1. Weh ku hapm if sohnbadi ak laik ih beta dan adaz?

TUDEH, wahn lata peepl aalwayz di chrai fain wayz fi bee beta dan adaz ahn dehn noh kay if dehn hert enibadi. Fi egzampl, wahn bizniz man mait waahn du tingz fi mek ih bizniz bee beta dan ada bizniz noh kay hoo geh hert. Sohnbadi weh di play wahn spoat mait hert sohnbadi weh deh eena di neks teem jos soh dat hihn ku win di gaym. Wahn styoodent mait cheet pan ih egzam jos soh dat ih ku get eena wahn faymos yooniversiti. Az Kristyanz, wee noa dat dehnya tingz rang bikaaz dehn da egzakli “weh di sinful badi waahn.” (Gal. 5:19-21) Bot yu tink sohnbadi eena di kangrigayshan ku shoa disya kaina atichood er inkorij adaz fi ak da saym way widowt ih eevn noa it? Ih impoatant fi mek wi tink bowt dis bikaaz ih ku afek di yooniti a di kangrigayshan.

2. Weh wi wahn diskos eena dis aatikl?

² Eena dis aatikl, wi wahn diskos sohn kwalitiz weh ku mek wi waahn bee beta dan adaz. Wi wahn aalso kansida di egzampl a sohn faytful man an uman fahn di Baibl weh mi du dehn bes fi noh ga da kaina atichood. Bot fers, mek wi kansida wai wi need fi tink bowt di reezn wai wee serv Jehoava.

3. Weh wi need fi aks wiself?

³ Ih gud fi mek wi aalwayz aks wiself wai wi serv Jehoava.  Fi egzampl, wi kud aks wiself: ‘Ai feel laik Ai haftu bee beta dan adaz fi feel gud bowt miself? Ai werk haad eena di kangrigayshan jos bikaaz Ai waahn bee di bes? Er Ah werk haad ahn du mi bes bikaaz Ah lov Jehoava?ʼ Wai wi need fi aks wiself dehndeh kweschan?

4. Akaadn tu Galayshanz 6:3, 4, wai wee noh fi kompyaa wiself wid adaz?

⁴ Di Baibl tel wi dat wi noh fi kompyaa wiself wid adaz. (Reed Galayshanz 6:3, 4.) Wai? Wel, if wi tink dat wi di du tingz beta dan wi bradaz, den dis ku mek wi bee prowd. Pahn di ada han, if wi tink dat wi bradaz du tingz beta dan wee, den wee wahn geh diskorij. Eeda way wi tek it, wi noh di tink eena wahn sensabl way. (Roam. 12:3) Wahn sista weh naym Katerina, * weh liv da Greece, seh: “Ai mi laik kompyaa miself wid ada sistaz hoo Ai mi tink pritiya dan mee, ga beta skilz eena di minischri, er hoo fain it eeziya fi mek frenz. Bikaaz a dis Ah mi feel laik Ah neva wert notn.” Wi haftu memba dat di reezn wai Jehoava jraa wee tu hihn da noh bikaaz a di way how wi luk, di way how wi taak, er bikaaz ada peepl laik wi, bot da bikaaz wi lov hihn ahn wi waahn lisn tu ih Son.—Jan 6:44; 1 Kor. 1:26-31.

5. Weh wi ku laan fahn Brada Hyun?

⁵ Wahn neks kweschan weh gud fi mek wi aks wiself da, ‘Adaz noa mee az sohnbadi weh redi fi mek pees er az sohnbadi weh aalwayz noh gree wid adaz?ʼ Noatis weh mi hapm tu wahn brada fahn South Korea weh naym Hyun. Hihn yoostu feel dat di bradaz weh mi ga difrent rispansabiliti eena di kangrigayshan mi aalwayz ak laik dehn beta dan hihn. Hihn seh: “Ah mi aalwayz di joj dehnya bradaz, ahn moas a di taim, Ai neva gree wid wat dehn seh.” Wat da-mi di rizolt? Brada Hyun seh: “Mai atichood mi afek di yooniti a di kangrigayshan.” Hyun frenz mi help ahn andastan wat da-mi ih prablem. Soh ih mi lisn tu di advais weh ih mi get an ih mi chaynj ih atichood. Now ih da wahn gud elda. If wi si eena wiself dat wi ga disya kaina atichood rada dan fi ga pees wid adaz, wi need fi mek chaynjiz rait away!

6. Akaadn tu Galayshanz 5:26, wat da sohn kwalitiz weh ku mek yu waahn feel dat yu beta dan adaz?

⁶ Reed Galayshanz 5:26. Wat da sohn bad kwalitiz weh ku mek yu feel dat yu beta dan adaz? Wan a dehn da praid. Sohnbadi weh prowd onli tink bowt ihself. Wahn nada bad kwaliti da jelosi. Wahn jelos persn noh onli waahn weh sohnbadi els ga bot ih aalso waahn tek it weh fan ahn. Akchwali, wen wahn persn jelos sohnbadi els, ih di shoa dat ih hayt ahn. Wi definaytli waahn stay weh fahn dehndeh bad kwalitiz!

7. Weh ku hapm if wi prowd ahn jelos? Yooz di egzampl eena di paragraaf.

⁷ Wi ku kompyaa praid ahn jelosi tu wudlais weh eet op wahn hows. Noh mata how priti di hows luk, wen di wudlais finish eet op di wud, di hoal hows jrap. Jos laik dat, sohnbadi ku di serv Jehoava fi wahn lang taim bot if ih noh kyaaful, praid ahn jelosi ku eet owt ih gud kwalitiz. (Prov. 16:18) Ih wahn stap serv Jehoava an ih noh wahn onli hert ihself bot ih wahn hert adaz tu. Weh wee  ku du soh dat wi noh geh prowd er jelos?

8. Weh wee ku du fi mek wi noh geh prowd?

⁸ Di kongsl weh di apasl Paal mi gi tu di bradaz da Filipai ku help wi fi noh geh prowd. Hihn mi tel dehn: “Unu mosn du notn owta praid er sayka laik kwaaril. Insteda dat, unu mos bee hombl ahn kansida ada peepl fi bee moa impoatant dan unu.” (Fil. 2:3) If wi kansida adaz fi bee moa impoatant dan wee, den wi noh wahn kompeet wid dehn wan weh ga beta skilz er weh ku du moa dan weh wee ku du. Insteda dat, wi wahn bee hapi fi dehn. Ih wahn mek wi feel hapiya wen wi si dat dehn di yooz dehn skilz fi serv Jehoava ahn fi bring prayz tu ahn. Soh if wi bradaz ahn sistaz di fala Paal advais, den dat meen dat dehn wahn di foakos pahn fi wee gud kwalitiz tu. Bikaaz a dat, aala wi wahn ku ga pees ahn yooniti eena di kangrigayshan.

9. Weh ku help wi fi mek wi noh bee jelos?

⁹ Hyoomiliti wahn help wi fi si dat dehn ga sertn tingz weh wi kud du ahn sertn tingz weh wi kyaahn du. If wi hombl, dis wahn help wi fi mek wi noh chrai bee beta dan adaz. Insteda dat, wi wahn luk pahn weh wi ku laan fahn dehn wan weh ku du moa dan weh wee ku du. Fi egzampl, yu mait noa wahn brada eena di kangrigayshan weh gi sohn reeli gud taak. Yu mait aks ahn wat da sohn tingz weh ih du wen ih di pripyaa fi ih taak. Yu mait noa wahn sista weh kuk reeli nais, soh yu mait aks ahn fi help yu du beta. Er if yu da wahn yong persn weh fain it haad fi mek frenz, den yu ku goh tu sohnbadi weh gud pan dat ahn aks dehn fi advais. Wen wi du dis, ih ku help wi fi du beta ahn fi noh bee jelos.

10. Weh prablem Gidiyan mi gat?

¹⁰ Tink bowt weh mi hapm bitween Gidiyan, hoo da-mi fahn di chraib a Manaaseh, ahn di man dehn hoo da-mi fahn di chraib a Eefrayim. Jehoava mi help Gidiyan  an ih 300 soaljaz fi win di vikchri. Dis kuda mi mek dehn geh prowd. Di man dehn fahn Eefrayim mi kohn meet Gidiyan, noh fi kongrajulayt ahn, bot fi kwaaril wid ahn. Dehn mi ga wahn prowd atichood, soh dehn geh beks dat Gidiyan neva invait dehn fahn di biginin fi fait gens Gaad enimi dehn. Di man dehn fahn Eefrayim mi-di tink moa bowt fi mek peepl kantinyu rispek fi dehn chraib ahn dehn ferget dat ih mi moa impoatant fi mek Gidiyan rispek Jehoava naym ahn protek fi Hihn peepl.—Judg. 8:1.

11. Weh Gidiyan tel di man dehn fahn Eefrayim?

¹¹ Eena wahn hombl way, Gidiyan mi tel di man dehn fahn Eefrayim: “Di ting dehn weh Ai du kyaahn kompyaa tu weh unu du.” Gidiyan mi-di rimain dehn a how Jehoava mi help dehn fi du amayzin tingz. Wen di man dehn mi hyaa dat, dehn mi kaam dong. (Judg. 8:2, 3) Gidiyan mi chooz fi bee hombl soh dat dehn ku kip di pees monks Gaad peepl.

12. Weh wi laan fahn di egzampl a Gidiyan ahn di man dehn fahn Eefrayim?

¹² Weh wi ku laan fahn dis Baibl akonk? Fahn di egzampl a di man dehn fahn Eefrayim, wi laan dat wi fi foakos moa pahn aana Jehoava insteda aana wiself. If yoo da wahn famili hed er wahn elda, yoo ku laan wahn lesn fahn Gidiyan. If sohnbadi geh beks bikaaz a sohnting weh yoo mi du, chrai andastan wai da persn beks. Wi ku aalso komen di persn fi di gud tingz weh ih don du. Fi du dis, wi haftu bee hombl, espeshali if di ada persn rang. Bot ih moa impoatant fi ga wahn gud rilayshanship wid wi bradaz dan fi proov dat wee rait.

13. Weh prablem Hana mi fays, ahn how shee mi deel wid it?

¹³ Mek wi luk pahn Hana egzampl. Shee mi marid tu wahn Leevait weh naym Elkayna, hoo mi lov ahn wahn lat. Bot Elkayna mi ga wahn nada waif weh naym Penina. Elkayna mi lov Hana moa dan Penina. Bot Penina mi ga pikni far ahn, an Hana neva ga non. Bikaaz a dis, Penina “mi mak ahn nonstap fi get ahn beks.” Di Baibl seh dat shee mi geh soh beks dat ih wuda “baal ahn baal ahn noh eet fi notn.” (1 Sam. 1:2, 6, 7) Bot di Baibl noh seh dat Hana mi chrai get bak aata Penina. Insted, shee mi tel Jehoava egzakli how shee mi-di feel an ih mi chros dat Jehoava mi wahn help ahn. How Penina mi chreet Hana afta dat? Di Baibl noh seh. Bot wi noa dat Hana mi geh bak ih pees ahn shee neva sad nohmoh.—1 Sam. 1:10, 18.

14. Weh wi ku laan fahn Hana egzampl?

 ¹⁴ Weh wi ku laan fahn Hana egzampl? If sohnbadi chrai ak laik dehn beta dan yoo, memba dat yu noh haftu proov dat yoo beta dan dehn. Insteda pay bak bad fi bad, chrai mek pees wid di persn. (Roam. 12:17-21) Di persn mait noh chaynj ih atichood, bot yoo wahn feel kaam ahn hapi.

15. Weh Apolos ahn Paal mi gat in kaman?

¹⁵ Fainali, mek wi si weh wi ku laan fahn Apolos ahn Paal egzampl. Di too a dehn mi noa di Skripchaz gud; dehn da-mi gud teechaz, ahn dehn mi help lata peepl fi bee disaiplz a Krais. Bot dehn neva jelos eech ada.

16. Da-mi weh kaina persn Apolos?

¹⁶ Apolos da-mi fahn Alegzanjriya, wahn siti wehpaat peepl yoostu goh fi geh wahn gud ejukayshan. Hihn da-mi wahn gud speeka an ih kuda “eksplayn di Skripchaz gud.” (Aks 18:24) Wen Apolos mi spen taim da Korint, sohn bradaz eena di kangrigayshan mi shoa ahn dat dehn mi laik hihn moa dan di ada bradaz, inkloodin Paal. (1 Kor. 1:12, 13) Yu tink Apolos mi talarayt disya kaina atichood? Af koars nat! Az a mata a fak, lee bit afta Apolos mi lef Korint, Paal mi aks ahn fi goh bak deh. (1 Kor. 16:12) Paal neva mi wahn du dis if hihn mi feel laik Apolos mi-di divaid di kangrigayshan. Ih klyaa fi si dat Apolos mi yooz ih skilz fi preech di gud nyooz ahn fi schrentn di bradaz. Wi ku aalso bee shoar dat Apolos mi hombl. Fi egzampl, di Baibl noh seh dat Apolos mi geh ofendid wen Akwila ahn Prisila mi “eksplayn di res a di chroot bowt di way a Gaad weh ih neva noa.”—Aks 18:24-28.

17. How Paal mi kip di pees eena di Kangrigayshan?

 ¹⁷ Di apasl Paal mi noa bowt di gud tingz weh Apolos mi-di du. Bot Paal neva jelos Apolos. Wen wi reed weh Paal mi rait tu di Korintyanz, wi si dat hihn mi hombl an ih mi reeznabl. Hihn neva laik wen peepl mi-di seh, “Ai di fala Paal,” insted, hihn mi giv aal di atenshan tu Jehoava ahn tu Jeezas.—1 Kor. 3:3-6.

18. Bays pahn 1 Korintyanz 4:6, 7, weh wi laan fahn Apolos ahn Paal egzampl?

¹⁸ Weh wi ku laan fahn Apolos ahn Paal egzampl? Wee mait di werk haad fi Jehoava ahn wi mait help wahn lata peepl geh baptaiz. Bot wi andastan dat dehndeh tingz onli pasabl bikaaz Jehoava di help wi. Wi aalso laan dat wen wi ga moa rispansabiliti eena di kangrigayshan, wi ku du moa fi kip di pees eena di kangrigayshan. Wi veri tankful wen di eldaz ahn ministeeryal servants yooz di Baibl fi help wi fi kip di pees eena di kangrigayshan. Dehn noh chrai bee moa impoatant dan wee, bot dehn help wi fi obay Jeezas ahn fi fala fi hihn egzampl!—Reed 1 Korintyanz 4:6, 7.

19. Weh eech wan a wi ku du? (Si di baks “ Noh Mek Nobadi Ak Laik Dehn Beta Dan Adaz.”)

¹⁹ Jehoava giv eech wan a wi wahn gif ahn wi ku yooz it fi “serv wan anada.” (1 Peet. 4:10) Wi mait feel laik di lee tingz weh wi du fi wi bradaz ahn sistaz noh impoatant. Bot jos laik how evri lee pees a wud help fi bil wahn hows, sayhn way soh eni lee ting weh wi du ku help kip di pees eena di kangrigayshan. Eech wan a wi fi kantinyu werk haad soh dat wi noh ak laik wi beta dan adaz. Mek wi mek op wi main fi du aal weh wi kud fi kip di pees ahn yooniti eena di kangrigayshan.—Ifee. 4:3.