1. Chumanyi chinateli kumwekana neyi antu amuchipompelu elaña yuma yinakumwekesha nawu abadika akwawu?

MUKAAYI makonu, antu amavulu adimonaña nawu abadika akwawu. Chakutalilahu, mukwakulanda nakulandulula nateli kwila yuma yidi yejima chakadi kwakama kulonda yayibadiki akwawu. Mukwakuhema yisela nateli kukatishilamu mukwawu mumushikila kulonda yayibadiki akwawu. Mukashikola wunakukeña nindi yakayi hayunivesiti yaya mpuhu nateli kutwamba hakusoneka kweseka. Etu akwaKristu tweluka netu yilwilu yamuchidiwu yatama; “[hi]nyidimu yamujimba wanshidi.” (Ñal. 5:19-21) Hela chochu, ambuña aYehova amakwawu anateli kwiluka wanyi nawu anakusañumuna yilwilu yakudibecha muchipompelu hela kuluwañesha amakwawu. Twatela kutoñojokahu hachumichi, muloña neyi antu amuchipompelu anakwila yuma yinakumwekesha nawu abadika akwawu, muchipompelu mukwikala kunuñañana wanyi.

2. Yumanyi yitukuhanjeka muchinu chibaaba?

² Muchinu chibaaba, tukuhanjeka hayilwilu yinateli kutuletesha kusañumuna kudibecha nawamanakwetu. Tukuhanjeka cheñi hayakutalilahu yawamayala niambanda ashinshika ashimunawu muBayibolu abulili kwikala nachilwilu chakudibecha. Chatachi, tuhanjekenu chitunateli kushinshika hayilwilu yetu.

3. Malwihwinyi itwatela kudihula etu aweni?

³ Chachiwahi kushinshikaña chidi yilwilu yetu mpinji yejima. Dihulenu nenu: ‘Komana natiyaña kuwaha hohu neyi nitoñojoka nami nabadika mukwetu? Komana nazataña nañovu muloña nakeñaña kwikala wayibadika amanakwami niahela? Tahindi nazataña nañovu kulonda nimuzañalesheña Yehova?’ Muloñadi chitwatela kudihwila awa malwihu? Talenu chahosha Izu daNzambi.

4. Muloñadi chitwatela kubulilaña kudesekeja nawakwetu, neyi chashimunawu haAÑalija 6:3, 4?

⁴ Bayibolu yatulejaña nawu bayi tudesekejaña nawakwetuku. (Tañenu AÑalija 6:3, 4.) Muloñadi? Chatachi, neyi tutoñojokaña netu tunakuzata nañovu kubadika amanakwetu tukwikala adivwimba. Ilaña, cheñi neyi tutoñojokaña netu amanakwetu niahela elaña chiwahi kubadika etu, tukuzeya. Iyi yitoñojoka yejima yatama. (Rom. 12:3) Muhela Katerina, * washakamaña kuGreece, wahosheli nindi: “Nadesekejeleña nawakwetu amwekeneña chiwahi, eluka kushimwina nawa eluka chakukwata amabwambu. Chafuminimu, nadimweneña nami nidi wamukunkulwayi.” Twatela kwanukaña netu bayi neyi Yehova watukokela kwakwihi nayena muloña wakuwaha, kuhosha chiwahi hela muloña wakwila antu amavulu atukeñaku, ilaña muloña wakwila twamukeña nawa twamutiyililaña Mwanindi.—Yow. 6:44; 1 Kor. 1:26-31.

5. Yumanyi yimunadizili kuyuma yeliliyi manakwetu Hyun?

⁵ Twatela kudihula cheñi netu, ‘Komana añiluka nawu nekala mukwakuleta kuwunda tahindi naletaña yikonkojola nawakwetu?’ Talenu chuma chamumwekeneni manakwetu Hyun, washakamaña kuSouth Korea. Mpinji yimu, wayimweneña amanakwetu adiña nakukooleka muchipompelu nindi amwekanaña neyi abadika akwawu. Wahosheli nindi, “Nadiña wakalisha nanawa amanakwetu nawa kakavulu, netejeleña wanyi yuma yahosheleñawu.” Chumanyi chafuminimu? Wahosheli nindi: “Yilwilu yami yaletesheli muchipompelu mubuli kwikala kunuñañana.” Amabwambu jindi amukwashili kwiluka kukala kwadiñayi naku. Hyun wahimpili nawa chayinu mpinji himukulumpi. Neyi tumona netu tudi nachilwilu chakusañumuna kudibecha chatela tuleteña kuwunda, twatela kuzatilahu swayi-swayi.

6. Kwesekeja naAÑalija 5:26, yilwilwinyi yatama yinateli kuletesha kudibecha?

⁶ Tañenu AÑalija 5:26. Yilwilwinyi yinateli kutuletesha kwikala namuchima wakudibecha? Chatachi, kudivwimba. Muntu wadivwimba watoñojokaña hohu hadi yomwenindi. Chilwilu chikwawu chatama hilwisu. Muntu walwisu bayi neyi wakeñaña hohu kwikala nayuma yidi namukwawuku, ilaña wakeñaña cheñi nikutambula yuma yikwetiyi. Lwisu dilwaleteshaña kuhelañana. Mwamweni, twatela kutondolwela iyi yilwilu yatama.

7. Chakutalilahwinyi chinakumwekesha nawu kudivwimba nilwisu kwatama?

⁷ Yilwilu yatama yidi neyi kudivwimba nilwisu tunateli kuyesekeja namajilu eñilaña mumanji azatikaña mundeki. Ndeki yinateli kutuuka ilaña majilu anateli kukañesha manji kuhita chiwahi. Chikufumamu ndeki yikujima nawa yikuholoka nakukisika. Munjila yoyimu, muntu nateli kumukalakela Yehova hadi mpinji yayilehi. Ilaña neyi wadivwimba nawa wukweti lwisu, wukujilumuka. (Yish. 16:18) Wukuleka kumukalakela Yehova nawa wukudikisañana yomweni  niakwawu. Hanu dinu tunateli kutondolwela ñahi kwikala adivwimba nilwisu?

8. Tunateli kutondolwela ñahi kudivwimba?

⁸ Tunateli kutondolwela kudivwimba neyi tuzatishaña kufumba kwayifumbiliyi Pawulu aFwilipi. Wayifumbili nindi: “Bayi mukoña chuma hela chimu nantaadi hela nakudivwimba kwamukunkulwayiku, ilaña dizozenuña nakumona akwenu nenu ayibadika enu.” (Fwili. 2:3) Neyi tuyimonaña akwetu netu atubadika, tukudesekejaña wanyi nawakwetu ekala nayawaana niwuswa kubadika etu. Ilaña tukuzañalelaña hamu nawu. Sweje-e neyi anakuzatisha wuswa wawu kumukalakela Yehova. Nawa neyi awa amanakwetu niahela azatishaña kufumba kwaPawulu, akushaña maana hayilwilu yayiwahi yitukweti. Chikufumamu, tukuleta kuwunda nikunuñañana muchipompelu.

9. Tunateli kutondolwela ñahi kutiyila manakwetu hela muhela lwisu?

⁹ Tunateli kutondolwela kutiyila manakwetu hela muhela lwisu neyi twiluka netu kudi yuma yimu yelukawu yitwabula kwiluka etu. Neyi twadizoza hitukutoñojokaña netu tweluka yuma kubadika akwetuku. Ilaña, tukukeñaña kudizila kudi akwetu atubadika. Chakutalilahu, twili netu manakwetu muchipompelu wahanaña chiwahi mpanji yawantu amavulu. Tunateli kumwihula chaloñeshañayi mpanji yindi. Neyi muhela watelekaña chiwahi, tunateli kumwihula chatelekañayi kulonda ninetu tudiziliku. Nawa neyi mukwaKristu wakansi chamukalilaña kukwata amabwambu, nateli kwihula akwawu eluka kukwata amabwambu. Neyi twilaña iyi yuma tukwikala nalwisu wanyi nawa tukufwilaña kudizilaku.

10. Kukalanyi kwamweniyi Gideyona?

¹⁰ Toñojokenu chuma chamumwekeneni Gideyona, wakumuchidi waManase nawamayala akumuchidi waEfweremi. Gideyona niamayala 300 ashindili njita nawukwashu waYehova yateleleli kudisambilawu. Amayala akuEfweremi ayili nakumuwana Gideyona bayi nakumuhamekaku, ilaña nakumubobwesha. Chinamwekani  neyi ahilili muloña kufuma tuhu hatachikiliyi Gideyona kuzuña nawayilumbu jaNzambi, hayitambikiliku. Ashili maana hakulemesha muchidi wawu, ilaña ajimbeli nawu Gideyona walemesheli ijina daYehova nikukiña antu jaNzambi.—Anso. 8:1.

11. Gideyona wayakwili ñahi amayala akuEfweremi?

¹¹ Gideyona wayilili amayala akuEfweremi nindi: “Indi ami chumanyi chineli chakwesekana nanenu?” Nkumininaku wayanukishili Yehova chayikwashiliyi kuzata mudimu weneni. Chafuminimu, awa amayala “nikuzuwa nindi nehi.” (Anso. 8:2, 3) Gideyona wadizozeli kulonda yatwalekihu kwikala mukuwunda nawantu jaNzambi.

12. Chumanyi chitunakudizila kudi aEfweremi naGideyona?

¹² Chumanyi chitunateli kudizila kuniyi nsañu? Kudi aEfweremi, tunakudizilaku netu hitwatela kusha maana hakudilemesha etu aweniku, ilaña twatela kumulemesha Yehova. Nyitu yayisaka niakulumpi, munateli kudizila kuyuma yeliliyi Gideyona. Neyi muntu nahili nayuma yitwelili, twatela kwiluka yuma yinaleteshi yahili. Twatela cheñi kumuhameka muntu hayuma yayiwahi yineliyi. Chakeñekaña kwikala adizoza hakwila twili mwenimu sweje-e neyi owu muntu diyi wunaluwañeshi. Chachiwahi kuleta kuwunda kubadika kumwekesha netu etu tudi chiwahi.

13. Kukalanyi kwamweniyi Hana, nawa wakushindili ñahi?

¹³ Toñojokenu cheñi chuma chamumwekeneni Hana. Wasumbukili kudi kaLevi Elikana, wamukeñeli nankashi. Ilaña Elikana wadiña namumbanda mukwawu wejina daPenina. Elikana wamukeñeli nankashi Hana kubadika Penina. Hela chochu, “Penina wadiñi nawanyanindi ilaña Hana hadiñi nawanyanaku.” Hamuloña wachumichi, Penina wamuvulokeleña Hana “nankashi kulonda kumutiyishaña kutama.” Hana watiyili ñahi? Waneñeli “hakudilaña hohu nikudyaña nawa nehi.” (1 Sam. 1:2, 6, 7) Hela chochu, hosi hashimunawu nawu Hana wakeñeleña kumufuntishila Penina katama. Ilaña wamulejelimu Yehova chatiyileñayi nawa wakuhweleli nindi wukumukwasha. Komana Penina walekeli kumukabisha Hana? Bayibolu hiyashimunaku. Ilaña tweluka netu Hana wekalili cheñi nakuwunda kwamuyitoñojoka. “Nikuneña nawa cheñi kumesu indi nehi.”—1 Sam. 1:10, 18.

14. Yumanyi yitwadizilaña kudi Hana?

¹⁴ Chumanyi chitunateli kudizila kudi Hana? Neyi muntu yeseka nindi yadibechi nanenu, ilukenu nenu yenu mwatela kuzatilahu. Bayi mwiteja kulonda mudibechi nindiku. Chatela mufuntisheña katama nakatama, esekenu kuleta kuwunda nanowu muntu. (Rom. 12:17-21) Neyi nakaani kuhimpa, enu mukutwalekahu kwikala nakuwunda kwamuyitoñojoka.

15. Yumanyi yadifwana yeliliwu Apolosi naPawulu?

 ¹⁵ Nkumininaku, toñojokenu hayuma yitunateli kudizila kudi kambanji Apolosi nikapostolu Pawulu. Awa amayala ejima wawu ayedi adiña eluka Nsona. Ejima wawu adiña aya mpuhu nawa adiña antañishi amawahi. Nawa wejima wawu elishili atumbanji amavulu. Ilaña aditiyilileña ichima wanyi.

16. Munateli kumulumbulula ñahi Apolosi?

¹⁶ Apolosi “wavwalikili kuAlesanderiya,” iluña daya mpuhu, mwatañilileñawu antu. Wadiña weluka kuhosha chiwahi “nawa welukili chikupu Nsona.” (Yilw. 18:24) Apolosi chazatililiyi muchipompelu chaKorinda, amanakwetu amakwawu amwekesheli chikupu nawu amukeñeli nankashi kubadika chakeñeliwu amakwawu, kushilahu tuhu niPawulu. (1 Kor. 1:12, 13) Komana Apolosi wetejeli chilwilu chakuleta chaambu? Inehi. Kafwampi chimwahitili mpinji hanyima yakwila Apolosi nafumi kuKorinda, Pawulu wamulejeli cheñi kufunta kweniku. (1 Kor. 16:12) Pawulu hadi kwila chumichiku neyi welukili nindi Apolosi waleteleña chaambu muchipompelu. Mwamweni, Apolosi wazatishili waana windi chiwahi, kushimwina nsañu yayiwahi nikukolesha amanakwindi. Tuneluki cheñi netu Apolosi wadiña wadizoza. Chakutalilahu, hosi hasonekawu nawu Apolosi wahilili chelili Akwila naPrisila amutambiki “nakumulumbulwila chiwahi mwaya njila yaNzambi.”—Yilw. 18:24-28.

17. Pawulu waleteli ñahi kuwunda?

¹⁷ Kapostolu Pawulu welukili nyidimu yayiwahi yazatiliyi Apolosi. Ilaña Pawulu hadakameneni nindi antu akutoñojokaña nawu Apolosi wamubadika yenaku. Neyi tutaña mazu ayisonekeleliyi Pawulu aKorinda, tukumona  netu Pawulu wadiña wadizoza nawa watoñojokeleleñaku akwawu. Chatela yadihameki namazu ahosheleña antu nawu “Ami nidi muntu waPawulu,” yena wahanini kalemesha kejima kudi Yehova Nzambi niYesu Kristu.—1 Kor. 3:3-6.

18. Kwesekeja na 1 AKorinda 4:6, 7, yumanyi yitwadizilaña kudi Apolosi naPawulu?

¹⁸ Yumanyi yitunateli kudizila kudi Apolosi naPawulu? Tunateli kumuzatila Yehova nañovu nawa tunateli kukwasha antu amavulu kupapatishewa. Ilaña tweluka netu Yehova diyi watukwashaña kwila yuma yejima yitwelaña. Kuchakutalilahu chaApolosi naPawulu twadizilañaku cheñi netu, neyi tukweti cheñi nyidimu yayivulu muchipompelu, tunateli kuzata nañovu kulonda tuleteña kuwunda muchipompelu. Twatiyaña kuwaha neyi amayala atondewa aletaña kuwunda nikunuñañana kuhitila mukuzatisha Izu daNzambi neyi anakufumbana, bayi kushindamena hadi awenawuku, ilaña kulondela chakutalilahu chaKristu Yesu.—Tañenu 1 AKorinda 4:6, 7.

19. Chumanyi chitwatela kwila wejima wetu? (Talenu chikasha chinakwila nawu “ Tondolwelenu Kusañumuna Kudibecha.”)

¹⁹ Wejima wetu tukweti yawaana niwuswa watwinkawu kudi Nzambi. Tunateli kuzatisha iyi yawaana “hakudikalakela wumu namukwawu.” (1 Pet. 4:10) Tunateli kutoñojoka netu mudimu wutwazataña walema wanyi. Ilaña twatela kwanukaña netu nyidimu yejima yitwazataña yakwashaña chipompelu kwikala chanuñañana. Dichi tutwalekihu kuzata nañovu kulonda tubuleña kudimona netu twayibadika akwetu. Nawa tuzateña nañovu kulonda tuleteña kuwunda nikunuñañana muchipompelu.—Efwe. 4:3.