1. Anni i mesimmu nu makikompetensia i totolay?

TA MUNDO sangawe, kayà na aru nga totolay i mabbalin tu mas malalaki anne ta tanakuan anna awan tu pakialam da maski nu makataki ira. Angngarigan na, daralan na tadday nga negosiante i kakompetensia na ira tapenu maffu na i negosio da. Sadyakan gapa na tadday nga atleta nga takitan i kagayam na ta kalaban nga team tapenu mangaffu ira. Tadday nga estudiante i makkodigo onu mangopia tapenu laman makatallung ta sikat nga eskuela. Bilang Cristiano, ammu tam nga marake danatun. Parte yatun na “neravvunan nga kata-katolay.” (Gal. 5:19-21) Ngem awayya na kari nga ari mataga-tageno na karuan ta aripan ni Jehova nga makikompetensia ngana ira ta unag na kongregasion anna influwensiadda gapa i tanakuan nga magangngua tu kunnatun? Mawag nga pannonopattam yatun megafu ta afektan na kompetision i pattaradday tam nga mawwaragi.

2. Anni i gigiammuattam taw nga artikulo?

² Taw nga artikulo, gigiammuattam i marake nga ugali nga mangitubba nittam nga makikompetensia ta wawwaragi tam. Ikonsidera tam gapa i ehemplo ira na matalo nga lallaki anna babbay ta Biblia nga ari nakikompetensia ta tanakuan. Ollu, gigiammuattam labbi nu kunnasi tam mammuan i motibo tam.

3. Anni ira i iyavu tam ta baggi tam?

³ Makasta nu kanayuttam nga ammuan i motibo tam. Awayya tam iyavu ta baggi tam: ‘Nakadepende kari i paningakku ta baggì ta pangikumpara ta tanakuan? Mallallappo ngà kari ta kongregasion megafu ta kayà ku nga sakan i mabbalin tu pinakamalalaki  onu kayà ku nga mas malalaki ngà ta tadday nga brother onu sister? Onu kukukuakku i ngamin para kani Jehova?’ Ngatta mawag tu iyavu tam danatun? Innattam i kagian na Biblia.

4. Ngatta ariattam ikumpara i baggi tam ta tanakuan gitta na nakagi ta Galacia 6:3, 4?

⁴ Kagian na Biblia nga ariattam ikumpara i baggi tam ta tanakuan. (Bibbigan i Galacia 6:3, 4.) Ngatta? Nu nonopattam gare nga mas malalaki ittam ta tanakuan, awayya na nga mabbalin ittam tu minappakatannang. Tapus nu nonopattam gapa nga mas malalaki i tanakuan anne nittam, siguradu nga makkafi i nono tam. Parehu nga ari tu balanse yatun nga appana-panono. (Roma 12:3) Kinagi ni Sister Katerina * nga taga-Greece: “Kanayukku bi ikumpara i baggì ta tanakuan nu sinni i mas guapa, i mas malalaki ta ministerio, anna i mas mabi makikkofun. I resulta na? Matageno ku nga awan tu kuentà.” Daddammattam nga niyaranni ittam ni Jehova nisa ari tu megafu ta guapo onu guapa ittam, malalaki nga mappalappa, onu sikat, nu ari, megafu ta sigga-paran ittam nga ayatan yayya anna magginna ta Ana na.​—Juan 6:44; 1 Cor. 1:26-31.

5. Anni i magigiammum ta nesimmu kani Brother Hyun?

⁵ Yaw paga i tadday nga awayya tam iyavu, ‘Kilala dà kari nga minangngirattal tu imammo, onu kanayun nga egga i kakiddamà?’ Kunnatun i nesimmu kani Brother Hyun nga elder ta South Korea. Kanayun na bi nga nononopan nga kakompetensia na danuri egga responsibilidad da ta kongregasion. Kinagi na: “Ivuyu-vuyà danatun nga brother anna kanayukku kontran i kakkagiadda.” Anni i resulta natun? Inamin na: “Megafu tatun nga ugalì, nafektan i pattaradday na kongregasion.” Inuffunan yayya na kokkofun na anna nipalippawa da nisa i problema na. Inuli ni Hyun i ugali na anna mas nga napprogreso ngana yayya bilang elder. Nu masingattam nga egga tendensia tam nga makikompetensia imbes tu ipoppollu i imammo, mawag nga manguli ittam insigida.

6. Segun ta Galacia 5:26, anni ira i marake nga ugali nga marresulta ta kompetision?

⁶ Bibbigan i Galacia 5:26. Anni ira i marake nga ugali nga marresulta ta kompetision? Tadday i pappara-parayag. I minapparayag nga tolay ay minappakatannang anna makasarili. Tadday paga nga marake nga ugali ay i passil. Karagatan na minappassil nga tolay i gannug nga egga ta tanakuan anna kayà na nga apan yatun ta nisa. Nu passilammu i tadday nga tolay, kakurugan na ikalussom gapa yayya. Siguradu nga kayà tam nga lillitan danatun nga marake nga ugali!

7. Anni nga angngarigan i mangipasingan nga delikadu i pappara-parayag anna i passil?

⁷ Megitta i papparayag anna passil ta maritta nga mekivu ta gasolina nga meyusa ta eroplano. Makakagag gapa i eroplano ngem mabbara i maritta ira ta tubo na gasolina yatutta maddo i makina na eroplano nige paga nga mal-landing anna madisgrasia yatun tapus madaral. Baka kunnatun i karuan nittam. Awayya na tu masserbi i tadday kani Jehova tu manganannuan ngem nu pappara-parayag anna passil i motibo na ta passerbi, marresulta yatun ta kadaral. (Prov. 16:18) Magimmang ngana yayya nga masserbi kani Jehova anna matakitan na i baggi na anna i tanakuan. Kunnasi tam gafu malillitan i mabbalin tu minapparayag anna minappassil?

8. Kunnasi tam malabanan i papparayag?

⁸ Malabanattam i papparayag nu iyaplika  tam i tabarang ni apostol Pablo ta taga-Filipos ira: “Arian nu nga kuan i maski anni nga gannug megafu laman ta ikaya nu nga mala i karagatan nu, onu megafu ta aya nu nga meyatannang. Mappakalinno kamu lallagu, anna ipay nu nga kanayun ta nono nu tu mas mapia i karuan ira nga totolay anne nikamu.” (Fil. 2:3) Nu ipay tam kanayun ta nono tam tu mas mapia i karuan anne nittam, ari ittam makikompetensia turi ira ta mas talentadu anna mas maabilidad anne nittam. Magayayya tam lallagu para nira, mas ngana nu usu-usadda yatun nga abilidad da tapenu medayaw si Jehova. Nu tuttulan gapa na maabilidad nga wawwaragi tam i tabarang ni Pablo, masingadda i makasta ira nga kualidad tam. Megafu tatun, makoffun ittam ngamin tapenu memammo anna mattaradday i kongregasion.

9. Kunnasi tam malillitan i mamassil?

⁹ Malillitattam i mamassil ta wagi tam nu aminattam nga egga ira i gannug nga ari ittam kuruga malalaki. Nu minappakalinno ittam, ariattam palawanan nga mas talentadu onu mas malalaki ittam anne ta maski sinni. Nonopattam lallagu nu anni i magigiammu tam turi ira ta mas malalaki anne nittam. Angngarigan na, nu egga i tadday nga brother nga malalaki mappalappa, awayya tam iyavu nu kunnasi yayya mapprepara ta palappa na ira. Nu masingngo gapa i pallutu na tadday nga sister, awayya tam makkiddaw nisa tu suhestion tapenu mas massingngo gapa i pallutu tam. Nu marigatan gapa i tadday nga kabataan nga Cristiano nga makikkofun, awayya na i makkiavu ta tadday nga alistu laman nisa i makikkofun. Nu kuattam danaw, malillitattam i mappassil anna mapakasta tam paga i abilidad tam ira.

10. Anni i problema ni Gideon?

¹⁰ Ikonsidera tam i nesimmu kada Gideon nga naggafu ta tribu ni Manases anna ta lallaki ta tribu ni Efraim. Inuffunan ni Jehova si Gideon anna i 300 nga lallaki nga kavulu na nga mangaffu ta gerra. Puede nakuan ira nga mappakatannang megafu tatun. Tapus inangngayan na lallaki na Efraim si Gideon ari nga  tapenu komendan yayya, nu ari, tapenu makiddama nisa. Nakaporay ira megafu ta ari ira nga inagalan ni Gideon tapenu makillaban ta kalaban na Dios ta ollu pagalaman. Agga-nono da laman i pangidayaw na totolay ta tribu da ngem nakattamadda i pinaka-importante—i panguffun ni Gideon tapenu medayaw i ngagan ni Jehova anna maprotektan i totolena.​—Uk. 8:1.

11. Anni i nitabbag ni Gideon ta lallaki na Efraim?

¹¹ Mapakalinno nga kinagi ni Gideon ta lallaki na Efraim: “Anni kari i nakuà nu ikumpara ta nakua nu?” Nipanono na i tadday nga angngarigan nu kunnasi nga binendisionan ni Jehova i Efraimita ira. Turi ta naginna da yatun, “nakkalma” ira. (Uk. 8:2, 3) Mas pinili ni Gideon i mappakalinno tapenu mattalupaddian i imammo ta totolay na Dios.

12. Anni i magigiammu tam ta Efraimita ira anna kani Gideon?

¹² Anni i matudduattam taw nga istoria? Magigiammu tam ta Efraimita ira nga ari nakuan tu i kedayaw tam i agga-nono tam, nu ari, i kedayaw ni Jehova. Makagigiammu gapa i ulu na familia anna elder ira kani Gideon. Nu egga i mallussaw ta kingngua tam, alippawatattam nu ngatta nallussaw yayya nittam. Awayya tam komendan yatun nga tolay ta makasta ira nga nakua na. Mawag nga mapakalinno ittam tapenu makua yatun, mas ngana nu manawag mabba nga yayya i mali. Mas importante i makasta nga relasiottam ta wawwaragi anne ta mapakurug tam nga sittam i fustu.

13. Anni i problema ni Hana, anna anni i kingngua na?

¹³ Nonopattam gapa i ehemplo ni Hana. Iddeddu yayya na atawa na nga si Elkana nga tadday nga Levita. Ngem egga paga i tanakuan nga atawa ni Elkana, si Penina. Mas iddu ni Elkana si Hana. Ngem “napeggan tu ána si Penina, ngem awan tu ana ni Hana.” Megafu tatun, ‘kanayun nga insultuan ni Penina si Hana tapenu matakitan yayya.’ Kagian na Biblia nga “tumangi yayya anna ari nga kuman.” (1 Sam. 1:2, 6, 7) Ngem awan tu mabibbig ta Biblia nga nangibalo si Hana. Nivuvvu na lallagu kani Jehova i mataga-tageno na anna nattalo yayya nga metunung gabbalaman saw i ganna-gannug. Nanguli kari i pattratu ni Penina kani Hana? Awan tu kagian na Biblia. Ngem ammu tam nga netoli i memammo nga panageno ni Hana anna “ari ngana nga narraddam i muka na.”​—1 Sam. 1:10, 18.

14. Anni i magigiammu tam kani Hana?

¹⁴ Anni i magigiammu tam kani Hana? Nu egga i makikompetensia ta nikaw, daddammammu nga kontroladum i situasion. Ari ka nga makikompetensia nisa. Imbes tu ibalo mu i marake nga makua nikaw, mappursigi ka tapenu memammo i relasiommu tatun nga tolay. (Roma 12:17-21) Maski nu ari yayya manguli, kalmadu ka lagapa anna magayayya.

15. Anni i napparehuan da Apolos anni Pablo?

 ¹⁵ Ikonsidera tam gapa nu anni i magigiammu tam ta disipulo nga si Apolos anna kani apostol Pablo. Parehu ira nga malalaki ta Katurakan, sikat, anna antigu da i manuddu. Parehu gapa nga aru i inuffunadda nga mabbalin tu disipulo. Ngem ari da matageno nga makkakompetensia ira.

16. Anni nga klase na tolay si Apolos?

¹⁶ “Neyana ta Alejandria” si Apolos. Sikat yatun nga pagiskuelan tagga ta ollu nga siglo. Mapia i agguvovug na anna “aru i ammu na meyannung ta Masanto nga Tura.” (King. 18:24) Turi ta nasserbi si Apolos ta Corinto, nipatageno na karuan nga wawwaragi ta kongregasion nga mas kayà da yayya anne ta tanakuan nga wawwaragi, nelagum si Pablo. (1 Cor. 1:12, 13) Sinuportan kari ni Apolos yatun nga mamassirina nga appanono? Ari. Kakurugan na, turi ta nanaw ngana si Apolos ta Corinto, nitotoli ni Pablo nisa nga manoli yayya tari. (1 Cor. 16:12) Ari nakuan nga kuan yatun ni Pablo nu passirinan ni Apolos i kongregasion. Makasta i pinangusa ni Apolos ta abilidad na—i pangilayyagayya ta makasta nga dumug anna pamatuyag ta wawwaragi na. Makasiguradu ittam gapa nga minappakalinno si Apolos. Angngarigan na, awan tu mabibbig ta Biblia nga nassinti yayya kada Akila anna Priscila turi ta ‘pinakanawag da sa ta mapia i meyannung ta dalan na Dios.’—King. 18:24-28.

17. Kunnasi nga nipoppollu ni Pablo i imammo?

¹⁷ Ammu ni apostol Pablo i makasta ira nga kingngua ni Apolos. Ngem ari mavurung si Pablo nga baka nonopan na totolay nga mas malalaki si Apolos anne ta nisa. Masingattam ta tabarang na ira ta taga-Corinto nga mapakalinno si Pablo, ammu na i limitasion na, anna rasonable yayya. Imbes nga dumakal i  talinga na nu kagian na totolay nga ‘tolay nà ni Pablo,’ niyawa na lallagu i ngamin nga dayaw kani Jehova nga Dios anna kani Jesu-Cristo.​—1 Cor. 3:3-6.

18. Anni i magigiammu tam kada Apolos anni Pablo ta 1 Corinto 4:6, 7?

¹⁸ Anni i magigiammu tam kada Apolos anni Pablo? Posible nga malallappo ittam ta passerbi kani Jehova anna aru i moffunattam nga mapprogreso adde ta bawtismo. Ngem daddammattam nakuan nga anni laman nga metuppal tam ay megafu ta bendision ni Jehova. Magigiammu tam paga nira nga nu mas aru i responsibilidad tam ta kongregasion, mas aru gapa i makua tam tapenu mepoppollu i imammo. Daka-dakal i pappabalo tam ta panguffun nittam na elder anna ministerial ira nga aripan tapenu mattaradday anna memammo ittam. Makua da yatun nu ibase da ta Biblia i ngamin nga tabarang da. Ari gapa ira nga mappa-importante. Uffunadda lallagu i kongregasion nga tuttulan si Jesus anna parigan i ehemplo na.​—Bibbigan i 1 Corinto 4:6, 7.

19. Anni i makua na kataggi-tadday nittam? (Innan gapa i kahon nga “ Lillitan i Pakikompetensia.”)

¹⁹ Egga i niyawa na Dios ta kataggi-tadday nittam tu talento onu abilidad. Mosa tam yaw nga regalu ta ‘passerbi ta pammakapian na kataggi-tadday.’ (1 Ped. 4:10) Awayya na nga manono tam nga baddi laman i meyuffuttam ta pattaradday. Ngem megitta yatun ta baraddi nga dage nga mamatturuvvug ta tela na makakkasta nga sinnung. Paray nakuan ta mappursigi ittam nga ari makikompetensia. Kuattam i ngamin nga mawayya tam tapenu ipoppollu i imammo anna pattaradday ta kongregasion.​—Efe. 4:3.