1. Unsay mahitabo kon ang mga tawo makigkompetensiya?

TUNGOD sa kahakog, daghang tawo sa kalibotan karon ang makigkompetensiya. Pananglitan, ang usa ka negosyante mogamit tingalig dili maayong mga pamaagi aron moasenso bisag makahatag nig kadaot sa uban. Ang usa ka atleta tinuyo tingaling magpahinabog kadaot sa atleta sa pikas nga team aron silay modaog sa dula. Ang usa ka estudyante manglimbong tingali aron makapasar sa entrance exam sa usa ka iladong unibersidad. Ingong mga Kristohanon, nahibalo ta nga sayop ang maong panggawi; apil kana sa “mga buhat sa unod.” (Gal. 5:19-21) Pero posible ba nga ang pipila ka alagad ni Jehova dili tinuyong makaaghat ug kompetisyon diha sa kongregasyon? Importante kana nga pangutana kay ang pagpakigkompetensiya makapabahinbahin sa kongregasyon.

2. Unsay atong hisgotan niining artikuloha?

² Niining artikuloha, hisgotan nato ang negatibong mga kinaiya nga makaaghat nato sa pagpakigkompetensiya sa atong mga igsoon. Konsiderahon sab nato ang ehemplo sa matinumanong mga alagad ni Jehova diha sa Bibliya nga wala maaghat sa pagpakigkompetensiya. Pero hisgotan una nato kon unsaon nato pagsusi ang atong mga motibo.

3. Unsay angay natong ipangutana sa kaugalingon?

³ Matag karon ug unya, maayong susihon nato ang atong mga motibo. Puwede natong pangutan-on ang kaugalingon: ‘Malipay lang ba ko sa akong nahimo kon maghunahuna ko nga mas  maayo ko sa uban? Naningkamot ba ko diha sa kongregasyon tungod lang kay gusto nakong mahimong kinamaayohan o mahimong mas maayo kay sa laing igsoon? O naningkamot ba ko aron mapalipay si Jehova?’ Nganong angay nato ning ipangutana? Matikdi ang giingon sa Pulong sa Diyos.

4. Sumala sa Galacia 6:3, 4, nganong dili nato angayng itandi ang atong kaugalingon sa uban?

⁴ Ang Bibliya nag-awhag nga dili nato itandi ang atong kaugalingon sa uban. (Basaha ang Galacia 6:3, 4.) Ngano? Ang usa ka rason mao nga kon maghunahuna ta nga mas maayo ta sa atong igsoon, mahimo tang garboso. Sa laing bahin, kon maghunahuna ta nga ubos ra kaayo ta kon itandi sa uban, posibleng maluya ta. Kanang duha ka panghunahuna dili maalamon. (Roma 12:3) Ang sister nga si Katerina, * kinsa nagpuyo sa Greece, miingon: “Kaniadto, itandi nako ang akong kaugalingon niadtong paminaw nako mas guwapa, mas epektibo diha sa ministeryo, ug mas mahigalaon. Tungod niana, mibati kong way pulos.” Angay natong hinumdoman nga gikabig ta ni Jehova, dili tungod kay guwapa o guwapo ta, maayong manulti, o popular, kondili tungod kay kinabubut-on tang nahigugma kaniya ug naminaw sa iyang Anak.—Juan 6:44; 1 Cor. 1:26-31.

5. Unsay imong nakat-onan sa eksperyensiya sa brader nga si Hyun?

⁵ Ang laing pangutana nga puwede natong isukna sa kaugalingon mao, ‘Nailhan ba ko ingong makigdaiton, o pirme ba kong may dili ikasinabot nga igsoon?’ Matikdi ang eksperyensiya sa brader nga si Hyun, nga taga-South Korea. Dihay panahon nga giisip niya ingong iyang mga kakompetensiya ang pipila niadtong dunay mga pribilehiyo sa pag-alagad. Siya miingon, “Magsige kog panaway niining mga igsoona, ug sagad dili ko mouyon sa ilang isulti.” Unsay resulta? “Ang akong panghunahuna nagpahinabog pagkabahinbahin diha sa kongregasyon,” siya miingon. Ang pipila sa mga higala ni Hyun mitabang niya nga makita ang iyang problema. Gihimo ni Hyun ang gikinahanglang mga kausaban, ug karon siya usa na ka maayo kaayong ansiyano. Kon makita nato nga duna tay tendensiya nga makigkompetensiya imbes makigdait, kinahanglang mohimo dayon tag kausaban.

6. Sumala sa Galacia 5:26, unsang dili maayong mga kinaiya ang makaaghat nato nga makigkompetensiya?

⁶ Basaha ang Galacia 5:26. Unsang dili maayong mga kinaiya ang makaaghat nato nga makigkompetensiya? Ang usa mao ang garbo. Ang garbosong tawo kaugalingon ray gihunahuna. Ang laing dili maayong kinaiya mao ang kasina. Ang masinahong tawo wala lang magtinguha sa nabatonan sa uban kondili mangandoy sab nga mawad-an sila sa ilang nabatonan. Busa, ang tawo nga nasina sa laing tawo sa pagkatinuod nagdumot kaniya. Gusto gyod natong likayan kining dili maayong mga kinaiya sama sa atong paglikay sa makamatay nga sakit!

7. Sa unsang paagi ikailustrar nato ang kadaot nga ipahinabo sa garbo ug kasina?

⁷ Ang garbo ug kasina mahimong ipakasama sa mga hugaw nga nakakontaminar sa gasolina sa usa ka eroplano. Ang eroplano makalupad tingali, pero ang mga hugaw makabara sa mga tubo nga agian sa gasolina, maong mamatay ang makina sa dili pa makalanding ang eroplano ug mahagsa kini. Sa susama, ang usa ka Kristohanon mag-alagad tingali kang Jehova sulod sa pipila ka panahon. Pero kon siya garboso ug masinahon, siya mahagsa. (Prov. 16:18) Mohunong siya sa pag-alagad kang Jehova ug mapasakitan niya ang iyang  kaugalingon ug ang uban. Pero sa unsang paagi malikayan nato ang garbo ug kasina?

8. Sa unsang paagi malikayan nato ang garbo?

⁸ Malikayan nato ang garbo, o ang pagpakaimportante sa kaugalingon, kon atong ipadapat ang tambag ni apostol Pablo sa mga taga-Filipos: “Likayi ang hilig nga makig-away o ang pagpakaimportante sa kaugalingon, apan magpaubos mo ug isipa ang uban nga labaw kay kaninyo.” (Filip. 2:3) Kon atong isipon ang uban nga mas labaw kay kanato, dili ta makigkompetensiya niadtong tingali mas daghag talento ug abilidad kay kanato. Malipay hinuon ta para nila, ilabina kon gigamit nila ang ilang mga abilidad diha sa pag-alagad ug pagdayeg kang Jehova. Sa laing bahin, kon ipadapat sa mga igsoon nga daghag abilidad ang tambag ni Pablo, makita nila ang atong maayong mga hiyas. Ingong resulta, kitang tanan makatabang sa pagpalambo sa kalinaw ug panaghiusa diha sa kongregasyon.

9. Sa unsang paagi makontrolar nato ang atong tendensiya nga masina?

⁹ Makontrolar nato ang atong tendensiya nga masina kon ugmaron nato ang pagkamakasaranganon, nga nagpasabot nga ilhon nato ang atong mga limitasyon. Kon makasaranganon ta, dili ta maningkamot nga ipakita nga mas maayo o mas hawod ta kay sa uban. Hinunoa, maningkamot ta nga mokat-on niadtong mas abilidaran kay kanato. Pananglitan, ibutang ta nga ang usa ka brader diha sa kongregasyon maayong mopakigpulong. Puwede nato siyang pangutan-on kon sa unsang paagi siya mangandam sa iyang mga pakigpulong. Kon ang usa ka sister maayong moluto, puwede tang mangayog sugyot niya kon unsaon nga mouswag nianang bahina. Ug kon ang usa ka batan-ong Kristohanon malisdan sa pagpakighigala, puwede siyang mangayog tambag niadtong mahigalaon. Kon ato ning himoon, malikayan nato ang kasina ug mouswag ang atong mga kahanas.

10. Unsang problema ang giatubang ni Gideon?

¹⁰ Hunahunaa ang nahitabo kang Gideon, kinsa gikan sa tribo ni Manases, ug sa mga lalaki sa tribo ni Epraim. Gitabangan ni Jehova  si Gideon ug ang iyang 300 ka sundalo nga makadaog sa gubat, nga puwede unta nilang ikapasigarbo. Ang mga lalaki sa tribo ni Epraim nakigkita kang Gideon, dili aron komendahan siya, kondili aron makig-away niya. Natandog ang ilang garbo kay wala dayon sila dapita ni Gideon nga moapil sa pagpakiggubat batok sa mga kaaway sa Diyos. Nagpokus sila pag-ayo sa pagpanalipod sa dungog sa ilang tribo maong wala nila makita ang mas importanteng butang—nga si Gideon mitabang sa pagpasidungog sa ngalan ni Jehova ug pagpanalipod sa Iyang katawhan.—Maghu. 8:1.

11. Unsay giingon ni Gideon ngadto sa mga lalaki sa tribo ni Epraim?

¹¹ Si Gideon mapainubsanong miingon ngadto sa mga lalaki sa tribo ni Epraim: “Unsa ra man tong akong nahimo kon itandi sa inyong nahimo?” Dayon, gihatagan niya silag espesipikong pananglitan kon giunsa sila pagpanalangin ni Jehova. Ingong resulta, sila “mikalma.” (Maghu. 8:2, 3) Gitulon ni Gideon ang iyang garbo aron mamentinar ang kalinaw taliwala sa katawhan sa Diyos.

12. Unsay atong makat-onan sa mga taga-Epraim ug kang Gideon?

¹² Unsay atong makat-onan niini nga asoy? Atong makat-onan sa mga taga-Epraim nga dili ta angayng magpokus sa pagpanalipod sa atong kadungganan, kondili sa kadungganan ni Jehova. Kitang mga ulo sa pamilya ug mga ansiyano dunay makat-onan kang Gideon. Kon dunay masuko sa atong gihimo, angay natong sabton kon nganong mao nay iyang gibati. Puwede sab natong komendahan ang maong tawo sa iyang maayong nahimo. Kinahanglan tang magmapainubsanon aron mahimo kana, ilabina kon ang maong tawo klarong nasayop. Pero ang kalinaw mas importante kay sa atong dungog.

13. Unsang problema ang giatubang ni Ana, ug unsay iyang gihimo?

¹³ Hunahunaa sab ang ehemplo ni Ana. Naminyo siya sa usa ka Levihanon nga si Elkana, kinsa nahigugma pag-ayo kaniya. Pero si Elkana may laing asawa, si Penina. Gimahal ni Elkana si Ana labaw kay kang Penina, pero “si Penina may mga anak, apan si Ana wala.” Tungod niini, si Penina “kanunayng magbiaybiay kaniya aron pasakitan siya.” Unsay gibati ni Ana? Nasakitan kaayo siya! “Siya mohilak ug dili mokaon.” (1 Sam. 1:2, 6, 7) Pero walay giingon ang Bibliya nga si Ana nanimalos kang Penina. Hinunoa, gisulti niya kang Jehova ang tanan niyang kaguol, ug misalig siya nga tabangan siya ni Jehova. Nausab ba ang pagtratar ni Penina kang Ana? Walay giingon ang Bibliya. Pero nahibalo ta nga nabatonan pag-usab ni Ana ang kalinaw sa hunahuna. “Ang iyang nawong dili na magul-anon.”—1 Sam. 1:10, 18.

14. Unsay atong makat-onan kang Ana?

¹⁴ Unsay atong makat-onan kang Ana? Kon  dunay makigkompetensiya nimo, hinumdomi nga duna kay mahimo. Puwede nimong malikayan ang pagpakigkompetensiya kaniya. Imbes manimalos, paningkamot nga makigdait sa maong tawo. (Roma 12:17-21) Bisag dili siya magbag-o, mabatonan gihapon nimo ang kalinaw sa hunahuna.

15. Sa unsang paagi managsama si Apolos ug Pablo?

¹⁵ Sa kataposan, konsideraha ang atong makat-onan sa tinun-ang si Apolos ug kang apostol Pablo. Silang duha parehong daghag nahibaloan bahin sa Kasulatan. Pareho silang ilado ug maayong mga magtutudlo. Ug daghan silag natabangan nga mahimong mga tinun-an. Pero wala sila masina sa usag usa.

16. Unsang matanga sa tawo si Apolos?

¹⁶ Si Apolos “usa ka lumad sa Alejandria,” nga usa ka sentro sa edukasyon sa unang siglo. Dayag nga siya maayo kaayo nga mamumulong, ug siya “batid kaayo sa Balaang Kasulatan.” (Buh. 18:24) Sa dihang si Apolos nagpabilin sa Corinto, gipakita sa pipila diha sa kongregasyon nga mas ganahan sila kaniya kay sa ubang igsoon, apil na kang Pablo. (1 Cor. 1:12, 13) Miuyon ba si Apolos nianang makapabahin nga panghunahuna? Dili nato maimadyin nga gihimo niya kana. Gani, paglabayg pipila ka panahon human mobiya si Apolos sa Corinto, giawhag siya ni Pablo nga mobalik didto. (1 Cor. 16:12) Di gyod nâ himoon ni Pablo kon gibati niya nga si Apolos nagpahinabog pagkabahinbahin sa kongregasyon. Klaro, gigamit ni Apolos ang iyang mga abilidad sa maayong paagi—sa pagsangyaw sa maayong balita ug pagpalig-on sa mga igsoon. Makaseguro sab ta nga si Apolos mapainubsanon. Pananglitan, wala tay mabasa sa Bibliya nga siya nahiubos dihang si Aquila ug Priscila ‘mas tukma nga nagpatin-aw kaniya sa dalan sa Diyos.’—Buh. 18:24-28.

17. Sa unsang paagi gipalambo ni Pablo ang kalinaw?

 ¹⁷ Nahibalo si Pablo sa maayo nga nahimo ni Apolos. Pero wala siya masina kang Apolos. Ang pagkamapainubsanon, pagkamakasaranganon, ug pagkamakataronganon ni Pablo makita diha sa iyang tambag sa kongregasyon sa Corinto. Imbes mahimong garboso tungod sa mga tawo nga nag-ingon, “Ako iya ni Pablo,” iyang gihatag ang tanang pasidungog kang Jehova nga Diyos ug kang Jesu-Kristo.—1 Cor. 3:3-6.

18. Base sa 1 Corinto 4:6, 7, unsay atong makat-onan kang Apolos ug Pablo?

¹⁸ Unsay atong makat-onan kang Apolos ug Pablo? Tingali nagkugi ta para kang Jehova, ug basin daghan tag natabangan nga mouswag ug mabawtismohan. Pero nahibalo ta nga nagmalamposon lang ta tungod sa tabang ni Jehova. Duna tay laing makat-onan kang Apolos ug Pablo—kon mas daghan tag responsibilidad sa kongregasyon, mas dako tag kahigayonan sa pagpalambo sa kalinaw. Mapasalamaton gyod ta sa dihang ang gitudlo nga mga lalaki magpalambo sa kalinaw ug panaghiusa pinaagi sa pagbase sa ilang tambag diha sa Pulong sa Diyos ug sa paghatag sa pasidungog, dili sa ilang kaugalingon, kondili sa atong ehemplo, si Kristo Jesus!—Basaha ang 1 Corinto 4:6, 7.

19. Unsay mahimo sa matag usa kanato? (Tan-awa sab ang kahong “ Likayi ang Pag-aghat ug Kompetisyon.”)

¹⁹ Ang matag usa kanato dunay hinatag sa Diyos nga talento o abilidad. Magamit nato kana “sa pag-alagad sa usag usa.” (1 Ped. 4:10) Mobati tingali ta nga gamay ra tag mahimo. Pero ang ginagmayng butang nga atong himoon sa pagpalambo sa panaghiusa samag gagmayng tahi diha sa tela aron kini mahimong sinina. Hinaot nga maningkamot ta nga wad-on sa atong kaugalingon ang bisan unsang tendensiya nga makigkompetensiya. Ug magmadeterminado ta nga himoon ang tanan sa pagpalambo sa kalinaw ug panaghiusa diha sa kongregasyon.—Efe. 4:3.