1. Һьнә мәрьв чь дькьн ԝәки жь кәсед дьн четьр бьн у дьһа пешдачуйи бьн?

ИРО, гәләк кәс һәри зедә хԝә һʹьз дькьн. Ләма жи әԝана һәвдӧрʹа дькʹәвьнә ләще. Мәсәлә, бизнеседа һьнә мәрьв методед ӧса дьдьнә хәбате, кӧ зийане дьдьнә бизнесменед дьн, ԝәки бизнеса хԝә пешда бьвьн. Спортеда һьнә спортсмен ԛәста һәвдӧ бьриндар дькьн, ԝәки ләщеда сәркʹәвьн. Мәкʹтәбеда һьнә шагьрт копийед екзамина жь кәсәки дьн дькʹьшиньн, сәва кӧ бькʹәвьн университета бьльнд. Әм ча шагьртед Иса заньн кӧ кьред ӧса, «кьред бьнйатʹа инсен» ьн (Галати 5:19-21). Ле гәло дьбә кӧ щьватеда һьнә хушк-бьра бе һʹәмде хԝә һәвдӧрʹа бькʹәвьнә ләще? Әв пьрсәкә гәләк фәрз ә у әм гәрәке һаш жь хԝә һәбьн, чьмки әԝ йәк дькарә йәктийа мә хьраб кә.

2. Ве готареда, әме дәрһәԛа чь хәбәр дьн?

² Ве готареда, әме дәрһәԛа һьнә һʹӧнӧред хьраб хәбәр дьн, йед кӧ дькарьн бьбьн сәбәба һәврʹькʹийе нав хушк у бьрада. Ӧса жи, әме дина хԝә бьдьн сәрһатийед һьнә кәсед амьн, йед кӧ һәвдӧрʹа нәдькʹәтьнә ләще. Пешийе, әме бьвиньн кӧ әм чаԝа дькарьн нетед хԝә бьщерʹьбиньн.

3. Ԝе баш бә кӧ әм жь хԝә чь бьпьрсьн?

³ Щар-щара лазьм ә кӧ әм нетед хԝә бьщерʹьбиньн. Мәсәлә, әм дькарьн жь хԝә бьпьрсьн: «Гәло әз хԝә һәр тʹьм бәрамбәри кәсед дьн дькьм? Гәло әз пәй чь дькʹәвьм у нета мьн чь йә? Әз пәй ве йәке дькʹәвьм кӧ щьватеда жь кәсед дьн четьр бьм, йан әз дьхԝазьм  дьле Йаһоԝа ша кьм?» Чьма лазьм ә кӧ әм пьрсед ӧса бьдьнә хԝә? Бьньһерʹә кӧ Хәбәра Хԝәде чь дьбежә.

4. Ль гора Галати 6:3, 4, чьма гәрәке әм хԝә бәрамбәри тʹӧ кәси нәкьн?

⁴ Кʹьтеба Пироз дьбежә кӧ гәрәке әм хԝә бәрамбәри тʹӧ кәси нәкьн (Галати 6:3, 4 бьхунә). Гәло чьрʹа? Һәгәр әм хԝә жь кәсәки дьн четьр һʹәсаб бькьн, ԛӧрʹәти дькарә бькʹәвә дьле мә. Жь алийе дьнва, һәгәр әм бьфькьрьн кӧ кәсед дьн жь мә четьр ьн, әм дькарьн дьлтәнг бьн у шабуна хԝә ӧнда кьн. Ләма жи, гәрәке әм нәфькьрьн кӧ әм жь кәсед дьн четьр ьн йан жи кӧ кәсед дьн жь мә четьр ьн (Рʹомайи 12:3). Хушкәкә жь Йунаньстане бь наве Катерина, * ӧса дьбежә: «Мьн хԝә һәр тʹьм бәрамбәри кәсед ӧса дькьр, йед кӧ бь ньһерʹандьна мьн жь мьн бәдәԝтьр бун, хьзмәтеда дьһа пешдачуйи бун у зу хԝәрʹа һәвалед тʹәзә дьдитьн. Ләма жи, мьн хԝә беԛимәт тʹәхмин дькьр». Гәрәке әм бир нәкьн кӧ Йаһоԝа әм кʹьшандьнә бал хԝә нә жь бо ве йәке кӧ әм бәдәԝ йан хәбәрхԝәш ьн, йан жи чьмки гәләк кәс мә һʹьз дькьн. Ле бона ве йәке кӧ әм һазьр бун ԝи һʹьз бькьн у гӧһ бьдьн Иса (Йуһʹәнна 6:44; 1 Корьнтʹи 1:26-31).

5. Сәрһатийа бьре Һйун чь мә һин дькә?

⁵ Ӧса жи, ԝе баш бә кӧ әм жь хԝә бьпьрсьн: «Гәло кәсед дьн мьн ча йәки әʹдьлайиһʹьз йан ча йәки шәрʹуд нас дькьн?» Дина хԝә бьдьнә сәрһатийа бьраки бь наве Һйун, йе кӧ Корейа Башуреда дьжи. Ԝәʹдәки әԝи кәсед кӧ щьватеда һьнә щабдари дьстандьн, һʹәсаб дькьр кӧ әԝана дьхԝазьн жь ԝи четьр бьн у тʹәви ԝи дькʹәвьнә ләще. Әԝ дьбежә: «Мьн ван бьра сущдар дькьрьн, у әз гәләк щара тʹәви готьнед ԝан ԛайил нәдьбум». Гәло ахьрийа ве йәке чь бу? Һйун ӧса дьбежә: «Ньһерʹандьна мьн йәктийа щьвате хьраб дькьр». Һьнә һәвалед Һйун али ԝи кьрьн кӧ әԝ проблема хԝә бьвинә. Һйун хԝә рʹаст кьр у иро әԝ рʹуспики баш ә. Һәгәр әм тедәрдьхьн кӧ әм дьһа зедә һәврʹькʹийе пешда тиньн нә кӧ әʹдьлайе, гәрәке әм ви хәйсәти зу дури хԝә хьн.

6. Ль гора Галати 5:26, һәврʹькʹи кʹижан һʹӧнӧред хьрабва гьредайи йә?

⁶ Галати 5:26 бьхунә. Гәло кʹижан һʹӧнӧред нәбаш дькарьн бьбьн сәбәба һәврʹькʹийе? Йәк жь ԝан, хԝәһʹьзи йә. Мәрьвәки хԝәһʹьз ԛӧрʹә йә у тʹәне дькʹәвә һʹәйра хԝә. Ӧса жи чʹәʹвнәбари һʹӧнӧрәки хьраб ә. Кәсе чʹәʹвнәбар нә кӧ тʹәне ван тьшта дьхԝазә чь кӧ щәм кәсед дьн һәнә, ле һәла һе дьхԝазә кӧ әԝ тьшт щәм ԝан тʹӧнә бьн жи. Бь рʹасти һʹәвсуди нәфрʹәтева гьредайи йә. Әм тʹӧ щар нахԝазьн ԝәки әв хәйсәтед хьраб дьле мәда кʹока хԝә бәрʹдьн!

7. Һʹале кәсәки хԝәһʹьз у чʹәʹвнәбар дькарьн бәрамбәри чь бькьн?

⁷ Һʹӧнӧред ӧса ча хԝәһʹьзи у чʹәʹвнәбари мина кӧрмед даре нә, йед кӧ һьндӧрʹе даре дьхԝьн у дьрʹьзиньн. Дьԛәԝьмә дәрберʹа әшкәрә нинә кӧ дар ида рʹьзийа йә, ле рʹожәке, әв дар ԝе бькʹәвә. Мина ве йәке, кәсәк дькарә ԝәхтәке Йаһоԝарʹа хьзмәт бькә, ле һәгәр дьле ԝида хԝәһʹьзи у һʹәвсуди һәбьн, әԝе мина дарәкә рʹьзийайи бькʹәвә (Мәтʹәлок 16:18). Ахьрийеда әв кәс ԝе хьзмәта хԝә бьһелә у зьраре бьдә хԝә у кәсед дьн. Гәло әм чаԝа дькарьн хԝә жь хԝәһʹьзи у чʹәʹвнәбарийе бьпарезьн?

8. Әм чаԝа дькарьн хԝәһʹьзийе жь хԝә дур хьн?

 ⁸ Сәва кӧ әм хԝәһʹьзийе жь хԝә дур хьн, ԝе баш бә кӧ әм гӧһ бьдьнә ве ширәта Паԝлосе шанди: «Тьштәки бь һәврʹькʹийе нәкьн у ль наве хԝә нәгәрʹьн, ле жь ԝә һәр йәк бь мьлуктийе һәвале хԝә сәр хԝәрʹа бьгьрә» (Филипи 2:3). Һәрге әм хушк-бьра сәр хԝәрʹа дьгьрьн, гава әм нава ԝанда фәрәсәтед ӧса бьвиньн кӧ жь йед мә четьр ьн, әме ша бьн. У әме дьһа ша бьн гава әԝана ван фәрәсәтед хԝә бона хьзмәт у рʹумәта Йаһоԝа бьдьнә хәбате. Хушк-бьред мәйә зен жи гәрәке жь алийе хԝәда гӧһ бьдьн ширәта Паԝлос у һʹӧнӧред мә йед баш бьвиньн. Бь ве йәке, әм гьшк дькарьн әʹдьлайи у йәктийа щьвате пешда бьвьн.

9. Сәва кӧ әм чʹәʹвнәбарийе нәкьн, әм гәрәке чь бькьн?

⁹ Сәва кӧ әм чʹәʹвнәбарийе кәсәки нәкьн, ԝе баш бә кӧ әм синоред хԝә  бьзаньбьн. Һәгәр әм мьлук бьн, әме мәрьварʹа нәдьнә кʹьфше кӧ фәрәсәтед мә жь йед ԝан баштьр ьн. Дәԝсе әме чʹәʹв бьдьнә кәсед зен у жь ԝана гәләк тьшт һин бьн. Мәсәлә, бьрак готаред пʹьрʹ хԝәш дьхунә. Әм дькарьн жь ԝи бьпьрсьн кӧ әԝ ча хԝә бона готаре һазьр дькә. Йан жи, һәгәр хушкәк хԝарьнед тәʹм чедькә, әм дькарьн жь ԝе бьпьрсьн кӧ әԝ чаԝа ӧса хԝәш чедькә. Ӧса жи, һәгәр щаһьләкирʹа чәтьн ә кӧ хԝәрʹа һәвалед тʹәзә бьвинә, әԝ дькарә жь кәсед кӧ һеса хԝәрʹа һәвала дьвиньн, ширәте бьхԝазә. Бь ве йәке, әм дькарьн хԝә жь чʹәʹвнәбарийе дур бьгьрьн у дьһа пешдачуйи бьн.

10. Гидәон рʹасти чь проблеме һат?

¹⁰ Сәрһатийа Гидәон у меред жь бәрәка Әфрайим бинә бира хԝә. Бь сайа аликʹарийа Йаһоԝа, Гидәон у 300 әскәред ԝи шәрʹәки мәзьнда сәркʹәтьн. Меред Әфрайими чун бал Гидәон, нә сәва кӧ пʹайе ԝи бьдьн, ле ԝәки ԝирʹа шәрʹ бькьн. Ча те кʹьфше әԝана һерс кʹәтьн, чьмки Гидәон гази ԝан нәкьрьбу, ԝәки тʹәви ԝи һьмбәри дьжмьнед Хԝәде шәрʹ  бькьн. Әԝана һәри зедә пәй наве бәрәка хԝә кʹәтьбун, у дина хԝә нәданә ве йәке кӧ Гидәон наве Йаһоԝа пироз кьр у щьмәʹта Хԝәде хьлаз кьр (Һʹакьмти 8:1).

11. Гидәон чаԝа щаба меред жь бәрәка Әфрайим да?

¹¹ Гидәон бь мьлукти ԝанрʹа гот кӧ һьмбәри кьрьна ԝан, кьре ԝи тʹӧ тьшт нинә. Паше, әԝи дина ԝан кʹьшандә сәр ве йәке кӧ Йаһоԝа әԝана чаԝа кʹәрәм кьрьн. Кʹьтеба Пироз дьбежә кӧ һьнге һерса ԝан дани (Һʹакьмти 8:2, 3). Гидәон бона кӧ әʹдьлайе хԝәй кә, хԝә шкенанд у бь мьлукти щаба ԝан да.

12. Әм жь сәрһатийа Гидәон у Әфрайимийа чь дәрсе дьстиньн?

¹² Гәло әм дькарьн жь ве сәрһатийе чь дәрсе һин бьн? Жь мәсәла Әфрайимийа, әм дьвиньн кӧ гәрәке әм һәри зедә нә кӧ пәй наве хԝә кʹәвьн, ле һәр тьшти бькьн кӧ наве Йаһоԝа рʹумәт кьн. Һәгәр тӧ сәре малбәте йан рʹуспи йи, тӧ дькари чʹәʹв бьди Гидәон. Чахе кәсәк сәва кьред тә хәйиди йә, хԝә дайнә дәԝса ԝи у бьфькьрә кӧ чь дьле ԝи ешанд. Ӧса жи, мина Гидәон, тӧ дькари пʹайе ви кәси бьди. Бона ве йәке мьлукти лазьм ә, илаһи һәгәр әв кәс нәһәԛ ә. Диса жи, бир нәкә кӧ дьһа баш ә әʹдьлайе хԝәй ки, нә кӧ хԝә һәԛ дәрхи у пәй наве хԝә кʹәви!

13. Һанна чь һʹалида бу, у дьле ԝе чаԝа рʹьһʹәт бу?

¹³ Ӧса жи, бьфькьрә сәр сәрһатийа Һаннайе. Мере ԝе Әлкана ле гәләк һʹьз дькьр. Ле һәԝийа Һаннайе бь наве Пенина һәбу. Ль гора Кʹьтеба Пироз, «зарʹокед Пәниннайе һәбун, ле зарʹокед Һаннайе тʹӧнәбун». Ләма жи Пенинайе дьле Һаннайе тʹьме дешанд у жь бо ве йәке «Һанна дьгьрийа у нан нәдьхԝар» (1 Самуйел 1:2, 6, 7). Диса жи, Кʹьтеба Пироз набежә кӧ Һаннайе дьхԝәст һʹәйфе жь Пенинайе һьлдә. Һаннайе дьле хԝә Йаһоԝарʹа вәкьр у баԝәр бу кӧ Хԝәде ԝе али ԝе бькә. Кʹьтеба Пироз әшкәрә накә кӧ паше ве йәке Пенина һатә гӧһастьне йан на. Ле әм заньн ԝәки әʹдьлайи у рʹьһʹәти кʹәтә дьле Һаннайе (1 Самуйел 1:10, 18).

14. Әм дькарьн жь сәрһатийа Һаннайе чь дәрсе бьстиньн?

¹⁴ Әм дькарьн жь сәрһатийа Һаннайе чь дәрсе һин бьн? Һәгәр кәсәк тәрʹа бькʹәвә һʹӧщәте, нәлазьм ә кӧ тӧ бькʹәви бәр байе ԝи. Дәԝса кӧ жь бәр хьрабийева хьрабийе бькьн, һәр тьшти бькә кӧ һун ль һәв бен (Рʹомайи 12:17-21). Һәгәр әԝ ньһерʹандьна хԝә нәгӧһезә жи, шабуна хԝә ӧнда нәкә чьмки тә жь алийе хԝәда һәр тьшт кьр.

15. Аполо у Паԝлосе шанди чьда мина һәв бун?

¹⁵ Ӧса жи дина хԝә бьдә дәрсед жь сәрһатийа Аполо у Паԝлосе шанди. Һәрдӧ жи Ньвисаред Пироз рʹьнд заньбун  у дәрсдаред бь нав у дәнг бун. Хенщи ве йәке һәрдӧ жи али гәләк кәса кьрьбун кӧ әԝ бьбьн шагьртед Иса Мәсиһ. Ле диса жи ԝана һәвдӧрʹа нәдькʹәтьнә ләще.

16. Аполо йәки чаԝа бу?

¹⁶ Кʹьтеба Пироз ӧса дьбежә: «Щьһуки наве ԝи Аполо, буйина хԝәда жь Скәндәрйайе, һатә Әфәсе. Әва готьнбежәки сәрхԝә у ньвисаред пирозда занәки зор бу» (Кʹаред Шандийа 18:24). Гава Аполо бажаре Корьнтʹеда бу, һьнәка жь щьвате әшкәрә дьданә кʹьфше кӧ әԝана һе зедә Аполо һʹьз дькьн, нә кӧ Паԝлос у бьред дьн (1 Корьнтʹи 1:12, 13). Гәло әв ньһерʹандьна нәрʹаст кӧ йәктийе хьраб дькьр, Аполо хԝәш дьһат? Әм баԝәр ьн кӧ на! Чахе Аполо жь Корьнтʹе чу, ԝәʹдә шунда Паԝлосе шанди ԝирʹа гот кӧ бьра әԝ диса вәгәрʹә Корьнтʹе (1 Корьнтʹи 16:12). Һәгәр Паԝлос бьфькьрийа кӧ Аполо йәктийа щьвата Корьнтʹе хьраб дькә, ԝе әԝ нәшанда ԝедәре. Әшкәрә йә кӧ Аполо фәрәсәтед хԝә бь щурʹәки баш дьда хәбате, демәк бона бәлакьрьна мьзгине у бона ԛәԝикьрьна щьвате. Жь Кʹьтеба Пироз те кʹьфше кӧ Аполо йәки мьлук бу. Мәсәлә, Кʹьтеба Пирозда найе готьне кӧ Аполо хәйиди, гава Әкила у Прьскила «һе рʹаст Рʹийа Хԝәде ԝирʹа шьровәкьрьн» (Кʹаред Шандийа 18:24-28).

17. Паԝлосе шанди чаԝа әʹдьлайе пешда дьбьр?

¹⁷ Чахе Паԝлосе шанди дьдит ԝәки Аполо пешда дьчә, әԝ нәдьтьрсийа кӧ мәрьвед дьн ԝе Аполо жь ԝи четьр һʹәсаб кьн. Жь ширәта кӧ Паԝлос да щьвата Корьнтʹе те кʹьфше, ԝәки әԝ йәки мьлук у сәрԝахт бу у синоред хԝә  заньбун. Гава һьнә кәса дьгот «әз пʹара Паԝлос ьм», әԝи хԝә ԛӧрʹә нәдькьр, ле дәԝсе дина ԝан дькʹьшандә сәр Йаһоԝа у Иса Мәсиһ у һʹәму пәсьн дьда ԝан (1 Корьнтʹи 3:3-6).

18. 1 Корьнтʹи 4:6, 7 дәрһәԛа Аполо у Паԝлосе шанди чь әʹйан дькә?

¹⁸ Гәло әм дькарьн жь готьн у кьред Аполо у Паԝлосе шанди чь дәрсе һин бьн? Дьбәкә әм бь дьл у щан шьхӧле Йаһоԝа дькьн у мә али гәләк хԝәндәкʹаред Кʹьтеба Пироз кьрийә ԝәки әԝана бәрбь ньхӧмандьне һәрʹьн. Ле әм рʹьнд заньн ԝәки мә әв йәк тʹәне бь сайа ԛәԝата Йаһоԝа кьрийә. Мәсәла Аполо у Паԝлос тьштәки дьн жи мә һин дькә: Чьԛас зедә щабдарийед мә һәнә, һаԛас зедә мәщалед мә һәнә кӧ әʹдьлайе бькьнә щьвате. Әм чьԛас рʹази нә, гава бьред кʹьфшкьри әʹдьлайе у йәктийе дькьнә щьвате бь ве йәке кӧ сәр һʹиме Кʹьтеба Пироз ширәта дьдьн, у дина хушк-бьра дькʹьшиньн сәр мәсәла Иса, нә кӧ сәр хԝә (1 Корьнтʹи 4:6, 7 бьхунә).

19. Һәр кәс жь мә дькарә чь бькә? (Ӧса жи, чаргошә « Нәбә Сәбәба Һәврʹькʹийе» бьньһерʹә.)

¹⁹ Хԝәде һьнә фәрәсәт данә һәр кәси жь мә. Бь сайа ван фәрәсәта әм дькарьн «һәврʹа хьзмәткʹарийе бькьн» (1 Пәтрус 4:10). Әм дьбәкә дьфькьрьн ԝәки рола мә щьватеда бьчʹук ә. Ле бир нәкә кӧ ав, дьлоп-дьлоп дьбә гол. Ләма жи бьра әм һәвдӧрʹа нәкʹәвьн һʹӧщәте у чь жь дәсте мә те бькьн, ԝәки әʹдьлайе у йәктийе бькьнә щьвате (Әфәси 4:3).