1. Kara helulu taudia be ma haida dekenai dahaka idia karaia?

INAI tanobada ai taunimanima momo idia ura ma haida idia hereaia, bona edia kara ese ma haida idia hahisia idia laloa bada lasi. Hegeregere, bisinesi tauna ia ura ia kwalimu dainai, ia ese gau haida ia karaia ma haida ia hahisia totona. Eiava heau helulu tauna ia ura gadara dekenai ia kwalimu dainai, ma ta ia haberoa. Eiava stiuden ta be iunivesiti ia lao totona, koikoi dalanai eksam ia karaia. Ita be Keristani taudia dainai, ita diba unai be kerere bona “tauanina ena kara dikadia” ta. (Gal. 5:19-21) Kongrigeisen lalonai haida idia laloparara lasi, to edia kara ese ia hahedinaraia idia be ma haida idia hereaia, a? Unai be henanadai badana, badina unai bamona kara helulu karana ese kongrigeisen ena lalotamona ia hadikaia diba.

2. Inai atikol ai dahaka do ita herevalaia?

² Inai atikol ai, ita ese lalohadai kereredia haida do ita herevalaia, unai lalohadai kereredia dainai do ita laloa ita be iseda tadikaka taihu ita hereaia. Danu ita ese Baibel lalonai kara helulu karana idia dadaraia tatau bona hahine edia haheitalai namodia do ita herevalaia. To, kara helulu ita hahedinaraia ena badina mani ita herevalaia guna.

3. Edena dala ai iseda kara ita sekea diba?

³ Nega ta ta ai, iseda kara ita sekea be namo. Reana sibona ita nanadaia: ‘Ma haida ida lau hahegeregerea neganai, lau laloa idia lau hereaia, a? Kongrigeisen ai lau gaukara goada badina lau ura ma haida lau hereaia, a? Eiava lau  gaukara goada Iehova lau hamoalea totona?’ Dahaka dainai unai bamona ita henanadai be namo? Mani Baibel ena hereva ita itaia.

4. Galatia 6:3, 4 ena hereva hegeregerena, dahaka dainai ma haida ida ita hahegeregerea lasi be namo?

⁴ Baibel ese ita ia hadibaia ma haida ida ita hahegeregerea lasi be namo. (Galatia 6:3, 4 duahia.) Dahaka dainai? Badina ta be, bema ita laloa ita be iseda tadikaka taihu ita hereaia, do ita hekokoroku diba. Badina ma ta be, bema ita laloa iseda tadikaka taihu be ita idia hereaia, do ita lalomanoka diba. Unai bamona lalohadai be aonega karana lasi. (Roma 12:3) Greece ai taihu ladana Katerina * ia gwau: “Guna lau ese mai edia hairai kekeni, haroro dalana idia diba namonamo tadikaka taihu, bona mai edia turadia momo taudia ida sibona lau hahegeregerea. Unai dainai, lau mamia lau be anina lasi.” Namona be ita laloatao, iseda hairai, iseda hereva dalana, eiava momo ese ita idia diba dainai, Iehova ese ia dekenai ita ia veria lao lasi, to mai ura ida Ia ita lalokau henia bona iena Natuna ita kamonai henia dainai ita ia abia dae.​—Ioa. 6:44; 1 Kor. 1:26-31.

5. Hyun ena ekspiriens amo dahaka ita dibaia?

⁵ Sibona dekenai ita henia henanadai ma ta be inai, ‘Lau be maino karaia tauna, eiava nega momo ma haida ida lau hepapahuahu?’ South Korea ai tadikaka Hyun ena ekspiriens ita laloa. Guna ia laloa kongrigeisen ai mai edia maduna tadikaka haida be ia idia hereaia. Ia gwau, “Lau ese unai tadikaka lau gwauraidia dika, bona nega momo edia hereva dekenai lau lalotamona lasi.” Unai dainai dahaka ia vara? Ia gwau, “Egu kara dainai kongrigeisen ai lalotamona ia noho lasi.” Hyun ena turadia haida ese ia idia durua ena lalohadai kererena ia hamaoromaoroa totona. Hyun ena kara ia haidaua, bona hari ia be elda namona ta. Bema ita itaia ita be kara helulu karana ita hahedinaraia to maino ita habadaia lasi, eda kara ita haidaua haraga be namo.

6. Galatia 5:26 hegeregerena, edena kara dikadia ese kara helulu karana idia havaraia diba?

⁶ Galatia 5:26 duahia. Edena kara dikadia ese kara helulu idia havaraia diba? Ta be hekokoroku karana. Hekokoroku tauna be sibona ia laloa bada. Bona ma ta be mama karana. Ia mama tauna be ma ta dekenai idia noho gaudia ia ura henia sibona lasi, to ia ura unai gaudia be unai tauna amo ia kokia. Oibe, ta ese ma ta ia mama henia anina be ia inai henia danu. Namona be unai kara dikadia be gorere dikana ta bamona do ita dadaraia!

7. Edena dala ai hekokoroku bona mama karana ese dika ia havaraia diba? Haheitalai gwauraia.

⁷ Hekokoroku bona mama karadia be hegeregere ruma ena timba ia ania ore dimairi bamona. Herevana ruma ena toana be mai ena hairai, to dimairi ese idia ania dainai do ia moru diba. Unai hegeregerena, ta be lagani daudau Iehova ia hesiai henia diba, to bema ia be hekokoroku bona mama tauna, do ia moru diba. (Aon. 16:18) Iehova hesiai henia karana do ia rakatania bona ia sibona bona ma haida do ia hahisia. To, edena dala ai hekokoroku bona mama karana ita dadaraia diba?

8. Edena dala ai hekokoroku karana ita dadaraia diba?

⁸ Aposetolo Paulo ena sisiba Filipi kongrigeisen dekenai ita laloatao neganai,  hekokoroku karana ita dadaraia diba. Ia gwau: “Namo lasi umui heiriheiri eiava sibona umui abia isi, to mai manau ida do umui laloa ma haida ese umui idia hereaia.” (Fili. 2:3) Momokani, ma haida edia diba bona aonega be bada, to bema ita abia dae ma haida ese ita idia hereaia, idia ida do ita kara helulu lasi. To, idia totona do ita moale. Bona bema edia diba bona aonega be Iehova hesiai henia totona idia gaukaralaia, unai be namo herea. Danu bema idia ese Paulo ena sisiba idia badinaia, iseda kara namodia do idia laloa bada. Unai amo kongrigeisen lalonai, ita ibounai ese maino bona lalotamona do ita habadaia.

9. Dahaka ita karaia diba iseda tadikaka o taihu dekenai ita mama lasi totona?

⁹ Bema ita laloparara iseda diba be mai ena hetoana, vadaeni iseda tadikaka eiava taihu dekenai do ita mama lasi. Bema ita manau, ita be ma haida ida do ita kara helulu lasi. To, do ita ura edia diba be bada taudia amo gau haida ita dibaia. Hegeregere, kongrigeisen ai tadikaka ta be pablik tok namodia ia henia. Reana ita nanadaia diba iena tok be edena bamona ia hegaegaelaia. Bema taihu ta be nanadu dalana ia diba namonamo, reana do ita noia nanadu dalana ia hadibaia totona. Bona bema Keristani matamata ta ese ma haida ia tura henia be auka, reana ma haida ia tura henia karana ia manadalaia tadikaka o taihu amo heduru ia tahua diba. Unai bamona ita karaia neganai, iseda diba ita habadaia bona mama karana ita dadaraia danu.

10. Gideona be dahaka hekwakwanai ia davaria?

¹⁰ Manase ena iduhu tauna Gideona bona Eparaima ena iduhu tatau huanai ia vara gauna mani ita laloa. Iehova ena heduru amo, Gideona bona ena tatau 300 be tuari dekenai idia kwalimu dainai idia hekokoroku diba. Eparaima tatau be Gideona ida idia hedavari neganai, idia hanamoa lasi to ia ida idia hepapahuahu. Idia badu badina Gideona ese Dirava ena inai taudia tuari henia totona, idia ia boiria lasi. Idia  laloa bada gauna be taunimanima ese edia iduhu ladana do idia abia isi. To idia laloa boio mai anina bada gauna be Gideona be Iehova ena ladana ia abia isi bona Iena taunimanima ia gimaia.​—Hah. 8:1.

11. Gideona be Eparaima tatau dekenai dahaka ia gwau?

¹¹ Gideona be mai manau ida Eparaima tatau dekenai ia gwau: “Umui karaia karana ese egu kara ia hereaia.” Gideona be Iehova ese idia ia hanamoa dalana ta ia herevalaia, bena edia “badu ia ore.” (Hah. 8:2, 3) Gideona be manau karana ia hahedinaraia, badina ia ura Iehova ena taunimanima huanai maino ia noho.

12. Eparaima taudia bona Gideona edia haheitalai amo dahaka ita dibaia?

¹² Unai sivarai amo dahaka ita dibaia? Eparaima taudia edia haheitalai amo ita dibaia gauna be sibona iseda ladana do ita abia isi lasi, to Iehova ena ladana ita abia isi be namo. Ruma bese kwaradia bona elda taudia ese Gideona ena haheitalai amo gau ta idia dibaia diba. Bema ta be iseda kara dainai ia lalohisihisi, namona be ia lalohisihisi ena badina ita lalopararalaia. Danu ena kara namodia dainai do ita hanamoa. Bona unai ita karaia totona ita manau be namo, ena be ita diba ia kerere. Namo lasi iseda ladana abia isi totona eda maoro ita herevalaia, to mai anina bada gauna be iseda hetura karana namona tadikaka taihu ida ita laloa bada.

13. Hana be dahaka hekwakwanai ia davaria, bona dahaka ia karaia?

¹³ Hana ena haheitalai ita laloa danu. Ia be Levi tauna Elikana ia adavaia, bona unai tau ese Hana ia lalokau henia bada. To Elikana be mai ena davana ma ta, Penina, ia be “mai ena natudia, to Hana be natudia lasi.” Unai dainai, Penina ese Hana ia “kirikirilaia momo, ena lalona ia hahisia totona.” Baibel ia gwau Hana be ia “taitai bona ia aniani lasi.” (1 Sam. 1:2, 6, 7) Baibel ese ia hahedinaraia lasi Hana be Penina ena kara davana ia haloua. To, Hana ese ena hemami ibounai be Iehova dekenai ia gwauraia bona ia abia dae Ia ese do ia durua. Penina ena kara Hana dekenai ia haidaua, a? Baibel ese unai ia gwauraia lasi. To ita dibaia gauna be, Hana be ia goada bona lalomaino ia abia lou. Bona “lalohisihisi toana ia hahedinaraia lou lasi.”​—1 Sam. 1:10, 18.

14. Hana ena haheitalai amo dahaka ita dibaia?

¹⁴ Hana ena haheitalai amo dahaka ita dibaia? Bema oi itaia ta ia laloa ia be oi ia hereaia, namo lasi oi danu be unai bamona oi karaia. Namona be dika davana oi haloua lasi, to dala oi tahua unai tauna ida maino oi karaia totona. (Roma 12:17-21) Ena be iena kara do ia haidaua lasi, to oi dekenai lalomaino ia noho.

15. Edena dala ai Apolo bona Paulo be idia hegeregere?

 ¹⁵ Dokonai, hahediba tauna Apolo bona aposetolo Paulo edia haheitalai amo ita dibaia gauna do ita herevalaia. Idia ruaosi be Toretore Helagadia idia diba namonamo. Bona momo idia diba edia hadibaia dalana be namo herea. Bona idia ese momo idia durua hahediba taudia ai idia lao totona. To idia be ta ta dekenai idia mama lasi.

16. Apolo be edena bamona tauna?

¹⁶ Apolo be “Alesandria tauna,” bona unai gabu dekenai momo idia lao sikuli totona. Apolo be hereva namonamo tauna, bona “Toretore Helagadia ia diba momo.” (Kara 18:24) Ia be Korinto kongrigeisen ai ia noho neganai, tadikaka haida be ia idia ura henia bada, to tadikaka ma haida, hegeregere Paulo, idia laloa bada lasi. (1 Kor. 1:12, 13) Apolo ese kongrigeisen ia hapararaia, a? Lasi. Momokani, Apolo ese Korinto ia rakatania bona nega sisina murinai, Paulo ese ia noia ia giroa lou totona. (1 Kor. 16:12) Paulo be unai bamona do ia noinoi lasi bema ia itaia Apolo ese kongrigeisen ia hapararaia. Unai ese ia hahedinaraia, Apolo ese ena diba ia gaukaralaia sivarai namona ia harorolaia bona tadikaka taihu ia hagoadaia totona. Bona ita diba Apolo be manau tauna danu. Hegeregere, Akwila bona Prisikila ese Apolo dekenai ‘Dirava ena dala idia hadibaia namonamo’ neganai, Baibel ia hahedinaraia lasi Apolo be ia badu.​—Kara 18:24-28.

17. Edena dala ai Paulo ese maino ia havaraia?

¹⁷ Aposetolo Paulo ia diba Apolo ese gaukara namona ia karaia. To Paulo ia laloa momo lasi bema haida idia laloa Apolo ese ia ia hereaia. Paulo ese Korinto tadikaka  dekenai ia torea revareva ita duahia neganai, do ita itaia ia be manau bona laloa maoromaoro tauna. Taunimanima idia gwau “lau be Paulo ena” neganai, ia be unai ia ura lasi, to hanamoa ibounai be Iehova Dirava bona Iesu Keriso dekenai ia henia.​—1 Kor. 3:3-6.

18. Korinto Ginigunana 4:6, 7 hegeregerena, Apolo bona Paulo edia haheitalai amo dahaka ita dibaia?

¹⁸ Apolo bona Paulo edia haheitalai amo dahaka ita dibaia? Reana ita be Iehova totona ita gaukara goada, bona momo ita durua bapatiso idia abia totona. To ita laloparara unai be Iehova ena heduru amo ita karaia. Apolo bona Paulo edia haheitalai amo ita diba, kongrigeisen ai maduna momo ita abia neganai, gau momo ita karaia diba maino ita havaraia totona. Elda bona hesiai taudia ese Baibel ena hakaua herevadia amo ita idia durua lalotamona bona maino ai ita noho dainai, ita moale. Idia ura lasi sibona edia ladana idia abia isi, to idia ura kongrigeisen taudia idia durua Keriso Iesu idia badinaia bona ena haheitalai idia tohotohoa!​—1 Korinto 4:6, 7 duahia.

19. Namona be ita ta ta ese dahaka ita karaia? (Maua itaia: “ Kara Helulu Havaraia Lasi.”)

¹⁹ Ita ta ta dekenai Dirava ese diba ia henia. Unai harihari gauna ita gaukaralaia diba ‘ta ta ita hesiai henia totona.’ (1 Pet. 4:10) Reana ita laloa ita henia heduru be gau badana lasi. Timba ta ta oi kokoa hebou neganai, ruma ta oi haginia diba, unai hegeregerena ta ta ese idia hahedinaraia kara namodia be kongrigeisen ai lalotamona ia havaraia. Namona be ta ta ita gaukara goada kara helulu karana ita dadaraia totona. Bona ita hekwarahi kongrigeisen lalonai maino bona lalotamona ita habadaia.​—Efe. 4:3.