gelah ula cian ateta turang seninata?

⁹ Banci siambekken sipat percian, adi siakui maka bas piga-piga bagin beluhen turang seninata asangken kita. Adi meteruk ukur kita, labo siusahaken guna mbuktiken maka beluhen kita asangken kalak si deban. Tapi siusahaken erlajar arah kalak si beluhen asangken kita. Contohna, katakenlah lit sekalak turang senina bas runggun si beluh mpeseh khotbah. Banci sisungkun ia uga carana nikapken khotbahna. Adi lit sekalak turang senina si beluh erdakan, banci sisungkun ia kai saja si lakokenna gelah kita pe reh beluhna erdakan. Adi lit sekalak anak muda bas runggun si mesera akapna ndarami teman, banci pindona nasehat arah kalak si nukah akapna ndatken teman. Alu ngelakoken si e ndai kerina banci sipedauh sipat percian janah reh beluhna me kita.

10. Kai saja tentangen si adapi Gideon?

¹⁰ Cuba ukuri kerna kai si terjadi antara Gideon arah suku Manase ras dilaki-dilaki arah suku Eperaim. Isampati Jahwe Gideon ras 300 prajuritna gelah menang bas perang. Tapi si e la erban kalak e jadi sombong. Sanga reh dilaki-dilaki arah suku Eperaim njumpai Gideon, tujunna labo muji ia tapi guna sijawapen ras ia. Sakit hati kalak e perban tangtangna nari la ajak Gideon kalak e erperang  ngelawan musuh-musuh Dibata. Si pentingna akap kalak e eme sukuna arus iergai. Arusna teh kalak e maka kemenangen Gideon e erban gelar Jahwe imuliaken ras ngelindungi umatNa, e me si pentingna.​—Hak. 8:1.

11. Kai nina Gideon man dilaki-dilaki arah suku Eperaim?

¹¹ Alu meteruk ukur bagenda nina Gideon man dilaki-dilaki arah suku Eperaim e, “Kai kin ertina si kulakoken e adi bandingken ras kena?” Kenca si e ikatakenna man kalak e uga Jahwe nampati kalak e guna ngelakoken perbahanen si luar biasa ndai. Hasilna, “tenang” me dilaki-dilaki e. (Hak. 8:2, 3) Labo penting akapna erga dirina guna njaga kedamen umat Dibata.

12. Pelajaren kai si banci sidat arah kalak Eperaim ras Gideon?

¹² Pelajaren kai si banci sidat arah kejadin e? La kita nggit bagi kalak Eperaim, si pentingen kapna kemulianna asangken kemulian Jahwe. Kepala keluarga ras pertua-pertua pe lit ka pelajaren si banci datna arah Gideon. Adi lit kalak si tersinggung man banta, uga nge tanggapenta? Erusahalah kita ngangkai engkai maka ia tersinggung janah sipujiken perbahanenna si mehuli. Guna ngelakoken si e arus kita meteruk ukur, terlebih ka adi kalak si tersinggung e nge si salah. Tapi ingetlah, hubungen si dame ndauh pentingen asangken erga dirita.

13. Kai si erban Hanna susah, janah kai si lakokenna?

¹³ Cuba ka ukuri contoh Hanna. Erjabu ia ras kalak Lewi si gelarna Elkana janah keleng kel ate Elkana ia. Tapi lit ka diberu Elkana si deban eme Penina. Kelengen ate Elkana man Hanna asangken man Penina. Tapi ‘Penina lit anak-anakna, Hanna la lit anakna.’ Perban si e, “tokoh-tokohi Penina lalap Hanna gelah ceda ukurna.” Uga tanggapen Hanna? Merawa kel ia, “tangis ia janah la nggit man.” (1 Sam. 1:2, 6, 7) Tapi la lit ikataken bas Pustaka maka usahaken Hanna balas dendam man Penina. Ipesehna man Jahwe uga perasanna janah tek ia pasti sampatiNa ia. Berubah nge dungna perbahanen Penina man Hanna? La siteh. Tapi siteh maka dungna dame pusuh Hanna. Nina Pustaka, “Teridah arah ayona enggo lanai kapna sedih.”​—1 Sam. 1:10, 18.

14. Pelajaren kai si banci sidat arah Hanna?

¹⁴ Pelajaren kai si banci sidat arah Hanna? Adi lit kalak si usahakenna ersaing ras kam, kam nge si nentuken uga cara ngadapisa. Ula kam nggit ersaing. Usahakenlah erdame ras ia janah ula balas  si jahat alu si jahat. (Rom. 12:17-21) Amin pe la ia nggit robah, banci tenang akapndu janah meriah ukurndu.

15. Kai si seri arah Apolos ras Paulus?

¹⁵ Si terakhir, cuba perdiateken pelajaren kai si banci sidat arah contoh sekalak murid eme Apolos bage pe Rasul Paulus. Duana kalak e mbue pemetehna kerna Pustaka. Duana kalak e itandai jelma si enterem janah luar biasa carana ngajar. Enggo enterem kalak isampati kalak e jadi murid. Tapi, labo kalak e ersaing.

16. Menurutndu, kalak si uga nge Apolos e?

¹⁶ Apolos “asalna Aleksandria nari,” eme kota si terkenal si jadi pusat pendidiken paksa si e. Beluh kel ia ngerana janah “melala pemetehna kerna Kitap si Badia.” (Perb. 18:24) Sanga Apolos ngelayani i Korinti, piga-piga kalak bas runggun, riahen akapna ras Apolos asangken turang senina si deban, termasuk Paulus. (1 Kor. 1:12, 13) Lit nge sipat nggit ersaing bas Apolos? Pasti la lit sipat si bage bas ia. Buktina piga-piga waktu kenca Apolos nadingken Korinti, undang Paulus ka ia gelah reh mulihi ku je. (1 Kor. 16:12) Labo mungkin bage ban Paulus adi tehna maka lit sipat nggit ersaing bas Apolos si banci erban runggun lanai ersada. Jelas me, gunaken Apolos kengasupenna alu cara si mehuli, eme guna mberitaken berita si meriah ras mpegegehi turang seninana. Tek ka kita maka Apolos e kalakna meteruk ukur. Contohna, la lit kataken Pustaka maka tersinggung ia sanga jelasken Persila ras Akuila “dalan Dibata alu lebih tepat man bana.”​—Perb. 18:24-28.

17. Kai si lakoken Paulus guna erban dame?

 ¹⁷ Teh Paulus kerna perbahanen si mehuli si lakoken Apolos. Tapi labo ia mbiar anggap kalak ulin Apolos asangken ia. Sanga sibaca surat si tulis Paulus man kalak Korinti, banci siidah maka Paulus e kalak si meteruk ukur ras masuk akal. Labo meriah kapna sanga lit si ngataken, “Aku pengikut Paulus.” Tapi berena pujin man Dibata Jahwe ras Jesus Kristus.​—1 Kor. 3:3-6.

18. Menurut 1 Korinti 4:6, 7, kai si banci siusih arah Apolos ras Paulus?

¹⁸ Pelajaren kai si banci sidat arah contoh Apolos ras Paulus? Banci jadi kita enggo kerja keras ngelayani Jahwe janah enggo melala kalak sisampati seh ngasa iperidiken. Tapi siteh maka si e banci silakoken perban penampat Jahwe. Pelajaren si deban eme adi reh buena tanggung jawapta bas runggun, reh buena ka si banci silakoken guna erban runggun tetap dame. Ngata bujur kel kita sanga pertua-pertua ras sinampati runggun nampati kita gelah tetap ersada ras erdame. Nasehat si bereken kalak e lalap erpalasken Pustaka. Labo usahaken kalak e jadi kalak si penting. Tapi sampatina kerina kalak bas runggun gelah patuh man Jesus janah ngikutken petunjukna.​—Baca 1 Korinti 4:6, 7.

19. Kai si banci silakoken sekalak-sekalak? (Nen ka kotak “ Ula Nggit Ersaing.”)

¹⁹ Lit piga-piga bakat ntah pe kengasupen si bereken Dibata man banta. Banci sigunaken kengasupenta e “guna ngelayani kalak si deban.” (1 Pet. 4:10) Banci saja labo siakap penting kel kai si banci silakoken. Tapi ingetlah maka sada baju si mejile banci iban perban lit melala jaiten-jaiten si kitik. Emaka kerina si lakokenndu banci nampati runggun ersada. Kerina kita arus erjuang gelah la siusahaken ulin asangken kalak si deban. Silakokenlah asa ngasupta guna erban runggun dame ras ersada.​—Ep. 4:3.