1. Éé ní ea é láá naaá be è ẹb bẹẹ bá kọ è léè èl dõòna gbò e?

È DI mm̀ bàlà boó e dùm kùlù-kúlù náa kọọ̀ gã́bug nen á ẹ̀b ba bá belí kọ bà léèlìè elìè dõòna gbò, vaá bà náa ólò bùlà nú ea kil ló bé e ba láb é láá tọá ló dõòna gbò naa. Neǹ ùlà ki é láá naa nú ea é kyọ ki ló dõòna gbò boo béè ge naa ní e ńlẹ́ẹ̀ ki é bọọ́ gbàà. Nen ea ólò bìlà bọ́ọ̀l deemá kpègè é láá sẹlẹ nvèè kom ló nen ea dṹùnà gbò e baala nè ọ̀và gé gbá bìlà kọbé bà elìè bá. Nen ea gbĩ́ gè bã pọ̀b tọọ̀ kpà e gbò nen ólò palàge nvèè ka ló ólò láá zìbmà ẹ̀bmà kọbé à láá bãè. Dì belí gbò nyòòne nvéè Kráìst, è nyímà kọọ̀ gbò lábvá dú pọ́lọ́; vaá à dṹùnà gbò “tóm e nom kpáló ólò sì.” (Gàl. 5:19-21) Sõò, é kọọ̀ gbò vígà págbálà nè pábia a láá ẹ̀b ba bá belí kọ bà léèlìè elìè dõòna gbò, àbèè ge naa kọọ̀ dõòna gbò á ié nágé bùlà naa vó tṍó e bà náa nyímá? Níà bíb ea bọ́ló kọ é bugi togó boo, boo béè kọọ̀ fẹ́ẹ́-fẹẹ̀ ló nè gbaaló náa é dí mm̀ bõ̀ònatõ̀ò be è ẹb bẹẹ bá kọ è léè èl dõòna gbò.

2. Éé ní eé ló bel boo mm̀ nakà togó bel ge nòí ẽ́?

² Mm̀ nakà togó bel ge nòí, èé ló bel boo gbò nú ea é láá naa kọ é gbĩ́ gè ẹ̀b bẹẹ bá kọọ̀ è léèlìè elìè sìgà pá vígà. Èé ló nágé bel boo gbò nu dòòmà bá ea kil ló gbò gbálà nè gbò bia e ba beè bọ́ló dẹ̀lẹ̀ nyíé boo tṍó e bà géè emí Kpá Káíá, e bà náa beè zìgà ge ẹ̀b ba bá kọ bà léèlìè elìè dõòna gbò. Túá kà, naanii èé ẹb nú ea é láá naa kọ é labví sìgà láb e bè náa bọ́ló.

3. Mókà gbò bíb ní ea bọ́ló gè bĩiná bẹẹ bá ẹ́?

³ Àé dú lé be è ólòó bugi togó boo bé e lábvì láb naa lọl  tṍó tẹlẹ tṍó. Èé láá bĩiná bẹẹ bá kọọ̀: ‘É kọọ̀ tṍó em ẹbvì nà lóó kọ m̀ léè èl dõòna nen ní e nyíém ólò ẹẹ ẹ́? É kọ m̀ ólò tú agẹ bá siimá tóm mm̀ bõ̀ònatõ̀ò boo béè kọọ̀ m̀ gbĩ́ gè sí èl dénè nen àbèè ge gbĩ́ gè lee èl ene kà vígà págbálà àbèè pábia? Sẹ̀ m̀ ólò tú agẹ bá siimá tóm boo béè kọ m̀ gbĩ́ gè naa nú ea é léémá Jìhóvà ẹ?’ Éé ní ea náa èé bĩ́íná gbò bíbvá bẹẹ bá ẹ́? Nvèè kpíí ló nú e Kpá Káí kọ́.

4. Dẹ̀ẹ̀a boo nú e kpá Gàlésìà 6:3, 4 kọ́, éé ní ea náa èé ooà aa ló gè tú bẹẹ lóó doolé ló dõòna gbò e?

⁴ Kpá Káí síèi kpóó ló kọ é gá tú bẹẹ lóó doolé ló dõòna gbò. (Bugi Gàlésìà 6:3, 4.) Ló éé? Túá kà, be è ẹb bẹẹ bá kọ è gé sí tóm èl pá vígà, àé láá naa kọ é dàlà kpá ló boo. Ní ea égè bàà kà, be à gá náa è ẹ̀b kọọ̀ dõòna gbò sí tóm èlii, àé láá ọọvẹ́ nái gé ló. Náa dú nú e nyìmànù di m gè bugi togó naa vó. (Róm̀ 12:3) Ene kà vígà pábia ea bée kọlà Katerina, * ea ólò tõó Gríìs, kọ́ọ̀: “M beè olòó tú nà lóó doolé ló gbò e bà ólò palàge kọ́ kpẹ̀a, vaá láá bã̀àà gã́bug kóò. Vó beè naa kọ ḿ ẹ̀b nà bá belí kọ ḿ gé ló tọ́ọ̀ nu.” Èé íè ge kẽ̀èa boo kọọ̀ Jìhóvà náa túi nvea ló boo béè bé e dúù lé mèà naa, bé e palàge ló bel naa, àbèè bé e gbò nen nyímái ló naa, sõò boo béè kọ è vulèe vaá gbàntṍ ló a Sã́áná.—Jọ́ọ̀n 6:44; 1 Kọ́r. 1:26-31.

5. Éé ní eo nóò lọl ló nú ea beè naaá ló vígà Hyun ẽ?

⁵ Nee dõòna kà bíb eé láá kpáá bĩià bẹẹ báí, ‘É kọọ̀ gbò nen nyímám ló naamá nen ea ólò zọ̀ dõòna gbò dia mm̀ fẹ́ẹ́-fẹẹ̀ ló, sẹ̀ bà ólò ẹ̀bvim naamá nen ea ólò bọọgẹ̀ zọ̀ gbò nen kaná ẽ́?’ Nvèè kpíí ló bel e ene kà vígà págbálà ea bée kọlà Hyun, ea ólò tõó South Korea kọ́. À íe tõó ea beè olòó ẹ̀b gbò e bà íe dọ̀ tóm mm̀ bõ̀ònatõ̀ò naamá pá a gbò ọ́b. Hyun kọ́ọ̀, “M beè olòó bọọgẹ̀ zọ̀ gbò vígàí kaná, vaá ním ólò zìgà tọ́ọ̀ kà bel e bà ló.” Éé ní ea beè sìlà aa m ẽ́? À kọ́ọ̀, “Nà láb beè naa kọọ̀ pò-pòòà á bã mm̀ bõ̀ònatõ̀ò.” Sìgà pá kọ́ọ̀ Hyun beè naa kọ á dã́ ból ló gbò a tã̀àgã̀. Hyun beè nyaaná bá ló a láb, vaá kátogóí a dú neǹ kànen mm̀ ba bõ̀ònatõ̀ò. À dú bíi kọ é nyaaná bá ló bé e náà nu naa be à gá náa è mòn kọọ̀ bẹẹ láb gbĩ́ gè naa kọọ̀ pò-pòòà á bã mm̀ bõ̀ònatõ̀ò.

6. Mókà gbò láb e kpá Gàlésìà 5:26 kọ́, ní ea é láá naa kọọ̀ nen á tú a lóó doolé ló dõòna nèn ẽ?

⁶ Bugi Gàlésìà 5:26. Mókà gbò láb ní ea é láá naa kọọ̀ nen á kyọ̀ tõ̀ò ló dõòna nèn ẽ? Túá kà dú gè põómi. Nen ea íe dùm ge põómi dú neǹ dàlà kpá ló boo, vaá à ólò bùlà nú ea kil ló áá a bá. Ní ea égè bàà kà dú dùm bẹẹ nyíe. Níì áá gè bẹ́ nyíe ló nú e dõòna nèn íe ní e neǹ bẹẹ nyíe ólò naa ẽ́ nì, sõò à ólò gbĩ́ gè tú nú e dõòna nèn íe lọ̀líé bá. Mm̀ kà kà, ge bẹ́ nyíe ló nen dú nágé gè ọbví nen. Vóà naa, à dú bíi kọ é òòà aa ló gbò dùmá!

7. Éé ní eé láá tú dùm ge põómi nè bẹẹ nyíe doolé ló é?

⁷ Èé láá tú dùm dàlà kpá ló boo nè bẹẹ nyíe doolé ló dĩ́ ea di gbàà nóo e bà ólò teemá ńkìlà. Ńkìlàá é láá pẹẹ aa kẽ, sõò dĩ́á é láá kpega deè kiẽe nóo ólò tení ea di ló ńkìlàá vaá naa kọ á gá sẹlẹ na mon, nè ge naa kọ á bẹ́ sã́ gbẹá gbàn deè. Mm̀ tẽ̀ènè sĩ́deèá, nen é láá tú gã́bug gbáá fã̀àmà Jìhóvà. Sõò dùm ge põómi é láá naa kọ á òòà aa ló gè fã̀e. (Pró. 16:18) Àé láá òòà aa ló gè fã̀ Jìhóvà, vaá níí é láá tãagẽ ẹlẹ bíi ló dõòna gbò. Vóà naa, éé ní eé náa kọbé née íè dùm ge põómi nè bẹẹ nyíe ẽ́?

8. Mósĩ́ deè ní eé láá bé èlbá dùm dàlà kpá ló boo é?

 ⁸ Èé láá bé dùm ge põómi àbèè dàlà kpá ló boo tení dú ló gè olòó kẽ̀èa boo ã̀àne e neǹ tóm Pọ́ọ̀l beè nè pá Fílipaì, ea kọ́ọ̀: “Ó gá naanii tọ́ọ̀ kà nu boo bée bọọ lee ló à bè gè dalai kpá ló boo. Tãa vó, ò kilmai kpá ló kẽ vaá ò ẹvii dõòna gbò dalaí boo elmai boólo ló.” (Fíl. 2:3) Be è ẹb kọọ̀ dõòna gbò bọọ èl beele, née é tú bẹẹ lóó doolé ló gbò e bà nyímá nu vaá naa nu èlii. Tãa vó, nyíéi é ẹ́ẹ vá ló. Níá palàge dú kà kà, be bà gé tú gbò nú e bà nyímá siimá tóm nè Jìhóvà. Vaá beè bẹẹ gbò vígà págbálà nè pábia e bà íe gbò dõ̀ònùí tú bel Pọ́ọ̀l siimá tóm, bàé mon gbò lé kpãa ea dìí m, vaá vó é náa kọọ̀ fẹ́ẹ́-fẹẹ̀ ló nè gbaaló á di mm̀ bõ̀ònatõ̀ò.

9. Mósĩ́ deè ní eé láá lẹ̀ẹ̀là bel ló dùm ge bẹ́ nyíe ẽ́?

⁹ Èé láá lẹ̀ẹ̀là bel ló dùm bẹẹ nyíe tení dú ló gè naa nú mm̀ kuna-kuna bá, ea dú gè nyímá kọọ̀ à íe sìgà nú e beéle née é láá naa. Be è náa nú mm̀ kuna-kuna bá, née é zógè kọọ̀ è nyímà nu àbèè ge naa kọọ̀ dõòna gbò á tuumá kọ è palàge naa nu elìèva. Tãa vó, èé piigà ge nó nu lọl bá gbò e bà nyímá nu èl beele. Dì belí nu dòòmà bá, be à íe ene kà vígà págbálà ea ólò láá palàge nè lòbèl mm̀ bẹẹ bõ̀ònatõ̀ò, èé láá kọ́ nèe kọ á dòbá bé ea ólò kpoogá dee ló nyòòmà a lòbèl naa nèi. Be à íe vígà pábia ea ólò palàge bùl nu, èé láá kọ á noòmài bé ea ólò bùl nu naa vaá à dú lé gã́. Vaá be à íe nvín ãa ea ólò tàvàlàẹ́ ló gè bã̀àà kóò dõòna gbò, àé láá íe nvèè bá lọl bá nen ea ólò valíé ló ge bã̀àà kóò. Be è náa vó, àé náa kọ é gá bẹ́ nyíe ló dõòna gbò, vaá naa kọ é láá naa gbò nú e bè née beè olòó láá naa.

10. Mókà nu ànà-ànà ní e Gédìọ̀n beè kpee sĩ́ ló é?

¹⁰ Zẹ́ẹ́ bugi togó boo nú ea beè naaá ló Gédìọ̀n, ea dú gãà Manásà, nè gbò gbálà e bà dú gãà Ífrèm. Jìhóvà beè nvèè bá nè Gédìọ̀n nè 300 gbò bé e ba beè dìé ló kọ bàá láá bé ba gbò ọ́b èlbá, ea gáẹ̀ láá naa kọ bàá dàlà kpá ló boo. Gbò gbálà e bà aa gãà Ífrèm beè sí ló Gédìọ̀n gé kanáe, tãa  vó e bà leelàẹ. Be à sẹlẹ, nyíé va beè palàge bììlà boo béè kọọ̀ Gédìọ̀n náa beè kọlí va kọ bàá zọẹ̀ẹ gé bé gbò ọ́b Bàrì. Ge gbĩ́ gè naa kọọ̀ gbò nen á nvèè ka ló tẽ́gã e bà dú beè naa kọọ̀ nú ea palàge dì bíi á tává nyíe—ea dú ka e Gédìọ̀n nvee ló béè Jìhóvà tení dú ló gè kpènà pá a gbò.—Jọ́j. 8:1.

11. Móbá ní e Gédìọ̀n beè aamá bel nè gbò gbálà e bà dú gãà Ífrème?

¹¹ Gédìọ̀n beè tú kìlmà kpá ló kẽ kọọmá nè pá gãà Ífrèm kọọ̀: “É kọọ̀ bàé láá tú nú e nda ni náa doolé ló nú e boolo ni náanii?” Tṍóá, a beè gbóó kẽeé vá nyíe bé e Jìhóvà ni tú va siimá gbò tóm ea palàge bọọ naa. Nú ea kọ́ nèva beè naa kọ bàá “kìlmà bùlà kẽ.” (Jọ́j. 8:2, 3) Gédìọ̀n beè di kpènà ló gè kìlmà kpá ló kẽ kọbéè fẹ́ẹ́-fẹẹ̀ ló kilsĩ́ gè di zẹ̀ẹ̀ gbò níí Bàrì.

12. Éé ní e nóò lọl ló nú ea beè naaá ló pá gãà Ífrèm nè Gédìọ̀ne?

¹² Éé ní eé láá nó lọl ló nòòtẽ́í ẽ́? Nu dòòmà bá gbò gbálà e bà dú gãà Ífrèmí, nóòmài kọọ̀ náa bọ́ló kọ é ká bùlà gbẹẹ́ boo gè nvèè ka ló bẹẹ bá èlmà Jìhóvà. Dì belí gbò tẹ̀ boo tọ nè gbò kànen mm̀ bõ̀ònatõ̀ò, èé láá nó nu lọl ló nú ea beè naaá ló Gédìọ̀n. Beè nú e náà biile nyíè dõòna nèn, à bọ́ló kọ é bugi togó boo nú ea man kọọ̀ nú e náà à biilée nyíe. Èé leelà nàgé nen tṍó ea náa nu leevè. Àé bĩ́íná kọ é kìlmà kpá ló kẽ kọbé è láá naa vó, èlmà tõ̀ò, beè nená ní ea lọẹ́. Sõò à palàge dú lé gè zọ̀ pá vígà tõoa mm̀ fẹ́ẹ́-fẹẹ̀ ló èlmà ge zogè kọọ̀ beele diè lèlà.

13. Mókà nu ànà-ànà ní e Hánà beè kpee sĩ́ ló é, vaá mósĩ́ deè ní ea beè láá bé èlbá ẹ́?

¹³ Bugi nagé togó boo nu dòòmà bá Hánà. A beè iá Ẹ̀lkánà ea dú gãà Lívaì, Ẹ̀lkánà beè palàge vùlè Hánà. Sõò a beè ié nágé dõòna kà va, ea kọlà Pènínà. Ẹ̀lkánà beè vùlè Hánà èlmà Pènínà; vaá “Pènínà beè ié gbò pá nvín, sõò Hánà náa beè ié nvín.” Vó beè naa kọọ̀ Pènínà á olòó ló gbò bel nvèèmà lẹ́ ea é “biile nyíe” Hánà. Hánà beè labví láb naa vàẹ? Nyíée beè palàge bììlà! “A beè olòó tò vaá náa láà dé nu.” (1 Sám. 1:2, 6, 7) Sõò, náa íe nòòtẽ́ ea di mm̀ Kpá Káí ea tẹ́lẹ bàlà kẽ kọọ̀ Hánà beè gbĩ́ gè kpẽ́ pọ́lọ́ e Pènínà síe. Tãa vó, a beè kọ́ bé e nu tọ́aẹ́ ló naa nè Jìhóvà vaá dẹlẹ nyíé boo kọọ̀ Jìhóvà é nveenìè bá neèe. É kọọ̀ Pènínà beè nyaaná bé ea géè labví láb kilma ló Hánà naa? Kpá Káí náa kọ́. Sõò è nyímà kọọ̀ nyíè Hánà beè kpáá ẹẹ tṍó e tṍó téní. “Sĩ́e náa beè bigálá ná.”—1 Sám. 1:10, 18.

14. Éé ní e nóò lọl ló nu dòòmà bá Hánà ẽ?

¹⁴ Éé ní eé láá nó lọl ló Hánà ẽ? Be à gá náa vaá nen à zọ̀ ni ana ló, nyimá kọ ò íè kpóó gè lẹ̀ẹ̀mà bel ló dìtõ̀òá. Náa bọ́ló kọ ó zọ̀ nená ana ló. Tãá vó eo túù  pọ́lọ́ kpẽemá nèe, zọ̀ẹ naaá fẹ́ẹ́-fẹẹ̀ ló. (Róm̀ 12:17-21) Kọbèè náa zigà ge zọ̀ni naaá fẹ́ẹ́-fẹẹ̀ ló, òé íe dĩ̀ìnè ló nè ẹ́ẹ́-ẹẹ̀ nyíe.

15. Mókà bèla ní ea beè di zẹ̀ẹ̀ Apọ́lọ̀s nè Pọ́ọ̀lẹ?

¹⁵ Dee deè nvée, bugi togó boo nú eé láá nó lọl ló nu dòòmà bá Àpọ́lọ̀s nè neǹ tóm Pọ́ọ̀l. Pálaa gbòí beè palàge dã́ ból ló gbò nú ea di mm̀ Kpá Káí. Gbò nen beè nyimá va ló vaá ba beè olòó pàlà ge noomà nu. Vaá pálaa ọ̀và beè nvèè bá naa kọọ̀ gã́bug nen á nyoone nvéè Kráìst. Sõò pálàa ọ̀và náa beè bẹ́ nyíé ló ene.

16. Mó íb nen ní e Apọ́lọ̀s beè dù e?

¹⁶ Àpọ́lọ̀s beè “mèà gbẹa Alẹkzándrìà,” ea dú kiẽ́e gbò nen beè olòó tõo nó kpá mm̀ túá gbò gbááá. À dọa bàlà kẽ kọọ̀ a beè pàlà ge nè lòbèl, vaá “a beè palà ge nyímá Kpá Káí.” (Tóm 18:24) Tṍó e Apọ́lọ̀s beè di Kọ́rìnt, sìgà pá vígà e ba beè di bõ̀ònatõ̀ò ea di Kọ́rìnt beè zogè kọọ̀ bà íèè lèèmá mm̀ Apọ́lọ̀s èlmà sìgà gbò vígà págbálà e ba beè di mm̀ bõ̀ònatõ̀òa, kọbèè Pọ́ọ̀l. (1 Kọ́r. 1:12, 13) É kọọ̀ Apọ́lọ̀s beè nvèè sãa kúm dùm pò-pòòàí? Née bulà naa vó. Kàsĩ́, tṍó e sìgà tṍó ni téní aa ló tṍó e Apọ́lọ̀s ni aa bõ̀ònatõ̀ò ea di Kọ́rìnt, Pọ́ọ̀l beè kọ́ nèe kọ á kpáá sì gé kãá va. (1 Kọ́r. 16:12) Pọ́ọ̀l náa gáẹ̀ beè kọ́ vó be Apọ́lọ̀s beè naa kọọ̀ pò-pòòà á di mm̀ bõ̀ònatõ̀òa. Mm̀ kà kà, Apọ́lọ̀s beè tú a dõ̀ònù siimá tóm boo bá ea bọ́ló, ea dú gè vee lé kpẹ̀a ea kil ló Boǹ Méné Bàrì nè ge siè kpóó ló pá vígà. È agàla boo kọọ̀ Apọ́lọ̀s beè dú neǹ kìlmà kpá ló kẽ. Dì belí nu dòòmà bá, náa íe tọ́ọ̀ ketõ̀ò ea di mm̀ Kpá Káí ea tẹ́lẹ bàlà kẽ kọ a beè nvèè súng tṍó e Presélà nè Akílà “kpáá palà ge dò bá nu e a kil ló Jíìzọ̀s nèe.”—Tóm 18:24-28.

17. Mósĩ́ deè ní e Pọ́ọ̀l beè naa kọọ̀ fẹ́ẹ́-fẹẹ̀ ló á di mm̀ bõ̀ònatõ̀ò ẽ?

 ¹⁷ Neǹ tóm Pọ́ọ̀l beè nyimá gã́bug lé tóm e Apọ́lọ̀s beè sì. Sõò, Pọ́ọ̀l náa beè ié tã̀àgã̀ bùlà kọọ̀ pá vígà é túúmá kọọ̀ Apọ́lọ̀s léèlìè elìèe. Tṍó e bugì kpá e Pọ́ọ̀l beè emí má bõ̀ònatõ̀ò ea beè di Kọ́rìnt, è monì kọọ̀ a beè dú neǹ kìlmà kpá ló kẽ vaá nyimá nu. Náa beè leemáe tṍó e gbò nen kọ́ọ̀, “Nda di nvée Pọ́ọ̀l,” Tãa vó, a beè kììlà va bùlà má Jìhóvà nè Jíízọ̀s Kráìst.—1 Kọ́r. 3:3-6.

18. Dẹ̀ẹ̀a boo nú ea di mm̀ 1 Kọ́rìnt 4:6, 7, éé ní e nóò lọl ló nu dòòmà bá Apọ́lọ̀s nè Pọ́ọ̀lẹ?

¹⁸ Éé ní eé láá nó lọl ló nu dòòmà bá Apọ́lọ̀s nè Pọ́ọ̀lẹ? Èé láá tú dénè bẹẹ kói siimá tóm nè Jìhóvà, vaá nvèè bá nè gã́bug nen kọ bàá dììa múú. Sõò, è nyímà kọọ̀ Jìhóvà ní ea náa kọọ̀ gbò tóm e síì á valí é. Nu dòòmà bá Apọ́lọ̀s nè Pọ́ọ̀l nóòmà nài gé kọọ̀—tṍó e íè gã́bug tóm gè sí mm̀ bõ̀ònatõ̀ò, níà bé eé íe gã́bug nèà deè ge naa kọọ̀ fẹ́ẹ́-fẹẹ̀ ló á di mm̀ bõ̀ònatõ̀ò naa ẽ́ . Nyíéi ólò palàge ẹẹ tṍó e gbò kànen nè gbò nvèè bá sìtóm náa kọọ̀ fẹ́ẹ́-fẹẹ̀ ló nè gbaaló á di mm̀ bõ̀ònatõ̀ò tení dú ló gè nè gbò dùùlà bá deè tṍ ea dẹẹ̀a boo Kpá Káí. Bà náa ólò gbĩ́ ka ea aa bá pá vígà, tãa vó, bà ólò nvèè bá nè va kọ bàá gbàntṍ ló Kráìst Jíízọ̀s vaá nó gbò a nu dòòmà bá!—Bugi 1 Kọ́rìnt 4:6, 7.

19. Éé ní e buù bẹ̀ì é láá naa ẽ́? (Ẹ̀b ńkpó ea kọ́ọ̀ “ Òòà Aa Ló Gè Tú O Lóó Doolé Ló Dõòna Gbò.”)

¹⁹ Buù bẹ̀ì íè dõ̀ònù e Bàrì néi. Èé láá tú gbò dõ̀ònùí ‘siimá tóm nè dõòna gbò.’ (1 Pít. 4:10) Àé láá tõoí ló kọọ̀ tóm e síì náa bọọ. Sõò, nyimá kọọ̀ gbò ńkem̀ tọọ̀ díí e bà gbáló ene ní ea ólò dú pọ̀b kọ̀là ló é. Naanii mè dénè bẹ̀ì é piigà ge tú dùm ge kọọ̀ è léèlìè elìè dõòna gbò lọa m. Vaá è piigà bé e bẹẹ kpóó sim tùlà naa gè naa kọọ̀ fẹ́ẹ́-fẹẹ̀ ló nè gbaaló á dí mm̀ bõ̀ònatõ̀ò.—Ẹ́fẹ. 4:3.