1. Ania ti epekto kadagiti tattao ti panagkokompetensia?

ITI lubong ita, adu ti agimbubukodan gapu iti pannakikompetensiada. Ti maysa a negosiante ket mabalin nga agusar kadagiti dakes a taktika tapno maabakna dagiti kakompetensiana. Ti maysa nga atleta ket mabalin nga igagarana a dangran ti padana nga atleta iti sabali a team tapno laeng mangabak. Ti maysa nga estudiante ket mabalin nga agkusit wenno ag-cheat iti entrance exam tapno laeng makastrek iti sikat nga unibersidad. Kas Kristiano, ammotayo a dakes dagita; dagita ket paset “dagiti aramid ti lasag.” (Gal. 5:19-21) Ngem posible ngata a di mapupuotan ti dadduma nga adipen ni Jehova nga irugrugida ti panagkokompetensia iti kongregasion? Napateg dayta a saludsod gapu ta ti panagkokompetensia apektaranna ti panagkaykaysa ti panagkakabsattayo.

2. Ania ti pagsasaritaantayo iti daytoy nga artikulo?

² Iti daytoy nga artikulo, pagsasaritaantayo dagiti dakes a kualidad a mangirugi iti panagkokompetensia dagiti kakabsat. Usigentayo met ti ulidan dagiti matalek a lallaki ken babbai idi tiempo ti Biblia a saan a nakikompetensia. Umuna, pagsasaritaantayo no kasanotayo a masukimat dagiti motibotayo.

3. Ania dagiti masapul nga isaludsodtayo iti bagitayo?

³ Nasayaat no masansan a sukimatentayo dagiti motibotayo. Mabalin nga isaludsodtayo iti bagitayo: ‘Naragsakak kadi  no ikomkomparak ti bagik iti sabsabali? Aggaggagetak kadi iti kongregasion ta kayatko a siak ti kalaingan wenno nalalaingak ngem iti sabali a kabsat? Wenno kayatko laeng nga ipaay ken Jehova ti kasayaatak?’ Apay a masapul nga isaludsodtayo dagita? Kitaentayo ti kuna ti Sao ti Dios.

4. Apay a masapul a liklikantayo nga ikompara ti bagitayo iti sabsabali, kas nadakamat iti Galacia 6:3, 4?

⁴ Iparegta ti Biblia a liklikantayo nga ikompara ti bagitayo iti sabsabali. (Basaen ti Galacia 6:3, 4.) Apay? No ngamin panunotentayo a nalalaingtayo ngem iti kabsattayo, agbalintayo a napannakkel. No ikomparatayo ti bagitayo iti sabsabali, mabalin met a maupaytayo. Aniaman kadagita, saan no kuan a nasimbeng ti panunottayo. (Roma 12:3) Imbaga ti kabsat nga agnagan Katerina * a taga-Greece: “Masansan idi nga ikomparak ti bagik iti dadduma a kasla napimpintas, mas epektibo iti ministerio, ken nalalaing a makigayyem. Kas resultana, nariknak nga awan serserbik.” Masapul a laglagipentayo nga inyasidegnatayo ni Jehova kenkuana, saan a gapu ta napintastayo, nalaingtayo nga agsao, wenno populartayo, no di ket gapu ta situtuloktayo a mangayat kenkuana ken dumngeg iti Anakna.​—Juan 6:44; 1 Cor. 1:26-31.

5. Ania ti masursurom iti kapadasan ti kabsat nga agnagan Hyun?

⁵ Ti sabali pay nga isaludsodtayo iti bagitayo ket, ‘Pagaammodak kadi kas mannakikappia, wenno masansan a makiririak?’ Kitaentayo ti kapadasan ti kabsat nga agnagan Hyun a taga-South Korea. Adda idi tiempo nga ibilangna a karibal ti dadduma nga addaan iti pribilehio iti kongregasion. Imbagana, “Kritkritikarek idi dagidiay a kakabsat, ken masansan a kontraek ti ibagada.” Ania ti resultana? “Gapu iti ugalik, naapektaran ti panagkaykaysa ti kongregasion,” inaminna. Adda gagayyem ni Hyun a timmulong kenkuana a mangbigbig iti problemana. Nagbalbaliw ni Hyun, ket epektibo itan a panglakayen. No makitatayo nga adda tendensiatayo a mangirugi iti panagkokompetensia imbes a mangitandudo iti talna, masapul a dagus nga agbalbaliwtayo.

6. Sigun iti Galacia 5:26, ania dagiti naalas a kualidad a pakaigapuan ti panagkokompetensia?

⁶ Basaen ti Galacia 5:26. Ania dagiti naalas a kualidad a mangiturong iti panagkokompetensia? Ti maysa ket kinapangas. Ti napangas a tao ket napannakkel ken managimbubukodan. Ti sabali pay a naalas a kababalin ket apal. Kayat ti naapal a tao nga alaen ti adda iti sabali ken kayatna met a mapukaw dayta ti tao nga ap-apalanna. Talaga a ti apal ket maysa a kita ti gura. Sigurado a ditay pulos kayat dagita a naalas a kababalin!

7. Kasanotayo a mayilustrar ti dakes nga epekto ti kinapangas ken apal?

⁷ Dagiti negatibo a kualidad a kinapangas ken apal ket mayarig kadagiti banag a mangkontaminar iti fuel ti eroplano. Makatayab met ketdi ti eroplano. Ngem dagita a mangkontaminar ti mangbara iti pagdalanan ti fuel, isu a maperdi ti makina ti eroplano ket ma-crash dayta sakbay a maka-landing. Umasping iti dayta, mabalin nga agserserbi met ken Jehova ti maysa a tao. Ngem no ar-aramidenna dayta gapu iti kinapangas ken apal, addanto aldaw a madadael isuna. (Prov. 16:18) Sumardengto nga agserbi ken Jehova ket madangranna ti bagina ken ti sabsabali. Kasanotayo ngarud a maliklikan ti kinapangas ken apal?

8. Kasanotayo a malabanan ti kinapangas?

 ⁸ Malabanantayo ti kinapangas no iyaplikartayo ti balakad ni apostol Pablo kadagiti taga-Filipos: “Dikay agaramid iti aniaman gapu iti riri wenno kinapangas, no di ket agpakumbabakayo, nga ibilangyo a nangatngato ti sabsabali ngem dakayo.” (Fil. 2:3) No ibilangtayo a nangatngato ti sabsabali ngem datayo, ditay makikompetensia kadagidiay nalalaing ken mas naabilidad. Imbes ketdi, makipagragsaktayo kadakuada. Nangnangruna a kasta no usarenda dagiti abilidadda tapno maidaydayaw ni Jehova. No ti balakad ni Pablo ket sursuroten met dagiti nalaing a kakabsat, agpokusda kadagiti kualidad nga apresiarenda kadatayo. Kas resultana, maitandudotayo amin ti talna ken panagkaykaysa iti kongregasion.

9. Kasanotayo a makontrol ti tendensiatayo nga umapal?

⁹ Makontroltayo ti tendensiatayo nga umapal no patanorentayo ti kinaemma, kayatna a sawen, ammotayo dagiti limitasiontayo. No naemmatayo, ditay ikagumaan a paneknekan a nalalaingtayo wenno mas kualipikadotayo ngem iti sabsabali. Imbes ketdi, ammuentayo dagiti masursurotayo kadagidiay nalalaing ngem kadatayo. Kas pagarigan, ipapantayon a nakalalaing nga agpalawag ti maysa a brother iti kongregasion. Mabalin a damagentayo no kasanona nga isagsagana dagiti palawagna. No nalaing nga agluto ti maysa a sister, mabalintayo a damagen no kasanotayo a lumaing nga agluto. Ken no awan unay ti gayyem ti maysa nga agtutubo a Kristiano, mabalin nga agpabalakad iti maysa a nalaing a makigayyem. No aramidentayo dagita, maliklikantayo ti umapal ket mapasayaattayo dagiti abilidadtayo.

10. Ania a problema ti nakaipasanguan ni Gideon?

¹⁰ Usigentayo ti maysa a pasamak a nakairamanan ni Gideon iti tribu ni Manases ken dagiti lallaki iti tribu ni Efraim. Iti tulong ni Jehova, nakaskasdaaw ti panangabak ni Gideon ken ti 300 a tattaona ket mabalin a kasta unay koma ti panangipannakkelda iti  dayta. Simmabet ken Gideon dagiti lallaki ti Efraim tapno makiririda kenkuana, saan a tapno komendaranda. Nasair ti riknada ta manipud idi damo, saan ida nga inawis ni Gideon a makikadua iti pannakilaban kadagiti kabusor ti Dios. Sangkapanunotda ngamin ti pakaidayawan ti tribuda ket saanda a nakita ti kapatgan​—timmulong ni Gideon iti pannakaidaydayaw ti nagan ni Jehova ken iti pannakaprotektar ti ilina.​—Uk. 8:1.

11. Ania ti imbaga ni Gideon kadagiti lallaki ti Efraim?

¹¹ Sipapakumbaba nga imbaga ni Gideon kadagiti lallaki ti Efraim: “Bassit laeng ti naaramidak no maidilig kadakayo.” Kalpasanna, impalagipna no kasano a binendisionan ida ni Jehova. Kas resultana, “nagkalmada.” (Uk. 8:2, 3) Situtulok a nagpakumbaba ni Gideon tapno agtalinaed ti talna iti ili ti Dios.

12. Ania dagiti masursurotayo kadagiti Efraimita ken ni Gideon?

¹² Ania dagiti masursurotayo iti daytoy a salaysay? Masursurotayo kadagiti Efraimita a ti koma pakaidayawan ni Jehova ti iyun-unatayo, saan a ti bukodtayo a pakaidayawan. No datayo ket ulo ti pamilia ken panglakayen, adda masursurotayo ken Gideon. No adda masuron iti inaramidtayo, ikagumaantayo koma a tarusan no apay a nasuron. Mabalin met a komendarantayo kadagiti nasayaat a naaramidanna. Kasapulantayo ti kinapakumbaba, nangruna no nalawag nga isu met a talaga ti nagkamali. Adayo a napatpateg ti talna ngem ti panangpaneknek a datayo ti husto.

13. Ania a problema ti nakaipasanguan ni Hanna, ken kasanona a napagballigian dayta?

¹³ Panunotem met ti ulidan ni Hanna. Ti asawana ket ti Levita a ni Elkana, a mangay-ayat unay kenkuana. Ngem adda pay sabali nga asawa ni Elkana, ni Penina. Ad-adda nga ay-ayaten ni Elkana ni Hanna ngem ni Penina. Nupay kasta, “adda annak ni Penina ngem awan annak ni Hanna.” Gapu iti dayta, “kanayon nga in-insultuen [ni Penina] ti karibalna nga asawa [a ni Hanna] tapno masaktan.” Ania ti reaksion ni Hanna? Naladingitan unay! “Agsangsangit ken saan a mangan.” (1 Sam. 1:2, 6, 7) Ngem awan ti mabasatayo a pinadas ni Hanna ti agibales ken Penina. Imbes ketdi, inyebkasna ken Jehova ti linaon ti pusona ken nagtalek nga ilintegna ti bambanag. Nagbalbaliw kadi ti panangtrato kenkuana ni Penina? Saan nga ibaga ti Biblia. Ngem ti ammotayo ket timmalna manen ti panunot ni Hanna ken nagtalinaed a kasta. “Saanen a naliday ti rupana.”​—1 Sam. 1:10, 18.

14. Ania dagiti masursurotayo iti ulidan ni Hanna?

¹⁴ Ania dagiti masursurotayo iti ulidan ni Hanna? No adda mangpadas a makikompetensia kenka, laglagipem a kontroladom ti situasion. Dimo itulok a makikompetensiaka.  Imbes a subadam ti dakes iti dakes, ikagumaam ti makikappia iti dayta a tao. (Roma 12:17-21) Uray no saan nga agbalbaliw, agtalinaed a natalna ti panunotmo.

15. Ania dagiti pagpadaan da Apolos ken Pablo?

¹⁵ Kamaudiananna, usigentayo dagiti masursurotayo iti ulidan ti adalan a ni Apolos ken ni apostol Pablo. Agpada dagitoy a lallaki a nakalalaing iti Kasuratan. Agpadada a nalatak ken nalaing a mannursuro. Ken agpada nga adu ti natulonganda nga agbalin nga adalan. Ngem saanda nga imbilang nga agkaribalda.

16. Kasanom a deskribiren ni Apolos?

¹⁶ Ni Apolos ket “nayanak idiay Alejandria,” ti sentro ti edukasion idi umuna a siglo. Nakalalaing nga agpalawag, ken “adu ti ammona iti Kasuratan.” (Ara. 18:24) Idi adda ni Apolos idiay Corinto, impakita ti dadduma iti kongregasion a kaykayatda isuna ngem iti dadduma a kakabsat, a pakairamanan ni Pablo. (1 Cor. 1:12, 13) Intandudo kadi ni Apolos ti panagsisina? Saan. Kinapudnona, sumagmamano a tiempo kalpasan a pimmanaw ni Apolos idiay Corinto, pinaregta ni Pablo nga agsubli sadiay. (1 Cor. 16:12) Saan a pulos nga aramiden dayta ni Pablo no ammona a pagsisinaen ni Apolos ti kongregasion. Nalawag a nasayaat ti nangusaran ni Apolos iti abilidadna​—tapno maipakaammona ti naimbag a damag ken maparegtana dagiti kakabsat. Masiguradotayo met a napakumbaba ni Apolos. Kas pagarigan, awan ti mabasatayo a nasair ti riknana idi a da Aquila ken Priscila “tinulonganda a maaddaan iti mas umiso a pannakatarus iti dalan ti Dios.”​—Ara. 18:24-28.

17. Kasano nga intandudo ni Pablo ti talna?

¹⁷ Ammo ni apostol Pablo dagiti nasayaat a  maar-aramidan ni Apolos. Ngem saanna a narikna a nalalaing ni Apolos ngem isuna. Ti kinapakumbaba, kinaemma, ken kinanainkalintegan ni Pablo ket makita iti balakadna iti kongregasion ti Corinto. Imbes a mapatiray-okan iti ibagbagada a “pasurotnak ni Pablo,” inturongna ketdi ti amin nga atension ken Jehova a Dios ken ni Jesu-Kristo.​—1 Cor. 3:3-6.

18. Sigun iti 1 Corinto 4:6, 7, ania dagiti masursurotayo iti ulidan da Apolos ken Pablo?

¹⁸ Ania dagiti masursurotayo iti ulidan da Apolos ken Pablo? Mabalin nga ar-aramidentayo ti amin a kabaelantayo nga agserbi ken Jehova, ken adu ti matultulongantayo a rumang-ay ken agpabautisar. Ngem ammotayo a ti aniaman a balligitayo ket gapu laeng iti bendision ni Jehova. Adda pay masursurotayo iti ulidan da Apolos ken Pablo. No ad-adu ti responsabilidadtayo iti kongregasion, dakdakkel ti gundawaytayo a mangitandudo iti talna. Anian a yamantayo no dagiti naapointaran a lallaki itandudoda ti talna ken panagkaykaysa. Maaramidanda dayta no ibasarda dagiti balakadda iti Sao ti Dios ken iturongda ti atension iti ulidantayo a ni Kristo Jesus, saan nga iti bagida!​—Basaen ti 1 Corinto 4:6, 7.

19. Ania ti maaramidan ti tunggal maysa kadatayo? (Kitaen met ti kahon a “ Ditay Irugrugi ti Panagkokompetensia.”)

¹⁹ Adda talento wenno abilidad nga inted ti Dios iti tunggal maysa kadatayo. Mabalintayo nga usaren dayta a sagut nga “agserbi iti maysa ken maysa.” (1 Ped. 4:10) Baka mariknatayo a bassit laeng ti maar-aramidantayo. Ngem ti babassit a banag a mangitandudo iti panagkaykaysa ket kas iti babassit a dait a mamagsasaip iti maysa a bado. Ikagumaantayo koma nga ikkaten ti aniaman a kita ti panagkokompetensia. Determinadotayo koma a mangaramid iti amin a kabaelantayo a mangitandudo iti talna ken panagkaykaysa iti kongregasion.​—Efe. 4:3.