1. Dahaka baine vara diba bema taunimanima haida na e uramu ma haida ida bae kara helulu?

HARI ina negai, momo na sibodia edia namo e lalomu dainai e uramu ma haida ida bae kara helulu. Heḡereḡere bisnes tauna ta na reana be uramu ena bisnes ese ma haida edia bisnes na baine hereaia, una dainai ia na dala idauidau be karamu ma haida edia bisnes baine hadikaia. Eiava spot gadara ta lalonai gadara tauna ta na e uramu baine wini dainai kahana tim ena gadara tauna ta be haberoamu. O stiuden ta na exam ai be koikoimu unu amo baine kwalimu bena iunivesiti bainela. Ita na Kristen tauda dainai, mai dibada kara unu bamona na dia maoro; una na “tau-anina ena kara.” (Gal. 5:19-21) To, kongrigeisin lalonai Iehova ena hesiai taudia haida na asie lalopararamu idia na ma haida ida e kara helulumu. Una baita laloa na mai anina bada, badina kara helulu karana ese kongrigeisin ena lalotamona karana baine hadikaia diba.

2. Ina atikol ai dahaka baita herevalaimu?

² Ina atikol ai, baita itaiamu ita be ededia kara haida baita dadarai unu amo tadikakada ida basita kara helulu. Danu, Baibul negadiai e nohova abidadama tatau bona hahine haida edia sivarai baita herevalaimu, idia ese kara helulu karana na e dadaraia. To, namona na eda kara baita haero namonamo daladia aita herevalai guna.

3. Siboda ese ededia henanadai baita heni na namo?

³ Dina ta ta ai, eda kara badidia baita haero namonamo na namo. Reana siboda baita henanadai: ‘Haida ida sibogu na haheḡereḡeremu neganai, lau be na lalomu lau ese idia  na hereadia, a? Kongrigeisin ai lau be na ḡaukara goadamu badina na uramu ma haida baina hereadia, a? Eiava na ḡaukara goadamu badina na uramu Iehova baina hamoalea?’ Dahaka dainai unu henanadai baita heni na namo? Mani Dirava ena Hereva aita laloa.

4. Galatia 6:3, 4 heḡereḡerena, dahaka dainai ma haida ida basita haheḡereḡere na namo?

⁴ Baibul na e gwaumu ma haida ida siboda basita haheḡereḡere. (Galatia 6:3, 4 ba duahi.) Dahaka dainai? Badi ta na ina, bema baita laloamu ta karamu ḡaukaradia ese tadikakada edia na e hereaia, ita na baita hekokorokumu. To, danu bema baita lalomu tadikakada e karamu ḡaukaradia ese ita eda na e hereadia, baita lalomanokamu. Unu na dia lalohadai maorodia. (Roma 12:3) Greece ai e nohomu taihu ta ladana Katerina, * na ini e gwau toma: “Lau na sibogu ma haida ida na heḡereḡereva neganai, na itaiava idia ese haroro ḡaukara na e karaia namonamova, bona taunimanima idauidau e hetura henidiava, una dainai na laloava egu ḡaukara na asi anina.” Namona na baita helalotao Iehova ese ita e verida mai badina na dia ita na mai hairaida, o hereva daladia mai dibada namonamo, eiava momo ese e ura henidamu dainai, lasi, to ita na mai eda ura ida Iehova ta lalokau heniamu bona ia Natuna ta kamonai heniamu.​—Ioa. 6:44; 1 Kor. 1:26-31.

5. Tadikaka Hyun ena ekspiriens amo dahaka ome diba?

⁵ Baita heni henanadaina ma ta na ina, ‘Tadikaka ese lau e itagumu lau be herohemaino taugu eiava heiriheiri na havaraiamu?’ South Korea ai e nohomu tadikakana ta ladana Hyun, ena ekspiriens mani aita laloa. Nega ta, ia na e laloava kongrigeisin ai maduna e abi taudia haida na e urava ia bae hereaia. Ia na e gwa: “Unu tadikaka na badu henidiava, bona nega momo e gwauraiva ḡaudia na asina abi daeva.” Bena dahaka e vara? Hyun na e gwa: “Egu kara ese kongrigeisin ena lalotamona karana e hadikaia.” Hyun na turana ese e durua ena kerere e lalopararalaia. Bena ena kara e haidau bona hari ia na elda namona ta. Bema ta mamiamu ita na ma haida ida ta kara helulumu to dia maino ta havaraiamu, eda kara baita haidaua haraḡa na namo.

6. Galatia 5:26 ena hereva heḡereḡerena, ededia kara daidiai ma haida ida baita kara helulumu?

⁶ Galatia 5:26 ba duahia. Ededia kara daidiai ma haida ida baita kara helulu dibamu? Hekokoroku karana. Hekokoroku tauna na e heaḡimu bona sibona ena namo e lalomu. Ma ta be, mama karana. Mama tauna na dia ta ena ḡau mo be ura henimu to be uramu unu ḡau baine abidia danu. Momokani, mama tauna ese ma ta e inai heniamu. Ita na ta uramu kara unu bamodia na baita dadarai!

7. Hekokoroku bona mama edia dika be ede bo haheitalaia tomamu?

⁷ Hekokoroku bona mama na plein ena fiul lalonai e vareai momoru ida baita haheḡereḡereamu. Plein na baine roho diba, to momoru ese fiul ena pipe bae koudia neganai, engine na basine goadamu bona plein na be crash dibamu. Una heḡereḡerena, reana ta na Iehova be hesiai heniamu, to bema be hekokorokumu eiava be mamamu, ia na be morumu. (Her. 16:18) Iehova ihesiai henina karana be hadokoamu bona ia sibona bona ma haida na dika be davarimu. To, dahaka baita kara hekokoroku bona mama karadia baita dadarai?

8. Edena dalai hekokoroku karana baita dadaraia?

 ⁸ Hekokoroku karana na baita dadaraia dibamu bema aposetolo Paulo ese Filipi taudia e sisiba henidia herevana baita badinaiamu, eto: “Ḡau ta basio karaia heiri-heiri dainai eiava hekokoruku dainai; a ta ta sibomui ba hahemanau, bamomui ba imodaidia.” (Fili. 2:3) Bema baita laloamu haida ese ita na e hereada, ḡau momo ikaradiai mai edia diba taudia ida na basita kara helulumu, to idia daidiai baita moalemu. Badina Iehova ihesiai heninai edia diba e ḡaukaralaiamu Ia bae hanamoa. Bona bema tadikaka bona taihu ese Paulo ena sisiba be badinaiamu, idia ese eda kara namodia na be lalo badamu. Unu amo kongrigeisin lalonai ita iboudai na maino bona lalotamonai baita nohomu.

9. Edena dalai mama karana baita dadaraia?

⁹ Mama karana na baita dadaraia dibamu bema baita lalopararamu ita siboda na dia heḡereḡere ḡau haida baita kara. Bema baita manaumu, basita uramu baita hahedinaraia ita ese haida na ta hereadia. To namona na mai edia ekspiriens taudia amo diba baita abi. Heḡereḡere, bema tadikaka ta na kongrigeisin ai pablik tok namodia e henimu, reana baita nanadaia ena tok be ede e heḡaeḡaelai tomamu. Bema taihu ta na mai nanadu dibana, reana baita noia baine duruda unu amo nanadu dalana baita diba namonamo. Bona bema Kristen eregabena ta enai na auka ma haida baine hetura henidia, reana taunimanima idauidau ihetura henidia karana e manadalaia tauna ena heduru baine noia. Unu baita kara tomamu neganai, mama karana baita dadaraiamu bona eda diba baita habadaiamu.

10. Gideon be dahaka hekwakwanai e davari?

¹⁰ Manase iduhuna amo ema tauna Gideon bona Efraim iduhuna tataudia padadiai e vara ḡauna mani aita laloa. Iehova ena heduru amo Gideon bona ena tatau 300 na tuari ai e kwalimu, una dainai idia na bema hekokoroku diba. Efraim tatau na Gideon e hedavari henia neganai, dia ia e  hanamoa to e gwau henia dikadika. Idia na e badu badina Gideon ese na se boiridia ia ida Dirava inaina bae tuari henidia. Idia e laloa bada ḡauna na, taunimanima ese edia iduhu bae matauraia, to e laloaboio ḡauna binai, Gideon na Iehova ladana e hanamoa bona ena taunimanima e gimadia.​—Hah. 8:1.

11. Gideon ese Efraim tatau be dahaka e hamaorolaidia?

¹¹ Gideon na mai manauna ida Efraim tatau e haere henidia, eto: “Lauegu kara na oiemu kara ida ede baita haheḡereḡeredia toma?” Bena e hadibadia Iehova ese idia be ede e durudia toma. Unu tatau ese una hereva e kamonai neganai, edia ‘badu na e doko.’ (Hah. 8:2, 3) Gideon na mai ena ura ida e manau, unu amo Dirava ena taunimanima bogaraḡidiai maino baine vara.

12. Efraim tatau bona Gideon edia haheitalai amo dahaka ta dibamu?

¹² Ina sivarai amo dahaka ta dibamu? Efraim tatau edia haheitalai amo tame diba taunimanima ese bae hanamoda karana na basita laloa bada, to Iehova baita hanamoa karana hari baita laloa bada. Ita na ruma bese kwaradia bona elda taudia dainai Gideon amo ḡau ta baita dibaiamu. Bema ta na ta karaia ḡauna ta dainai e lalohisihisimu, namona na ena lalohisihisi badina baita lalopararalaia. Bona ena ḡaukara namona ta dainai baita hanamoa. Namona na mai manauda ida unu baita kara toma, ena be ia na e kerere. Eda hetura karana namona tadikakada ida na mai anina bada.

13. Hana be dahaka hekwakwanai e davari, bona edena dala ai e hanaia?

¹³ Hana ena haheitalai danu mani aita laloa. Ia na Levi tauna ta ladana Elkana e adavaia, Elkana ese e lalokau henia badava. To, Elkana na e hodara, adavana ma ta ladana na Penina. Elkana ese Hana na e lalokau henia badava, a Penina be e lalokau henia maraḡiva; to, ‘Penina na mai natuna haida, a Hana be gabani.’ Una dainai Penina ese Hana e ‘ha-uraiava bona lalona e hahisiava.’ Hana ena hemami be ede bamona? Ia na e lalohisihisi bada herea! ‘E taitaiva, bona se anianiva.’ (1 Sam. 1:2, 6, 7) To, Baibul na se gwa Hana ese dala haida ai Penina ena kara davana e haloua. To, ena hemami na Iehova enai e gwauraia hedinarai bona e abidadama Ia ese baine durua. Penina ese ena kara e haidaua, eiava? Baibul ese una na se herevalaia. To, ta dibamu Hana na e lalomaino. Bona “vairana danu se huaia lou.”​—1 Sam. 1:10, 18.

14. Hana ena haheitalai amo dahaka ta dibamu?

¹⁴ Hana ena haheitalai amo dahaka ta dibamu? Bema ta na dala haida ai e uramu oi ida ba kara helulu, oi ese una kara na ba dadaraia diba. Dia namo una kara dainai oi danu ba kara helulu, eiava ena dika davana  ba haloua. To ba hekwarahi ia ida maino ba karaia. (Roma 12:17-21) Ena be basine uramu ba maino, to oi na bo moalemu badina oi na o hekwarahi ia ida maino o karaia.

15. Edena dalai Apolo bona Paulo edia kara na heḡereḡere?

¹⁵ Mani hahediba tauna Apolo bona aposetolo Paulo edia haheitalai amo baita dibamu ḡaudia aita lalo. Idia raruosi ese Buka Helaḡa na e dibaia namonamo. Taunimanima momo na mai dibadia idia bona idia na e hahediba namonamova taudia. Danu idia raruosi ese momo e durudia hahediba taudia ai ela. To, unu tatau raruosi na asie hemama heheniva.

16. Apolo ena kara be edena bamona?

¹⁶ Apolo na “Alesandria tauna,” bona una negai momo na skuli totona iena hanua e laova. Ia na hereva igwauraina mai dibana namonamo bona “Buka Helaḡa dibana herea.” (Apos. 18:24) Apolo na Korinto ai e nohova neganai, kongrigeisin ai tadikaka ese ia na e ura henia badava, to Paulo bona tadikaka ma haida be e ura henidia maraḡiva. (1 Kor. 1:12, 13) Apolo ese una kara be e abia dae? Ita na asi dibada namonamo. Apolo na Korinto e rakatania bena nega taina e daudau murinai, Paulo ese e noia ma baine lou lao. (1 Kor. 16:12) Paulo ese ia na basinema noia bema ia na bema diba Apolo ese kongrigeisin na e hapararaiava. E hahedinaraia ḡoevaḡoeva, Apolo ese ena diba na dala namona ai e ḡaukaralaiava​—sivarai namona e harorolaiava bona tadikaka e hagoadadiava. Bona ta dibamu Apolo na manau tauna. Heḡereḡere, Baibul na se gwa Priskila bona Akula ese “Dirava ena dala e hadibalaia maoromaoro” neganai, ia na e badu.​—Apos. 18:24-28.

17. Paulo be edena dalai maino e havaraia?

 ¹⁷ Aposetolo Paulo na mai dibana Apolo na ḡaukara namodia e karava. Ena be taunimanima bae laloa Apolo ese Paulo na e hereaia, to Paulo ese una na se lalohekwarahilaia. Paulo ese Korinto taudia e tore henidia herevana baita duahiamu neganai, baita itaiamu Paulo na e manau bona e lalomaoromaoro. Taunimanima e gwauva, “lau na Paulo ena” neganai, ia na se moale. To heimodai iboudiai na Iehova Dirava bona Iesu Keriso e henidia.​—1 Kor. 3:3-6.

18. Korinto Ginigunana 4:6, 7 ena hereva heḡereḡerena, Apolo bona Paulo edia haheitalai amo dahaka ta dibamu?

¹⁸ Apolo bona Paulo edia haheitalai amo dahaka ta dibamu? Namona na Iehova dainai baita ḡaukara goada, bona momo baita durudia bae bapatiso. To, unu ta kara tomamu badina ta lalopararamu ita na Iehova ese e durudamu. Apolo bona Paulo edia haheitalai amo tame dibaia ḡauna ta na ina, kongrigeisin ai maduna momo ta huamu neganai, baita hekwarahi maino baita havaraia. Ta moalemu badina elda bona hesiai taudia ese Baibul ena sisiba amo e durudamu maino bona lalotamona ai baita noho, idia na se uramu ladadia bae abi isi to kongrigeisin ibounai e duruamu Keriso Iesu bae badinaia!​—1 Korinto 4:6, 7 ba duahi.

19. Ita ta ta be dahaka baita kara? (“ Kara Helulu Karana Baita Dadaraia” ena maua ba itaia.)

¹⁹ Dirava ese ita ta ta na diba e henida. Namona na una diba baita ḡaukaralaia ta ta isiaidia baita lao heni. (1 Pet. 4:10) Reana baita laloamu ta karaiamu ḡaukarana na dia ḡau badana. To, ina ba laloatao, varo maraḡidia momo amo dabua namona ta ba turia hebou diba, una heḡereḡerena emu kara namodia momo amo kongrigeisin ai lalotamona ba havaraia diba. Namona na baita hekwarahi kara helulu karana baita dadaraia. Bona laloda baita hadai kongrigeisin ai maino bona lalotamona baita havaraia.​—Efe. 4:3.