1. Ka gayaraabei lasuseredun dan le lasaminarun gürigia buidu lan luéi le aban?

LIDAN ubóu le, saragu gürigia aransetiña lun hadügün furumiñeguarügü katei lun genege lan buídutima hamá hawéi amu. Kéiburi aban wügüri le labureme bísinisi másiñati ladügün somu katei le mabuidunti lun lidin hóugiñe amu. Másiñati labuleiseiragüdün aban áhurerati ábaya áhurerati le lídangiñeti amu sétanu lun gayara lan lagañeiruni huraraü. O másiñati giñe ladügün aban aturiahati katei le moun lumuti lúnrügü lagañeirunu egüsámini lun lebelurun tidoun aban luban furendei íñuti. Subudi wamuti wagía kristiánugu wuriba lan sun igaburi le ladüga subudi wamuti lídangiñeti lan “layumahan ǘgürügü” (Gal. 5:19-21). Gayaraati san háyeihañein lan hádangiñe lubúeingu Heowá igaburi le sin híchugun fe? Súdiniti lun lóunabun álügüdahani le ladüga gayaraati ladügün igaburi le lun lafanreinragun úarani le lídanbei damuriguaü.

2. Kaba wariha lidan aturiahani le?

² Lidan aturiahani le wayanuhaba ka lan wuribani gayaraabei ladügün lun wasaminarun buídutima wamá hawéi wábirigu. Warihibei giñe igaburi le harufudubei saragu lubúeingu Heowá ha úaraguabaña ha lánina tidaani Bíbülia ha mígiraguagüdünbaña houngua lun igaburi le. Furumiñe, lunti warihini ida waña lan. Ariha waméi.

3. Ka álügüdahani lunbei wadügüni wóuniwagua?

³ Buiti lun waríagun wougua sagü átiri dan ida liña lan wagaburi. Gayaraati wálügüdagun woungua: “Mégeitina san naríagun nungua hóubawagu amu lun buidu lan nasandiragun nungua? Ka san ínchahabalina lun nawadigimaridun lidan damuriguaü? Ladüga  san busén nan lun buidu nan hawéi amu o, lun buídutima nan hawéi ítaga íbirigu? O ladüga busén nan lun níchuguni le buídutimabei númagiñegua lun Heowá?” Ka uagu súdini lubéi lun wóunabuni álügüdahani le? Ariha waméi le tariñagubei Bíbülia.

4. Ka uagu moun lumuti lubéi wagoubaguagüdün woungua hama amu, kei lariñaguni Galasiana 6:3, 4?

⁴ Ariñagatu Lererun Bungiu lun lan magoubaguagüdün wamá woungua hama amu (aliiha huméi Galasiana 6:3, 4). Ka uagu? Ánhawa agoubaguagüda woungua hama amu, gayaraabei ladügün katei le lun wapantahan. Ánhawa asandiragua woungua ni kata wamá, gayaraati giñe lábürühan warüna. Mabuidunti bián katei le (Rom. 12:3). Ariñagatu aban íbiri gíritu Katerina: * “Héchutina meha arihaña amu íbirigu kamá buídumeraütiña nuéi, chútima lan hau lidan apurichihani ani gamadoun hamá. Adügati meha katei le lun nasandiragun nungua ni kata nan”. Haritagua waméi machawahan lániwa Heowá luouguoun ladügarügü wabuídumeraü, gayanuhadi wamá o subudiwatima wamá, lachawahabadiwa ladüga aranseñu waña lan lun hínsiñe lan woun ani aganba wamani Lisaani (Huan 6:44; 1 Ko. 1:26-31).

5. Ka wafurendeirubei lídangiñe le asuseredubei lun íbiri le gíribei Hyun?

⁵ Gayaraati giñe wálügüdagun woungua: “Ariha hamutina san amu kei aban gürigia le áluahabalin darangilaü, o súnwandan dagua nan nungua lidoun burí turobuli?”. Ariha waméi le asuseredubei lun aban íbiri gíribei Hyun, le awinwandubei Koréa lani Suru. Anihein meha aban dan ariha lániña íbirigu ha lídanbaña damuriguaü kei láganigu. Abahüdaguati: “Ayanuhatina meha wuriba hawagu ani súnwandan múaran nan luma le hariñagubei”. Ka asuseredubei? Ariñagati: “Adügati nigaburi lun ñein lan fánreingua lidan damuriguaü”. Íderagua hamuti saragu lumadagu lun lasansiruni ligaburi. Adüga lumuti Hyun asansiruni le mégeiwabei, ani uguñe weyu aban wéiyaali lidan afiñeni buiti ligía. Ka wafurendeirubei? Lunti lan wadügüni sun wayaraati ánhawa arihei gagaburi wamani wínchahaniña amu lun harihiniwa buídutima wamá hawéi amu lubaragiñe hamuga wáluahani darangilaü.

6. Según Galasiana 5:26, ka luriban igaburi gayaraabei ladügün lun wasaminarun buidu wamá hawéi amu?

⁶ (Aliiha huméi Galasiana 5:26). Ka san igaburi gayaraabei larufuduni anihein lan igaburi lánina ásügüraguni wawagu? Aban lídangiñe wasaminarun buídutima wamá hawéi amu. Gürigia le asaminarubei buídutima lan hawéi amu pántati ani luouguounrügüñein lasaminara. Gimugaü ligía ábaya igaburi mabuidunti. Gürigia le gimugabei mámarügü busenrügü lumuti le lúmabei aban gürigia, ayumahati giñe lun mani lani gürigia ligía. Ligíati, dan le gimuga lan aban gürigia larufuduñein iyereegu lan le aban gürigia lun. Chóuruti busenbadiwa lan lun wanurahan luéi luriban igaburi le kamá hamuga wanurahan luéi aban sandi le galugurahati.

7. Ka hénpulu gayaraabei líderaguniwa gunfurandei wuribani le lanügübei lasaminarun gürigia luouguounrügü luma gimugaü?

⁷ Genegeguati ligaburi gürigia le asaminarubei luouguounrügü lumoun iwiyei le awiyedubalin tigasin awión. Gayaraati gayara lan táhamarun aban awión; gama lumoun, anhein latapara iwiyei lémeri gasi, másiñati leferidiruni máhina lere lubaragiñe tadagarun awión ábame taduunchun. Ítarameme, gayaraati barühali lan aban gürigia fiu dan eseriwida lun Heowá; anhein anihein lubéi pantaü luma gimugaü tidan lanigi gayaraabei lagumuchun wuriba (Ari. 16:18). Ábameti meseriwidunhali lanme lun Heowá, ani adüga ligíame dañu lúniwagua luma houn amu. Ida luba wáfaagun lun masaminarun wamá wawouguounrügü ni lun gimuga wamá?

8. Ida luba wáfaagun lun masaminarun wamá wawouguounrügü?

 ⁸ Gayaraati wáfaagun lun magaburi wamani wawouguounrügü lan wasaminara ánhawa afalarei adundehani le líchugubei apostolu Pábulu houn filipuna: “Madüga humá ni kata huouguarügü lun hanügǘniwa weiri, ni lau pantaü; lubaragiñe lira lau lan ǘnabuguni, ani buidulá hanügüniña amu gürigia huéi guánarügü” (Fili. 2:3). Ánhawa asaminara buídutima hamá amu wawéi, másügüragubadiwa hama ha gayaraaguabaña houngua wawéi, gúndaarügübadiwa hau. Inarüni katei le, dántima le hayusuruñein lan here luma iarani le hawagubei lun híchugun uéiriguni lun Heowá. Luagu le aban oubaü, anhein hafalara íbirigu ha gayaraaguabaña houngua adundehani le líchugubei Pábulu, heteniruba lun lubuidun igaburi le wawagubei. Ladügüba katei le lun ñein lan darangilaü luma úarani lidan damuriguaü.

9. Kaba íderaguawa lun magimugan wamá?

⁹ Kaba íderaguawa lun magimugan wamá? Ǘnabuguni, lugundun wasubudirubei gébeha lan le wayaraabei adüga. Ánhawa ǘnabugu, máfaagunbadiwa warufuduni houn amu buídutima wamá lidan ladügǘn somu katei hawéi ha híbiri gürigia. Lubaragiñe lira, wáfaaguba lun wafurendeirun lídangiñe iarani le ídanbei buídutima hamá amu wawéi. Kéiburi, anhein anihein lubéi aban íbiri lídangiñeti damuriguaü le gíchigaditi yanu, gayaraati wálügüdüni ida liña lan laranseruni liyanun. Anhein anuhein lubéi aban íbiri to gábouguaditu, gayaraati wamuriahan ídemuei tuma lun wabuiduragüdüni ligaburi wábougun. Anhein anihein lubéi aban nibureinti le unbei gürewei lan lun gamadagua lan, gayaraati lálügüdün aban íbiri le gamadounti, lun lariñaguni lun ka lan lunbei ladügüni lun gamadoun lan. Líderagubadiwa wafalaruni sun adundehani le lun ua lan gimugaü wadan, líderagubadiwa giñe abuiduragüdei wagaburi.

10. Ka sügǘ úmabei lagagibudagua Hedeón?

¹⁰ Samina wamá luagu le asuseredubei lun Hedeón, le lídangiñebei lani Manasési türibu luma hawagu wügüriña ha lídangiñetiña lani Éfürain türibu. Lau lídehan Heowá, gáñeiti Hedeón hama 300 wügüriña aban wuribu le uágubei gayara lan hamuga lapantahan luagu. Aba houdin  lüwügüriña Éfürain ayanuha luma Hedeón, mama lun hariñagun lun buidu lan ladüga, hóudiña lun hasigenehan luma. Genegeti meha safagu haña lan ladüga lúmagiñe lagumeseha wuribu magunbirahan lumutiña lun houdin ageindagua úara luma, hawagun láganiñu Bungiu. Wéiriti heteniruña lan meha lun hóunigiruni lubuidun liri hani türibu ani masaminaruntiña meha luagu le súdinitimabei: Sun liña meha lídehan Hedeón lun lichugún uéiriguni lun liri Heowá luma óunigiraña lumutuniña (Ali. 8:1).

11. Ida liña lóunabuniña Hedeón wügüriña ha lídangiñebaña lani Éfürain türibu?

¹¹ Lau ǘnabuguni, aba lariñagun Hedeón houn lánigu Éfürain: “Ibidiñeti san hun luagu gíbetima lan le hadügübei sügǘ lau le nadügübei?” Lárigiñe aba layanuhan hama luagu aban hénpulu le arufudubalin ida liña lan labiniruniña Heowá. Dan le haganbunbalin, “aba lásügürün hagañi” (Ali. 8:2, 3). Aranseñu liña meha Hedeón lun marufudun lan pantaü lun gayaraabei lan ñein lan darangilaü hadan lumutuniña Bungiu.

12. Ka wafurendeirubei hámagiñe éfüraimüna luma lúmagiñe Hedeón?

¹² Ka larufudahabei sügǘ le woun? Furendeitiwa hámagiñe lani Éfürain türibu mama lan lun wíchugun uéiriguni wóuniwagua súdinitimabei, súdinitimati wíchugun uéiriguni lun Heowá. Gayaraati hafurendeirun hachügüdina iduheñu hama wéiyaaña lidan afiñeni lúmagiñe Hedeón, anhein agañida somu gürigia hama luagu ida liña lan ligaburi hadügüni katei, lunti háfaagun lun harihini katei kei ligaburi harihini gürigia hagía. Gayaraati giñe hariñagun houn buidu lan hadüga luagu katei buiti le hadügübei. Lun lira mégeiwati ǘnabuguni, dántima le ménefan lan bulíeiguaali lan le aban gürigia. Ligíati súdinitimati lun wadügün lun ñein lan darangilaü sügǘ lau warufudun garicha wamá.

13. Ka meha titurobulibei Ana, ani ka tadügübei?

¹³ Ariha waméi giñe tani Ana hénpulu. Maríeitu meha luma aban lewitana le gíribei Elikaná, ani wéiriti meha tínsiñe lun. Lau sun lira, gámariti meha Elikaná ábaya würi to gíriboun Peniná. Wéiritimati meha tínsiñe Ana lun sügǘ tuéi Peniná. Gama lumoun “gíbetimatiña meha tirahüñü Peniná, ánhounti Ana, marahüñütu”. Súnwandan meha “tañawarihan Peniná tun luagu maráü tan; ábatiha tayahun Ana, ani méigintuha” (1 Sam. 1:2, 6, 7). Lau sun lira, mariñaguntu Bíbülia áluga tan Ana lun tafayeirun Peniná luagu wuribati le tadügübei tun. Lubaragiñe lira, aba tadaarunu tanigi lun Heowá, afiñeñu líderaguboun lan. Ibidiñeti woun anhein sansi tubalin Peniná tigaburi. Le wasubudirubei ragügua tan Ana tungua ani buidu ligía tasandiragun tungua, lugundun ariñagatu Bíbülia tuagu “aba mírudundigiaaru lan” (1 Sam. 1:10, 18).

14. Ka wafurendeirubei túmagiñe Ana?

¹⁴ Ka wafurendeirubei túmagiñe Ana? Anhein samina lubéi aban gürigia o láfaaguña lan lun buídutima lan wawéi, aritagua waméi wáhaburuguñein lan ubafu lun waransehani katei. Moun lumuti wígiraguagüdün woungua lun agañiduni.  Lubaragiñe wígiraguagüdün wougua lun wafayeirun wuribani luagu wuribani, áfaaguatiwa lun ñein lan darangilaü (Rom. 12:17-21). Íbini masansirun hamá gürigia, anhein wagía busentiwa warufudun darangilaü.

15. Ida liña aban lan ligaburi Apolosu kei Pábulu?

¹⁵ Lagumuhóun, ariha waméi le larufudahabei ligaburi Apolosu luma igaburi le larufudubei apostolu Pábulu. Biángubei meha hagía subuditu meha Lererun Bungiu houn buidu buidu ani máisturu meha ha subudiwatiña ani gabafuti meha le hariñagubei hawagu amu. Ani biángubei hagía íderaguaña meha saragu gürigia adügagua houngua disipulugume. Gama lumoun ni aban hádangiñe maríaguntiña meha houngua kei áganiñu.

16. Ka meha hawuyeri gürigia Apolosu?

¹⁶ “Alehandüríana” meha Apolosu lídangiñe aban fulasu le ñein lubéi hadariruwa sun hawuyeri gürigia lidan furumiñeti sígulu. Ani genegeti meha gíchigadi lan yanu ani subudi tuguya “Lererun Bungiu buidu buidu” lun (Adü. 18:24). Dan meha le Korintu lubéi Apolosu arufuda hamuti lílana damuriguaü furangu himei hamuti lan, sügǘ hawéi amu íbirigu, kei burí apostolu Pábulu (1 Ko. 1:12, 13). Apolosu san adügübei lun ñein lan fánreingua ligía? Masaminarun wamuti ítara liña lan. Dan le lídinbei Apolosu Korintu giñe, aba lamuriahan Pábulu luma lun lagiribudun (1 Ko. 16:12). Mamuriahanbei hamuga Pábulu lun lagiribudun Apolosu lun hamuga anihán lan Apolosu afanreinraguagüdei damuriguaü. Chóuruti layusuruñein lan Apolosu iyaraani le luágubei lidan aban igaburi le buiti: lun lapurichihani uganu buiti luma lun lederebudagüdüni hafiñen íbirigu. Gayaraati giñe wachoururuni aban lan meha wügüri ǘnabuguti Apolosu. Kei hénpulu úati ni kata arufuduti gañi lan Apolosu dan le lafuranguagüdünitima Akila tuma Pürisíla “luáguti lémeri Bungiu lun” (Adü. 18:24-28).

17. Ka ladügübei Pábulu lun ñein lan darangilaü?

 ¹⁷ Subudi lumuti meha apostolu Pábulu lubuidun dasi le ladügübei Apolosu. Gama lumoun, masandiragunti meha Pábulu lagidaraali lan Apolosu lubara luéi. Gayaraati warihin lidan adundehani le labürühabei houn lílana damuriguaü le Korintubei, luagu ǘnabugu lan Pábulu, subudi lumuti le liyaraabei adüga ani buiti meha lisaminan. Lubaragiñe hamuga lasandiragun lungua lau uéiriguni ladüga hariñagun “lánigu Pábulu au”, aba líchuguni sun uéiriguni lun Heowá luma lun Hesukrístu (1 Ko. 3:3-6).

18. Según 1 Korintuna 4:6, 7, ka wafurendeirubei lúmagiñe Apolosu labu Pábulu?

¹⁸ Ka wafurendeirubei lúmagiñe Apolosu labu sun Pábulu? Sun dasi le wadügübei luagu Heowá dan le buidu lan lidin woun lidan wíderagun gürigia lun habadiseirun, sun lira, seremei labiniruni Heowá wáfaagun. Amu katei le wafurendeirubei, eibu lan lagibedun wadasin lidan damuriguaü, éibutima gayara lan wídeha lun ñein lan darangilaü luma úarani. Adüga hamuti wéiyaaña lidan afiñeni hama ídehatiña lidan damuriguaü lira dan le tídangiñe lan Bíbülia hasagara ariñahani lun híchugun adundehani, adügati lira lun háyeihani Kristu Hesusu. Ma wagundan luagu añahein lan wama! (Aliiha huméi 1 Korintuna 4:6, 7).

19. Ka lunbei ladügüni kada aban wádangiñe? (Ariha waméi rekuáduru “ Mínchahan wamá amu lun buídutima hamá hawéi amu”).

¹⁹ Rúhali Bungiu ámuñegueinarügü iyaraani woun sun wagía lun gayara lan wayusuruni lun weseriwidun wámagua (1 Fe. 4:10). Másiñati wasandiragun woungua mibe lan le wíchugunbei. Gama lumoun, murusun katei le wadügübei lun ñein lan úarani, ítara liña kei filu le afadaraguagüdübarun gamisa to áhüchawagunboun le adügübei lun tasalirun aban tubuidun daüguaü. Ligíati, áfaagua wamá lun wagidaruni sun saminaü le lánina buídutima wamá hawéi amu ani adüga waméi sun wayaraati lun ñein lan darangilaü luma úarani lidan damuriguaü (Efe. 4:3).