1. ¿Mbaʼépa ikatu oiko oĩramo okompetíva ótrondi?

KO MÚNDOPE ningo umi hénte opensa ijehénte ha oiko okompeti oñondive. Por ehémplo, peteĩ empresário ikatu ojapo umi mbaʼe operhudikáva umi ikompeténsiape, oipotágui osẽ porãve chupe inegósio. Peteĩ deportísta oganasetereígui, ikatu hína a propósito olastima pe hugadór oĩvape pe ekípo kontráriope. Ha peteĩ estudiánte oikesetereígui peteĩ universida ifamósovape, ikatu hína okopia umi exámen de ingrésope. Ñande kristianokuéra jaikuaa koʼã mbaʼe oĩ vaiha, pórke umíva hína “umi mbaʼe vai ogustáva yvypóra rete imperféktope” (Gál. 5:19-21). ¿Péro ikatúpa peteĩ ermáno térã ermána ohechakuaaʼỹre oñepyrũma avei okompeti ótrondi kongregasiónpe? Iñimportánte ñapensa upévare, pórke oĩramo okompetíva ótrondi ikatu hína ombyai pe pyʼaguapy oĩva kongregasiónpe.

2. ¿Mbaʼépa jahecháta ko artíkulope?

² Ko artíkulope jahecháta mbaʼéicha rupípa ikatu hína jaju ñakompeti ñane ermanokuérandi. Jahecháta avei mbaʼéichapa Jehová siervokuéra oĩva la Bíbliape ndoikói vaʼekue okompeti ótrondi. Péro jahechami raẽna mbaʼéichapa ikatu jaikuaa mbaʼépa ñanemomýi hína jaservi hag̃ua Jehovápe.

3. ¿Mbaʼe mbaʼépa ñañeporandu vaʼerã?

³ Káda siérto tiémpo ningo iporãta jahecha mbaʼépa ñanemomýi jaservi hag̃ua Jehovápe. Upearã ikatu ñañeporandu: “¿Chépa añekomparámante vaʼerã ótrore añeñandu porã hag̃ua? ¿Ambaʼapo jejopýpa Jehová servísiope aikose rupi pe ivalevévaramo  kongregasiónpe, térã ahasase rupi peteĩ ermáno térã ermánape? ¿Térãpa ambaʼapo jejopy hína ameʼẽségui Jehovápe pe iporãvéva?”. ¿Mbaʼérepa ñañeporandu vaʼerã koʼã mbaʼe? Jahechamína mbaʼépa heʼi la Biblia.

4. ¿Mbaʼérepa nañañekomparái vaʼerã ótrore, heʼiháicha Gálatas 6:3, 4?

⁴ La Biblia heʼi ñandéve ani hag̃ua ñañekompara ótrore (elee Gálatas 6:3, 4). ¿Mbaʼérepa ndajajapói vaʼerã upéva? Pórke ñapensáramo ñandevaleveha ñane ermanokuéragui ikatu hína jaju ñandeorgullóso. Péro ikatu avei ñañedesanima ñapensáramo umi ermanokuéra ivaleveha ñandehegui. Mokõive mbaʼénte ikatu ñandeperhudika ha ndajahechaukamoʼãi ñanearanduha (Rom. 12:3). Peteĩ ermána hérava Katerina, * oikóva Gréciape, heʼi: “Che ajepokuaa vaʼekue añekompara umi ermána iporãvévare chehegui, ivalevéva predikasiónpe, umi horyve ha iñamíga hetavévare chehegui. Upéicha rupi, apytámi vaʼekue yvýre ha añandu ndavaleiha mbaʼeverã”. Ñanemanduʼa vaʼerã Jehová nañanemoag̃uíri hague ijehe ñaneporã, ñañeʼẽkuaa térã ñaneamígo heta haguére, síno jahayhúgui chupe ha ñaneñeʼẽrenduségui Itaʼýrape (Juan 6:44; 1 Cor. 1:26-31).

5. ¿Mbaʼépa reaprende ermáno Hyun ehémplogui?

⁵ Ikatu avei ñañeporandu: “¿Heʼínepa cherehe umi ermanokuéra añehaʼãha oĩ hag̃ua pyʼaguapy kongregasiónpe, térãpa pyʼỹinte voi aikoha ajoavy ótrondi?”. Jahechamína la oiko vaʼekue peteĩ ermáno héravare Hyun, oikóva Corea del Súrpe. Peteĩ tiémpore, Hyun haʼe riréma ansiáno oñepyrũ oñakontraria unos kuánto ermáno orekóvare priviléhio kongregasiónpe openságui haʼekuéra oñembovaleseha. Haʼe heʼi: “Che siémpre aiko vaʼekue akritika la ojapóva koʼã ermáno ha pyʼỹinte naiméi de akuérdo hendivekuéra”. ¿Ha mbaʼépa oiko upe haguére? Haʼe omombeʼu: “Che káusare ojeiko vaipáma hína kuri kongregasiónpe”. Péro Hyun amigokuéra oipytyvõ chupe ohechakuaa hag̃ua mbaʼépa la iprovléma. Hyun okambia ha koʼág̃a haʼe peteĩ ansiáno ikatupyryetereíva. ¿Mbaʼépa ñanemboʼe iñehémplo? Pyaʼe porã ñakambia vaʼerãha jahechakuaáramo ñandejehe jaikoseha ñakompeti ótrondi, ha ñañehaʼã jaiko pyʼaguapýpe.

6. Heʼiháicha Gálatas 5:26, ¿mbaʼépa ikatu ñanemomýi ñakompeti hag̃ua ótrondi?

⁶ (Elee Gálatas 5:26). ¿Mbaʼe mbaʼépa ikatu omomýi peteĩ persónape okompeti hag̃ua ótrondi? Ikatu hína oñembotuicha rupi. Peteĩ persóna oñembotuicháva ningo ijorgullóso ha opensa ijehénte. Ikatu avei okompeti ótrondi iñenvidióso rupi. Pe persóna iñenvidiósova ndahaʼéi ku oipotánteva umi mbaʼe orekóva pe ótra persóna, síno oipota voi operde upe orekóva. Upéicharõ pe oenvidiáva hapichápe añetehápe ndaijaʼéi hína hese. Upévare ñañehaʼãmbaite vaʼerã ani hag̃ua ova ñanderehe koʼã mbaʼe vaiete.

7. ¿Mbaʼe ehémplopa ohechauka ipeligrosoha ñañembotuicha ha ñaneenvidióso?

⁷ Ñande ñañembotuicha ha ñaneenvidiósoramo, haʼetéta umi kupiʼi okarúva hína ñande rógare. Iporãvéramo jepe la ñande róga, umi kupiʼi okarúramo hese amo ipahápe katuete oúta yvýpe pe óga. Péicha avei ñande jaservíramo Jehovápe ñañembotuichase térã ñaneenvidióso rupi, ikatu hína jaha porã hese peteĩ tiémpore, péro amo ipahápe jaʼáta katuete. Jahejáta Jehovápe, jajeperhudikáta ñande voi ha avei ótrope (Prov. 16:18). ¿Péro mbaʼépa ikatu jajapo ani hag̃ua ñañembotuicha ni ñaneenvidióso?

8. ¿Mbaʼépa ñanepytyvõta ani hag̃ua ñañembotuicha?

⁸ Pe konsého apóstol Pablo omeʼẽ vaʼekue umi filipénsepe ñanepytyvõta ani hag̃ua  ñañembotuicha. Haʼe heʼi vaʼekue chupekuéra: “Ani pejapo mbaʼeve peiko vaiségui ni peñembotuichaségui, upéva rangue peneumílde vaʼerã ha pepensa umi ótro tuichaveha pendehegui” (Filip. 2:3). Ñapensáramo umi ótro tuichaveha ñandehegui, ndajaikomoʼãi ñakompeti umi ivaleve térã ikatupyryvévandi ñandehegui. Upéva rangue, javyʼáta hendivekuéra, koʼýte oiméramo oipuru hína hikuái umi mbaʼe ojapokuaáva Jehová servísiope omombaʼeguasu hag̃ua chupe. Avei umi ermáno térã ermána ivaléva osegíramo Pablo konsého ohechakuaáta umi kualida porã jarekóva. Péicha enterove ñaipytyvõta oĩ hag̃ua pyʼaguapy ha unida kongregasiónpe.

9. ¿Mbaʼépa ikatu jajapo ani hag̃ua ñaneenvidióso?

⁹ Ñande nañaenvidiamoʼãi peteĩ ermáno térã ermánape ñaneumílderamo ha jahechakuaáramo umi mbaʼe ndajajapokuaáiva. Ñande ñaneumílderamo ndajaikomoʼãi jahechaukase ñandevaleveha ñande rapichakuéragui. Upéva rangue, oĩramo peteĩ ermáno térã ermána ivalevéva ñandehegui peteĩ mbaʼépe, ñañehaʼãta ñaaprende chugui. Por ehémplo, ñamoĩ chupe peteĩ ermáno ojapokuaaitereiha diskúrso, ñande ikatu ñaporandu chupe mbaʼéichapa ojeprepara ojapo hag̃ua idiskúrso. Térã oĩramo peteĩ ermána okosina hetereíva, ñaporandukuaa chupe mbaʼépa ikatu jajapo ñande ñakosinakuaave hag̃ua. Ha peteĩ imitãvape ijetuʼúramo okonsegi hag̃ua iñamigorã, haʼe ikatu ojerure konsého peteĩ iñamígo hetávape. Péicha jajapóramo, nañaneenvidiosomoʼãi ha avei jajapokuaáta hetave mbaʼe.

10. ¿Mbaʼe provlémapa ombohovái vaʼekue Gedeón?

¹⁰ Jahechamína la oiko vaʼekue Gedeón ha umi kuimbaʼe Efraingua rehe. Gedeón ningo Manasés trivugua, ha Jehová oipytyvõ vaʼekue chupe ha umi 300 isoldádope ogana hag̃ua peteĩ gérra, ha haʼekuéra ikatu vaʼekue oñemombaʼeguasu upévare. Upéi umi kuimbaʼe Efraingua oho ojotopa Gedeón ndive, péro ndahaʼéi oguerohory hag̃ua chupe, síno ojodiskuti hag̃ua hendive. Amalisia haʼekuéra ipochy kuri Gedeón noinvitái haguére chupekuéra oñepyrũ guive pe gérra oñorairõ hag̃ua Ñandejára enemigokuéra kóntrape. Chupekuéra oipyʼapyve  vaʼekue mbaʼépa oñepensa itrívure, ha hesarái la iñimportantevévagui: Gedeón oipytyvõ hague oñemombaʼeguasu hag̃ua Jehová réra ha oprotehe ipuévlope (Juec. 8:1).

11. ¿Mbaʼépa heʼi vaʼekue Gedeón umi kuimbaʼe Efrainguápe?

¹¹ Péro Gedeón iñumílde ha heʼi umi kuimbaʼe Efrainguápe: “Añekomparátarõ penderehe, ¿mbaʼe piko che la ajapóva?”. Upémarõ haʼe omomanduʼa umi Efrainguápe mbaʼeichaitépa Jehová ovendesíma chupekuéra, ha ohendúvo upéva “oñetrankilisa hikuái” (Juec. 8:2, 3). Gedeón omboyke vaʼekue pe orgúllo ikatu hag̃uáicha oĩ pyʼaguapy Ñandejára puévlope.

12. ¿Mbaʼépa ñaaprende umi Efraingua ha Gedeón ehémplogui?

¹² ¿Mbaʼépa ñanemboʼe ko rreláto? Umi Efraingua ehémplogui ñaaprende ndajaikói vaʼerãha jajepyʼapy mbaʼépa oñepensáta ñanderehe, síno ñandepyʼapyve vaʼerã mbaʼépa oñepensa Jehováre, ha ñamombaʼeguasu chupe. Oiméramo ñande peteĩ ansiáno térã ñamoakã hína ñande rogapy, ikatu ñaaprende peteĩ mbaʼe iñimportánteva Gedeóngui. Oĩramo ipochýva ñanendive peteĩ mbaʼe jajapo vaʼekuére, ñañehaʼã vaʼerã ñañemoĩ ilugárpe ha ñantende mbaʼérepa haʼe ipochy. Ikatu avei jaguerohory chupe umi mbaʼe ojapo porãvare. Jajapo hag̃ua upéva ningo tekotevẽ ñaneumílde, koʼýte oiméramo pe ótra persóna la ojavýva. Péro iñimportanteve hína jaiko porã ñane ermánondi jahechaukase rangue mávapa la ojavy vaʼekue.

13. ¿Mbaʼe ijetuʼúvapa ombohovái vaʼekue Ana, ha mbaʼéichapa haʼe ogueropuʼaka vaʼekue upéva?

¹³ Ñapensamína avei Ana ehémplore. Haʼe omenda vaʼekue peteĩ levita héravare Elcaná, ha haʼe ohayhueterei vaʼekue Ánape. Péro Elcaná oreko avei ótro hembireko hérava Peniná. Elcaná ningo ohayhuve vaʼekue Ánape. Upéicharõ jepe, “Peniná imemby vaʼekue, péro Ana naimembýi”. Upe haguére Peniná oñembohory hese “ombopochy hag̃ua” chupe. ¿Mbaʼéichapa Ana oñeñandu vaʼekue? Haʼe oñeñandu vaieterei, “hasẽ ha ni ndokarusevéi” (1 Sam. 1:2, 6, 7). Upéicharõ jepe, la Biblia nomombeʼúi ñandéve Ana oñehaʼã hague ojedeskita Penináre. Upéva rangue, haʼe omombeʼupaite Jehovápe mbaʼéichapa oñeñandu ha ojerovia haʼe oipytyvõtaha chupe. ¿Okambiápa raʼe Peniná ha upéi otrata porãve Ánape? La Biblia nomombeʼúi ñandéve upéva. Péro si jaikuaa Ana oñeñandu porã ha ipyʼaguapy jey hague. Haʼe ningo upéi “noñekevrantavéima” (1 Sam. 1:10, 18).

14. ¿Mbaʼépa ñaaprende Ana ehémplogui?

¹⁴ ¿Mbaʼépa ñaaprende Ana ehémplogui? Oĩramo okompetiséva ñanendive, ñanemanduʼa vaʼerã ñande ikatuha jadesidi mbaʼépa jajapóta. Natekotevẽi ningo ñañemoĩ ñakompeti hendive. Ha oĩramo ojapóva mbaʼe vai ñanderehe, ani jajapo hese la mísma kósa. Upéva rangue, ñañehaʼã jajogueraha porã hendive (Rom. 12:17-21). Pe ótra persóna nokambiáiramo jepe, ñande jasegíta ñandepyʼaguapy ha javyʼáta.

15. ¿Mbaʼépepa ojojogua vaʼekue Apolos ha Pablo?

 ¹⁵ Ultimoite jahechami mbaʼépa ikatu ñaaprende disípulo Apolos ha apóstol Pablo ehémplogui. Mokõivéva oikuaa vaʼekue hetaiterei mbaʼe oĩva Ñandejára Ñeʼẽme. Mokõivévante ikonosído ha oporomboʼe porãiterei vaʼekue. Ha mokõivéva oipytyvõ hetápe oiko hag̃ua chuguikuéra disípulo. Péro haʼekuéra ndoikói vaʼekue okompeti oñondive, ni noñakontrariái vaʼekue ojuehe.

16. ¿Mbaʼeichagua persónapa rakaʼe Apolos?

¹⁶ Apolos ningo haʼe vaʼekue “Alejandriagua”. Ha upe tiémpope upe lugár ifamóso vaʼekue, pórke umi hénte oho vaʼekue upépe ostudia hag̃ua. Amalisia haʼe ivaleterei vaʼekue ojapo hag̃ua diskúrso ha avei ‘oikuaa porã Ñandejára Ñeʼẽ’ (Hech. 18:24). Apolos oservi aja Coríntope, unos kuánto ermáno upe kongregasionpegua ohechauka vaʼekue ohayhuveha Apólospe umi ótro ermánogui, umíva apytépe Páblogui jepe (1 Cor. 1:12, 13). ¿Oime piko Apolos voi la omboligáva umi ermánope opensa hag̃ua upéicha? ¡Ni mbaʼevéicharõ! Añetehápe, ojapo rire peteĩ tiémpo Apolos oho hague Coríntogui, Pablo ojerure joʼa joʼa chupe oho jey hag̃ua upépe (1 Cor. 16:12). Pablo ni mbaʼevéicharõ ndojapomoʼãi kuri upéva oimérire Apolos káusare la ojedividipa pe kongregasión. Jahecha Apolos oipuru porã hague umi mbaʼe ojapokuaáva: Haʼe oipuru umíva opredika hag̃ua umi notísia porã, ha omombarete hag̃ua iñermanokuérape. Ikatu avei ñaime segúro Apolos iñumílde hague. Por ehémplo, la Biblia nomombeʼúi haʼe ipochy hague Áquila ha Priscila ‘omyesakã porãve haguére chupe Ñandejára rape’ (Hech. 18:24-28).

17. ¿Mbaʼéichapa Pablo oipytyvõ vaʼekue oĩ hag̃ua pyʼaguapy?

¹⁷ Apóstol Pablo oikuaa vaʼekue umi mbaʼe porã ojapóva Apolos. Péro haʼe ndojepyʼapýi  vaʼekue umi hénte opensáta haguére Apolos ivaleveha chugui. Pablo ningo iñumílde ha iñakãguapy vaʼekue, ha upéva jahechakuaa pe kárta oskrivi vaʼekuére umi Corintoguápe. Chupe ndogustái vaʼekue oĩrõ guare heʼíva: “Che asegi Páblope”. Upéva rangue, haʼe oipota enterove omombaʼeguasu Jehovápe ha Jesucrístope (1 Cor. 3:3-6).

18. ¿Mbaʼépa ñaaprende Apolos ha Pablo ehémplogui, ohechaukaháicha 1 Corintios 4:6, 7?

¹⁸ ¿Mbaʼépa ñaaprende Apolos ha Pablo ehémplogui? Oiméne hetáma ñambaʼapo jejopy Jehovápe g̃uarã, ha ñaipytyvõma hetápe ojevautisa hag̃ua. Péro ñande jaikuaa jahupytyha entéro koʼã mbaʼe Jehová ñanevendesi rupínte. Avei ñaaprende chuguikuéra ko leksión: Amáske jarekove rresponsavilida kongregasiónpe, jarekove avei hetave oportunida ñaipytyvõ hag̃ua oĩ hag̃ua pyʼaguapy kongregasiónpe. Jaagradesete ningo umi ansiáno ha siérvo ministeriálpe ñanepytyvõ haguére ñaime hag̃ua en unida ha pyʼaguapýpe. Haʼekuéra ojapo upéva oguenohẽ jave la Bíbliagui umi konsého omeʼẽva ñandéve, ha avei ndoikói jave oñemoimportantese, síno oipytyvõ enterovépe kongregasiónpe iñeʼẽrendu hag̃ua Jesúspe ha osegi hag̃ua iñehémplo (elee 1 Corintios 4:6, 7).

19. ¿Mbaʼépa ikatu jajapo káda uno? (Ehecha avei pe rrekuádro “ Aníkena ñamoñepyrũ mbaʼeveichagua kompeténsia ermanokuéra apytépe”).

¹⁹ Káda únope Ñandejára omeʼẽ vaʼekue peteĩ avilida, térã ñanepytyvõ ñandevale hag̃ua peteĩ mbaʼépe. Ha ñande ikatu jaipuru upe rregálo ‘jaservi hag̃ua ótrope’ (1 Ped. 4:10). Ñande ningo ikatu ñapensa pe jajapóva naiñimportanteguasuiha. Péro oñemopuʼã hag̃ua peteĩ óga káda ladríllo oñemboguapýva iñimportánte hína, upéicha avei umi mbaʼe michĩva jajapóva oipytyvõ hína oĩ hag̃ua unida kongregasiónpe. Upéicharõ, ñañehaʼãmbaitékena jasegi ñambaʼapo jejopy ani hag̃ua ñakompeti ótrondi. Ha jajedesidíkena jajapotaha opa ikatúva oĩ hag̃ua unida ha pyʼaguapy kongregasiónpe (Efes. 4:3).